Presidenti Joe Biden ka hyrë në Kopshtin e Trëndafilave jashtë Shtëpisë së Bardhë, ku është pritur me duartrokitje.

Prej andej, Presidenti në detyrë ka nisur fjalimin, i pari që pas zgjedhjeve të 5 nëntorit, ku kandidatja demokrate, Kamala Harris, humbi përballë republikanit Donald Trump.

Biden e filloi fjalën e tij duke thënë se për më shumë se 200 vjet, SHBA ka kryer “eksperimentin më të madh të vetëqeverisjes në historinë e botës”, ku njerëzit votojnë dhe zgjedhin liderët e tyre dhe e bëjnë atë në mënyrë paqësore, “aty ku vullneti i njerëzve mbizotëron gjithmonë”.

Ai thotë se foli me presidentin e sapozgjedhur Donald Trump për ta uruar për fitoren e tij dhe për ta ndihmuar atë me një tranzicion të rregullt të pushtetit.

Biden thotë se ka folur edhe me Kamala Harris, dhe thekson se ajo kishte qenë “një bashkëpunëtore dhe një nëpunëse publike”.

Ai komplimenton fushatën “frymëzuese” të Harris, lavdëron “shtyllën kurrizore” të saj dhe thotë se ajo duhet të jetë krenare për punën e saj.

Në vijim, Biden thotë se për disa njerëz është një kohë për fitore, për të tjerë është një kohë humbjeje.

“Një vend zgjedh njërën ose tjetrën. Ne e pranojmë zgjedhjen që bën vendi”, thotë ai.

Dhe në vijim, Presidenti në detyrë i SHBA, thekson “nuk mund ta duash vendin tënd vetëm kur fiton. Nuk mund ta duash fqinjin tënd vetëm kur bie dakord.”

Biden vazhdoi duke thënë se duhet të rikthehet respekti për të gjithë punonjësit e zgjedhjeve dhe se ata duhet të falenderohen.

“Shumë janë vullnetarë që e bëjnë këtë nga dashuria për atdheun”, thotë ai.

Biden vazhdon duke thënë se do të ketë një transferim paqësor të pushtetit më 20 janar, duke shtuar: “Unë do të bëj detyrën time si president”.

“Ne po lëmë pas ekonominë më të fortë në botë. Tani kemi 74 ditë për të mbaruar mandatin tonë, le t’i numërojmë çdo ditë”, thotë ai dhe shton se kjo është përgjegjësi e tyre si qeveri.

Ne të gjithë rrëzohemi, thotë ai, por “masa e karakterit tonë” është se si ngrihemi përsëri.

“Ne e humbëm këtë betejë, Amerika e ëndrrave tuaja po ju bën thirrje që të ngriheni përsëri”, shprehet Biden.

Në vijim, Presidenti i SHBA theksoi “ne duhet të mbajmë besimin”, duke shtuar se është krenar që ka punuar me kabinetin dhe ekipin e tij”.

“Zoti ju bekoftë të gjithëve dhe Amerikën”, thotë ai. bw

Donald Trump do të kërkojë një fund të shpejtë të luftës në Ukrainë të nisur nga Vladimir Putin, tha ish-përfaqësuesi special i presidentit të zgjedhur amerikan.

Kurt Volker, i cili ishte i përfshirë në negociatat me Ukrainën dhe Vladimir Putinin midis 2017 dhe 2019 gjatë mandatit të mëparshëm të Trump, i tha Kyiv Independent se republikani “do t’i bëjë një telefonatë Putinit sa më shpejt të jetë e mundur” dhe do t’i thotë presidentit rus se “ai duhet të ndalojë luftën”.

Komentet e tij vijnë në mes të pasigurisë rreth asaj se çfarë do të thotë presidenca Trump për ndihmën e vazhdueshme të SHBA për Ukrainën, duke pasur parasysh kritikat e tij të përsëritura për mbështetjen financiare të Uashingtonit. Megjithatë, Putini do të jetë “një kundërshtar dinak”, për Trump dhe ai nuk dëshiron një marrëveshje, por përkundrazi të marrë të gjithë Ukrainën, tha Volker.

“Nëse Trump dëshiron të ndalojë konfliktin, ai do të duhet të bindë Putinin “se do ta dëmtojë atë, se do t’i kushtojë shumë nëse ai ndjek luftën”. tha Volker, ish ambasador i SHBA në NATO.

