VOAL

VOAL

Copyright © 2022

VOAL

RUDINA HAJDARI – RRËFEHET VAJZA E AZEM HAJDARIT

September 12, 2015

(Kjo intervistë është dhënë me rastin e 10 vjetorit të vrasjes të Azem Hajdarit)

12-09-2015 11-14-28

Një ditar me çelës. I ati ia dhuroi për vitin e ri. I fundit vit me Azemin. Dikush e la pa baba në moshën 11-vjeçare. Rudina mban mend përqafimin e fundit me të atin. E ëma, Fatmira, s’e la ta shihte të vdekur. Duhej ta mbante mend vetëm të gjallë. Ndaj nuk i urreu dot ata që i vranë babin, sepse ishte një fëmijë që s’dinte çfarë ishte urrejtja. Sot, Rudina është e rritur. E gjeta tek porta e hyrjes së shtëpive teksa kthehej nga gazetashitësi. Në dorë mbante një dëng me shtypin e ditës. E qeshura në fytyrën e njomë që i është dashur të laget nga lotët në një moshe fare të re, të drejton drejt dhomës së pritjes. Pultin e televizorit e fikson tek lajmet politike të ditës. Reflekton hijen e të atit, shtatlartësinë e tij, pse jo dhe çiltërsinë që e karakterizonte atë, njeriun e madh, që arriti të krijonte në kohën më të vështirë, miticizmin. Dhe e bija, Rudina, tashmë një zonjushë e vërtetë, që prej shtatë vitesh studion në Amerikë, drejt së cilës do të udhëtojë sot, rrëfen për “standard”, dhimbjen e ikjes së babit, çastet e vështira, kujtimet më të paharruara dhe si gjeti forcën për të mos e lënë dhimbjen që ta mundë që fëmijë të vogël. Të gjitha nisi t’i hedhë në një ditar. Ato vargjet e dhimbjes, me idenë se në një të ardhshme të shpejtë do të shkruajë dhe një libër për të atin. Pse jo dhe të ndjekë rrugën e tij në politikë. Studimet për marrëdhëniet ndërkombëtare në një nga universitetet e SHBA-së janë fillesa e kësaj rruge. Por sot në moshën 21-vjeçare, thotë se ka mall…

Rudina, ç’ne që ke blerë sot gjithë këto gazeta?
(Qesh). Më pëlqen të jem në kontakt me informacionin, pasi edhe shkolla që bëj ka të bëjë pikërisht me këtë gjë. Më duket sikur e kam një lloj detyrimi. Por ndjekja e lajmeve dhe leximi i gazetave më ka mbetur dhe nga familja, prej babit ngaqë merrej me politikë. Nga ana tjetër duke u rritur, jam bërë dhe më kureshtare për gjërat që dua t’i njoh, të jem në kontakt me atë çfarë ndodh çdo ditë. Megjithatë, sot gazetat i bleva sepse kanë shkruar për babin.

Për çfarë studion në Amerikë?
Studioj në Nju Jork në universitetin “Fordam” për Marrëdhënie Ndërkombëtare. Tani në shtator hyj në vitin e katërt. Unë kam shkuar në Amerikë në moshën 14 vjeçe dhe shkëputja ime me Shqipërinë ishte në një moshë shumë të vogël, të brishtë dhe për mua fillimi ishte shumë i vështirë. Por isha në gjendje të përshtatesha shpejt me kulturën amerikane, ku arrita të krijoj shoqëri amerikane. Në Tiranë vij gjatë pushimeve të verës, edhe për vitin e ri, pasi më mungon shumë familja ime, të afërmit e mi, shoqëria ime këtu.

Zgjedhje e kujt ishte studimi për Marrëdhënie Ndërkombëtare?
Ishte zgjedhja ime, sepse mendoj se ca gjëra janë të trashëguara gjenetikisht edhe nga im atë. Them se për këtë kam më shumë prirje dhe e gjej veten shumë rehat në këtë drejtim. Marrëdhëniet ndërkombëtare më pëlqejnë shumë dhe mendoj të kontribuoj në këtë fushë.

Megjithatë ju tani duhej të ishit në Amerikë, pasi viti shkollor ka filluar atje. Pse kjo vonesë?
Po, realisht duhej të kisha filluar vitin e ri shkollor, por fakti që këtë vit babi ka përvjetorin e 10-të, unë duhej të isha këtu pranë familjes sime. Nuk kam mundur vitet e tjera, pasi çdo 12 shtator më gjente në Nju Jork, ndaj këtë herë mendova ta shtyj udhëtimin tim. Kam 7 vjet atje, pasi edhe gjimnazin e kam kryer në Amerikë dhe gjykova se këtë herë duhej të isha këtu.

Dhe fakti se këtë përvjetor ishe në Tiranë, besoj se për ty ka qenë më emocionues?
Kur jam atje, ia ndjej mungesën babit. Kur jam këtu gjërat janë më emocionuese, sepse gjithçka përreth meje ka të bëjë me babin tim. Doja të isha e pranishme në këtë përvjetor, pasi çdo gjë këtu me kujton babin tim.

Gjatë ceremonive zyrtare gjatë këtyre ditëve takuat edhe ish-miqtë e babit në politikë, apo jo?
Po aktivitetet që u organizuan me këtë rast na dhanë këtë mundësi. Sidomos me z. Berisha, i cili më reflektoi babin kur e takova. U tregua shumë i dashur me mua, më pyeti dhe për shkollën dhe si vete me studime. Po ashtu edhe Genc Pollon. Babi im ka qenë shumë shokë me të. Jozefina po ashtu u tregua e dashur tek ceremonia në Presidencë. Edhe Presidenti Bamir Topi. Më takuan pothuajse të gjithë dhe u ndjeva mirë mes tyre. Por unë aty isha për babain tim dhe të jesh mes njerëzve që e vlerësojnë atë është krenari për mua. U ndjeva shumë mirë.

Si ndiheni kur të tjerët ju thonë vajza e Azem Hajdarit?
Unë jam me fat që jam vajza e tij. Jam krenare për këtë. Por nuk më pëlqen të më thonë kjo është vajza e Azemit. Kjo më ndodh edhe në Amerikë me shqiptarët që jetojnë atje. Dua të kem identitetin tim dhe gjërat t’i arrijë vetë, jo nisur nga emri i babit. Aktualisht jam e pavarur aty ku jam dhe i përballoj gjërat vetë. Shkoj shumë mirë me mësime dhe kjo është meritë e imja dhe e askujt tjetër.

Mirëpo seç kam përshtypjen që pas studimeve do të ndiqni rrugën e babait…
E ardhmja është shumë vështirë për t’u parashikuar, por ajo që mendoj tani janë studimet që t’i mbyll me rezultatet sa më të mira, pasi jam në vitin e fundit të universitetit. Aktualisht imediate për mua janë studimet dhe të plotësohem nga ana intelektuale, me qëllim që të kontribuoj për Shqipërinë. Dijet që do marr në universitet dua t’i investoj këtu në vendin tim dhe jo jashtë shtetit.

Rudina çfarë kujton nga nata e vrasjes së Azemit?
Isha vetëm 11 vjeçe atëherë. Atë natë e kishim lënë të pinin një kafe të gjithë bashkë dhe babi na mori në telefon dhe na tha të shkonim tek selia e PD-së. Vajtëm atje bashkë me mamin e me Kirin. Babi erdhi, zbriti nga zyra. Na takoi dhe na tha të uleshim përballë tek lokali dhe dukej shumë i lumtur, pasi atë ditë kishte zhvilluar një miting në Fier dhe gëzimi i tij ndikoi shumë edhe tek ne. Sepse i tillë ishte babi, sikur të impononte të qeshurën, gëzimin. Pasi pimë kafen, ne u kthyem në shtëpi që të tre, kurse babi u kthye sërish në seli.

