I zgjedhuri nga Donald Trumpi për postin e të dërguarit për Ukrainën dhe Rusinë, tha se presidenti i zgjedhur amerikan do të ketë parasysh interesat e Kievit kur ai të nisë punën për arritjen e një marrëveshjeje për dhënien fund të luftës dhe do të synojë që zgjidhja të jetë e drejtë.

“Njerëzit kanë nevojë ta kuptojë se ai nuk po tenton t’i japë diçka [presidentit rus, Vladimir] Putin apo rusëve”, tha Keith Kellogg, gjenerallejtënant në pension, të cilin Trumpi e ka zgjedhur në postin e të dërguarit të tij për Ukrainën dhe Rusinë dhe e ka ngarkuar me udhëheqjen e negociatave për t’i dhënë fund luftës.

“Ai po tenton të shpëtojë Ukrainën dhe të shpëtojë sovranitetin e saj”, tha Kellogg gjatë një interviste për Fox News më 8 janar. “Ai do të sigurohet që të jetë i drejtë dhe këtë e ka thënë vazhdimisht”, përfshirë edhe presidentit ukrainas, Volodymyr Zelensky.

Trump gjatë fushatës presidenciale vitin e kaluar tha se ai do t’i jepte fund konfliktit në Ukrainë brenda 24 orësh pasi të merrte detyrën e presidentit. Tani ai shpreson që t’u japë fund luftimeve brenda gjashtë muajve.

“Shpresoj që të ndodhë para se të kalojnë gjashtë muaj”, tha Trump gjatë një konference për media më 7 janar kur u pyet nëse do të mund të zgjidhte konfliktin për gjysmë viti.

Kellogg tha se ai preferon një periudhë më të shkurtër kohore, në një periudhë prej 100 ditësh nga inaugurimi i Trumpit si presidenti më 20 janar. Sipas emisarit, ai dhe Trumpi dëshirojnë që t’i japin fund luftës sa më shpejt të jetë e mundur.

Kellogg nuk pranoi të zbulonte përmbajtjen e ndonjë nga bisedat e tij me Trumpin mbi luftën, duke thënë se Trump “flet vetë” dhe më shumë informacione për këtë temë do të bëhen publike pas inaugurimit.

Ai la të kuptohet se po punohet që Trump dhe Putin të bisedojnë.

“Ne do të vendosim kushtet… dhe ai më pas do të jetë në pozitë që të bisedojë me Putinin dhe po ashtu me presidentin Zelensky dhe mendoj se do të arrijmë deri te një zgjidhje në një periudhë të shkurtër kohore”, tha Kellogg.

Megjithatë, ai nuk u pyet lidhur me shtyrjen e një vizite që ai pritej të zhvillonte gjatë këtij muaji në Kiev dhe në kryeqytete të tjera evropiane. Ministri i Jashtëm ukrainas, Andriy Sybiha, njoftoi më 7 janar se kjo vizitë do të riplanifikohet.

Gjatë intervistës, Kellogg kritikoi presidentin amerikan, Joe Biden, për moskomunikim me Putinin, duke thënë se kanë kaluar më shumë se dy vjet që kur ata kanë biseduar. Trump, në anën tjetër, flet si me kundërshtarët ashtu edhe me aleatët, tha ai.

“Ai e di se duhet të flitet me njerëz për të arritur te një zgjidhje përfundimtare dhe kjo është ajo çfarë ne do të bëjmë”, tha Kellogg.REL

Presidenti i zgjedhur Donald Trump nuk përjashtoi përdorimin e forcës ushtarake për të marrë nën kontroll Kanalin e Panamasë dhe Groenlandën, gjatë një konference shtypi të martën, duke thënë se kontrolli amerikan i dyjave është jetik për sigurinë kombëtare të Shteteve të Bashkuara.

Në një konferencë me gazetarë vetëm dy javë para se të marrë mandatin e ri më 20 janar, zoti Trump la të hapur mundësinë që të përdorë ushtrinë amerikane për të siguruar kontrollin ndaj këtyre dy territoreve.

“Nuk mund të zotohem”, tha ai, i pyetur nëse do të përjashtonte përdorimin e ushtrisë. “Ndodh që do të duhet të bëjmë diçka. Kanali i Panamasë ka rëndësi jetike për vendin tonë”.

Më pas ai shtoi se “Groenlanda na duhet për qëllime të sigurisë kombëtare”. Groenlanda është territor autonom i Danimarkës, një aleat tradicional i Shteteve të Bashkuara dhe njëra prej shteteve themeluese të NATO-s.

