Përkeqësohet situata në Malin e Zi, ku protestat po bëhen edhe më të dhunshme. Policia ka ndërhyrë me gaz lotsjellës, mirëpo protestuesit janë kundërpërgjigjur, duke përdorur edhe armë zjarri.

Momentalisht, stafi i Ambasadës Shqiptare në Podgoricë është gatishmëri, pasi situata mund të tensionohet. Ambasadori shqiptar, Ernal Filo, duke folur për “Neës24” tha se situata po përkeqësohet.

“Policia po monitoron situatën, jemi në gjendje gatishmërie. Para pak minutash pati edhe një shpërthim pranë ambasadës. Për momentin jemi të mbrojtur nga forcat e sigurisë”, ka thënë ai.

“Ka një reagim nga qeveria malazeze që dënoi këto akte të dhunshme ndaj Ambasadës. Mund të them që situata është e rënduar, kjo protestë ka më shumë se 20 ditë.

Para një jave u mor vendimi për t’i larguar tendat dh për t’i larguar ata nga rruga në mënyrë që të vijohet situata normale, por kjo acaroi protestuesit të cilët kaluan në veprim të dhunshme.

Ata kërkuan krijimin e një qeveri tranzitore deri në mbajtjen e zgjedhjeve të reja. Ne ishim të informuar që do kishte një protestë të ashpër sot.

Ne nuk kemi probleme. Gazi lotsjellës hyri edhe në ambientet e ambasadës, shkaktoi pak kollitje dhe shqetësime të lehta, por pa probleme”, vijoi ambasadori Filo.

19:30-Sulmohet me gurë Ambasada Shqiptare
Ambasada e Shqipërisë në Podgoricë të Malit të Zi është sulmuar me gurë nga protestuesit antiqeveritarë proserbë, teksa kriza vazhdon të thellohet në vendin fqinj.

Sipas mediave malazeze, disa aktivistë prorusë kanë qëlluar me gurë ambasadën tonë në Podgoricë. Fatmirësisht nuk ka patur asnjë të lënduar.

I menjëhershëm ka qenë reagimi i ministrit të Jashtëm të Shqipërisë, Ditmir Bushati. “Sulmi ndaj ambasadës sonë, i prapranueshëm. U kam kërkuar autoriteteve malazeze që të marrin masa për sigurinë e stafit diplomatik shqiptar në Malin e Zi”, është shprehur Bushati.

Ndërkohë, nuk ka ende asnjë arrestim nga ana e autoriteteve malazeze për sulmin. Qeveria e Malit të Zi në një postim të bërë në “Tëitter” bën me dije se grupi “Nikšićana” gjatë demonstrimit ka sulmuar selinë diplomatike shqiptare. Gjithashtu, qeveria e Malit të Zi, e dënon sulmin ndaj ambasadës shqiptare.