Vajza e presidentit të 40-të të Shteteve të Bahskuara, Ronald Reagan, ka kërkuar falje për disa qëndrime raciste të babait të saj. Patti Davis tha në një opinion të sajin të publikuar të enjten në gazetën Uashington Post se nuk e kishte menduar kurrë që do të dëgjonte një inçizim, ku babai i saj i përshkruante si majmunë delegatët me ngjyrë në Kombet e Bashkuara, thjesht sepse vota e tyre i kishte zemëruar.

Vendimi i anëtarëve të delegacionit të Tanzanisë për të votuar pro njohjes së Republikës Popullore të Kinës në vitin 1971, e kishte zemëruar guvernatorin e Kalifornisë Ronald Reagan, i cili më vonë do të bëhej president.

Menjëherë pas votimit në Kombet e Bashkuara, zoti Reagan i telefonoi Presidentit të atëhershëm, Richard Nixon.

Në bisedë ai kishte fyer rëndë delegacionin e shtetit afrikan.

“Të shohësh ata, majmunët nga vendet afrikane, dreqi ta hajë, ata ende nuk dinë të mbathin këpucë”, kishte thënë guvernatori Reagan.

Biseda ishte regjistruar nga presidenti Nixon.

Incizimi audio shoqëronte një shkrim për të njëjtën temë të publikuar të mërkurën në faqen e internetit The Atlantic.

Kur pa artikullin, vajza e presidentit të 40-të të Shteteve të Bashkuara, nuk u besoi syve. Fillimisht ajo dyshonte se materialit i ishte shtrembëruar përmbajtja. Por ajo tha se mbeti e shtangur kur dëgjoi përmbajtjen.

Një ditë më pas, ajo reagoi për veprimin e të atit me një shkrim që botoi në gazetën Uashington Post, ku kërkonte falje publike.

“Nuk ka mbrojtje, as arsyetim ose sqarim për atë që babi im thotë në bisedën telefonike”, shkruan Davis.

“Fjalët që ai përdor në bisedën me presidentin Nixon, nuk mund të përshkruhen ndryshe veçse të shëmtuara”, shkruan ajo.

Isabela Çoçoli

Presidenti Donald Trump njoftoi se shefi i zbulimit kombëtar, Dan Coats, po jep dorëheqjen pas dy vjetësh në detyrë dhe përplasjeve të shpeshta politike me Shtëpinë e Bardhë.

Presidenti Trump njoftoi në Twitter se Dan Coats do të japë dorëheqjen më 15 gusht. Ai e falënderoi zotin Coats për “shërbimin e tij të çmuar për vendin” dhe tha se do të emërojë në vend të tij ligjvënësin republikan nga Teksasi John Ratcliffe, i njohur si mbështetës besnik i presidentit.

Presidenti Trump e përshkroi kongresmenin Ratcliffe si një ish prokuror mjaft të respektuar.

Dan Coats ka qenë Drejtor i zbulimit Kombëtar që nga marsi i vitit 2017. Ai shpesh nuk ka qenë dakord me zotin Trump për një numër çështjesh të zbulimit, duke përfshirë politikën amerikane ndaj Rusisë, programin e armëve bërthamore të Koresë së Veriut dhe çështjen nëse Irani ka shkelur marrëveshjen bërthamore të vitit 2015, nga e cila presidenti Trump më vonë u tërhoq.

Për shumë njerëz, trenat e dikurshëm me avull sjellin një ndjenjë kureshtjeje. Amerika për 175 vjet me radhë ka patur trena me qymyr duke filluar që nga vitet 1830. Ky lloj transporti luajti një rol vendimtar në revolucionin industrial dhe zgjerimin e Amerikës. Vizitorët sot mund të përjetojnë një udhëtim me sistemin e trenave më të vjetër amerikanë në një linjë prej 7 kilometrash në Ronks të shtetit Pensilvania.

Hekurudha Strasurg e vitit 1832 mban ende gjallë ndjesinë e së kaluarës. Steve Barrall është menaxher i stacionit të hekurudhës.

“Duam që njerëzit të përjetojnë trenat me avull të shekullit të kaluar, ashtu si kanë qënë në atë kohë.”

Disa lokomotiva me avull me vagonat prej druri të restauruar ofrojnë një udhëtim prej 45 minutash në fshat. Kjo hekurudhë e shkurtër në të kaluarën lidhte pasagjerët dhe mallrat me një hekurudhë më të madhe që bënte lidhjet me qytetet kryesore.

“Në atë kohë kjo ishte lidhja e Stasburgut me botën e jashtëme”, thotë Steve Barall.

Kjo kabinë e klasit të parë të kujton njerëzit që ishin në gjendjetë shpenzonin më shumë për një udhëtim më të rehatshëm. Robert është një nga vizitorët.

“Trenat janë pjesë e strukturës së këtij vendi dhe në fakt të shumë vendeve në mbarë botën. Është kënaqësi të kthehesh mbrapa e të shikosh se si fuksiononin trenat.”

“Ishte kënaqësi kthimi në të kaluarën dhe ritmi i ngadaltë”, thotë Carol.

“Është kënaqësi të udhëtosh në të shkuarën dhe të shijosh peisazhet”, thotë një tjetër vizitore.

Aty pranë gjendet Muzeumi i Hekurudhave të Pensilvanisë, një prej muzeumeve më të mëdha amerikane opr historinë e herkurudhave. Patrick Morrison është Drejtor i Muzeumit të Hekurudhave të Pensilvanisë.

“Kemi rreth 100 paisje pjesë përbërëse të hekurudhave që nga vagonat dhe lokomotivat. Por ruajmë edhe uniformat e punonjësve apo enët e kuzhinës.”

Ai thotë se lokomotivat gjigande me avull i joshin vizitorët sot si dikur në të kaluarën.

“Mjafton ideja e diçkaje të fuqishme që tërheq shumë vagona mallrash dhe pasagjerësh që të hopnotizojë shumë njerëz.”

Kjo duket qartë tek turistët në vagonin e trenit. Në “Motelin Red Caboose”, që duket nga treni i pasagjerëve, mysafirët mund të kenë shansin të shijojnë ndjesinë e shekullit të kaluar. Tyler Prickett është pronar i motelit.

“Turistët kanë shansin të shijojnë një natë sikur të ishte në muzeum. Ky është moteli më i madh i modelit të asaj kohe sipas Librit të Rekordeve Guinnes.”

Kjo mban gjallë edhe nostalgjinë e trenave të vjetër.

“Më pëlqen të sodis këto pamje nga treni”, thotë pasagjeri Richard Prindle.

