Lugina Barada, ku forcat e regjimit të Asadit në Siri dhe përkrahësit e tij kanë intensifikuar sulmet pas marrjes nën kontroll të Halepit, është bërë fokusi i shkeljeve të armëpushimit

DAMASK – Lugina Barada, ku forcat e regjimit të Bashar al-Asadit në Siri dhe përkrahësit e tij kanë intensifikuar sulmet pas marrjes nën kontroll të Alepit, është bërë fokusi i shkeljeve të armëpushimit.

Armëpushimi i arritur mes palëve ndërluftuese nën garantimin e Turqisë dhe Rusisë, hyri në fuqi më 30 dhjetor, por forcat e regjimit dhe grupet e huaja terroriste e kanë shkelur atë.

Ushtria e Asadit dhe forcat e Hezbollahut, pas marrjes së tërësishme nën kontroll të qendrës së Halepit dy javë më parë, kanë intensifikuar sulmet në Luginën Barada në afërsi të Damaskut dhe rrethinë.

Lugina Barada, e cila prej dy javësh është shënjestër e sulmeve të intensifikuara, edhe pas armëpushimit shpesh herë është duke u sulmuar me bomba fuçi. Gazetarët e AA-së bëjnë të ditur se rajoni mbrëmë ka qenë shënjestër e katër sulmeve ajrore, prej të cilave dy me bomba fuçi, ndërkohë që sulmet vazhdojnë ende që nga mbrëmja.

“Në Barada nuk ka organizatë terroriste”

Nga marrëveshja për armëpushim ishin përjashtuar organizatat si Fronti Al-Nusra dhe DEASH, të cilat Këshilli i Sigurimit i Organizatës së Kombeve të Bashkuara (KS i OKB-së) i cilëson si organizata terroriste.

Ebu Muhammed el-Baradani, përgjegjësi mediatik për Luginën Barada, në deklaratën për gazetarin e AA-së tha se në rajon nuk ka organizatë terroriste.

“Në Luginën Barada nuk ka asnjë organizatë terroriste. Nuk rajon nuk ndodhen as Al-Nusra, as DEASH. Madje, këtu nuk ka as grupe të huaja opozitare që luftojnë. Vendasit e rajonit luftojnë nën çatinë e Ahraru’sh-Sham dhe Ushtrisë së Lirë Siriane (ULS). Këtë e them në mënyrë të qartë dhe të prerë”, tha el-Baradani.

Ndërkaq, komandanti i Ahraru’sh-Sham për rajonin, Ebu Zejd, tha se “Regjimi vazhdon sulmet nga ajri dhe toka edhe përkundër armëpushimit. Njerëzit nuk po mund të lëvizin për shkak të snajperëve. Prej dhjetë ditësh janë të privuar nga nevojat elementare”.

Grupet opozitare pjesë e armëpushimit, përmes një komunikate të përbashkët të publikuar ditë më parë theksuan: “I bëjmë thirrje opinionit ndërkombëtar t’i shohë masakrat e regjimit në Luginën Barada dhe Rusisë si garantuese e regjimit t’i zbatojë detyrimet e saj”.

Pozita e Luginës Barada

Lugina Barada ndodhet 16 kilometra larg qendrës së Damaskut dhe 12 kilometra larg kufirit me Libanin. Në të gjendet edhe burimi i ujit Ajn el-Fixha, prej të cilit kryeqyteti siguron furnizimin më të madh të ujit.

Pjesa e banuar e rajonit e cila strehon afërsisht 100 mijë sirianë në mesin e të cilëve ka edhe persona që kanë ardhur nga rajone të ndryshme të përfshira nga luftimet, përbëhet nga një sipërfaqe prej 12 kilometrash katrorë.

Për t’i marrë nën kontrollet burimet e ujit në rajon, Hezbollahu dhe ushtria e Sirisë në muajin korrik kishin rrethuar Luginën Barada dhe kishin mbyllur të gjitha hyrjet dhe dajlet. Më parë në Luginën Barada nuk kanë ndodhur luftime, kurse shënjestër u bë pas përfundimit të evakuimit të civilëve dhe opozitarëve nga Halepi.

Lugina Barada është e rrethuar me male të larta. Fshatrat që ndodhen në Luginën Barada, siç janë Suk Vadi Barada, Kafr el-Avamid, Husejnije, Dejr Kanun, Kefr ez-Zejt, Ajn el-Hadra, Besime, Dejr Makran, Ajn el-Fixha dhe Afra, janë nën kontrollin e opozitarëve. aa