Presidenti i Shteteve të Bashkuara, Donald Trump, më 17 shtator, shpalli pesë emra si zëvendësues të mundshëm, për pozitën e lirë të këshilltarit të sigurisë kombëtare, katër prej të cilëve kanë punuar në Këshillin e Sigurisë Kombëtare, raportoi Reuters.

Duke folur para gazetarëve në bordin e aeroplanit presidencial, Trump renditi fillimisht, Ricky Waddell, një ish-këshilltar i sigurisë kombëtare, së bashku me Keith Kellogg, i cili aktualisht shërben si këshilltar për siguri i nënpresidentit amerikan, Mike Pence.

Më pas, Robert O’Brien, u veçua si një pasardhës i mundshëm i John Boltonit, i cili u shkarkua javën e kaluar nga ana e presidentit Trump. O’Brien është një veteran i politikës së jashtme në qarqet e partisë republikane.

Ish-oficeri i Agjencisë Qendrore të Inteligjencës (CIA), Fred Fleitz është një tjetër zëvendësim i mundshëm. Ai shërbeu si sekretar ekzekutiv i Këshillit të Sigurisë Kombëtare. Fleitz është kritik ndaj Iranit dhe ka pikëpamje të linjës së ashpër mbi islamin.

Lisa Gordon-Hagerty, nënsekretare e sigurisë bërthamore në Departamentin e Energjisë, gjithashtu u rendit si zëvëndësuese e mundshme e Boltonit. Ajo gjithashtu ka shërbyer në Këshillin e Sigurisë Kombëtare.

Pozita e këshilltarit të sigurisë kombëtare nuk kërkon konfirmim të Senatit të SHBA-së. Këshilltari-ja e sigurisë kombëtare jep këshilla për çështjet e mbrojtjes, të sigurisë dhe diplomacisë dhe është pozicioni më i lartë i Shtëpisë së Bardhë për sigurinë kombëtare.

Megjithëse këta emra u përmendën nga presidenti Trump, më vonë përmes një deklarate zëdhënësja e Shtëpisë së Bardhë, Stephanie Grisham, tha se lista nuk është e plotë.

Më 10 shtator, presidenti Donald Trump, e shkarkoi këshilltarin e sigurisë kombëtare, John Bolton, duke i thënë se shërbimet e tij në Shtëpinë e Bardhë nuk janë më të nevojshme.

Zëdhënësja e Shtëpisë së Bardhë, Stephanie Grisham u tha gazetarëve se “Presidenti (Donald Trump) nuk i kanë pëlqyer shumë politikat e tij (John Boltonit), dhe se ata kanë pasur mospajtime”.

Ish analisti i CIA-s komenton shkarkimin e Këshilltarit të Sigurisë nga Presidenti Donald Trump.

Ish analisti i CIA-s John Kiriakou diskuton rreth largimit të John Bolton nga Këshilltar i Sigurisë Kombëtare dhe hamëndëson se kush mund ta zëvendësojë.

John Kiriakou parashikon se Presidenti Donald Trump të mund emërojë  Stephen Biegun ose Douglas Macgregor për këshilltar të ardhshëm të sigurisë kombëtare.

“Unë duhet të pajtohem me Elizabeth Warren dhe Bernie Sanders se bota është një vend më i sigurt pa John Bolton që të merrte vendime të luftës dhe paqes,” vazhdoi Kiriakou.

“Nuk më shqetëson fakti se tani nuk kemi një këshilltar të sigurisë kombëtare; është më mirë të mos kesh askënd në këtë pozitë sesa të kesh John Bolton në pozitë. ”

“Ai u përpoq aktivisht të rrëzonte qeverinë e Venezuelës; ai u përpoq aktivisht të rrëzonte qeverinë iraniane; ai u përpoq në mënyrë aktive të rrëzonte qeverinë Siriane – dhe ky është vetëm në vitin e fundit! Pra, po, është më mirë të mos e kemi John Bolton në këtë pozicion, “tha Kiriakou./thegrayzone.com

SHBA-të tejkaluan Arabinë Saudite si eksportuesja më e madhe e naftës në botë në qershor, falë rritjes së prodhimit të naftës së argjilës në vend dhe kufizimeve të OPEC-ut që prekën kryesisht Arabinë Saudite.

