Ambasadori suedez, Jonas Westerlund është shprehur i zhgënjyer që ura mbi lumin Ibër në Mitrovicë vazhdon të jetë e mbyllur.

Diplomati Westerlund thotë që ura duhet të hapet në koordinim me banorët lokal.

“Siç e dini unë kam qenë në Kosovë në vitin 1999 dhe i mbaj mend shumë mirë trupat franceze në urën e Ibrit. Ishin momente shumë të tensionuara. Jam i palumtur kur e shoh se edhe pas 24 vitesh ura vazhdon të mos jetë krejtësisht e hapur. Kjo tregon më së miri se ende nuk janë shëruar plagët e luftës. Unë konsideroj se ura duhet të hapet, por në koordinim me banorët lokal nga të dyja anët” , tha ambasadori Westerlund.

Westerlund vlerëson se situata në veri vazhdon të jetë tejet komplekse dhe ka sugjeruar qeverinë që për disa veprime të jetë në koordinim me aleatet ndërkombëtarë.

“Janë ndërmarre shumë veprime gjatë dy viteve të fundit në veriun e Kosovës. Siç e dini situata vazhdon të jetë komplekse. Unë pajtohem me ata që thonë së Kosova është shtet i pavarur që nga viti 2008 dhe ka të drejtë të marrë vendime. Por nëse dëshironi të keni KFOR-it këtu, BE-në, dhe nëse keni synim integrimin në strukturat euro-atlantike atëherë duhet të ketë koordinim me shtetet aleate”, thotë ai.

Tutje ambasadori suedez thotë se ka ardhur koha që të shqyrtohen masat ndëshkuese ndaj Kosovës, derisa pret që të krijohet edhe një momentum i ri në procesin e dialogut.

Krejt në fund, Westerlund ka inkurajuar Kosovën dhe Serbinë që të bëjnë përpjekje më shumë për normalizimin e plotë të marrëdhënieve. sn

Kryetari i Grupit Parlamentar të PD-së, Gazment Bardhi ka reaguar pas skandalit të ndodhur në Kuvendin e Shqipërisë, ku forcat speciale të policisë jo vetëm kanë penguar deputetët të kryejnë detyrat e tyre, por policët e Ramës kërcënuan edhe me jetë deputetët e opozitës.

Reagimi i Gazment Bardhit:

Kurrë në historinë e Shqipërisë nuk ka ndodhur që deputetët të rrethohen nga forcat speciale të Policisë së Shtetit brenda ambienteve të Kuvendit të Shqipërisë.

Kurrë gjatë një seance plenare nuk ka ndodhur që forcat speciale të Policisë së Shtetit të futen në ambientet e brendshme të Kuvendit dhe të pengojnë lëvizjen e deputetëve. Kuvendi sipas ligjit dhe Rregullores së Kuvendit ka forcat e veta të sigurisë, që janë pjesë e Gardës së Republikës.

Kurrë nuk ka ndodhur që një punonjës policie brenda ambienteve të Kuvendit të kanosë me jetë një deputet.

Pavarësisht debateve të përhershme dhe tejkalimeve të kompetencave herë pas here nga Garda e Republikës, sot ishin pikërisht punonjësit e Gardës që mbrojtën jetën e deputetëve të kanosur nga Policia në ambientet e brendshme të Kuvendit.

Sot Kuvendi i Shqipërisë u shndërrua në fytyrën e vërtetë të Edi Ramës. Shteti që kërcënon brenda Kuvendit me polici deputetët e opozitës, nuk ka asnjë lidhje me nje shtet që pretendon të jetë pjesë e Bashkimit Europian dhe asnjë lidhje me parimet që udhëheqin një vend anëtar i NATO-s! sn

Policia e Shtetit me një reagim të nxituar dhe skandaloz, kërkon të mohojë se një efektiv i forcave speciale të FNSH-së u ka nxjerrë armën brenda ambienteve të Kuvendit, deputetët të Partisë Demokratike.

Policia arrin deri aty sa të mohojë edhe pamjet filmike të bëra nga protestuesit dhe deputetëve gjatë momentit të përplasje.

Sigurisht reagimi i policisë është i urdhëruar politikisht, ashtu siç ishte urdhëruar politikisht edhe të futej në një objekt të rëndësisë së veçantë që ruhet ekskluzivisht nga Garda e Republikës.

Reagim i Policisë së Shtetit

Shërbimet e Drejtorisë Vendore të Policisë Tiranë, me mbështetjen e Forcës Kombëtare të Sigurisë, kanë marrë të gjitha masat për garantimin e rendit dhe sigurisë publike, si dhe për mbarëvajtjen e tubimit të organizuar para bashkisë Tiranë.

Gjatë tubimit është bërë thirrje që pjesëmarrësit t’i drejtoheshin Godinës së Kuvendit.

