Zëvendëskryeministri i Kosovës dhe ministri i punëve të Jashtme Hashim Thaçi ka reaguar sot pas dëmtimit të varrezavte të katolikëve në Dedaj të Romajës së Hasit ditë më parë.

Thaçi ka thënë se ky është akt barbar mbi një vlerë universale njerëzorë.
“Me indinjatë te thellë mora lajmin për rrënimin e varrezave në Dedaj – Romajë të Hasit. Ky sulm i varrezave katolike është akt barbar mbi një vlerë universale njerëzore, që tradicionalisht është respektuar në vendin tonë”, ka thënë Thaçi.
Ndërkohë ai ka shtuar se edhe ky rast nuk do të mund të mbjellë urrejtje ndaj shqiptarëve.
“Duke shprehur keqardhje dhe duke u solidarizuar me banorët e Dedajve në Romajë, jam i bindur që nuk ka forcë që mund të mbjellë përçarje mes qytetarëve të Kosovës, që shquhen për tolerancë fetare, respekt të ndërsjellë dhe harmoni religjionesh”, ka përfunduar ai.