Shtetet e Bashkuara miratuan tarifa të reja mbi lavatriçet e importuara dhe tablotë diellore.

Ky veprim është në përputhje me politikën tregtare “Amerika e para” të presidentit Donald Trump, e cila synon të mbrojë prodhuesit vendas nga konkurrenca e huaj.

Prodhuesit kinezë të tablove diellore dhe prodhuesit e lavatriçeve në Korenë e Jugut do të preken më së shumti nga tarifat e reja.

Të dyja vendet i kanë kritikuar ato.

Tarifat, sidomos për lavatriçet dhe pjesët e tyre, në disa raste do të jenë më të larta për 50 përqind.

Por, tarifat e reja shihen si lëvizja më e rëndësishme në tregti e presidentit Trump prejse ai ka tërhequr SHBA-në nga Marrëveshja Partneriteti Trans-Paqësor dhe prejse ka vendosur të rinegociojë Marrëveshjen për Tregti të Lirë me Amerikën e Veriut.

Tarifat e reja u miratuan nga presidenti Trump pasi Komisioni i Tregtisë Ndërkombëtare i SHBA-së konstatoi se prodhuesit vendorë po dëmtohen nga importet më të lira.

VOAL – Senati i SHBA, me një shumicë të vogël repulikane, nuk e ka miratuar ligjin e financimit, duke shkaktuar kështu “shutdown”-in, bllokimin e aktiviteteve jo të domosdoshme të administratës federale për mungesë fondesh. Votimi është përmbyllur 50-49. Për ta miratuar ligjin duheshin 60 vota. Kjo ndodh ditën kur presidenti Trump bën vitin e parë në drejtimin e Shteteve të Bashkuara.

Për miratimin e tekstit, demokratët kërkonin konfirmimin e përkujdesjes ndaj ‘dreamers’, të rinjve emigrantë që kanë ardhur në moshë të vogël me prindërit klandestinë.

Demokratët shpallen në një komunikatë të Shtëpisë së Bardhë përgjegjës të situatës bllokuese, ndërsa demokratët thonë se faji bie mbi Donald Trumpin,  i cili javën e shkuar kishte refuzuar një propozim bipartizan për të dalë nga ngërçi, pavarësisht takimeve ku dukej se po gjendej një spirale për rrugëdalje.

Për SHBA nuk janë të reja sitata të tilla. Herën e fundit shutdown ndodhi më 2013 me presidentin Barack Obama.

Sekretari amerikan i Mbrojtjes Jim Mattis thotë se Shtetet e Bashkuara po humbasin avantazhin ushtarak ndaj Kinës dhe Rusisë, duke vënë theksin tek sfidat kryesore të forcave të armatosura amerikane.

“Konkurenca e fuqive të mëdha, jo terrorizmi, është tashmë fokusi kryesor i sigurisë kombëtare të SHBA“, – tha zoti Mattis të premten, pasi prezantoi në Uashington atë pjesë të Strategjisë të Mbrojtjes Kombëtare të administratës Trump që nuk përmban informacion të klasifikuar.

Dokumenti akuzon Kinën për “ekonomi grabitqare që ka për qëllim të frikësojë fqinjët” dhe se ka ndërtuar e pajisur ushtarakisht ishuj të rremë në Detin e Kinës Jugore.

Dokumenti pohon se Rusia ka shkelur kufijtë fqinjë dhe se po kërkon të shkatërrojë NATO-n me qëllimin “për të ndryshuar në favor të saj strukturat e sigurisë dhe ato ekonomike të Evropës dhe t[ Lindjes së Mesme“.

Zoti Mattis foli gjithashtu për “regjime mashtruese” të tilla si Koreja e Veriut dhe Irani që po vazhdojnë siç tha ai “veprimet që kërcënojnë stabilitetin rajonal, madje edhe atë botëror” ndërsa “shtypin popullin e tyre”.

Terrorizmi, që konsiderohej prioritet kryesor në fushën ushtarake në dy administratat e mëparshme, është ende një shqetësim për Shtetet e Bashkuara pavarësisht nga rënia fizikisht e kalifatit të Shtetit Islamik në Irak dhe Siri.