Shërbimet e Policisë, konform ligjit, forcat policore kanë marrë masa për të garantuar sigurinë e institucioneve shtetërore ne rastin konkret te Kuvendit të Republikës së Shqipërisë për të parandaluar një sulm të mundshëm nga protestuesit ndaj këtij institucioni.

Bazuar në ligjin “Për tubimet”, punonjësit e Policisë, të angazhuar për mbarëvajtjen e tubimit, asnjë punonjës policie nuk ka qene i pajisur me armë zjarri gjate tubimit, po vetëm me mjete mbrojtëse dhe me shkopinj gome.

Përgënjeshtrojmë lajmin që punonjës të Policisë, në tubim, iu kanë nxjerrë tubuesve, armët e zjarrit.

Policia e Shtetit është e vendosur për të garantuar të drejtën e tubimit, liritë dhe të drejtat e tjera të qytetarëve, si dhe pronën publike dhe atë private.

Ndërkohë, Policia e Shtetit do të kryejë të gjitha veprimet hetimore dhe shtetasit përgjegjës për veprimet e dhunshme ndaj punonjësve të Policisë, do të kallëzohen në Prokurori.

sn

Presidenti i Shteteve të Bashkuara, Joe Biden, do të udhëtojë sot për në Gjermani për një vizitë të shkurtër, gjatë të cilës do të diskutojë me liderët e Gjermanisë, Francës dhe Britanisë së Madhe për pushtimin e Ukrainës nga Rusia.

Kievi është duke u bërë thirrje aleatëve të vet perëndimorë të ndërmarrin hapa urgjentë për t’i dhënë fund luftës.

Konflikti i zgjeruar në Lindjen e Mesme pritet të jetë gjithashtu lart në agjendën e bisedimeve mes liderëve.

Biden fillimisht planifikoi ta mbante një takim më të madh me mbështetësit ushtarakë të Ukrainës në bazën ajrore amerikane në Gjermani, Ramstein, javën e kaluar gjatë një vizite të paraparë treditore. Por ai e anuloi atë vizitë për t’u marrë me pasojat e uraganit Milton.

Tani, presidenti amerikan do ta kryejë një vizitë të shpejtë. Ai pritet të mbërrijë në Gjermani të enjten vonë dhe të takohet me presidentin dhe kancelarin e Gjermanisë të premten në mëngjes, para se të takohet me katërshen evropiane pasdite.

Ai po e bën këtë vizitë në një javë kur presidenti i Ukrainës, Volodymyr Zelensky, i vizitoi vendet perëndimore për ta paraqitur “planin e fitores” për t’i dhënë fund pushtimit të plotë nga Rusia, i cili nisi në shkurt 2022.

“Situata në fushëbetejë në Ukrainë, trajektorja e luftës dhe si mund aleatët ta mbështesin më së miri Ukrainën, do të jenë temë diskutimi”, tha një zyrtar i lartë i administratës amerikane para vizitës së Bidenit, në lidhje me takimin me udhëheqësit evropianë.

Ndërkohë, kancelari gjerman Olaf Scholz tha të mërkurën në Parlamentin gjerman se SHBA-ja dhe Gjermania nuk do ta ndalin ndihmën për Ukrainën.

“Gjermania dhe Shtetet e Bashkuara janë mbështetësit më të mëdhenj të Ukrainës në mbrojtjen e sovranitetit dhe integritetit të saj, si dhe të demokracisë së saj. Dhe, ne do të vazhdojmë të jemi të tillë”, tha Scholz.

“Por kjo është një kohë kur, përveç mbështetjes sonë të qartë për Ukrainën, duhet të bëjmë gjithçka që mundemi për ta kuptuar se si mund të sigurohemi që kjo luftë të mos vazhdojë përgjithmonë, që të mos vazhdojë të vrasë një numër të pabesueshëm grash dhe burrash”, shtoi ai.

Zelensky thotë se plani i tij, i cili do të përfshinte ftesë të pakushtëzuar për Ukrainën për t’iu bashkuar NATO-s tani, synon ta detyrojë Kremlinin të negociojë në mirëbesim.

Shtetet e Bashkuara dhe Gjermania janë aleatë të ngushtë të Izraelit, i cili është bërë gjithnjë e më i izoluar për shkak të fushatës së tij ushtarake në enklavën palestineze të Gazës, ku autoritetet vendase thonë se janë vrarë më shumë se 42.000 njerëz.

“Ne nuk do të pranojmë që Irani të sulmojë Izraelin me raketa”, tha Scholz të mërkurën.

“Kjo nuk duhet të ndodhë. Nuk duhet të ketë destabilizim të mëtejshëm të rajonit. Dhe, Irani po luan me zjarrin. Kjo duhet të ndalet”, shtoi ai. REL

Sekretari i Përgjithshëm i NATO-s, Mark Rutte, tha të mërkurën se gjendja e sigurisë në Ballkanin Perëndimorë është e brishtë, ndërsa Rusia vazhdon përpjekjet për të dëmtuar demokracitë në rajon.