Me një vendim 5 me 4, Gjykata e Lartë e Shteteve të Bashkuara vendosi në favor të Presidentit Donald Trump, duke i dhënë atij mundësinë të përdorë miliarda dollarë fonde të buxhetit federal për të realizuar premtimin e tij kryesor të fushatës, ndërtimin e një muri përgjatë kufirit me Meksikën.

Vendimi i së premtes rrëzon vendimin e një gjykate të një niveli më të ulët, që u la në fuqi nga gjykata e apelit, për ngrirjen e fondit të Departamentit të Mbrojtjes prej 2.5 miliardë dollarësh. Fondet ishin kërkuar nga administrata Trump për ndërtimin e murit në kufirin SHBA-Meksikë.

“Fitore e madhe për sigurinë kufitare dhe sundimin e ligjit”, tha Presidenti Trump në Twitter pas vendimit të Gjykatës së Lartë.

​Dror Ladin, jurist për sigurinë kombëtare në Unionin Amerikan për Liritë Civile, i tha agjencisë franceze të lajmeve AFP se“Komunitetet kufitare, mjedisi dhe ndarja e kompetencave e përcaktuar në Kushtetutën tonë do të dëmtohen përgjithmonë nëse zoti Trump lejohet të vazhdojë me plaçkitjen e fondeve ushtarake për një mur kufitar ksenofobik, ndërtimi i të cilit është kundërshtuar nga Kongresi.”

Presidenti Donald Trump tha të premten se Shtetet e Bashkuara do të vendosin shumë shpejt sanksione të mëdha ndaj Francën në “një akt reciprociteti”, nisur nga njoftimi i Parisit për vendosjen e një takse ndaj kompanive amerikane të teknologjisë.

“Nëse do të kishte një vend që mund t’i taksonte këto kompani, ky do të ishte vendi i tyre, SHBA-ja”, tha zoti Trump. “Do të njoftojmë së shpejti një masë të konsiderueshme reciproke lidhur me marrëzinë e zotit Macron“, shkruante më tej në një postim në twitter zoti Trump, duke iu referuar Presidentit francez Emmanuel Macron.

“Gjithmonë kam thënë se vera amerikane është më e mirë se vera franceze!”, shkruante ai.

Sipas një njoftimi të Shtëpisë së Bardhë, javën e kaluar zoti Trump i kishte shprehur zotit Macron shqetësimin e tij lidhur me taksën e propozuar mbi shërbimin dixhital.

Zëdhënësi i Shtëpisë së Bardhë Judd Deere tha se Uashingtoni “është jashtëzakonisht i zhgënjyer nga vendimi i Francës për të miratuar një taksë mbi shërbimet dixhitale, në kurriz të kompanive dhe punëtorëve amerikanë”.

Masa e njëanshme e Francës duket se synon kompanitë amerikane të inovacionit që ofrojnë shërbime në sektorë të veçantë të ekonomisë.

Presidenti Trump ka urdhëruar kryerjen e një hetimi mbi taksën e planifikuar. Muajin e kaluar zyra e përfaqësuesit amerikan për Tregtinë njoftoi se do të zhvillojë një seancë dëgjimore në 19 gusht lidhur me hetimin që po kryen. Situata mund të çojë në vendosjen e tarifave të reja apo kufizimeve të tjera tregtare nga ana e SHBA-së. za

Në një atmosferë politike thellësisht të përçarë, si demokratët dhe republikanët kishin shpresuar që dëshmia e prokurorit të posaçëm, Robert Mueller para dy komisioneve të Dhomës së Përfaqësuesve, do të ishte një pikë kthese për administratën e Presidentit Donald Trump. Mes një atmosfere që dukej si arenë cirku në Kongres, të dyja partitë vazhduan të flisnin me këmbëngulje lidhur me çështjen nëse duhet të fillojë apo jo procesi për shkarkimin e mundshëm të presidentit. Siç njofton korrespondentja e Zërit të Amerikës, Katherine Gypson debati lidhur me ndërhyrjen ruse në zgjedhjet e vitit 2016 nuk tregon shenja se do të ndalet.

Momenti i shumëpritur …

…Për këta të rinj që donin të ishin në sallë kur prokurori i posaçëm foli për herë të parë në publik, ia vlejti aq sa të flinin një natë më parë në korridoret e Kongresit.

Ata nuk ishin të vetmit në gjithë vendin që shpresonin që zoti Mueller do të mund të qartësonte debatin politik që ka përfshirë vendin.

Megjithëse si edhe herë të tjera, pati disa protestues, nuk ishte aspak një seancë e zakonshme për demokratët që kaluan natën, duke u përgatur për çdo lloj skenari. Rezultati?

“Mendoj se nuk ka diskutim se në këtë seancë pamë prova bindëse të pengimit të drejtësisë, kryer nga presidenti i Shteteve të Bashkuara në detaje të jashtëzakonshme nga prokurori i posaçëm”, tha anëtari demokrat i kongresit, David Cicilline.

Demokratët donin që detajet që u transmetuan drejtpërdrejt në gjithë vendin, të kontribuonin në argumentat pro hetimeve të zotit Trump dhe administratës së tij.

“Ai u përpoq të pengonte hetimin për pengimin e drejtësisë nga ana e tij. Pra presidenti na ka futur në një gjendje absurde, por tani këtë mund ta shohë gjithë vendi”, – tha Jamie Raskin, anëtar demokrat i Kongresit.

Por republikanët thonë se zoti Mueller, e keqësoi gjendjen.

“Mendoj se fakti që Robert Mueller nuk dukej se e zotëronte mirë raportin që mban emrin e tij, lë të kuptosh se nuk e kishte plotësisht të qartë se çfarë kishte në ato 448 faqe të raportit”, – tha anëtari republikan i Kongresit, Mark Meadows.

Ata akuzuan prokurorin e posaçëm se u ishte shmangur pyetjeve kyçe lidhur me pikënisjen e hetimit.

“Drejtori Mueller m’u duk i çorientuar, shpesh konfuz dhe shumë evaziv për pyetje elementare lidhur me aktivitetet e rusëve dhe ndërthurjen e interesave të tyre me njerëz të lidhur me demokratët dhe lëvizjen anti-Trump”.

Deri sot, mbi 90 demokratë të Dhomës së Përfaqësuesve kanë bërë thirrje për hapjen e procesit të shkarkimit. Një demokrate tha se dëshmia e zotit Mueller u dha votuesve informacion të nevojshëm.

“Nxjerr në pah shumë qëndrime presidenciale të papërshtatshme dhe në të kaluarën, gabimet presidenciale të një natyre penale kanë çuar në procesin e shkarkimit. Popullit amerikan do t’i duhet të vendosë nëse mund ta pranojë këtë lloj sjelljeje”, tha Mary Gay Scanlon.