Në Strategjinë Kombëtare të Mbrotjes udhëzohet se Shtetet e Bashkuara do të vazhdojnë të mohojnë “parajsat” terroriste anembanë globit, ndërsa modernizojnë ushtrinë në një mënyrë që është “e përshtatshme për kohën”.

Sipas dokumentit përpjekjet për modernizim do të përqëndrohen tek kapacitetet bërthamore, sistemet e mbrojtjes me raketa, hapësira, përfshirë ato virtuale.

Zoti Mattis tha gjithashtu se Departamenti i Mbrojtjes do të përqëndrohet tek puna me aleatët, të cilët “mbajnë pjesën e tyre të barabartë” të barrës për sigurinë, gjatë ndërtimit të partneriteteve të reja anembanë globit.

“Forca në rritje ekonomike e demokracive dhe partnerëve të sotëm dikton se duhet të bëjnë më shumë” tha ai.

Sekretari i Mbrojtjes Mattis tha se që proceset ushtarake amerikane duhet të jenë “miqësore ndaj aleatëve” dhe të gatshëm të ndikohen nga miqtë besnikë të Amerikës.

“Jo të gjitha idetë e mira vijnë nga vendi me më shumë aeroplanmbajtës”, tha ai.

Presidenti Donald Trump tha në një fjalim që mbajti të premten në një tubim të aktivistëve që morën pjesën në Marshimin Vjetor për Jetën, se administrata e tij “do ta mbrojë gjithmonë të drejtën e parë të Deklaratës së Pavarësisë, që është e drejta për jetën.”

Zoti Trump u foli aktivistëve përmes videos, nga Kopështi i Trëndalifilave i Shtëpisë së Bardhë, i rrethuar nga pjesëmarrës në aktivitetet kundër abortit.

Ai tha, “E ardhmja e Amerikës do të mbushet me të mira, paqe, gëzim, dinjitet dhe jetë për çdo fëmijë të zotit.”

Më parë, të premten, Presidenti Trump e shpalli 19 janarin “Dita Kombëtare e Shenjtërisë së Jetës”.

Shtëpia e Bardhë lëshoi një deklaratë, ku thuhej se Departamenti i Shëndetësisë dhe Shërbimeve Njerëzore do të propozojë kufizimin e fondeve të taksapaguesve, që ato të mos përdoren nga grupe që mbështesin politika, apo praktika diskriminuese; për të mbrojtur amerikanët që kanë besime fetare dhe morale, që lidhen me disa shërbime të kujdesit shëndetësor” dhe për të pranuar se Amerikanët nuk duhen diskriminuar për besimet e tyre fetare, apo morale kur marrin shërbime të tilla të kujdesit shëndetësor.

Në takim foli edhe nënpresidenti Mike Pence, i cili njihet prej vitesh si mbështetës i Lëvizjes për Jetën. Ai e cilësoi Donald Trumpin si “presidentin më pro-jetës në historinë amerikane.”

Aktivistët kundër abortit shpresojnë se administrata Trump do t’i mbështesë përpjekjet e tyre për ta nxjerrë abortin jashtë ligjit.

Qeveria e Shteteve të Bashkuara, mesnatën e 19 janarit (sipas kohës lokale), përballet me mbyllje, nëse demokratët dhe republikanët nuk arrijnë marrëveshje për ligjin e financimit.
Dhoma e Përfaqësuesve, një ditë më herët, e ka miratuar një ligj për të zgjatur fondet deri më 16 shkurt.
Në Senat, megjithatë, demokratët kanë thënë se do ta pengojnë legjislacionin, nëse nuk negociohet marrëveshja për mbrojtjen nga dëbimi të rreth 700,000 emigrantëve që kanë arritur në SHBA si fëmijë dhe kanë qëndruar atje ilegalisht.
Shtëpia e Bardhë njoftoi se presidenti Donald Trump nuk do të shkojë në Floridë për fundjavë, siç ka qenë e planifikuar, nëse nuk miratohet ligji i financimit.
Nëse mbyllet qeveria, shërbimet jetësore, si inspektimi i ushqimeve, kontrollimi i sigurisë në aeroporte dhe zbatimi i ligjit federal do të vazhdojnë.
Punonjësit federalë, megjithatë, nuk do të paguhen.

Presidenti Donald Trump kritikoi Kongresin për mënyrën lidhur me buxhetin dhe paralajmëroi se një mbyllje e mundshme e qeverisë do të kishte pasoja “shumë negative” për ushtrinë.