Zoti Trump po ashtu foli edhe për mundësinë që Kanadaja t’i bashkohej Shteteve të Bashkuara. Ai tha se për një gjë të tillë ai nuk do të mbështetej tek forca ushtarake, por në “forcën ekonomike”.

Ndërkohë, djali i madh i Presidentit të zgjedhur amerikan, Donald Trump po viziton Groenlandën të martën në kuadër të një vizite private, duke nxitur spekulime se administrata e re e Shteteve të Bashkuara do të synojë që ta marrë nën kontroll territorin danez, të pasur me minerale.

Transmetuesi shtetëror danez njoftoi se avioni i Donald Trump Jr. arriti në Nuuk, kryeqyteti i territorit të madh dhe të akullt, që ka 57 mijë banorë. Mediat vendase transmetuan pamje të tij duke ecur në pistën e mbuluar me borë.

Qeveria e Groenlandës tha përmes një deklarate se zoti Trump Jr. Ndodhet atje në “një vizitë private” dhe se nuk bëhet fjalë për vizitë zyrtare, duke njoftuar se përfaqësuesit e Groenlandës nuk do të takohen me të. Groenlanda është një territor autonom që është pjesë e Danimarkës.

Sekretari i Përhershme në Departamentin e Punëve të Jashtme të Groenlandës, Mininguaq Kleist i tha agjencisë së lajmeve Associated Press se autoritetet ishin njoftuar se zoti Trump Jr do të qëndronte atje për katër ose pesë orë.

As delegacioni i zotit Trump Jr. e as zyrtarët qeveritarë të Groenlandës nuk kërkuan takim, sipas zotit Kleist.

Por pavarësisht kësaj, vizita ka ngjyrim politik.

Territori në Arktik, është zonë e një rëndësie strategjike për Shtetet e Bashkuara, Kinën, Rusinë dhe të tjerët.

Ishulli më i madh i botës, Groenlanda shtrihet ndërmjet oqeanit Atlantik dhe atij Arktik dhe 80 për qind e territorit të saj është e mbuluar me shtresë akulli. Aty gjendet një bazë e madhe ushtarake amerikane.

“Po dëgjoj që popullsia e Groenlandës janë ‘MAGA’ (inicialet e sloganit ‘Ta bëjmë Amerikën përsëri të madhërishme’. Djali im, Don Jr dhe përfaqësues të ndryshëm do të shkojnë atje për të vizituar disa nga pjesët më të mrekullueshme” Presidenti i zgjedhur Trump shkroi në një postim në platformën e tij sociale të hënën mbrëma.

“Groenlanda është një vend i mahnitshëm dhe banorët do të përfitojnë shumë nëse dhe kur të bëhet pjesë e shtetit tonë”, shkroi zoti Trump. “Do ta mbrojmë dhe do ta ruajmë nga një botë e rrezikshme. TA BËJMË GROENLANDËN SËRISH TË MADHËRISHME!”

Kryeministri i Groenlandës Mute Egede ka bërë thirrje për pavarësi nga Danimarka, duke theksuar në fjalimin e tij të Vitit të Ri se pavarësia do të ishte një mënyrë për t’u çliruar nga e kaluara koloniale. Por Kryeministri Egede po ashtu tha se ai nuk është i interesuar që Groenlanda të bëhet pjesë e Shteteve të Bashkuara, duke këmbëngulur që ishulli nuk është në shitje.

Kryeministri danez Mette Frederiksen tha të martën se e ardhmja e Groenlandës do të vendoset nga Groenlanda dhe i quajti Shtetet e Bashkuara aleatin më të rëndësishëm të Danimarkës.

Mbreti i Danimarkës Frederik X po rithekson të drejtat e shtetit të tij ndaj Groenlandës dhe Ishujve Faroe, një arkipelag që vetëqeveriset ndërmjet Islandës dhe Norvegjisë në pjesën veriore të Oqeanit Atlantik.

Muajin e kaluar, mbreti ndryshoi stemën e Danimarkës për të përfshirë pjesët që përfaqësojnë Groenlandën dhe Ishujt Faroe. Groenlanda përfaqësohet nga një ari i argjendtë me gjuhë të kuqe. Shpallja mbretërore theksoi se që nga viti 1194, stema mbretërore “ka simbolizuar legjitimitetin dhe sovranitetin e shtetit dhe të monarkut”.