Cilat ishin fjalët që ju tha teksa po ktheheshit në shtëpi, ndërkohë që ai do qëndronte akoma tek PD-ja?
Mbaj mend që kur zbriti në oborrin e PD-së, unë vrapova drejt tij dhe po e përqafoja fort. S’e dija që ai ishte përqafimi i fundit me të. Dukej shumë i lumtur. Edhe në tavolinë reflektonte gëzim. Po fliste me entuziazëm edhe për mitingun e Fierit. Pastaj u ngritëm dhe na tha ikni në shtëpi, pasi do vonohem dhe pak dhe do vij edhe unë në shtëpi. Më puthi mua, më tha shpirt i babit dhe u ndamë me të.

Dhe çfarë ndodhi pastaj?
U kthyem në shtëpi. Mami po përgatiste darkën dhe diku rreth orës 9 të darkës, dikush e telefonoi dhe i tha: “Hapni radio “Kontaktin” se diçka i ka ndodhur Azemit”. Nuk i kishte thënë se e kanë vrarë. Unë s’po kuptoja fillimisht asgjë, sepse isha në moshë shumë të vogël. Mami vajti me nxitim të hapte radion dhe aty jepej lajmi se kanë vrarë Azem Hajdarin. Por mua m’u duk e pabesueshme, pasi ishte thjesht një zë që dilte nga radioja dhe nuk ishte shumë i besueshëm.

Por që gjithsesi ishte një lajm i vërtetë…
Për fatin tonë të keq po. Ishte një goditje e rëndë për ne të gjithë. Dhe mendimi i parë i imi dhe Kirit ishte që ta qetësonim mamin, pasi ajo ishte 7-muajshe shtatzënë, duke i thënë që nuk është e vërtetë. Kishim shumë frikë nga tronditja e saj dhe i ndenjëm shumë afër. Por mua personalisht për momentin nuk m’u duk real lajmi që po dëgjonim. Shpresonim në një lajm të dytë, prisnim një telefonatë tjetër që të na thoshte se nuk ishte e vërtetë. Por nuk ndodhi kjo gjë. Më vonë nisën njerëzit të vinin për të na qëndruar pranë dhe kjo e bëri dhe më reale gjendjen. Është e vështirë t’i përshkruash ato çaste. Janë më të dhimbshmet e jetës sime.

Dhe më pas do vinte momenti kur trupin e pajetë e sollën në shtëpi… Si e kapërcyet këtë çast?
Pasi ndodhi tragjedia në shtëpinë tonë, mami na ndau veç mua dhe Kirin në një dhomë tjetër dhe na tha: “Është më mirë që ju të dy të mos e shikoni babin e vdekur. Dua ta kujtoni vetëm të gjallë…”. Edhe tani që flasim bashkë nuk e besoj që babi im nuk jeton më. Babin tim e pash të vdekur vetëm të nesërmen në faqet e gazetës. Ajo foto më frikësoi dhe nuk kam dashur ta shoh më kurrë. Por kur pashë gjithë ata njerëz në shtëpi, solidaritetin e qytetarëve, kuptova se sa i rëndësishëm ishte babi im dhe çfarë ndikimi kishte ai tek njerëzit. Kuptova se ishte njeri i jashtëzakonshëm, me vlera të jashtëzakonshme. Të paktën kjo na bënte të ndjeheshim mirë.

Megjithatë pas ikjes së babit, pas dy muajsh erdhi në jetë Azemi i vogël. Dhimbjen e treti gëzimi në familje.
Po. Ishte një gëzim i madh për familjen tonë. Nuk e dinim që do të ishte djalë, pasi mami s’kishte dashur ta dinte para se të lindte. Dhe kur lindi djalë, ishim shumë të lumtur, pavarësisht se unë doja të ishte vajzë, që të kisha dhe një motër. Por fakti që babi nuk jetonte më, lindja e Azemit, ishte një mrekulli. Na plotësoi babin, pasi ne mbetëm sërish 4 veta në familje, ndonëse donim që Azemi i vogël të ishte i pesti. Megjithatë, mbeti prapë numri 4 në familjen tonë. Ndjemë gëzimin që kishim humbur që nga ikja e babit, pasi Azemi i vogël na kënaqte me gjestet e tij. Duke qeshur, na sillte një atmosferë të gëzuar në familje, gjë që kishte munguar që nga 12 shtatori. Kështu që ishte një dhuratë nga Zoti.

Cili është kujtimi më i bukur që keni nga babi?
Për vitin e ri babi më dhuroi një ditar, i cili ishte me çelës. Në faqen e parë më shkroi: “Këtë ditar ia dhuroj vajzës sime”. Ishte dhe një dedikim i vogël. Që atëherë jam kujdesur për këtë ditar si një gjë të shtrenjtë, që ma la im atë. E mbaj gjithnjë me vete, pasi më ngjan sikur me mua është dhe një pjesë e babit tim.

Çfarë shkruat më pas në fletët e atij ditari?
Shkruaja për ditët e mia pa babin. Madje, kam shkruar edhe poezitë e mia në këtë ditar. Dhe pikërisht kur ndodhi dhe tragjedia e 12 shtatorit.

Keni shkruar poezi për babin?
Po, po. Janë disa. I mbaj në ditarin tim.

Këto vjersha janë shenja e parë e të shkruarit të një libri vetëm për Azemin?
Ndoshta. Gjithçka i përket së ardhmes. Vjershat e para për të i shkrova me emocione, edhe duke qarë, pasi nuk doja që të tjerët të shikojnë lot në sytë e mi. Jam me fat që isha një fëmijë i fortë.

Çfarë pëlqenit më tepër tek Azemi?
Dashurinë që tregonte për ne familjen e tij. Më i afrueshëm ishte me mua në veçanti. Emrin tim thërriste më shpesh nëpër shtëpi apo kudo që të ishim. Ndoshta dhe ngaqë emrin tim e kishte lënë amanet gjyshja ime nga babi, pasi i kujtonin rudinat në Tropojë, lëndina të bukura të mbushura plot me lule.

Dhe për çfarë të ka marrë malli më shumë?
Për përqafimet e tij të pafundme. Për puthjet atërore. Janë më të ngrohtat… të mbushura plot dashuri. (Ndalon bisedën dhe qan).

Rudina dikush të la pa baba, jetime në moshën 11-vjeçare. A ndjen urrejtje në shpirt për atë që i mori jetën Azemit?
Jo. Nuk kam urrejtje, edhe pse më shkaktoi dhimbjen më të madhe të jetës sime bashkë me familjen time. Atë natë që vranë babin, unë sapo kisha mbushur 11 vjeç. Pra, isha fëmijë dhe nuk mund të urreja, pavarësisht asaj që na shkaktuan. Një fëmijë nuk di të urrejë. Nuk ka vend urrejtja tek një fëmijë.

Cili është ai veprim që keni vlerësuar më shumë tek ai?
Mbaj mend kur erdhën kosovarët e parë në Shqipëri, që iknin nga lufta me serbët, babi u bë shumë keq. Ato ditë ai sikur mbante një shqetësim brenda vetes, derisa një natë na tha të gjithëve se do të merrte disa kosovarë në shtëpi. Të gjithë reaguam shumë mirë dhe kjo e entuziazmoi edhe më tepër. Vendin e trishtimit tek babi e zuri gëzimi kur morëm kosovarët në shtëpi. Sillej me ta sikur kishte vite që i njihte. E habitshme ishte se babi gjente kohë për të gjithë ne. Ishte një njeri shumë i dashur, si me ne të familjes, si me mysafirët e rinj, ashtu dhe me ata që takonte çdo ditë.

