PRISHTINË – Me rastin e 20 qershorit – Ditës Ndërkombëtare të Refugjatëve dhe Ditës së Kthimit nga Eksodi i vitit 1999, Departamenti i Diasporës pranë partisë Aleanca për Ardhmërinë e Kosovës (AAK), në sheshin “Nëna Tereza” në Prishtinë hapi ekspozitën me fotografi nga eksodi dhe kthimi i shqiptarëve në shtëpitë e tyre në Kosovë.

Në ekspozitën e fotografive nga eksodi dhe gjenocidi serb me titull “Shqiptarët nuk do të duhej të jenë refugjatë” shihen fotografitë e nënave me fëmijë në krahë nëpër male, fëmijë në gjendje të mjerueshme nëpër kampe, refugjatët në kampe, kolonat e stërzgjatura me njerëz dhe ushtarët e UÇK-së duke ndihmuar nënat shqiptare.

Gjatë fjalës së tij në hapje të kësaj ekspozite, kreu i AAK-së dhe kandidati për kryeministër i koalicionit PDK-AAK-NISMA, Ramush Haradinaj, tha se edhe shqiptarët e Kosovës për fat të keq bëjnë pjesë në popujt që kanë shumë të shpërngulur. Ai theksoi se edhe në ditën e sotme dihet që ka plotë të rinj e familje shqiptare që janë refugjat në vende të ndryshme.

“Mendoj se ideja e departamentit të diasporës dhe Jahja Llukës për mos ta lënë në harresë këtë plagë dhe këtë dhimbje të popullit tonë është vërtet për t’u respektuar. Duhet të punojmë ashtu siç kemi deklaruar gjithmonë që të mos largohet askush nga trojet tona për shkaqe jetësore apo të diskriminimit çfarëdo natyre qoftë”, tha Haradinaj.

Ndërkaq, kryesuesi i departamentit të diasporës në partinë AAK, Jahja Lluka, theksoi se sot në Ditën Botërore të Refugjatëve, numri i refugjatëve në botë është mbi 65 milionë, pasi që shumë njerëz kanë ikur nga vendet e luftës dhe krizave. Lluka shtoi se një krizë të tillë e kanë përjetuar edhe shqiptarët në vitin ’99 duke theksuar se “që 150 vite ne shpërngulemi vazhdimisht që nga Sanxhaku i Nishit kur janë zbrazur me dhunë 665 fshatra nga ushtria serbe”.

Ndryshe, gjatë luftës së fundit në Kosovë, në vitet 1998-99, ndodhi një eksod i madh i kosovarëve, ku gra, burra dhe fëmijë të shumtë ishin detyruar nga forcat serbe të largoheshin nga vendet dhe shtëpitë e tyre, të cilët kishin gjetur strehim kryesisht në Shqipëri e Maqedoni. aa