Zyrtarët e sigurisë kombëtare në Uashington mohuan komentet lidhur me njoftimet e medias se Presidenti amerikan Donald Trump miratoi goditje ajrore ndaj Iranit të enjten, por më pas u tërhoq nga vendimi për t’i ndërmarrë ato për arsye të panjohura.

Fillimisht presidenti Trump autorizoi sulme ndaj një numri objektivash iraniane, si radarë dhe bateri raketash, siç njoftoi së pari gazeta The New York Times.

Më pas, edhe The Washington Post dhe media të tjera njoftuan se zyrtarët e administratës thanë se presidenti i miratoi kundërgoditjet.

Ndërkohë agjencia e lajmeve Reuters thotë se qeveria iraniane i tha se kishte marrë një mesazh nga Presidenti Trump përmes Omanit, ku ai paralajmëronte për një sulm të pritshëm ndaj Iranit.

Reuters tha se përgjigjja e menjëhershme e Teheranit ndaj mesazhit të Presidentit Trump ishte një paralajmërim i ashpër lidhur me pasojat “rajonale dhe ndërkombëtare” nëse Shtetet e Bashkuara ndërmerrnin veprime ushtarake.

Të enjten në mbrëmje, Administrata Federale e Aviacionit lëshoi një urdhër urgjent përmes së cilit ndalonte të gjitha kompanitë ajrore amerikane që të lejonin avionë të hynin në hapësirën ajrore mbi pjesë të Gjirit Persik dhe atij të Omanit, zona ku u godit droni i Marinës amerikane nga Irani. Edhe disa linja ajrore ndërkombëtare, përfshirë KLM –në holandeze dhe Qantas të Australisë thonë se nuk do të fluturojnë mbi Ngushticën e Hormuzit. za

Presidenti Donald Trump, i cili nisi zyrtarisht fushatën për rizgjedhje, thotë se autoritetet amerikane të emigracionit do të fillojnë deportimin e miliona emigrantëve pa dokumente. Disa analistë pohojnë se kërcënimet e tij nuk janë tjetër përveçse pjesë e retorikës së nxehtë të fushatës, por për miliona njerëz mesazhi i tij është një paralajmërim serioz. Ramon Taylor i Zërit të Amerikës sjell këto hollësi.

Duke nisur zyrtarisht fushatën, Presidenti Trump u bëri jehonë disa temave të njohura:

“Ne besojmë se vendi ynë duhet të jetë vendi i shenjtë për qytetarët që respektojnë ligjin, jo për të huaj kriminalë”, tha ai.

Përpara kësaj, ai publikoi një numër komentesh në Twitter, ku paralajmëronte se autoritetet e emigracionit do të kryejnë dëbime masive, duke filluar nga java e ardhshme. Një operacion i tillë do të kërkonte qindra, apo mijëra agjentë dhe personel ligjzbatues, të cilët qysh tani përballen me një vëllim të madh pune. Analistët thonë se qeverisë i duhen më shumë mjete dhe njerëz.

Jessica Vaughn, është me Qendrën për Studimet e Emigracionit.

“Mendoj se gjëja e parë është se qeveria duhet të ketë kapacitetin, aftësinë dhe burimet për të zbatuar ligjin. Me fjalë të tjera, jepini fund krizës në kufi pastaj sigurohuni që autoritetet të jenë në gjendje të bëjnë punën në brendësi të vendit.”

Momenti kur Presidenti e dha njoftimin ngriti menjëherë pikëpyetje sa i përket qëllimeve të tij. Por kundërshtarët paralajmërojnë se retorika e tij tashmë është provuar se vjen me pasoja.

“Mendoj se nuk mund të lejojmë qeverinë federale të bëjë atë që ajo thotë se do të bëjë. Ne pamë se si ata nuk i ndryshuan planet për ndarjen e familjeve në kufi dhe, siç e dini, sado që kjo rezultoi diçka e tmerrshme, nuk i pengoi ata ta zbatonin. Prandaj duhet të besojmë se ata do të përpiqen ta bëjnë edhe këtë”.

Avokati i emigracionit Matthew Cameron thotë se një operacion masiv deportimi thjesht nuk është i mundur, por nuk ka dyshim se kjo do të ngjallë frikë në komunitetin e emigrantëve pa dokumente.

“Kjo do të thotë që njerëzit nuk do të shkojnë në takimet me mjekun, nuk do të shkojnë të marrin fëmijët nga shkolla, nuk do të shkojnë dot të punojnë, nëse vërtet besojnë se ka mundësi që kjo të ndodhë”.

Në të njëjtën ditë që kërcënoi për deportime masive, Presidenti Trump tha se Shtetet e Bashkuara po përgatiten të nënshkruajnë një marrëveshje me Guatemalën, për të mos lejuar njerëzit nga ky vend i Amerikës Qendrore të largohen për t’i shpëtuar përndjekjeve dhe të vijnë të kërkojnë strehim në SHBA.

Në SHBA, Komisioni Juridik i Dhomës së Përfaqësuesve po zhvillon të mërkurën një seancë dëgjimore me dyer të mbyllura me ish-drejtoren e Komunikimit të Shtëpisë së Bardhë Hope Hicks. Kjo është hera e parë që ligjvënësit marrin në pyetje një person të rrethit të ngushtë të presidentit, që prej publikimit të raportit të Prokurorit të Posaçëm Robert Mueller në muajin prill.

Demokratët e konsiderojnë dëshminë e zonjës Hicks, ish-ndihmëse e ngushtë e Presidentit Donald Trump, një fitore të rëndësishme pasi zoti Trump i ka penguar gjerësisht hetimet e nisura prej tyre.

Komisioni kërkoi fillimisht që dëshmia e zonjës Hicks të ishte publike, por në fund ra dakord për një seancë me dyer të mbyllura. Një transkript i seancës pritet të publikohet në ditët në vazhdim.

