Viktor dhe Amalija Knavs, prindërit e Zonjës së Parë Melania Trump bënë betimin si shtetas amerikanë. Avokati i tyre tha se çifti slloven e bëri betimin të enjten në qytetin e Nju Jorkut. Çifti Knavs e rritën Melaninë në qytetin Sevnica, kur Sllovenia ishte nën sundimin komunist.

Viktor ishte tregtar makinash, ndërsa Amalija punonte në një fabrikë tekstili. Viktor është 74 vjeç, dy vjet më i madh se Presidenti Donald Trump. Amalija është 73 vjeç. Zonja e Parë ndryshoi emrin në Melania Knauss kur filloi punën si modele. Ajo u vendos në Nju Jork më 1996 dhe u njoh me zotin Trump dy vjet më vonë.

UASHINGTON – Pasi që janë vërejtur shumë gjarpërinj në Bibliotekën Georgetown të kryeqytetit të SHBA-ve, Washington, ndërtesa është vënë nën karantinë.

Sipas lajmeve në mediat amerikane, ngjarjet filluan pasi që të shtunën e kaluar një punonjës i bibliotekës ka vërejtur një gjarpër në katin e poshtëm të ndërtesës.

Punonjësi e kapi gjarprin dhe e nxori atë në pyll, por punonjësit e tjerë treguan se kanë parë shumë gjarpërinj brenda ndërtesës.

Gjarpërinjtë zhduken misteriozisht

Gjarpërinjtë për të cilët nuk dihen se prej ku kanë ardhur kanë shkaktuar panik, ndërsa administrata arriti marrëveshje me një kompani të spërkatjes për të pastruar ndërtesën nga këto gjallesa.

Kompania i mbylli të gjitha pjesët e bibliotekës që çonin jashtë saj, ndërsa ndërtesën e mori nën karantinë dy ditore.

Punonjësit e kësaj kompanie pasi që dje kanë hapur bibliotekën treguan se vetëm një gjarpër ka ngordhur si pasojë e spërkatjes, ndërsa të tjerët në mënyrë misterioze janë zhdukur.

Zyrtarët e bibliotekës theksuan se më parë nuk kanë hasur me ndonjë gjë të ngjashme si kjo.

Ndërkohë zyrtarët lokal tregojnë se gjarpërinjtë mund të kenë hyrë brenda shtëpive dhe vendeve të punës pas shirave që zgjatën me ditë. aa

Dy zjarre në veri të Kalifornisë, të cilat kanë nisur si pasojë e motit të nxehtë, janë kthyer të hënën në zjarret më të mëdha në historinë e këtij shteti, pas një ere të nxehtë që ka shkaktuar zgjerimin e tyre, transmeton AP.

Të dyja zjarret që kanë nisur shumë afër njëra-tjetrës, dhe njihen si Kompleksi Mendocini janë duke u trajtuar si incident i vetëm.

Zyrtarët e zjarrit kanë njoftuar të hënën se dy zjarret kanë përfshirë një territor prej 1,148 kilometrash katrorë.

Këto dy zjarre kanë shkatërruar 75 shtëpi dhe kanë detyruar mijëra persona të largohen nga zonat e banimit të tyre, çka ka shtyrë presidentin amerikan, Donald Trump të deklarojë “katastrofë të madhe” në këtë shtet.

Zgjerimi i territorit të përfshirë nga zjarri tejkalon një zjarr të dhjetorit të vitit të kaluar në jug të Kalifornisë, i cili kishte djegur 1,140 kilometra katrorë.

Si pasojë e atij zjarri kishte humbur jetën një zjarrfikës dhe ishin shkatërruar më shumë se 1,000 ndërtesa derisa flakët ishte ndalur plotësisht më 12 janar.

Ekspertët për klimë dhe zjarre kanë thënë se ndryshimi i klimës është duke ndikuar në tharjen e bimëve dhe nxitjen e nisjes së zjarreve, të cilat me shpejtësi më pas po barten nga zonat rurale në pjesët urbane.

Mirëpo ata po ashtu kanë fajësuar qytete dhe qyteza që po zgjerojnë hapësirat e banimit në zonat që dikur kanë qenë të pazhvilluara.

Zëdhënësi për Mbrojtje nga Zjarri, Scott McLean, ka thënë që më shumë se 14,000 zjarrfikës janë duke u përballur me dhjetëra zjarre në gjithë Kaliforninë.

“Më kujtohet disa vjet më parë kur kemi parë 10 deri në 12,000 zjarrfikës në Kaliforni, Oregon dhe Uashingtoni, mirëpo kurrë nuk kemi parë 14,000 sikurse tani”, ka shtuar ai.

Presidenti i Shteteve të Bashkuara, Donald Trump, ka kritikuar basketbollistin e famshëm Lebron James i cili cilësohet “mbret i basketbollit”.

Trump në një postim në rrjetin social Twitter ka kritikuar personalitetin e televizionit Don Lemon duke e quajtur “njeriu më i paditur në televizion” dhe shtoi se Lemon ka bërë “Lebronin të duket i mençur, gjë që nuk është e lehtë”.