“Të gjithë jemi të bashkuar dhe secili prej nesh është i përkushtuar ndaj Mbretërisë së Danimarkës …. deri në Groenlandë”, tha mbreti në fjalimin e tij të Vitit të Ri.

Gjatë mandatit të tij të parë, Presidenti i zgjedhur amerikan e kishte përmendur blerjen e Groenlandës, e cila fitoi të drejtën për vetëqeverisje nga Danimarka në vitin 1979. Zoti Trump anuloi një vizitë të planifikuar në Danimarkë në gusht të vitit 2019 pasi kryeministri danez e hodhi poshtë këtë ide.

Zoti Trump e ringjalli këtë temë muajin e kaluar kur njoftoi për emërimin e ambasadorit të SHBA-ve në Danimarkë, duke shkruar: “për shkaqe të sigurisë kombëtare dhe lirisë në tërë botën, Shtetet e Bashkuara të Amerikës ndihen që pronësia dhe kontrolli i Groenlandës është një domosdoshmëri absolute”.

Djali i tij i madh, Don Jr, është figurë e rëndësishme në lëvizjen politike të babait të tij dhe është pjesë e ekipit të tranzicionit të presidentit, që përzgjedh pjesëtarët e administratës së ardhshme në Shtëpinë e Bardhë.

Presidentit të zgjedhur Donald Trump iu hodh poshtë të hënën kërkesa për të shtyrë për një kohë të pacaktuar shpalljen e dënimit për çështjen e gjyqësore për pagesat e bëra në këmbim të heshtjes së një gruaje përpara zgjedhjeve të vitit 2016, që ishte planifikuar këtë javë.

Ekipi i tij i avokatëve kishte kërkuar që dënimi të mos jepej ndërsa ai apelon një vendim që mbajti në fuqi në një vendim të mëparshëm që duket se do ta bëjë atë presidentin e parë që merr detyrën ndërsa është gjendur fajtor për një vepër penale.

Gjykatësi i Manhatanit Juan M. Merchan, urdhëroi që shpallja e dënimit të bëhet të premten siç ishte planifikuar, duke hedhur poshtë argumentet e avokatëve të zotit Trump, të cilët kishin kërkuar një pauzë ndërsa i drejtohen një gjykate të apelit shtetëror në përpjekje për të anuluar vendimin për ta mbajtur në fuqi atë të mëparshmin.

Zoti Trump gjithsesu mund t’i kërkojë gjykatës së apelit të ndërhyjë dhe të urdhërojë një ndalim ose pauzë. Përndryshe, ai do të marrë dënimin pak më shumë se një javë para se të inaugurohet për një mandat të dytë.

Avokatët e zotit Trump i kanë thënë gjykatësit Merchan se nëse seanca mbahet, ai do të shfaqet me video dhe jo personalisht. Gjykatësi e kishte lejuar këtë opsion në dritën e e procesit të tranzicionit presidencial.

Gjykatësi Merchan rrëzoi kërkesën e Presidentit të zgjedhur Trump për ta anuluar vendimin e 30 majit, për shkak të rikthimit të tij të afërt në Shtëpinë e Bardhë. Avokatët e zotit Trump thanë se do të apelojnë gjithashtu një vendim paraprak në të cilin gjykatësi refuzoi të pushonte çështjen për arsye të imunitetit presidencial.

Në vendimin e tij javën e kaluar, gjykatësi sinjalizoi se nuk ka gjasa të japë ndonjë ndëshkim për presidentin e zgjedhur republikan, pas vendimit të paprecedent të fajësisë për 34 akuza penale në lidhje me falsfikimin e të dhënave të biznesit.

Presidenti i zgjedhur Trump ka thënë se “do të ishte fundi i Presidencës siç e njohim”, nëse vendimi lejohet të qëndrojë.

Avokatët e tij argumentuan të hënën se apelimi i tyre në Divizionin e Apelit të gjykatës gjyqësore të shtetit Nju Jork duhet të shkaktojë atë që njihet si një ndalim automatik, ose pauzë të procedurave. Nëse kjo nuk ndodh, thanë ata, vetë gjykatësi Merchan duhet të veprojë dhe ta ndalë dënimin e së premtes.

“Sot, ekipi ligjor i Presidentit Trump ndërmori hapa për të ndaluar dënimin e paligjshëm në Gjuetinë e Shtrigave të prokurorisë së Manhattanit”, tha zëdhënësi i Presidentit të zgjedhur Trump, Steven Cheung më herët. “Vendimi historik i Gjykatës së Lartë mbi imunitetin, kushtetuta shtetërore e Nju Jorkut dhe precedenti i vendosur ligjor kërkojnë që kjo sajesë e pavlerë të hidhet poshtë menjëherë”.

