Sekretari amerikan i Mbrojtjes, Jim Mattis u ka thënë liderëve arabë se Rusia nuk është zëvendësim për Shtetet e Bashkuara në Lindjen e Mesme, pas ndërhyrjes ushtarake të Moskës në Siri.

“Prania e Rusisë në rajon nuk mund të zëvendësojë përkushtimin afatgjatë, të qëndrueshëm dhe transparent të Shteteve të Bashkuara në Lindjen e Mesme”, u shpreh Mattis më 27 tetor, në një takim në Manama të Bahrejnit.

Rusia dhe Irani mbështesin regjimin e presidentit sirian Bashar al-Assad, në luftën civile shtatëvjeçare që ka lënë mbi 300 mijë persona të vrarë dhe miliona të tjerë janë zhvendosur.

Mattis tha në konferencën për dialog në Manama se “oportunizmi dhe vullneti i Moskës për të mos shikuar veprimtaritë kriminale të Assadit kundër popullit të tij, dëshmon mungesën e angazhimit të sinqertë ndaj parimeve themelore morale”.

Sekretari Mattis tha se mbështetja e Iranit për regjimin sirian “së bashku me vetot e përsëritura të Rusisë ndaj rezolutave të OKB-së, është arsyeja kryesore që Assadi vazhdon të qëndrojë në pushtet”.

Mattis po ashtu ka paralajmëruar se incidentet të tilla si vrasja e gazetarit saudit, Jamal Khashoggi minojnë stabilitetin në Lindjen e Mesme dhe se Shtetet e Bashkuara do të marrin masa shtesë ndaj përgjegjësve.

Gjatë ditës së djeshme pati një situatë emergjentë në Amerikë pasi u dërguan 13 bomba tek disa figura publike, që ishin kundërshtarët më të mëdhenj të Donald Trumpit. Gjatë ditës së djeshme u kap njeriu që i kishte dërguar këto pako-bomba. Cesar Sayoc, 56 vjeç u kap në Florida.

CNN ka zbuluar një video ku shihet Cesar në një nga mitingjet e Donald Trumpit duke e përkrahur atë. Përveç këtij rasti, Cesar ishte i akuzuar edhe për pesë vepra tjera penale.

Presidenti Donald Trump tha dje se zarfat me lëndë plasëse të dërguara në adresë të zyrtarëve aktualë dhe të mëparshëm të qeverisë amerikane nuk kanë vend në politikën amerikane. Paketat iu dërguan ish-Sekretares së Shtetit, Hillary Clinton, ish-Presidentit Barak Obama si dhe një numër personalitetesh amerikane, po ashtu edhe zyrave redaksionale të rrjetit CNN në Nju Jork. Presidenti Trump, duke folur për zhvillimet e fundit, fajësoi median si pjesërisht shkaktare e problemit:

Policia në Uashington dhe në një zonë periferike në Nju Jork po hetonte përmbajtjen dhe dërguesin e disa paketave në adresë të ish-Presidentit Barak Obama, si dhe ish-kandidates presidenciale, Hillary Clinton, ndërkohë që në një tubim në Uiskonsin, Presidenti Trump i cilësoi këto akte si sulm kundër demokracisë:

“Media ka përgjegjësinë t’i përmbahet një qëndrimi të civilizuar, të heqë dorë nga negativizmi dhe tendencat armiqësore, nga sulmet shpesh të pabaza”.

Më parë dje, zyrat redaksionale të rrjetit CNN në Nju Jork, u evakuuan pasi një paketë e dyshimtë u gjet në magazinën e postës. Zyrtarët janë shprehur se këto janë akte terroriste.

“Oficerët që u dërguan në skenën e ngjarjes identifikuan një pajisje që dukej si një mjet plasës aktiv. U mobilizua skuadra për asgjësimin e bombave e cila e neutralizoi pajisjen dhe e ka sjellë për hetime. U gjet edhe një zarf me pluhur të bardhë,” tha komisioneri i policisë në Nju Jork.

Ka njoftime për paketa të dyshimta të dërguara edhe në adresë të ligjvënëses demokrate Debbie Wasserman Schultz në zyrën e saj në Florida. Po ashtu të hënën u gjet një bombë e improvizuar në kutinë postare të miliarderit, George Soros, një përkrahës i fuqishëm i demokratëve. Asnjë nga pajisjet nuk ka shpërthyer.

Nënpresidenti Mike Pence i dënoi incidentet si akte prej frikacakësh.

Në Florida, zonja Clinton u shpreh se këto janë kohë të trazuara:

“Këto janë kohë të shoqëruara me përçarje të thella. Duhet të bëjmë të pamundurën që ta bashkojmë vendin”.

Kritikët e kanë akuzuar presidentin se e ka acaruar retorikën. Një senator republikan nuk mendon ashtu, megjithatë bën thirrje për qëndrim të moderuar:

“Mendojmë se njerëzit nga të dyja kahjet politike, duhet të përqafojmë qëndrime të moderuara,” – tha Senatori Orrin Hatch.

Autoritetet vazhdojnë hetimet në Uashington, Nju Jork, Florida, si dhe në Los Anxhelos ku u interceptuan dy paketa të dyshimta në adresë të ligjvënëses Maxine Waters.

Presidenti amerikan, Donald Trump u ka bërë thirrje mediave “të ndalin armiqësinë e pafund” pasi disa pako me material shpërthyes janë nisur drejt adresave të figurave të larta politike.

