Censi i vitit 2023 na tregoi se Shqipëria po përjeton një transformim të thellë demografik, duke u zbrazur e plakur para syve tanë, gjë që megjithëse shpesh kalon pa u vënë re në zhurmën e përditshmërisë, mbart pasoja të thella e të rënda për të ardhmen e vendit. Me këtë prirje dhe sistemin ekonomik të ngritur nga kjo qeveri, është e qartë se po gërmon vetë varrin e buxhetit të shtetit, por edhe të aleatëve të saj biznesorë. Shpopullimi masiv dhe plakja e popullsisë po krijojnë një bombë me sahat, që do të shpërthejë nën këmbët e qeveritarëve dhe bizneseve të mëdha që kanë ortakë, të cilët mbështeten kryesisht te tregtimi i mallrave që importojnë. Me modelin aktual ekonomik që ka ndërtuar kjo qeveri, duket qartë se po sharron degën ku është varur vetë, sepse po shkurton ndjeshëm kontributet për sigurime shoqërore dhe tatimet mbi konsumin. Kur popullsia e aftë për punë largohet dhe fuqia blerëse bie, pakësohen paratë si për buxhetin e shtetit, ashtu edhe për xhepat e këtyre tregtarëve importues të mëdhenj, që kanë partneritet me qeveritarët.

Në regjistrimin e fundit të popullsisë, të kryer gjatë vitit 2023, numri i përgjithshëm i banorëve është ulur në rreth 2.4 milionë banorë. Ndërsa mosha mesatare e popullsisë është 42,5 vjet (nga 35,3 vjet që ishte në Censin 2011) duke u afruar me mesataren prej 44 vjet që ka Bashkimi Evropian. Kjo rritje e moshës së popullsisë, që është ndikuar kryesisht nga emigracioni masiv dhe deri diku nga rritja e jetëgjatësisë dhe rënia e lindshmërisë, po e ndryshon rrënjësisht mënyrën se si jetojmë, punojmë dhe ndërtojmë të ardhmen tonë. Pra, rritja e numrit të të moshuarve dhe emigrimi i të rinjve e bën demografinë tonë si një orë me rërë, që po shkon drejt fundit.

Bazuar në të dhënat e EUROSTAT-it, del se gjatë periudhës 2010-2022, 652 993 shtetas të Shqipërisë që janë pajisur me leje qëndrimi për herë të parë, pra kanë emigruar legalisht në një vend të Bashkimit Evropianë. Kuptohet që kjo shifër nuk tregon totalin e emigrimit, sepse aty nuk përfshihen shqiptarët që qëndrojnë ilegalisht, si dhe ata që kanë emigruar në shtete perëndimore që nuk janë në BE si SHBA, Britani të Madhe, Kanada etj.. Për me tepër, prirja e braktisjes së vendit duket se sa vjen e përkeqësohet, sepse vetëm vitin e kaluar rezidencën evropiane e kanë marrë 74938 veta, shifër kjo që përfaqëson 3.12% të popullsisë sonë totale.

Vazhdimi i largimit masiv nënkupton që Shqipëria humbet jo vetëm fuqi punëtore, por edhe breza të të rinjve që do të mund të kontribuonin në zhvillimin e vendit. Emigracioni po na merr të rinjtë më të mirë, si një stuhi që shkul pemët më të larta, gjë që dëmton rëndë bizneset, të cilat gjithnjë e më shumë po hasin vështirësi për të gjetur punonjës të kualifikuar (edhe ata pak që gjejnë, detyrohen t’i paguajnë me fatura të kripura). Më pak të rinj do të thotë gjithashtu më pak biznese të reja apo start-up-e, më pak inovacion e teknologji, më pak fleksibilitet për t’u përshtatur me kërkesat e tregut, më pak gatishmëri nga krahu i punës për t’u rikualifikuar për të qenë kompetentë për dinamikat e ekonomisë.

Kjo metamorfozë demografike që po pësojmë, gjithashtu, zvogëlon ndjeshëm aftësinë konkurruese në tregjet ndërkombëtare, sepse mungesa e fuqisë punëtore si dhe tkurrja e fuqisë blerëse e bëjnë vendin tonë më pak atraktiv për investitorë të huaj. Nëse vazhdojmë të katandisemi në një azil pleqsh, ne njëherazi do ta përjashtonim vendin nga revolucioni teknologjik bashkëkohor, që po ndodh sot me epokën e inteligjencës artificiale. Popullsia e moshuar është më rezistente ndaj përqafimit të inovacionit dhe teknologjive moderne, të cilat sot nuk janë më luks, por domosdoshmëri, nëse duam të kemi një rritje të qëndrueshme të ekonomisë.

Megjithatë, duhet theksuar se pasoja me e rëndë e këtij fenomeni është padyshim shkatërrimi potencial i skemës sonë pensionale. Censi tregon një rënie dramatike të popullsisë aktive, që manifestohet nga ulja e ndjeshme e grup-moshave që janë aktive në tregun e punës. Të dhënat e tregojnë se një në pesë individë (19.7 për qind) janë 65 vjeç e lart, krahasuar 11.3% në 2011 dhe 7.5% 2001. Për rrjedhojë, sot kemi më shumë pensionistë se kurrë më parë, nga 570 mijë në vitin 2013, numri i tyre është rritur në 717 mijë në vitin 2024, duke reflektuar një popullsi që plaket me ritme të shpejta. Nga ana tjetër, të dhënat e fundit tregojnë se numri i të punësuarve me rrogë është diku te 730 mijë veta (ndër të cilët rreth 25% janë të punësuar në administratë dhe ndërmarrje me pronësi publike).

Kjo rritje e pensionistëve vjen në një kohë kur të rinjtë po largohen masivisht nga vendi, duke lënë pas një boshllëk të madh në fuqinë punëtore dhe në burimet që mbështesin skemën aktuale të pensioneve. Prandaj pyetja e parë që shtrohet në këtë situatë është: Çfarë ndodh kur ka gjithnjë e më pak kontribuues për të mbështetur një numër gjithnjë në rritje përfituesish të pensioneve? Në vitin 2023, kontributet e sigurimeve përbënin rreth 24% të të ardhurave tatimore për shtetin dhe ky largim i forcës aktive të punës po hap gradualisht një vrimë shumë të madhe në thesin e qeverisë.

Ky problem bëhet edhe më i ndërlikuar nga fakti që një popullsi më e moshuar kërkon më shumë kujdes shëndetësor dhe social prej shtetit. Kërkesa në rritje për shërbime shëndetësore po vë nën presion një sistem tashmë të mbingarkuar, të përballur me mungesë fondesh dhe të kërcënuar më së shumti nga hemorragjia e mjekëve dhe infermierëve drejt Gjermanisë e vendeve perëndimore. Në kulturën shqiptare, solidariteti mes brezave brenda familjes ka qenë tradicionalisht mbështetja kryesore për të moshuarit. Mirëpo shkuarja në kurbet i të rinjve shpesh lë pas të moshuarit pa mbështetjen e duhur nga fëmijët, duke sjellë shtim të kërkesave për shërbime sociale të posaçme për këtë grup-moshë, të janë shpesh të mangëta tek ne.

Për më tepër, plakja e popullsisë kërcënon rëndë buxhetin e qeverisë, sidomos për shkak të zvogëlimit të taksave indirekte me të cilat mbahet në këmbë shteti. Me një popullsi më të plakur, numri i personave me të ardhura të rregullta zvogëlohet dhe kjo çon në uljen e fuqisë blerëse agregate për mallra dhe shërbime. Dihet që të moshuarit zakonisht janë më të kujdesshëm me shpenzimet dhe konsumojnë mallra të domosdoshme (ushqime bazike, ilaçe), që shpesh kanë TVSH të reduktuar ose janë të përjashtuara nga taksat indirekte ose tarifat doganore. Me pak fjalë, ndryshimi demografik sjell edhe ndryshimin e strukturës së konsumit, sepse të moshuarit priren të mos blejnë mallra afatgjata me taksa të larta që kërkohen nga të rinjtë, si pajisjet elektronike, mobiliet, mallrat e luksit, veshjet e modës, automjetet etj.. Gjithashtu, efekti domino i emigrimit të të rinjve sjell një ulje të ndjeshme të konsumit për shërbimet më të tatueshme si restorantet, klubet, hotelet, udhëtimet etj.. Këtu duhet vënë në dukje se sipas të dhënave të vitit 2023, TVSH-ja, e cila mblidhet kryesisht falë blerjes së mallrave dhe shërbimeve të sapopërmendura, kontribuoi me rreth 32% të të ardhurave tatimore totale, duke përbërë burimin kryesor të të ardhurave të qeverisë.

Njëkohësisht është fakt i njohur që krahasuar me kohortat e të rinjve, mosha e tretë konsumon shumë më pak duhan dhe alkool dhe e përdor më pak makinën, duke ulur ndjeshëm konsumin e karburanteve. Këto produkte janë subjekt i akcizave, të cilat gjithashtu kontribuojnë ndjeshëm në të ardhurat buxhetore, duke përbërë rreth 10.1% të totalit. Në mënyrë të veçantë vlen të theksohet se të moshuarit nuk investojnë në blerjen e shtëpive të reja ose projekte të mëdha, duke ulur të ardhurat e majme që qeveria vjel prej sektorit të ndërtimit dhe vënë në pikëpyetje të ardhmen një sektori, që së fundmi ka arritur të zërë 12% të Prodhimit të Brendshëm Bruto.

Sipas të dhënave më të fundit, nga 1,082,529 banesa në Shqipëri, 32.9% (nga 21.7% që ishin në censin e 2011) rezultojnë të pabanuara si rezultat i boshllëkut demografik, që po krijohet nga largimi në shkallë të gjerë i njerëzve. Fluska e ngritur në këtë sektor rrezikon njëherazi të pëlcasë, edhe për shkak të bllokimit të rubineteve të parave të pista që e ka fryrë ndërkohë që kërkesa reale bie prej rënies së numrit të banorëve. Nga njëra anë SPAK-ku me luftën kundër parave të korrupsionit dhe krimit në Shqipëri nga ana tjetër policitë evropiane me goditjet masive ndaj rrjeteve kriminale shqiptare (ndihmuar deshifrimet e kriptofonëve ‘Sky Ecc’, ‘EncroChat’ dhe ‘Matrix’), po ia ndalin rrjedhën kapitalit të vrullshëm të krimit që e ka ushqyer tej mase tregun e ndërtimit dhe patundshmërisë.