Është e paqartë se sa informacion të ri do të ofrojë Hope Hicks. Ajo ka bashkëpunuar gjerësisht me hetimin e zotit Mueller lidhur me ndërhyrjen ruse në zgjedhje. Një avokat i Shtëpisë së Bardhë, i pranishëm gjatë seancës dëgjimore, pritet ta ndalojë atë t’u përgjigjet disa pyetjeve.

Në një letër dërguar të martën kryetarit të komisionit Jerry Nadler, avokati i Shtëpisë së Bardhë Pat Patrick Cipollone shkruante se zoti Trump e kishte udhëzuar zonjën Hicks që të mos i përgjigjej pyetjeve “në lidhje me periudhën e shërbimit të saj si këshilltare e lartë e presidentit”.

Zoti Cipollone tha se zonja Hicks, si një nga ish-këshilltaret e larta të zotit Trump është “absolutisht imune” lidhur me dëshminë për shërbimin e saj ndaj presidentit për shkak të ndarjes së pushteteve mes degëve ekzekutive e legjislative. Shtëpia e Bardhë ka përmendur gjithashtu privilegjin ekzekutiv në lidhje me shumë nga kërkesat e demokratëve, duke përdorur fuqinë e presidentit për të refuzuar dhënien e informacionit për të mbrojtur konfidencialitetin e procesit vendimmarrës të Zyrës Ovale.

Demokratët kanë argumentuar se përgjigjet e zonjës Hicks nuk mbrohen nga imuniteti apo privilegji ekzekutiv, sidomos pas bashkëpunimit të saj me zotin Mueller. Komisioni i ka kërkuar zyrtarisht zonjës Hicks të paraqesë dokumente, por ajo është pajtuar vetëm pjesërisht me këtë kërkesë. za

Shtëpia e Bardhë i bëri thirrje Kosovës dhe Serbisë të lenë mënjanë retorikën ekstremiste dhe të punojnë për një marrëveshje që përqendrohet në njohjen reciproke mes tyre.

Në një deklaratë me rastin e 20 vjetorit të përfundimit të operacionit të NATO-s që i dha fund spastrimit etnik në Kosovë, zëdhënësi i Shtëpisë së Bardhë Judd Deere tha:

“Prishtina dhe Beogradi duhet të dyfishojnë përpjekjet për të punuar drejt një marrëveshjeje gjithëpërfshirëse të përqendruar në njohjen reciproke dhe të heqin menjëherë pengesat ndaj përparimit.”

“E vetmja rrugë për një të ardhme më të mirë është një dialog midis fqinjësh që të synojë normalizimin e marrëdhënieve dhe t’i hapë rrugën Serbisë dhe Kosovës të kenë vendin e tyre të ligjshëm brenda komunitetit euroatlantik,” tha zëdhënësi.

“Shtetet e Bashkuara janë të gatshme të ndihmojnë gjatë gjithë këtij procesi, por i takon Kosovës dhe Serbisë që të ndërmarrin hapat e ardhshëm,” thuhet në deklaratën e Shtëpisë së Bardhë, e cila u bën thirrje Prishtinës dhe Beogradit të veprojnë tani e të mos ua lënë punën brezave të ardhshëm. za

Gjatë ditëve të ardhshme pritet të zhvillohen disa seanca me dëshmi mbi raportin e Prokurorit të Posaçëm Mueller mbi ndërhyrjet ruse në zgjedhjet e 2016. Po shtohet presoni për të vazhduar hetimet që mund të çojnë në hapjen e procesit për shkarkimin e Presidentit Donald Trump.

Por zoti Robert Mueller, i cili ditët e fundit e përmbylli detyrën e prokurorit të posaçëm pas përfundimit të raportit, nuk do të japë dëshmi para Komisionit të Dhomës së Përfaqësuesve për Gjyqësorin, i cili do të zhvillojë një seancë me titull: “Mësime nga Raporti Mueller: Ndërhyrje presidenciale dhe vepra të tjera penale”.

Komisioni do të dëgjojë dëshmi të ish-prokurorëve të përgjithshëm dhe ekspertëve të tjerë ligjorë, përfshirë John Dean, dëshmitar kryesor në vitet 1970 gjatë skandalit Watergate dhe ish-këshillar për Presidentin e atëhershëm Richard Nixon. Komisioni thotë se dëshmitarët do të diskutojnë prova të raportit se Presidenti Trump ishte përpjekur të pengonte ose kufizonte hetimet, të cilat përforcuan përfundimet e komunitetit të zbulimit se Rusia kishte ndërhyrë në zgjedhje me synimin për të ndihmuar Presidentin Trump të fitonte.

Të mërkurën, Komisioni i Dhomës së Përfaqësuesve për Zbulimin do të organizojë një seancë të re me synimin për të nxjerrë mësime mbi “ndërlikimet në punën e agjencive të zbulimit” bazuar në konkluzionet e raportit Mueller.

Të dy këto komisione kryesohen nga demokratë, ndërkohë që vetë antarësia e Partisë Demokrate është e përçarë në pikëpamjet e tyre pro dhe kundër hapjes së procesit për shkarkimin e Presidentit Trump. za

Zëvendës ndihmës sekretari amerikan i shtetit, Mathew Palmer, tha se Shtetet e Bashkuara nuk kërkojnë një afat të caktuar për arritjen e një marrëveshjeje për normalizimin e marrëdhënieve ndërmjet Kosovës dhe Serbisë, por do të dëshironin një rifillim sa më të shpejtë të bisedimeve. Në një intervistë për programin në gjuhën serbe të Zërit të Amerikës, ai tha se Shtetet e Bashkuara nuk vendosin vija të kuqe në procesin e bisedimeve, por kjo nuk nënkupton se të gjithë mundësitë janë të hapura.

Zëri i Amerikës: Zoti Palmer, a prisni që Serbia dhe Kosova të nënshkruajnë një marrëveshje për normalizimin e marrëdhënieve mes tyre në Shtëpinë e Bardhë këtë vit?

