Presidenti i Turqisë, Recep Tayyip Erdogan, njoftoi të hënën se numri i projekteve me rëndësi kritike për sigurinë e vendit do të rritet gjithnjë e më shumë.

“Sa u përket luftanijeve, janë 14 projekte të përfunduara në kantieret ushtarake dhe ato të sektorit privat; ndërkohë që gjatë viteve të ardhshme do të nënshkruhen marrëveshjet për edhe 10 projekte të tjera”, sqaroi Presidenti Erdogan gjatë fjalës së rastit në ceremoninë e lëshimit në det të korvetës “Kinaliada”, organizuar në kantierin e Tuzlas.

Të gjitha këto zhvillime – theksoi Erdogan – janë mishërim i rëndësisë, që Turqia u kushton zgjidhjeve të projektuara me mundësi kombëtare në fushën e detarisë kundër kërcënimeve, që formohen dhe transformohen në këtë rajon.

“Me lejen e Zotit, ne do të bëjmë edhe aeroplanmbajtësen tonë kombëtare. Jemi të vendosur për këtë”, shtoi ai.

Kreu i shtetit turk nënvizoi se këto hapa duhet t’i bëjnë më shpejt, si një vend që synon të eliminojë plotësisht vartësinë e jashtme në industrinë e mbrojtjes deri në vitin 2023.

Mes të tjerash, Erdogan bëri me dije se Turqia renditet aktualisht mes atyre 10 vendeve në botë, të afta për të projektuar, ndërtuar dhe mirëmbajtur një anije luftarake me mundësi krejtësisht kombëtare.

“Cilado qoftë arsyeja, as që mund të bëhet fjalë që ne të tolerojmë qëndrimet e atilla, të cilat kanë si qëllim të frenojnë progresin e Turqisë në industrinë e mbrojtjes. Ata, që do të tentojnë një diçka të tillë, do të na gjejnë vetë ne përkarshi. Të gjithë sipërmarrësit tanë dhe të gjitha kompanitë tona me të vërtetë profesionistë/e, produktivë/e dhe të sinqertë/a, që punojnë për vendin e popullin tonë dhe që ndërkohë fitojnë natyrisht edhe për veten e tyre, duhet ta dinë dhe të jenë të sigurt se na kanë neve pranë”, përfundoi Presidenti Erdogan.