Në qoftë se, sipas policisë së Tiranës, ka mbetur njoftimi i dy ditëve më parë : “pas verifikimeve të kryera ka rezultuar se personi i dëmtuar është shtetasi Gjergj Zefi, 52 vjeç (administrator i një portali), i cili aktualisht po merr ndihmën mjekësore” dhe më tej agresorët “janë larguar në drejtim të paditur”, ky refren i ngritjes së supeve po e bën shoqërinë shqiptare të ndjehet e pasigurt dhe të mbetet e kërcënuar në çdo orë të ditës.

Dhuna verbale mbi median është ndeshur shpesh, kujtojmë këtu etiketimin si “vrasës me pagesë” kur  Kryetari i Bashkisë së Tiranës Erion Veliaj i bëri ndaj një gazetareje, kur ajo zbuloi korrupsion në investimet e munguara në djegësin e plehrave. Pra nga dhuna verbale dhe përshkallëzimi në lëndim fizik vetëm në pak muaj tregon se ndjeshmëria e parandalimit dhe ndëshkimit me forcën e ligjit mungon. Rastet janë shumta dhe të shprehura në forma të ndryshme, por duke e analizuar këtë kapërcim, nga dhuna verbale (normë), deri në dhunë fizike (fakt) dhe kur përgjegjësit nuk ndëshkohen, kjo shpalosje e bën UGSHPD (Unioni i Gazetarëve Shqiptarë Profesionistë të Diasporës),  që të dënojë me forcë dhe të kërkojë ndërgjegjësimin qytetar që të angazhohet për marrjen e  masave të menjëherëshme për mbrojtjen e sigurisë së jetën e shtetasve.

Këto shprehje të përsëritura që kanë gjetur shprehjen e frikës me formën e kërcënimit të vazhdueshëm  janë dëshmia e realitetit  të sotëm shqiptar që shkon përtej lajmit në kronikën e zezë. Qeveria e cila ka përgjegjësinë dhe detyrën e mbrojtjes së jetës dhe sigurisë së shtetasve ka mbetur vetëm në ushtrimin e propagandës politike dhe të  arrogancës në një kohë kur opozita zgjohet, mediat shprehen, bota sheh ndërsa krimi duket se po drejton vendin.

UGSHPD i fton shqiptarët ta shohin më gjerë dhe me përparësi situatën pasi KËRCËNIMI i kthyer në normalitet në jetën e shoqërisë sot po përbën një rrezik të madh. Janë jo vetëm mediat të kërcënuara që përcjellin kronikën e zezë, për grabitje bankash, vrasje, rrahje të dhunëshme, votues të ndrojtur në qendrat e votimit, veprime bandash të trafiqeve dhe deri tek kërcënimi i jetës së prokurorëve së fundmi që po tregojnë se krimi po ndjehet i lirë dhe ka aftësi dhe epërsi të gjunjëzojë vetë shtetin.