I paparashikueshëm ky vit për tenorin Saimir Pirgu. Jo vetëm një album shumë i suksesshëm, koncerte, turne, shfaqje në skenat më të mëdha botërore, kritika nga më të mirat.

Lajmi më i fundit vjen nga çmimet më të mëdha muzikore në botë: Grammy Awards. Opera, në të cilën Saimir Pirgu ka interpretuar një nga rolet kryesore, është pretendente për çmimin “Best opera recording”. Bëhet fjalë për operën “Szymanowski: Król Roger”, nën drejtimin Antonio Pappanos, i cili dirigjon Orkestrën e Royal Opera House dhe me regji të Kasper Holten. Interpretojnë Georgia Jarman, Mariusz Kwiecieñ, Saimir Pirgu etj. Opera është një produksion i Royal Opera House në Londër.

Pas suksesit në skenën londineze, është shfaqur me po aq sukses edhe në kinema DVD-ja e kësaj opere, publikuar nga “OpusArte”, që e vuri atë edhe më në vëmendje të publikut dhe kritikës. Kjo e fundit ka veçuar tenorin shqiptar Saimir Pirgu në rolin e Shephert, të cilin herë e quanin një zbulim e herë të mrekullueshëm. “Indipendent” shkruan: “Pirgu is superb”, teksa vë theksin në karizmën vokalistike dhe aktoriale të “tenorit të shkëlqyer dhe të zjarrtë shqiptar”, që tërheq vëmendjen në gjithë produksionin.

Opera ku interpreton Pirgu është në garë edhe me katër produksione të tjera. Ky është niveli më i lartë që një këngëtar lirik shqiptar ka arritur deri më sot dhe do të ishte një ngjarje e jashtëzakonshme, nëse një shqiptar do të tërhiqte trofeun e “Grammy Awards”, në edicionin e tij të 59-të. Tashmë lajmi është zyrtar.

Mes dhjetëra çmimesh, që ndahen në të gjitha zhanret muzikore, që nga popi, rroku, xhazi, R&B etj., ndahen edhe çmimet në kategorinë e muzikës klasike dhe “Szymanowski: Król Roger” është një ndër të nominuarit. TENORI Edhe pse ky vit ka qenë shumë i mbarë për tenorin Saimir Pirgu, të qenët pjesë e kastit të nominuar për çmimet më të mëdha muzikore në botë ishte pa dyshim një befasi.

I pyetur nga “Panorama”, ka shprehur gati nota habie. “Normalisht që një lajm i tillë më ka gëzuar e për më tepër surprizuar. Nuk isha në dijeni që shtëpia ime diskografike “OpusArte”, që ka publikuar DVD-në, kishte hedhur kandidaturën për ‘Grammy Award 2017’”, thotë Saimir Pirgu. Nëse do të shpallen fitues, sigurisht që ai nuk e di, por të qenët në pesëshen më të mirë, e bën jo pak entuziast dhe pse jo krenar për arritjet.

NOMINIMET

“Corigliano: The Ghosts of Versailles” — James Conlon, conductor;
Joshua Guerrero, Christopher Maltman, Lucas Meachem,
Patricia Racette, Lucy Schaufer & Guanqun Yu; Blanton Alspaugh,
producer (LA Opera Orchestra; LA Opera Chorus)
“Handel: Giulio Cesare” — Giovanni Antonini, conductor; Cecilia
Bartoli, Philippe Jaroussky, Andreas Scholl & Anne-Sofie von Otter;
Samuel Theis, producer (Il Giardino Armonico)
“Higdon: Cold Mountain” — Miguel Harth-Bedoya, conductor; Emily
Fons, Nathan Gunn, Isabel Leonard & Jay Hunter Morris; Elizabeth
Ostrow, producer (The Santa Fe Opera Orchestra; Santa Fe Opera
Apprentice Program for Singers)
“Mozart: Le Nozze Di Figaro” — Yannick Nézet-Séguin, conductor;
Thomas Hampson, Christiane Karg, Luca Pisaroni & Sonya
Yoncheva; Daniel Zalay, producer (Chamber Orchestra of Europe;
Vocalensemble Rastatt)
“Szymanowski: Król Roger” — Antonio Pappano, conductor; Georgia
Jarman, Mariusz Kwiecieñ & Saimir Pirgu; Jonathan Allen, producer
(Orchestra of the Royal Opera House; Royal Opera Chorus)

ALMA MILE