Dëshmia e zotit Mueller është një pike kthese për ndërgjegjësimin e amerikanëve lidhur me krimet e zotit Trump, tha kryetarja e Dhomës së Përfaqësuesve, Nancy Pelosi. Por hapja e procesit të shkarkimit mund të bëhet vetëm pasi rastet e hapura në gjykata t’u japin demokratëve gjithë informacionin e duhur.

“Nëse vendosim për një gjë të tillë, do të donim që të ishte bashkuese jo përçarëse për vendin, dhe prandaj duam që argumentat të jenë bindëse”, tha ajo.

Dhe ndërsa kanë mbetur vetëm dy ditë në sesionin veror të kongresit, një nismë për shkarkim nuk do të ndërmerret së shpejti.

Në kryeqytetin e Puerto Rikos të mërkurën mbrëma shpërtheu gëzimi nëpër rrugë, menjëherë pasi guvernatori i Ricardo Rossello njoftoi dorëheqjen, pas disa ditë protestash masive në rrugët e kryeqytetit.

Në një fjalim në video të postuar në faqen e Facebookut të qeverisë, guvernatori njoftoi se do largohej nga posti më 2 gusht, duke thënë se arritjet e administratës së tij do të kërcënoheshin, nëse ai do të vazhdonte të qëndronte në post.

Ricardo Rossello është guvernatori i parë që heq dorë nga posti, që nga koha kur ky territor i Shteteve të Bashkuara filloi zgjedhjen e drejtpërdrejtë të guvernatorëve në vitin 1947. Vendin e tij do ta zerë sekretarja e drejtësisë Wanda Vazquez, i cila ishte në rendin e pasardhësve, pasi sekretari i shtetit Luis Rivera Marin dha dorëheqjen lidhur me një bisedë në internet që shkaktoi skandal dhe që përfundoi me fundin e mandatit të guvernatorit Rossello.

Mijëra njerëz që ishin mbledhur jashtë rezidencës së guvernatorit në qytetin e vjetër historik të San Juan filluan të festonin në mënyrë spontane pas përfundimit të fjalimit të guvernatorit Rossello, duke valëvitur flamuj dhe duke kënduar.

Lajmi gjithashtu u prit me entuziazëm nga kryetarja e Bashkisë së San Juanit, Carmen Yulin Cruz, e cila kishte njoftuar tashmë synimin e saj për të kandiduar kundër Rossellos vitin e ardhshëm.

[[ https://twitter.com/CarmenYulinCruz/status/1154239274289684481 ]]

Zemërimi publik që çoi në dorëheqjen e guvernatorit shpërtheu gati dy javë më parë, kur Qendra për Gazetari Investigative e ishullit publikoi rreth 900 faqe të zbardhura nga bisedat on line në grup midis zotit Rossello dhe disa ndihmësve të lartë dhe bashkëpunëtorëve që përfshinin mesazhe pa respekt dhe të mbushura me përbuzje për viktimat e Uraganit Maria të vitit 2017 , si dhe shaka homofobike kundër kundërshtarëve politikë të guvernatorit Rossello.

Publikimi i bisedave shkaktoi zemërim të madh në mesin e portorikanëve, të rraskapitur nga vitet e korrupsionit dhe keqmenaxhimit publik, që e lanë territorin e Shteteve të Bashkuara nën kontrollin e një bordi mbikëqyrës të mandatuar nga Kongresi, për ta udhëhequr atë të dalë nga një krizë borxhesh prej miliarda dollarësh.

Ricardo Rossello dha dorëheqjen si kreu i Partisë së Re Progresive gjatë një fjalimi televiziv të dielën dhe tha se ai nuk do të kërkonte të rizgjidhej.

Në një ditë dramatike në Uashington, ish-prokurori i posaçëm Robert Mueller filloi të mërkurën dëshminë e tij para Kongresit, lidhur me ndërhyrjen ruse në favor të Donald Trumpit dhe nëse presidenti më pas pengoi drejtësinë, duke u përpjekur të ndalte hetimin e prokurorit.

Në komentet e tij në fillim të seancës, zoti Mueller tha se hetimi arriti në përfundimin se qeveria ruse ndërhyri në zgjedhjet amerikane në mënyrë të gjerë dhe sistematike.

Zoti Mueller tha për një nga përfundimet më të rëndësishme dhe të debatueshme:

“Ne nuk e trajtuam bashkëpunimin me qëllim, që nuk është një term ligjor”. Mbështetur tek politikat dhe parimet e Departamentit të Drejtësisë për drejtësinë (e procesit), ne vendosëm që të mos japim një përcaktim, lidhur me faktin nëse presidenti kreu krim”, tha ai.

Zoti Mueller theksoi gjithashtu se dëshmia e tij do të ishte e kufizuar, pasi ajo mund të ndikonte në çështje që nuk janë përfundimtare dhe sepse Departamenti i Drejtësisë kishte përdorur provilegjin që të mos ta lejonte të fliste për disa tema.

Presidenti Trump kishte thënë se nuk kishte ndër mend ta shohë seancën pesë orëshe të zotit Mueller që do të transmetohet drejtpërdrejt në televizion, ose ndoshta vetëm pjesë të vogla të saj. Ai këmbëngul se seancat janë një humbje e jashtëzakonshme kohe dhe se është bërë e qartë se ai nuk ka bashkëpunuar në mënyrë të qëllimshme me rusët, dhe nuk ka ndërhyrë me hetimin e zotit Mueller.

Por miliona amerikanë që nuk e kanë lexuar raportin prej 448 faqesh të prokurorit të posaçëm, pritet t’i shohin seancat para komisioneve juridik dhe të zbulimit të Dhomës së Përfaqësuesve, që pritet të jenë të nxehta dhe interesante.

Seancat janë kritike për 235 demokratët e opozitës në Dhomën e Përfaqësuesve, një e treta prej të cilëve kanë bërë thirrje për fillimin e një procesi shkarkimi ose një hetimi për shkarkim për presidentin Trump.

Aleatët e Presidentit Trump në Kongres thonë se zoti Mueller nuk gjeti asgjë inkriminuese për zotin Trump dhe se kjo çështje duhet mbyllur. Por ata e kanë bërë gjithashtu të qartë se kanë ndër mend ta pyesin zotin Mueller për një hetim që ata thonë se është defektoz dhe me fillesa të dyshimta.

Ndërsa pritet të fillojë seanca, një gjë është e qartë: prokurori me përvojë dhe ish-drejtori i FBI-së, nuk do të thotë asgjë që nuk është pjesë e raportit përfundimtar që i dorëzoi Prokurorit të Përgjithshëm, William Barr.

Në maj, zoti Mueller u tha gazetarëve të mos presin shumë përtej asaj që përmban raporti.

“Raporti është dëshmia ime. Nuk do të jepja para Kongresit informacion tjetër përveç asaj që është bërë tashmë publike”, tha ai.