Trump përfundoi postimin me deklarimin “Unë e pëlqej Mike”, që i dedikohej legjendës së NBA, Michael Jordan, në krahasim me Lebron James.

Trump kishe kritikuar vazhdimisht NFL, për mosdënimin e lojtarëve që gjunjëzohen gjatë himnit të flamurit në formë proteste.

“Sporti nuk është dicka që na ndan, por që na bashkon”, tha James në një intervistë.

Shtetet e Bashkuara thonë se zgjidhja e mosmarrëveshjeve midis Kosovës dhe Serbisë duhet të vijë nga vetë palët dhe të jetë në duart e tyre.

Në një deklaratë për Radion Evropa e Lirë, Departamenti amerikan i Shtetit thekson se “SHBA-ja është e gatshme t’i dëgjojë dhe t’i ndihmojë palët në gjetjen e një zgjidhjeje të përbashkët”.

“Normalizimi i plotë i marrëdhënieve midis Serbisë dhe Kosovës është thelbësor për qëndrueshmërinë rajonale. Normalizimi po ashtu do t’iu hapte rrugë të qartë të dyja vendeve drejt anëtarësimit eventual në Bashkimin Evropian. Shtetet e Bashkuara mbështesin fuqishëm dialogun e lehtësuar nga BE-ja midis Beogradit dhe Prishtinës. Tani është koha që palët të jenë kreative dhe fleksibël”, thuhet në deklaratën e Departamentit amerikan të Shtetit.

Ajo vjen si përgjigje pas sugjerimeve të fundit se zgjidhja e mundshme e mosmarrëveshjeve Kosovë-Serbi mund të arrihet me shkëmbim territoresh në vija etnike.

Presidentët e të dyja vendeve, Hashim Thaçi dhe Aleksandër Vuçiq, e kanë hedhur idenë – i pari për korrigjim kufijsh, ndërsa tjetri për ndarje territoriale.

Këshilltari i posaçëm amerikan, Robert Mueller dëshiron të intervistojë Emin Agalorov, një këngëtar azerbajxhano-rus, njëherësh ish-dhëndëri i presidentit të Azerbajxhanit Ilham Aliyev, ka thënë avokati i Agalorov.

Mueller është duke hetuar pretendimet për ndërhyrjen e Rusisë në zgjedhjet presidenciale amerikane të vitit 2016 dhe nëse fushata e presidentit, Donald Trump ka bashkëpunuar me Rusinë.

NBC News ka cituar avokatin Scott Balber të ketë thënë se Mueller ka kërkuar një intervistë me Agalarov.

Balber nuk ka dhënë më shumë detaje nëse Mueller gjithashtu ishte i interesuar që të flasë me babain e këngëtarit, Aras Agalarov, një person mjaft i pasur që ka lidhje me presidentin rus, Vladimir Putin.

Agalarovët ishin partnerë të Trumpit në konkursin e Miss Universe në Moskë më 2013. Ata gjithashtu kanë luajtur rol kyç në aranzhimin e takimit në mes të djalit të Trumpit, Donald Trump Jr., dhëndrit të presidentit, Jared Kushner, shefit të fushatës Paul Manafort me avokaten ruse, Natalya Veselnitskaya.

Ky takim, i realizuar në Trump Tower në Nju Jork, ishte aranzhuar pasi një ndërmjetës rus i kishte thënë djalit të presidentit Trump se zyrtarët rusë kanë ofruar dokumente dhe informacione që mund të dëmtonin rivalen demokrate Hillary Clinton. Avokatja ruse, Veselnitskaya ka mohuar se ka vepruar në emër të Kremlinit kur është takuar me ekipin e Trumpit.

Këngëtari Agalarov ka konfirmuar se ka ndihmuar në organizimin e këtij takimi, por ai ka mohuar se në këtë takim është biseduar për informacione inkriminuese.

Senatorët republikanë dhe demokratë paraqitën një projekt-ligj të enjten për vendosjen e sanksioneve të reja ndaj Rusisë, përpjekja më e fundit e ligjvënësve për të ndëshkuar Moskës lidhur me ndërhyrjen e saj në zgjedhjet amerikane dhe aktivitetet e saj në Siri dhe Ukrainë. Projekt-ligji përfshin kufizime në transaksionet për borxhin e ri rus, projektet e energjisë dhe naftës, importet ruse të uraniumin dhe sanksione të reja ndaj figurave politike dhe oligarkëve rusë. Tregjet ruse reaguan shpejt pas publikimit të projekt-ligjit, me dobësimin e obligacioneve në rubla e dollarë.

“Regjimi aktual i sanksioneve ka dështuar të frenojë Rusinë nga ndërhyrja në zgjedhjet e ardhshme të vitit 2018“, tha senatori republikan Lindsey Graham, një nga mbështetësit kryesor të projekt-ligjit. Verën e kaluar Kongresi miratoi një ligj që parashikonte sanksione ndaj Rusisë dhe disa ligjvënës kritikuan atë që e cilësuan si hezitim të Presidentit Donald Trump për ta zbatuar atë. Zoti Trump e nënshkroi ligjin vetëm pasi Kongresi e miratoi me shumicë dërrmuese votash.

