Presidenti i Serbisë Aleksander Vuçiç ka biseduar me ambasadoren e Maqedonisë Vera Jovanovska-Tipko për takimet e ardhshme të zyrtarëve të të vendeve

BEOGRAD – Presidenti i Serbisë, Aleksander Vuçiç, informoi sot ambasadoren e Maqedonisë Vera Jovanovska – Tipko se kryeministrja e Serbisë, Ana Brnabiç, do t’i dërgojë ftesë kryeministrit të Maqedonisë, Zoran Zaev, për mbajtjen e seancës së përbashkët të dy qeverive deri në fund të vitit në Beograd.

Vuçiç dhe ambasadorja Jovanovska – Tipko diskutuan edhe rreth mbajtjes së shpejti të Komitetit të Përbashkët për Bashkëpunim Ekonomik.

“Të gjithë konsiderojmë se duhettë punojmë me përkushtim dhe me përgjegjësi drejt përmirësimit të marrëdhënieve tona”, ka thënë Vuçiç, sipas një deklarate nga zyra e Presidencës së Serbisë.

Vuçiç dhe Tipko u pajtuan që pas vendosjes të këshilltarit për sigurinë kombëtare të Serbisë, të mbahet takim i përbashkët me homologun maqedonas.

Ata folën edhe për përmirësimin e bashkëpunimit, veçanërisht në fushën e turizmit, ekonomisë dhe pjesëmarrjen e përbashkët në tregjet e treta.

Serbia të dielën tërhoqi stafin nga ambasada e saj në Shkup për konsultime urgjente në Beograd. Ambasadorja e Serbisë pritet të kthehen në Maqedoni deri më 31 gusht. aa