E mërkura pritet të jetë një ditë dramatike në Uashington, ndërsa ish-prokurori i posaçëm Robert Mueller dëshmon para Kongresit, lidhur me ndërhyrjen ruse në favor të Donald Trumpit dhe nëse presidenti më pas pengoi drejtësinë, duke u përpjekur të ndalte hetimin e prokurorit.

Presidenti Trump thotë se nuk ka ndër mend ta shohë seancën pesë orëshe të zotit Mueller që do të transmetohet drejtpërdrejt në televizion, ose ndoshta vetëm pjesë të vogla të saj. Ai këmbëngul se seancat janë një humbje e jashtëzakonshme kohe dhe se është bërë e qartë se ai nuk ka bashkëpunuar në mënyrë të qëllimshme me rusët, dhe nuk ka ndërhyrë me hetimin e zotit Mueller.

Por miliona amerikanë që nuk e kanë lexuar raportin prej 448 faqesh të prokurorit të posaçëm, pritet t’i shohin seancat para komisioneve juridik dhe të zbulimit të Dhomës së Përfaqësuesve, që pritet të jenë të nxehta dhe interesante.

Seancat janë kritike për 235 demokratët e opozitës në Dhomën e Përfaqësuesve, një e treta prej të cilëve kanë bërë thirrje për fillimin e një procesi shkarkimi ose një hetimi për shkarkim për presidentin Trump.

Aleatët e Presidentit Trump në Kongres thonë se zoti Mueller nuk gjeti asgjë inkriminuese për zotin Trump dhe se kjo çështje duhet mbyllur. Por ata e kanë bërë gjithashtu të qartë se kanë ndër mend ta pyesin zotin Mueller për një hetim që ata thonë se është defektoz dhe me fillesa të dyshimta.

Ndërsa pritet të fillojë seanca, një gjë është e qartë: prokurori me përvojë dhe ish-drejtori i FBI-së, nuk do të thotë asgjë që nuk është pjesë e raportit përfundimtar që i dorëzoi Prokurorit të Përgjithshëm, William Barr.

Në maj, zoti Mueller u tha gazetarëve të mos presin shumë përtej asaj që përmban raporti.

“Raporti është dëshmia ime. Nuk do të jepja para Kongresit informacion tjetër përveç asaj që është bërë tashmë publike”, tha ai. za

Shumica e amerikanëve mendojnë se niveli i mosbesimit tek qeveria e tyre dhe tek njerëzit e tjerë në përgjithësi, pengon përpjekjet për të zgjidhur problemet me të cilat përballet shoqëria, si emigracioni, racizmi, kujdesi shëndetësor, taksat dhe e drejta e votës.

Qendra Kërkimore Pew publikoi së fundi rezultatet e një sondazhi që përfshinte mbi 10 mijë vetë.

“Shumë njerëz nuk mendojnë më se qeveria mund të jetë një forcë për të mirë ose që mund të sjellë ndryshim në jetën e tyre”, citon Qendra Pew një nga pjesëmarrësit në sondazh, i cili shton se “Kjo lloj shkëputjeje dhe apatie do të çojë në një qeveri edhe më të keqe dhe më pak përfaqësuese.”

Pothuajse 70 për qind e amerikanëve thonë se qeveria federale e fsheh qëllimisht informacionin që mund ta japë pa cënuar sigurinë ndërsa 64 për qind të tjerë thonë se kur zyrtarët e zgjedhur flasin, është e vështirë të kuptosh se çfarë është dhe çfarë nuk është e vërtetë.

Besimi i publikut tek qeveria, që ra së tepërmi në vitet ’60 dhe ’70, u rikthye disi në vitet ’80 dhe në fillim të viteve 2000, sipas një sondazhi të muajit prill të Organizatës Pew.

Besimi i amerikanëve tek qeveria është tani në nivelin 17 për qind, një nivel i ulët historik.

Shumica e njerëzve të anketuar mendojnë se ky mosbesim është i justifikuar – 75 për qind e të anketuarve kanë thënë se qeveria nuk duhet të ketë besimin e publikut në një nivel më të lartë sesa e ka aktualisht.

Republikanët dhe të anketuarit me prirje republikane kishin më shumë gjasa ta lidhnin mosbesimin ndaj qeverisë me korrupsionin dhe performancën e dobët qeveritare, ndërsa homologët e tyre demokratë dhe me prirje demokrate kishin prirjen ta lidhnin marrëdhënien me qeverinë me performancën e Presidentit amerikan Donald Trump.

Sipas sondazhit, besimi tek njerëzit e tjerë në përgjithësi ka rënë, por më së shumti kur hyn në mes politika. Ndërkohë që shumica i besojnë të tjerëve që “të bëjnë gjënë e duhur”, siç është zbatimi i ligjit, kjo ndryshon kur është fjala për pranimin e rezultatit të zgjedhjeve, rishqyrtimi i pikëpamjeve në raport me informacionin e ri dhe një mori situatash të tjera.

Në sondazh, besimi tek të tjerët ndryshonte në bazë të racës, moshës, të të ardhurave dhe arsimit – pjesëmarrësit më të moshuar, më të pasur dhe më të arsimuar kishin nivele më të larta të besimit personal. Njerëzit e bardhë kishin nivele të larta besimi për të tjerët në 27 për qind të rasteve, më shumë se dyfishi i të anketuarve afrikano-amerikanë dhe hispanikë.

“Amerikanët që mund të ndihen të pafavorizuar kanë më pak gjasa të shprehin besim tek njerëzit e tjerë”, vë në dukje Organizata Pew.

Çuditërisht, republikanët dhe demokratët kishin nivele të ngjashme të besimit personal tek të tjerët, por kishin pikëpamje të ndryshme për qeverinë – republikanët në përgjithësi shprehnin më shumë besim.

Pse ka rëndësi besimi i publikut tek qeveria? Përveç se është baza e çdo qeverie që shpall se pushteti i saj e merr forcën nga njerëzit, 64 për qind e amerikanëve thonë se besimi i ulët tek qeveria pengon reagimin e njerëzve ndaj problemeve më të mëdha që ka vendi. 70 për qind e të anketuarve mendojnë të njëjtën gjë për mosbesimin tek njerëzit e tjerë. Zgjidhjet për çështje për të cilat ka dallime partiake, si emigracioni, kujdesi shëndetësor, taksat, të drejtat e votimit dhe martesa mes njerëzve të të njëjtit seks, sipas të anketuarve, janë duke u vështirësuar.

Megjithatë, 84 për qind e pjesëmarrësve në sondazh mendonin se besimi i ulët tek qeveria federale mund të ndreqet. Në komentet e hapura, pjesëmarrësit sugjeroni zgjidhje për përmirësimin e gjendjes, si pakësimi i besnikërisë partiake dhe minimizimi i mbulimeve sensacionale në media.