Ai i ka bërë këto deklarata pasi pakot janë dërguar në zyrën e CNN-it në Nju Jork dhe demokratëve, Barack Obama dhe Hillary Clinton.

Asnjëra nga pakot nuk ka shpërthyer, mirëpo FBI-ja ka nisur kërkime për të kuptuar kush qëndron mbrapa dërgesave.

Kritikët e presidentit amerikan i kanë cilësuar deklaratat e fundit të Trumpit, hipokrite, meqë ai shumë shpesh shprehet me fjalor brutal kundër kundërshtarëve të tij dhe shtypit.

Duke folur të mërkurën në një tubim në Viskonsin, presidenti Trump është zotuar për zënien e kryesit të këtij akti, derisa u ka bërë thirrje mediave të ndalin “raportet dhe sulmet negative”.

Ndërkohë presidenti rrjetit televiziv, CNN, Jeff Zucker ka kritikuar Trumpin dhe Sekretaren për media të Shtëpisë së Bardhë, Sarah Sanders që sipas tij nuk kuptojnë që “fjalët vlejnë”.

“Ekziston një mungesë e plotë në Shtëpinë e Bardhë e të kuptuarit lidhur me seriozitetin e sulmeve të tyre të vazhdueshme në media”, ka thënë ai.

Edhe kryetari i Nju Jorkut, Bill de Blasio i ka cilësuar tentimet për sulme ndaj CNN-it dhe demokratëve si “akt të terrorit”.

Ndërtesa Time Warner në Nju Jork është evakuuar pasi në magazinën e postës së rrjetit CNN u gjet një paketë e dyshimtë që ishte dërguar në adresë të CNN-it.

Ende nuk është konfirmuar nëse paketa ishte e ngjashme me pako të tjera që janë dërguar në adresë të Shtëpisë së Bardhë, si dhe në banesat e ish-Presidentit Obama, dhe çiftit Bill dhe Hillary Clinton.

Policia e Nju Jorkut tha se mori njoftim për paketën që i ishte dërguar CNN-it në ora 9:53 të mëngjesit të mërkurën.

Një tjetër paketë e dyshimtë është interceptuar nga forcat e rendit në Nju Jork, ku policia ka evakuuar zyrat redaksionale të rrjetit televiziv CNN. Paketa ishte e ngjashme me ato që janë dërguar në adresë të ish-presidentit Obama, si dhe çiftit Bill dhe Hillary Clinton.

Më parë të mërkurën Shtëpia e Bardhë dënoi tentativat për goditje me lëndë plasëse kundër ish-presidentit Barak Obama, si dhe ish-presidentit Bill Clinton dhe Hillary Clintonit.

Zëdhënësja e Shtëpisë së Bardhë Sarah Huckabee Sanders tha përmes një deklarate të mërkurën se “Këto akte terrorizuese janë të pështira dhe çdokush që është përgjegjës do të japë llogari deri në maksimumin e ligjit. Shërbimi Sekret dhe agjenci të tjera të rendit po hetojnë dhe do të marrin të gjitha hapat e nevojshëm për të mbrojtur këdo që kërcënohet nga këta individë frikacakë”.

Shërbimi Sekret i Shteteve të Bashkuara tha të mërkurën se ka interceptuar paketa të dyshimta, të identifikuara si paisje të mundshme shpërthyese, dërguar në shtëpitë e ish-Presidentit Barack Obama, dhe ish-Sekretares së Shtetit, Hillary Clinton.

Shërbimi Sekret tha se kishte kapur një paketë që i ishte dërguar zonjës Clinton në Westchester, një zonë në veri të Manhatanit të martën.

Gazeta New York Times njofton se paisja e gjetur pranë shtëpisë së ish-Presidentit Bill Clinton dhe kandidates demokrate për presidente në vitin 2016, është e ngjashme me atë që ishte vendosur në një kuti postare para shtëpisë së filantropistit, George Soros të hënën.

Një paketë tjetër u dërgua në banesën e zotit Obama në Uashington të mërkurën.

“Paketat u identifikuan menjëherë gjatë procedurës rutinë të kontrollit si paisje që mund të jenë shpërthyese dhe u trajtuan si të tilla”, tha Shërbimi Sekret në një deklaratë.

Në deklaratë shtohet se as zonja Clinton, as zoti Obama nuk i morën paketat dhe nuk ishin në rrezik t’i merrnin.

DES MOINES – Fituesi i premios në lojërat e fatit “Mega Millions” prej 1.6 miliardë dollarë, tiketën me fat e bleu në Karolinën e Jugut në SHBA.

Zyrtarët e “Mega Millions” njoftuan se blerësi i biletës ka qëlluar të gjitha 6 numrat e tërhequr mbrëmë.

Kjo është premio më e madhe e tërhequr ndonjëherë ndërsa nuk pritet publikimi i të dhënave të fituesit.

Fituesit e lotarisë kanë mundësi që mjetet t’u paguhen me këste për 29 vite, por shumica preferojnë pagesën e totalit. Nëse premio paguhet njëherësh, fituesi, pas pagesë së taksës, do të marrë 913 milionë dollarë.

“Mega Millions” luhet nga një numër qytetarësh amerikanë në 44 shtete federale. aa

VOAL – Shtatë milionë qytetarët e parë të Shteteve të Bashkuara tashmë kanë hedhur votat e tyre në funksion të zgjedhjeve afatmesme, të martën, më 6 nëntor.