Dhe momenti më i bukur me babin?
Ishim me pushime në Durrës, të cilat për fatin e keq ishin të fundit me babin. Ishte data 16 gusht, pak ditë para se ta vrisnin. Unë atë ditë kisha ditëlindjen dhe babi do vinte nga Tirana në Durrës, për ta festuar të gjithë bashkë. Kisha ftuar dhe shoqërime time. Kur erdhi babi iu hodha në qafë dhe e puthja kur më hapi dhuratën. Ishte një kukull e vogël që më ngjante shumë mua. Babi kishte kërkuar nëpër disa dyqane, derisa kishte pikasur atë që përafronte me pamjen time. Diçka që do i dukej si më e përshtatshmja për mua. Dhe në të vërtetë ishte gjë shumë e bukur, ishte shumë e veçantë, pasi ideja e tij ishte që unë ta mbaja gjithnjë dhe ta ruaja edhe kur të rritesha. Dhe e kam ruajtur me shumë kujdes. Ndonëse më ngjan mua, ajo kukull më kujton babin që e kam dashur shumë.

Por që pas 27 ditësh atë e vranë. Gjatë atyre ditëve, a shfaqte ndonjë shenjë mërzie apo ankthi?
Jo, jo. Di vetëm që ato ditë ishte shumë i zënë me punë. Edhe pushimet nuk arriti t’i bënte të plota me ne në Durrës. I bënte vajtje-ardhje nga Tirana, pasi thoshte se kishte shumë punë. Edhe telefonatat mbaj mend që ishin të shpeshta kur vinte të na takonte. Nuk i pushonte telefoni. Kishte dhe njerëz që vinin e takonin në Durrës, ku pushonim. Por kohën që ishte me ne nuk reflektonte shqetësim tjetër përveç punës që kishte në politikë.

Fliste për çështje politike në shtëpi?
Jo. Rrallë. Na pyeste për shkollën mua dhe Kirit. Na plotësonte dëshirat që kishim. Dilte me ne në darka, sidomos pasi kishte pak kohë më të lirë. Pastaj nuk mund të shmangte gjithsesi edhe çështjet politike, pasi në shtëpinë tonë dëgjoheshin të gjitha lajmet, lexoheshin gazetat. Në një farë mënyrë unë dhe Kiri u rritëm me to.

Rudina është e vështirë që një vajzë të rritet pa baba?
Është shumë e vështirë. Më është dashur në një moshë fëminore që të bëhem e fortë, madje t’i jap kurajë dhe mamit kur dëgjuam lajmi e ikjes së babit, pasi siç e thashë dhe më lart gjatë bisedës ajo ishte shtatzënë, 7-muajshe. Megjithatë më duket sikur babi jeton çdo ditë me ne, është pranë nesh në çdo moment të jetës. Nuk dua të përmend kurrë fjalën vdekje, sepse edhe sot nuk më besohet që ai ka vdekur. Kanë qenë këshillat e tij që kur të rritem të përballem me çdo vështirësi të jetës. Ndonëse askush nga ne s’e kishte menduar këtë lloj vështirësie. Por që gjithsesi them se jam treguar e fortë, gjë të cilën do ta bëj edhe në vijimësi, pasi babi donte që të ecja në jetë dhe të shikoja vetëm përpara, drejt së ardhmes. Ndaj them se prezenca e tij është gjithnjë afër meje. Jetoj me të çdo çast të jetës sime.

Nëse do të jetonte sërish, çfarë do doje t’i thoshe babit tënd?
T’i tregoja se ja ku jam tani, që jam rritur, që vazhdoj studimet në atë vend ku na çoi të gjithë familjen dhe dukej qartë se dëshira e tij ishte ndoshta të bëja një universitet amerikan. Jam ajo që babi ka dashur, sidomos studimet e mia në SHBA. Kam mall gjithsesi për të. Më mungon shumë babi…

Çfarë i mbeti Rudinës peng, që nuk i tha babit?
Do doja të bëja shumë biseda me të. Fakti që isha fëmijë, nuk mund të bëja biseda serioze me babin. Tani që jam rritur është më ndryshe. Do të doja ta kisha pranë dhe të flisja pa fund me të për gjithçka e për çdo gjë. Më mungojnë këshillat e tij.

Poezi

Rudina Hajdari

Babi im, hero i demokracisë

O ditë e shtunë, ditë e mallkuar,
Me thikë në zemër më kanë qëlluar.
Një krismë u ndje në shpirtin tim,
Për babin, për babin tim.
Një kujtim më mbetet nga babi im”
“njeriu nuk është jetim me demokracinë.
Po të isha pa baba, e pa demokraci,
Atëherë do të isha vërtet jetim.
Për babin tim po vajton
Shqipëria, Kosova dhe Çamëria.
12 shtator ditë e zezë
Çdo njeri hap radio “Kontakti”,
Ka ndërruar jetë Azem Hajdari
Iku zemra e çdo shqiptari.
U dridh një mal,
U thye një shkëmb,
Ditë të zeza po kalojmë,
Në sytë e mia
Lot po pikojnë,
Zemra bën të mendojë
Babit tim, një vjershë t’ia kushtojë.
Për ty poezia s’mbaron kurrë
Ishte trim i vërtetë,
Po e mbyll këtë poezi
Me dy pika lot në sy…

Babi im…

Aty pranë memorialit të tij,
Ulem. Gjithçka më kujtohet
Kur isha e vogël
E kapja
E shtrëngoja
Buzët e tij viheshin në gaz
Nga goja e tij
Rridhte fjala:
Rudina ime e dashur,
Kur të rritsh më kujto
E kurrë mos më harro.
Dua të qaj
Por nuk qaj dot,
Lotët e mia janë tharë.
Dua të urrej njeriun që ka vrarë
Por nuk urrej dot
Jam fëmijë dhe nuk dua ta di
Ç’është urrejtja në këtë gjithësi.
Kjo letër e bardhë është mbushur me lot
Këtë poezi
S’mund ta mbaroj dot.

  • twitter
  • facebook
  • linkedin
Fjalë kyçe: , , ,

Komentet

Lajme të ngjashëm

‘Hajdut, po të zënë hakat e…’- Veliaj në SPAK, qytetarët protestë para Prokurorisë së Posaçme

Disa qytetarë kanë protestuar para ambienteve të Prokurorisë së Posaçme, teksa kryebashkiaku Erion Veliaj u paraqit këtë të enjte në SPAK.

Me pankarta në duar, protestuesit kanë kërkuar dënimin e Veliajt, të cilin e cilësojnë hajdut dhe mashtrues.

Image

“Mashtrues 99-sh, hajdut, po të zënë hakat e Kombinatit”, shkruhej në një nga pankartat e protestuesve.

Image

Kryebashkiaku Veliaj po jep deklarime në lidhje me hetimin e regjistuar nga SPAK, për veprën penale të “korrupsionit pasiv të funksionarëve të lartë shtetërore dhe të zgjedhurve vendorë”.

BKH me urdhër të SPAK, ditë më parë i sekuestroi celularin gruas së Veliajt, Ajola Xoxës, pas një kontrolli të zhvilluar në banesën e tyre, teksa kryebashkiaku nuk ishte në Shqipëri.

Gjykata e Posaçme e Apelit dy ditë më parë, refuzoi ankimin e bërë nga Ajola Xoxa, bashkëshortja e kryebashkiakut të Tiranës, Erion Veliaj, kundër vendimit që lejoi SPAK-un ta kontrollojë dhe sekuestrojë aparatin telefonik celular.

Në të njëjtin vendim Apeli rrëzoi të njëjtat pretendime të ngritura kundër kontrolleve nga vëllai i kryebashkiakut, Arbër Veliaj dhe dy kompani, ambientet e të cilave kaluan në filtrën e agjentëve të BKH.

Albin Kurti firmos vendimin, Qeveria e Kosovës jep 1 mln euro për Luginën e Preshevës

Qeveria e Kosovës ka zhvilluar dje një mbledhje elektronike, në të cilën ka marrë tri vendime.

