Protestuesit e opozitës u grumbulluan për herë të 31-të para Bashkisë së Tiranës, duke shprehur pakënaqësitë e tyre për situatën e vështirë në vend. Protesta e organizuar ishte një manifestim i revoltës qytetare ndaj qeverisjes aktuale, e cila, ka shpërfillur interesat e qytetarëve dhe ka lejuar korrupsionin të përfshijë çdo nivel të institucioneve.

Dorian Teliti, nënkryetar i Këshillit Bashkiak të Tiranës, doli në fjalim për të përshkruar realitetin e ashpër që përjetojnë qytetarët shqiptarë. Ai e nisi fjalën duke falënderuar të pranishmit për mbështetje dhe theksoi se protesta është një flamur që qytetarët e kanë ndezur për të kërkuar drejtësi dhe liri. Ai shprehu keqardhje për situatën ku qytetarët e ndershëm janë jashtë, ndërsa kriminelët janë brenda institucioneve.

Teliti bëri thirrje për vazhdimin e protestës deri në dorëheqjen e Edi Ramës dhe Erion Veliajt, si dhe për një qeveri teknike që do të sigurojë zgjedhje të lira dhe të ndershme. Ai theksoi rëndësinë e rezistencës qytetare dhe mosbindjes civile, duke kërkuar angazhim të fortë nga të gjithë ata që duan një Shqipëri më të mirë.

‘Fillimisht, një falënderim për të gjithë ju për mbështetjen në këtë protestë të 31-ës, para godinës së krimit dhe korrupsionit, para kësaj godine ku flamuri digjet jashtë, por kriminelët janë brenda; ku qytetarët e ndershëm janë jashtë, por hajdutët brenda; ku ata të cilëve u është djegur prona janë jashtë, janë nënkëmbur, janë ofenduar, ata të cilët janë të diskredituar janë jashtë, ndërkohë që kriminelët e vërtetë të vitit 2024 vazhdojnë të mburren brenda godinës së bashkisë, me këta zinxhirë në dyert që ju shikoni, të mbrojtur nga policia e pushtetit.

Flakën e protestës nuk e shuan dot askush, përveç qytetarëve. Qytetarët e ndezën flakën e protestës dhe do ta mbajnë atë të ndezur deri në dorëheqjen e Erion Veliajt, deri në dorëheqjen e qeverisë dhe shkuarjen në zgjedhje të lira e të ndershme me qeveri teknike.

Ta harrojnë këta që mbyllen këtu brenda me zinxhirë; këta që shpenzojnë më shumë se 1 milion euro, jo për qytetarët, jo për familjet në nevojë, jo për të ndërtuar rrugë, kopshte, çerdhe e shkolla, jo për të sjellë ujë në shtëpitë tona, por si e si të vjedhin ato me inceneratorë që nuk ekzistojnë, me kompanitë e krijuara vetë si 5D, me të tjetërsime pronash private për të ndërtuar kulla nga oligarkët.

Na flitet për demokraci e për integrim. Cili është integrimi i Shqipërisë? Integrimi që sot nuk respekton Kuvendin e Shqipërisë; integrimi që sot nuk respektohen këshillat bashkiak; integrimi që lejon ata që janë shkaktarë të shkatërrimit të Shqipërisë të shkojnë të negociojnë për 20 vitet e ardhshme, akoma e më tepër zhytjen e Shqipërisë në mjerim.

Ndaj, të dashur miq, ta mbajmë të ndezur protestën popullore, ta mbajmë të ndezur rezistencën qytetare, sepse vetëm me rezistencë dhe mosbindje civile, me çdo mjet demokratik, ne mund ta arrijmë qëllimin tonë të përbashkët: rikthimin e Shqipërisë në normalitet. Kjo kryhet vetëm me qeverisje teknike, vetëm me dorëheqjen e Edi Ramës, vetëm me dorëheqjen e Erion Veliajt. Të rezistojmë dhe të fitojmë!’- u shpreh Teliti.