Sipas shifrave të mbledhura nga New York Times, votimi paraprak regjistron numra rekord. Në fakt, vlerësohet një pjesëmarrje përfundimtare prej 48% të atyre me të drejtë vote, me një pjesëmarrje që nuk është arritur që nga viti 1966, përsëri me rastin e votimit afatmesëm. Për momentin është shumë herët të dihet nëse kjo prirje do të sjellë përfitime për kampin republikan të Presidentit Trump ose, përkundrazi, nëse është një shtytje demokratike drejt ndryshimit.

ANSA

Presidenti i Shteteve të Bashkuara, Donald Trump, tha se përgjigjja e Arabisë Saudite ndaj vrasjes së gazetarit saudit, Jamal Khashoggi, ka qenë përpjekja më e keqe në histori për të fshehur të vërtetën.

Trump tha për gazetarët në Shtëpinë e Bardhë se kushdo që e organizoi komplotin “duhet të jetë në telashe të mëdha”.

SHBA-ja u përball me presion të madh për të ashpërsuar qëndrimin ndaj Arabisë Saudite – aleate kyçe e saj.

Arabia Saudite ka ofruar raporte kundërthënëse për fatin e Khashoggit, banor i SHBA-së dhe kontribues në gazetën Washington Post.

Pas disa javësh këmbënguljeje si ai është i gjallë, autoritetet saudite thonë tani se Khashoggi, 59 vjeç, ka vdekur pas një përleshjeje që ka ndodhur pasi ka vizituar konsullatën saudite në Stamboll, më 2 tetor.

Sekretari amerikan i Shtetit, Mike Pompeo, tha se Shtetet e Bashkuara “do t’i dënojnë përgjegjësit” dhe se do t’i anulojnë vizat për 21 të dyshuar të identifikuar.

Në një intervistë të veçantë për gazetën Wall Street Journal, Trump përmendi përfshirjen e mundshme të zyrtarëve të lartë sauditë në vrasjen e Khashoggit, por tha se nuk beson se mbreti saudit, Salman, ka pasur njohuri paraprake për krimin.

Shtetet e Bashkuara të Amerikës janë të gatshme të kapin dhe të rrëzojnë raketat ruse, me rreze të mesme veprimi, të vendosura në kundërshtim me traktatin e INF që mund të prekin vendet e NATO-s në Europë ose Alaskën në Amerikë, theksoi ambasadorja amerikane në NATO, Kay Bailey Hutchison.

“Jemi përpjekur për t’i dërguar një mesazh në Rusisë për kaq shumë vite dhe ne kemi dijeni për shkeljet e traktateve nga ana e Rusisë, por ata tani po ndërtojnë një raketë balistike me reze të mesme, e ndaluar nga traktatet”, theksoi ambasadorja.

”SHBA është drejt tërheqjes nga kjo marrëveshje me Rusinë”, deklaroi të shtunën për gazetarët presidenti amerikan, Donald Trump, raporton ata.

Traktati INF është arritur në vitin 1987 mes SHBA-së dhe ish-Bashkimit Sovjetik, trashëguese juridike e të cilit është Rusia. Marrëveshjen e nënshkruan ish-presidenti amerikan, Ronald Regan dhe lideri i fundit sovjetik, Mihail Gorbaçov.

Me të parashikohet ndalesa për prodhimin, testimin dhe sistemimin e raketave bërthamore dhe konvencionale me rreze veprimi prej 500-1 500 kilometra që lëshohen nga toka.

Presidenti Trump ka nënshkruar një projekt-ligj që themelon një agjenci të re për investimet e huaja e cila synon të lehtësojë kreditimin privat prej 60 miliardë dollarësh të projekteve infrastrukturore në vendet në zhvillim. Disa e shohin këtë si një kthesë për një president që ka bërë fushatë për strategjinë “Amerika e para” ku propozohej shkurtimi i fondeve për ndihmë ndërkombëtare. Agjencia e re krijohet për t’iu kundërvënë ndikimit në rritje të Kinës në Afrikë, Azi dhe Amerikën Latine.

Stacioni Furi-Lebu pranë Addis Abebës në Etiopi, është një ndalesë kryesore në sistemin e parë modern hekurudhor të Afrikës nën-Sahariane. Ai lidh Etiopinë me daljen në det në portet e Gjirit të Adenit dhe Detit të Kuq.

Projekti i infrastrukturës masive u ndërtua me fonde kineze.
Daniel Runde i Qendrës për Studime Strategjike dhe Ndërkombëtare është ekspert për kreditë zhvillimore.​

“Kur zyrtarë të lartë të administratës Trump shkuan në Azi dhe në pjesë të tjera të botës dhe panë se Kina po merrte pjesën tonë, ata menduan se ne duhet të bëjmë diçka”, thotë ekspertë Runde.
Dhe ata bënë.

Muajin e kaluar administrata Trump krijoi një njësi të re të ndihmës për zhvillim, Korporatën Ndërkombëtare për Zhvillim, ose IDFC, bazuar në legjislacionin dy partiak të quajtur Akti BUILD.

“Është mjaft domethënëse që Kongresi dhe administrata e kanë njohur rëndësinë e financimit për të promovuar zhvillimin e SHBA në mbarë botën”, thotë George Ingram, i Institutit Brookings, raporton VOA.