Matthew Palmer: Ne nuk po kërkojmë ndonjë kuadër kohor të caktuar. Ne mbështesim normalizimin e marrëdhënieve mes Kosovës dhe Serbisë, ne duam të shohim që dialogu për arritjen e këtij synimi të rifillojë sa më shpejt që të jetë e mundur dhe që palët të arrijnë një marrëveshje gjithëpërfshirëse për normalizimin e marrëdhënieve në kohë. Në se kjo do të ndodhë apo jo deri në fund të vitit, nuk jam në gjendje ta parashikoj.

Zëri i Amerikës: Presidenti Trump ka bërë thirrje për arritjen e një marrëveshje sa më shpejt që të jetë e mundur. Prandaj ju pyeta, a besoni se ajo do të ndodh këtë vit?

Matthew Palmer: Në këtë moment jam më i interesuar që palët të ulen përsëri në tryezën e bisedimeve, të rifillojnë dialogun, të përparojnë hap pas hapi drejt një marrëveshjeje. Nuk mendojmë se vendosja e një kufiri artificial kohor do të ndihmonte arritjen e një marrëveshjeje apo të lehtësonte procesin. Por duam që palët të rifillojnë negociatat sa më shpejt që të jetë e mundur dhe urgjentisht.

Zëri i Amerikës: Presidenti Vuçiç foli në parlament për një kompromis për çështjen e Kosovës dhe paralajmëroi se mund të ketë sulme nga shqiptarët nëse nuk arrihet një kompromis. A e shikoni këtë si një sinjal se ai është më i gatshëm të arrijë një kompromis nga sa ç’ka qenë më parë?

Matthew Palmer: Mendoj se presidenti Vuçiç e ka bërë të qartë se është i përgatitur të kthehet tek negociatat kur tarifat të hiqen dhe të punojë me Kosovën drejt një marrëveshjeje për normalizimin e plotë të marrëdhënieve. Ne besojmë se ai është i sinqertë për këtë, ne besojmë se pala e Kosovës është gjithashtu e sinqertë në dëshirën për të siguruar marrëveshje për normalizimin e plotë të marrëdhënieve. Por këto janë çështje të ndërlikuara. Ato janë të ndërlikuara politikisht, emocionalisht dhe psikologjikisht. Pra do të duhet kohë për t’i zgjidhur. Hapi i parë sigurisht është që palët të ulen përsëri në bisedime për negociata dhe të ecin në drejtimin e duhur.

Zëri i Amerikës: Përse besoni se Vuçiç do ta arrijë këtë. Ai ka qenë në pushtet për shtatë vjet dhe asgjë s’ka ndryshuar?

Matthew Palmer: Ne besojmë se presidenti Vuçiç është i vendosur për një të ardhme evropiane për Serbinë dhe besoj se ka një kuptim të qartë tek të gjithë që janë të përfshirë në këtë proces se e ardhmja evropiane si për Serbinë edhe për Kosovën, do të kërkonte një marrëveshje për normalizimin e marrëdhënieve. Pra shpresa jonë është që palët të takohen, të negociojnë, të arrijnë marrëveshje, ta zbatojnë atë dhe të hapin një rrugë të qartë evropiane si për Serbinë ashtu edhe për Kosovën.

Zëri i Amerikës: Beogradi nuk do të kthehet në tryezën e bisedimeve para se Prishtina të heq tarifat. Prishtina e refuzon një gjë të tillë edhe pse Shtetet e Bashkuara dhe BE-ja kanë bërë thirrje disa herë për ta bërë një gjë të tillë. Edhe ju e keni kërkuar këtë. Presidenti Vuçiç tha javën e kaluar se Prishtina do të heq tarifat kur “mentorët e saj perëndimorë të vendosin një gjë të tillë”. Cili është komenti juaj?

Matthew Palmer: Mendoj se është shumë e rëndësishme që Serbia, udhëheqja politike në Beograd të pranojë se Kosova ka agjenci të pavarura. Kosova nuk është thjesht një instrument i Shteteve të Bashkuara. Kosova është një vend i pavarur, një shoqëri e pavarur që ka politikat e veta dhe këto politika duhet të zbatohen. Çështja e negociatave, çështja e tarifave është çështje e ngarkuar politikisht në kontekstin e politikës në Kosovë. Ne do të mbështesnim pezullimin apo heqjen e tarifave si një mjet për t’u kthyer në dialog. Ne mendojmë se ky do të ishte një hap i rëndësishëm përpara. Por gjithashtu mendojmë se është e rëndësishme që vetë palët të gjejnë një rrugë për të manovruar sfidat në të dyja anët për t’u kthyer në tryezën e bisedimeve, për të gjetur një rrugë përpara për të arritur një zgjidhje të negociuar.

Zëri i Amerikës: Pra ju thoni se Uashingtoni nuk mund të bëjë asgjë për të inkurajuar Prishtinën për të pezulluar tarifat?

Matthew Palmer: Jo, nuk është ajo që po them. Mendoj se ka gjëra që mund të bëjmë për të mbështetur dhe lehtësuar përparimin që përfshin inkurajimin e partnerëve tanë në Kosovë të mendojnë thellë dhe me kujdes nëse tarifat në fakt avancojnë interesat e Kosovës. Ne besojmë se interesat e Kosovës shërbehen më mirë me arritjen e një marrëveshje gjithëpërfshirëse me Beogradin dhe për të arritur atë marrëveshje, ata duhet të kthehen tek dialogu dhe për të arritur tek dialogu, është e rëndësishme që tarifat të eliminohen si një pengesë për përparim.

Zëri i Amerikës: Kur do të ndodh kjo?

Matthew Palmer: Nuk mund t’u japë një datë për këtë por shpresoj që të ndodh sa më shpejt që të jetë e mundur.

Zëri i Amerikës: Do të ndodh këtë vit? A mendoni se dialogu mund të vazhdojë këtë vit?

Matthew Palmer: Po, mendoj se është absolutisht e mundur.