“SHBA aktualisht është numër një në qershor, pasi eksportet e naftës së papërpunuar u rritën mbi 3 milionë fuçi në ditë, duke rritur eksportet totale të naftës së papërpunuar dhe produkteve në gati 9 milionë fuçi në ditë”, tha të enjten Agjencia Ndërkombëtare e Energjisë (IEA).

“Në të njëjtën kohë, Arabia Saudite zvogëloi eksportet e produkteve të naftës së papërpunuar dhe ato të rafinuara”, shtoi IEA në Raportin e Tregut të Naftës për shtatorin.

Raporti i IEA-së nuk jep shifra specifike për eksportet e naftës së papërpunuar të SHBA-së dhe Arabisë Saudite, megjithatë, shifrat e Nismës së Organizatave të Përbashkëta (JODI) tregojnë se eksportet e naftës së papërpunuar të Arabisë Saudite mesatarisht ishin 6.72 milionë fuçi në ditë në qershor, ndërsa eksportet e produkteve të përgjithshme të naftës mesatarisht ishin 1.27 milionë fuçi në ditë. Kjo solli sasinë totale të eksporteve të naftës për vendin në qershor në 7.99 milionë fuçi në ditë.

Në qershor, eksportet e naftës së papërpunuar të SHBA-së mesatarisht ishin 3.41 milionë fuçi në ditë ndërsa eksportet e përgjithshme të produkteve të naftës arritën në 5.44 milionë fuçi në ditë, duke sjellë vlerën totale të eksporteve të naftës në 8.85 milionë fuçi në ditë.

IEA tha se kompletimi i tubacioneve dhe terminaleve të nevojshme të naftës në SHBA tani bën të mundur rritjen e eksporteve të naftës në vend.

Megjithatë, Arabia Saudite riktheu pozitën e parë në eksportet e naftës në muajt korrik dhe gusht, tha IEA.

“Prodhimi amerikan u ndikua nga goditja e uraganit. Mosmarrëveshja tregtare e SHBA-së me Kinën gjithashtu e ka vështirësuar gjetjen e tregjeve për produktet e argjilës”, tha IEA.

Sa i përket prodhimit të naftës së papërpunuar, SHBA tejkaloi Arabinë Saudite në tetor 2018 me 11.2 milionë fuçi në ditë të prodhimit dhe më pas u tejkalua nga Rusia me 11.7 milionë fuçi në ditë në nëntor 2018 duke u bërë prodhuesja më e madhe e naftës së papërpunuar në botë.

Për shkak të marrëveshjes për kufizimin e prodhimit midis vedeve të OPEC-ut dhe aleatëve të saj, prodhimi i naftës së papërpunuar të Arabisë Saudite ishte mesatarisht 9.83 milionë fuçi në ditë në qershor, duke zbritur 4.6 për qind nga niveli mesatar i 2018 prej 10.31 milionë fuçi në ditë, thuhet në Raportin Mujor të Tregut të Naftës të OPEC-ut për shtator.

Eksportet e naftës së papërpunuar të SHBA-së u rritën gradualisht pas dhjetorit 2015 kur ish-presidenti Barack Obama hoqi ndalimin e vetë-imponuar katër dekada të eksporteve të naftës bruto të prodhuar në vend që ishte aktive që nga viti 1973 gjatë krizës së naftës të OPEC-ut. aa

Presidenti amerikan, Donald Trump ka shkarkuar nga detyra Këshilltarin e tij të Sigurisë Kombëtare, John Bolton.

“Unë e njoftova John Bolton mbrëmë se shërbimet e tij nuk janë më të nevojshme në Shtëpinë e Bardhë,” shkroi ai.

“Unë nuk isha dakord me shumë nga sugjerimet e tij,” shkruajti Trump, duke shtuar se një këshilltar i ri i sigurisë kombëtare do të emërohet javën e ardhshme.

Sekretari i shtypit i Shtëpisë së Bardhë Stephanie Grisham u tha gazetarëve: “Presidentit nuk i pëlqyen shumë politikat e tij, ata nuk pajtohen.”

Në përgjigje, Bolton shkroi në Twitter: “Unë ofrova të jepja dorëheqjen mbrëmë dhe Presidenti Trump tha:” Le të flasim për këtë nesër. “

Komisioni Juridik i Dhomës së Përfaqësuesve ka në plan të votojë për të përcaktuar kriteret për nisjen e procedurave për shkarkimin e Presidentit Donald Trump.