Është një kthesë e një presidenti që donte të zvogëlonte ndihmën e huaj si pjesë e një plani më të gjerë për të ndryshuar mënyrën se si Uashingtoni angazhohet me botën.

“Ne e hedhim poshtë ideologjinë e globalizmit”, u shpreh presidenti Trump në OKB në muajin shtator.

Agjencia e re do të zëvendësojë OPIC, Korporatën e Investimeve Private jashtë vendit, duke marrë autoritet më të madh dhe më shumë fonde. Presidenti Trump dhe disa republikanë kishin kërkuar më parë t’i japin fund OPIC-ut, duke mos besuar se lehtësimi i kredive për kompanitë që bëjnë biznes në vendet në zhvillim është një përdorim i mirë i burimeve qeveritare.

Por ata ballafaqohen me një trilion dollarë investime kineze në projektet e infrastrukturës në mbarë botën, që e ka forcuar gjeopolitikisht Pekinin. Por ka edhe shenja shqetësimi për marrësit e fondeve.

Ja ç’thotë eksperti Daniel Runde:
“Kina është në rrugën e saj për të qenë tregtari i financave ndërkombëtare, sepse kinezët janë duke ofruar para në kushte tepër të lehta që nuk janë transparente ose sipas rregullave.”

Pekini ka hedhur poshtë akuzat se kreditë e tij jepen për të krijuar një kurth borxhi për vendet në zhvillim.

Me vetëm 60 miliardë dollarë, analistët thonë se IDFC-ja e re nuk do të jetë e mjaftueshme për t’iu kundërvënë investimeve kineze në mbarë botën, por ndikimi i saj mund të zmadhohet duke bashkëpunuar me organizata të tjera ndërkombëtare të huadhënies.

“Francezët, britanikët, skandinavët, të gjithë kanë organizata të ngjashme dhe tani që IDFC ka autoritet të barabartë, ky ent i ri do të jetë një partner shumë më efektiv se OPIC,” thotë eksperti George Ingram.

Ndërkaq, për vendet në zhvillim në Afrikë, Azi dhe Amerikë Latine që mund të përfitojnë nga më shumë investime amerikane, agjencia e re për investime të huaja (IDFC), është një hap në drejtimin e duhur.

Zgjedhjet e mesit të mandatit për Kongresin amerikan po afrojnë dhe demokratët kanë siguruar shumë financime. Analistët thonë se ndjenjat anti-Trump mund të jenë arsyeja që kontributet financiare për demokratët kanë arritur nivel rekord, ndërsa ata përpiqen t’u marrin republikanëve kontrollin e Kongresit. Zgjedhjet e mesit të mandatit kësaj here po bëhen më të kushtueshmet në historinë e Kongresit amerikan. Por pikëpyetja mbetet, nëse kontributet e demokratëve për fushatën janë të tilla për t’u marrë republikanëve një numër të mjaftueshëm vendesh në mënyrë që të sigurojnë shumicën në Kongres.

Në garën për në Kongres demokratët janë duke fituar “lojën” e financimeve.

Këtë javë, Komisioni Federal i Zgjedhjeve, njoftoi se kandidatët për në Kongres kanë siguruar një shifër rekord prej 2,3 miliardë dollarësh në ciklin e tanishëm zgjedhor.

Avantazhi i demokratëve në këto financime? Më tepër se 400 milionë dollarë.

Sarah Bryner e Qendrës për Politika të Përgjegjshme thotë se kjo përbën shqetësim për republikanët e zgjedhur.

“Fakti që demokratët ia kanë kaluar me financime, tregon se gara ka për të qenë një sfidë.”– thotë Sarah Bryner, drejtoreshë në Qendrën për Politika Përgjegjëse.

Republikanët dolën po aq mirë, ose ua kaluan demokratëve në fondet e krijuara nga Komitetet për Veprim Politik (PAC). Por demokratët siguruan shumë më tepër fonde nga kontributet individuale përmes internetit dhe me aktivitetet për mbledhje fondesh.

Shumica e fondeve përdoren për blerjen e reklamave të kushtueshme televizive, që mbetet mjeti i preferuar i kandidatëve për t’u drejtuar votuesve.

“Fushtatat janë të kushtueshme në vendin tonë, për shkak të kostos së televizionit.”– thotë ish kongresmeni Martin Frost, tani President i Shoqatës për ish anëtarët e Kongresit.

Frost thotë se financimet masive për demokratët reflektojnë një shtim të entuziazmit në radhët e anëtarëve të thjeshtë të Partisë.

“…Në Shtetet e Bashkuara ka një numër të madh demokratësh, shumë prej të cilëve japin kontribute të vogla; ata nuk e duan aspak Presidentin Trump dhe duan të japin një mesazh me këto zgjedhje.”– thotë zoti Frost.

Shtimi i financimeve për demokratët po i detyron republikanët ta rimendojnë strategjinë e financimit të fushatës së tyre. Ata po i zhvendosin financimet nga kandidatët e dobët, tek ata më të fuqishëm.

Michael Steele, ish kryetar i Komitetit Kombëtar Republikan, paralajmëron se fitorja nuk është e garantuar vetëm nga fondet.

“Shumë njerëz i mbivlerësojnë financimet dhe i shohin ato si rrezikun që i kanoset politikës amerikane, por unë them se ka patur po aq gara ku kandidati më i financuar ka humbur, sa edhe kur ai ka fituar.”