Senatori demokrat Bob Menendez tha se administrata nuk i është përmbajtur plotësisht sanksioneve të vendosura.

“Ky projekt-ligj është hapi tjetër për t’i bërë presion Kremlinit në mënyrë që Putini ta kuptojë më në fund se SHBA-ja nuk do ta tolerojë më sjelljen e tij“, tha ai.

Republikanët dhe demokratët u bashkuan muajin e kaluar duke kritikuar dështimin e zotit Trump për të dënuar publikisht Presidentit Vladimir Putin për ndërhyrjen në zgjedhjet e vitit 2016. Sidoqoftë, Kongresi dështoi të ndërmarrë ndonjë veprim lidhur me këtë gjë, përpara se të largoheshin nga Uashingtoni për pushimet e verës. E ardhmja e projekt-ligjit të fundit nuk është ende e qartë. Ai duhet të miratohet si nga Senati ashtu edhe Dhoma e Përfaqësuesve si dhe të nënshkruhet nga presidenti Trump në mënyrë që të shdërrohet në ligj.

Një mbrëmje gala në Qendrën Hapësinore Kennedy në Florida hapi këtë javë një vit festimesh e aktivitetesh në përgatitje për 50 vjetorin e zbritjes së njeriut në Hënë. Personalitete, shkencëtarë e entuziastë të udhëtimeve në hapësirë ishin mbledhur për të festuar misionet Apollo që shënuan një revolucion në eksplorimin e hapësirës, duke u kurorëzuar me misioin Apollo 11 që arriti të dërgojë njerëz në Hënë. Astronautët Walt Cunningham, Rusty Schweickart dhe Tom Stafford të cilët kanë fluturuar me misione të ndryshme Apollo, reflektojnë mbi domethënien e këtyre misioneve për njerëzimin:

Paul Manafort, ish-kryetari i fushatës së Presidentit Donald Trump, doli sot në gjyq në Aleksandria të Virxhinias, në një nga dy çështjet penale që u paraqitën kundër tij nga Prokurori i Posaçëm, Robert Mueller. Ai bëhet i pari mes ish-këshilltarëve të Presidentit Trump që del në gjyq, nën akuzat për mashtrime bankare dhe me taksat nga hetuesit federalë që po shqyrtojnë ndërhyrjen ruse në zgjedhjet presidenciale të vitit 2016.

Nga ana e jashtme, akuzat kriminale kundër zotit Manafort – mospagim taksash, mosraportim i llogarive të huaja bankare dhe marrje huash përmes mashtrimit në banka – nuk kanë lidhje me thelbin e hetimit të zotit Mueller.

Akuzat vijnë nga lobizmi dhe aktiviteti i tij si konsulent politik për ish-Presidentin e Ukrainës, Viktor Yanukovych.

Ndërsa punonin nga viti 2006 deri në vitin 2015 për zotin Yanukovych dhe forcën e tij politike pro-ruse, Partinë e Rajoneve, zoti Manafort dhe ish-partneri i tij i biznesit, Rick Gates, akuzohen se fituan dhjetra miliona dollarë, ndërkohë që ia fshehën këto të ardhura agjencisë së taksave.

“Emri i zotit Manafort përmendet në ‘listën e zezë’ të Partisë së Rajoneve. Sipas kësaj liste, 12 milionë dollarë janë shpenzuar për të mbuluar shpenzimet e lidhura me këtë person duke filluar nga nëntori 2007. Regjistrimi i fundit në librin e llogarive që lidhet me zotin Manafort, është bërë më 5 tetor 2012”, thotë Artem Sytnyk, shefi i zyrës së anti-korrupsionit në Ukrainë.

Prokurorët thonë se për të shmangur pagesën e taksave të larta, ata krijuan kompani sekrete fantazma dhe llogari në parajsa fiskale për t’i përcjellë të ardhurat nga Ukraina, duke i paraqitur si hua në llogari bankare amerikane dhe duke blerë prona miliona dollarëshe dhe mallra luksoze me to.

Pasi zoti Yanukovych u rrëzua nga pushteti në vitin 2014 dhe të ardhurat e tyre nga Ukraina ranë, Manafort dhe Gates akuzohen se sajuan një skemë tjetër për të fituar para: përdorën pronat e tyre të patundshme në Shtetet e Bashkuara si garanci për të siguruar me metoda mashtruese mbi 20 milionë hua nga bankat, duke i ekzagjeruar të ardhurat e tyre.

Prokurorët thonë se mbi 75 milionë dollarë kaluan përmes llogarive në parajsa fiskale që hapën Manafort dhe Gates.

Zoti Manafort nuk e ka pranuar fajësinë për akuzat që janë depozituar në gjykatën e Virxhinias, si edhe për një çështje tjetër në gjykatën federale në Uashington.