Kompania mediatike “Politico” njoftoi e para rreth këtij zhvillimi, duke thënë se raporti i saj bazohej në “shumë burime që ishin informuar rreth kësaj çështjeje”.

Komisioni pritet të votojë javën e ardhshme. Sipas Politico-s një projekt-rezolutë pritet të bëhet publike të hënën në mëngjes. Në artikull thuhet se demokratët “shpresojnë se një përcaktim i qartë i procesit për shkarkimin e presidentit do të forconte shanset tyre për të detyruar dhënien e dëshmive”.

Sidoqoftë mbetet e paqartë nëse ky proces do të çojë në ngritjen e një akuze ndaj presidentit si dhe nëse Senati që udhëhiqet nga republikanët do të votonte për largimin e presidentit nga detyra.

Komisione të ndryshme të Kongresit po shqyrtojnë një sërë çështjesh që lidhen me presidentin. Ato përfshijnë dështimin e tij për të publikuar deklaratat mbi të ardhurat, pagesat e bëra për të detyruar dëshmitarë që të mbyllin gojën e të mos bëjnë publike histori të sikletshme rreth tij si dhe shpenzimin e parave të taksapaguesve në hotelet dhe pronat e presidentit. za

Sekretari amerikan i Mbrojtjes, Mark Esper, tha se Irani mund të jetë më afër një mundësie për bisedime të reja rreth programit të tij bërthamor.

Deklarata vjen edhe pse Teherani njoftoi se ka ndërprerë edhe disa angazhime që ia kërkon marrëveshja bërthamore e vitit 2015.

Duke folur të premten në Londër, Esper tha se së shpejti mund të ketë vend për bisedime mbi programin bërthamor dhe raketor të Iranit.

“Duket se Irani, në njëfarë mënyre, po lëviz drejt atij vendit ku mund të bisedojmë. Shpresoj se do të luajë në atë drejtim”, tha Esper në Institutin e Shërbimeve të Bashkuara Mbrëtërore.

Irani dhe fuqitë botërore kanë arritur një marrëveshje në vitin 2015, në bazë të së cilës Irani ka kufizuar programin bërthamor në këmbim të lehtësimit të sanksioneve ndërkombëtare.

Por, presidenti i Shteteve të Bashkuara, Donald Trump, vitin e kaluar, është tërhequr nga kjo marrëveshje, duke thënë se nuk ka qenë e ashpër mjaftueshëm sa për të penguar Iranin nga zhvillimi i armës bërthamore.

Që atëherë, Uashingtoni ka vënë sanksione të ashpra mbi ekonominë e Iranit, ndërsa ky i fundit ka nisur të shkelë kufizimet e përcaktuara me marrëveshjen bërthamore.

SHBA-ja do marrëveshje të re dhe, këtë javë, Trump foli për mundësinë e një takimi me presidentin e Iranit, Hassan Rohani, në Asamblenë e Përgjithshme të Kombeve të Bashkuara.

Por, Rohani, më herët, e ka përjashtuar një mundësi të tillë, ashtu si edhe atë për negocimin e një marrëveshjeje të re bërthamore. rel

Bahamas

Uragani Dorian u forcua sërish në stuhi të kategorisë 3, pasi shkaktoi vdekjen e së paku 20 personave në ishujt Bahamas.

Komisionari për çështje humanitare i Kombeve të Bashkuara, Mark Lowcock, tha se rreth 70,000 njerëz “kanë nevoja të menjëhershme për ndihmë” në Bahamas.

Ndihmat urgjente përfshijnë strehimin, ujin e pijshëm, ushqimet dhe ilaçet, tha ai.

Qendra Kombëtare e Uraganeve e Shteteve të Bashkuara tha se stuhia po lëviz drejt bregdetit të Atlantikut në SHBA, me erëra deri në 184 kilometra në orë.

Dorian kërcënon të përfshijë brigjet e ulëta nga Xhorxhia në jugperëndim të Virxhinias.

Të enjten, suhia pritet të zbarkojë në dy Karolinat.

Dorian ka zbarkuar në Bahamas në fillim të javës, fillimisht si stuhi e kategorisë pesë, me erëra deri në 250 kilometra në orë.

Kryeministri i Bahamas, Hubert Minnis, i cilësoi dëmet e shkaktuara atje si “historike”.