Ai i bëri këto komente në prag të takimit dyditësh të ministrave të Mbrojtjes të vendeve anëtare të NATO-s, të cilët siç tha, do të diskutojnë edhe operacionet e aleancës në Kosovë.

“Situata në Ballkanin Perëndimor mbetet shqetësuese me kërcënimet për ndarje në Bosnje e Hercegovinë, situatën e brishtë të sigurisë në Kosovë dhe përparimin e paktë në dialogun e lehtësuar nga Bashkimi Evropian ndërmjet Beogradit dhe Prishtinës“, tha sekretari Rutte në një konferencë për shtypin ne selinë e NATO-s në Bruksel.

Ai tha se përkushtimi i NATO-s ndaj misionit të saj paqeruajtës në Kosovë mbetet i fuqishëm. “Për më shumë se dy dekada KFOR-i ka ruajtur një mjedis të qetë dhe sigurt për të gjithë njerëzit në Kosovë dhe lirinë e lëvizjes”, tha sekretari Rutte.

Aktualisht mbi 4 mijë e 400 trupa të udhëhequra nga NATO-ja kujdesen për sigurinë në Kosovë dhe përgjatë vitit që lamë pas, aleanca shtoi praninë e saj pas tensioneve në veriun e Kosovës të banuar me shumicë serbe.

Sekretari Rutte tha se Rusia “po bën përpjekje për të penguar demokracitë në rajon nëpërmjet kërcënimeve hibride, përfshirë dezinformimin. Ajo po përdor brishtësitë e brendshme për të krijuar ndarje”.

Diplomacia perëndimore shpesh ka tërhequr vërejtjen se Rusia mund të provojë të nxisë konflikte në Ballkan për të tërhequr vëmendjen nga agresioni i saj në Ukrainë.

NATO-ja e përkushtuar ndaj Ukrainës – kërkon më shumë qartësi për “planin e fitores” të presidentit Zelensky

Zoti Rutte tha se aktualisht NATO-ja është e përqendruar të ndihmojë Ukrainën që të rifitojë më shumë territor dhe të forcojë pozicionin e saj para çdo negociate të ardhshme për paqe, por aleanca nuk dha ndonjë shenjë se do të ishte e gatshme ta ftonte së shpejti Ukrainën për t’u bashkuar në radhët e saj.

Aleatët kërkuan më shumë informacion nga presidenti ukrainas Volodymyr Zelenskyy për “planin e tij të fitores” për t’i dhënë fund luftës me Rusinë.

Plani përqendrohet në kërkesën që NATO-ja të ecë përpara me një proces të “përshpejtuar” të anëtarësimit të Ukrainës, që presidenti Zelensky e bëri dy vjet më parë, për të kërkuar mbrojtje nën ombrellën e sigurisë të aleancës ushtarake, pasi Rusia filloi agresionin e saj në shkallë të gjerë.

Besueshmëria e NATO-s mbështetet në garancinë e saj të sigurisë kolektive, përkatësisht në nenin 5 të traktatit të saj themelues që paraqet një angazhim politik nga të gjitha vendet anëtare për t’i ardhur në ndihmë çdo anëtari, sovraniteti ose territori i të cilit mund të sulmohet.

Megjithatë, ky parim nuk zbatohet për një vend partner si Ukraina.

Sekretari i Përgjithshëm i NATO-s nuk pranoi të mirëpresë “planin e fitores”, duke thënë vetëm se ai dhe aleatët “e marrin parasysh” atë. Ai nuk diskutoi se kur Ukraina mund t’i bashkohej aleancës më të madhe ushtarake në botë, përtej këmbënguljes që ajo do të bëhet anëtare.

“Plani ka shumë aspekte dhe shumë çështje politike dhe ushtarake që vërtet duhet t’i rrahim me ukrainasit për të kuptuar se çfarë fshihet pas tij, për të parë se çfarë mund të bëjmë, çfarë nuk mund të bëjmë”, tha sekretari Rutte.

Presidenti Zelensky do t’u shpjegojë elementet e planit të tij të enjten udhëheqësve të Bashkimit Evropian si dhe ministrave të Mbrojtjes të vendeve anëtare të NATO-s.

Plani dhe debatet rreth tij po ndodhin në një kohë të errët për Ukrainën. Trupat e saj po përpiqen të përballen me forcat ruse më të numërta dhe të pajisura më mirë, veçanërisht në rajonin lindor të Donetskut, ku ato gradualisht po zmbrapsen. Kievi po mbijeton me ndihmën perëndimore, por Ukraina thotë se ndihma po arrin shumë ngadalë.