Ai ndodhet në burg që nga qershori, kur gjykatësi i çështjes së Uashingtonit, ja hoqi të drejtën e lirisë me kusht, pasi e akuzoi se ishte përpjekur të ndikonte tek dëshmitarë të mundshëm.

Manafort kishte qenë nën hetim federal që nga viti 2014 mbi dyshime për lobim të paligjshëm dhe mashtrime financiare. Por vitin e kaluar ai u përfshi në hetimin e Rusisë, pasi zoti Mueller filloi të analizonte lidhjet mes anëtarëve të fushatës së zotit Trump dhe Rusisë.

Prej 14 muajsh, zoti Muller ka mbledhur prova për çështjen kundër Manafortit.

I pandehuri përballet me 18 akuza. Vetëm akuzat për mashtrime bankare dhe konspiracion mund të sjellin dënime me nga 30 vjet burg secila.

Por disa ekspertë ligjorë thonë se Manafort mund t’i ketë varur shpresat tek një falje presidenciale nga zoti Trump që e ka quajtur ish-kryetarin e fushatës së tij “njeri të mirë” që po trajtohet padrejtësisht. Megjithatë zoti Trump nuk ka thënë shprehimisht se do ta bëjë këtë.

Ndërkaq, disa ekspertë ligjorë kanë thënë se edhe një falje presidenciale mund të mos e ndihojë zotin Manafort, pasi ndaj tij mund të ngrihet padi në një gjykatë shteti për shumë nga krimet për të cilat akuzohet nga prokurori i posaçëm. Faljet presidenciale mund të bëhen vetëm për krime federale.

“Ka mundësi që të mos përfitojë dot nga një falje, pasi ka gjithë këto akuza për pastrim parash kundër tij, për të cilat mund të paditet në shtetin e Nju Jorkut”, thotë Nick Akerman, ish-prokuror i çështjes Watergate.

Duke qenë se presidenti Trump e ka quajtur hetimin e prokurorit të posaçëm, Mueller “një gjueti shtrigash”, vendimi që do të merret në rastin e zotit Manafort, mund të përcaktojë besueshmërinë e hetimit.

Thellimi i përçarjeve mes Turqisë dhe Shteteve të Bashkuara po nxit spekulimet se Turqia po i jep shtysë të mëtejshme forcimit të lidhjeve me Rusinë.

Të hënën zyrtarët e lartë turq u takuan me homologët e tyre ruse dhe iranianë në vendpushimin detar rus të Soçit, si pjesë e bashkëpunimit të vazhdueshëm mes vendeve për zgjidhjen e luftës civile në Siri.

“Mund të ndjekim rrugën tonë“, shkruante shtypi turk duke iu referuar një deklarate të presidentit turk Rexhep Tajip Erdogan. “Shtetet e Bashkuara mund të humbasin një aleat besnik dhe të vlefshëm“, shtonte zoti Erdogan, si përgjigje ndaj kërcënimeve të Shteteve të Bashkuara.

Javën e kaluar, tensionet Turqi-SHBA u përshkallëzuan me shpejtësi kur Presidenti Donald Trump paralajmëroi “sanksione të ashpra” nëse Turqia nuk do të lironte nga paraburgimi pastorin amerikan Andrew Brunson. Ai ndodhet nën arrest shtëpiak i akuzuar për terrorizëm, akuza që Uashingtoni i ka hedhur poshtë si “të pabazuara”. Ankaraja thotë se çështja u takon gjykatave.

Ndërkohë, Rusia po përpiqet me sukses të tërheqë Turqinë. “Këto janë marrëdhëniet më të ngrohta që kemi pasur në historinë e republikës turke“, thotë ish-diplomati i lartë turk Aydin Selcen, i cili ka shërbyer në Uashington dhe në Lindjen e Mesme. Dy vendet i kanë thelluar shumë marrëdhëniet e bashkëpunim lidhur me luftën civile në Siri dhe tregtinë.

Vendimi i Turqisë për të blerë raketa S-400 nga Rusia po rrit shqetësimet mes aleatëve perëndimorë të Ankarasë. Uashingtoni paralajmëroi se raketat kërcënojnë të komprometojnë sistemet e mbrojtjes së NATO-s. Turqia dhe SHBA janë aleatë në NATO.

Shqetësimi i aleatëve

Analistët sugjerojnë se qasja gjithnjë e më e ashpër e Uashingtonit ndaj Ankarasë lidhur me çështjen e pastorit Brunson, mund të shpjegohet pjesërisht me shqetësimet më të gjera lidhur me besnikërinë e Turqisë ndaj aleatëve të saj perëndimorë.

Kërcënimi i zotit Trump për sanksione mund të jetë një mundësi për presidentin e Rusisë Vladimir Putin.