Një masë për financimin e përkohshëm të qeverisë, skadon të premten në darkë, duke sjellë mbylljen e qeverisë të shtunën nëse republikanët dhe demokratët në kongres nuk bien dakord.

“Negociatat për buxhetin duhet të menaxhohen ndryshe. Nëse për çfarëdolloj arsyeje, qeveria mbyllet, do të ishte gjëja më e keqe që do t’i ndodhte ushtrisë sonë”, tha ai gjatë një vizite në Pentagon.

Zëdhënësja e Pentagonit, Dana White i tha Zërit të Amerikës se “fokusi kryesor i vizitës së Presidentit ishte diskutimi i pasojave të mbylljes së mundshme të qeverisë dhe masave për financimin e përkohshëm, tek Departamenti i Mbrojtjes”.

Ajo tha gjithashtu se presidenti dhe nënpresidenti do të flisnin me Sekretarin e Mbrojtjes, Jim Mattis për Strategjinë Kombëtare të Mbrojtjes që ky i fundit do t’ia paraqesë publikut të premten.

Presidenti Trump tha të enjten se ai kishte shkuar në Pentagon për të shprehur mbështetjen për ushtrinë, që siç tha ai do të kishte pasoja të konsiderueshme pa fondet e nevojshme.

Ai shtoi se vendi kishte nevojë për një ushtri të fortë “ndoshta më shumë se asnjëherë tjetër në të kaluarën”.

Presidenti amerikan Donald Trump behet serish lajm ne media me sjelljen e tij. Kete radhe ka nxjerre jashte nga Zyra Ovale e Shtëpisë së Bardhë reporterin e CNN, Jim Acosta. Mediat e huaja qe transmetojne lajmin bejne me dije se gjithcka ndodhi gjatë një konference për media, ku Trump u përplas me gazetarin.

Ai këmbëngulte në pyetjet që kishin të bënin me deklaratat raciste të Trump ndaj shteteve të varfra.

“A keni thënë që doni që në Amerikë të vijnë njerëz nga Norvegjia? A është kjo e vërtetë?”, pyeste Acosta me këmbëngulje.

Trump reagoi me pergjigje te prere: ‘dua që njerëzit të vijnë në Amerikë nga çdo shtet’.

Megjithatë, gazetari i CNN nuk u ndal dhe e pyeti sërish nëse ai ka dëshirë që në Amerikë të vijnë njerëz me ngjyrë nga vende të ndryshme.

Këtu Trump shpërtheu dhe e urdhëroi gazetarin të dilte jashtë. I drejtoi gishtin dhe i tha: Jashte…

Por nderhyri stafi i tij. Gazetari nuk e ka lene me kaq, por ka komentuar ne Twitter gjithe sa ndodhi.

Presidenti amerikan, Donald Trump, ka përfunduar “jashtëzakonisht mirë”, testimin për harresën, i cili ishte kryer javën e kaluar, pas kërkesës së Shtëpisë së Bardhë, për të vërtetuar shëndetin e tij mendor, kanë thënë doktorët e Trumpit.
Doktori Ronny Jackson, i cili ka përcjellur kontrollimin e tij fizik gjatë javës së kaluar, ka thënë se Trump ka fituar shumë pikë, në një testim të dizajnuar për të kuptuar shenjat e para të humbjes së kujtesës.
Ndonëse 71 vjeçari Trump është me mbipeshë, duhet të ketë një regjim në ushqim dhe të ushtrojë më shumë “në përgjithësi shëndeti i presidentit është në gjendje shumë të mirë”, ka thënë Jackon, i cili ka parashikuar se Trump do të vazhdojë të jetë i shëndetshëm gjatë periudhës sa do të jetë në presidencë.
“Është gjenetike”, ka thënë Jackon.
“Ai ka gjene jashtëzakonisht të mira dhe kjo është mënyra si Zoti e ka krijuar atë”, ka shtuar ai.
Presidentët amerikanë nuk kanë kryer zakonisht teste të tilla, gjatë kontrolleve mjekësore. Mirëpo Jackson ka thënë se një gjë e tillë është kërkuar nga presidenti Trump, pasi vazhdimisht po përballet me pyetje për gjendjen e tij mendore.

