Presidenti amerikan, Donald Trump ka përshëndetur sulmet ushtarake në Siri, duke thënë se ato janë kryer në “mënyrë të përkryer” dhe se “misioni ka përfunduar”.

Shtetet e Bashkuara, Mbretëria e Bashkuar dhe Franca kanë bombarduar tri caqe qeveritare, duke shënjestruar ato që i kanë cilësuar si baza të armëve kimike.

Sulmet kanë qenë përgjigje ndaj sulmit të dyshuar me armë kimike në qytetin Duma, javën e kaluar.

Presidenti rus, Vladimir Putin ka thënë se ai ka dënuar sulmet Perëndimore, “në mënyrën më serioze”.

Rusia, aleatja kryesore e Sirisë ka kërcënuar me hakmarrje ushtarake nëse goditet ndonjë forcë ruse.

Sulm kundër barbarizmit! Kështu e ka cilësuar Presidenti Donald Trump, sulmin ushtarak të ndërmarrë mëngjesin e sotëm nga SHBA dhe aleatët në Siri, pas përdorimit të armëve kimike të regjimit të Bashar Al Assad ndaj popullsisë civile.

Shefi i Shtëpisë së Bardhë ka thyer heshtjen pas sulmit të ndërmarrë, duke thënë se SHBA dhe aleatët përdorën fuqinë kundër barbarizmit dhe brutalitetit.

“Kombet e Britanisë, Francës dhe Shteteve të Bashkuara të Amerikës përdoren fuqinë e tyre legjitime kundër barbarizmit dhe brutalitetit. Synimi i veprimeve tona sonte është të krijojë një pengesë të fortë kundër prodhimit, përhapjes dhe përdorimit të armëve kimike”, u shpreh Trump.

Ndërkohë që Kryeministrja britanike Theresa May sqaroi në një konferencë për shtyp arsyet se përse Britania iu bashkua shteteve që sulmuan Sirinë.

“Ne nuk mund të lejojmë që përdorimi i armëve kimike të kthehet në një normalitet brenda Sirisë apo dhe rrugëve britanike. Do të kishim preferuar një zgjidhje alternative, por në këtë rast, nuk ekzistonte një e tillë”, tha Theresa May.