UASHINGTON – Komanda për Mbrojtjen e Hapësirës Ajrore të Amerikës së Veriut (NORAD) bëri të ditur se dy avionë amerikanë F-22 Raptor kanë interceptuar dy avionë bombardues rusë TU-95 mbi ujërat e Alaskës të martën.

Përmes një deklarate me shkrim, NORAD njoftoi se interceptimi ka ndodhur në hapësirën ajrore ndërkombëtare në perëndim të Alaskës.

Sipas deklaratës, avionët rusë nuk kanë hyrë brenda kufijve ajrorë të SHBA-së ose Kanadasë, ndërkohë që në kohë kur është bërë interceptimi, dy bombarduesit rusë gjendeshin brenda Zonës së Identifikimit të Mbrojtjes Ajrore, e cila shtrihet deri në 200 milje detare nga Alaska.

Ngjashëm, në fillim të muajit shtator dhe në muajin maj, bombardues rusë ishin interceptuar nga avionët amerikanë mbi ujërat e Alaskës.

Pas incidentit në muajin maj, zyrtarë të Pentagonit i kishin cilësuar fluturimet si “rutinore” dhe “jo kërcënuese”.

Nga ana tjetër, disa anëtarë republikanë të Kongresit Amerikan e kishin përshkruar fluturimin e avionëve rusë pranë kufirit të SHBA-së si “mesazh për popullin amerikan”. aa