SHBA

Librat që e bënë të famshme J.K.Rowling duke u shndërruar në një fenomen të rrallë letrar me 500 milionë kopje të shitura në mbarë botën, tetë filma, një muzikal në Broadway, dhe tematike të parqeve të lojërave, nuk do të gjenden më në raftet e librarisë së një shkolle katolike në Tennessee, të Shteteve të Bashkuara.

Që prej kohës kur ata u botuan për herë të parë, librat dhe shkrimtarja Joanne Rowling, kanë fituar kundërshtarë si mes të krishterëve ashtu edhe myslimanëve. Një përplasje e fundit raportohet se ka ndodhur në Nashville, SHBA shkruan CNN.

Pastori Dan Reehil nga një shkollë famullie katolike ka zbuluar se librat për magjistarin anglez Harry Potter nuk janë më në dispozicion për studentët për shkak të përmbajtjes së tyre, raporton ‘The Tennessean’.

Ai ka këmbëngulur në heqjen e tyre me pretendimin se magjitë dhe mallkimet që përmbajnë, janë të vërteta. Ai i përshkruan si një lloj shpërthimi të magjisë dhe okultit që synon t`i shtyjë gjeneratat e reja drejt paganizmit, duke minuar vlerat e krishtera e duke nxitur kureshtjen e më të vegjëlve në drejtim të magjisë.

“Këto libra paraqesin magji si të mirë ashtu edhe të keqe, gjë që nuk është e vërtetë, por në fakt një mashtrim i zgjuar. Mallkimet dhe magjitë e përdorura në libra janë mallkime dhe magji aktuale; të cilat kur lexohen nga një qenie njerëzore rrezikojnë të çojnë në përhapjen e shpirtrave të këqij te personi që lexon tekstin””- raporton prifti.

Guvernatorët e Floridas dhe Karolinës Veriore kanë nisur urdhra për evakuim të detyrueshëm në disa pjesë të këtyre vendeve teksa Uragani Dorian, një stuhi e kategorisë së pestë me erëra deri në 295 kilometra në orë, u afrohet brigjeve të kësaj zone.

Guvernatori i Karolinës Veriore, Henry McMaster ka urdhëruar evakuimin e gjithë personave që jetojnë në zonat bregdetare në shtetin e tij.

Në Florida, guvernatori, Ron DeSantis, ka bërë thirrje për evakuim nga qarku, Palm Beach County deri në zonën Daytona Beach, ka raportuar agjencia e lajmeve, Reuters.

Miliona banorë janë përgatitur për këtë stuhi.

Qendra Kombëtare për Uragane ka thënë se stuhia pritet të përfshijë brigjet e Floridës në orët e vona të 2 shtatorit.

Kjo stuhi ka përfshirë Ishujt Bahamas, duke përmbysur veturat, ka shkatërrruar linjat e energjisë elektrike, teksa mijëra persona janë strehuar në shkolla, xhami apo vende tjera.

Dorian konsiderohet uragani i dytë më i fuqishëm në Oqeanin Atlantik nga viti 1950.

Një milioner i cili është shef i një agjencie modelingu që mendohet se ka informata kyçe rreth skandalit të Jeffrey Epstein ‘është zhdukur si një fantazmë pa asnjë gjurmë’.

Jean-Luc Brunel, 72 vjeçar, është zhdukur ndërkohë që policia ka kërkuar nga autoritetet franceze që ai të merret urgjentisht në pyetje. Hetuesit e rastit të Epstein kanë prova se ai ka përdorur seksualisht vajza të mitura. E këto abuzime mund të kenë ndodhur në Brazil, SHBA dhe Evropë.

Epstein e vrau veten në burg më 10 gusht. Të paktën kështu mendohet sepse ka akuza dhe teori që kanë ngjallur dyshime se ai mund të jetë vrarë, transmeton Gazeta Express.

Brunel, i cili për herë të fundit është parë në Nju Jork, mohon të gjitha akuzat se mund të jetë i përfshirë në të njëjtat krime me të cilat është akuzuar Epstein.

Një burim ligjor nga Parisi për Daily Mirror ka thënë: ‘Ai është një fantazmë e cila është zhdukur pa asnjë gjurmë’.

Akuzat ndaj tij vijnë pasi që modelja Svetlana Pozhidaeva, e cila punonte në kompaninë e tij, u fotografua në shtëpinë e Epstein, i cili akuzohej për pedofili. Rasti kishte ndodhur në vitin 2016.