“Nuk e përjashtoj mundësinë që Putini po i shet Erdoganit një lloj garancie për siguri, përkundrejt zemërimit amerikan“, thotë analisti politik Atilla Yesilada i “Global Source Partners”. “Putin ka gjithçka për të cilën ka nevojë Turqia, përveç parave. Dhe Turqia ka nevojë të dëshpëruar për fonde të huaja. Por vetëm Perëndimi mund t’i japë kredi“.

Kongresi amerikan i vetëdijshëm për varësinë e fortë të ekonomisë turke ndaj huamarrjes së huaj, po kërcënon me masa për të kufizuar aftësinë e Turqisë për të marrë hua.

Ekspertët gjithashtu vënë në dyshim nëse zoti Putini ka vërtet interes të thellojë më tej marrëdhëniet me Ankaranë.

“Nuk mendoj se Moska dëshiron ta ketë Turqinë më pranë se kaq“, thotë ish-diplomati Selcen. “Për ta mjafton loja për ta mbajtur NATO-n të dobët, për ta mbajtur Turqinë me një këmbë në Perëndim dhe një në Lindje, sepse nuk është në interesin e presidentit Putin që Turqia të jetë e varur sikurse Bjellorusia. Le të kujtojmë që ekonomia ruse është më e vogël se ajo e Kalifornisë. Rusia nuk mund të mbajë barrën e Turqisë. Madje as të Sirisë“.

Turqia dhe Rusia kanë qenë historikisht rivalë rajonalë. “Turqia i ka balancuar gjithnjë marrëdhëniet e saj mes Perëndimit dhe Lindjes“, thotë profesori i marrëdhënieve ndërkombëtare Huseyin Bagci i universitetit Teknik të Lindjes së Mesme në Ankara. “Turqia i di kufizimet e bashkëpunimit me Rusinë”.

Siria si katalizator

Një këshilltar i presidentit Erdogan, që foli në kushte anonimiteti, theksoi muajin e kaluar se Ankaraja mbetet e përkushtuar ndaj aleancave të saj perëndimore dhe se marrëdhëniet me Rusinë bazohen tek domosdoshmëria e zgjidhjes së luftës civile në Siri dhe tregtia.

Bashkëpunimi i Ankarasë me Moskën lidhur me Sirinë përballet me tendosje në rritje. Zyrtarët turq akuzojnë Rusinë për mos respektimin e një marrëveshje për të krijuar zonat pa konflikt, ku një armëpushim do të mbronte rebelët sirianë. Zonat u krijuan si pjesë e atij që njihet si “Procesi i Astana-s” në kuadër të të cilit Irani, Turqia dhe Rusia bashkëpunojnë për të zgjidhur luftën siriane.

Pjesa më e madhe e zemërimit të Ankarasë, lidhet me atë që forcat e regjimit sirian të mbështetura nga forcat ajrore ruse janë duke e tejkaluar gradualisht zonat pa konflikt. Presidenti Erdogan është zotuar të mbrojë zonën e fundit kryesore në Idlib, në kufirin me Turqinë. Takimi i së hënës në Soçi i zyrtarëve turk, iranianë dhe rusë pritet të përqëndrohet në të ardhmen e enklavës së Idlib-it.

Takimi i nivelit të lartë në Helsinki mes zotit Putin dhe zotit Trump gjatë muajit korrik mund t’i tendosë edhe më tej lidhjet turko-ruse. “Në Helsinki u zhvillua një takim prej katër orësh. Kishte thelb! Ekziston tashmë baza për një marrëveshje përfundimtare politike lidhur me Sirinë“, thotë ish-diplomati turk Selçen.

“Presidenti Trump, më shumë se Presidenti Barak Obama, është i gatshëm t’ia dorëzojë Sirinë Presidentit Bashar Assad, sapo IS-isi të jetë mundur,” thotë zoti Selcen. Sipas tij kjo tregon se “Moska dhe SHBA-ja mund të bien dakord mbi Sirinë, duke lënë jashtë Turqinë “. za

Presidenti Donald Trump sot kërcënoi se do ta mbyllë qeverinë, nëse Kongresi nuk miraton financimin për ndërtimin e një muri përgjatë kufirit me Meksikën, me synimin për të penguar emigracionin e paligjshëm.

Udhëheqësi amerikan tha se “demokratët e opozitës duhet t’i japin votat e nevojshme për sigurinë në kufi, ku përfshihet Muri!” dhe për ndryshime të tjera të politikës së emigracionit.

Por ligjvënësit republikanë kanë qenë të ndarë për ndryshimin e politikave të emigracionit, duke i hedhur poshtë dy herë javët e fundit propozimet e presidentit për këtë çështje, sikurse edhe opozita e unifikuar demokrate.

Në një koment në Twitter, Trump bënte thirrje që Shtetet e Bashkuara “më në fund të kenë një sistem imigracioni mbi bazën e meritave. Duhet që në vendin tonë të hyjnë njerëz të mirë”, shkruante në twittin e tij të së dielës Presidenti.

https://twitter.com/realDonaldTrump/status/1023557246628900864

Ndërtimi i Murit ndarës me Meksikën ka qenë një premtim i fushatës së zgjedhjeve presidenciale të zotit Trump. Muri kushton 20 miliardë dollarë, por Kongresi deri tani ka miratuar vetëm 1,5 miliardë dollarë për sigurinë në kufi.