Volker tha se një skenar mund të jetë rritja e prodhimit të naftës dhe gazit dhe vërshimi i tregut me energji të lirë, gjë që do të jetë e keqe për buxhetin e Putinit. Një taktikë tjetër mund të jetë një program huazimi me qira në të cilin Ukraina merr hua për të blerë armë amerikane.

“Unë nuk mendoj se Trump dëshiron të shpenzojë paratë e taksapaguesve amerikanë në Ukrainë, por të lejojë Ukrainën të marrë hua atë që i nevojitet për të mbrojtur veten”, tha Volker.

Kur Trump të hyjë në Zyrën Ovale më 20 janar, lufta e nisur nga Putini mbush 3 vjet dhe pretendimet e përsëritura të presidentit të zgjedhur se do t’i jepte fund luftës brenda “24 orëve” kanë nxitur spekulime se si do të përballet ai me agresionin rus.

“Trump mund të nënkuptojë çdo gjë për Ukrainën – ta shesë atë për hir të politikës së fuqive të mëdha ose të dyfishojë dëmin që mund t’i shkaktojë Rusisë”, tha Orysia Lutsevych, zëvendësdrejtore e programit Rusia dhe Euroazia në institutin Chatham House.

Një ide për t’i dhënë fund luftës përfshin shtyrjen e anëtarësimit të Kievit në NATO për të paktën 20 vjet në këmbim të furnizimeve të vazhdueshme me armë, sipas Wall Street Journal, e cila citoi tre burime të paidentifikuara të afërta me Trump.

Burimet sugjeruan se rrethi i brendshëm i Trump po kërkon të ngrijë luftën në vijat aktuale të frontit dhe të krijojë një zonë të çmilitarizuar në lindje.

Një ndihmës i paidentifikuar i Trump shprehet se Uashingtoni do të kërkonte që aleatët evropianë të dërgonin trupa për të kontrolluar zonën e çmilitarizuar prej 800 miljesh, megjithëse ide të tjera po shqyrtohen.bw

Donald Trumpi jo vetëm që fitoi Shtëpinë e Bardhë, por që nga mëngjesi i sotëm ai është më i pasur me më shumë se një miliard dollarë, sepse aksionet e kompanisë së republikanit, “Trump Media” u rritën me 35 për qind brenda natës, duke e rritur vlerën e tregut të kompanisë në nëntë miliardë dollarë.

Ish-presidenti amerikan është pronari shumicës së aksioneve të kompanisë, rrjet social konservator me të ardhura minimale, raporton cnn.

Presidenti i zgjedhur i SHBA-së ka 114.75 milionë aksione, të cilat kapin vlerën prej 5.3 miliardë dollarëve dhe ishin me vlerë 3.9 miliardë dollarë kur tregtimi përfundoi në prag të ditës së zgjedhjeve.

Sigurisht, shton CNN, është një fitim në letër, sepse në praktikë do ta kishte të vështirë që 78-vjeçari të shiste kaq shumë aksione pa u ulur çmimi i tyre.

Për muaj të tërë, Trump Media ka shërbyer si një përfaqësues për mënyrën se si tregtarët parashikojnë rezultatin e zgjedhjeve.

Kur shanset e republikanin po binin, aksionet e kompanisë ranë në nivele rekord të ulëta dhe në muajin shtator arritën pikën më të ulët.
Në periudhën midis 23 shtatorit dhe fundit të tetorit, Trump Media trefishoi vlerën.

Nga ana tjetër, sipas një raporti të publikuar të mërkurën nga firma analitike financiare S3 Partners, investitorët që vënë baste kundër Trump Media & Technology Group (DJT.O), kanë humbur 420 milionë dollarë që kur bursa filloi të gjurmonte shanset për zgjedhjet e Donald Trump, shkruan Reuters.

Republikani Trump, 78 vjeç, rimori Shtëpinë e Bardhë të mërkurën me një fitore gjithëpërfshirëse ndaj kandidates demokrate Kamala Harris.
Në gjashtë javët para fitores së Trump, aksionet e Trump Media u rritën me 196%.

Trump Media & Technology Group operon Truth Social, një faqe e mediave sociale dhe shërbim transmetimi. Vetë Trump është aksioneri më i madh i kompanisë.

Të martën mbrëma, qindra fansa të aksioneve u mblodhën në një festë për vëzhgimin e zgjedhjeve në platformën e ndarjes së videove në internet Rumble. bw

Republikanët fitojnë edhe Senatin. Sipas projeksioneve të FOX, por edhe të mediave të tjera prestigjioze amerikane, ata kanë siguruar 51 vendet që u duhen, teksa mund të marrin edhe më tepër pasi procesi vijon.