Një nga vendimet është edhe ndarja e 1.108.529 euro mbështetje për të gjitha familjet shqiptare nga Presheva, Medvegja dhe Bujanoci, që në mënyrë aktive merren me bujqësi, transmeton Zeri.info.

Këto janë vendimet:

– Aprovuar Rregulloren për Procedurat dhe Kushtet e Financimit të Organizatave Sportive;

– Ndarë 1,108,529 euro mbështetje për të gjitha familjet shqiptare nga Presheva, Medvegja dhe Bujanoci, që në mënyrë aktive merren me bujqësi sipas thirrjes publike të Këshillit Kombëtar Shqiptar (KKSH), duke përfshirë këtu financimin për programet nga thirrja publike e KKSH-së për avancimin dhe socializmin e fëmijëve me nevoja të veçanta;

– Aprovuar kërkesën e Ministrisë së Financave, Punës dhe Transfereve për kursime dhe ndarje.

LAJMI I FUNDIT- Kryebashkiaku i Tiranës Erion Veliaj paraqitet në SPAK

Kryetari i Bashkisë Tiranë Erion Veliaj paraqitet në Prokurorinë e Posaçme.

Lajmi konfirmohet për BalkanWeb nga gazetarja Klodiana Lala.

Gazetarja Klodiana Lala raporton se Veliaj do të pyetet në kuadër të hetimit që po zhvillohet ndaj tij për korrupsion pasiv.

Më herët është marrë edhe dëshmia e bashkëshortes së tij Ajola Xoxa.

Kujtojmë se Prokuroria e Posaçme ushtroi kontroll në telefonin e Xoxas.

Papa Françesku bën thirrje t’i jepet fund luftës në Ukrainë

VOA Marrë nga Reuters

Papa Françesku bëri thirrje sot për bisedime mes Ukrainës dhe Rusisë për t’i dhënë fund luftës që nisi me sulmin në shkallë të gjerë të Moskës, më shumë se dy vite më parë, e që ka shkaktuar me dhjetëra mijëra të vrarë.

Në fjalimin e tij në ditën e Krishtlindjes, duke iu referuar konfliktit në Ukrainë Papa bëri thirrje për “të gjetur guximin e nevojshëm për t’u hapur derën negociatave”.

Duke folur nga ballkoni qendror i Bazilikës së Shën Pjetrit, para mijëra njerëzve të mbledhur në shesh, Papa tha se uronte që “zhurma e armëve në Ukrainën e shkatërruar nga lufta, të ndalej”.

Ai bëri thirrje gjithashtu për gatishmëri për “dialog e për t’u takuar”, në mënyrë siç tha ai “të arrihet një paqe e drejtë dhe e qëndrueshme”.

Papa Françesku, i cili ka qenë Papë që nga viti 2013, u kritikua nga zyrtarët ukrainas këtë vit kur tha se vendi duhet të ketë guximin për të negociuar me qëllim dhënien fund të luftës me Rusinë.

Më parë Presidenti ukrainas Volodymyr Zelenskiy e kishte përjashtuar më mundësinë e bisedimeve për paqe pa rivendosjen e kufijve të Ukrainës së paraluftës.

Por zoti Zelenskiy ka treguar gatishmëri në rritje që nga momenti i rizgjedhjes së Donald Trump-it si president i Shteteve të Bashkuara, për të hyrë në negociata.

Më herët gjatë muajit dhjetor, zoti Zelenskiy hodhi idenë e një zgjidhjeje diplomatike që do të përfshinte “ngrirjen” siç tha ai të linjave aktuale të betejës dhe vendosjen e trupave të huaja në Ukrainë. Rusia ka kërkuar që Ukraina të heqë dorë nga ambiciet e saj për t’iu bashkuar aleancën ushtarake të NATO-s.

Po sot Papa Françesku, bëri thirrje për t’i dhënë fund konflikteve, politike, sociale apo ushtarake, në vende si Libani, Mali, Mozambiku, Haiti, Venezuela dhe Nikaragua.

Shqiptarët më të frikësuarit në rajon nga inteligjenca artificiale, 46% e tyre mendojnë se IA do t’i dëmtojë njerëzit!

Nga reduktimi i nevojë për fuqi punëtore, tek.. Efektet negative në ekonomi

 

Inteligjenca artificiale është duke rritur përdorimin në popullatë nga dita në ditë, por Shqiptarët janë më të frikësuarit në Rajon në raport me efektet afatgjata në ekonomi të përdorimit të saj.

 

Anketa “Security Meter” që bëri Këshilli i Bashkëpunimit Rajonal në gjashtë vendet evidentoi se 46 për qind e Shqiptarëve mendonin se Inteligjenca Artificiale do t’i dëmtojë më së shumti njerëzit (Ekonominë) në 20 vitet e ardhshme, përqindja më e lartë në Rajon. Gjithashtu Serbet dhe Boshnjakët ishin të frikësuar nga ky fakt me përkatësisht 45 dhe 44% e të anketuarve mendonin se përdorimi i inteligjencës artificiale do të ishte të dëmshëm.

Po në anën tjetër Shqipëria ka gjithashtu përqindjen më të lartë të njerëzve që mendojnë se IA i ndihmon. Anketa zbuloi se 24% e shqiptarëve mendojnë se inteligjenca i ndihmon (shiko grafikun e mëposhtëm).

Përdorimi i inteligjencës artificiale (IA) mund të ketë efekte negative në ekonominë shqiptare. IA mund të automatizojë procese dhe detyra, duke reduktuar nevojën për fuqi punëtore në industri të ndryshme, si shërbimet, prodhimi dhe administrata publike.

Gjithashtu përdorimi i IA mund të favorizojë më shumë ato biznese që kanë më shumë akses në teknologji dhe kapital, duke krijuar pabarazi më të mëdha midis bizneseve të mëdha dhe atyre të vogla, si dhe midis grupeve të ndryshme shoqërore.

Për shkak të mungesës së investimeve në edukimin dhe trajnimet teknologjike, shumë individë dhe kompani në vendin tonë mund të mbeten pas, duke mos qenë në gjendje të përfitojnë nga IA.

Implementimi i IA kërkon investime të mëdha fillestare për infrastrukturë teknologjike, trajnim dhe mirëmbajtje, gjë që mund të jetë e vështirë për një ekonomi në zhvillim si Shqipëria.

Industria dhe sektorët që mbështeten te aftësitë tradicionale, si artizanati dhe bujqësia, mund të ndihen të kërcënuar nga teknologjitë e reja, duke humbur rëndësinë e tyre kulturore dhe ekonomike. Nëse Shqipëria nuk zhvillon kapacitetet e veta në IA, mund të bëhet e varur nga teknologjitë dhe kompanitë e huaja, duke ulur kontrollin mbi ekonominë kombëtare.

Nga ana tjetër përdorimi i inteligjencës artificiale (IA) sjell gjithashtu një sërë përfitimesh që mund të ndihmojnë në modernizimin dhe përmirësimin e shumë sektorëve.

IA mund të ndihmojë në automatizimin e proceseve dhe detyrave të përsëritura, duke ulur kohën dhe kostot e prodhimit. Kjo lejon bizneset të jenë më efikase dhe konkurruese në treg.

Në sektorët publikë, si shëndetësia, arsimi dhe administrata, IA mund të ndihmojë në digjitalizimin e proceseve, reduktimin e burokracisë dhe ofrimin e shërbimeve më të shpejta dhe më cilësore për qytetarët. Me ndihmën e analizave të avancuara të të dhënave, IA mund të ofrojë njohuri të vlefshme për bizneset dhe qeverinë, duke përmirësuar planifikimin dhe vendimmarrjen në fusha të ndryshme.