Demokratët duhet të sigurojnë 23 vende më tepër për të rimarrë kontrollin e Dhomës së Pëfaqësuesve. Analistët thonë se ata kanë shanse të mira, edhe pse shpresat e demokratëve për të rimarrë kontrollin e Senatit janë zbehur.

Presidenti i Shteteve të Bashkuara, Donald Trump, tha se do të tërhiqet nga marrëveshja me Rusinë për kontroll të armëve që daton nga Lufta e Ftohtë.

Ai ripërsëriti se Moska ka shkelur marrëveshjen, në një fjalim par Këshillit të Sigurisë.

“Ne do ta ndalim marrëveshjen dhe do të tërhiqemi”, tha Trump para gazetarëve. “Rusia ka shkelur marrëveshjen për shumë vite”, shtoi ai.

“Ne duhet të zhvillojmë ato armë, vetëm nëse Rusia dhe Kina vijnë tek ne dhe na thonë, le të bëhemi njëmend të mençur dhe asnjëri nga ne të mos zhvillojë armët”, tha Trump.

Traktati i vitit 1987 i ndalon Shteteve të Bashkuara dhe Rusisë, posedimin, prodhimin dhe transportin e armëve raketore. SHBA kishte akuzuar Rusinë nga viti 2014 për shkelje të marrëveshjes.

Rusia kishte kundërshtuar akuzat e SHBA-së duke theksuar se disa elemente të sistemit të armëve kanë qenë në kundërshtim me marrëveshjen.

Deklaratat e Trump vijnë disa ditë pasi Putini tha se Rusia mund të përdorë armët bërthamore në përgjigje ndaj ndonjë sulmi bërthamor në vend.

Këshilltari për Siguri Kombëtare në Shtëpinë e Bardhë, John Bolton, do të vizitojë Rusinë më 20 tetor, pas raportimeve se Uashingtoni po vazhdon drejt tërheqjes së traktatit të kontrollit të armëve bërthamore që nga periudha e Luftës së Ftohtë dhe se ka akuzuar Rusinë për shkelje.

Gazeta New York Times ka raportuar se Bolton planifikon të paralajmërojë presidentin rus Vladimir Putin se administrata e Trumpit po përgatitet të largohet nga Traktati i vitit 1987 që ishte negociuar nga ish presidenti Ronald Regan gjatë kohës së Bashkimit Sovjetik.

Në anën tjetër, gazeta The Guardian ka raportuar se Bolton ka rekomanduar tërheqjen e Trumpit nga traktati.

Më 2014, Uashingtoni kishte akuzuar publikisht Moskën për ndërtimin e një raketahedhësi, për të cilën SHBA ka akuzuar së është në shkelje të drejtpërdrejtë të marrëveshjes së vitit 1987, sepse i mundëson Moskës të bëjë sulm ajror ndaj Evropës.

Rusia kishte refuzuar akuzat e SHBA-së dhe kishte shtuar se disa elemente të sistemit mbrojtës raketor të SHBA-së janë në kundërshtim me marrëveshjen.

Gjatë vizitës, Bolton pritet të diskutojë edhe për Korenë Veriore, Ukrainën dhe Sirinë.

UASHINGTON – Në lidhje me vrasjen e gazetarit saudit, Jamal Khashoggi, presidenti i SHBA-ve, Donald Trump, ka deklaruar se do të kenë disa pyetje për sauditët dhe për këtë çështje do të punojnë me Kongresin.

Duke folur për gazetarët në Arizona të SHBA-ve rreth rastit Khashoggi presidenti Trump ka mbrojtur idenë e tij se Arabia Saudite “është e besueshme” në lidhje me deklaratën e saj për “vdekjen e gazetarit Khashoggi”.

Deklarata e Rijadit është “hapi i parë i madh” ka bërë të ditur Trump duke shtuar se “Por ende nuk ka përfunduar vlerësimi ynë. Aktualisht është herët “për të arritur një rezultat”.

“Do të kemi disa pyetje ndaj sauditëve. Në lidhje me këtë çështje po punojmë së bashku me Kongresin”, tha Trump në lidhje me deklaratën e Arabisë Saudite për Khashoggi, duke shtuar se vendimin e tyre do ta njoftojnë pasi të ketë biseduar me princin saudit, Muhammed bin Selman.

Po ashtu Trump ka theksuar se “janë shumë të rëndësishme” arrestimet që qeveria e Rijadit ka kryer në lidhje me vrasjen e gazetarit Khashoggi.

Për fatin e marrëveshjes në shitjen e armëve me shumën 110 miliardë dollarë mes SHBA-ve dhe Arabisë Saudite, presidenti Trump ka theksuar se dëshiron ta ruajë marrëveshjen në fjalë dhe se në vend të saj do të preferonte të zbatojë “një formë sanksioni” ndaj Arabisë Saudite.

“Në këtë proces jemi përfshirë ne, është përfshirë Turqia. Kjo është një gjë e tmerrshme dhe nuk do të jetë një ngjarje që të humbë nga sytë”, tha më tej Trump në përgjigje ndaj pyetjes nëse është i “besueshëm” apo jo hetimi që Arabia Saudite po kryen në lidhje me këtë ngjarje.

Ndërsa zëdhënësja e Shtëpisë së Bardhë, Sarah Sanders, në lidhje me vdekjen e gazetarit Khashoggi kishte deklaruar se “Shprehim keqardhjen që kemi dëgjuar konfirmimin e vdekjes së Khashoggi. I shprehim ngushëllimet familjes, të fejuarës dhe dashamirësve të Khashoggi”.