E ardhmja e Ukrainës në NATO është një çështje që aleanca e ka peshuar për 16 vjet.

Në takimin e lartë në Uashington në muajin korrik, 32 vendet anëtare deklaruan se Ukraina është në një rrugë “të pakthyeshme” drejt anëtarësimit. Megjithatë, pak gjëra kanë përparuar që kur udhëheqësit e NATO-s i premtuan Ukrainës dhe Gjeorgjisë në vitin 2008 se “këto vende do të bëhen anëtarë të NATO-s” një ditë.

Tani për tani, NATO-ja është në një gjendje pritjeje. Vendi më i madh dhe më u fuqishëm i aleancës, Shtetet e Bashkuara, janë në prag të zgjedhjeve presidenciale. Aleatët evropianë presin pak lëvizje në Ukrainë derisa një president i ri të marrë detyrën në janar.

Përtej kësaj, Shtetet e Bashkuara dhe Gjermania mbeten thellësisht të shqetësuara për mundësinë e përfshirjes në një luftë më të gjerë me Rusinë që ka armë bërthamore dhe udhëheqin një grup vendesh që kundërshtojnë anëtarësimin e Ukrainës në NATO deri në përfundimin e konfliktit.

Në çdo rast, thonë diplomatët e NATO-s, kufijtë e Ukrainës do të duhet të shënohen qartazi përpara se ajo të bashkohet me aleancën, në mënyrë që të mos ketë gabime se ku do të mund të zbatohej garancia e nenit 5.

Trupat ruse kanë pushtuar rreth 20 për qind të territorit të Ukrainës.

Shefi i ri i NATO-s, Mark Rutte, ka thënë të mërkurën se gjendja e sigurisë në rajonin e Ballkanit Perëndimorë është e brishtë, duke përmendur në veçanti atë në Kosovë dhe në Bosnje e Hercegovinë.

“Situata në Ballkanin Perëndimor mbetet shqetësuese me kërcënimet për ndarje në Bosnje e Hercegovinë, situatën e brishtë të sigurisë në Kosovë dhe përparimin e vogël në dialogun e lehtësuar nga BE mes Beogradit dhe Prishtinës“, tha Rutte për gazetarë në prag të takimit të Ministrave të Mbrojtjes të vendeve anëtare të NATO-s.

Gjendja e sigurisë në Kosovë mbetet e tensionuar prej vitit të kaluar, veçanërisht pas një sulmi nga një grup serbësh ndaj Policisë së Kosovës në veri të vendit, si pasojë e të cilit u vra një polic dhe tre sulmues.

Së voni, NATO-ja ka zhvendosur trupa në Kosovë dhe në Maqedoninë e Veriut, duke thënë se ata dërgojnë “mesazh të qartë” të vendosmërisë të fortë të NATO-s dhe përkushtimit për të ruajtur paqen dhe stabilitetin në rajon, por edhe aftësitë e aleancës dhe gatishmërinë për t’u përgjigjur.

Rutte u zotua se NATO-ja do të mbetet fuqishëm e përkushtuar për misionin e vet në Kosovë, KFOR, i cili ka mbi 4.400 trupa ushtarake në vend.

“Për më shumë se dy dekada KFOR-i ka ruajtur një ambient të qetë dhe sigurt për të gjithë njerëzit në Kosovë dhe lirinë e lëvizjes. Përkushtimi i NATO-s për KFOR-in mbetet i fuqishëm edhe sot“, theksoi Rutte.

NATO-ja e ka shtuar praninë e saj në Kosovë gjatë vitit 2023, pas rritjes së tensioneve në veriun e banuar me shumicë serbe.

KFOR-i është reaguesi i tretë i sigurisë në Kosovë, pas Policisë së Kosovës që është e para dhe pas misionit të BE-së për sundim të ligjit, EULEX.

Misioni i NATO-s në Kosovë po ashtu është përgjegjës për sigurinë e kufijve të Kosovës me Serbinë. Ndërsa, pjesën tjetër të vijës kufitare e mbikëqyr Policia e Kosovës.

Rutte, ish-kryeministër i Holandës, para dy javësh e mori përsipër rolin e sekretarit të përgjithshëm të NATO-s duke e pasuar në këtë post ish-shefin e aleancës, Jens Stoltenberg.

Ai foli edhe për përpjekjet e Rusisë për të krijuar ndasi të rajon përmes fushatave dezinformuese.

“Rusia, po ashtu, po bën përpjekje për të penguar demokracinë në rajon me kërcënime hibride dhe kibernetike, përfshirë edhe dezinformimin. Ajo po përdor ndjesitë e brendshme për të krijuar ndasi“, nënvizoi ai.

Ky do të jetë takimi i parë i Këshillit të Atlantikut të Veriut në nivel të ministrave të Mbrojtjes nën udhëheqjen e Ruttes./ REL.