Ndërsa vazhdojnë shqetësimet lidhur me mosmarrëveshjet ekonomike me partnerët e kryesorë tregtarë të Shteteve të Bashkuara, Presidenti Donald Trump foli për strategjinë e tij të tregjeve të lira, në takimet që pati këtë javë në shtetet amerikane Ajova dhe Illinoi.

Presidenti Trump u përpoq t’i bindëte pjesëmarrësit në takimin e Ajovës, ku fermerët, shumë prej të cilëve e mbështesin atë, janë prekur nga tarifat e reja ndaj sojës dhe produkteve të tjera. Tarifat u vendosën nga Kina, si përgjigje ndaj tarifave të reja të vendosura ndaj mallrave kineze nga presidenti amerikan.

“Ne e hapëm tregun europian dhe kjo ka për të qenë diçka shumë e mirë për ta e për të gjithë ne, për fermerët tanë, sepse ka vetëm një treg të madh për të gjithë,” – tha Presidenti.

Zoti Trump tha se Europa “ka rënë dakord, thuajse menjëherë, të blejë sasi të mëdha të sojës, ngaqë Kina u përpoq ta dëmtonte fermerin amerikan.

Presidenti nuk dha hollësi për atë që ai tha se ishte një letër me një objektiv të caktuar e Presidentit të Komisionit Europian Jean-Claude Juncker, ndërkohë që Sekretari amerikan i Thesarit Steven Mnuchin e cilësoi paktin “marrëveshje në parim”.

Një ditë para takimit në Zyrën Ovale mes Presidentit Trump dhe zotit Juncker, Departamenti amerikan i Bujqësisë njoftoi se ka caktuar një fond prej 12 miliardë dollarësh për t’u ardhur në ndihmë fermerëve amerikanë të prekur nga tarifat.

“Është pikëpamja e administratës, që bujqësia ka qenë objekt hakmarrjeje, si rezultat i veprimeve tona me synimin për të zbutur pabarazitë në tregti. Kjo është arsyeja që Presidenti dhe Sekretari i Bujqësisë e krijuan këtë program.”– tha një zyrtar i tregtisë.

Megjithatë, disa fermerë thonë se ndihmat financiare nuk do të mund të lehtësojnë ndikimin afatgjatë që do të kenë tarifat e reja ndaj të ardhurave të tyre.

“Për mua, kjo është një humbje e madhe, jo vetëm se ka rënë çmimi i produkteve tona, por ngaqë do të humbin tregjet”,- tha një fermer.

Presidenti Trump u takua edhe me punëtorët e uzinës së çelikut në Granite City, të Illinoit, të cilëve u tha se administrata e tij kishte marrë “masat më të ashpëra në vite, si përgjigje ndaj praktikave tregtare abuzive të Kinës.”

NEW YORK – Në New York u organizua protestë me valixhe në mbështetje të emigrantëve të deportuar.

Protesta u organizua nga një grup aktivistësh të cilët kritikuan procesin e deportimit të emigrantëve dhe politikat e zbatuara, duke u shfaqur me valixhe në shenjë proteste ndaj praktikës që u lejon emigrantëve të marrin me vete vetëm nga një valixhe.

“Nëse të dashurit ose të afërmit tuaj do të ngelnin të detyruar të ndaheshin prej jush, çfarë do të vendosnit në një valixhe të vetme të cilën do ta merrnin?”, ishte shprehja me të cilën reaguan protestuesit. aa

LOS ANGELES – Zjarri në pyjet në rajonin San Bernardino të Kalifornisë në SHBA akoma nuk është vënë në kontroll.

Departamenti Zjarrfikës Riverside County bëri të ditur se është arrestuar një person për të cilin dyshohet se ka shkaktuar zjarrin në të cilin u dogjën 5 shtëpi dhe u evakuua e tërë lagjja.

Zyrtarët thonë se 32-vjeçari Brandon N. McGlover ka shkaktuar më shumë se një zjarr në rajonin e Revrside.

Prandaj, është dhënë urdhri për evakuimin e rreth 12 mijë personave. Mediat lokale thonë se për shuarjen e zjarrit, i cili ka përfshirë rreth 19 kilometra katrorë, janë angazhuar rreth 500 zjarrfikës. Po ashtu njoftojnë se stuhia e zjarrit akoma nuk është vënë nën kontroll.

Gjithashtu si pasojë e zjarreve është mbyllur dhe Parku Kombëtar Yosemite.

Zjarret që kishin kapluar Lake County në vitin 2015 morën katër jetë njerëzish dhe dëmtuan rreth 2.000 objekte banimi. aa

Sekretari i Shtetit Mike Pompeo tha se personalisht u ka deklaruar zyrtarëve më të lartë rusë se çdo ndërhyrje në zgjedhjet e SHBA apo në procesin demokratik amerikan do të shoqërohet me “pasoja të rënda”, ndërkohë që Shtëpia e Bardhë njoftoi se takimi i dytë Trump Putin është shtyrë për në vitin 2019.