Zëri i Amerikës: Nëse flasim për modelin e zgjidhjes, duket sikur Gjermania dhe Franca e hoqën nga tryeza idenë e shkëmbimit të territoreve, pas samitit në Berlin.

Matthew Palmer: Ne mendojmë se është e rëndësishme që vetë palët të vendosin parametrat e marrëveshjes. Ajo çfarë ne do të dëshironim të shikonim është një marrëveshje me autorësi lokale, një marrëveshje të qëndrueshme, një marrëveshje të drejtë, një marrëveshje të zbatueshme dhe që mund të pranohet nga publiku i të dyja palëve, që mund të zbatohet drejt dhe plotësisht, dhe një marrëveshje që mund të çelë rrugëtimin drejt të ardhmes evropiane.

Zëri i Amerikës: A do të thotë kjo se SHBA-ja nuk e ka hequr nga tavolina idenë e shkëmbimit të territoreve? Pra, në kundërshtim me Gjermaninë dhe Francën?

Mattthew Palmer: Ne nuk po vendosim vija të kuqe në procesin e negocimit, për gjëra që palët nuk duhet të diskutojnë. Është në dorën e vetë palëve që të gjejnë rrugën për të lëvizur përpara, me mbështetjen tonë. Por, kjo gjithashtu nuk është një “çek i bardhë”. Do të dëshironim t’i shohim palët të negociojnë marrëveshjen më të mirë të mundshme; të na e paraqesin, nëse do të kërkojnë mbështetjen tonë. Nëse do të kemi shqetësime, do t’i shprehim ato dhe do të përpiqemi të gjejmë zgjidhjen me palët për të arritur diçka që mund ta mbështesim dhe me të cilën mund të punojmë për zbatimin e saj. Por, ky nuk është procesi ynë. Ky është procesi i tyre. Ne i mbështesim.

Zëri i Amerikës: Çfarë prisni se do të ndodh në Paris?

Matthew Palmer: Nuk kam ndonjë pritshmëri specifike për atë takim

Zëri i Amerikës: A keni biseduar me partnerët francezë dhe gjermanë

Matthew Palmer: Absolutisht. Mendoj se synimi i takimeve, në Berlin në prill dhe në Paris në korrik, të ndihmojnë të krijojnë kushte që do të lejonte palët të ktheheshin në negociata përmes procesit të udhëhequr nga BE-ja që ka sjell marrëveshjen e Brukselit dhe ka prodhuar disa lëvizje përparuese për një marrëveshje gjithëpërfshirëse.

Zëri i Amerikës: A do të marrin Shtetet e Bashkuara një rol më të rëndësishëm apo më të dukshëm në dialog tani që Komisioni Evropian po ristrukturohet?

Matthew Palmer: Ne kemi qenë partnerë me Evropën për këtë proces, e kemi mbështetur këtë proces dhe BE-ja e ka udhëhequr këtë proces. Nuk shoh ndonjë arsye specifike përse kjo duhet të ndryshojë në këtë moment.

Zëri i Amerikës: Shumë palë kanë bërë thirrje për një angazhim më të madh të Shteteve të Bashkuara

Matthew Palmer: Në se do të ketë një rol për ne, që të jetë konstruktiv dhe mbështetës për këtë proces, një rol që partnerët evropianë dhe vetë palët do të donin që ne të luanim, ne jemi të hapur për çdo gjë që mund të bëjmë në mbështetje të këtij procesi.

Departamenti amerikan i Shtetit njofton se tani kërkon nga aplikantët për vizë të japin hollësi për llogaritë në median sociale, si dhe adresën e emailit dhe numrin e telefonit.

Rregulloret e reja për ata që kërkojnë vizë amerikane si vizitorë apo si aplikantë për të emigruar në Amerikë përfshijnë emrin e llogarisë së aplikantit në median sociale, të gjitha adresat e emailit dhe të gjithë numrat e telefonit që ka përdorur aplikanti gjatë pesë vjetëve të fundit.

Zyrtarët thonë se afro 15 milionë shtetas të huaj do të preken nga kjo kërkesë. Vetëm aplikantët për viza diplomatike dhe zyrtare do të përjashtohen nga këto kërkesa.

Aplikantët do të pyeten edhe nëse ndonjë prej të afërmve të tyre ka qenë i përfshirë në aktivitet terrorist. za

Dwayne Craddock është identifikuar si personi i dyshuar për vrasjen e 12 personave të premten në një ndërtesë të komunës në Virxhinia Beach. Ai punonte prej kohësh si një punonjës i shërbimeve publike.

Në një konferencë për shtyp të shtunën shefi i policisë James Cervera tha se personi i armatosur, ishte një punëtor i pakënaqur. Ai u vra nga policia pas një shkëmbimi zjarri për një kohë të gjatë siç tha zoti Cervera. Por shefi i policisë tha se ende nuk është përcaktuar një motiv mbi ngjarjen.

Gjatë konferencës për shtyp autoritetet u përqëndruan tek viktimat, duke përmendur emrin e secilit prej tyre, shoqëruar me fotografitë dhe informacion biografik.

Shefi administrativ i qytetit Dave Hansen tha se të gjithë ishin punonjës të administratës lokale të Virginia Beach përveç njërit prej tyre që ishte kontraktor. Zoti Hansen tha se ai kishte punuar prej vitesh me shumë prej tyre duke shtuar se ata do të “lënë një zbrazëti që kurrë nuk do të mbushet”.

Shefi i policisë James Cervera tha të premten se personi i armatosur “nisi të qëllojë ndaj të gjithëve pa dallim” menjëherë sapo hyri në ndërtesën komunale, pak pas orës 4 pasdite.

Sipas zyrtarëve katër persona të tjerë u plagosën si pasojë e të shtënave.

Dëshmitarët thonë se të shtënat ndodhën në ndërtesën e dytë të kompleksit komunal të Virginia Beach, ku ndodhen zyrat e personelit përgjegjës për punimet publike të qytetit, shërbimet publike dhe departamentet e planifikimit.