Partia Republikane do të mbajë të paktën 51 vende, të mjaftueshme për një shumicë të plotë.

Vendi i pikës së kthesës është Nebraska, ku FOX projekton që senatori aktual republikan Deb Fischer do të mundë sfiduesin e pavarur Dan Osborn. Nuk është ende e qartë se kush do të shërbejë si udhëheqësi i ardhshëm i shumicës në Senat.

Udhëheqësi republikan Mitch McConnell, i cili është udhëheqësi më jetëgjatë i Senatit në histori, njoftoi në fillim të këtij viti se ai do të largohej. bw

“Ne duam Trump! Ne duam Trump!” dhe Presidenti i 47-të i SHBA-ve Donald Trump ngjitet në skenë për të shpallur fitoren dhe për t’iu drejtuar mbështetësve.

“Kjo është një lëvizje e jashtëzakonshme. Do të ndihmojmë vendin tonë që të shërohet. Do të rregullojmë çdo problem me të cilin përballet vendi jonë. Ne bëmë histori për një arsye dhe historia është piëkrisht kjo. Ne kaluam pengesat dhe ja ku jemi, një çmenduri e vërtetë. Është një fitore politike që vendi ynë nuk e ka parë kurrë më parë. Dua të falënderoj popullin amerikan që më zgjodhën si Presidenti i 47-të”, tha Trump.

Nga perdja blu pranë skenës vjen një shushurimë, e cila ka tërhequr vëmendjen e turmës. Donald Trump del në skenë me familjen e tij. bw

Joe Biden u ka bërë thirrje votuesve që të “bëjnë histori” duke zgjedhur Kamala Harris si pasuese të tij, ndërsa ai përgatitej për një ditë të qetë zgjedhjesh në Shtëpinë e Bardhë.

“Shkoni votoni”, tha ai në një postim për X.

Presidenti amerikan u tërhoq nga gara dhe mbështeti zonjën Harris në korrik, teksa thirrjet për tërheqjen e tij u intensifikuan pas një debati katastrofik kundër Donald Trump.

Zoti Biden u kthye në Shtëpinë e Bardhë dje pasi kaloi pjesën më të madhe të fundjavës në Delaware me një ndalesë të fundit të fushatës në Pensilvani.

Ai po e kalon ditën, një nga të fundit si president në rezidencën e Uashingtonit duke pritur nëse do t’ia dorëzojë pushtetin zëvendëspresidentit të tij apo do t’i kthehet Donald Trump.

Zonja e Parë Jill Biden ndodhet në Wilmington, Delaware, ku do të votojë personalisht përpara se të kthehet për t’iu bashkuar bashkëshortit të saj sonte.

Një zyrtar i Shtëpisë së Bardhë i tha NBC News se presidenti dhe zonja e parë do të shikojnë rezultatet e zgjedhjeve në Shtëpinë e Bardhë me ndihmës të vjetër dhe staf të lartë. bw

Kandidatja demokrate, Kamala Harris ka shpërndarë postimin e saj të parë në platformën X që kur u hapën qendrat e votimit në SHBA.

“Amerikë, ky është momenti për të bërë zërin tuaj të dëgjohet”, thotë nënkryetari aktual.

Kundërshtari i saj, Donald Trump, nuk ka postuar që nga hapja e sondazheve, por tha në platformën e tij “Truth Social”: Është koha për të dalë për të votuar- kështu që se bashkë, mund ta bëjmë Amerikën së madhe sërish!!!”

Kjo ishte rreth një orë pas përfundimit të tubimit të tij të fundit të fushatës, në Michigan. Panorama

Sytë e të gjithëve janë drejtuar sot nga Uashingtoni, ku zhvillohen zgjedhjet presidenciale.
Të gjithë presin që nesër të kemi emrin e personit që do të drejtojë SHBA në mandatin e ardhshëm, por çfarë ndodh nëse asnjë nga kandidatët nuk arrit të siguroje dot 270 votat e nevojshme të Kolegjit Zgjedhor, të domosdoshme për t’u shpallur fitues?

Nëse ndodh që të dy kandidatët presidencialë të jenë të barabartë dhe secili të fitojë 269 vota të Kolegjit Zgjedhor, d.m.th. asnjëri nuk arrin një shumicë prej të paktën 270 votash, do të jetë në dorën e Dhomës së Përfaqësuesve të përcaktojë fituesin.

Çdo delegacion i një shteti federal do të kishte më pas një votë dhe do të kërkohej një shumicë prej 26 votash për të fituar.