Gjithashtu adoptimi i IA mund të nxisë zhvillimin e sektorëve të rinj ekonomikë, si teknologjia e informacionit, startup-et digjitale dhe zhvillimi i aplikacioneve, duke krijuar vende të reja pune dhe mundësi investimi./Monitor

re

 

Osmani thotë se Lista Serbe është angazhuar në akte terroriste, Petkoviq e quan këtë deklaratë të “turpshme”

Presidentja e Kosovës, Vjosa Osmani vlerëson se Lista Serbe është e angazhuar në akte terroriste, akte agresioni dhe cenim të rendit kushtetues, ka thënë kabineti i Presidencës në disa përgjigje për Radion Evropa e Lirë.

Kjo deklaratë vjen një ditë pasi Komisioni Qendror i Zgjedhjeve (KQZ) nuk e ka certifikuar Listën Serbe – partinë më të madhe të serbëve në Kosovë – për zgjedhjet parlamentare të 9 shkurtit, pas shqetësimeve të ngritura nga përfaqësues të partisë në pushtet, Lëvizjes Vetëvendosje se, kjo parti nuk e njeh shtetin e Kosovës, dhe atij nuk i referohet me emrin zyrtar, por si “Kosova dhe Metohia”.

Shtetet e Bashkuara, Bashkimi Evropian, Mbretëria e Bashkuar dhe Gjermania kanë shprehur shqetësim dhe keqardhje për këtë vendim dhe kanë bërë thirrje që procesi i certifikimit të bëhet mbi baza të standardeve ligjore dhe procedurave në përputhje me ligjet, dhe jo në bazë shqyrtimesh politike.

Sipas kabinetit të saj, Osmani beson se KQZ-ja duhet të vendosë në mënyrë të pavarur.

“Çdo vendim i nxjerrë nga KQZ-ja, duhet të respektohet, si pjesë e përkushtimit ndaj sundimit të ligjit dhe ruajtjes së integritetit institucional”, është cituar të ketë thënë Osmani.

Lista Serbe është ankuar për këtë vendim në Panelin Zgjedhor për Ankesa dhe Parashtesa dhe vendimi pritet të bëhet publik brenda 48 orëve.

Sipas kryetarit të kësaj partie – që gëzon mbështetjen e Beogradit zyrtar – Zllatan Ellek, vendimi për moscertifkim është absurd, antiserb dhe jodemokratik dhe është bërë me kërkesë të kryeministrit të Kosovës, Albin Kurtit.

 

Në një konferencë për media, kryeministri i Kosovës është pyetur për të komentuar deklaratën e Osmanit dhe mundësitë për shpalljen e Listës Serbe si organizatë terroriste, por ai ka rikujtuar se autoritetet e Kosovës kanë shpallur terroriste grupet si Brigada Veriore dhe Mbrojtja Civile dhe që Lista Serbe është e ndryshme nga karakteri, andaj nuk janë vendosur në të njëjtën kategori.

“Megjithatë, u përket organeve të ndjekjes dhe sigurisë, sidomos Prokurorisë së Shtetit dhe gjykatave, që të zbardhin shumë më tepër, dhe me shpejtësi të shtuar të sjellin drejtësi edhe mbi lidhjet e mundshme mes Mbrojtjes Civile dhe Brigadës së Veriut në njërën anë, dhe Listës Serbe në anën tjetër”, ka thënë Kurti.

Petar Petkoviq, kryetar i Zyrës për Kosovën në Qeverinë e Serbisë, ka thënë se deklarata “e turpshme” e presidentes Osmani vetëm konfirmon që vendimi i KQZ-së ka qenë politik dhe është marrë nën urdhrat e Kurtit.

“Vjosa dhe Kurti as nuk ia dinë për demokraci dhe as për sundim të ligjit. Me këtë qasje, Prishtina tregon se Lista Serbe dhe uniteti i serbëve është halë në sy për ta. Për këtë arsye duhet të fitojë Lista Serbe!”, ka thënë Petkoviq përmes një postimi në X – platformë e njohur më parë si Tëitter.

Njohës të çështjeve politike vlerësojnë se moscertifikimi i kësaj partie është pjesë e parafushatës zgjedhore të partisë në pushtet.

Lista Serbe pati thënë se do të marrë pjesë në zgjedhje pas një periudhe të bojkotimit të proceseve politike në Kosovë.

Më 2022, pjesëtarë të kësaj partie patën dhënë dorëheqje në mënyrë kolektive nga institucionet e Kosovës, si shenjë kundërshtimi ndaj vendimeve të autoriteteve të Kosovës për shtrirje të autoritetit në gjithë territorin e vendit.

Zgjedhjet parlamentare të 9 shkurtit përbëjnë procesin e parë të rregullt zgjedhor në Kosovë, pas shpalljes së pavarësisë më 2008.

Deri tani janë mbajtur një mori zgjedhjesh të parakohshme. REL

UGSHPD: DREJTËSI ORBITALE PËR VELIAJN (Qurani* i Baldushkut)

