Presidenti maqedonas Gjorgje Ivanov ia dorëzoi të mërkurën në drekë mandatin për formimin e qeverisë kryetarit të Lidhjes Social Demokrate të Maqedonisë, Zoran Zaev. Presidenti Ivanov më në fund iu bind trysnive të shumta brenda vendit nga qarqe politike dhe akademike dhe kërkesave të komunitetit ndërkombëtar për ta respektuar kushtetutën e vendit.

Mandatari për kryeministër, Zoran Zaev dy herë i kishte dërguar letër presidentit Ivanov duke i garantuar atij se do të ruhet karakteri unitar i vendit, sovraniteti, tërësia territoriale dhe karakteri shumetnik, që ishte edhe kushti i presidentit maqedonas që nga shpallja e shumicës së re parlamentare, para pak muajsh.

Presidenti Ivanov u tha gazetarëve se tashmë “u shmangën pengesat për dhënien e mandatit”.

Zoti Zaev ka një afat prej njëzet ditësh për formimin e kabinetit qeveritar dhe për dorëzimin e programit qeverisës para ligjvënësve në parlament.

Sipas pritjeve, partitë shqiptare Bashkimi Demokratik për Integrim dhe Aleanca për Shqiptarët janë të sigurta se do të jenë pjesë e koalicionit të ri qeveritar, ndërsa Lëvizja Besa ende nuk e ka shprehur qëndrimin përfundimtar. Pa këtë të fundit, shumica parlamentare ka 62 vota në parlament, të mjaftueshme për miratimin e qeverisë.

Maqedonia është pa qeverisje funksionale që nga viti 2015, kur vendi hyri në krizë të thellë për shkak të aferës së përgjimeve, që çoi në rrëzimin e qeverisë së drejtuar nga VMRO-DPMNE.

Zgjedhjet e dhjetorit të vitit të kaluar nuk sollën edhe formimin e qeverisë meqë VMRO-DPMNE e drejtuar nga ish kryeministri nacionalist Nikola Gruevski, nuk siguroi votat e mjaftueshme, ndërsa presidenti George Ivanov, refuzonte t’i jap mandatin kryetarit të LSDM-së Zoran Zaev, me gjithë faktin se ai siguroi shumicën me partitë politike shqiptare.

Mbështetësit e VMRO-DPMNE-së u hodhën në protesta të përditshme për të kundërshtuar formimin e qeverisë nga LSDM-ja dhe partitë shqiptare.

Më 27 prill, shumica parlamentare zgjodhi Talat Xhaferin, nga Bashkimi Demokratik për Integrim në postin e kryetarit të parlamentit. Zgjedhja e tij u pasua me ndërhyrje të dhunshme të grupeve nacionaliste maqedonase në parlament.

Më shumë se 100 veta u lënduan duke nxitur reagimin e Bashkimit Evropian dhe të Shteteve të Bashkuara, që dënuan dhunën dhe kërkuan respektimin e kushtetutës dhe ligjeve të Maqedonisë.