Rusja, Pozhidaeva, babai i së cilës është Kolonel në Ushtrinë e Kuqe, mohon se ajo është në atë fotografi.

Pezullimi këtë muaj nga Shtëpia e Bardhë të akreditimit të një gazetari, po kritikohet nga mbrojtësit e lirisë së shtypit. Ata thonë se ky është një shembull i përpjekjeve të administratës së Presidentit Donald Trump për të heshtur gazetarët dhe zërat e tjerë kritikë.

Sekretarja e shtypit e Shtëpisë së Bardhë, Stephanie Grisham, pezulloi për 30 ditë kredencialet e korrespondentit të revistës Playboy, njëkohësisht edhe analist i kanalit CNN, Brian Karem. Masa u mor pasi në përfundim të një takimi për mediat sociale, zoti Karem u përfshi në një shkëmbim me tone të larta me ish-këshilltarin e Presidentit Trump, Sebastian Gorka, i cili drejton një emision radiofonik.

Ky është rasti i dytë që Shtëpia e Bardhë tërheq akreditimin e një korrespondenti, ndërkohë që Presidenti Trump vazhdon të denigrojë organet mediatike duke i quajtur ato “fake news” dhe “armiq të popullit”, duke inkurajuar kështu edhe mosbesimin tek mediat.

Nëntorin e kaluar, Shtëpia e Bardhë ndërmori hapin e pazakontë për epokën moderne, të heqjes së kredencialeve për korrespondentin e kanalit CNN, Jim Acosta, vetëm pak orë pasi ai pati një shkëmbim sfidues me Presidentin Trump gjatë një konference për shtyp në Shtëpinë e Bardhë. Pasi kanali CNN paditi në gjykatë administratën Trump, një gjykatës federal urdhëroi rikthimin e kredencialeve të shtypit për zotin Acosta, duke vendosur se pezullimi kishte shkelur të drejtën e tij për një proces të rregullt.

Tashmë, zoti Karem ka paditur Presidentin Trump dhe zëdhënësen Grisham, për shkeljen e të drejtave të tij kushtetuese, dhe i kërkoi gjykatës federale në Uashington që t’i rikthejë kredencialet e tij të akreditimit. Gjykatësi Rudolph Contreras, shprehu pakënaqësinë e tij për sjelljen e zotit Karem, por edhe për standartet e Shtëpisë së Bardhë për heqjen e kredencialeve të tij. Gjatë seancës dëgjimore të zhvilluar të martën, Gjykatësi tha se do të jepte një vendim ndoshta që ditën e premte.

“Siç provoi ky rast, natyra e gazetarisë ka ndryshuar shumë”, tha Gjykatësi Contreras. “Po përpiqem të kuptoj se ku ndodhet kufiri”.

Ndërkaq, juristët e Departamentit të Drejtësisë që përfaqësonin Shtëpinë e Bardhë i quajtën e veprimet e zotit Karem “qartësisht të papranueshme” dhe mbrojtën procedurën e ndjekur për heqjen e akreditimit të tij si “transparente, të mirëmenduar dhe të kujdesshme”. Gazetari veteran tha se ishte piketuar nga Shtëpia e Bardhë për shkak të mbulimit të tij kritik të administratës dhe pyetjeve të hapura për Presidentin Trump.

“Ata vetëm duan të më ndëshkojnë”, tha zoti Karem në një intervistë për Zërin e Amerikës. “Duan të më ndëshkojnë pasi nuk u pëlqejnë ato që unë shkruaj. Që nga fillimi i kësaj administrate unë kam shkruar mbi 100 artikuj dhe i kam drejtuar pyetje shumë të drejtpërdrejta Presidentit. Nuk mendoj se i pëlqejnë pyetjet e mprehta dhe nuk mendoj se atij dhe stafit të tij i pëlqejnë artikujt e mi”.

Nora Benavidez, drejtore për programet për shprehjen e lirë në SHBA, në organizatën PEN America, gjithashtu po e padit administratën Trump dhe paraqiti këtë javë një raport në mbrojtje të padisë së zotit Karem. Ajo thotë se pezullimi i kredencialeve është pasqyrë e trajtimit nga Shtëpia e Bardhë të zërave disidentë.