Zoti Cervera tha se mes atyre që u goditën me armë zjarri ishte edhe një oficer policie, por ai arriti të shpëtojë falë veshjes antiplumb. Shefi i policisë tha se oficerët ia dolën të pengojnë përpjekjet e të dyshuarin që të vriste persona të tjerë.

Ai tha se hetuesit besojnë se i dyshuari kishte vepruar i vetëm. Ai përdori një pistoletë të kalibrit 45mm me silenciator si dhe karikatorë të modifikuar që mbajnë më shumë plumba.

Në konferencën për shtyp të mbajtur menjëherë pas ngjarjes kryebashkiaku Bobby Dyer tha se “kjo ishte një nga ditët më të rënda në historinë e Virginia Beach. Personat e përfshirë janë miqtë tanë, bashkëpunëtorët, fqinjët, kolegët tanë”, tha ai.

Shtëpia e Bardhë njoftoi se Presidenti Donald Trump ishte informuar mbi ngjarjen dhe po monitoronte situatën.

Guvernatori i Virxhinias Ralph Northam udhëtoi për në Virginia Beach të premten dhe tha se kishte ofruar mbështetjen e plotë të shtetit.

“Kjo është dhunë e paimagjinueshme dhe e pakuptimtë,” tha ai në një deklaratë.

Senatori amerikan i Virxhinias Mark Warner tha të premten se “ndihej i tmerruar nga ajo që kishte ndodhur në Virginia Beach“.

Senatori tjetër i Virxhinias Tim Kaine, shkruante në twitter se “ai është pranë të gjithë atyre që kanë humbur njeriun e dashur gjatë këtij sulmi”. Ai shkruante se po lutet për një shërim të shpejtë për të gjithë të plagosurit.

Këto vrasje ishin më të fundit të një serie incidentesh në rritje në SHBA që përfshijnë të shtëna masive. Në nëntorin e vitit të kaluar një person i armatosur vrau 12 vetë në një bar në Thousand Oaks të Kalifornisë përpara se të vriste veten. Gjatë këtij sulmi u vra edhe një polic.

Një zyrtar i lartë i Departamentit të Shtetit tha se Shtetet e Bashkuara e mbështesin fort hyrjen e Maqedonisë së Veriut në NATO, si anëtare e 30 e saj.

I pyetur nga Zëri i Amerikës, ai tha se shpreson që ratifikimet nga vendet anëtare të përfundojnë në vjeshtë të këtij viti.

Zyrtari tha se SHBA janë gjithashtu mbështetëse e fuqishme e rrugës së Maqedonisë së Veriut për anëtarësim në Bashkimin Evropian.

Ai tha se ndihma e SHBA është e drejtuar në mbështetje të reformave të nevojshme për këto përpjekje dhe se zyrtarët amerikanë mbajnë kontakt të ngushtë me vendet anëtare të Bashkimit Evropian.

Për shembull, Gjermania, tha ai, është një vend me të cilin ne flasim, për të nënvizuar besimin tonë se të dhënat pozitive të pasqyruara në raportin e fundit të Komisionit (për Zgjerimin) do të merren në konsideratë të plotë, ndërsa fillojnë të planifikojnë hapat e ardhshëm për Maqedoninë e Veriut dhe Shqipërinë si dhe për vendet e tjera të Ballkanit Perëndimor që synojnë anëtarësimin në BE.

Këshilltari Special, Robert Mueller, ka thënë se akuzimi i presidentit të Shteteve të Bashkuara, Donald Trump për ndonjë krim, nuk ka ekzistuar si mundësi, bazuar në rregulloren e Departamentit amerikan të Drejtësisë.

Sipas tij, do të ishte e padrejtë që dikush potencialisht të akuzohej për krim kur nuk do të kishte mundësi që rasti të paraqitej në gjykatë.

Mueller ka thënë po ashtu se edhe nëse dëshmon para Kongresit amerikan për hetimet e tij, ai nuk do të ofrojë ndonjë informacion që nuk gjendet në raport.

Për dy vjet, Mueller dhe ekipi i tij kanë hetuar nëse ka pasur bashkëpunim në mes të fushatës zgjedhore të presidentit Trump dhe Rusisë.

Në një përmbledhje të redaktuar, Prokurori i Përgjithshëm, William Barr ka thënë se Mueller nuk ka gjetur se ka prova të mjaftueshme që Trump ka bashkëpunuar me Rusinë, pavarësisht pse janë vërtetuar përfundimet e agjencive amerikane të Inteligjencës, se Rusia ka ndërhyrë në zgjedhjet e vitit 2016.

Këto janë komentet e para publike të prokurorit të posaçëm rreth hetimit që zgjati 22 muaj.

Deklarata e zotit Mueller vjen pas një shkrimi të publikuar në gazetën The Guardian e cila i referohet një libri të ri me autor Michael Wolff ku pretendohet se Prokurori i Posaçëm kishte përgatitur një padi me tri akuza kundër zotit Trump, përpara se të vendoste t’i hiqte ato.

Zëdhënësi i Prokurorit të Posaçëm Peter Carr i tha gazetës The Guardian se “dokumentet për të cilat ajo flet nuk ekzistojnë”.

Zoti Mueller e përfundoi hetimin e tij rreth nderhyrjes së Rusisë në zgjedhje në fund të muajit mars duke dalë në përfundimin se nuk gjeti prova për një marrëveshje të fshehtë mes zyrtarëve të fushatës presidenciale të zotit Donald Trump dhe Moskës. Megjithatë ai nuk doli në një përfundim lidhur me pyetjen nëse Presidenti Trump pengoi drejtësinë në një përpjekje për të penguar hetimin ndaj Rusisë.

Në një koment të mëparshëm përpara anëtarëve të Kongresit, Prokurori i Përgjithshëm William Barr tha se ai nuk kishte gjetur prova se zoti Trump të kishte penguar drejtësinë.

Demokratët e Kongresit e kanë akuzuar zotin Barr për keqinterpretim të konkluzioneve të raportit Mueller dhe kanë kërkuar që vetë Prokurori i Posaçëm të dëshmojë përpara Kongresit.

