Trumpi të mërkurën nënshkroi një dekret me të cilin aprovohet ndërtimi i murit në kufirin e SHBA-ve dhe Meksikës. “Këtë e kemi thënë që nga fillimi”, tha ai teksa nënshkroi dekretin

NEW YORK – Zëdhënësi i Shtëpisë së Bardhë, Sean Spicer, deklaroi të enjten se presidenti amerikan Donald Trump ka një plan të ri për financimin e murit në kufi me Meksikën.

Presidenti i Meksikës, Enrique Peno Nieto tha se vendi i tij nuk do të paguajë për ndërtimin e murit në kufi me SHBA-të, për çka Trumpi u kundërpërgjigj me idenë për të aplikuar një tatim prej 20 për qind për importet nga Meksika në kuadër të reformave tatimore.

Spicer u tha gazetarëve se reforma gjithëpërfshirëse në të cilën Trumpi planifikon të përfshijë tatimet nga importi, përfshin edhe ato nga Meksika.

“Në këtë mënyrë, në nivel vjetor do të mund të tubojmë 10 miliardë dollarë me të cilat me lehtësi do të mund të paguajmë murin vetëm përmes këtij mekanizmi. Kjo vërtetë do të sigurojë mjetet e duhura”, tha Spicer.

Në bazë të të dhënave zyrtare, në vitin 2015 Meksika ka eksportuar në SHBA mall në vlerë prej 316.4 miliardë dollarë.

Deficiti tregtar është vlerësuar në 50 miliardë dollarë. Zbatimi i tatimit më të lartë do të mund të shkaktojë rritjen e çmimeve të prodhimeve meksikane, ndërkohë që zëdhënësi i Shtëpisë së Bardhë shmangu pyetjet për ndikimin e tatimit të paralajmëruar mbi konsumatorët amerikanë.

Meksika reagon për planin e Trumpit rreth financimit të murit

Ministri meksikan i Punëve të Jashtme, Luis Videgaray, në një deklaratë theksoi se tatimi në fjalë do të shkaktojë që prodhimet e importuara nga Meksika do të arrijnë me çmime më të shtrenjta tek konsumatorët amerikanë dhe kjo do të rezultojë që të jenë dakord për të paguar murin.

“Aplikimi i tatimit në prodhimet tona, nuk e siguron pagesën për murin, por kjo sjell që konsumatorët të Amerikës Veriore ta paguajnë me shitjen e avokados, lavatriçes, televizorit me çmime të shtrenjta”, tha Videgaray, duke njoftuar se çështja që meksikanët ta paguajnë murin nuk mund të negociohet.

Kujtojmë se Trumpi të mërkurën nënshkroi një dekret me të cilin aprovohet ndërtimi i murit në kufirin e SHBA-ve dhe Meksikës. “Këtë e kemi thënë që nga fillimi”, tha ai teksa nënshkroi dekretin.

Ndërkohë, shefi i stafit të Trumpit, Reince Preibus, kishte treguar se plani është një ndër disa alternativat për të cilët janë duke punuar.

Pasi Trumpi kishte nënshkruar dekretin e nevojshëm për zbatimin e projektit për ndërtimin e murit në kufirin me Meksikën, kishin filluar diskutime rreth asaj se kush do të paguaj murin i cili mund të kushtoj 25 miliardë dollarë.

Presidenti i Meksikës, Enrique Pena Nieto kishte theksuar se nuk do ti paguajnë shpenzimet e murit, ndërsa Trump kishte njoftuar se mund ta anulojë takimin e tij me Pena Nieto në fund të muajit. Pas kësaj Pena Nieto njoftoi për anulimin e vizitës në SHBA. aa