 
Në dy ditë të njëpasnjëshme kur Rama, kryeministër dhe kreu i elitës së Rilindjes Socialiste, pedalon fort në të përpjetën e mbylljes së vitit 2024 duke i marrë një e nga një trofetë e monopolizuara prej vitesh kryetarit të Bashkisë Tiranë Erion Veliaj, ky i fundit po humb edhe peshën e influencës në propagandën e partisë shtet.
Çfarë i ka ndodhur të parit të kryeqytetit që është shtyrë në orbitën e Tiranës me shfaqjen më të fundit më 22 Dhjetor, 2024?
Gjeli i Detit/ Qurani i Baldushkut po promovohet për vitin e ri ndryshe nga bonusi i kryeministrit për pensionistët nga Erion Veliaj si “krenaria Tiranase”ose:- “Është një mundësi e jashtëzakonshme, për të mos e lënë këtë tokë. Kjo tokë mund të prodhojë ekonomi, mund të prodhojë mirëqenie. Ndaj ftoj të gjithë qytetarët e Tiranës, të gjithë lokalet e Tiranës, të gjithë hotelet e Tiranës, bujtinat, të blejnë vetëm gjelat e Baldushkut”.
I parë ftohtë, ky lajm në kryeqytet se çfarë po ndodh me protestat antikorrupsion sikurse dhe me trokitjen e drejtësisë në rrethin e ngushtë familjar të Erion Velisë në festat e fundvitit, propaganda dhe mjegulla mbi të vërtetën bashkohen në një.
A do t’ua shtrojë Rama Veliajn në tryezë shqiptarëve dhe njerëzit të ndjehen të ngopur nga me drejtësinë pa filluar viti i ri drejtë zgjedhjeve apo është ende herët?
Kurbani nga Hamburgu (me tigrin) dhe Baldushku me (gjel detin/quranin) janë sërish dy metafora që i ndërton një marrëdhënie e luftës për pushtet brenda elitës të rilindësve socialistë.
Vetëm dje më 23 Dhjetor, bashkëshortja e Erion Veliajt qëndroi/u mor në pyetje në SPAK prej rreth 3 orësh.
Heshtje nga Veliaj, heshtje nga skuadra e tij e kryeqytetit dhe po ashtu heshtje nga mediat që ai i influencon me justifikimin deri në zbardhjen e fakteve të vërteta. 
Për drejtësinë duhet luftuar dhe sakrifikuar, por kjo nuk ndodh mes moralit të të korruptuarve.
Standardi është eliminimi.
Por a është bashkëshortja Ajola Xoxe temë e lajmit në propagandën zyrtare të partisë-shtet në ATSH?
Postimi më i fundit për të dhe çiftin Veliaj ka qenë muaji Maj 2024 me çeljen e një ekspozite me veprat e Salvador Dalisë. Pjesa tjetër është heshtje dhe veprimtari në hije deri sa SPAK nisi një proces hetimor për pasurinë familjare të të parit të Tiranës.
Kur rrethi mbyllet kaq shumë dhe Veliaj nuk reagon dhe mbron të drejtën, përse drejtësia mbetet orbitale rreth Veliajt?
Pyetja nuk shtrohet për ndëshkimin dhe “kënaqësinë me kurbanin”, por me keq menaxhimin e qytetit me rreth 1 milion banorë, vepra dhe buxhet që i janë besuar Erion Veliajt t’i administrojë në 8 vitet e fundit.
Ashtu si mediat pranë qeverisë, pranë ideologjisë së Rilindjes Socialiste dhe më pranë kryetarit të bashkisë Tiranë nuk lanë lajme pa pasqyruar për çdo fidan të pyllit orbital të kryeqytetit, për çdo shkollë të ri konstruktuar, për çdo koncert e maratona që pushtojnë Sheshin Skënderbej gjatë gjithë vitit etj. në këtë rast përpjekje me drejtësinë heshtin. Heshtin ose fshihen pasi e njohin mirë orbitën mbrojtëse dhe luftën për pushtet brenda elitës së Rilindjes Socialiste që prej shumë vitesh me kujdes kanë rrëmbyer drejtimin e Partisë Socialiste.
Në kujtesë për lexuesin nga një shënim të muajit Maj prej UGSHPD-s me titull “RAMA SIMBOLIKISHT IA MERR BIÇIKLETËN KRYETARIT TË BASHKISË VELIAJ”*, shënimi theksonte pikërisht forcën e drejtësisë për të ndalur fluksin e parasë që investohet për propagandë brenda dhe jashtë atdheut për të siguruar zgjedhjet e 2025.
Rilindja Socialiste e kishte përgatitur strategjinë për fushatën ndërsa opozita i kishte marrë dhe do të merrte goditjet e tjera.
Duket se Rama po mbron orbitën e vet dhe po e përzë përfundimisht Veliajn pa mëshirën e festave. 
Një shprehje e kryebashkiakut nga salla e operacionit fill pas Pashkëve që u duk si kohë e fituar për të mos u paraqitur në SPAK dhe jo si “ringjallje” mes korrupsionit, ishte  “humba 2 gurë bashkë me tëmthin…” dhe menjëherë pas daljes nga SPAK pas disa javësh nisi të shpërfaqë të gjitha projektet për Tiranën si kryeqyteti i dialogut dhe kulturës Mesdhetare, i muzikës, i rinisë, i sportit, i ekselencës së studentëve, i ndihmave për të moshuarit dhe atyre në nevojë etj…etj. deri tek fidanët e pyllit orbital.
Por tani në etapën e fundit duke ditur se ku kanë shkuar paratë dhe sa afër finishit të zgjedhjeve Rilindja Socialiste është, Rama i merr Veliajt edhe “Giro D’Italia 2025”,  edhe “Medaljet e Arta” të nxënësve ekselentë, ashtu sikurse do t’i marrë atij me vështirësi edhe Tiranën.
Interesante ishte dhe simbolika e një starti të ri nga Rama kur shprehet se:-“Gara e famshme popullore, me një traditë 114-vjeçare, do të mbledhë në maj çiklistët më të mirë të botës në Tiranë, Durrës dhe Vlorë dhe do të ndiqet nga qindra-milionë teleshikues”. Këtu flasim pas zgjedhjeve 2025, kohë kur propaganda e Ramës në prag të zgjedhjeve për veprimtarinë do të jetë në kulm. Në fakt në sy të shqiptarëve Giro d’Italia mund të fillojë në një nga qytetet e sipërpërmendur, pa harruar se do të kalojë edhe nga Shëngjini për të mbaruar në Gjadër në dy qytezat e reja Italiane dhe një njëkohësisht të BE-së.
Morali në mes të korruptuarve nuk lidhet me drejtësinë, por me ruajtjen e imazhit. Veliaj dhe shumë të tjerë kanë “punuar” për pushtetin e tyre për të mbajtur me lavde një autoktrat si Edvin Rama, ndërsa ky i fundit nuk e ka problem që brenda elitës që atë e mbajnë t’i zëvendësojë kurbanet me shërbëtorë të tjerë të gatshëm. Pushtetin e korruptuar e ka si një armë mbi orbitën e vet elitë, administratë dhe patronazhistë, pasi zgjedhësit socialistë janë larg dhe opozita e popullit dhe ajo politike janë përballë.
____________________________
* Qurani- Gjeli i Detit, mish shpendi për festën e fundvitit.
 
24 Dhjetor, 2024
 
 

Unioni i Gazetarëve Shqiptarë Profesionistë të Diasporës (UGSHPD)

Verband Albanischer Berufsjournalisten der Diaspora (VABD)

Union of Professional Albanian Journalists of Diaspora (UPAJD)

L’Union des journalistes professionnels albanais de la diaspora (UJPAD)

Unione dei Giornalisti Professionisti Albanesi della Diaspora (UGPAD)

Kurti: Radoiçiq dha urdhrin për sulmin në kanalin e Ibër-Lepencit, për financim ka përgjegjësi Serbia

Kryeministri i Kosovës, Albin Kurti, ka thënë të martën se Millan Radoiçiq ka dhënë urdhrin për kryerje të sulmit në kanalin e Ibër-Lepencit më 29 nëntor, ndërsa shteti i Serbisë ka përgjegjësi për financim, planifikim dhe logjistikën e sulmit, që ka pasur synim rrezikimin e sigurisë kombëtare.

Në një konferencë për media, Kurti ka thënë se këto deklarata i bazon në të dhënat e inteligjencës dhe autoriteteve të sigurisë.

Sipas tij, përkrahja që i ofron Beogradi zyrtar, atij që e ka quajtur grup terrorist të Millan Radoiçiqit, nuk mund të quhet ndryshe, pos koordinim i shtetit serb me këtë grup, për të intensifikuar luftën hibride kundër Kosovës.

“Sulmi i 29 nëntorit në kanalin Ibër-Lepenc është vazhdimësi e akteve dhe sulmeve terroriste, dhe aktiviteteve tjera destabilizuese të kryera nga mekanizmat e ndikimit të Serbisë në Kosovë, përfshirë organizatat terroriste serbe. Duke marrë parasysh se akte të tilla terroriste kërkojnë përgatitje profesionale në diversion, dhe faktin se Millan Radoiçiq përkrahet edhe nga strukturat shtetërore të Serbisë, vlerësohet se edhe shpërthimi në kanalin e Ibër-Lepencit është përkrahur me planifikim dhe logjistikë nga shteti i Serbisë”.

Një ditë më parë, ambasadori amerikan në Serbi, Christopher Hill, ka thënë se SHBA-ja “nuk sheh asnjë provë që do të çonte në Beograd” kur bëhet fjalë për atë se kush qëndron pas sulmit në kanalin e furnizimit me ujë, Ibër-Lepenc.

“Ne sigurisht nuk shohim asnjë provë që do të çonte në Beograd, por dikush e bëri atë dhe duhet të kryhet një hetim i plotë”, ka thënë Hill në një intervistë për televizionin publik të Serbisë, RTS.

Mirëpo, sipas Kurtit, sulmi ka qenë e pamundur të kryhet nga grupi i Radoçiqit, pa e pasur mbrapa shtetin serb.

“Kësi metodash të sfidimit të sigurisë në Kosovë, të cilat për pasojë kanë, jo vetëm cenimin e dëmtimin e infrastrukturës vitale, shkaktimin e incidenteve ndëretnike, të cilat Serbia i nxit fort, pastaj shkaktimin e panikut në mesin e qytetarëve, e krejt në fund edhe krijimin e një imazhi të një vendi jostabil, pritet të ndodhin edhe në të ardhmen e afërt, dhe veçmas para dhe pas Vitit të Ri”, ka thënë Kurti, duke u zotuar se autoritetet janë të përkushtuara për, siç ka thënë, neutralizim të kësaj metode të mbetur serbe.