Siç njofton gazeta New York Times, prokurori i posaçëm Robert Mueller ka nxjerrë një urdhër që detyron ish-strategun e Shtëpisë së Bardhë Steve Bannon të dëshmojë para një jurie të madhe që po heton rreth kontakteve të fushatës së zotit Trump me Rusinë. Sipas gazetës, urdhri është nxjerrë javën e kaluar.

Ndërkohë, zoti Bannon po merret në pyetje nga ligjvënësit lidhur me një tjetër hetim që po bën Kongresi për këtë çështje.

Zoti Bannon, i cili ishte një nga ndihmësit kryesorë të fushatës zgjedhore të zotit Trump dhe për shtatë muaj këshilltar i lartë i administratës së tij, ka dalë përpara Komisionit të Zbulimit të Dhomës së Përfaqësuesve në një seancë me dyer të mbyllura.

Hetimet që po kryen Dhoma e Përfaqësuesve janë një prej disa hetimeve në Uashington rreth lidhjeve të njerëzve të fushatës së zotit Trump me Rusinë.

Steve Bannon vazhdon ta ofrojë hapur mbështetjen e tij për Presidentin Trump. Por marrëdhëniet e tij me Presidentin u dëmtuan shumë kur zoti Bannon u citua gjerësisht për kritika rreth fuksionimit të Shtëpisë së Bardhë muajt e saj të parë. Citimet bëhen në librin e ri të autorit Michael Wolff, Zjarr dhe Furi: Brenda Shtëpisë së Bardhë të zotit Trump.

Ish-këshilltari i zotit Trump citohej ta kishte cilësuar “tradhti” dhe “jopatriotik” takimin gjatë fushatës që djali i madh i Presidentit, Donald Trump Jr, dhëndri i tij Jared Kushner tashmë këshilltar në Shtëpinë e Bardhë dhe dikur menaxheri i fushatës Paul Manafort patën zhvilluar me një avokate ruse, në përpjekje për të marrë prova “inkriminuese” kundër kandidates presidenciale të Partisë Demokratike, Hillary Clinton.

Pas botimit të librit, zoti Trump tha se: “Bannon nuk kishte të bënte fare me të apo me presidencën e tij”. “Pas pushimit nga puna ai jo vetëm humbi punën por dhe mendjen“, tha zoti Trump.

Javën e kaluar zoti Bannon u shkarkua gjithashtu nga detyra e drejtuesit ekzekutiv më lartë të Breitbart News, një agjenci lajmesh e së djathtës ekstreme që ka mbrojtur qasjen populiste të zotit Trump.

Komisioni i Zbulimit i Dhomës së Përfaqësuesve ka të ngjarë ta pyesë zotin Bannon rreth takimit të qershorit 2016 të organizuar nga Trump Jr., i cili u ka thënë hetuesve se avokatja ruse nuk ofroi informacione të dëmshme për zonjën Clinton. Hetuesit gjithashtu po shqyrtojnë rolin e zotit Trump kur ishte kandidat për President, në hartimin e një deklarate dizinformuese në lidhje me qëllimin e takimit, një shpjegim që ra poshtë shumë shpejt.

Me gjasa zoti Bannon do të pyetet rreth pohimeve të tij për librin e zotit Wolff se Prokurori i Posaçëm Robert Mueller, kreu i hetimit penal për lidhjet e dyshuara të njerëzve të fushatës së zotit Trump me Rusinë, është duke u përqendruar në dyshimet për pastrimin e parave nga zyrtarët e fushatës. Ai mund të pyetet gjithashtu për ato çka di lidhur me bisedat e ish-këshilltarit për Sigurinë Kombëtare Michael Flynn me ambasadorin e atëhershëm rus Sergej Kislyak, disa javë përpara se zoti Trump të merrte detyrën. Po kështu ai mund të pyetet edhe nëse Presidenti Trump ka ndonjë synim të shkarkojë Prokurorin e Posaçëm Mueller, pavarësisht se ai e ka mohuar.

Presidenti Trump ka thënë në mënyrë të përsëritur se nuk ka patur “bashkëpunim të fshehtë” mes njerëzve të fushatës së tij dhe Rusisë, edhe pse hetimet prej disa muajsh të Kongresit apo të zotit Mueller nuk ka dalë ende në ndonjë përfundim.