Pakësimi i konsumit të mallrave nga një popullsi që rritet në moshë, por zvogëlohet në numër dhe fuqi blerëse, është një goditje e drejtpërdrejtë edhe për bizneset më të mëdha të Shqipërisë, të cilat sot duket se po lundrojnë drejt një deti të trazuar. Po të analizohet lista bizneseve më të mëdha në vend, që shpesh konsiderohen të privilegjuara nga politika, shihet se ato janë kryesisht importues të mëdhenj dhe shitës të mallrave me shumicë e pakicë. Nëse baza e konsumatorëve reduktohet dhe fuqia blerëse e popullsisë bie, këto kompani do të përballen me ulje të fitimeve, ngushtim të tregut dhe rritje të kostove për të mbajtur aktivitetin. Me një strukturë ekonomike që mbështetet kryesisht në tregti dhe importe, ky model po bëhet i pambrojtur ndaj ndryshimeve radikale demografike dhe po krijon një spirale destruktive, që dëmton jo vetëm shtresat e gjera të popullsisë, por edhe vetë oligarkinë ekonomike që ka përfituar nga ky sistem. Thënë më shkoqur, modeli aktual ekonomik po hyn në një cikël vicioz, që kërcënon të ardhmen e ekonomisë kombëtare dhe vetë burimet e fitimit të këtyre aktorëve të mëdhenj. Për pasojë, shteti jo vetëm që do të humbasë të ardhurat nga këto biznese, por ka gjasa që ne do të përjetojmë një ortek që mund ta prekë të gjithë ekonominë.

Nëse nuk ndërmerren reforma të guximshme dhe politika të mirëstudiuara për të adresuar sfidat e moshimit dhe shpopullimit, Shqipëria rrezikon të zhytet në një dinamikë të rrezikshme të krizës ekonomike dhe sociale. Humbja e fuqisë punëtore aktive, tkurrja e konsumit dhe shtimi i presionit mbi sistemet publike të shëndetësisë dhe pensioneve janë duke kërcënuar themelet e ekonomisë shqiptare. Struktura e brishtë aktuale, e cila mbështetet kryesisht te konsumi dhe importet, si dhe te fluksi i parave të pista të hedhura në ndërtim e turizëm, është e paqëndrueshme dhe nuk mund të mbajë dot mbi supe peshën e një popullsie, që zvogëlohet dhe plaket me ritme kaq të shpejta. Pa masa për të frenuar emigrimin, për të rikthyer fuqinë punëtore, për të nxitur lindshmërinë dhe për të transformuar modelin ekonomik drejt një ekonomie që mbështetet në prodhim dhe inovacion, vendi do të rrezikojë të përballet me një kolaps ekonomik. Çdo vonesë do të përkeqësojë problemet dhe do ta fundosë vendin në një krizë nga e cila mund të jetë shumë vonë për të dalë.

/Gazeta Panorama

Unioni Ndërkombëtar Demokrat në mbledhjen e Komitetit Ekzekutiv miratoi më 6 dhjetor me unanimitet një rezolutë për Shqipërinë propozuar nga Partia Demokratike e Shqipërisë dhe Partia Republikane.

Në rezolutë shprehet shqetësim i madh në lidhje ‘me përqendrimin e pushtetit në duart e një personi dhe shndërrimin e zgjedhjeve në fasadë, persekutimin politik ndaj të gjithë liderëve të opozitës, që sipas saj përballen me persekutim politik, burgosje dhe kërcënime si Sali Berisha, Ilir Meta, Fatmir Mediu, Ervin Salianji dhe Fredi Beleri, duke e krahasuar me regjimet autoritare në Bjellorusi dhe Tunizi; korrupsionin e shfrenuar dhe lidhjet mes krimit të organizuar dhe drejtuesve të Partisë Socialiste,  për të manipuluar zgjedhjet dhe ndikimin ne emërimet në postet kyçe; dështimin e qeverisjes së Ramës për të trajtuar rekomandimet e OSBE/ODIHR në lidhje me abuzimet elektorale’.

Shqetësimi i IDU bëhet akoma më i madh duke pasur parasysh afrimin e zgjedhjeve të vitit 2025 ndërkohë që represioni politik po përshkallëzohet, që dëshmon që gjyqësori është kthyer në një mjet për të shtypur opozitën dhe për të manipuluar zgjedhjet.

Kryetar i PR Fatmir Mediu  faleminderoi EPP dhe CDI për miratimin e dy rezolutave për Shqipërinë.

“Sot, ne kërkojmë mbështetjen tuaj për zgjedhje të lira dhe të ndershme. Qeveria socialiste po përdor sistemin gjyqësor si një armë kundër liderëve politikë të opozitës përmes arrestimeve, gjyqeve, dhe ndodhemi në këtë situatë vetëm katër muaj përpara zgjedhjeve.

Një  e treta e popullsisë, të rinjtë dhe profesionistët, kanë lënë vendin, duke krijuar një problem të madh për të ardhmen tonë; krimi i organizuar ka lidhje të forta me qeverinë, duke vendosur se kush do të jenë deputetët në listën e Partisë Socialiste. Kryeministri po bën gjithçka për të manipuluar zgjedhjet e ardhshme, me qëllim të sigurimit të 2/3 së mandateve parlamentare, për të ndryshuar Kushtetutën dhe për të krijuar një sistem presidencial nën kontrollin e tij.

Rezoluta e miratuar nga IDU është një sinjal i fortë që kërkon vetëm standarde për zgjedhje të lira dhe të ndershme.

Një qeveri kujdestare është e nevojshme për të mbajtur larg duart e krimit të organizuar, korrupsionit dhe qeverisë nga zgjedhjet”.

Në prezantimin e Rezolutës Vokshi, përfaqësuese e PD, theksoi:“Përtej propagandës së madhe, të paguar me para korrupsioni dhe krimi të organizuar, ekziston një realitet shumë i errët dhe i trishtë. Shqipëria ndodhet nën një regjim autoritar, ku Kryeministri kontrollon të gjitha pushtetet (politike, institucionale, ekonomike, mediatike dhe drejtësisë).

Sistemi i drejtësisë, pas reformës «së famshme» në drejtësi, e cila u ndikua  shumë dhe u financua nga Fondacioni i Shoqërisë së Hapur dhe George Soros, në vend që të bëjë drejtësi, po përdoret si një armë në duart e mazhorancës duke e shndërruar Shqipërinë ne një vende me të burgosur politikë: Sali Berisha, Ilir Meta, Fatmir Mediu, Ervin Salianji, Fredi Bejleri.

Zgjedhje të lira dhe të ndershme – tha znj Vokshi-  nuk janë organizuar në Shqipëri që nga viti 2013. Vota është e shantazhuar, e kërcënuar dhe e dhunuar. Zëri i Amerikës, media zyrtare e qeverisë në SHBA, ka publikuar një studim me një informacion tronditës: Një nga katër votues, e ka ndryshuar votën për shkak të presionit të administratës publike të këqpërdorur nga mazhoranca socialiste.

Bandat kriminale në Shqipëri, të lidhura me Kryeministrin dhe mazhorancën socialiste u përdorën nga maxhoranca për zgjedhje, dhe tani drejtojnë trafikun e drogës nga Amerika Latine në portet e Europës e janë shndërruar në rrezik jo vetëm për Shqipërinë, por për Evropën, Amerikën Latine.

Kërkojmë mbështetje për zgjedhje të lira dhe të ndershme. Modeli maqedonas, i një qeverie kujdestare, është një mundësi e mirë për ne për të pasur zgjedhje të lira dhe të ndershme.

Rezoluta e IDU kërkon:

Të ndalet persekutimi politik ndaj liderëve të opozitës, dhe sigurimi i një mjedisi të lirë e të ndershëm për të gjithë aktorët politikë në mënyrë që të bëjnë fushatë pa asnjë persekutim politik.

Garantimin e shtetit të së drejtës dhe integritetit institucional si themele të një shoqërie demokratike.

Sistem gjyqësor të paanshëm dhe të lirë nga ndërhyrjet politike.

Intensifikimin e luftës kundër krimit të organizuar, trafikimit të drogës dhe pastrimit të parave, duke siguruar që veprimet të mbeten të paanshme duke mos targetuar opozitën.

Zgjedhje të lira dhe të ndershme që garantojnë pavarësinë e administratës publike nga partia në pushtet.

Krijimin e një qeverie kujdestare, sipas modelit të Maqedonisë së Veriut, për të siguruar zgjedhje të lira dhe të ndershme.

IDU do të monitorojë nga afër zhvillimet dhe do të mbështesë aspiratat demokratike dhe europiane të Shqipërisë. sn

Rrjeti i organizatave Barazi në Vendimarrje ka reaguar në mbrojtje të deputetes Ina Zhupa, duke dënuar gjuhën e dhunës me bazë gjinore në Kuvend, në seancën e 5 dhjetorit.

Ato shprehen se gjuha e dhunës mbi bazë gjinore dekurajon gratë të merren me politikë.’ Dënojmë me vendosmëri çdo formë dhune, qoftë ajo verbale, psikologjike apo fizike, duke theksuar se dhuna minon vlerat demokratike dhe pengon përparimin e shoqërisë sonë’.

Në kushtet e tensioneve të shtuara politike, Task Forca Kundër Dhunës ndaj Grave në Politikë u bën thirrje deputetëve dhe institucioneve më të larta që të zgjedhin komunikimin dhe dialogun si mënyrën kryesore për zgjidhjen e mosmarrëveshjeve.

Kjo deklaratë vjen pas gjuhën së dhunës verbale të përdorur nga deputeti Erjon Brace, ndaj deputetes Ina Zhupa, duke përdorur terma si “mos hidh parfum” “pri thonjtë” “nuk di të lexosh, nuk di të shkruash” “dukesh si ruse”. Deputetja më pas ju kundërpërgjigj në gjuhë popullore “O Erion ti rritë boja, sa shumë m.. të ha goja”. Kjo solli edhe mbylljen e seancës plenare pas shumë përplasjeve në sallë mes kryetarëve të grupeve parlamentare Bardhi dhe Peleshi.

