Moti i keq gjatë orëve të fundit ka shkaktuar përmbytje në disa zona të Shqipërisë dhe probleme në akse rrugore, ndërkohë për menaxhimin e situatës janë angazhuar edhe Forcat e Armatosura të Shqipërisë, transmeton Anadolu Agnecy (AA).

Sipas njoftimit të Ministrisë së Mbrojtjes së Shqipërisë, nga situata e motit të keq me shi dhe dëborë, Forcat e Armatosura nën koordinimin e Agjencisë së Mbrojtjes Civile janë në gatishmëri për çdo nevojë.

“Intensiteti i reshjeve është shtuar shumë 24 orët e fundit. Shqetësuese është situata e krijuar për shkak të daljes nga shtrati të lumit Vjosa. Kjo ka shkaktuar përmbytje në fshatin Novoselë dhe në fshatin Ferras. Probleme ka sjellë edhe dalja e lumit Osum në fshatin Verrik në Berat, ndaj në bashkinë Dimal e Kuçovë janë evakuuar disa familje. Si pasojë e reshjeve të shumta të dëborës po ndiqet nga strukturat edhe situata në rrugën Bogë-Qafë Thorë dhe Peshkopi-Lurë”, theksohet në njoftim.

Ministria e Mbrojtjes u ka bërë thirrje banorëve ku ka probleme të bashkëpunojnë me autoritetet për evakuim nëse do të jetë e nevojshme.

Në lidhje më situatën nga moti i keq ka reaguar edhe ministri i mbrojtjes i Shqipërisë, Niko Peleshi, i cili në rrjetet sociale shkruan se efektivë të Forcave të Armatosura janë angazhuar prej orëve të para të ditës në ndihmë të banorëve.

“Po punohet me strukturat e emergjencave civile te qarkut të Vlorës e Fierit. Po ndiqet me vëmendje maksimale edhe situata në bashkitë e tjera, ku për shkak të reshjeve që vijojnë me intensitet të lartë ka bllokime rrugësh nga bora apo prurjet e shumta të lumenjve”, ka shkruar Peleshi.