Administrata e Arabisë Saudite kishte pranuar se Jamal Khashoggi i cili ishte zhdukur më 2 tetor pas kishte hyrë në Konsullatën e Arabisë Saudite në Stamboll “ka humbur jetën si rezultat i grindjeve në ndërtesën e konsullatës”. aa

Qeveria amerikane të premten ka akuzuar rusen Elena Aleksevna Khusyaynova, 44 vjecare, për rolin kyc financiar në planin e mbështetur nga Kremlini për informacione kundër Shteteve të Bashkuara, si dhe tentimit për të ndërhyrë në zgjedhjet e Kongresit muajin e ardhshëm.

Khusyaynova është shtetasja ruse e parë që dënohet për krimin e tentim-ndërhyrjes në zgjedhjet në mes të mandatit më 2018 në SHBA.

Ajo ishte e përfshirë në projekte të financuara nga oligarkë rusë të afërt me presidentin Putin, sipas burimeve.

Oligarku Evgeny Viktorovich Prigozhin, me dy kompanitë e tij janë duke u hetuar në një hetim të vecantë për shtytjen e fituesit të zgjedhjeve Donald Trump ndaj kandidates Hillary Clinton.

Rasti kundër ruses Khusyaynova u publikua të njëjtën ditë kur intelegjenca e SHBA-së lëshoi vërejtje ndaj përpjekjeve të Rusisë, Kinës, Iranit dhe disa vendeve të tjera për ndërhyrje në zgjedhjet e Kongresit, në të cilat republikanët po tentojnë të mbajnë shumicën.

UASHINGTON – Presidenti i SHBA-ve, Donald Trump, është shprehur se ai beson se gazetari saudit Jamal Khashoggi është i vdekur, duke shprehur besim mbi raportet e inteligjencës nga burime të shumta që fuqimisht sugjerojnë rolin saudit në këtë rast.

Presidenti Trump në një intervistë për New York Times ndaloi të thoshte se princi saudit i kurorës, Mohammed bin Salman, ishte përgjegjës për vdekjen e gazetarit Khashoggi.

Por Trump pranoi se akuzat mbi atë se princi urdhëroi vrasjen kanë ngritur pyetje të thella rreth aleancës amerikane me Arabinë Saudite, duke ndezur një nga krizat më serioze të politikës së jashtme të presidencës së tij.

“Kjo gjë ka kapur imagjinatën e botës, për fat të keq”, u tha Trump gazetarëve të New York Times në një intervistë të shkurtër në Zyrën Ovale, duke theksuar më tej, “Nuk është pozitive. Nuk është pozitive”.

“Nëse nuk ndodh mrekullia e të gjitha mrekullive, do të pranoj se ai është i vdekur”, tha Trump dhe shtoi, “Kjo bazohet në të gjitha shërbimet e inteligjencës që arrijnë”.

Pas një kohe të shkurtër, Trump përsëriti para gazetarëve në Bazën e Përbashkët Andrews se ai besonte se Khashoggi është i vdekur duke thënë se, “Kjo është gjë e keqe, e keqe dhe pasojat duhet të jenë të rënda”.

Intervista për New York Times ndodhi pasi presidenti u informua nga Sekretari amerikan i Shtetit, Mike Pompeo, i cili u kthye nga një udhëtim në Arabinë Saudite dhe në Turqi.

Gazetari dhe kolumnisti i “The Washington Post”, Jamal Khashoggi, i cili ka dhënë kontribute edhe për “Al Watan”, një platformë e rëndësishme për reformistët sauditë, u zhduk më 2 tetor pasi hyri në kompleksin e Konsullatës së Arabisë Saudite në Stamboll, ndërsa ka shqetësime se ai mund të jetë vrarë brenda saj.

Sipas burimeve të policisë turke, të njëjtën ditë, 15 sauditë, duke përfshirë disa zyrtarë, arritën në Stamboll me dy avionë dhe vizituan konsullatën në kohën kur Khashoggi ishte ende brenda. Të gjithë individët e identifikuar kanë lëshuar Turqinë.

Për hetimin e rastit është formuar një ekip ekspertësh me propozim të Arabisë Saudite i përbërë nga zyrtarë sauditë dhe turq, i cili filloi punën të hënën me një hetim disa orësh në ndërtesën e konsullatës.

Grupi i përbashkët hetues sot në orët e hershme përfundoi edhe hetimin e nisur dje në rezidencën e konsullit gjeneral Mohammad al-Otaibi, i cili është larguar nga Turqia.

Avioni që bartte Zonjën e Parë të Shteteve të Bashkuara, Melania Trump, bëri ulje të detyrueshme pasi kabina u mbush me tym.

“Çdo gjë është në rregull dhe të gjithë janë mirë”, tha një zëdhënës i Trumpit.

Sipas tij, shkak i incidentit është një “çështje e vogël mekanike”.

Gazetarëve në bord iu dhanë peshqirë të lagur “për t’i vënë mbi fytyrë, nëse tymi bëhet shumë i dendur”, tha një gazetar i NBC-së.

Zonja Trump është dashur të udhëtojë në Filadelfia për të takuar familjet e prekura nga abuzimi me opiod, por avioni presidencial është kthyer në bazën ajrore në Merillend, nga ku është nisur.

Paul Allen dhe Bill Gates

Paul Allen, i cili bashkëthemeloi kompaninë e teknologjisë Microsoft, vdiq në moshën 65-vjeçare.