Zoti Pompeo u tha të mërkurën anëtarëve skeptikë të Komisionit të Senatit për Marrëdhëniet me Jashtë se ai e kishte bërë paralajmërimin të qartë ndaj Rusisë në takime dhe biseda të shumta.

Ai e bëri komentin në përgjigje të pyetjeve konkrete në lidhje me hollësitë e takimit kokë më kokë të Presidentit Donald Trump me udhëheqësin rus Vladimir Putin javën e kaluar në Finlandë.

Si anëtarët republikanë edhe ata demokratë të komisionit kërkuan nga zoti Pompeo hollësi rreth takimit të nivelit të lartë, për të cilin Shtëpia e Bardhë ka ofruar vetëm deklarata të paqarta.

Kryetari republikan i komisionit, Bob Corker e hapi seancën duke thënë se Pompeo do të fliste përpara senatorëve që kanë “dyshime serioze” ndaj Presidentit Trump dhe politikës së tij të jashtme.

Sekretari Pompeo tha po të mërkurën se SHBA nuk ka ndërmend të njohë aneksimin e gadishullit ukrainas të Krimesë nga Rusia në vitin 2014 dhe nuk do të heqë sanksionet ekonomike kundër Moskës derisa Krimeja të jetë kthyer nën kontrollin e Ukrainës.

Ai tha se me pushtimin e Krimesë rusishtfolëse, Moska “u përpoq të minojë një parim ndërkombëtar bazë të mbështetur nga shtetet demokratike, sipas të cilit asnjë vend nuk mund të ndryshojë kufijtë e një tjetri me forcë”.

Diplomati më i lartë i Shteteve të Bashkuara shtoi: “Ndërsa shtetet demokratike përpiqen të ndërtojnë një botë të lirë, të drejtë dhe të begatë, ne duhet ta mbështesim angazhimin tonë ndaj parimit ndërkombëtar të barazisë sovrane dhe të respektojmë integritetin territorial të shteteve të tjera. Rusia, me veprimet e saj, veproi në një mënyrë të padenjë për një vend të madh dhe zgjodhi të izolojë veten nga bashkësia ndërkombëtare”.

Ndërkohë Shtëpia e Bardhë njoftoi se takimi i dytë Trump Putin është shtyrë dhe nuk do të mbahet përpara vitit 2019.

Këshilltari i Sigurisë Kombëtare John Bolton njoftoi se Presidenti Trump dëshiron të presë derisa të përfundojë hetimi i prokurorit të posaçëm Robert Mueller për ndërhyrjen e Rusisë në zgjedhjet presidenciale të vitit 2016 në Shtetet e Bashkuara.

CHICAGO – Qytetin amerikan Chicago vitin e kaluar e kanë vizituar 55.2 milionë turistë, të cilët interesim të madh kanë treguar për “Portën e Qiellit”.

Kjo skulpturë e bërë nga çeliku i pandryshkshëm në vitin 2006, peshon rreth 110 ton. Faqja e internetit për turizëm “TripAdvisor” e radhiti atë midis dhjetë simboleve turistike më të rëndësishme të Shteteve të Bashkuara të Amerikës për vitin 2014.

Skulptura e projektuar nga skulptori indiano-britanik, Anish Kapoor njihet gjithashtu edhe si “The Bean” për shkak të dukjes së saj. aa

Presidenti Donald Trump reagoi pasi rrjetet televizive amerikane transmetuan një inçizim të martën, ku ai dhe ish-avokati i tij, Michael Cohen diskutojnë një pagesë të mundshme për të drejtat e historisë së një modeleje për një marrëdhënie që thuhet se ajo ka pasur me zotit Trump.

Zoti Cohen e kishte regjistruar fshehtas bisedën në shtator 2016, kur zoti Trump po kandidonte për postin e presidentit. Avokati i zotit Cohen, Lanny Davis, ia vuri në dispozicion inçizimin CNN-it për transmetim.

Presidenti Trump komentoi në Twitter, duke thënë “Çfarë lloj avokati do të inçizonte një klient?” dhe duke sugjeruar se inçizimi ishte ndërprerë, aty ku ai mund të ishte duke thënë gjëra pozitive.

“Kam dëgjuar se klientë të tjerë dhe shumë gazetarë janë inçizuar. A mund të jetë e vërtetë? Sa keq”, shkruante ai.

Zoti Trump ka mohuar vazhdimisht se ka pasur një marrëdhënie jashtëmartesore me modelen Karen McDougal, që ia shiti historinë e saj, kompanisë botuese të tabloideve, American Media për 150 mijë dollarë. Asnjë artikull për marrëdhënien e mundshme nuk u pagua.