Deklaratë:

Thirrje për Kujdes në Komunikim dhe Dialog

Në kushtet e tensioneve të shtuara politike, Task Forca Kundër Dhunës ndaj Grave në Politikë u bën thirrje deputetëve dhe institucioneve më të larta që të zgjedhin komunikimin dhe dialogun si mënyrën kryesore për zgjidhjen e mosmarrëveshjeve. I ftojmë të gjithë aktorët politikë që të zhvillojnë një komunikim paqësor dhe me respekt, duke nxitur bashkëpunimin dhe mirëkuptimin e ndërsjellë.

Dënojmë me vendosmëri çdo formë dhune, qoftë ajo verbale, psikologjike apo fizike, duke theksuar se dhuna minon vlerat demokratike dhe pengon përparimin e shoqërisë sonë. Le të punojmë së bashku për të krijuar një mjedis ku mosmarrëveshjet zgjidhen përmes diplomacisë, respektit dhe mirëkuptimit.

Dhuna nuk ka vend në politikë, dialogu duhet të jetë rruga e vetme për të ecur përpara.

Task Forca Kundër Dhunës ndaj Grave në Politikë

sn

Erion Veliaj reagoi pas shumë orësh për kontrollin e ushtruar në banesën e tij nga SPAK dhe BKH.

Kontrolle u ushtruan edhe në banesën e vëllait të Veliajt, por edhe në galerinë e të shoqes.

Veliaj sulmoi opozitën dhe mediat, por nuk la pa lëshuar një ‘thumb’ edhe për Edi Ramën, duke thënë se: “Unë nuk bëj pjesë në atë kastë të vjetër politike që, për shumë kohë, e vendosën veten mbi ligjin, mbi drejtësinë dhe mbi llogaridhënien institucionale”.

Veliaj konfirmoi se ndaj tij dhe familjarëve po bëhet hetim pasuror. Reagimi i tij erdhi pasi u kthye nga Gjermania. Ai u fotografua në avion kur kthehej nga Hamburgu.

REAGIMI

Duke marrë shkas nga zhvillimet e ditës së sotme, hapat procedurale të kryera nga prokuroria e posaçme në lidhje me hetimin pasuror që po kryhet ndaj meje dhe familjarëve të mi, jo vetëm janë të mirëpritura, por edhe i mbështes në çdo hap.

U bë një kohë e gjatë që hetimin dhe gjykimin tim e bëjnë opozitarët e zhytur në llumin e korrupsionit dhe të “ashtuquajturat media”, që luftojnë çdo zyrtar e funksionar publik që nuk bie prè e presioneve dhe shantazheve të tyre për përfitime të padrejta.

Familjarët e mi dhe unë, si qytetar i këtij vendi, por njëkohësisht edhe në cilësinë e kryetarit të Bashkisë së Tiranës, do të jemi gjithmonë të hapur për çdo veprim dhe vendim të institucioneve të drejtësisë, por duke përbuzur njëkohësisht me neveri çdo të pavërtetë, që ka si qëllim dëmtimin e imazhit tim dhe familjarëve të mi, si dhe duke përhapur, mbi të gjitha, disinformacione edhe mbi vetë punën e këtyre institucioneve.

Unë nuk bëj pjesë në atë kastë të vjetër politike që, për shumë kohë, e vendosën veten mbi ligjin, mbi drejtësinë dhe mbi llogaridhënien institucionale.

Të gjithë këta që i kanë borxhe drejtësisë, rrokin flamurin e përkrahjes së drejtësisë kur në përputhje me ligjin dhe vendimet e gjykatave kryhen veprime procedurale në kuadër të hetimeve, dhe e sulmojnë atë me çdo mjet tashmë që drejtësia ka filluar të veprojë mbi ta, duke thyer kështu tabunë shumë vjeçare të mosndëshkueshmërisë. sn

Deputeti demokrat, njëkohësisht drejtues politik në qarkun e Elbasanit, thotë se Shqipëria është kthyer në një vend kartel të trafikut ndërkombëtar të kokainës.

I ftuar në edicionin e orës 19.00 në Syri Tv, Alizoti ngriti alarmin, mbi përfshirjen e vendit tonë në trafikun ndërkombëtar të lëndës narkotike më të shtrenjtë, kokainës, ku gjenerohen miliarda euro të ardhura nga fitimet.

Teksa iu referua vizitës që ka pasur në Gjermani së bashku me drejtuesin politik të Tiranës, Belind Këlliçi, Alizoti tha se opozita dhe PD ka kërkuar mbështetjen dhe sensibilizimin e ndërkombëtarëve për të parandaluar kartelet e drogës në Shqipëri, të cilat i konsidetron të dëmshme jo vetëm për vendin tonë, por edhe për vetë BE.

Alizoti paralajmëroi gjithashtu edhe mbi vizitat që do të ndërmarrë kryedemokrati Sali Berisha në Gjermani dhe vende të tjera të BE, për të hedhur informuar ndërkombëtaret, mbi atë se çfarë po ndodh në Shqipëri.

Policia në Shqipëri ësjtë në kontrollin e krimit. Policia kriminale gjermane dhe belge,  është e shqetësuar që Shqipëria po shkon në një vend kartel dhe është një vend kartel. Paralelizmi i Shqipërisë me Meksikën, dhe trafiku i kokainës. Të njëtat tregues ka marrë Shqipëria, është në kufi me BE dhe këtu shitet lënda më shtrenjtë e drogës, kokaina. Kjo i ka shqetësuar gjëermanët, ne si opozitë kërkojmë suport ndërkombëtar për të parandaluar këto kartele. Ne këtë kemi kërkuar nga ndërkombëtarët, që jo vetëm të shpëtojmë Shqipërinë por edhe evropën. Shqëipëria është bërë e rrezikshme. Rama ka investuar miliona e milarda për  të lobuar ndaj ‘realitetit’ shqiptar dhe zvogëlimin e opozitës.

Opozita është në formën më të mirë në aspektin ndërkombëtar. Së shpejti Berisha mund të ketë vizia në Gjermani, me CDU-në për të treguar realitetin në Shqipëri. Beteja në terren, ndjej se ka ndryshuar qëndrimi. Gjermanët janë mbështetje e mirë, nëse motivohet fuqishëm opozita, së shpejti e shoh në pushtet.

Nëse në Shqipëri nis, ruhet dhe stabilizohet mirë rruga e trafikut ndërkombëtar të kokainës, që janë miliarda euro do jetë e pamundur të shkëputet, sepse rrezikon ekonomitë botërore. Shqipëria është afër, s’e ka kapur ende. S’ka ndodhur që kartelet të caktojnë drejtorin e policisë. Bandat sot janë kartele, me grupe të mëdha financiare, nëse shqiptarët nuk çohen sot, do jetë e pamundur nësë kjo rrugë e madhe kokaine do arrijë të jetë në Shqipëri, nesër do jetë e pamundur. Të mbrojmë Shqipërinë, sepse rreziku është më i madh se komunizmi. Gjithë qytetet janë në duart e karteleve, Durrrësi, së shpejti do jetë në Tiranë.

Nëse SPAK lufton kartelët e drogës në Shqipëri, ky është  rreziku i shkombëtarizimit të Shqipërisë. E gjithë Shqipëria është emigruar, kjo është e rrezikshme. Duhet të frenojmë këtë kartel droge, Rama e ka degraduar vendin, njëri i përfshirë në botën e drogës. Te përgjimet është e gjithë Shqipëria, ka rënë gjithçka. Rama po I lufton përgjimet, pasi kërkon që ato të mos publikohen. sn

Drejtuesi politik i PD për Qarkun Tiranë, Belind Këlliçi, në një postim në Facebook ka shprehur ngushëllime për humbjen nga jeta të politikanit dhe aktivistit të njohur Arben Tafaj, i cili u nda nga jeta ditën e sotme.

Si anëtar i Këshillit Bashkiak Tiranë ai ishte një përfaqësues i palodhur i qytetarëve dhe një derë e hapur për këdo që kishte një shqetësim. Pa Arbenin, Tirana është sot më e varfër, me një referencë që do të na mungojë të gjithëve’– shkruan Këlliçi.

Postimi:

Me hidhërim të thellë mora vesh lajmin për ndarjen para kohe nga jeta të mikut, qytetarit, familjarit, bashkëpunëtorit, politikanit dhe aktivistit të palodhur për Tiranën tonë, z. Arben Tafaj.

Arben Tafaj bëri kaq shumë për qytetin, kontribuoi për vlerat më të mira që ne të gjithë aspirojmë e luftojmë për to. Si kryetar i “Shoqatës Tirana”, punoi pa u lodhur për të ruajtur trashëgiminë, shpirtin e qytetit e autenticitetin tiranas. Po gjithnjë duke përkrahur bashkëjetesën dhe frymën e miqësisë me secilin komunitet.Si anëtar i Këshillit Bashkiak Tiranë ai ishte një përfaqësues i palodhur i qytetarëve dhe një derë e hapur për këdo që kishte një shqetësim.

Pa Arbenin, Tirana është sot më e varfër, me një referencë që do të na mungojë të gjithëve.

Por ai ka lënë pas shumë punë të mira e rezultate dinjitoze, kujtime dhe vlera, siç është dhe dera e madhe Tafaj, nga ai vjen.

Ngushëllimet më të sinqerta për familjen, miqtë e të afërmit.

Qofsh i Parajsës mik i mirë [🙏🏻]

Grupi Parlamentar i Partisë Demokratike, kërkon interpelancë urgjente me Kryeministrin për egzekutimin e pagesës 110 milionë euro të shtetit shqiptar për biznesmenin Becchetti.

Në një shkresë drejtuar Kryetares së Kuvendit Gazment Bardhi shkruan se “Megjithëse, Kryeministri Edi Rama dhe ish-Ministri i Financave Arben Ahmetaj e kanë mohuar në vazhdimësi se Shqipëria do të paguante dëmshpërblimin prej 110 milionë euro sipërmarrësit Becchetti dhe ortakëve të tij, proceset e iniciuara nga qeveria shqiptare pranë ICSID dhe tribunaleve të tjera ndërkombëtare nuk arritën të prodhonin asnjë ndryshim, sa i përket detyrimit të qartë të shtetit shqiptar për shlyerjen e plotë të faturës financiare të mbylljes dhe shkatërrimit të televizionit Agonset”.

“Në javën e dytë të nëntorit, mediat shqiptare raportuan gjërësisht se një përmbarues belg kishte arritur të ekzekutonte vlerën e plotë të dëmit në favor të biznesmenit italian nëpërmjet fondeve të Albcontrol, që mbaheshin të bllokuara në llogarinë e Eurocontrol prej dhjetorit 2020”. “Sipas raportimeve mediatike, në 12 nëntor 2024, Eurocontrol ka njoftuar zyrtarisht qeverinë shqiptare dhe kompaninë Albcontrol për kryerjen e ekzekutimit të plotë tëvendimit të ICSID”.

