Zvicra rrezikon të mbetet pa sulmues për sfidën e parë të ‘Euro 2016’ ndaj Shqipërisë. Pas Breel Embolo dhe Eren Derdiyok, të cilët rrezikojnë të mungojnë për arsye dëmtimi, helvetikët mund të mbesin edhe pa Haris Seferovic.

Sulmuesi i Eintracht Frankfurtit mund të pezullohet nga UEFA me 2 ose 3 ndeshje. Arsye për këtë është gjuha fyese që sulmuesi përdori ndaj gjyqtarit kryesor të miqësores Zvicër-Belgjikë, për çka edhe u ndëshkua me karton të kuq.

Lajmi u dha nga vet trajneri i kombëtares zvicerane, Vladimir Petkovic, i cili edhe e pranoi se e ka vënë në pozita shumë të vështira.

“Gjithçka do të varet nga raporti i gjyqtarit por Seferovic rrezikon pezullimin. Nëse kjo gjë ndodhë atëherë ai do të humbasë miqësoren ndaj Moldavisë dhe ndeshjen e parë të grupit ndaj Shqipërisë, por rrezikon të mos jetë as ndaj Rumanisë”, u shpreh Petkovic.