Presidenti amerikan, Donald Trump, ka deklaruar se “nuk është racist”, pasi ai ishte kritikuar se ka bërë komente vulgare për Haitin, El Salvadorin dhe disa shtete në Afrikë.

I pyetur për akuzat nga disa kritikë se ai është rascit, mbrëmë presidenti Trump u tha gazetarëve se “jo, jo, unë nuk jam racist”.

“Unë jam personi më së paku racist që ju ndonjëherë e keni intervistuar”, tha Trump në klubin e tij privat të golfit në Floridë.

Mediat e Shteteve të Bashkuara kanë raportuar se presidenti Trump i kishte përshkruar emigrantët nga Afrika dhe Haiti, se vijnë nga vendet “e pista” (“shithole”), gjatë një takimi me gjashtë senatorë në Shtëpinë e Bardhë më 10 janar.

Në këtë takim, senatorët e kishin shtruar çështjen e mbrojtjes për emigrantët nga Hait, El Salvadori dhe Afrika.

Trump i ka hedhur poshtë pohimet se ka bërë deklaratë të tillë, por nuk e ka elaboruar se çka ka thënë ai gjatë takimit.

Në raportet e mediave, që i kanë cituar burimet e paemëruara të afërta me takimin në Shtëpinë e Bardhë, është thënë se komentet vulgare të zotit Trump kanë hasur në kritika të ashpra në Shtetet e Bashkuara dhe në botë.

Studiuesi Viron Prodani, në vijim të librave të tij për emigracionin shqiptar në Shtetet e Bashkuara të Amerikës, ka sjellë një tjetër libër të rrallë.

Këtë herë për emigrantët shqiptarë në SHBA që luftuan në ushtrinë amerikane gjatë Luftës së Parë dhe të Dytë Botërore.

Libri i ri i Prodanit titullohet “KONTRIBUTI I EMIGRANTEVE SHQIPTARE NE SHBA. NE LUFTEN E PARE DHE TE DYTE BOTERORE”.

Prodani i ka zbuluar emrat pas një pune voluminoze në arkivat amerikane.

Gazeta Dita do të botojë në mënyrë ekskluzive të gjithë emrat 4973 shqiptarëve që luftuan në ushtrinë amerikane gjatë Luftës së Parë Botërorë, por edhe emrat e 3441 shqiptarëve që luftuan në ushtrinë amerikane gjatë Luftës së Dytë Botërorë.

LISTA  EMERORE  E  USHTAREVE  SHQIPTARE  NE LUFTEN E PARE BOTERORE

Vijon nga numri i kaluar

Ivanka Trump, vajza dhe këshilltarja e presidentit të Shteteve të Bashkuara, Donald Trump, e vlerësoi lart fjalimin e yllit televiziv, Oprah Winfrey, i cili ka shkaktuar thashetheme për kandidimin e saj të mundshëm për presidente të SHBA-së.

Trump tha se fjalimi në ceremoninë e ndarjes së Çmimeve Golden Globes, këtë javë, ka qenë “i fuqishëm dhe frymëzues”.

Winfrey ka folur me pasion për racën dhe seksizmin, si dhe për rëndësinë e trajtimit të pabarazisë.

Fjalimi ka çuar në thirrjet për kandidimin e saj në zgjedhjet presidenciale në SHBA në vitin 2020.

Në këtë garë pritet të garojë edhe presidenti aktual, Donald Trump.

“Le të bashkohemi të gjithë, burra dhe gra, dhe të themi koha është tani”, ka thënë Ivanka Trump përmes një postimi në Twitter.

“Koha është tani” është një fushatë për të ndihmuar në luftimin e ngacmimeve seksuale në industrinë e filimit dhe vende të tjera të punës.

Këshilltari special amerikan, Robert Mueller, ka informuar Shtëpinë e Bardhë, se ka mundësi të kërkojë intervistimin e presidentit amerikan, Donald Trump, në kuadër të hetimeve të tij nëse ka pasur ndonjë koordinim në mes të Rusisë dhe fushatës së Trumpit, janë duke raportuar mediat amerikane.