Kërkesa

Znj. Kryetare e Kuvendit,

Në prill 2021, opinioni publik shqiptar është njohur me vendimin “Becchetti dhe të tjerë kundër Shqipërisë”, të marrë nga Qendra për Zgjidhjen e Mosmarrëveshjeve të Investimeve pranë Bankës Botërore (ICSID), e cila kishte vendosur t’iu akordonte palëve paditëse një dëmshpërblim në vlerën 110 milionë euro nga Republika e Shqipërisë, përfshirë interesat dhe shpenzimet gjyqësore.

Ky shpërblim iu akordua palëve paditëse Becchetti dhe të tjerë, pasi nga faktet dhe provat e vëna në dispozicion, ICSID ka konstatuar se si rezultat i veprimeve të paligjshme të zyrtarëve të lartë shtetërorë, ku përfshihen Edi Rama, me detyrë kryeministër i Shqipërisë, Erion Veliaj, me detyrë Kryetar i Bashkisë Tiranë dhe Ëngjëll Agaci, me detyrë Sekretar i Përgjithshëm i Këshillit të Ministrave, në bashkëpunim me zyrtarë të tjerë të një rangu më të ulët si Enkelejd Joti, me detyrë drejtor i Qendrës Spitalore Universitare “Nënë Tereza” (asokohe), ish-drejtor i përgjithshëm i Top Channel, shtetasi Skerdi Drenova, me detyrë administrator i Operator të Sistemit të Transmetimit (asokohe), ish-zëvëndësdrejtor i përgjithshëm i Top Channel dhe shtetasi Gentian Sala, kryetar i Autoritetit të Mediave Audiovizive (asokohe), ish-drejtor i Top Channel dhe Digitalb, sipërmarrjet e biznesmenit italian Becchetti janë shkatërruar plotësisht.

Konkretisht ICSID, pasi shqyrtoi mesazhin e dërguar në datën 5 shtator 2014, nga Erion Veliaj, ish-Ministër i Mirëqënies Sociale dhe Rinisë, bisedën e zhvilluar në fillim të vitit 2014 me Ëngjëll Agacin, Sekretar i Përgjithshëm i Këshillit të Ministrave, statusin në Facebook të Edi Ramës, Kryeministër i Shqipërisë dhe deklaratat e tij në medianë qershor 2015, arriti në përfundimin se vendimi i sekuestrimit të Agonset ishte finalizimi i një fushate politike kundër sipërmarrësit Becchetti dhe ortakëve të tij. Për ICSID ishte e qartë se në këtë rast nuk kemi pasur të bëjmë me një proces të rregullt ligjor, por vetëm me një proces të motivuar politikisht, që kishte për qëllim mbylljen e televizionit dhe shkatërrimin e sipërmarrjeve të biznesmenit italian Francesco Becchetti në Shqipëri (shih paragrafin 724 të vendimit).

Megjithëse, Kryeministri Edi Rama dhe ish-Ministri i Financave Arben Ahmetaj e kanë mohuar në vazhdimësi se Shqipëria do të paguante dëmshpërblimin prej 110 milionë euro sipërmarrësit Becchetti dhe ortakëve të tij, proceset e iniciuara nga qeveria shqiptare pranë ICSID dhe tribunaleve të tjera ndërkombëtare nuk arritën të prodhonin asnjë ndryshim, sa i përket detyrimit të qartë të shtetit shqiptar për shlyerjen e plotë të faturës financiare të mbylljes dhe shkatërrimit të televizionit Agonset. Në javën e dytë të nëntorit, mediat shqiptare raportuan gjërësisht se një përmbarues belg kishte arritur të ekzekutonte vlerën e plotë të dëmit në favor të biznesmenit italian nëpërmjet fondeve të Albcontrol, që mbaheshin të bllokuara në llogarinë e Eurocontrol prej dhjetorit 2020. Sipas raportimeve mediatike, në 12 nëntor 2024, Eurocontrol ka njoftuar zyrtarisht qeverinë shqiptare dhe kompaninë Albcontrol për kryerjen e ekzekutimit të plotë tëvendimit të ICSID.

Megjithatë, deri në datën e paraqitjes së kësaj kërkese, nga ana e qeverisë shqiptare dhe kompanisë Albcontrol nuk ka pasur asnjë reagim a qëndrim zyrtar sa i përket vërtetësisë së raportimeve mediatike dhe në funksion të transparencës së plotë me taksapaguesit shqiptarë, të cilët për shkak të veprimeve arbitrare e të paligjshme të kryera nga zyrtarë të lartë të shtetit shqiptar, si Kryeministri, Kryebashkiaku i Tiranës dhe Sekretari i Përgjithshëm i qeverisë duhet të shlyejnë faturën më të lartë në historinë e arbitrazheve ndërkombëtare me palë shtetin shqiptar. Qeveria dhe kompania Albcontrol kanë për detyrë të informojnë Kuvendin e Shqipërisë, dhe nëpërmjet tij qytetarët shqiptarë lidhur me vërtetësinë e këtij procesi, përgjegjësit dhe pasojat e këtij dëmi kaq të lartë financiar.

Prandaj, duke pasur parasysh sa më sipër, në cilësinë e kryetarit të Grupit Parlamentar të Partisë Demokratike, në mbështetje të nenit 80 të Kushtetutës së Shqipërisë dhe neni 97 të Rregullores së Kuvendit, kërkojmë zhvillimin e një interpelance urgjente me Kryeministrin e Shqipërisë Edi Rama, me qëllim dhënien e informacioneve dhe shpjegimeve të detajuara lidhur me ekzekutimin e vendimit “Becchetti dhe të tjerë kundër Shqipërisë”, të Qendrës për Zgjidhjen e Mosmarrëveshjeve të Investimeve (ICSID). sn

Dhjetë ditë pas vrasjes së 14-vjeçarit Martin Cani pranë shkollës 9-vjeçare “Fan Noli” në Tiranë, nga autori i dyshuar, M. Përlleshaj, dhimbjes së pakufijshme të familjes dhe trishtimit të madh që përfshiu opinionin publik, i është shtuar edhe dyshimi i fortë mbi mos-reagimin, madje edhe akuza më të rënda për fshehje të krimit, nga ana e institucioneve arsimore dhe ato ligjzbatuese.

Të paktën tre protesta qytetare para Ministrisë së Arsimit nuk e kanë luajtur aspak këtë institucion të marrë masa ose më së paku të tregojë nëse ka zhvilluar një hetim administrativ dhe cilat janë konkluzionet e mundshme mbi stafin pedagogjik dhe drejtuesit e shkollës.

Nën parimin “gjithçka harrohet shpejt”, Ministrja Ogerta Manastirliu dhe bashkëpunëtorët e saj po paraqesin në media plane e projekte për rritjen e sigurisë në shkolla, pa thënë më parë se çfarë dështoi në rastin e vrasjes së 14-vjeçarit.

Por, kur ka kaluar më shumë se një javë nga ngjarja tragjike, akuzat më të rënda publike po ngrihen mbi institucionet ligjzbatuese, Policinë në radhë të parë, e më tej Prokurorinë.

Për ngjarjen, tashmë është arrestua M. Përlleshaj, si autor i dyshuar. Por, të dhëna publike, të deklaruara nga aktorë të dorës së parë në ngjarje, flasin edhe për më së paku një autor tjetër, po 14-vjeçar.

Në sherrin mes të miturve, krahas vrasjes së M. Canit, ka mbetur i plagosur edhe një miku i tij, L. M., i cili prej ditësh qëndron në regjim spitalor. Babai i të plagosurit, por edhe vetë i dëmtuari i mitur, kanë deklaruar që në ditët e para se në sherr ka qenë edhe një goditës i dytë, K. Bekaj, gjithashtu 14-vjeçar.

Ky deklarim është një akuzë shumë e rëndë për Policinë, për atë të Tiranës, por edhe për Drejtorinë e Përgjithshme.

Pas gjithë këtyre ditëve, Policia nuk rezulton të ketë kryer veprime hetimore ndaj këtij personazhi që dyshohet si “goditës i dytë” me thikë.

Madje, në një reagim pas deklaratave publike të babait të djaloshit të plagosur, Policia reagoi në mënyrë cinike dhe kërcënuese.

“Policia e Shtetit vëren se burime të caktuara janë angazhuar në një fushatë mediatike dizinformimi, lidhur me vrasjen e 14-vjeçarit nga një bashkëmoshatar i tij, në një distancë rreth 200 metra nga shkolla “Fan Noli” në Tiranë”, u tha në një deklaratë të lëshuar në datën 24 nëntor, pa përmendur se “burime të caktuara dizinformimi” në fakt janë vetë i plagosuri dhe babai i tij.

Partia Demokratike në opozitë akuzoi Drejtorin e Përgjithshëm të Policisë, Ilir Proda, se po fsheh autorin e dytë të dyshuar, pasi prindërit e tij punojnë në SPAK dhe BKH.

Nuk është hera e parë për Policinë që gjendet nën akuza publike për fshehje krimesh, prishje vendngjarjesh e të tjerë.

Si rregull, veprimet e Policisë, edhe ato të dyshimtat, verifikohen dhe kontrollohen nga Prokuroria.

Në rastin konkret, prokuroria e Tiranës dhe prokurorja e çështjes, Alma Felaj, kanë mbajtur heshtje publike, nën argumentin e “zhvillimit të hetimeve” dhe “kryerjes së ekspertizave”.

Vrasja tragjike e M. Canit nuk ka elementë të sekretit hetimor. Ngjarja ka ndodhur në sy të shumë njerëzve, pjesa më e madhe e tyre të mitur të shkollës “Fan Noli”.

Policia, ashtu edhe Prokuroria, i kanë që ditën e parë emrat e personave të përfshirë, kanë dinamikën e ngjarjes, siç e ka edhe publiku, nëpërmjet dëshmive të shumë dëshmitarëve okularë.

Prokuroria ka në dorë të tregojë nëse Policia e ka fshehur ngjarjen, nëse ka shmangur persona nga përgjegjësia penale dhe, nëse ka ndodhur diçka e tillë, për cilat arsye ka vepruar në këtë mënyrë.