Si zoti Trump ashtu edhe zoti Barr kanë thënë se nuk kanë asnjë kundërshtim që zoti Mueller të dëshmojë, por vetë zoti Mueller nuk ka thënë nëse do të dëshmojë apo jo. za, rel

Senatori republikan me peshë, Lindsey Graham, parashikon se nëse demokratët në Dhomën e Përfaqësuesve përpiqen të hapin procesin për të shkarkuar Presidentin Trump, presidenti do të fitojë zgjedhjet presidenciale vitin e ardhshëm dhe republikanët do të fitojnë kontrollin e të dyja dhomave të Kongresit.

Senatori Graham, aleat i presidentit Trump tha të dielën në emisionin Fox News Sunday se nëse Kryetarja e Dhomës së Përfaqësuesve, Nancy Pelosi lejon hapjen e procesit që mund të çojë në shkarkimin e presidentit, do të ishte “vetëvrasje për partinë e saj, Demokraten”.

Rreth 35 demokratë dhe një republikan i vetëm në Dhomën e Përfaqësuesve me 435 anëtarë janë shprehur pro procesit për shkarkimin e presidentit, një proces që funksionon si çështje gjyqësore, por zhvillohet nga Kongresi për të arritur në përfundimin nëse presidenti ka penguar drejtësinë duke u përpjekur të kufizojë hetimet e Prokurorit të Posaçëm, Robert Mueller.

Edhe nëse Dhoma e Përfaqësuesve e kontrolluar nga demokratët voton për të hapur procesin, Senati që kontrollohet nga republikanët nuk ka gjasa që të votojë për të larguar Presidentin Trump nga posti. za

Presidenti Donald Trump dhe këshilltari i tij për Sigurinë Kombëtare John Bolton duket se kanë pikëpamje të ndryshme lidhur me nivelin e rrezikut që paraqet Koreja e Veriut.

Në një postim në tweeter në dielën nga Tokio, zoti Trump i dha një përgjigje zotit Bolton pas komenteve të tij të shtunën se nuk kishte “asnjë dyshim” se prova e kohëve të fundit e Phenianit me raketë balistike me rreze të shkurtër veprimi, shkelte një rezolutë të Kombeve të Bashkuara.

“Koreja e Veriut lëshoi disa armative të vogla që shqetësuan disa nga njerëzit e mi e të tjerë, por jo mua” shkruante zoti Trump.

Presidenti e bëri komentin e tij pak para se të luante golf me kryeministrin japonez Abe. Më vonë ata ndoqën nga afër një ndeshje sumo dhe zoti Trump i dorëzoi kupën e Presidentit fituesit të garës.

Të hënën Presidenti Trump pritet të takohet me perandorin Naruhito. Ai do të zhvillojë dhe një takim zyrtar me zotin Abe si dhe do të marrë pjesë në një darkë shtetërore. za

Kompania “Shell Upstream Albania” tha se testimet e para në pusin “Shpirag-4” në afërsi të Beratit, konfirmojnë potencialin e prurjeve të një zbulimi të rëndësishëm nafte të lehtë. Sipas Kompanisë potenciali është prej disa mijëra fuçive nafte në ditë. Kompania tha se “zbulimi i Shpiragut për Shell është i pari në tokë në një brez tektonik të rrudhosur dhe të mbivendosur në Shqipëri”.

“Ne jemi të gjithë të kënaqur që këto testime të para kanë konfirmuar potencialin e këtij zbulimi dhe presim të rrisim biznesin tonë në Shqipëri” , tha Marc Gerrits, Zëvendës Presidenti Ekzekutiv i Kompanisë “Shell” për Eksplorimin.”

Hapi i testimit vlerësues në pusin Shpirag-4 pason një marrëveshje që qeveria shqiptare dhe Kompania Shell nënshruar shkurtin e vitit 2018 për zgjerimin e kërkimeve për naftë në këtë zonë. “Shell” kishte kryer më parë shpime pusesh të tjerë vlerësues brenda blloqeve 2 dhe 3 me pritshmëri për rezerva nafte.

Sipas kompanisë Volumi komercial i rikuperueshëm i naftës nga Shpiragu do të përcaktohet më tej, përmes aktivitetesh të tjera vlerësuese. Vendburimi i Shpiragut në afërsi të Beratit u konfirmua në vitin 2013 nga vlerësimi në pusin “Shpirag-2” i cili dëshmoi rezerva nafte të lehtë.

Ndërkohë Kompania “Shell Upstream Albania” njoftoi fundvitin e shkuar edhe një program vrojtimi sizmik për kërkime hidrokarburesh në zonën jugore të Shqipërisë në kufi me Greqinë. Programi, në kuadër të Bllokut 4 përfshin një mjedis të pasur me vlera të trashëgimisë natyrore dhe kulturore të Shqipërisë që shtrihen në Qarkun e Gjirokastrës dhe ngjalli ndjeshmërinë e banorëve të këtyre zonave.

Kompania publikoi Vlerësimin e Ndikimit në Mjedis, ndikimin social dhe në shëndet duke njoftuar edhe dëgjesat e para me komunitetet vendore. Pas reagimit të banorëve kompania tha se nuk do të kryente shpime në zonë e mbrojtur të Parkut Kombëtar Natyror të Zagorisë.

Kryetarja e Dhomës së Përfaqësuesve, Nancy Pelosi, tha sot se Presidenti Donald Trump dëshiron që ligjvënësit e opozitës demokrate të hapin procedurën e shkarkimit të tij nëpërmjet hetimit të akuzave. Megjithatë, ajo shtoi se çështja nuk ka marrë ende formën e duhur për të nisur zyrtarisht procesin.