Në inçizimin e shkurtër, zoti Cohen flet për nevojën e “hapjes së një kompanie për transferimin e gjithë informacionit për mikun tonë, David”, thotë ai dhe ka gjasa që të jetë duke iu referuar mikut të zotit Trump dhe Presidentit të kompanisë “American Media”, David Pecker.

Në një moment zoti Trump pyet se sa duhet paguar: “150 (mijë)”?

Ai përmend gjithashtu një pagesë me para në dorë, por nuk dëgjohet qartë nëse po sugjeron që të paguhet me para në dorë apo jo.

Në prill, FBI-ja bastisi zyrën dhe shtëpinë e zotit Cohen dhe konfiskoi disa inçizime që iu dërguar prokurorëve federalë javën e kaluar.

Presidenti Trump ka shprehur pakënaqësinë e tij me hetimin e zotit Cohen.

Ai shkruante në Twitter javën e kaluar: “E paimagjinueshme që qeveria të hyjë me force në zyrën e një avokati (herët në mëngjes) – pothuajse e padëgjuar. Edhe më e paimagjinueshme se si një avokat inçizon një klient, e padëgjuar dhe ndoshta e paligjshme. Lajmi i mirë është se presidenti juaj i preferuar nuk ka bërë asnjë gabim”.

Shtete të ndryshme kanë rregulla të ndryshme se kur është e ligjshme të inçizosh një bisedë që në thelb kërkojnë ose njërin ose të dy bashkëbiseduesit, që të japin miratimin e tyre. Në shtetin e Nju Jorkut, ku u bë biseda vetëm njëra palë duhet të japë miratimin, kështuqë Cohen ishte i lejuar ligjërisht që të inçizonte bisedën.

Zoti Cohen i pagoi 130 mijë dollarë për të mos folur aktores së filmave pornografikë Stormy Daniels, më pak se dy javë para zgjedhjeve të vitit 2016 , lidhur me një marrëdhënie jashtëmartesore që ajo thotë se pati një natë me zotin Trump në vitin 2006, pak pasi bashkëshortja e zotit Trump, Melania lindi djalin e tyre, Barron.

Muajt e fundit, zoti Cohen ka thënë se e bëri pagesën me iniciativën e vet. Presidenti Trump ka mohuar që të kishte një marrëdhënie me zonjën Daniels dhe ka thënë se pagesa u bë për të ndalur akuza të rreme nga ana e saj.

Liderët e Kongresit të Shteteve të Bashkuara të Amerikës, duke cituar ndërhyrjen ruse në zgjedhjet amerikane, thonë se nuk do të ftojnë presidentin rus Vladimir Putin për t’ju adresuar Kongresit nëse pranon që të organizohet samiti i radhës në mes dy presidentëve në Uashington.

Më 24 korrik, kreu i Dhomës së Përfaqësuesve, Paul Ryan dhe lideri i Senatit Mitch McConnell, refuzuan të kenë qasje miqësore ndaj Putinit dhe shprehën mospajtim për përkrahjen e Trumpit ndaj Putinit pas samitit në Helsinki.

Ryan dhe McConnell thanë se nuk kanë plane t’i kërkojnë Putinit t’i adresohet Kongresit – nderim që u bëhet liderëve të huaj.

“Ne natyrisht nuk do ta ftojmë atë për një fjalim të përbashkët”, tha Ryan. “Këtë e rezervojmë për aleatët”.

“E kemi bërë të qartë se Putin nuk është i mirëseardhur në Capitol”, tha McConnell.

Këto komente vijnë pas deklarimeve të Putinit që tha se është duke u menduar nëse duhet të zhvillojë një takim të ri me Trumpin.

Dy ditë pas polemikave e “kërcënimeve” të dyanshme nga ana e presidentit iranian Hassan Rouhani dhe presidentit amerikan Donald Trump, ky i fundit thotë se është i gatshëm për të negociuar një marrëveshje të re bërthamore me Teheranin.

“Do të shohim se çfarë do të ndodhë, por jemi të gatshëm për një marrëveshje të re, jo marrëveshjen që është arritur nga administrata e kaluar, që ishte një katastrofë”, tha Trumpi gjatë një fjalimi në Missouri.

Trumpi, disa ditë më parë kishte kërcënuar Teheranin me “pasoja të cilat janë vuajtur shumë pak në histori” pas kërcënimeve nga presidenti iranian ndaj Trumpit i cili i tha “të mos luajë me bishtin e luanit”.

Retorika e ashpër në mes dy presidentëve është rikujtim i kërcënimeve në mes të presidentit Trump dhe liderit të Koresë së Veriut, Kim Jong Un, vitin e kaluar. Pas përplasjeve të dyja palët negociuan një marrëveshje të re në një samit gjatë pranverës.

Sekretari amerikan i Mbrojtjes Jim Mattis, ka refuzuar të komentojë kërcënimet e Trumpit ndaj Teheranit, por ka ngritur zërin ndaj veprimeve ttë Iranit në Lindjen e Mesme, duke përfshirë përkrahjen ndaj presidentit Bashar al-Assad.