Policia në Amsterdam e ka ndërprerë një protestë propalestineze të dielën, pasi një gjykatë e mbajti në fuqi vendimin për ndalimin e demonstratave në kryeqytetin holandez, pas përleshjeve ku u përfshinë edhe tifozët izraelitë të futbollit këtë javë.

Qindra protestues e shpërfillën ndalesën dhe u mblodhën në qendër të kryeqytetit holandez, ku brohoritën thirrje për ndaljen e luftës në Rripin e Gazës dhe “Liri për Palestinën”.

Por, pasi gjykata e miratoi ndalesën e vendosur nga autoritetet e qytetit, policia ndërhyri, duke i udhëzuar protestuesit të shpërndaheshin.

Disa njerëz u tërhoqën zvarrë nga oficerët e policisë, raporton agjencia e lajmeve Reuters.

Autoritetet vendosën të premten t’i ndalojnë protestat për tri ditët e ardhshme, pas sulmeve ndaj tifozëve izraelitë të futbollit, pas një ndeshjeje të enjten mes Maccabi Tel Avivit dhe Ajax Amsterdamit.

Të paktën pesë njerëz u lënduan të premten, kur tifozët izraelitë u sulmuan nga ato që kryetarja e Amsterdamit, Femke Halsema, i përshkroi si “grupe antisemitike”.

Prokurorët thanë të shtunën vonë se katër të dyshuar po mbahen në paraburgim për akte të dhunshme, përfshirë dy të mitur, dhe se 40 persona u gjobitën për trazira publike dhe 10 për vepra të tjera, përfshirë vandalizmin.

Ata theksuan se presin të bëjnë më shumë arrestime.

Një grup i madh i tifozëve të Maccabi Tel Avivit u pa në një video të postuar në internet nga faqja e lajmeve Bender duke u armatosur me shkopinj, tuba dhe gurë, dhe duke u përleshur dy herë me kundërshtarët kur marshuan në qytet pas ndeshjes.

Videoja nuk është verifikuar nga Reuters.

Incidentet antisemitike janë rritur dukshëm në Holandë që nga fillimi i luftës në Gaza në tetor të vitit të kaluar. REL

Trajneri Franco Foda ka publikuar tashmë listën për dy ndeshjet e ardhshme të Kombëtares së Kosovës në muajin nëntor në kuadër të Ligës së Kombeve.

Dardanët do t’i luajnë dy ndeshjet e fundit të këtij edicioni në Ligën e Kombeve, ku fillimisht do të përballet me Rumaninë në udhëtim më 15 nëntor, pastaj ndaj Lituanisë në Prishtinë më 18 tetor.

Për këto dy ndeshje shumë të vlefshme, përzgjedhësi Franco Foda ka vendosur të ftojë 24 futbollistë, ndërsa 10 lojtarë tjerë janë në listën rezervë.

Kryeministri i Izraelit, Benjamin Netanyahu, ka urdhëruar dërgimin e menjëhershëm të dy avionëve shpëtimtarë në Amsterdam, pas një “incidenti shumë të dhunshëm” ndaj qytetarëve izraelitë, tha zyra e tij të premten.

Policia holandeze tha se u raportua për disa përleshje në qendër të qytetit pas ndeshjes së futbollit mes Ajaxit dhe klubit izraelit Maccabi Tel Aviv të enjten mbrëma.

Ministria e Sigurisë Kombëtare të Izraelit u bëri thirrje izraelitëve në qytetin holandez të qëndrojnë brenda dhomave të hoteleve të tyre pas incidenteve të dhunshme, tha zyra e Netanyahut në një komunikatë tjetër.

“Tifozët, të cilët shkuan për ta parë ndeshjen, u përballën me antisemitizëm dhe u sulmuan me mizori të paparafytyrueshme, thjesht sepse janë hebrenj dhe izraelitë”, tha ministri i Sigurisë Kombëtare të Izraelit, Ben-Gvir, në X.

Policia holandeze tha se 57 njerëz janë ndaluar pas ndeshjes, pasi protestuesit propalestinezë u përpoqën të arrinin afër stadiumit “Johan Cruyff”, edhe pse komuna nuk u kishte dhënë leje për protestë atje.

Policia shtoi se tifozët u larguan nga stadiumi pa asnjë incident, por gjatë natës ndodhën përleshje të ndryshme në qendër të qytetit.

Ushtria izraelite tha se është duke u përgatitur ta nisë menjëherë një skuadër shpëtimi në bashkërendim me Qeverinë e Holandës, pas ndeshjes së futbollit, në të cilën Ajaxi e mposhti klubin izraelit Maccabi Tel Aviv me rezultat 5:0.