Një mesazh ku kërkohej koment u la për zyrën e prokurorit të qarkut të Manhatanit, i cili drejtoi çështjen hetimore.

Ndërsa zoti Trump pohoi se imuniteti presidencial dhe mandati i tij i dytë i afërt kërkonin anulimin e vendimit, gjykatësi Merchan shkruajti në vendimin e tij të 3 janarit se vetëm “përfundimi i kësaj çështjeje” duke e dënuar zotin Trump, do t’i shërbente interesave të drejtësisë.

Gjykatësi shkruajti se dënimi i Presidentit të zgjedhur Trump me atë që njihet si një “shkarkim i pakushtëzuar” – pra mbyllja e çështjes pa burg, gjobë, apo ndonjë kusht – “duket të jetë zgjidhja më e zbatueshme”.

Akuzat ndaj zotit Trump përfshinin një skemë për të fshehur pagesën për të siguruar heshtjen e aktores pornografike Stormy Daniels, në javët e fundit të fushatës së zotit Trump në vitin 2016, për të shmangur publikimin e pretendimeve se kishte patur marrëdhënie seksuale me të vite më parë. Ai thotë se historia e saj është e rreme dhe se nuk ka bërë asnjë shkelje.

Çështja u përqëndrua në mënyrën se si zoti Trump regjistroi rimbursimin e avokatit të tij personal të atëhershëm Michael Cohen, i cili pati bërë pagesën për zonjën Daniels. Gjetja fajtor krijoi mundësinë e dënimit që varionte që nga një gjobë, një dënim me kusht, apo deri në katër vite burg.

Zoti Cohen, një dëshmitar kyç i prokurorisë, i cili më parë kishte bërë thirrje që zoti Trump të futej në burg, tha se “bazuar në të gjitha rrethanat ndërhyrëse” vendimi i gjykatësit Merchan për ta dënuar zotin Trump pa ndonjë ndëshkim “është i arsyeshëm dhe i përshtatshëm”.

Dënimi i Presidentit të zgjedhur Trump fillimisht u caktua për 11 korrikun e kaluar dhe më pas u shty dy herë me kërkesë të mbrojtjes. Pas zgjedhjes së zotit Trump më 5 nëntor, gjykatësi Merchan e shtyu sërish dënimin në mënyrë që mbrojtja dhe prokuroria të mund të jepnin mendimin e tyre mbi të ardhmen e çështjes.

UASHINGTON – Kongresi amerikan zyrtarisht certifikoi fitoren elektorale të Presidentit të zgjedhur republikan Donald Trump në zgjedhjet e nëntorit, duke i hapur rrugë betimit të tij më 20 janar.

Certifikimi i rezultatit zgjedhor të hënën në 50 shtetet dhe në Distriktin e Kolumbisë u përcoll me një ceremoni të shkurtër zyrtare gjatë një seance të përbashkët të Dhomës së Përfaqësuesve dhe Senatit. Kjo seancë u udhëhoq nga Nënpresidentja Kamala Harris, rivalja demokrate e zotit Trump në zgjedhjet presidenciale, e cila u paraqit në rolin e drejtueses së Senatit.

Ky ritual, që bëhet çdo katër vjet, dalloi nga ngjarjet e para katër viteve kur një turmë përkrahësish të zotit Trump hynë me forcë në Kapitol, duke bërë një përpjekje të dështuar për ta bllokuar certifikimin e humbjes së vitit 2020 të Presidentit të atëhershëm Trump ndaj Presidentit demokrat Joe Biden.

Seanca e përbashkët e Kongresit u mbajt megjithë stuhinë e borës e cila përfshiu kryeqytetin amerikan, me reshje dëbore që arritën deri në 15 centimetra dhe që penguan qarkullimin e automjeteve.

Certifikimi përfundimtar vulosi rezultatet paraprake se zoti Trump fitoi 312 votat e Kolegjit Zgjedhor krahasuar me 226 votat e zonjës Harris.

Republikanët do të kontrollojnë Shtëpinë e Bardhë dhe Kongresin

Republikanët po ashtu fituan shumicën e vendeve në Senatin amerikan dhe një shumicë të ngushtë në Dhomën e Përfaqësuesve në zgjedhjet e nëntorit, fitore që do t’i japin zotit Trump përkrahjen e partisë, e cila i nevojitet për të zbatuar planin e tij për shkurtim të taksave dhe dëbim të emigrantëve të jashtëligjshëm.