Kurti e ka prezantuar një kronologji të 15 sulmeve, që sipas tij, e kanë pasur synim për të dëmtuar Kosovën “në mënyrë terroriste” nga 30 qershori deri më 29 nëntor të këtij viti, dhe që kanë kulmuar me sulmin në kanalin e Ibër-Lepencit.

Kanali i Ibër-Lepencit është sulmuar më 29 nëntor në fshatin Varragë të komunës së Zubin Potokut – komunë me shumicë serbe në veri të vendit.

Policia e Kosovës ka thënë se sulmi është kryer me lëndë shpërthyese deri në 20 kilogramë.

Kanali Ibër-Lepenc furnizon me ujë nga Liqeni i Ujmanit gjithë veriun e Kosovës, rajonet e Mitrovicës, Prishtinën me rrethinë, si dhe Korporatën Energjetike të Kosovës për ftohjen e termoelektranave të saj.

Kurti ka thënë se Radoiçiq – që aktualisht besohet se është në Serbi i lirë – ka autorizuar persona për të kryer sulme në Kosovë disa herë gjatë vitit.

Millan Radoiçiq është në kërkim nga autoritetet e Kosovës, pasi e ka pranuar organizimin dhe kryerjen e sulmit në Banjskë të Zveçanit në shtator të vitit 2023.

Si pasojë e këtij sulmi, që Kosova e konsideron terrorist dhe e fajëson Serbinë, është vrarë rreshteri i Policisë së Kosovës, Afrim Bunjaku.

Serbia, në anën, tjetër, hedh poshtë këto akuza.

Mes tjerash, Kurti ka thënë se refuzimi i Beogradit për ta dorëzuar Radoiçiqin, ka qenë inkurajim për grupin i prin Radoiçiqi, për të vazhduar me akte tjera “kundër integritetit territorial dhe sovranitetit të Kosovës”.

Për autoritetet e Kosovës, sulmi në kanalin e Ibër-Lepencit ka qenë sulmi më i rëndë në infrastrukturën kritike të vendit që nga lufta e viteve 1998/99.

Sulmi është dënuar ashpër edhe nga Shtetet e Bashkuara dhe Bashkimi Evropian, dhe është bërë thirrje që përgjegjësit të përballen me drejtësinë.

Ambasadori amerikan në Kosovë, Jeffrey Hovenier, ka thënë ditë më parë se agjentë amerikanë të Byrosë Federale të Hetimeve (FBI) janë të angazhuar drejtpërdrejt në Kosovë, në hetimet për të gjetur fajtorët mbrapa sulmit në kanalin e Ibër-Lepencit. REL

Protesta e opozitës- Grupi i PD kallëzim penal në SPAK kundër Ministrit të Brendshëm, Drejtorit të Policisë dhe zyrtarëve të Policisë së Shtetit

Grupi Parlamentar i Partisë Demokratike kallëzim penal në SPAK dhe Prokurorinë e Tiranës kundër Ministrit të Brendshëm, Drejtorit të Përgjithshëm të Policisë, Drejtorit të Drejtorisë Vendore Tirnaë, dhe zyrtarëve të tjerë të Policisë së Shtetit.

Grupi i PD pretendon se zyrtarët e lartpërmendur penguan tubimin, ushtruan dhunë, konsumuan 6 vepra penale.

“Grupi Parlamentar i Partisë Demokratike, përmes Kryetarit Gazment Bardhi ka kallzuar në SPAK dhe Prokurorinë e Tiranës Ministrin e Brendshëm, Drejtorin e Përgjithshëm të Policisë, Drejtorin e Drejtorisë Vendore Tirnaë, dhe zyrtarë të tjerë të Policisë së Shtetit, për kryerjen e veprave penale “Dëmtime të tjera me dashje”, “Shpërdorimi i detyrës”, “Kryerja e veprimeve arbitrare”, “Mosmarrja e masave për të ndërprerë gjendjen e paligjshme”, “Shkelja e barazisë së shtetasve”, “Pengim në ushtrimin e të drejtës për t’u shprehur, grumbulluar apo manifestuar”, të kryera në bashkëpunim, parashikuar nga nenet 25, 90, 248, 250, 251, 253 dhe 261 të Kodit Penal të Republikës së Shqipërisë”, thuhet në njoftimin e grupit të PD-së.

NJOFTIM PËR SHTYP

Grupi Parlamentar i Partisë Demokratike, përmes Kryetarit Gazment Bardhi ka kallzuar në SPAK dhe Prokurorinë e Tiranës Ministrin e Brendshëm, Drejtorin e Përgjithshëm të Policisë, Drejtorin e Drejtorisë Vendore Tirnaë, dhe zyrtarë të tjerë të Policisë së Shtetit, për kryerjen e veprave penale “Dëmtime të tjera me dashje”, “Shpërdorimi i detyrës”, “Kryerja e veprimeve arbitrare”, “Mosmarrja e masave për të ndërprerë gjendjen e paligjshme”, “Shkelja e barazisë së shtetasve”, “Pengim në ushtrimin e të drejtës për t’u shprehur, grumbulluar apo manifestuar”, të kryera në bashkëpunim, parashikuar nga nenet 25, 90, 248, 250, 251, 253 dhe 261 të Kodit Penal të Republikës së Shqipërisë.

Në kallëzim janë evidentuar faktet dhe provat që dëshmojnë se tubimi i njoftuar nga Partia Demokratike ishte tërësisht i ligjshëm, si një e drejtë që garantohet nga Kushtetuta dhe se pengimi nga Policia e Shtetit ishte i kundërligjshëm dhe kriminal. Dhuna e ushtruar ndaj deputetëve, zyrtarëve politik të opozitës dhe qytetarëve, ka qenë e motivuar politikisht dhe një akt i rëndë kriminal i kryer në bashkëpunim nga zyrtarët e policisë së Shtetit.

Bashkëlidhur do të gjeni kallëzimin e plotë të dorëzuar sot në dy Prokurori nga kreu i Grupit Parlamentar të PD Gazment Bardhi.bw

“U rrethova nga një grup policësh, frymëmarrja po më ngadalësohej”, Gjekmarkaj flet pas daljes nga spitali: Më ka mbetur në kujtesë egërsia e 2-3 oficerëve që…

Deputeti dhe nënkryetari i Partisë Demokratike, Agron Gjekmarkaj, ka reaguar përmes një deklarate publike pas daljes nga spitali, ku u shtrua pasi humbi ndjenjat gjatë protestës së opozitës ditën e djeshme.

Në deklaratën e tij, Gjekmarkaj ka hedhur akuza ndaj policisë së shtetit, duke e cilësuar sjelljen e tyre gjatë protestës si brutale dhe të motivuar politikisht.

Sipas Gjekmarkajt, gjithçka ndodhi kur ai, së bashku me shoqëruesin e tij u rrethuan nga një grup i madh policësh.

 

“I thashë me butësi dhe humor: ‘Mos më prekni, jam Agron Gjekmarkaj, nënkryetari i Kuvendit dhe deputet.’ Por reagimi i tyre ishte i dhunshëm. Më shtynë brutalisht, thyen pasqyrën e makinës dhe më ngritën në ajër. Për shkak të kësaj dhune, frymëmarrja ime u vështirësua dhe humba ndjenjat,” tha Gjekmarkaj.

Ai shtoi se ndodhi nuk ishte pasojë e ndonjë problemi shëndetësor, por e veprimeve të policisë. Deputeti u shpreh se u largua nga protesta jo me dëshirë, por sepse u detyrua të shkojë në spital për ndihmë mjekësore.

Gjekmarkaj akuzoi policinë për motivim politik në veprimet e tyre. “Ata nuk mund të shtynin një deputet në atë mënyrë pa një urdhër politik,” deklaroi ai, duke krahasuar sjelljen e policëve me zellin e regjimeve të vjetra totalitare.