Por, nga ana e prokurorisë po mbahet një “heshtje peshku”, duke shtuar më shumë dyshimet se ka element të rëndësishëm të krimit që po mbahen të fshehur dhe po mbulohen.

Një postulat akademik thotë që “drejtësia jo vetëm duhet të jepet, por edhe të duket që po jepet”. Në rastin e 14-vjeçarit, M. Cani, deri më tani, “drejtësia nuk duket se po jepet”.

Ndoshta është shpejt, por gjaku i 14-vjeçarit u tha, shoqëria në përgjithësi, por sidomos prindërit nuk po arrijnë të kalojnë traumën. Ndaj, akuzat publike për “fshehje autorësie” kanë nevojë për një përgjigje. Sot, jo nesër!/Boldnews.al

5 vite pas tërmetit tragjik mijëra familje vijojnë të jenë pa çati mbi krye. Kryeministri zotohej se familjet e pastreha do të gëzonin banesat brenda 2020, por procesi nuk ka mbaruar. Buxheti ka dhënë mbi 1 miliardë euro për rindërtimin që pritet të mbyllet në 2026.

Pak orë pasi mijëra familje shqiptare u gjendën në udhëkryeq për shkak të tërmetit shkatërrimtar të 26 nëntorit 2019, kryeministri Edi Rama u zotua se të gjithë të pastrehët do të futeshin në banesat e reja brenda një viti.

“Brenda vitit 2020 nuk duhet të ketë më diskutim për asnjë person që ka humbur shtëpinë nga tërmeti. Duhet të jenë të gjithë në kushte më të mira se ç’ishin para tërmetit.”, premtoi Rama asokohe.

Fakt

Pesë vite pas tërmetit tragjik mijëra familje vijojnë të pastreha. Procesi i rindërtimit nuk është mbyllur me afate të zvarritura vit pas viti. Vonesat në rindërtim sipas drejtuesit të Institutit të Bashkive janë diktuar nga disa faktorë.

“Procedurat e komplikuara administrative dhe burokracia kanë zgjatur kohën për aprovimin e projekteve dhe dhënien e fondeve. Koordinimi i pamjaftueshëm midis bashkive dhe qendrore shpesh ka çuar në vonesa. Përparësitë shpesh janë vendosur sipas kritereve që nuk janë të qarta, çka ka krijuar ndjenja të pabarazisë në komunitete. Kapacitetet e kufizuara teknike dhe financiare qe vijnë nga buxhet i pamjaftueshëm dhe larg pritshmërive.”, argumenton Haxhimali.

Afati i ri i dhënë zyrtarisht është fundi i vitit 2026. Por ekspertët thonë se procesi do të marrë më shumë kohë.

“Ky 5 vjetor le të jetë një kembanë zhurmuese për rishikimin e prioriteteve dhe forcimin e menaxhimit institucional. Gjithashtu të shërbejë si moment reflektimi dhe rishikimi për të përshpejtuar përmbushjen e detyrimeve ndaj qytetarëve të prekur.”, shprehet Haxhimali nga Instituti i Bashkive.

Barra e rindërtimit në buxhet

Të dhënat e përpunuara nga Faktoje tregojnë se buxheti i shtetit ka mbajtur barrën kryesore të rindërtimit. Shpenzimet që nga krijimi i fondit të rindërtimit, deri në nëntor të këtij viti rezultojnë 126,4 miliardë lekë- mbi 1 miliardë euro.

Me aktin e fundit normativ, qeveria i shtoi buxhetit të këtij viti 2 miliardë lekë për financimin e punimeve të kryera për rindërtimin. Ndërsa në buxhetin e vitit të ardhshëm, fondi shtohet me 2 miliardë lekë të tjera.

Referuar të dhënave, barra financiare e taksapaguesve shqiptarë për rindërtimin ka qënë më e lartë në katër vitet e para. Por fondet edhe pse më të pakta do të vijojnë në buxhet të paktën deri në fund të 2026. Buxheti parashikon 2 miliardë lekë si fond për rindërtimin pas dy vitesh.

Paratë e donatorëve

Në konferencën e donatorëve për rindërtimin në Bruksel, Shqipërisë iu vunë në dispozicion 1,15 miliardë euro në formë grantesh dhe kredish të buta.

“Komuniteti ndërkombëtar ka angazhuar 1.15 miliardë euro për Shqipërinë, që është një shifër fenomenale, që do të plotësojë nevojat dhe unë jam shumë e emocionuar nga solidariteti i treguar nga komuniteti ndërkombëtar për Shqipërinë.”, shprehej asokohe Presidentja e Komisionit Europian, Ursula von der Leyen në krah të Kryeministrit Edi Rama në shkurt të 2020-s.

Nga fondi 1.15 miliardë euro, 750 milionë ishin kredi të buta. Huatë më interesa të ulta qeveria i shpërfilli duke ia lënë barrën e rindërtimit buxhetit të shtetit.

Të dhënat e ministrisë së Financave tregojnë se nga viti 2020, e deri në prill të këtij viti, qeveria ka marrë 38 linja kredie nga institucione të ndryshme financiare ndërkombëtare. Por asnjë prej tyre nuk lidhet me rindërtimin.

“Qeveria nuk e realizoi këtë, sepse s’kishte mundësi t‘i alokonte fonde oligarkëve dhe klientëve të saj, duke përfshirë dhe elemente të krimit të organizuar. Por përdori paratë e buxhetit që gjithsesi janë të pamjaftueshme.”, argumenton Zef Preçi, drejtor ekzekutiv i Qendrës Shqiptare për Kërkime Ekonomike.

Nën petkun e emergjencës, shumica e kontratave për rindërtimin u lidhën përmes procedurës së kufizuar dhe negociimit të drejtëpërdrejtë.

‘Nëse nuk respekton rregullat e shkruara, asnjë donator nuk të jep, sepse ata japin llogari përpara taksapaguesve. Kanë manuale dhe rregulla të shkruara dhe shkelja e tyre ngarkon me përgjegjësi cilindo që certifikon para që nuk shkojnë për destinacionin dhe mbi bazën e rregullave të përcaktuara për të cilat janë dhënë.’, thekson më tej Preçi.

Përfundim

Nisur nga informacionet e mbledhura premtimin e kryeministrit Edi Rama se ‘brenda vitit 2020 nuk duhet të ketë më diskutim për asnjë person që ka humbur shtëpinë nga tërmeti’ e kategorizojmë të pambajtur. sn

Kryetari i FRPD-së, Besart Xhaferri, në një postim në rrjetin socuial Facebook, ngriti shqetësimin për gjendjen e demokracisë në Shqipëri, duke iu referuar një letre publike nga Forumi Rinor i Partisë Popullore Evropiane (YEPP).

Në reagimin e tij, Xhaferri thekson tentativat për të asgjësuar opozitën dhe për të shtypur garën e ndershme elektorale, duke paralajmëruar rrezikun për integrimin e vendit në BE. Ai vë në pah mbështetjen e YEPP për Partinë Demokratike dhe forumet rinore, si dhe kritikën ndaj qeverisë për shtypjen e zërave opozitarë.  Sipas Xhaferrit, këto zhvillime minojnë të ardhmen e Shqipërisë dhe kërkojnë ndërhyrje urgjente për të rikthyer demokracinë dhe shpresën për të rinjtë.

POSTIMI I XHAFERRIT:

Në Shqipëri zërat e opozitës po shtypen dhe po tentohet të agjësohet gara e ndershme   elektorale  që është tipar dallues i një shoqërie demokratike.
Alarmi është ngritur nga Forumi Rinor i Partisë Popullore Evropiane YEPP që përmes një letre publike shpreh shqetësimin e thellë se në Shqipëri po minohet struktura demokratike e vendit në dobi të autokracisë.
Në një kohë që lideri i opozitës Sali Berisha mbahet padrejtësisht me masë sigurie dhe drejtësia po godet ata që përbëjnë rrezik elektoral për Edi Ramën YEPP thekson në reagim se e drejta për një konkurrncë të ndershme politike nuk është vetëm një shenjë dalluese e demokracisë, por një domosdoshmëri për rrugën e integrimit të Shqipërisë në BE.
Nga ana tjetër Forumi Rinor i Partisë Popullore Evropiane  ngre zërin për plagën më të rëndë të Shqipërisë, eksodin dramatik të rinisë ku sipas YEPP të  rinjtë shqiptarë po largohen për shkak të mundësive të kufizuara ekonomike dhe pakësimit të besimit në sistemin politik dhe se ky eksod kërcënon potencialin e ardhshëm të Shqipërisë.
YEPP  në letrën publike konfirmon se qëndron fort përkrah Partisë Demokratike të Shqipërisë dhe forumit të saj rinor FRPD, në luftën e tyre për të rivendosur qeverisjen demokratike dhe për të adresuar këto çështje kritike.
Leta e plotë e Forumit Rinor të Partsë Popullore Evropiane
Rinia e Partisë Popullore Evropiane (YEPP) ripohon përkushtimin e saj të palëkundur ndaj parimeve të demokracisë, shtetit të së drejtës dhe të drejtave të njeriut, të cilat janë të gjitha themelore për aspiratat e Shqipërisë për anëtarësim në Bashkimin Evropian. Me shqetësim të thellë, ne trajtojmë sfidat urgjente që minojnë strukturën demokratike të Shqipërisë.
Së pari, jemi të alarmuar nga mungesa e institucioneve të fuqishme demokratike në Shqipëri. Siç theksohet në rezolutat e Asamblesë Politike të PPE të Maltës, respektimi i parimeve demokratike dhe sundimit të ligjit është thelbësor për anëtarësimin në BE. Qeverisja e Shqipërisë duhet të sigurojë llogaridhënie, transparencë dhe gjithëpërfshirje në të gjitha nivelet për të mbështetur këto vlera.
Së dyti, ne e pranojmë problemin e rëndë të emigrimit të të rinjve. Shumë të rinj shqiptarë po largohen për shkak të mundësive të kufizuara ekonomike dhe pakësimit të besimit në sistemin politik. Ky eksod kërcënon potencialin e ardhshëm të Shqipërisë dhe nënvizon nevojën urgjente për reforma për të krijuar një mjedis të begatë dhe shpresëdhënës për brezin e ardhshëm.
Për më tepër, ne dënojmë shtypjen e zërave të opozitës nga qeveria. E drejta për një konkurrencë të ndershme politike nuk është vetëm një shenjë dalluese e demokracisë, por një domosdoshmëri për rrugën e integrimit të Shqipërisë në BE. Partia Popullore Evropiane ka bërë thirrje vazhdimisht për respekt ndaj të gjitha subjekteve politike dhe respektim të normave demokratike.
YEPP qëndron fort përkrah Partisë Demokratike të Shqipërisë dhe forumit të saj rinor, në luftën e saj për të rivendosur qeverisjen demokratike dhe për të adresuar këto çështje kritike. Ne përgëzojmë përkushtimin e tij të palëkundur ndaj procesit të integrimit europian, i cili përputhet me vlerat e mishëruara në rezolutat e kaluara të PPE për Shqipërinë.
E ardhmja e Shqipërisë si një demokraci e fortë dhe e gjallë brenda familjes evropiane varet nga veprimet e menjëhershme dhe të bashkërenduara për të trajtuar këto sfida. YEPP u kërkon autoriteteve shqiptare të respektojnë angazhimet e tyre ndaj kornizës së anëtarësimit në BE dhe të sigurojnë ruajtjen dhe forcimin e institucioneve dhe parimeve demokratike.
Së bashku, ne parashikojmë një Shqipëri që mishëron plotësisht vlerat evropiane – një komb ku demokracia lulëzon, mundësitë janë të shumta dhe të gjithë qytetarët mund të realizojnë aspiratat e tyre brenda atdheut të tyre.

