VOAL – Opinioni në Shqipëri vazhdon të jetë i skandalizuar me sulmet e shfrenuara të TV Klanit kundër figurës së Visar Zhitit, ish i burgosur politik, shkrimtar i shquar, ish deputet i Kuvendit të Shqipërisë nga radhët e Partisë Demokratike, ish ministër i Kulturës në qeverinë Berisha.

Ndërsa dokumentet dhe vetë dëshmitarët nga ferri i burgjeve të Spaçit dhe të Qafë Barit vërtetojnë se Visar Zhiti nuk ka qenë bashkëpunëtor i Sigurimit, nuk ka qenë spiun i komandave të burgjeve, nuk ka bashkëpunuar në asnjë formë me Sigurimin e Shtetit, duke e përgënjeshtruar fushatën e nxitur nga Bujar Nishani, TV Klani vazhdon të rrëmojë në të kaluarën e Visar Zhitit, duke e diskredituar vetë pronarin Aleksandër Frangaj dhe vetë Bujar Nishanin.

Duke u marrë me kërkesën ankimore penale nëpërmjet së cilës Visar Xhiti, me 21 Prill 1980, i drejtohej Gjykatës së Lartë të asaj kohe, për ndryshimin e masës së dënimit të dhënë nga Gjykata e Kukësit, TV Klan pretendon që Visar Zhiti në këtë kërkesë për uljen e dënimit ta shpallte veten armik të partisë dhe të kërkonte dënim kapital nga organet e drejtësisë të regjimit komunist.

Mediat në Tiranë e shpjegojnë këtë vazhdë të sulmeve që TV Klan ndërmerr ndaj Visar Zhitit me faktin se pronari i TV Klan, Aleksandër Frangaj, ka një konflikt interesi, pasi në Vatikan, vendin që e ka zënë Zhiti, e mbante motra e tij.

Ka qenë motra e Aleksandër Frangajt shkaku konkret pse Bujar Nishani nuk e dekretoi Zhitin ambasador në Vatikan. Ky konflikt interesi i ka bërë bashkë e të pandarë Bujar Nishanin dhe Aleksandër Frangajn kundër Visar Zhitit.

Natyrisht, opinioni i gjerë shqiptar, pa më të voglin hezitim është në anën e shkrimtarit të shquar, ish të burgosurit politik Visar Zhiti.

Kujtojnë se i bëjnë keq Visarit, në fakt diskreditojnë veten dhe populli i neverit, i urren dhe i mallkon: Ju zëntë Vetting-u një orë e ma parë!