Deputeti shfrytëzoi rastin për të falënderuar protestuesit, demokratët, qytetarët e Lezhës dhe kolegët e tij që i qëndruan pranë. Ai shprehu mirënjohje edhe për mjekët që e trajtuan në spitalin ushtarak dhe QSUT.

Deklarata e plotë e Gjekmarkajt:

Nuk do të kisha reaguar persa ndodhi dje me mua në proteste nëse policia e shtetit nuk do me fyente se dyti me deklaraten e vet publike e dizinformuese!
Nuk e pelqej as e kerkoj viktimizimin! Madje kurrë në jeten time nuk kam kerkuar as nxitur ballafaqime fizike! Nuk kam sulmuar asnjeherë askënd! Dje thjesht jam mbrojtur. I gjindur para një makine të vogel bashkë me shoqeruesin tim , punonjes i gardes, i cili u keqtrajtua gjithashtu ndonese u tregoi edhe dokumentin identifikues, u rrethova nga një grup i madh policesh ! Ju thashe mos me prekni , jam Agron Gjekmarkaj, Nen Kryetari i Kuvendit të Republikes , deputet, pedagog Universiteti me butesi gati me humor , nuk shquhem per force fizike nuk bëj palester, ndaj bëni kujdes! Me shtynë brutalisht , me shume forcë, thyen e edhe pasqyren e vetures duke me ngritur gati në ajer mua ! Me terhoqi shoqeruesi me shumë mundim dhe një djale nga Lezha permes policeve teksa ndieja frymarrjen qe po me ngadalesohej! Sapo dola nga turma e policeve duke me terhequr te tjeret humba ndjenjat! Nuk u ndieva keq se kisha probleme me shendetin por si pasoje e veprimeve të policisë! Nuk u largova nga protesta se desha të largohem, por me detyruan, nuk u largova për të shkuar në kafe apo shtepi por në spital!
Me ka mbetur në kujtesë egersia në shikim e dy tre oficerve të policisë, zelli i tyre si dikur motit kur arrestoheshin deputet e opozites në 1946 , u dukej e padrejte që dikush guxon të protestojë kunder pushtetit të tyrë se ata e shohin pushtetin si gjënë e tyre, pse jo edhe si instrument dhune! Gjithsesi ata nuk mund të shtynin një deputet në atë menyrë pa një urdher politik!
Perfitoj nga ky rast i trishtë të falenderoj të gjithë ata që mu gjinden pranë , protestuesit , demokratet e qytetaret e Lezhes, drejtuesit dhe deputetet e PD , mjeket e spitalit ushtarak dhe ata të QSUT për ekzaminimet dhe sherbimin, falenderoj qendra miq e të njohur nga vendi e Bota per atë lum mesazhesh që kam marrë prej tyre ënde në pamundesi për tu kthyer pergjigje individualisht!
Shpreh keqaerdhje të thellë për të gjithë të lenduarit e të ndaluarit të cilet perpiqen per një Shqiperi më të mirë që nuk e moren vemendjen që mora unë! Ne nuk kemi frikë!
Sot jemi në vigjilje të Krishtlindjeve ! Qofshin ato të bardha per ju dhe të gjithë shqiptaret! Të tjerat do të jenë më të mira!

Agron Gjekmarkaj
Nen Kryetar i Kuvendit të Republikes
Nën Kryetar i Partisë Demokratike të Shqipërisë!

Spitali i Traumës – U dhunua nga narkopolicia- Gjekmarkaj transferohet në QSUT, mjekët: Ka nevojë për ndihmë më të specializuar!

Nënkryetari i PD, Agron Gjekmarkaj, i cili u dhunua nga narkopolicia në protestën e kësaj të hëne në kryeqytet, do të transferohet në QSUT.

Vendimi është marrë nga mjekët e spitalit të Traumës, të cilët thotë se Gjekmarkaj do të transferohet për në QSUT për ndihmë më të specializuar.

Më herët, numrin dy të PD, e vizitoi kryetari i saj, Sali Berisha, i cili pa nga afër gjendjen shëndetësore të Gjekmarkajt, i cili mbeti i lënduar si pasojë e dhunës së ushtruar nga narkopolicia.

Nënkryetari i PD-së, Agron Gjekmarkaj, edhe i Kuvendit njëkohësisht, ka humbur ndjenjat në protestë.

Gjekmarkaj ndodhej në zonën e pallatit me Shigjeta, bashkë me deputetë dhe zyrtarë të tjerë të PD-së, në krah të qytetarëve që protestonin, në kuadrin e mosbindjes civile.

Deputeti Gjekmarkaj ka humbur ndjenjat për shkak të dhunës së ushtruar nga narkopolicia.

Sipas PD-së, Gjekmarkaj është dhunuar barbarisht nga Policia, në momentin që kjo e fundit tentoi të shpërndante protestuesit që ndodheshin në rrugë. sn

UGSHPD: K’CIMI I KUVENDIT

 
“Këndej dhe andej bjeshkëve” batuta e preferuar dhe e përzgjedhur nga Rama humbi çdo frymëzim poetik dhe dëshirë komunikimi me të pranishmit menjëherë kur që në krye të fjalës së mbajtur u ndie dhe mungesa e drejtimit me respekt dhe me emër të përfaqësuesve të Presidentit, Kuvendit dhe qeverisë së Kosovës ishin shprehja më e mirë e mburrjes dhe e mospërfilljes që mishëron kryeministri i RSH Rama dhe mendon se i imponohet atyre që e dëgjojnë. 
“I nderuar Kuvend i Bashkuar i Shqipërisë dhe Kosovës” * dhe kaq(!)
Tungjatjeta!
Thirret me emër i zoti i shtëpisë dhe me po atë respekt pritet përshëndetja.
Urtësia e kuvendit ka traditë. 
I jep fjalën dhe e respekton mikun.
E dëgjon dhe e vlerëson për këshillën.
Nuk ja duartroket mendjemadhësinë në mënyrë që njeriu i ftuar ta nxjerrë vetë mësimin dhe të piqet për tjetër herë në një kuvend të ngjashëm po ja dha prapë rasti.
Kjo analizë e shprehur në skicën “”K’cimi i Kuvendit” (Time Out), tregoi më shumë për të kuptuar se sa vlerë kishin fjalimi dhe retorika e Ramës mes dy kuvendeve të Republikës së Shqipërisë dhe Republikës së Kosovës.
Klima e paqëndrueshme që Rama krijoi i takon atij vetë ta peshojë si kryeministër. 
Media u mundua të merrej me të panjohurat e një pusulle që ai shkëmbeu me kryeministrin e Kosovës, Kurti dhe shumë supozime gjestin ja falën talentit të tij si piktor dhe e  lanë tek humnera e të panjohurës se diçka mund të ketë vizatuar.
Por “K’cimi nga Kuvendi” është shikimi ndryshe i sjelljes në skicën e LD-NY24. Shumë mos stabilitetin e justifikuan edhe si një moment normal për një pushim të shkurtër kafeje. Në fakt ai i ngjan vetëm Ramës në karrierë që gafat “e lojës” shmangen me një “time out”, për të tërhequr vemendjen nga thelbi i gjërave.
________________
* nga fjala e plotë sipas ATSH
 
 
 
23 Dhjetor, 2024 
 

Unioni i Gazetarëve Shqiptarë Profesionistë të Diasporës (UGSHPD)

Verband Albanischer Berufsjournalisten der Diaspora (VABD)

Union of Professional Albanian Journalists of Diaspora (UPAJD)

L’Union des journalistes professionnels albanais de la diaspora (UJPAD)

Unione dei Giornalisti Professionisti Albanesi della Diaspora (UGPAD)

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend