Gazetari Klodian Tomorri i ftuar në Edicionin e Pasdites në SYRI TV, ka folur në lidhje me tunelin e Llogarasë, që u inaugurua dje nga Edi Rama.

Sipas gazetarit, SPAK duhet të hetojë ndërtimin e këtij tuneli, sepse është skualifikuar një kompani që kishte dhënë  12 mln euro më pak.

Gjatë bisedës me moderatoren, Eneida Ndoci, Tomorri u shpreh se, përfitues të këtij tuneli janë disa biznesmenë që tani do ta kenë më të lehtë të shesin vilat e tre.

‘Përfituesit kryesor të tunelit janë biznesmenët që kanë investuar në jug, të cilët zotërojnë asete të mëdha ne bregdetin e vendit, pra ata do ta kenë më të lehtë të shesin vilat që ndërtojnë, do ta kenë më të lehtë që të kenë njerëz tek ata hotelet që kanë.

Është një vepër që do të përdoret edhe politikisht, por edhe interesave klienteliste të qeverisë.

Inxhinierët e përfunduan punën se u ndërtua tuneli, por prokurorët duhet të punojnë për atqë që thamë në fillim; anulimi i tenderit, ndryshimi i kritereve rrugës, skualifikimit të ofertës që ishte 12 mln euro më e ulët se ajo fituese, fotos që ekziston të Ramës dhe Ballukut me CEO e kompanisë që u shpall fitues në tender, 4 muaj para se të shpallej tenderi. Janë një sërë elementësh që prokuroria do të duhej ti verifikojë, sepse bëhet fjalë për një shumë të madhe, që me TVSh shkojnë mbi 200 mln.

Duke qenë se këtu veprat e mëdha bëhen pis nga korrupsioni, këtu ka një sërë  pikëpyetjesh që duhej verifikuar nga prokuroria. Nga çfarë kemi parë ne deri tani, prokuroria heziton të hetojë ato çështje ku del hija e kryeministrit.

E kemi parë këtë me çështjen Beketi, me çështjen McGonigal, dosjen e inceneratorëve, që u copëtua dhe është bërë një rrjetë merimange vetëm e vetëm që të mos shkohet në verifikimin e procedurës dhe rolit të niveleve më të larta të qeverisë në këtë aferë.

Duket se prokuroria i druhet hijes së kryeministrit dhe sa shikon që në një çështje mund të dalë diku ndonjë indicie për kryeministrin, hetimet aty, ose ndalohen ose nuk hetohen fare, apo ndahen si historia e inceneratorëve’, u shpreh gazetari Klodian Tomorri në SYRI TV.