“Misioni do të niset me avionë dhe do të përfshijë ekipe mjekësore dhe të shpëtimit”, tha IDF-ja.

Ky incident ndodhi në një kohë kur tensionet vazhdojnë të jenë shumë të larta në Lindjen e Mesme prej se grupi palestinez i shpallur organizatë terroriste nga SHBA dhe BE – Hamasi, e kreu një sulm më 7 tetor 2023 në Izrael, ku vrau 1.200 njerëz dhe rrëmbeu rreth 250 të tjerë, sipas autoriteteve izraelite.

Kjo e nxiti Izraelin të nisë një luftë në Gazë, si pasojë e të cilës kanë humbur jetën mbi 43.000 palestinezë, sipas zyrtarëve shëndetësorë në enklavë.

Lufta në Gazë ka nxitur protesta në mbështetje të të dyja palëve nëpër Evropë dhe Shtetet e Bashkuara, gjatë të cilave janë sulmuar si arabët, ashtu edhe izraelitët.

Politikani antimysliman, Geert Wilders, i cili është lider i partisë më të madhe në Qeverinë holandeze, i dënoi sulmet e raportuara në Amsterdam.

“Ndihem i turpëruar se kjo mund të ndodhë në Holandë. E papranueshme”, shkroi ai në X. REL

Tifozët e Yllit të Kuq, apo siç njihen në Kosovë edhe si tifozët e Crvena Zvezdës, kanë vazhduar me parulla anti-Kosovë edhe mbrëmë në Beograd, ku skuadra e tyre ishte duke luajtur kundër Barcelonës

Ata edhe kësaj here kanë kënduar këngë në kor nacionaliste derisa kanë paraqitur Kosovën me flamurin serb në tribunat e tyre.

Nuk është hera e parë që tifozët e Zvezdës bëjnë këto gjëra, madje ata e bëjnë këtë në çdo ndeshje që e luajnë në Europë, si me ekipin e tyre Kombëtar është edhe me ekipet e tyre që luajnë në gara europiane. sn

Lamine Yamal vazhdon të thyejë rekord pas rekordi. Ai vazhdon të djegë çdo etapë të mundshme, duke lënë kohën pas siç bëri para tij Lionel Mesi.

Yamal dhe Barcelona pushtuan “Bernabeun”, pasi kishte dështuar në 4 përpjekje me radhë. Dhe e ka bërë si protagonist, duke shënuar një nga 4 golat e fitores së madhe të blaugranave. Dhe ndonëse vetëm 17 vjeç, spanjolli “kërcënon” të thyejë çdo rregull në futbollin botëror.

Thyerja e rekordeve duket se është bërë diçka e përjavshme për 17-vjeçarin. Që nga debutimi i tij vetëm 15 vjeç kundër Betisit nën drejtimin e Xavit, ai ka nisur një aventurë ndoshta të parakohshme dhe unike.

33 rekordet

Lojtari më i ri që shënon me fanellën e Barcelonës: 16 vjeç e 87 ditë (kundër Granadës);

Lojtari më i ri që shënon në La Liga: 16 vjeç e 87 ditë (kundër Granadës);

Lojtari më i ri që shënon një dygolësh në La Liga: 16 vjeç e 213 ditë, po ashtu ndaj Granadës;

Lojtari më i ri që shënon në një Klasike; të shtunën kundër Realit;

Lojtari më i ri që shënon në Kupën e Mbretit: Kundër Bilbaos me 16 vjeç e 195 ditë;

Lojtari më i ri që shënon në Superkupën e Spanjës: Kundër Osasunës 2024;

Lojtari më i ri që shënon me kombëtaren spanjolle: 16 vjeç e 57 ditë kundër Gjeorgjisë;

Lojtari më i ri që shënon në një Europian: 16 vjeç e 362 ditë kundër Francës;

Lojtari më i ri që jep asist me Barcelonën: 16 vjeç e 45 ditë;

Lojtari më i ri që jep asist me Barcelonën: 16 vjeç e 45 ditë;

Lojtari më i ri që jep asist në Champions: 16 vjeç e 153 ditë, duke lënë pas Bojan Kërkiç;

Lojtari më i ri që jep asist në Europian: 16 vjeç e 339 ditë kundër Kroacisë;

Lojtari më i ri që jep asist në finalen e një turneu madhor: Për Niko Uilliams kundër Francës;

Lojtari më i ri që arrin 10 gola e 10 asiste në La Liga;

Lojtari më i ri që shënon dhe jep asist në një turne madhor;