Ajo tha se disa hetime që vazhdojnë të kryhen nga Dhoma e Përfaqësuesve e kontrolluar nga demokratët “mund të na çojë drejt nisjes së procedurave për shkarkimin”, por se për momentin “nuk kemi mbërritur ende në atë pikë”. Dhjetëra ligjvënës demokratë dhe një republikan, nga totali i 435 ligjvënësve të Dhomës së Përfaqësuesve, kanë bërë thirrje për fillimin e ngritjes së akuzave për shkarkimin e Presidentit. Sidoqoftë, edhe në rast se Dhoma e Përfaqësuesve e ndërmerr këtë hap, nuk ka gjasa që Senati i kontrolluar nga republikanët të shkarkojë Presidentin Trump.

Zonja Pelosi tha megjithatë se kjo “është çfarë ai (Presidenti Trump) dëshiron që ne të bëjmë”.

Ajo tha se demokratët “do të ndjekin faktet” në mbledhjen e informacionit për veprimet financiare të zotit Trump, të presidencës së tij 28-muajshe dhe për konkluzionet e hetimit të Prokurorit të Posaçëm Robert Mueller për ndërhyrjen e Rusisë në zgjedhjet presidenciale amerikane të vitit 2016, si dhe nëse Presidenti Trump u mundua ta pengojë këtë hetim.

Zonja Pelosi tha se ajo i do të mirën Presidentit Trump, por se mendon që zyrtarët e administratës dhe të afërmit e tij duhet të “ndërhyjnë” tek ai, për të mirën e vendit.

Ky prononcim i zonjës Pelosi rreth lëvizjeve të mundshme për ngritje akuzash me qëllim shkarkimin e Presidentit Trump, u bë vetëm pak orë pasi Presidenti sulmoi sërish ligjvënësit demokratë, duke u shprehur se ata janë “partia e arritjes së asgjëje!”.

“Gjithçka që ata janë mprehur të bëjnë, gjashtë komisione, është shpërdorim kohe, ditë pas dite, në përpjekje për të gjetur çfarëdolloj gjëje që mund të dukej e keqe për mua”, shkruajti në Twitter, Presidenti Trump, ditën pasi braktisi bisedimet në Shtëpinë e Bardhë me zonjën Pelosi dhe udhëheqësin e demokratëve në Senat, Chuck Schumer, për shpenzimet për infrastrukturën. Presidenti Trump ishte i revoltuar nga pretendimi i zonjës Pelosi se ai ishte “angazhuar në një mbulim të së vërtetës”, koment të cilin ajo e përsëriti të enjten. Presidenti u shpreh se nuk do të fliste për aspekte të politikave me udhëheqësit demokratë për sa kohë që ata vazhdojnë me hetimet. za

Kryetari i Komisionit Juridik të Dhomës së Përfaqësuesve, Jerrold Nadler ka kërkuar që komisioni të votojë për ta shpallur fajtor ish-këshilltarin ligjor të Shtëpisë së Bardhë, Don McGahn për mosbindje ndaj Kongresit pasi ai nuk u paraqit për të dëshmuar të martën.

Zoti Nadler nuk e anuloi seancën, po mbajti një formë të shkurtuar të saj me karrigen ku do ulej zoto McGahn të zbrazët. Ai tha se komisioni është “i përgatitur të përdorë të gjitha mekanizmat e detyrimit që ka në dispozicion”, ndaj ish-këshilltarit ligjor.

Në një letër dërguar zotit McGahn të hënën, zoti Nadler shprehte kundërshtimin ndaj një urdhri të Shtëpisë së Bardhë që udhëzonte zotin McGahn të mos dëshmonte dhe ndaj një opinioni ligjor të Departamentit të Drejtësisë, sipas së cilit Kongresi nuk mund ta detyrojë atë të paraqitet.

“Komisioni e ka bërë të qartë që ju përballeni me pasoja serioze nëse nuk shfaqeni nesër”, shkruante zoti Nadler.

Ai tha se Presidenti Donald Trump po përpiqej të “bllokonte një ish-zyrtar të informonte një degë të barazvlefshme të qeverisë lidhur me shkeljet e tij”.

Demokratët duan të dëgjojnë dëshminë e zotit McGahn dhe t’i bëjnë pyetje për pengimin e mundshëm të drejtësisë nga Presidenti Trump, lidhur me ndërhyrjen e Rusië në zgjedhjet e vitit 2016 dhe raportin e Prokurorit të Posaçëm, Robert Mueller lidhur me këtë çështje.

Presidenti amerikan Donald Trump duket se po shfaq shqetësimin e tij lidhur me një rival të mundshëm që mund ta pengojë atë në rimarrjen e një mandati të dytë për Shtëpinë e Bardhë.

Presidenti Trump iu drejtua mbështetësve mbrëmë në shtetin e Pensilvanisë, vendlindja e kandidatit që kryeson fushatën demokrate, ish nënpresidentit Joe Biden, i cili gjithashtu ka shërbyer si Senator i shtetit Delauere.

“Mos harroni, Biden ju braktisi. Ai lindi në Pensilvani dhe u largua nga këtu. Ju la ju për një shtet tjetër. Mbani mend këtë, desha të them se ai shprehet sikur e njeh qytetin Skranton (Scranton)…thotë se i njeh vendet më mirë. Ju braktisi ju për një shtet tjetër dhe nuk u kujdes për ju sepse nuk u kujdes për punësimin tuaj. Ai la vendet e tjera të vijnë dhe të plaçkisin Amerikën.”

Zoti Trump dhe kandidati Biden e kanë vënë Pensilvaninë në qendër të përpjekjeve të tyre për të fituar zgjedhjet presidenciale të vitit 2020.

Zoti Biden ka thënë se nëse “populli amerikan dëshiron një president që të thellojë ndasitë tona, të udhëheqë me një grusht të fuqishëm, dorë shtrënguar dhe me zemër të ngurtë”, ata mund të votojnë për Trumpin.

Zyrtarët e emigracionit thonë se kanë nisur të dërgojnë me qindra emigrantë nga Teksasi drejt San Diegos ku do të shqyrtohen kërkesat e tyre për azil.

