Ndihmës Sekretarja për Byronë e Çështjeve Evropiane dhe Euroaziatike, Karen Donfried ka takuar në Kryesinë e Kuvendit kreun e Grupit Parlamentar të Partisë Demokratike, Enkelejd Alibeajn. Në takim me zyrtaren e lartë të DASH ishin edhe Gazmend Bardhi dhe Jorida Tabaku.

Pas takimit, Alibeaj foli për mediat.

“Nuk mund të lija pa diskutuar marrëdhënien e posaçme që ka pasur PD me SHBA, që nga lindja e saj. Me kënaqësi vura re mbështetjen e posaçme për këtë marrëdhënie. Mora mbështetjen e fortë për një opozitë të fortë, të qëndrueshme, për një opozitë pro-amerikane që sheh nga e ardhmja,” tha ai.

I pyetur nëse është takuar për çështjet e brendshme në PD, Alibeaj bëri ‘bisht’ duke thënë: “Në takim u ngritën ato çështje që janë të rëndësishme për Shqipërinë dhe shqiptarët”.

Më tej Alibeaj iu shmang pyetjeve të gazetarëve dhe u largua teksa SYRI TV po e pyeste nëse ishte diskutuar në takim për çështjen e presidentit të ri.