Kështu deklaroi Sekretarja e Shtetit Livia Leu sot në Bruksel për raundin e pestë të bisedimeve eksploruese me BE-në

VOAL- Për herë të parë, Berna dhe Brukseli kanë biseduar për ruajtjen e “miliardës së kohezionit” si pjesë e paketës së re të negociatave. Kështu deklaroi Sekretarja e Shtetit Livia Leu pas raundit të pestë të bisedimeve eksploruese në Bruksel.

“Në parim, Zvicra është e gatshme të japë konstant kontributin e saj në kohezionin në Evropë”, tha Leu sot në Bruksel. Faza e zbatimit të kontributit të dytë të kohezionit tashmë ka filluar. Me 1.3 miliardë franga gjatë dhjetë viteve, qëllimi është të reduktohen pabarazitë ekonomike dhe sociale midis vendeve të BE-së dhe të mbështeten shtetet e BE-së në menaxhimin e emigracionit.

Deri tani, marrëveshjet në fushën e “pabarazisë ekonomike dhe sociale” janë nënshkruar me tetë shtete: Bullgarinë, Kroacinë, Qipron, Estoninë, Hungarinë, Maltën, Rumaninë dhe Poloninë. Me Sllovakinë, Lituaninë, Letoninë, Slloveninë dhe Çekinë janë në fazën e finalizimit. Në fushën e emigracionit kanë përfunduar negociatat me Greqinë dhe Qipron. “Ne jemi ende në bisedime me Italinë”.

Kontesti për lirinë e lëvizjes

Sot u fol edhe për lëvizjen e lirë të njerëzve. Kishte një marrëveshje mbi parimin e “pagave të barabarta për të njëjtën punë në të njëjtin vend”, vazhdoi Leu. Megjithatë, parimi ende nuk është “konkretizuar”.

Sipas Sekretares së Shtetit, pikat kritike për Zvicrën mbeten aksesi në sistemin social, dëbimi i kriminelëve të huaj dhe mbrojtja e pagave. Për këto çështje do të zhvillohen bisedime të mëtejshme teknike.

Komisioni Evropian, nga ana e tij, në një deklaratë të shkurtër shkroi se bisedimet sqaruan disa pika, por se nevojiten më shumë informacion për të tjerat. Sipas Leut, është ende e nevojshme të diskutohen çështje institucionale dhe ndihma shtetërore. Për më tepër, Zvicra theksoi edhe një herë se lidhja midis pjesëmarrjes zvicerane në programin kërkimor të BE-së Horizon Europe dhe çështjeve institucionale “është e parëndësishme”, shpjegoi Leu. Një raund i gjashtë i bisedimeve eksploruese është planifikuar për më 11 nëntor.rsi-eb