Opinioni shqiptar u bë dëshmitar i një akti të ulët dhe të shëmtuar të kryeministrit të Shqipërisë Edi Rama ndaj gazetares së Syri Tv Ambrozia Meta. Me të drejtë, organizatat evropiane për të drejtat e gazetarëve reaguan menjëherë duke e dënuar këtë akt si befasues, të pafalshëm dhe të papranueshëm. Akti i kryeministrit ndaj gazetares u cilësua prej tyre si mungesë e mirësjelljes bazë dhe të respektit ndaj punonjësve të medias, si një akt tmerrues që synon frikësimin ndaj gazetarëve dhe mediave që kërkojnë të vërtetën. Qendra Evropiane për Lirinë e Shtypit dhe Medias theksoi se ky incident nxjerr në pah sfidat e vazhdueshme me të cilat përballen gazetaret femra në kërkimin e së vërtetës, duke theksuar nevojën urgjente që udhëheqësit të respektojnë median dhe të ruajnë integritetin gazetaresk. Grupi monitorues për shkeljet e lirisë së medias në Evropë, Media Freedom Rapid Response theksoi: “Jemi të gjithë të tmerruar nga sjellja shqetësuese e kryeministrit të Shqipërisë Edi Rama ndaj një femre gazetare.” Ndërsa Grupi Gratë për Lirinë e Shtypit duke vënë në pah se nuk është hera e parë që kryeministri i Shqipërisë ka ka shfaqur përbuzje ndaj shtypit që e kritikon atë, pasi shprehu solidaritetin me gazetaren Ambrozia Meta, i kërkoi kryeministrit që ai t’i trajtojë me respekt gazetarët dhe t’i kërkojë falje gazetares Ambrozia Meta. Aktin e dënoi edhe Sekretari i Përgjithshëm i Federatës Evropiane të Gazetarëve, Ricardo Gutiérrez.

Gazetarja Ambrozia Meta në reagimin e saj ku shpreh keqardhjen që ajo dhe pyetjet e saj u vunë në qendër të lajmeve, shkruan ndër të tjera: “Kryeministri bëri një gjest të ulët dhe të turpshëm, duke më gjuajtur në faqe dhe duke shkelur çdo lloj etike. Është një veprim që nuk më intimidon, siç nuk më step fare gjuha e tij ofenduese, sepse unë kam guximin t’i kërkoj llogari, pasi nuk bëj kurrë pazare me profesionin tim dhe e kam shumë të shenjtë dinjitetin”.

Unioni i Gazetarëve Shqiptarë Profesionistë të Diasporës (UGSHPD) është i shqetësuar edhe nga mospranimi i kryeministrit të Shqipërisë për t’i kërkuar falje gazetares. Ndërkohë ai nuk ia lë dot fajin gazetares për sjelljen e tij. Kryeminstri Rama reagon ndaj organizatave evropiane të mbrojtjes së të drejtave të gazetarëve, ndaj qëndrimeve të tyre kritikuese dhe dënuese, i quan ato “një gënjeshtër krejtësisht të neveritshme” dhe duke i ndarë gazetarët në gazetarë “me etikë” dhe gazetarë “pa etikë”. Ai ua kujton organizatave të shtypit se ato duhet të merren jo vetëm me mbrojtjen e gazetarëve nga pushteti, por edhe me mbrojtjen e pushtetit “nga anëtarët e komunitetit të shtypit” që e minojnë pushtetin.

Gazetarinë që nuk i bindet pushtetit të tij, Edi Rama e trajton si “minuese” të pushtetit të tij. Konsiderojmë se kjo është një mendësi e rrezikshme, të cilën ai nuk e ka pohuar kaq haptas më parë, por që e ka demonstruar në mënyrë sistematike ndaj çdo shfaqjeje të gazetarisë së lirë në Shqipëri, në një kohë që pothuajse të gjitha mediat në Shqipëri janë të varura plotësisht nga pushteti i Edi Ramës.

Unionit të Gazetarëve Shqiptarë Profesionist të Diasporës (UGSHPD) i është dashur në këto vite të merret shpesh me raste të shumta të sjellje të dënueshme verbale apo fizike ndaj çdo gazetarëve që synojnë pasqyrimin e drejtë e me profesionalizëm të realitetit në Shqipëri si dhe ndaj mediave ku ata punojnë. Shpesh autor i drejtpërdrejtë është vetë kryeministri Rama.

Ne iu kemi kërkuar vazhdimisht dhe iu kërkojmë mediave në Shqipëri që të ngrenë zërin në përkrahje të kolegëve dhe kolegeve që bëhen objekt i padrejtësive nga ana e qeverisë apo nga ana e pronarëve që janë në shërbim të qeverisë. I kemi bërë thirrje vazhdimisht dhe i bëjmë thirrje pranisë perëndimore në Shqipëri që të mbajnë qëndrimet e duhura për mbrojtjen e lirisë së mediave në Shqipëri përballë një pushteti që gjithnjë e më të padrejtë dhe më brutal ndaj tyre.

20 mars 2024

Unioni i Gazetarëve Shqiptarë Profesionistë të Diasporës (UGSHPD)