SPAK ka reaguar zyrtarisht për operacionin ku është goditur banda e Suel Çelës në Elbasan.

Sipas njoftimit të SPAK, Suel Cela ka synuar të manipulojë perceptimin publik, duke i paraqitur rivalët e tij si të paprekshëm për shkak të lidhjeve të dyshuara që ata mund të kenë me politikën.

Trysnia për hetime pasurore në kuadër të OFL-së dhe nxitja e mediave për të marrë dëshmi nga individë që mund të inkriminojnë rivalët e tij do të krijonin, sipas tij, në opinionin publik perceptimin se këta rivalë, për shkak të lidhjeve të dyshuara politike, janë bërë “të paprekshëm”. Kjo strategji, e cila përfshin manipulimin e informacionit dhe ndikimin në opinionin publik, jo vetëm që do të rriste pozitat e tij, dhe në të njëjten kohë do të dëmtonte interesat e rivalëve.

Dyshohet se këto synime i ka realizuar përmes bashkëpunimit me gazetarët A.H. dhe E.Q, të cilët kundrejt përfitimeve monetare të paligjshme kanë mbajtur qëndrime në media, si dhe kanë publikuar artikuj dhe video që keqinformonin dhe manipulonin opinionin publik.

Njoftimi i SPAK:

Goditet Organizata Kriminale nga Elbasani në Trafikun Ndërkombëtar të Kokainës

Prokuroria e Posaçme Kundër Korrupsionit dhe Krimit të Organizuar (SPAK), në bashkëpunim me Eurojust, Europol, autoritetet e drejtësisë së Francës, Belgjikës, Holandës dhe Ekuadorit ka dokumentuar dhe ndjekur penalisht një organizatë të mirëstrukturuar kriminale në trafikun ndërkombëtar të kokainës, me bazë në qytetin e Elbasanit dhe me shtrirje në vendet e Bashkimit Europian dhe Amerikës Latine. Ky hetim i bazuar në  komunikimet e koduara  SKY/EÇ dhe në veprimet të tjera hetimore vijon edhe për dokumentimin e veprimtarisë kriminale për persona të tjerë.

Me kërkesë të Prokurorisë së Posaçme, Gjykata e Posaçme e Shkalles së Parë për Korrupsionin dhe Krimin e Organizuar ka caktuar masat e sigurisë për 21 persona:

Arrest me burg për 18 individë, duke përfshirë drejtuesit e grupit, një ish-zyrtar i lartë policie dhe një ish-gjyqtar.

Arrest në shtëpi për 1 avokat.

Detyrim paraqitjeje për 2 gazetarë.

Struktura e Organizatës

Kjo organizatë kriminale, në fokusin e saj kishte kontrollin e territorit, kryesisht në Shqipërinë e Mesme, duke përdorur mekanizma të ndryshëm si dhe dhunë të vazhdueshme ndaj grupeve rivale kriminale.

Organizata kriminale që drejtohej nga S.Ç. me qëllim kontrollin e territorit  kishte si synim kryesor eliminimin fizik të anëtarëve të një grupi tjetër të strukturuar kriminal i cili vepronte po në qytetin e Elbasanit dhe që konsiderohej si kundërshtar i organizatës kriminale që drejtohej nga S. Ç.

I gjithë aktivitetit financohej nga paratë që përfitoheshin nga aktiviteti kriminal i trafikimit të lëndëve narkotike nga Amerika Latine drejt vendeve si; Gjermania, Mbretëria e Bashkuar, Italia, Belgjika dhe Holanda.

Gjatë hetimit të këtij procedimi penal nr.193/2023 janë dokumentuar faktet penale si më poshtë:

Vrasje e mbetur në tentativë me snajper në dëm të shtetasit, A.Ç., në datën 08.06.2020 në qytetin e Elbasanit

Sigurimi i kushteve dhe mjeteve materiale për kryerjen e vrasjes në dëm të shtetasit B.M, mars 2020;

Sigurimi i kushteve dhe mjeteve materiale për kryerjen e vrasjes në dëm të shtetasit E.K, në vitin 2020.

Tentativa për trafikimin e afërsisht 930 kg të lëndës narkotike, lloji kokainë nga Ekuadori në Europë, në dhjetor 2020.

Tentativa për trafikimin e 466 kg të lëndës narkotike, lloji kokainë nga Ekuadori në Holandë, në janar 2021.

Ushtrimi i ndikimit përmes akteve korruptive në segmente të caktuara të sistemit të drejtësisë, policisë së shtetit dhe medias.

Shtetasi M.L. (alias S.Ç.) është identifikuar si drejtuesi i organizatës, përgjegjës për menaxhimin dhe koordinimin e aktiviteteve kriminale, përfshirë vrasjet, trafikimin ndërkombëtar të drogës, kryerjen e veprimeve korruptive dhe organizimin e skemave të pastrimit të parave. Ndërkohë disa nga anëtarët me role kyçe si;  M.Ç., A.V., B.SH, K.M., Xh.R.etj ishin pjesë operative e organizatës, të angazhuar në planifikimin dhe ekzekutimin e veprave të rënda penale, përfshirë vrasje me paramendim dhe trafikun e narkotikëve.

Roli i personave të tjerë

Organizata kishte arritur të korruptonte funksionarë të policisë së shtetit (D.GJ.) dhe të sistemit gjyqësor (P.F.) të cilët duke shfrytëzuar pozicionin e tyre zyrtar e ndihmonin organizatën me informacione, duke ofruar gjithashtu lehtësira dhe ndikime në sistemin gjyqësor në këmbim të favoreve dhe përfitimeve materiale. Organizata kriminale kishte aftësi që të ndikonte dhe të korruptonte përfaqësues të sistemit të drejtësisë me qëllim që këta të fundit të lehtësonin pozitën e drejtuesit S.Ç. dhe anëtarëve të tjerë të organizatës në proceset penale në ngarkim të tyre. Për t’u theksuar është aftësia e organizatës që të ndikojë tek trupa gjyqësore me qëllim që të rëndohej pozita apo masa e dënimit që do te jepej në ngarkim të anëtarëve të grupit kriminal që konsideroheshin si kundërshtarë të tyre.

M.L ka synuar të manipulojë perceptimin publik, duke i paraqitur rivalët e tij si të paprekshëm për shkak të lidhjeve të dyshuara që ata mund të kenë me politikën. Trysnia për hetime pasurore në kuadër të OFL-së dhe nxitja e mediave për të marrë dëshmi nga individë që mund të inkriminojnë rivalët e tij do të krijonin, sipas tij, në opinionin publik perceptimin se këta rivalë, për shkak të lidhjeve të dyshuara politike, janë bërë “të paprekshëm”. Kjo strategji, e cila përfshin manipulimin e informacionit dhe ndikimin në opinionin publik, jo vetëm që do të rriste pozitat e tij, dhe në të njëjtën kohë do të dëmtonte interesat e rivalëve.

Dyshohet se këto synime i ka realizuar përmes bashkëpunimit me gazetarët A.H. dhe E.Q, të cilët kundrejt përfitimeve monetare të paligjshme kanë mbajtur qëndrime në media, si dhe kanë publikuar artikuj dhe video që keqinformonin dhe manipulonin opinionin publik.

Rrjeti i trafikut ndërkombëtar të kokainës

Organizata ka zbatuar një skemë komplekse të mbyllur të trafikut të kokainës nga Amerika Latine drejt vendeve të Europës duke bashkuar me grupe të ndryshme kriminale me lidhje të forta në Amerikën Latine. Organizata e porosiste lëndën narkotike nga grupe të strukturuara kriminale shqiptare të lidhur me grupe kriminale vendase në Amerikën Latinen.

Më pas, sasia e lëndës narkotike transportohej e fshehur në produkte të ligjshme dhe tranzitohej në disa porte europiane me destinacion shtetet si; Gjermania, Mbretëria e Bashkuar, Italia, Belgjika dhe Holanda, nga ku nxirrej, trafikohej dhe shitej me shumicë nga anëtarët e organizatës drejt tregun europian i narkotikëve. Pjesa më e madhe e ngarkesave lëvizte me kontejnerë në porte të mëdha si Antverp,  Roterdam etj., të cilët shpesh shërbenin si pika kyçe për trafikun e saj në tregun evropian. Gjithashtu ka pasur tentativa për të kryer transport të lëndëve narkotike përmes aeroporteve të Belgjikës dhe Holandës.

Një pjesë e të ardhurave nga ky aktivitet kriminal investohej:

a. Në blerjen e lëndës narkotike

b. Në gjendje cash-i në Shqipëri

c. Në biznese në dukje të rregullt

d. Për të mbështetur infrastrukturën operative të organizatës dhe blerje influence në segmente të veçanta të sistemit të drejtësisë, policisë, medias dhe biznesit

Për këtë operacion falenderojmë Europol, Eurojust, autoritetet e drejtësisë dhe ato ligjzbatuese të; Francës, Holandës, Belgjikës dhe autoritetet italiane (Ufficio del’ Esperto per la Sicurezza a Tirana, Squadra Mobile di Milano).

Sqarim: Gjithkush prezumohet i pafajshëm derisa nuk vërtetohet fajësia e tij me vendim të formës së prerë.