Dy javë më parë, ai njoftoi se i është kthyer sëmundja e kancerit, të cilën e ka trajtuar në vitin 2009.

Bashkëthemeluesi i Microsoft-it, Bill Gates, tha së është “zemërthyer nga vdekja e njërit prej miqve të tij më të vjetër dhe më të dashur”.

“Informatika personale nuk do të kishte ekzistuar pa të”, tha Gates.

Allen u largua nga Microsoft-i në vitin 1983, pas një mosmarrëveshjeje me Gates.

Por aksionet në kompani i mundësuan atij të jetojë jetën si miliarder.

Spektatorët sy-mprehtë kanë vënë re në një intervistë të Presidentit të Shteteve të Bashkuara të Amerikës një pikturë.

Në të duket Donald Trumpi i ulur në një tavolinë me të gjithë Presidentët Republikanë të shquar në historinë e SHBA, përfshi edhe Abraham Lincoln.

Dekori i varur jashtë Zyrës Ovale, bëri që njerëzit në rrjetet sociale të japin komentet e tyre. Disa shkruanin se Trump e ka dizejnuar vetë në mënyrë që t’i duket vetja i rëndësishëm.

Ndërsa disa tjerë mendonin se Trump-it i takon një vend pranë Presidentëve të shquar si Dwight Eisenhower, Richard Nixon, Teddy Roosevelt dhe Gerald Ford.

Në fillim të këtij viti, gazetarët e Zërit të Amerikës, Chris Simkins dhe Jeff Swicord ndërmorën një projekt të posaçëm njëvjeçar për të dokumentuar krizën e opioideve në Shtetet e Bashkuara, me fjalët e vetë amerikanëve që vuajnë nga kjo epidemi. Rezultati është një seri e quajtur “Dëmi i bërë: Të jetosh makthin e krizës së opioideve në Amerikë”. Seria rrëfen historinë e tre vetëve, një grua nga Majami, që po përpiqet të shërohet nga varësia ndaj opioideve dhe të mbajë familjen e saj; një punonjës social vullnetar që punon në lagjen më të prekur nga droga në Filadelfia; dhe një shef policie në një qytet të vogël të Karolinës së Veriut që nuk i arreston më njerëzit dhe ka krijuar një organizatë jofitimprurëse që siguron shërbime për të droguarit. Në këtë episod do t’ju çojmë në Filadelfia ku policia ka ndërhyrë për të spastruar kampet me tenda provizore të të droguarve në lagjen Kensingotn të qytetit. Po ku do të shkojnë ata?

Presidenti Donald Trump po sugjeron se Sekretari i Mbrojtjes Jim Mattis mund të jetë një nga zyrtarët e tij të ardhshëm kyç që mund të largohet nga qeveria.

Republikani Trump, në një intervistë të transmetuar të dielën në emisionin “60 Minutes” të kanalit CBS, thotë se Mattis nuk ka asnjë shenjë se po largohet, por shtoi: “Mund të ndodhë që ai të largohet. Mendoj se ai është si një demokrat, nëse doni të dini opinionin timtë vërtetë. ”

Udhëheqësi amerikan e përshkroi gjeneralin në pension si “një njeri të mirë, ne shkojmë shumë mirë, por mund të largohet, pasi në një moment, të gjithë largohen.

Trump, gjatë administratës së tij 21-mujore, ka shkarkuar ose detyruar të largohen dhjetra zyrtarë të rëndësishëm, ose ka parë të tjerët që i pëlqente, të japin dorëheqjen, përfshirë ambasadoren në Kombet e Bashkuara Nikki Haley, e cila javën e kaluar tha se do të linte postin e saj në fund të vitit.

Mattis, duke udhëhequr ushtrinë amerikane, herë pas here ka qenë në kundërshtim me presidentin Trump dhe shumë zyrtarë të administratës së tij, duke përfshirë këshilltarin e sigurisë kombëtare John Bolton. Mattis, në mes të vitit 2017, bëri thirrje për më shumë opsione diplomatike me Korenë e Veriut në lidhje me programin e armëve bërthamore të Phenianit, një qëndrim që presidenti Trump përfundimisht e përkrahu, gjë që çoi në samitin e qershorit me udhëheqësin e Koresë së Veriut, Kim Jong Un.

UASHINGTON – Presidenti i SHBA-ve, Donald Trump, është takuar në Zyrën Ovale në Shtëpinë e Bardhë me pastorin amerikan, Andrew Craig Brunson, pasi gjykata në Izmir vendosi që ai të lirohet.

Presidenti Trump pasi ka bërë të ditur se kanë punuar shumë në çështjen e Brunson kryesisht kohët e fundit, tha se “Falënderoj shumë presidentin Erdoğan. Është një hap i madh për t’u kthyer në marrëdhëniet e mëparshme. Tani kemi mundësinë për të patur marrëdhënie të shkëlqyera me Turqinë”.

Ai ka shtuar se pas lirimit të Brunson kanë një qasje të ndryshme ndaj Turqisë në krahasim me ditën e mëparshme.

– “E duam Turqinë, e duam popullin turk”

Ndërsa pastori Brunson në fjalën e tij ka shprehur falënderimet ndaj zyrtarëve amerikanë që janë përpjekur për lirimin e tij.