“Besimi është si zamku që i lidh njerëzit bashkë. Pa të, ne bashkëpunojmë më pak me njëri-tjetrin dhe elementët që ndikojnë në cilësinë e përgjithshme të jetës sonë preken, “- komentonte një 38-vjeçar i përfshirë në në sondazh. za

Jim Malone

Ish-prokurori i posaçëm, Robert Mueller që kryesoi hetimin për ndërhyrjen ruse në zgjedhjet e vitit 2016, pritet të dëshmojë javën që vjen (të mërkurën më 24 korrik) para dy komisioneve të Kongresit në seanca që mund të marrin nota dramatike dhe që do të transmetohen drejtpërdrejt në televizion.

Robert Mueller do të dëshmojë përpara dy komisioneve të Dhomës së Përfaqësuesve lidhur me raportin e tij për ndërhyrjen ruse në zgjedhjet e vitit 2016, dhe gjasta për bashkëpunim dhe pengimi të drejtësisë, që implikojnë Presidentin Donald Trump dhe Shtëpinë e Bardhë.

Në maj, zoti Mueller u tha gazetarëve të mos presin shumë përtej asaj që përmban raporti.

“Raporti është dëshmia ime. Nuk do të jepja para Kongresit informacion tjetër përveç asaj që është bërë tashmë publike”, tha ai.

Zoti Mueller arriti në përfundimin se nuk kishte të prova të mjaftueshme për konspiracion të dënueshëm apo koordinim mes Rusisë dhe fushatës së Presidentit Trump për të ndikuar tek zgjedhjet.

Por zoti Mueller ka gjasa të përballet me pyetje të shumta nga demokratët lidhur me vendimin e tij për të mos dhënë gjykim nëse Presidenti Trump ishte përpjekur të pengonte drejtësinë në lidhje me hetimin për Rusinë.

“Nëse do të kishim pasur bindjen që presidenti qartësisht nuk kishte kryer krim, do ta kishim thënë. Por nga ana tjetër, nuk nuk arritëm dot në përfundimin se presidenti nuk kishte kryer krim. Në bazë të politikave të Departamentit (të Drejtësisë), ndaj një presidenti nuk mund të ngrihet akuzë për krim federal gjatë kohës që është në detyrë”, tha ai.

Presidenti Trump ka komentuar shpesh në Twitter lidhur me raportin dhe shprehja e tij “jo konspiracion, jo pengim”, ka qenë e vazhdimisht e pranishme në tubimet e tij politike.

“Për dy vite e gjysëm, kemi qenë nën mbikqyrje dhe me raportin Mueller, fituam! Dhe tani duan t’ia fillojnë nga e para. Nuk doli siç dëshironin herën e parë dhe tani duan ta bëjnë prapë”, u shpreh ai në një rast.

Demokratët, përfshirë kryetarin e Komisionit Juridik të Dhomës së Përfaqësuesve, Jerry Nadler thonë se synojnë ta pyesin me këmbëngulje zotin Mueller.

“Presidenti vazhdimisht u shpreh ‘jo konspiracion, jo pengim’, që në fakt nuk ishte përfudnimi i raportit. Prandaj mendoj se është shumë e rëndësishme që populli amerikan t’i dëgjojë nga zoti Mueller përfundimet e tij dhe se cilat ishin rezultatet e hetimin dyvjeçar”, tha ai.

Ecuria e dëshmisë së zotit Mueller, mund të përcaktojë nëse demokratët e Kongresit do të këmbëngulin për një hetim për procesin e shkarkimit të Presidentitm, thotë analistja Andra Gillespie.

“Presidenti Trump nuk pati pasoja nga hetimi i zotit Muellur por nuk është ende e qartë nëse demokratët do të ndërmarrin procedurën e përpjekjes për shkarkim dhe nëse mund të gjejnë prova shtesë që mund të ndryshojnë mendimet e njerëzve”.

Raporti i zotit Mueller, është bërë një temë e njohur mes kritikëve të presidentit dhe përkrahësve të tij. Aktorë të Hollivudit, kohët e fundit organizuar një recitim dramatik të raportit në një shfaqje në Nju Jork me aktorin John Lithgow në rolin e zotit Trump.

“Por presidenti iu kthye temës së postit të (ish-drejtorit të FBI-së) James Comey, në fund të darkës duke thënë: ‘Unë dua bensikëri’”, recitoi ai duke iu referuar shkëmbimit mes Presidentit dhe zotit Comey.

“Nga unë do të keni gjithomonë ndershmëri”, tha Justin Long në rolin e zotit Comey.

Dëshmia publike e zotit Mueller para dy komisioneve të Kongresit, pritet të zgjasë disa orë.

Departamenti amerikan i Shtetit tha në një deklaratë të shkurtër për Zërin e Amerikës se ka mësuar që Ramush Haradinaj dha dorëheqjen nga posti i kryeministrit të Kosovës.

“Shtetet e Bashkuara përgëzojnë respektimin nga ana e tij të thirrjes për t’u paraqitur para Zyrës së Prokurorit të Posaçëm të Dhomave të Posaçme për Kosovën”, thuhet në deklaratë.

Kryeministri i Kosovës Ramush Haradinaj paraqiti të premten dorëheqjen e pakthyeshme nga posti i tij. Në një vendim të papritur, ai tha se arsyeja për dorëheqjen është “ftesa për t’u marrë në pyetje nga Dhomat e Specializuara në Hagë si i dyshuar”.

Dhomat e Posaçme, apo siç njihen në Kosovë, Gjykata e Posaçme me seli në Hagë, u themelua me vendim të parlamentit të Kosovës, ndërsa në të punojnë prokurorë e gjykatës ndërkombëtar dhe do të trajtojë pretendimet për përfshirjen e ish pjesëtarëve të Ushtrisë Çlirimtare të Kosovës në krime lufte dhe të pasluftës.

Prokuroria e Posaçme nuk pranoi të japë ndonjë hollësi rreth ftesës për marrjen në pyetje të zotit Haradinaj që pritet të ndodhë nga mesi i javës së ardhshme.

Dorëheqja e zotit Haradinaj ndodhi në një periudhë të shtimit të trysnisë ndaj tij për të hequr tarifat ndaj mallrave serbe me të cilat Beogradi vazhdon të kushtëzojë vazhdimin e bisedimeve me Kosovën.

Ai u shpreh i bindur se pas dorëheqjes së tij vendi duhet të shkojë në zgjedhje të reja, ndërsa në favor të tyre u shpreh edhe Nisma Socialdemokrate, që është pjesë e koalicionit qeverisës si dhe opozita që hodhi poshtë çdo mundësi të krijimit të ndonjë qeverie të re apo qeverie teknike. Çështja tash i mbetet presidentit Hashim Thaçi, i cili duhet të këshillohet me forcat politike në vend.

