Arbër Sejdiu dhe Alban Makolli, veprimtarë të Lëvizjes Vetëvendosje, janë sulmuar para zyrës së tyre në Prishtinë. Sipas kësaj Lëvizje, aktivistët e saj janë sulmuar nga Alban dhe Kushtrim Geci të cilët janë djemtë e Sabit Gecit.

Sipas zëdhënësit të Vetëvendosjes, Frashër Krasniqi, dy aktivistët e tyre Arbër Sejdiu dhe Alban Makolli kanë qenë duke qëndruar para zyrës së Lëvizjes kur ka disa persona në mesin e tyre djemtë e Sabit Gecit kanë dalë të armatosur dhe kanë sulmuar ata.

Aktivistët Sejdiu dhe Makolli pasi kanë marrë trajtimin e duhur në QKUK janë lëshuar në shtëpi. Ndërkohë policia e Kosovës, ka arrestuar dy persona të dyshuar për kryerjen e kësaj vepre e të cilët thuhet se janë djemtë e Sabit Gecit. Ata janë dërguar në mbajtje për 48 orë.

Krasniqi: U sulmuan para zyrës, ishin të armatosur

Frashër Krasniqi, ka rrëfyer për “Zërin” në tërësi se si ka ndodhur ngjarja ku dy aktivistët e tyre kanë mbetur të therur me thikë.  “Rreth orës 21:20, një grup personash në mesin e të cilëve edhe dy djemtë e Sabit Gecit, Kushtrim dhe Alban Geci, sulmuan dy aktivistë të Lëvizjes VETËVENDOSJE! që ndodheshin para zyrës sonë. Njëri nga djemtë e Sabit Gecit, parkoi makinën BMË mu në hyrje të selisë dhe doli duke i sharë e kërcënuar aktivistët”, rrëfen Krasniqi.

Ai më pas thotë se menjëherë ka ardhur grupi tjetër pas djemve të Sabit Gecit të cilët kanë qenë të armatosur dhe kanë nisur të sulmojnë aktivistët e tyre.

Vendi ku ka ndodhur ngjarja!

“Pastaj erdhën edhe grupi tjetër të cilët kanë qenë të armatosur me revole dhe me thika. Ata kanë sulmuar aktivistët duke therur njërin në kokë dhe tjetrin në këmbë”, shton më tutje ai.

Sipas Krasniqit, po të mos ishin aktivistët tjerë të Lëvizjes të cilët kanë dalë shpejtë nga zyra për të reaguar dy aktivistët e tyre do të mund të pësonin edhe më shumë. Ndërkohë që dikush më herët kishte lajmëruar edhe policinë të cilët arrijnë shumë shpejtë në vendin e ngjarjes.

“Kanë dalë nga zyra aktivistët e tjerë të Lëvizjes që kanë qenë brenda ndërtesës dhe i kanë larguar sulmuesit dhe në ato momente ka ardhur policia. Policia ka arritur të  arrestoj dy nga ta, Alban dhe Kushtrim Gecin, kurse 3 të tjerë, që kishin edhe revole, kanë ikur”, rrëfen Frashër Krasniqi.

Makolli dhe Sejdiu nuk janë në rrezik jete

Dy aktivistët e Lëvizjes Vetëvendosje Arbër Sejdiu dhe Alban Makolli menjëherë pasi që janë sulmuar nga të dyshuarit, janë dërguar me urgjencë në QKUK. Aty të dy kanë marrë ndihmën e menjëhershme mjekësorë. Lëndimet e tyre nga thika kanë qenë në kokë dhe në këmbë .

Fatmirësishtë jo aq serioze sa për tu rrezikuar jetën. Krasniqi ka konfirmuar për “Zërin”, se menjëherë pas marrjes së ndihmës në QKUK ty aktivistët e tyre janë liruar për në shtëpi.

Ndërkohë policia e Kosovës ka konfirmuar se ka arrestuar dy persona të cilët kanë qenë të përfshirë në këtë rast e që Vetëvendosje thotë se janë djemtë e Sabit Gecit.

“Rreth orës 21:00 ka pasur një përleshje mes disa personave në rrugën “UÇK. Policia ka shoqëruar dy persona në stacionin policor”, ka thënë Flora Ahmeti.