Ndaj pyetjes së Trump nëse dëshiron apo jo të rikthehet sërish në Turqi pastroi Brunson tha se “E duam Turqinë, e duam popullin turk. Atje kemi jetuar 25 vite”.

Edhe Trump pas fjalës së Brunson ka bërë vlerësimin e tij se “Populli turk është një popull i madh, e di këtë”.

Dje gjykata në Izmir të Turqisë dha dënimin me tre vite e një muaj e gjysmë burgim, ndaj pastorit amerikan, Andrew Craig Brunson, i cili ndodhej në arrest shtëpie dhe ndaj të cilit kërkohej dënimi me 35 vite burg me akuzat se kishte kryer spiunazh dhe vepra penale në emër të organizatave terroriste FETO dhe PKK.

Duke marrë parasysh kohën prej afër dy vitesh që ai ka qëndruar në arrest, gjykata vendosi që ai të lirohet. Brunson i cili u lirua dje pas heqjes së arrestit të shtëpisë dhe ndalesës për udhëtim jashtë vendit, udhëtoi drejt SHBA-ve. aa

Presidenti Donald Trump përshëndeti kthimin në Uashington të pastorit amerikan Andrew Brunson.

Trump dhe Brunson u takuan në Zyrën Ovale të shtunën, pak orë pas mbërritjes së këtij të fundit në tokën amerikane.

Presidenti i tha Brunsonit “ne kemi qenë duke biseduar gjatë dhe kemi bërë negociata të vështira” për lirimin e tij duke shtuar se “ne nuk paguajnë shpërblim në këtë vend”.

Një gjykatë turke të premten dënoi Brunsonin për lidhje me terrorizmin dhe e dënoi atë me vetëm tre vjet burg. Por gjykata e liroi pastorin ungjillor 50-vjeçar, pasi ai kishte kaluar gati dy vjet në paraburgim, raporton VOA.

“Do të jetë e mrekullueshme të takohem me të”, shkroi Trump në Twitter të shtunën në mëngjes. “Ai është një i krishterë i mirë që ka përjetuar një përvojë kaq të vështirë”.

Trumpi falënderoi Presidentin turk Rexhep Tajip Erdogan për kthimin e Brunsonit, i cili u lirua të premten nga një gjykatë turke. Trump vuri në dukje se SHBA nuk negociuan një marrëveshje me Turqinë për lirimin e Brunsonit, duke thënë, “Unë nuk bëj marrëveshje për pengje.” Ankaraja gjithashtu ka kundërshtuar fuqimisht çdo sugjerim për një marrëveshje.

Lirimi i Andrew Brunson të premten shënoi fundin e një mosmarrëveshjeje të ashpër diplomatike midis Uashingtonit dhe Ankarasë. Brunson përballej me 35 vjet burg nëse do të dënohej për terrorizëm dhe akuzat për spiunazh, që Uashingtoni i quajti të pabaza.

Eksperti amerikan i politikës së jashtme, David L. Phillips, në një intervistë për “kallxo” thotë se Shtetet e Bashkuara të Amerikës nuk janë pajtuar për idenë e korrigjimit të kufijve të cilën Presidenti i Kosovës, Hashim Thaçi, është duke e avokuar tash e disa muaj nëpër Kosovë dhe jashtë saj.

Phillips, drejtor i Programit për Ndërtim të Paqes dhe të Drejta të Njeriut në Institutin për të Studime të të Drejtave të Njeriut në Universitetin Columbia, tha se nëse Presidenti Thaçi po thotë që Qeveria amerikane e përkrah pozicionin e tij, atëherë “ai ose i ka keqkuptuar ata, ose po i keqinterpreton”.

Deri para pak ditëve, Phillips ka qenë i angazhuar në ekipin e ekspertëve të huaj të Presidentit Thaçi, por ka dhënë dorëheqje duke shprehur hapur mospajtimet me idenë për ndarje të Kosovës.

“Po, jam i sigurt. Kam folur me zyrtarë amerikanë. Qeveria amerikane nuk e përkrah korrigjimin e kufirit, ajo përkrah gjetjen e një zgjidhje të përbashkët të cilën mund ta vlerësojë dhe ajo marrëveshje duhet të gjejë përkrahje nga qeveritë përkatëse dhe nga shoqëria civile”, ka thënë eksperti amerikan i politikës së jashtme.

Mexico Beach, Florida

Uragani Michael ka shkatërruar qytetin Mexico Beach në veriperëndim të Floridas në SHBA, thanë zyrtarët.

Stuhia ka zbarkuar atje të mërkurën, me erëra deri në 250 kilometra në orë.

Mbi 1.4 milion shtëpi kanë qenë pa energji elektrike në Florida, Alabama Xhorxhia dhe Virxhinia, mëngjesin e së premtes.

Michael, njëri nga uraganet më të fuqishme në historinë e Shteteve të Bashkuara, la të vrarë së paku 11 njerëz, ndërsa kërkimet për të mbijetuar vazhdojnë.

Personeli i ushtrisë amerikane përdori pajisje të rënda për të pastruar pemët e rrëzuara, në mënyrë që ekipet e shpëtimit të arrinin te banorët e bllokuar.

“Nëna e të gjitha bombave nuk bën më shumë dëm se kjo”, tha kryetari i qytetit Mexico Beach, Tom Bailey.

I dobësuar në erëra me shpejtësi deri në 50 kilometra në orë, Michael është nisur në verilindje të SHBA-së, tha Qendra Kombëtare për Uragane.