Lojtari më i ri në një Klasike: 16 vjeç e 280 ditë në tetor 2023;

Lojtari më i ri në fazën eliminatore të Champions;

Lojtari më i ri në Superkupën e Spanjës;

Lojtari më i ri që ka debutuar me Spanjën: 16 vjeç e 57 ditë;

Lojtari më i ri në një Europian;

Lojtari më i ri në fazën eliminatore të Europianëve;

Lojtari më i ri në finalen e një turneu madhor;

Lojtari më i ri që ka luajtur 50 ndeshje zyrtare me Barcelonën: 16 vjet, 10 muaj e 6 ditë;

Lojtari më i ri që ka luajtur 10 ndeshje në Champions: 16 vjeç e 278 ditë;

Lojtari më i ri titullar në La Liga: 16 vjeç e 38 ditë;

Lojtari më i ri titullar në Champions: 16 vjeç e 83 ditë;

Lojtari më i ri titullar në Europianë: 16 vjeç e 339 ditë;

Lojtari më i ri që fiton çmimin më i miri i ndeshjes në një Europian;

Lojtari më i ri fitues i një Europiani;

Lojtari më i ri fitues i një turneu madhor;

Lojtari më i ri që ka fituar çmimin si lojtari i ri më i mirë në një Europian;

Lojtari më i ri që e mbyll mes 10 më të mirëve në “Topin e Artë”. sn

Një ngjarje e papritur ka ndodhur, teksa Real Madrid ka anuluar pjesëmarrjen e delegacionit të tij në ceremoninë e “Topit të Artë”.

Sot ishte planifikuar që një avion me 50 delegatë të nisej drejt Parisit në orën 15:00, për të marrë pjesë në këtë ceremoni ku shumë prej madrilenëve pritej të ishin protagonistë me çmime. Por Reali ka anuluar gjithçka dhe në Spanjë janë të bindur se kjo ka ndodhur pasi kanë informata se Vinicius nuk do të jetë fituesi i këtij edicioni.

Në fakt, të 50 personat ishin të pranishëm në ambientet e klubit që në orën 14:00, të gatshëm për t’u nisur drejt Francës.

Por më pas u mësua vendimi i klubit madrilen, për të bojkotuar këtë ceremoni, siç raportojnë mediat spanjolle. sn

Gjithçka është gati, sonte në mbrëmje, në orën 20:00 në Paris në “Théâtre du Châtelet” do të zhvillohet ceremonia e “Topit të Artë” për vitin 2024, çmimi që kurorëzon lojtarin më të mirë të vitit.

Çmimi i dhënë nga “France Football” është ëndrra e çdo futbollisti, ndërsa në edicionin e kaluar ishte Mesi ai që fitoi, pasi fitoi siguroi suksesin në Botërorin 2022 në Katar me Argjentinën.

Me këtë rast, favorit i madh për suksesin është Vinicius Junior, pasi fitoi Champions League dhe La Ligan me Realin e Madridit, duke luajtur një rol themelor.

Në rast se kishte ndonjë dyshim, në javën para dorëzimit të trofeut ai shënoi një trigolësh kundër Dortmundit që sugjeron se braziliani do të jetë ai i zgjedhuri për të hënën në mbrëmje.

Kandidatë të tjerë potencialë që mund ta rrezikojnë atë janë Bellingam (Real Madrid), Rodri (Mançester Siti) ose Karvahal (Real Madrid). sn

Kosova siguroi fitoren e tretë radhazi në Ligën e Kombeve, duke mposhtur Qipron me rezultatin 3-0, në duelin e dominuar totalisht nga “Dardanët”. Një fitore spektakolare për përfaqësuesen e Franko Fodës, që ngjitet në kuotën e 9 pikëve në 4 ndeshje.

Një gol “alla Kvaraskhelia” i kapitenit Amir Rrahmani, i cili braktisi mbrojtjen, zhbllokoi sfidën në minutën e 30-të. Pjesa e parë u mbyll me rezultatin 1-0, teksa në fragmentin e dytë “Dardanët” shënuan edhe 2 herë të tjera, me Krasniqin dhe Emir Sahitin në minutat 52 dhe 71.

Vlen të theksohet fakti se për Sahitin ky ishte goli i parë me fanellën e Kosovës. Futbollisti që aktivizohet me Hamburgun në Gjermani, u hodh nga stoli në minutën e 67-të në vendin e Zhegrovës.

Ndërkohë në 88-të, miqtë nga Qipro shënuan golin e nderit me Sotiriu, por goli u anulua për faull në sulm. Duelin e radhës Kosova do e luajë në transfertë ndaj Rumanisë në datën 15 nëntor.