Liderët e vendit kanë dënuar ashpër ekstremistët, ndërkohë që autoritetet kanë nisur një hetim i cili deri më tani, ka çuar në arrestimin e gjashtë personave dhe sekuestrimin e pajisjeve

VARSHAVË – Një video incizim i neo-nazistëve në Poloni, i xhiruar fshehurazi, ka shkaktuar këtë javë kritika të ashpra dhe debate në Poloni, në shtetin ku regjimi i Adolf Hitlerit vrau miliona njerëz në kampet e përqendrimit dhe gjatë bombardimit të qyteteve.

Liderët e vendit kanë dënuar ashpër ekstremistët, ndërkohë që autoritetet kanë nisur një hetim i cili deri më tani, ka çuar në arrestimin e gjashtë personave dhe sekuestrimin e pajisjeve dhe një sasie municioni.

Opinioni është i shqetësuar se polakët e rinj, paraardhësit e të cilëve kanë qenë viktima gjatë Luftës së Dytë Botërore, mund të përqafojnë një ideologji të tillë.

Presidenti i vendit, Andrzej Duda, tha se “sjellja e neo-nazistëve duhet të çrrënjoset”.

Debati mbarëkombëtar u nxit nga një raport i publikuar në televizionin TVN24, në të cilin u shfaqën pjesëtarët e një grupi neo-nazist polak, duke kremtuar ditëlindjen e 128-të të Adolf Hitlerit.