Dorëheqja e zotit Haradinaj mund të zvarrisë edhe më tej përpjekjet për ripërtëritjen e bisedimeve për normalizimin e marrëdhënieve ndërmjet Kosovës dhe Serbisë. aa

Kjo ishte një javë sfiduese për demokracinë amerikane. Presidenti Donald Trump po kritikohet për sulmet ndaj katër ligjvënëseve demokrate që i përkasin pakicave. Dhoma e Përfaqësuesve, kryesisht në linja partiake, votoi për të dënuar disa nga komentet e presidentit, që ajo i cilësoi si raciste. Në të njëjtën kohë, demokratët e opozitës mbeten të ndarë mbi çështjen e fillimit të procedurave për shkarkimin e Presidentit Trump apo përqëndrimin e energjisë në mposhtjen e tij në zgjedhjet presidenciale të vitit të ardhshëm. Siç njofton korrespondenti i Zërit të Amerikës Jim Malone, përplasja ka zhytur vendin në një debat të ashpër mbi racën, emigracionin dhe ideologjinë politike.

Para një turme entuziaste në Karolinën e Veriut, Presidenti Trump sulmoi përsëri katër ligjvënese demokrate, të gjitha gra me ngjyrë.

“Këta ideologë të krahut të majtë e shohin vendin tonë si një forcë të së keqes. Ato flasin keq për vendin tonë. Ato duan të shkatërrojnë Kushtetutën, të dobësojnë ushtrinë tonë dhe të eleminojnë vlerat mbi të cilat është ndërtuar ky vend i mrekullueshëm”.

Në një moment gjatë fjalimi të tij, Presidenti vuri në shënjestër ligjvënësen e Minesotës Ilhan Omar, duke nxitur thirrjet nga turma “kthejeni në vendin e saj”.

Paraqitja konfrontuese e Presidentit Trump ndodhi në të njëjtën ditë që Dhoma e Përfaqësuesve votoi kundër një nisme për të filluar procedurat e shkarkimit të tij.

Por më parë gjatë javës, Dhoma e Përfaqësuesve bëri një hap të pazakontë, duke votuar për të dënuar dhe cilësuar si raciste disa nga sulmet e Presidentit Trump ndaj katër ligjvënëseve demokrate.

Të gjithë demokratët e Dhomës së Përfaqësuesve mbështetën rezolutën, përfshirë aktivistin e të drejtat civile John Lewis nga Xhorxhia.

“Unë e di se çka është racizmi dhe mund ta ndjejë atë. Në nivelin më të lartë të qeverisë, nuk ka vend për racizëm”.

Fitorja e Presidentit Trump në vitin 2016 u ndihmua nga mbështetja e fortë e votuesve të bardhë të shtresës punëtore.

Por shumë demokratë, përfshirë ligjvënësin Tom Malinowski besojnë se Presidenti është duke bërë një ofertë të rrezikshme për mbështetje bazuar në pakënaqësinë racore.

“Këto nuk janë vetëm fjalë. Ato janë njësojë sikur t’i hedhësh zjarrit benzinë, dhe që mund të acarojnë mendjet e trazuara të njerëzve.”

Presidenti Trump ka mohuar akuzat se është racist, por ka sulmuar katër ligjvënëse, duke i quajtur ato socialiste dhe u ka thënë atyre të largohen nga vendi nëse nuk janë të kënaqura.

Disa republikanë i kanë kritikuar sulmet, por shumë të tjerë duke përfshirë Senatorin John Kennedy, e mbështesin Presidentin.

“Ky vend nuk është si Kina ose si Koreja e Veriut. Kjo është Amerika dhe nëse ju urreni vendin tonë, ju jeni të lirë të largoheni kur të doni”.

Fokusi i Presidentit tek tensionet racore dhe ideologjike po e gris strukturën e vendit, paralajmëron ligjvënësi demokrat Dean Phillips.

“Nëse racizmi bëhet një çështje partiake në këtë vend, ky do të ishte një abuzim ndaj themeluesve të vendit tonë, Kushtetutës sonë dhe çdo personi që e quan Amerikën shtëpi të tyre”.

Fitorja e ngushtë e Presidentit Trump në vitin 2016 dhe mbështetja relativisht e ulët për punën e tij ia vështirëson atij përpjekjet për t’u rizgjedhur, thotë analisti Kyle Kondik.

“Nëse mbështetja për punën e tij është nën 45 për qind, atëherë ai do të ketë nevojë për votat e një pjese të konsiderueshme të njerëzve që nuk e mbështesin atë dhe në këtë pikë gjërat do të jenë tepër të vështira për të.”

Retorika tensionuese e kësaj jave mund të shërbejë si një hap paraprak i një fushate të acaruar dhe të paqëndrueshme presidenciale vitin e ardhshëm.

Presidenti Donald Trump dhe shumë nga aleatët e tij republikanë në Kongres ishin në pozita vetëmbrojtëse të martën, pasi kritikët dënuan komentet dhe postimet në Twitter të presidentit që ata i quajnë raciste, ku ai thoshte se katër anëtare demokrate të Kongresit duhet të kthehen në vendet nga kanë ardhur, pas kritikave të tyre për Shtetet e Bashkuara. Të katër ligjvënëset janë qytetare amerikane dhe tre prej tyre kanë lindur në Shtetet e Bashkuara. Siç njofton korrespondenti i Zërit të Amerikës, Jim Malone, polemikat e fundit kanë nxjerrë në pah ndasitë e thella lidhur me politikën dhe racën në Shtetet e Bashkuara.

Në Shtëpinë e Bardhë, Presidenti Trump qëndroi sfidues duke mbrojtur komentet e mëparshme ku u thoshte anëtareve demokrate të Kongresit, të iknin nga vendi nëse ishin të pakënaqura.

“Dëgjoni se çfarë kanë thënë. Deklaratat më të ndyra, të tmerrshme për vendin tonë, për Izraelin, për të tjerë. E kanë në dorë të bëjnë ç’të duan. Mund të ikin, mund të rrinë, por duhet ta duan vendin tonë dhe të punojnë për të mirën e tij”, tha ai.

Komentet e Presidentit Trump drejtuar katër demokrateve me ngjyrë, shkaktuan reagime nga kritikët që e akuzuan se ishte racist.

“Mendoj se ajo që bëri Presidenti Trump, është e turpshme. Të nxisësh anën më të keqe të instinkteve njerëzore, të përçash Amerikën…asnjë president më parë nuk e ka bërë këtë”, tha udhëheqësi i demokratëve në senat, Chuck Schumer.

Disa republikanë e ngritën zërin dhe akuzuan presidentin se po përpiqet të përçajë vendin.