Shënim për gazetarët:

Masat e sigurimit janë dhënë për personat e mëposhtëm:

M.L alias S.Ç –  36 vjeç, banues në Elbasan

M.Ç – 35 vjeç, banues në Elbasan

XH.R – 33 vjeç, banues në Tiranë

K.M alias K.Ç alias K.Ç – 37, banues në Elbasan

S.H – 30 vjeç, banues në Elbasan

B.H – 34 vjeç, banues në Elbasan

L.Z – 33 vjeç, banues në Elbasan

M.R – 37 vjeç, banues në Tiranë

A.Xh, alias E.C, A.C –  39 vjeç, banues në Tiranë

P. K. – 48 vjeç, banues në Malësinë e Madhe

F.V –  48 vjeç, banues në Elbasan

M.M – 27 vjeç, banues në Elbasan

R.H – 35 vjeç, banues në Elbasan

S.S – 34 vjeç, banues në Tiranë

A.H – 50 vjeç, banues në Tiranë

E.Q – 39 vjeç, banues në Tiranë

P.F – 65 vjeç, banues në Elbasan

D.Gj – 48 vjeç, banues në Tiranë

M.Sh, alias B.Sh – 51 vjeç, banues në Tiranë

H.L alias H.X alias H.S – 40 vjeç, banues në Tiranë

B.B –  39 vjeç, banues në Elbasan

Veprat penale të dyshuara:

“Vrasje me paramendim”, e mbetur në tentativë, në dëm të A.Ç, ngjarje e ndodhur në datën 08.06.2020;

“Sigurimi i kushteve dhe i mjeteve materiale për të kryer vrasje në dëm të E. K. dhe B.M.

“Mbajtja pa leje dhe prodhimi i armëve, armëve shpërthyese dhe municionit”, kryer në formë të veçantë të bashkëpunimit, atë të organizatës kriminale, “Organizata kriminale” dhe “Kryerja e veprave penale nga organizata kriminale dhe grupi i strukturuar kriminal”.

“Trafikimi i narkotikëve”, kryer në formë të veçantë të bashkëpunimit atë të grupit të strukturuar kriminal”.

“Grup i strukturuar kriminal”.

“Korrupsion aktiv i gjyqtarit, prokurorit dhe i funksionarëve të tjerë të drejtësisë”.

“Korrupsion aktiv në sektorin privat”, i kryer në bashkëpunim.

“Shpërdorim detyre”.

“Pastrimi i produkteve të veprës penale ose veprimtarisë kriminale” .

SN

Të tjera detaje janë zbardhur nga skandali ku është përfshirë me dashje, Policia e Shtetit, në lidhje me autorin e dytë që ka marrë pjesë në vrasjen e Martin Canit dhe plagosjen e Luis Meçajt.

Pasi u bë e ditur se autori i dytë, i cili është ende i lirë, është djali i një hetuesi të Byrosë Kombëtare të Hetimit, tani është mësuar se edhe nëna e djalit është pjesë e SPAK, si punonjëse e administratës.

Burime ekskluzive për JOQ kanë zbuluar skandalin në vrasjen e Martin Canit, ku një prej të miturve është lënë i lirë.

Emri që është fshirë nga Policia e Shtetit është Kledion Bejkaj, shoku i autorit të vrasjes Mario Prelleshaj.

Bejkaj nuk është ndaluar nga policia, pasi policia pretendon se ai nuk ka qenë i përfshirë në krim, ndërkohë që të kundërtën ka treguar i plagosuri Luis Meçaj.

JOQ zbulon se Kledion Bejkaj është djali i Maksim Bejkajt, hetues në Byronë Kombëtare të Hetimit (BKH), dhe Nevila Bejkajt, Specialiste e Regjistrave dhe Statistikës pranë Prokurorisë së Posaçme.

Sipas grupit hetimor, është arritur në përfundimin se Mario Prelleshaj ka vepruar i vetëm dhe nuk ka pasur një bashkëpunëtor në ngjarje, por në deklaratën e marrë nga OPGJ, Kledion Bejkaj ka shoqëruar Mario Prelleshajn në sulmin ndaj viktimës.

Bejkaj është denoncuar publikisht edhe nga i ati i Luis Meçajt, i cili ka thënë se i mituri mbante një thikë të vogël dhe ka goditur pas shpine të birin. Ndër të tjera ai ka thënë se 14-vjeçarin, prindërit me influencë në BKH, po mundohen ta nxjerrin jashtë Shqipërisë. SN

Gazetarja Anila Jole, aktualisht kryeredaktore e News24, ka bërë një denoncim të fortë, duke akuzuar policinë se po përfshihet në një krim edhe më të rëndë, se ai që ndodhi.

Jole shkruan në Facebook se autori i dytë i vrasjes së Martinit dhe plagosjes së shokut të tij, Luis Meçajt është djali i një hetuesi të Byrosë Kombëtare të Hetimit.

Reagimi i gazetares Anila Jole:

Vrasja e 14 vjeçarit Martin Cani ishte një kob për të gjithë, por me kobshme po bëhet ajo nga përpjekjet e paturpshme për ta mbuluar. Prokuroria, policia dhe fatkeqësisht edhe disa media po bëjnë ç’është e mundur të mbrojnë një version të cunguar të vrasjes, atë që publiku mësoi që ditën e ngjarjes.

Por tashmë për çdo mendje të kthjellët e të drejtë ka disa fakte që vërtetojnë se në vrasjen e Martinit kanë qenë pjesëmarrës të paktën 2 persona.

– Këtë e dëshmon shoku i Martinit që po kurohet në spital. Ai thotë se është qëlluar nga 2 persona me 2 thika të ndryshme dhe provë për policinë janë plagët që ka në trup. Një ekspertizë e thjeshtë mund të vërtetojë dëshminë e tij, por një rezultat i saj ende nuk ka dalë.

– Po ashtu thika e gjetur pranë ATSH nuk është e njëjta me atë që reklamonte vrasësi 14 vjeçar në Tik Tok.

– Vrasësit janë larguar nga vendngjarja me një makinë (të cilën nuk mund ta drejtojë një 14 vjeçar). Pra autori i vrasjes, gjithësesi nuk është vetëm ai që është arrestuar.

Këto janë disa elementë që dalin nga aq sa është bërë publike dhe nuk do shumë mend për të kuptuar se diçka e madhe po fshihet.

Shumë gazetarë e dinë dhe e kanë thënë se personi që po mbahet i fshehur është djali i një hetuesi të BKH, por shumë gazetarë të tjerë edhe pse e dine, bëjnë emisione për të devijuar të vërtetën. Hetuesi i BKH që paguhet për të bërë drejtësi, po bën ç’është e mundur të shpëtojë të birin nga ndëshkimi i merituar. Kaq i madh është presioni i tij, saqë edhe vetë 14 vjeçari i arrestuar nuk e tregon emrin e shokut të tij, ndërsa policia për çudinë e madhe nuk gjen asnjë provë që të vërtetojë këto dëshmi. Asnjë kamera nuk e paska filmuar autorin e dytë, edhe pse i plagosuri thotë që ai qëllonte se bashku me atë që tashmë është arrestuar. Por përse disa ditë më parë policia nxitoi të bëjë njoftim ku siguronte opinionin se në vrasje nuk ka marrë pjesë një person i dytë veç të arrestuarit?

Unë besoj se sado përpjekje të bëhen, e vërteta do dalë, sepse shpresoj që kanë mbetur në këtë vend 2 njerëz të ndershëm që iu dhemb dhimbja e prindërve të Martinit dhe e ndiejnë detyrim t’i thonë publikut të tronditur se krimi do ndëshkohet. Unë besoj se nëse askush nuk do bëjë drejtësi për Martinin, do të jetë Zoti gjykatësi më i drejtë.

Nuk mund të flesh i qetë me gjakun e një fëmijë në duar! sn

Prokuroria e Posaçme (SPAK) ka lëshuar 21 masa sigurie në kuadër të një operacioni për goditjen e grupit kriminal të Suel Çelës, një prej personazheve më të njohur të botës së krimit në qytetin e Elbasanit. Për 18 prej tyre është caktuar masa ‘arrest me burg’, për një avokate masa ‘arrest në shtëpi’, si dhe ‘detyrim paraqitje’ për dy gazetarë.

Operacioni është ende në vijim, teksa ditën e sotme SPAK ka njoftuar se do të dalë me një komunikatë zyrtare për të dhënë një informacion më të zgjeruar rreth këtij operacioni.

Mësohet se mbi anëtarët e kësaj organizate kriminale rëndojnë nga akuzat e trafikut të lëndëve narkotike nga vendet e Amerikës Latine drejt Evropës, deri te vrasjet.

Burime bëjnë me dije se nga bisedat në aplikacionin e enkriptuar ‘Sky ECC’, SPAK ka zbardhur dhe atentatin ndaj Ardian Çapjes, i regjistruar më 8 qershor të vitit 2020.

Në atë kohën Çapja u qëllua me armë zjarri snajper nga një distancë e largët, kur ai ndodhej në oborrin e vilës së tij në Elbasan, të monitoruar në çdo cep nga kamerat, teksa qitësi dyshohet se ishte pozicionuar në kodrën e Krastës.

Çapja arriti që t’i shpëtojë atentatit, teksa mori një plumb në shpatullën e majtë, pranë zemrës. Në momentin që u rrëzua dhe ra në tokë, ai mori edhe një frakturë në kokë.

Në atë kohë Ardian Çapja u dërgua fillimisht në spitalin e Elbasanit dhe më pas u transportua në Tiranë te ‘Trauma’, ku iu nënshtrua një ndërhyrje kirurgjikale dhe arriti t’i shpëtonte plagës së marrë.

Nga operacioni i fundit i SPAK, mësohet se autori i dyshuar i këtij atentati ka qenë snajperisti Prek Kodra, ndaj të cilit është lëshuar një urdhër-arresti, ndërsa porositës ka qenë grupi i Suel Çelës.

Prek Kodra është shpallur në kërkim nga SPAK edhe në dy operacione të mëparshme të SPAK, teksa dyshohet se është një vrasës me pagesë i përfshirë në disa ngjarje kriminale në Shqipëri dhe në Kosovë.

Me origjinë nga fshati Shtoj i Ri i Shkodrës, Prek Kodra konsiderohet si një person me rrezikshmëri të lartë, i dyshuar edhe për një atentat të mundshëm ndaj kryeministrit të Kosovës, Albin Kurti në vitin 2021.