Duke cituar “persona që janë të familjarizuar më këtë çështje”, mediat kanë raportuar më 8 janar, se ekipi hetues i Muellerit, i ka informuar avokatët e Trumpit për diskutimet e fundit dhe se një intervistë mund të kërkohet shumë shpejt, mirëpo nuk është caktuar asnjë datë kur mund të ndodhë takimi.

Zyrtarët e Shtëpisë së Bardhë e kanë cilësuar diskutimin si shenjë të asaj se hetimet e Muellerit rreth supozimeve të ndërhyrjes ruse në zgjedhjet presidenciale të vitit 2016 në SHBA janë duke iu afruar fundit.

Gjatë një hetimi paraprak të këshilltarit special që përfshinte ish presidentin amerikan, Bill Clinton, ishte vet presidenti në mesin e personave të fundit që është përballur me marrje në pyetje. Trump dhe avokatët e tij kanë kundërshtuar vazhdimisht ndonjë bashkëpunim eventual me Rusinë dhe kanë premtuar se do të bashkëpunojnë në hetimet e Muellerit.

Trump nuk e pati larguar mundësinë e marrjes në pyetje nga Mueller kur është pyetur rreth kësaj çështje në një konferencë për media më 6 janar.

“Nuk ka pasur bashkëpunim. Nuk ka pasur ndonjë krim”, ka thënë ai.

“Mirëpo ne kemi qenë shumë të hapur”, ka shtuar Trump.

“Ne kemi mundur të veprojmë në dy mënyra. Kemi mundur të jemi shumë të mbyllur dhe kjo do të zgjaste me vite. Mirëpo e dini, është një gjë që kur nuk keni bërë asgjë keq, më mire le të jemi të hapur”, ka thënë Trump.

Në një deklaratë të Shtëpisë së Bardhë, avokati, Ty Cobb, ka thënë më 8 janar, se Shtëpia e Bardhë nuk diskuton bisedat e saj me Muellerin, mirëpo është duke vazhduar të bashkëpunojë “në gjetjen e një zgjidhje sa më shpejt që është e mundur”, sa i përket hetimeve për Rusinë.

Derisa Trump pretendon se është i pafajshëm ndaj çdo krimi, zyrtarët kanë thënë se çfarëdo interviste me Muellerin mund të përbëjë rrezik për presidentin, i cili ka pranuar të ketë përdorur me raste atë që e ka quajtur “hiperbolë të vërtetë” apo “ekzagjerim të pafajshëm”.

Mueller deri tash ka nisur akuza kundër katër bashkëpunëtorëve të Trumpit, të cilët përballen me akuzat për deklarata të rrejshme gjatë intervistave të tyre me autoritetet.

Duke treguar rreziqet e të biseduarit me hetuesit e Muellerit drejtpërdrejt, disa organizata mediale kanë raportuar se avokatët e Trumpit preferojnë që atij t’i lejohen përgjigjet e shkruara.

Ndonëse misioni fillestar i Muellerit prej kur është emëruar në detyrë gjatë muajit maj, ka qenë të vërtetojë nëse ndihmësit e Trumpit kanë bashkëpunuar me Rusinë gjatë fushatës, mediat kanë raportuar se Mueller po ashtu ka hetuar nëse Trump ka kërkuar të pengojë hetimet në mënyra të ndryshme, duke përfshirë shkarkimin e ish drejtorit të FBI-së, James Comey, i cili ishte duke udhëhequr hetimet para emërimit të Muellerit.

Pengimi i drejtësisë konsiderohet krim në Shtetet e Bashkuara.

Comey ka deklaruar se Trump ka kërkuar të ndërhyjë në hetimet e tij. Ai ka dëshmuar në vitin e kaluar disa muaj pasi është shkarkuar, se Trump i ka thënë atij se dëshiron që ai t’i përfundojë hetimet për këshilltarin e tij të parë për siguri kombëtare, Michael Flyyn.

Trump ka hedhur poshtë këto deklarata kinse ka kërkuar nga Comey të përfundojë hetimet për një nga ndihmësit e Trumpit, i cili po ashtu është akuzuar në vitin e kaluar.

Është raportuar se Flynn tani është duke bashkëpunuar në hetimet e Muellerit.