Autoritetet e imigracionit thonë se do të kryhen tre fluturime në javë, me të paktën 130 persona në bord.

Sipas njoftimeve në shtyp, agjencitë e emigracionit po analizojnë gjithashtu mundësinë e dërgimin të emigrantëve, të cilët nuk kanë kaluar ende në proces shqyrtimi, në qytete të tjera anembanë vendit.

Kjo praktikë e çuarjes së individëve dhe familjeve të tyre që nuk janë shqyrtuar ende, konsiderohet një lëvizje e jashtëzakonshme për zyrtarët e emigracionit, sidomos pas incidenteve të fundit, ku fëmijët e emigrantëve u ndanë nga familjet e tyre në kufi dhe zyrtarët e emigracionit hasën në vështirësi për ribashkimin e tyre.

Nuk dihet ende se çfarë masash mbrojtëse janë marrë për lëvizjen me mjete ajrore të emigrantëve, të cilët nuk kanë kaluar ende në proces shqyrtimi.

Zyrtarët amerikane të Doganave dhe Mbrojtjes së Kufijve kanë qenë të mbingarkuar me një numër të madh emigrantësh që kërkojnë azil në SHBA.

Presidenti i Shteteve të Bashkuara Donald Trump shpalli planin e tij të emigracionit që përfshin ndalimin e sistemit të Vizave për Diversifikimin e Emigracionit, e njohur ndryshe si llotaria amerikane. Plani ul në mënyrë drastike numrin e vizave të emigrimit që u jepen familjarëve, si dhe zhvendos emigracionin drejt një sistemi të bazuar tek meritat. Siç njofton korrespondentja në Shtëpinë e Bardhë e Zërit të Amerikës, demokratët e kanë refuzuar këtë plan, pasi nuk trajton çështjen e 700 mijë të mbiquajturve “ëndërrimtarë”, individë të sjellë ilegalisht në moshë të mitur në Shtetet e Bashkuara.

Sipas të dhënave të Bordit Kombëtar të Shkencës, 30% e punonjësve me arsim të lartë në sektorët amerikanë të inxhinierisë dhe shkencave kanë lindur jashtë Shteteve të Bashkuara.

Presidenti Donald Trump dëshiron të vijnë në Amerikë më shumë emigrantë të tillë me kualifikime të larta.

“Një sistem i ri emigracioni që mbron rrogat e amerikanëve, që promovon vlerat amerikane, dhe që tërheq më të mirët dhe më të shkëlqyerit nga mbarë bota”, tha Presidenti Trump.

Shtetet e Bashkuara miratojnë çdo vit 1.1 milionë viza për qëndrim të përhershëm, të mirënjohura ndryshe si kartat jeshile.

Shumica u jepen të afërmve të shtetasve amerikanë, dhe një pjesë e vogël jepet për shkak të aftësive dhe veçorive profesionale.

Presidenti Trump dëshiron të ulë numrin e vizave që jepen për të afërmit dhe të rrisë numrin e vizave që ai i quan “të bazuara tek meritat”.

Gjithashtu, Presidenti dëshiron të përgjysmojë numrin e vizave që jepen për arsye humanitare, si p.sh. për azilkërkuesit dhe refugjatët. Mbi të gjitha, Presidenti Trump dëshiron t’i japë fund llotarisë amerikane.

“Përzgjedhja e rastësishme është kundër vlerave amerikane”, tha Presidenti Trump.

Presidenti e emërton propozimin e ri “Viza për të Ndërtuar Amerikën”. Plani bazohet tek një sistem pikësh, tek mosha, njohuritë e gjuhës angleze, arsimi, ofertat për punësim apo premtimi për të investuar, si dhe kërkon kalimin me sukses të një testimi për historinë amerikane dhe qeverisjen.

Demokratët e refuzuan planin e Presidentit të bazuar tek meritat.

“A po thuhet që familja nuk ka merita? A po thonë se shumica e njerëzve që kanë ardhur historikisht në Shtetet e Bashkuara nuk kanë merita pasi nuk kanë një diplomë inxhinierie?”, tha Nancy Pelosi, Kryetare e Dhomës së Përfaqësuesve.

Gjithashtu, demokratët nuk e pranojnë propozimin e ri pasi nuk trajton çështjen e 700 mijë “ëndërrimtarëve”, persona të sjellë ilegalisht në moshë të mitur në SHBA, si dhe të miliona emigrantëve pa dokumenta që gjendet tashmë në Shtetet e Bashkaura.

“Nuk ka shanse të miratohet me ligj. Ai (Presidenti Trump) e pranoi vetë këtë gjë duke thënë në fund të fjalimit të tij se nëse nuk miratohet nga Kongresi i tanishëm, atëherë do të miratohet kur të zgjidhet sërish Presidenti dhe të krijohet Dhoma e re e Përfaqësuesve. Mendoj se i pamë dy vite të këtij Presidenti dhe të Kongresi me shumicë republikane, periudhë gjatë së cilës ai nuk arriti dot asgjë për emigracionin. Prandaj, nuk mendoj se ky propozim ka ndonjë shans”, thotë David Bier, analist i politikave të emigracionit në Insitutitin Cato.

Propozimi gjithashtu nuk i jep zgjidhje aspektit të numrit të ulët të punëtorëve për profesione që nuk kërkojnë kualifikime të larta.

“Ka sektorë të ekonomisë që ankohen se nuk gjejnë punëtorë dhe kanë nevojë për emigrantë, si p.sh. ndërtimi, bujqësia apo industria e mishit. Ka shumë kërkesë në këto fusha. Një sistem emigracioni për individë me kualifikime të larta, megjithëse është i rëndësishëm, nuk jep zgjidhje për nevojat tona për punëtorë pa kualifikime të larta”, thotë Rick Su, profesor për legjislacionin e emigracionit në Universitetin Buffalo.

Presidenti Trump këmbëngul gjithashtu për ndërtimin e një muri në kufi, duke krijuar për këtë qëllim një fond me tarifa të mbledhura nga personat që kalojnë kufirin.