Vajza 21-vjeçare që filmoi ish-kryebashkiakun e Peshkopisë, Shukri Xhelili, duke i kërkuar favore seksuale, ka denoncuar në Prokurori presionet dhe kërcënimet pas denoncimit që bëri në televizion.“Panorama” shkruan sot se në një kallëzim të datës 14 maj, dy ditë pas publikimit të videove, në Prokurorinë e Peshkopisë, Anisa A. tregon se disa persona, që ajo dyshon se janë anëtarë të Forumit Rinor Socialist, i kanë hapur një adresë false në “Facebook”.

Këtë adresë, të hapur me emrin e fotografinë e saj, 21-vjeçarja pretendon se e përdorin disa persona që e fyejnë dhe kërkojnë ta denigrojnë. Ndërsa për këtë arsye, ajo shprehet se e ka mbyllur profilin e saj zyrtar në rrjetin social, pikërisht për të shmangur presionet dhe fyerjet.

Anisa shprehet në padinë e saj se pasi u bë publik denoncimi i saj në televizion, ajo dhe familja e saj ndihen të kërcënuar dhe nuk mund të dalin nga shtëpia.

Më poshtë padia e Anisa A., dorëzuar në Prokurorinë e Peshkopisë.

Quhem Anisa A., 21 vjeçe, me kombësi e shtetësi shqiptare. Me arsim të mesëm dhe profesion magaziniere tek Qendra Kulturore e Bashkisë Peshkopi.

Jam beqare dhe me banim në Peshkopi, lagjja “Kamen”. E padënuar më parë. Arsyeja përse kam ardhur për të kallëzuar, ka të bëjë me faktin se para dy ditësh (datë 12 maj 2016), unë kam denoncuar publikisht një rast abuzimi ku subjekt i kallëzimit tim është ish-kryetari i Bashkisë së Peshkopisë.

Për shkak të kësaj situate kam qenë e detyruar të qëndroj e mbyllur në shtëpi, pasi gjatë këtyre ditëve kam pasur presione nga persona të panjohur. Kjo situatë presioni ka ndodhur edhe në rrjetin social “Facebook”, të cilin unë e frekuentoj.

Unë kam profilin me adresën “A…” dhe me pasuord “…”. Këtë faqe të rrjetit social “Facebook” e kam frekuentuar pothuajse çdo ditë.

Gjatë ditës së djeshme, më datë 13 maj 2016, rreth orës 18:00, kur kam hapur adresën time në “Facebook”, kam parë që kanë hapur edhe një faqe tjetër me fotografi profili fytyrën time dhe me emrin “Anisa A.”.

Për këtë fakt nuk kam dijeni se kush e ka hapur këtë profil, por dyshoj se këtë mund ta ketë hapur ndonjë prej anëtarëve të Forumit Rinor Socialist të degës Dibër.