Demokratët nuk u përpoqën që të bllokojnë certifikimin e fitores së zotit Trump të hënën.

“Na duhet të angazhohemi sërish që të mbrojmë demokracinë amerikane”, tha nënkryetarja e ligjvënësve demokratë në Dhomën e Përfaqësuesve, Katherine Clark. “Si përfaqësues të zgjedhur, ne duhet t’i jemi besnik, në radhë të parë dhe gjithnjë ndaj Kushtetutës. Jemi këtu për të respektuar vullnetin e popullit dhe sundimin e ligjit”.

Masat e sigurisë brenda dhe jashtë Kapitolit u përforcuan në prag të certifikimit dhe pritet që ato të mbesin të tilla deri në ceremoninë e betimit të zotit Trump.

Perimetri rreth Kapitolit u rrethua me barrikada metalike dhe hyrjet në pika të caktuara ruheshin nga policët me uniformë.

Autokolonat e veturave të zeza të policisë ishin të vendosura në afërsi. Përforcimet nga Departamenti i policisë i Nju Jorkut po ashtu janë dislokuar për të patrulluar në këtë zonë.

Në trazirat e vitit 2021 në Kapitol, protestuesit e dhunshëm çanë barrikadat e policisë, duke sulmuar 140 pjesëtarë të policisë dhe duke shkaktuar dëme, që kapën shifrën 2.8 milionë dollarë. Disa nga policët që u përleshën me protestuesit vdiqën gjatë javëve në vijim, disa prej tyre u vetëvranë.

Për shkak të dhunës së asaj dite, Kongresi miratoi ligje në fund të vitit 2022 për ndërmarrjen e masave shtesë për t’u siguruar që procesi i certifikimit të bëhet në mënyrë ligjore.

Shumë nga këto ndryshime janë bërë si kundërpërgjigje ndaj veprimeve të zotit Trump përpara dhe gjatë 6 janarit të vitit 2021. Për shembull, ligji i ri thotë se roli i nënpresidentit është kryesisht ceremonial.

Presidenti i zgjedhur i Shteteve të Bashkuara, Donald Trump, i ka kërkuar një gjykatësi në Nju Jork të hënën që ta shtyjë shqiptimin e dënimit ndaj tij në rastin penal të blerjes së heshtjes, në të cilin ai u shpall fajtor vitin e kaluar.

Avokatët e Trumpit thanë se synojnë t’i kërkojnë Gjykatës së Apelit ta hedhë poshtë vendimin e javës së kaluar nga gjykatësit Juan Merchan për shqiptimin e dënimit më 10 janar.

Avokatët Todd Blanche dhe Emil Boce i kërkuan Merchanit të mos e shpallë aktgjykimi ndaj Trumpit derisa ata ta bëjnë ankesën në Gjykatën e Apelit. Nëse kjo ndodh, atëherë gjasat janë që aktgjykimi ndaj Trumpit të mos shpallet para inaugurimit të tij më 20 janar.

Merchan e caktoi të premten si datë për shpalljen e aktgjykimit, por la të kuptohej se Trumpi nuk do të përballet me ndonjë dënim me burgim apo gjobë.

Trumpi u shpall fajtor në maj për falsifikimin e regjistrave biznesore për të ndikuar jashtëligjshëm në zgjedhjet presidenciale të vitit 2016, përmes pagesave për heshtjen e një aktoreje të pornografisë, e cila tha se kishte kryer marrëdhënie seksuale me të.

Ai ngarkohej me 34 akuza penale, përfshirë për falsifikimin e 11 faturave, 12 kuponëve dhe 11 çeqe, për ta fshehur pagesën në vlerë prej 130.000 dollarëve që ia kishte bërë Stormy Danielsit për ta blerë heshtjen e saj në lidhje me pretendimet e saj se kishte kryer marrëdhënie seksuale me Trumpin më 2006.

Daniels donte të fliste publikisht për lidhjen e dyshuar seksuale me Trumpin një muaj para zgjedhjeve të vitit 2016, gjë që do t’ia kishte dëmtuar fushatën presidenciale të nominuarit republikan.

Trump ka thënë se rrëfimi i saj ishte i rrejshëm dhe i ka mohuar të gjitha akuzat. REL