“Do të kisha dashur ta kapërcenim. Por druhem se me komentet e lëshuara, i jemi rikthyer përçarjes që është aq shkatërruese për frymën tonë kombëtare”.

Republikanë të tjerë, ose heshtën ose e anashkaluan çështjen.

Alexandria Ocasio-Cortez është një nga anëtaret demokrate të Kongresit, që u vu në shënjestër nga Presidenti.

Ajo u bëri thirrje amerikanëve të mos shpërqendrohen nga sulmet e presidentit.

“Dhe e para gjë që dua t’u them fëmijëve në gjithë vendin është se çfarëdo që të thotë presidenti, ky vend you takon juve dhe na takon të gjithëve”.

Përplasja e fundit mes presidentit dhe demokratëve ka gjasa të jetë një prelud i fushatës presidenciale të vitit të ardhshëm.

Gara e rrëmujshme e demokratëve që konkurojnë për president, ku deri tani kanë hyrë 24 kandidatë i ka vënë pretendentët përballë detyrës së vështirë për t’u dalluar nga të tjerët. Shumë prej tyre premtojnë plane për të luftuar pabarazinë në të ardhura. Kjo politikë ka në qendër një problem real të shoqërisë amerikane si dhe vë në shenjestër politikat e administratës Trump, e cila përmes reformës fiskale ka lejuar shkurtim të ndjeshëm të taksave për amerikanët më të pasur, por u ka ofruar vetëm përfitime modeste amerikanëve me të ardhura të ulëta.

Kjo temë është shumë e përshtatshme për tonin e fushatave, pasi shoqërohet me statistika që ndezin turmën duke nxitur thirrje për veprim.

Pak kohë më parë, Elise Gould, ekonomiste pranë Institutit të pavarur për Politika Ekonomike dëshmoi në Kongres se “familjet më të pasura që përfaqësojnë 1% të popullatës kanë përjetuar rritje të të ardhurave në masën 229% që nga 1979, shumë më tepër se 46% rritje ose rritje në masën 1% për vit për 90% të familjeve amerikane që përfaqësonë shtresat më të varfëra”.

Hendeku ekonomik po thellohet. Sipas Institutit për Studime Politike, tre personat më të pasur: Jeff Bezos, Bill Gates dhe Warren Buffet së bashku kontrollonin më shumë pasuri se 50% e amerikanëve që përfaqësojnë gjysmën më të varfër të vendit. 5% e amerikanëve që renditen si personat më të pasur në vend kontrollojnë 2/3 e pasurisë së përgjithshme të vendit.

Sanders, i pari me thirrjet për mbylljen e Hendekut në të Ardhura

Senatorit nga Vermonti, Bernie Sanders i takon merita që e solli në qendër të vëmendjes këtë temë. Tani që konkurron për herë të dytë për president, zoti Sanders vazhdon të bëjë thirrje për taksa ndëshkuese ndaj më të pasurve dhe betohet të mbledhë 2.2 miliardë dollarë nga afro 600 miliarderë që ka Amerika, duke rritur taksën mbi shumën që trashëgojnë pasardhësit duke e çuar në 77% të shumës. Ai ka mbështetur prej kohësh rrogën minimale prej 15 dollarësh.

Shumë nga politikat që ai parashtroi gjatë fushatës përballë rivales demokrate Hillary Clinton tani janë përqafuar nga konkurrentë të tjerë demokratë.

Biden me plane që ndërthurin Politika Progresive e të Moderuara

Ish-nënpresidenti Joe Biden ka propozuar zgjidhe që përpiqen të gjejnë balancën mes politikave që duan të taksojnë të pasurit dhe alternativave më të moderuara që pat përqafuar administrata Obama. Zoti Biden ka kritikuar ligjet që mbrojnë shumë të pasurit nga taksimi i trashëgimisë si dhe shkurtimet e taksave që miratoi administrata Trump, duke i cilësuar si favorizuese për më të pasurit. Por gjithashtu ai ka premtuar se nuk do të vërë në shenjestër të pasurit me taksa ndëshkuese.

Warren premtojn “taksë mbi Ultra Milionerët”

Ndër kandidatët më agresivë është Senatorija Elizabeth Warren e cila ka propozuar “taksë mbi ultra milionerët”. Në bazë të propozimit do të ndëshkoheshin me 2% taksë pasurie të gjithë ata që kanë më shumë se 50 milionë dollarë pasuri neto dhe me 3% të gjithë ata që janë miliarderë. Të ardhurat për buxhetin që do të rezultonin nga këto politika do të ndihmonin programe që mbështesin familjet me të ardhura të ulëta, duke ofruar kujdes si për shembull kopshte falas për fëmijët, si dhe banesa me kosto të ulët, thotë zonja Warren.

Propozimet fiskale të Kamala Harris

Senatorja Kamala Harris ka propozuar rimbursim deri në 6000 dollarë të taksave në vit për familje. Ajo mbështet rrogën minimale prej 15 dollarësh si dhe programe për të mbrojtur amerikanët nga kostot e strehimit që marrin 30% të të ardhura të familjes. Ajo kërkon eliminimin e shkurtimit të taksave që miratoi administrata Trump.

Kryebashkiaku Butigieg pro Rrogës Minimale $15

Kryebashkiaku Pete Buttigieg aktualisht është pak i paqartë në politikat që mbështet për të zgjidhur pabarazinë ekonomike. Ai mbështet rrogën minimale prej 15 dollarësh dhe forcimin e sindikatave që të mund të luftojnë për paga më të larta. Ai gjithashtu kërkon leje të paguar për nevoja familjare dhe lehtësira për kujdesin për fëmijët e vegjël.

O’Rourke pa shumë shpjegime

Ish-ligjvënësi nga Teksasi Beto O’Rourke, ka qenë më i paqarti ndër kandidatët kryesorë lidhur me politikat për të zgjidhur hendekun ekonomik mes shtresave amerikane. Gjatë fushatës ai ka pohuar se ka një përqëndrim të pashembullt të pasurisë dhe privilegjit tek një grup i vogël njerëzish, por nuk ka dhënë shpjegime si do ta adresojë këtë problem. Në faqen elektronike të fushatës së tij, ky problem nuk renditet si një ndër përparësitë e tij politike.

Booker premton “Bono për Foshnjet”

Disa nga propozimet më të padëgjuara më parë mbi këtë temë kanë dalë gjatë kësaj fushate, por pa tërhequr shumë vëmendje nga votuesit. Senatori Corey Booker propozon “bono për foshnjet” për të vënë mënjanë 1000 dollarë në vit (në rastet e familjeve të varfra 2000 dollarë në vit) për çdo fëmije të lindur në SHBA. Paratë do t’i mbante në një llogari Departamenti i Thesarit deri kur fëmija të arrinte moshë të rritur. Këto fonde do të arrinin afro 46 mijë dollarë për person duke i dhënë mundësi personit të blinte një banesë, apo të financonte studimet ose pensionin.

