Kryetari i Lëvizjes Vetëvendosje, Visar Ymeri është shoqëruar sot sërish nga policia për në Gjykatë, pasi që nuk i është përgjigjur vullnetarisht thirrjes për paraqitje në seancë gjyqësore.

Bëhet fjalë për rastin e incidentit në Kuvendin e Kosovës të datës 28 qershor të vitit 2012.

Aty ishin përfshirë deputetët e Vetëvendosjes, Visar Ymeri, Rexhep Selimi, ish-deputeti Florin Krasniqi dhe shoferi Besart Bujupi, të cilët sipas deputetit të PDK-së Bekim Haxhiu e kanë sulmuar atë me qëllim të shkaktimit të lëndimeve trupore.

Nga personat e përfshirë në këtë incident, mungon ish-deputeti i Vetëvendosjes, Florin Krasniqi, i cili ndodhet jashtë Kosovës, andaj ndaj tij është paralajmëruar procedurë e veçantë.

SËRISH ARRESTOHET KRYETARI VISAR YMERI

Sot rreth orës 10:00, policia arrestoi sërish kryetarin e VETËVENDOSJE!-s, z. Visar Ymeri.

Proceset e montuara gjyqësore ndaj Lëvizjes VETËVENDOSJE! nuk po ndalen dhe janë intensifikuar kohëve të fundit. Arrestimi i vazhdueshëm i kryetarit të subjektit më të madh opozitar, konfirmon raportet ndërkombëtare që Kosovën e kanë shpallur vend me sistem gjysmë të konsoliduar autoritar.

Prej se e kemi në pushtet këtë koalicion, dhuna dhe përndjekjet politike janë bërë metodë qeverisëse në Kosovë.

Lëvizja VETËVENDOSJE! kërkon urgjentisht ndërprerjen e përndjekjeve politike dhe do të angazhohet me tërë qenien e saj që ta largojë këtë regjim autoritar.