TIRANË- Djali i ish-kryeministrit Sali Berisha, Shkëlzeni është paraqitur sot në Komisionin Hetimor për CEZ dhe ka pranuar të dëshmojë vetëm nëse komisioni nuk drejtohej nga Taulant Balla, të cilin e quan “të dënuar” dhe në konflikt interesi. Edhe anëtarët e komisionit akuzonin Ballën se ishte në konflikt interesi.
Shkëlzeni ka debatuar me Taulant Ballën duke pyetur në nisje se kush e drejtonte komisionin. Ky i fundit tha se këtë komision e drejtonte ai dhe se fillimisht duhej të betohej që të dëshmonte.

Shkëlzen Berisha: Kush e drejton seancën, ju (Ulsi Manja) apo i dënuari (Taulant Balla)?
Taulant Balla: Këtë komision e drejtoj unë
Shkëlzen Berisha: Zoti i dënuar kam një kërkesë paraprake.
Balla: Je mësuar ti të ndryshosh gjyqtarin. Na thuaj gjeneralitetet, se ndryshe nuk kemi si të marrim deklaratën tënde, o zoti jurist.
Ulsi Manjani i kërkon të betohet dhe i jep fjalën.
Shkëlzen Berisha: Zoti Manja kush është drejtues i seancës, ju apo i dënuari?
Taulant Balla: Që ta mësoni njëherë e mirë këtë komision e drejtoj unë. Ka mbaruar koha kur t’i e zgjidhje vetë gjyqtarin e prokurorin. Kjo ka marrë fund me reformën në drejtësi.
Berisha: Kam një kërkesë paraprake.
Balla: Kërkesën dorëzojeni në sekretari.
Deputetët e PD: Seanca të drejtohet nga Ulsi Manja.
Shkëlzen Berisha kërkesë për përjashtimin e Ballës nga drejtimi i komisionit.
Ristani i drejtohet Manjës më fjalën “papagall”.
Manja-Ristanit: Ti s’vë dot rregull në familjen tënde. Do vesh këtu.
Balla: E kemi shqyrtuar një kërkesë të ngjashme, është rrëzuar. Komisioni nuk ngre akuza, administron dëshmi.
Ristani-Ballës: Nuk voton dot për përjashtimin tënd.
Ndreu: Ka tendencë për të ngatërruar dëshminë. Kryesia e Kuvendit të shqyrtojë kërkesën e Shkëlzen Berishës.
Elmazi: Pse nuk e thërrisni në Komision Kastriot Ismailajn? Po ju jeni selektivë, me qëllim të keq.
Balla: Do ta thërrasim edhe atë. Tani kemi dëshmitarit Shkëlzen Sali Berisha. Kastriot Ismailajn aty e kemi, se është në burg, nuk na ikën dot. Do ta thërrasim, kemi 40 ditë kohë.
Bode-Ballës: Keni probleme në raport me ligjin.

Më herët Shkëlzeni ka mohuar lidhjet me Nuel Kalajn dhe Kastriot Ismailaj.

Në nisje të mbledhjes së Komisionit Hetimor për CEZ-in, kryetari Taulant Balla deklaroi se dëshmitari Nuel (Nue) Kalaj që akuzohet se ka ndërmjetësuar një takim të Shkëlzen Berishës me drejtorin çek të CEZ në Shqipëri, Josef Hejsek, është shpallur në kërkim pasi policia nuk e gjeti për ta shoqërkuar me forcë në këtë komision.

Ai lexoi një shkresë të policisë, sipas të cilës, ishte ushtruar dy herë kontroll në banesën e tij tek Sheshi “Rilindja” dhe nuk ishte gjetur. Nisur nga ky fakt, Balla tha se Kalaj është shpallur në kërkim për të dëshmuar dhe kurdo që policia e gjen, duhet ta sjellë për të dëshmuar.