Yang flet për “Lirinë e Përpjesëtuar”

Andrew Yang, i cili krijoi një kompani shumë të suksesshme për përgatitjen e studentëve për provime universitare, megjithëse pa përvojë politike ka tërhequr vëmendje për propozimin që t’i ofrojë çdo amerikani një të ardhur minimale bazë. Ai e cilëson si “Liria e Përpjesëtuar” apo “Liria e Shpërndarë” dhe propozon që qeveria t’i ofrojë çdo amerikani 1000 dollarë në muaj që do të mbulohet nga një taksë mbi transaksionet finaciare dhe ka propozuar gjithashtu eliminimin e favorizimeve përmes taksave të të ardhurave nga investimet.

Pavarësisht se kush do ta fitojë garën mes pretendentëve demokratë, fituesi pritet të dalë në garë përballë Presidentit Trump me disa propozime që do të adresojnë hendekun në të ardhura mes amerikanve më të pasur dhe shtresave të mesme e të varfra.

Një numër grupesh të njohura konservatore mblidhen të enjten në Shtëpinë e Bardhë për të diskutuar se si duhen trajtuar raportimet në mediat sociale.

Por gjigandët e medias sociale, Twitter dhe Facebook nuk marrin pjesë pasi nuk janë ftuar.

Për Samitin e Shtëpisë së Bardhë dhe për pjesëmarrësit në të janë dhënë pak hollësi, por konferenca vjen mes kritikave të shumta për këto kompani.

Disa argumentojnë se kompanitë e mediave sociale po heshtin zërat konservatorë. Të tjerë thonë se nuk po bëjnë sa duhet për të mbrojtur përdoruesit nga dezinformatat dhe postimet fyese.

Një argument për të cilin bihet dakord është se firmat e teknologjisë janë të fuqishme dhe kontrollojnë kanale të rëndësishme të informacionit. Ka thirrje për një zbatim më të fuqishëm të ligjit anti-trust dhe për të parë nëse këto kompani duhet të ndahen.

Presidenti Donald Trump është i apasionuar i Twitter-it, duke e përdorur platformën si për të trumpetuar punën e administratës së tij ashtu edhe për të sulmuar kundërshtarët.

“Shtëpia e Bardhë do të organizojë një samit shumë të madh dhe shumë të rëndësishëm për Median Sociale sot,” shkroi ai në Twitter përpara ngjarjes. “A do të bëhesha President pa Median Sociale? Po (ndoshta)!”

Paragjykim ndaj zërave konservatorë?

Presidenti Donald Trump ka kritikuar gjithnjë e më shumë tre kompanitë e mëdha të mediave sociale – Facebook, Twitter dhe YouTube – për atë që ai thotë se është censurë dhe paragjykim ndaj zërave konservatorë.

Të tre kompanitë kanë mohuar vënien në shënjestër të përdoruesve konservatorë kur zbatojnë standardet e tyre të komunitetit social.

Në maj, Shtëpia e Bardhë u kërkoi njerëzve të ndanin eksperiencat e tyre në një faqe elektronike.

“Në fillim të këtij viti Shtëpia e Bardhë filloi një nismë për të lejuar amerikanët, pa marrë parasysh pikëpamjet e tyre politike, të tregojnë se si janë prekur nga paragjykimet në internet. Pas marrjes së mijëra përgjigjeve, Presidenti dëshiron të angazhohet drejtpërdrejt me këta liderë dixhitalë në një diskutim për fuqinë e mediave sociale”, tha zëdhënësi i Shtëpisë së Bardhë Judd Deere në një deklaratë të martën pasdite.

Faqja elektronike tani është e mbyllur, por një mesazh u tregon vizitorëve se “platformat e mediave sociale duhet të avancojnë lirinë e fjalës. Megjithatë, shumë amerikanë kanë parë që llogaritë e tyre janë pezulluar, ndaluar apo raportuar për shkelje të paqarta të politikave të përdoruesve”. https://whitehouse.typeform.com/to/Jti9QH

Samiti është për “udhëheqësit dixhitalë” të interesuar për “një bisedë të fuqishme mbi mundësitë dhe sfidat e mjedisit të sotëm online”, tha Shtëpia e Bardhë kur njoftoi për konferencën.

Të ftuar, ekspertë dhe drejtues konservatorë

Ndërkohë që lista e pjesëmarrësve nuk është bërë publike, ndër të ftuarit janë Zëvendëskryetari i Partisë Republikane të Floridës, Christian Ziegler dhe anëtarë të grupeve konservatore si Fondacioni Heritage dhe Turning Point USA.

Është e rëndësishme për njerëzit të mësojnë se si faqet e mediave sociale moderojnë përmbajtjen, tha Jillian York, drejtoreshë për lirinë ndërkombëtare të shprehjes në Fondacionin Elektronic Frontier, një organizatë dixhitale për liritë civile.

Kompanitë e mediave sociale “nuk po veprojnë si duhet” dhe po heqin fjalime që nuk duhet, tha ajo. Por as vlerësimi i administratës Trump për konservatorët nuk është i drejtë, shtoi ajo.

“Rregulli duhet të jetë liria e shprehjes,” tha ajo. “Duhet të hiqen përmbajtje vetën për rrethana vërtet të rrezikshme.”

Clara Tsao, një bashkëpunëtore për kompaninë Mozilla tha se sipas ligjit amerikan, ofruesit e “shërbimeve interaktive kompjuterike” lejohen të përjashtojnë njerëzit nga komunitetet e tyre në internet, për të mbrojtur përmbajtjen dhe vendimet editoriale dhe për të ofruar standarde të mirësjelljes. “Është një problem i ndërlikuar”, thotë ajo. “Ka një keqkuptim rreth asaj se si duhet të bëhet moderimi i përmbajtjes”.

‘Izolimi’ i fjalës

Kompanitë e mediave sociale vazhdojnë të bëjnë ndryshime në shërbimet e tyre për të hequr llogaritë e rreme dhe në disa raste, për ta bërë më të vështirë të shihen postime që konsiderohen të pavërteta ose ofenduese.

Këtë javë, Instagrami, i cili është pronë e Facebook-ut, njoftoi ndryshime për të goditur bulizmin. https://www.businessinsider.com/instagram-announces-restrict-mute-feature-ai-flag-offensive-comments-2019-7

Kohët e fundit, Reddit “pezulloi” një grup diskutimi në faqen e tij për shkak të një kërcënimi për dhunë. Përdoruesit shohin tani një paralajmërim përpara se të hyjnë në grup. za