Ekipi i Muellerit së fundmi ka zhvilluar një seri intervistash me ish ndihmësit e Shtëpisë së Bardhë duke përfshirë edhe ata që janë aktualisht, në mesin e tyre ish shefin e stafit, Reince Priebus, si dhe dhëndrrin e presidentit Trump, Jared Kushner.

Administrata e presidentit të Shteteve të Bashkuara, Donald Trump, ka vendosur të anulojë lejet që u mundësojnë gati 200,000 shtetasve të El Salvadorit të jetojnë dhe punojnë në SHBA.
Atyre u është dhënë Statusi i Përkohshëm i Mbrojtjes pas tërmetit vdekjeprurës që ka goditur El Salvadorin – shtet në Amerikën Qendrore – në vitin 2001.
Shtetasit e El Salvadorit duhet të largohen deri në vitin 2019 ose do të përballen me dëbim nëse nuk gjejnë mënyra të tjera ligjore për të qëndruar.
Administrata Trump tashmë u ka hequr Statusin e Përkohshëm të Mbrojtjes dhjetëra-mijëra njerëzve nga Haiti dhe Nikaragua.
Njoftimi i fundit vjen katër muaj pasi qeveria ka thënë se planifikon të shfuqizojë të ashtuquajturën skemë Daca, e cila daton nga koha e ish-presidentit Barack Obama dhe mbron nga dëbimi imigrantët e rinj pa dokumente, shumica e tyre nga Amerika Latine.
Ligjvënësve në Kongres u është dhënë kohë deri në mars të vendosin për fatin e rreth 800,000 njerëzve që preken nga programi Daca.

VOAL – Oprah Winfrey po mendon seriozisht që të kandidojë për në Shtëpinë e Bardhë dhe të garojë në zgjedhjet amerikane të vitit 2020. Lajmin e pohojnë të paktën dy njerëz të afërt të yllit televiziv amerkan, siç bën të ditur CNN.

Ndërkohë hashtagu “Oprah for President” po dalldis internetin. Që para fjalimit të bujshëm të mbretëreshës së talk show në Golden Globes, cilësori “presidential” ishte shfaqur në Twitter, me hashtag #Oprah2020 që ka bërë jehonë menjëherë pas dorëzimit të çmimit të parë Cecile B. De Mille Award, i barabartë me çmimin Oskar të karrierës, dheënë një gruaje amerikane.

“Është në garë”, kanë komentuar shumë përdorues të Twitteri ndërkohë që Oprah ishte ende në skenë. Mes fansave të #OprahforPresident aktorja komike Sarah Silverman e cila ka ëndërruar në Twitter një biletë Oprah/Michelle.

Një zjarr i vogël ka shpërthyer në çatinë e gratacelës së Trump Tower, ku presidenti amerikan ka një rezidencë, në New York.

Tymi ishte i dukshëm edhe disa blloqe larg në Mahhatan. Pas ndërhyrjes së forcave zjarrfikëse, situata është kthyer në normalitet.

Zjarri duket se është shkaktuar nga sistemi i kondicionimin në ndërtesë.

Rezidenca e familjes Trump është në katet e fundit të gratacelës. Në momentin që ka rënë zjarri presidenti nuk ishte prezent në godinë.

Ashtu siç kanë shpjeguar burime nga forcat zjarrfikëse, nuk ka qenë i nevojshëm evakuimi dhe nuk ka pasur të plagosur.

Dy blerës të biletave të lotarisë në Shtetet e Bashkuara kanë fituar më shumë se 1 miliard dollarë gjatë uikendit, kanë thënë zyrtarët.

Një person apo grup në Nju Hempshir ka fituar 560 milionë dollarë në lotarinë Powerball, vetëm një ditë, pasi blerësi i biletës në Florida ka fituar 450 milionë dollarë në lotarinë Mega Millions.

Identitetet e fituesve nuk janë bërë të ditura.

Vlera prej 560 milionë dollarëve është shifra e gjashtë më e lartë në Powerball e fituar ndonjëherë.

“Jam shumë i gëzuar”, ka thënë pronari i marketit ku është blerë bileta, Sam Safa.

Dyqani do të fitojë 75 mijë dollarë për shitjen e biletës.

Ndërsa bileta e Mega Millions është cilësuar si e katërta sa i përket shifrës së fituar.

Dyqani ku është blerë kjo biletë do të fitojë 100,000 euro për shitjen e saj.