Kjo u zbulua nga e mail-et e ish-drejtorit të Policisë së Shtetit, Gledis Nano, të cilat u nxorën në publik nga grupi i hakerave iranianë, pas hakerimit të institucioneve shtetërore.

Sipas dokumentit të Njësisë Kundër Terrorizmit, roli i Prek Kodrës në serinë e atentateve që kishin për qëllim destabilizimin politik të Kosovës, ishte ai i atentatorit/vrasësit. Ai përshkruhej si person që dinte se si të përdorte edhe armën e zjarrit snajper dhe dyshohej se ishte përfshirë në disa vrasje në Kosovë dhe Mal të Zi.

Sipas planit, fillimisht do të vritej një komandant i UÇK-së Ismet Haxha dhe më pas deputeti Xhavit Haliti. Një muaj pas vrasjes së deputetit të PDK-së, do të vritej edhe Albin Kurti për t’u dukur si akt hakmarrjeje.

Gjithsesi, përmes një deklarate për mediat kosovare në atë kohë, Prek Kodra i mohoi të gjitha akuzat për atentate ndaj politikanëve në Kosovë.

‘Ça të shpjegoj, vetëm po shpika diçka sikur kanë shpikur persona të paidentifikuar për mua. Albin Kurtin e njoh vetëm prej televizionit. Më keni akuzuar dhe po më merrni më qafë mua dhe familjen time. Për herë të parë, paradite rreth orës 11 kam qenë në Shkodër në kafe dhe dikush më ka telefonuar nga Gjermania dhe më thotë a je duke i parë lajmet dhe më ka nisur linkun. E kam parë linkun dhe pashë një gjë që se kisha imagjinuar kurrë në jetën time.’ – tha Prek Kodra.

Ai ka treguar gjithashtu se e kanë ndaluar në Kosovë kur ka shkuar për të blerë një makinë dhe nuk i kanë treguar arsyet pse po e mbanin prej orësh.

‘Më kanë ndaluar në Kosovë para një viti në doganë, më 24 nëntor nëse nuk gaboj. Isha duke shkuar në Kosovë për të blerë një kamionçinë. Kur më kanë ndaluar kam qenë me makinën e vajzës time për të blerë një kamionçinë për firmën time. Kur kam shkuar në doganë më kanë ndaluar dhe më kanë mbajtur nga ora 2 e pasdites deri në orën 11 në darkë pa më thënë pse më kanë ndaluar. Në doganë më kanë arrestuar. Kisha 15 mijë euro me vete. Më kanë çuar në Prishtinë dhe më kanë marrë në pyetje nga Departamenti i Krimeve të rënda. Nuk e dija pse po më ndodhte ajo gjë. Kur më thanë që dyshohesh për falsifikim parash por unë isha i sigurt sepse i kisha marrë te firma ime.’ – deklaroi Prek Kodra.

Mediat kanë raportuar dhe se Prekë Kodra është arrestuar dhe në verën e vitit 2011 pasi kishte penguar mbajtjen e zgjedhjeve lokale në Shalë të Shkodrës dhe se ishte simpatizant i njërës prej dy partive të mëdha në Shqipëri. Po ashtu, dyshohej edhe për lidhje të forta me mafien e Malit të Zi, me nipin e tij që pretendohet të jetë kapur me substanca narkotike dhe të ketë pasur probleme ligjore me këtë vend.

Gjithashtu, ai është shpallur në kërkim edhe në vitin 2016, ndërsa pas kontrolleve në banesë iu gjetën dy armë gjahu dhe 90 fishekë. sn

Gjykata e Strasburgut ka pranuar padinë e kryetarit të PD-së, Sali Berisha kundër vendimit të SPAK për masën e sigurisë, ‘arrest shtëpie’.

Pas pranimit të padisë, Gjykata e Strasburgut ka vendosur ta kalojë çështjen me përparësi, për vetë rëndësinë që paraqet kjo çështje për demokracinë dhe Shqipërinë.

OBJEKTI I ÇËSHTJES

Çështja ka të bëjë me kërkesën e kërkuesit për rishikim gjyqësor të arrestit të tij shtëpiak me dyshimin për kryerjen e një vepre penale dhe ndërhyrjen si pasojë në punën e një deputeti të Kuvendit.

Aplikanti është një politikan i shquar në vend, ish-president dhe kryeministër, deputet aktual i Parlamentit dhe lider i partisë kryesore opozitare.

Më 20 tetor 2023, Gjykata e Shkallës së Parë kundër Korrupsionit dhe Krimit të Organizuar (“gjykata e shkallës së parë”), pas kërkesës së Prokurorisë Speciale (“prokurori”), vendosi ndaj kërkuesit si masë sigurie kërkesën të raportonte rregullisht në polici dhe të ndalonte daljen nga vendi. Masat e sigurisë janë vendosur në lidhje me dyshimin e kryerjes së veprës penale të marrjes së ryshfetit. Më 12 dhjetor 2023, meqenëse kërkuesi nuk ishte paraqitur në polici, prokurori kërkoi autorizimin e Parlamentit për një masë sigurie më të ashpër.

Më 21 dhjetor 2023 Parlamenti dha autorizimin. Më 30 dhjetor 2023, gjykata e shkallës së parë urdhëroi kërkuesin arrest shtëpiak, me arsyetimin se kërkuesi nuk kishte respektuar masën e mëparshme të sigurisë të vendosur ndaj tij, së bashku me ekzistencën e një dyshimi të arsyeshëm, rreziqet e arratisjes dhe ngatërresës. dëshmi.

Ai vendim u la në fuqi nga Gjykata Speciale e Apelit për Korrupsion dhe Krim të Organizuar (“Gjykata e Apelit”) dhe Gjykata e Lartë. Më 9 prill 2024, Gjykata e Lartë rrëzoi ankimin e kërkuesit për çështjet ligjore. Kërkuesi u ankua më tej, dhe këto procedura janë në pritje në Gjykatën Kushtetuese.

Kërkuesi paraqiti disa kërkesa për rishikim ose revokimin e arrestit të tij shtëpiak, të cilat të gjitha u hodhën poshtë. Më 11 shtator 2024, kërkuesi u akuzua për korrupsion pasiv (marrje ryshfeti) të kryer nga një zyrtar i lartë shtetëror në bashkëpunim me të tjerët. Më 13 shtator 2024, Gjykata e Apelit rrëzoi kërkesën e fundit të kërkuesit për rishikimin e masave të sigurisë.

Që nga 30 dhjetor 2023, aplikanti ka qenë në arrest shtëpiak.

Duke u mbështetur në nenin 5 § 4 të Konventës, kërkuesi ngre çështjet e mëposhtme në lidhje me procedurën e rishikimit të arrestit të tij shtëpiak:

– Gjykatat nuk dhanë baza të mjaftueshme për të justifikuar privimin e tij të vazhdueshëm nga liria;

– Gjykata e shkallës së parë nuk ishte e paanshme sepse në vitin 1996 gjyqtari (i vetëm) i asaj gjykate ishte shkarkuar nga Këshilli i Lartë Gjyqësor, të cilin kërkuesi si President i vendit e kishte drejtuar në atë kohë;

– Nuk ka pasur asistencë juridike efektive, pasi avokatëve nuk u është lënë kohë dhe lehtësira të mjaftueshme dhe kërkuesi nuk ka mundur të takohet me ta;

– Vendimet nuk janë marrë brenda një afati të arsyeshëm.

Sipas nenit 3 të Protokollit nr. 1 të Konventës, ai ankohet gjithashtu se arresti i tij shtëpiak ka qenë arbitrar dhe i miratuar me qëllim që ta pengojë të ushtrojë detyrat e tij si deputet i zgjedhur ligjërisht.

PYETJE PËR PALËT

1. A i shteroi ankuesi mjetet juridike të disponueshme në legjislacionin e brendshëm në lidhje me ankesat e tij sipas nenit 5 § 4 të Konventës (shih G.B. dhe të tjerët kundër Turqisë, nr. 4633/15, §§ 163-69, 17 tetor 2019) ? Në veçanti, a është një ankesë individuale në Gjykatën Kushtetuese një mjet juridik efektiv për t’u shteruar në këtë aspekt (shih Žúbor kundër Sllovakisë, nr. 7711/06, §§ 71-86, 6 dhjetor 2011, dhe, mutatis mutandis, Hysa v. Shqipëri, nr. 52048/16, § 54, 21 shkurt 2023)? A trajtohen ankesa të tilla me shpejtësinë e kërkuar si çështje ligjore dhe/ose praktike? Palëve u kërkohet të paraqesin kopje të vendimeve përkatëse të brendshme të nxjerra nga Gjykata Kushtetuese, nëse ka, duke treguar kohëzgjatjen e këtyre procedurave.

2. Pa paragjykuar pyetjen 1, a ishte procedura me të cilën është shqyrtuar ligjshmëria e arrestit shtëpiak të kërkuesit në përputhje me nenin 5 § 4 të Konventës (shih Idalov kundër Rusisë [GC], nr. 5826/03, § 161, 22 maj 2012, Cernák kundër Sllovakisë, nr. 78, 17 dhjetor 2013, G.B dhe të tjerët kundër Turqisë, §§ 174, 17 tetor 2019; )? Në veçanti:

(a) A ishte gjykata e shkallës së parë që trajtoi çështjen e aplikantit një gjykatë e paanshme?

(b) A dhanë gjykatat vendase arsye adekuate për të justifikuar arrestin e tij fillestar dhe atë të vazhdueshëm në shtëpi?

(c) A gëzonte kërkuesi ndihmë juridike efektive?

(d) A ishte kohëzgjatja e procedurave me të cilat kërkuesi kërkoi të kundërshtonte ligjshmërinë e arrestit të tij shtëpiak me kërkesën e “shpejtësisë” të nenit 5 § 4 të Konventës (shih Mooren kundër Gjermanisë [GC], nr. 11364 /03, §§ 106-07, 9 korrik 2009)?

3. a ka pasur shkelje të të drejtave të kërkuesit sipas nenit 3 të Protokollit nr. 1 të Konventës për shkak të kufizimeve në aktivitetet e tij parlamentare që rezultojnë nga arresti shtëpiak (shih Selahattin Demirtaş kundër Turqisë (nr. 2) [GC ], nr. 14305/17, §§ 388-89, 22 dhjetor 2020)?

sn