Megjithatë, ky është një skenar që kurrë nuk ka ndodhur.

Kur publikohet rezultati?
Në një garë kokë më kokë, mund të duhet pak kohë për të shpallur rezultatin përfundimtar. Nëse ka mospërputhje në disa shtete, ato duhet të zgjidhen deri më 11 dhjetor sipas ligjit zgjedhor.

Më 17 dhjetor, zgjedhësit do të takohen në kryeqytetet e shteteve federale për të hedhur zyrtarisht votat e tyre për president dhe nënkryetar. Më 6 janar 2025, Kongresi do të mblidhet në Uashington në mënyrë që të numërohen votat elektorale dhe të konfirmohet zyrtarisht fituesi i zgjedhjeve. Inaugurimi ceremonial i presidentit bëhet në Uashington më 20 janar. bw

Donald Trump dhe Kamala Harris mbajtën fjalimet e tyre të fundit para votuesve mbrëmë vonë pas një fushatë të gjatë elektorale, me tubime, intervista e reklama.

Por çfarë do të bëjnë ata ndërsa presin rezultatin e votimit?

Harris do të jetë sot në Uashington DC duke marrë pjesë në intervista në radio, raporton CNN.

Ajo më pas do të mbajë festën e saj të vëzhgimit të natës zgjedhore në Universitetin e saj Alma Mater Howard në Uashington sonte.

Një zyrtar me njohuri për planet e saj tha se ajo ka ftuar edhe donatorët kryesorë në një konferencë zgjedhore nesër.

Ndërkohë, Trump pritet të mbajë një festë natën e zgjedhjeve në West Palm Beach, Florida. gsh

Një ditë para zgjedhjes së presidentit të 47-të, autoritetet amerikane kanë marrë masa të rrepta sigurie përreth Shtëpisë së Bardhë dhe ndërtesave të tjera qeveritare në Uashington D.C. Mediat amerikane raportojnë se kryeqyteti po përgatitet për trazira të mundshme gjatë dhe pas zgjedhjeve presidenciale.

Shërbimi sekret vendosi gardhe metalike me lartësi 2.5 m rreth Shtëpisë së Bardhë, Kapitolit, Departamentit të Thesarit dhe rezidencës së zv/presidentes Kamala Harris.

“Shërbimi Sekret po punon ngushtë me partnerët federalë, shtetërorë dhe lokalë në Uashington DC dhe Palm Beach County, Florida, për të siguruar nivele të larta të sigurisë ditën e zgjedhjeve”, tha Shërbimi Sekret në një deklaratë për Uashington Post. “Këto masa nuk janë përgjigje ndaj ndonjë çështje specifike, por janë pjesë e përgatitjeve të gjëra të sigurisë publike për zgjedhjet e të martës, 5 nëntor 2024”.

Gjithashtu, Shërbimi Sekret po instalon gardhe metalike jashtë një qendre mbledhjesh në ëest Palm Beach, Florida, ku ish-presidenti Donald Trump do të zhvillojë një festë natën e zgjedhjeve, jo shumë larg rezidencës së tij në Mar-a-Lago.

Videot e shpërndara në rrjet tregojnë se disa biznese në Uashington kanë ndërprerë punën pa mbërritur dita e zgjedhjeve.

Këto masa të rrepta vijnë 4 vjet pasi ish-presidenti Donald Trump refuzoi të pranojë rezultatet e zgjedhjeve të vitit 2020, duke bërë që një turmë mbështetëse e tij të sulmonte Kapitolin, një përpjekje kjo e dhunshme për të certifikuar fitoren e presidentit Joe Biden.

Megjithatë, autoritetet amerikane mohojnë të kenë identifikuar ndonjë kërcënim real dhe nuk ka nevojë për asnjë alarm. Por paralajmërimi që vjen Departamenti i Policisë Metropolitane është konkret: “Ne nuk do të tolerojmë asnjë trazirë. Ne nuk do të tolerojmë shkatërrimin e pronës. Ne nuk do të tolerojmë asnjë sjellje të paligjshme. Shkelësit do të arrestohen dhe do të mbajnë përgjegjësi”.

Të martën e 5 nëntorit amerikanët do t’u drejtohen kutive të votimit për të zgjedhur Presidentin e ri, mes Donald Trump të republikanëve dhe Kamala Harris të demokratëve.

Në kutitë e votimit deri sot, 4 nëntor 2024, janë hedhur 77 mln vota të hershme. Akti final mes dy kandidatëve do të “luhet” nesër. bw