“Është një shembull i përpjekjeve për të vendosur në objektiv gazetarët që i drejtojnë pyetje të vështira Shtëpisë së Bardhë dhe që janë ndoshta kërkues dhe që dëshirojnë ta mbulojnë Shtëpinë e Bardhë në mënyra që nuk i pëlqejnë Presidentit”, thotë zonja Benavidez. “Ky vetë është diskriminim dhe shkelje e Amendamentit të Parë”.

Shtëpia e Bardhë i refuzon këto akuza.

“Realiteti është se trupa e gazetarëve e Shtëpisë së Bardhë është e përbërë nga gazetarë që drejtojnë pyetje agresive Presidentit dhe zyrtarëve të Shtëpisë së Bardhë; një pjesë e mirë e tyre janë jashtëzakonisht kritikë ndaj Presidentit dhe politikave të tij”, shkruhet në dokumentin e juristëve të Departamentit të Drejtësisë, në përgjigje të padisë së zotit Karem, e cila u paraqit në datën 20 gusht.

58-vjeçari Brian Karem është një gazetar me eksperiencë i medias së shkruar dhe asaj televizive, një aktivist i vetëdeklaruar i Amendamentit të Parë, i cili ka bërë edhe burg për shkak se refuzoi të zbulonte burimin e të dhënave konfidenciale. Gjatë dy viteve që ka punuar si korrespondent i Shtëpisë së Bardhë për revistën Playboy, ai është shndërruar në një figurë të debatueshme në trupën e gazetarëve, i lavdëruar nga mbështetësit për drejtimin e pyetjeve hulumtuese Presidentit Trump dhe zyrtarëve të administratës, ashtu siç edhe kritikohet nga të tjerë për stilin e tij të tepruar agresiv. za

Voal.ch – Rubén Díaz Jr., Kryetari i Bashkisë të Bronx në New York, me një popullsi prej gati 1.5 milionë banorë, një personalitet shumë i suksesshëm, i zgjedhur për 3 mandate rresht kujtoi dje ditëlindjen e Nënë Terezës, duke e shpallur 26 gushtin 2019 në Bronx si ditën e Nënë Terezës. Në një status në rrjetin social ai shkruan si më poshtë:

“Dhjetë vjet më parë, pata nderin të riemërtoja një bllok të Avenue Lydig midis Holland Avenue dhe Wallace Avenue, si  “Mother Teresa Way” – “Rruga Nëna Tereza”, duke përkujtuar vizitën e saj të vitit 1977 në manastirin e Bronksit të Motrave të Bamirësisë, si dhe të nderoja rrënjët e saj shqiptare.

Sot, ne jemi duke nderuar dhe festuar trashëgiminë humanitare të kësaj Fituesje Të Çmimit Nobel të Paqes, duke rikujtuar e festuar ditën e lindjes të Nënë Terezës dhe duke e shpallur 26 Gushtin 2019 në Bronx si Ditën e Nënë Terezës”!

Emërtimi u bë me nismën e z. Esad A. Rizai, Kryetar i Fondacionit Shqiptaro-Amerikan, një figurë e shquar e komunitetit shqiptaro-amerikan.

Shqiptarët e Bronx dhe gjithë shqiptarët kudo që janë i shprehin mirënjohjen Rubén Díaz Jr.kryetarit të Bashkisë të Bronx të New Yorkut.

A nuk duhet të reflektojmë ne shqiptarët si komb, kur Bota e Qyterëruar e nderon Nënë Terezën, ne çfarë na takon të bëjmë ?

Joe Walsh, ish-ligjvënës nga Illinois dhe tashmë drejtues i një emisioni radioje, njoftoi të dielën se do të sfidojë Presidentin Donald Trump për nominimin e Partisë Republikane për zgjedhjet presidenciale të vitit 2020.

57-vjeçari Walsh shërbeu për një mandat në Dhomën e Përfaqësuesve dhe humbi garën e rizgjedhjes në vitin 2012. Ai e njoftoi kandidaturën e tij gjatë emisionit “This week” të kanalit ABC News.

“Po kandidoj pasi ai është i papërshtatshëm”, tha zoti Walsh për Presidentin Trump, duke e përshkruar atë si “të paaftë”, “fanatik” dhe “narcisist”, epitete të përdorura shpesh nga demokratët ndaj Presidentit Trump, i cili kërkon një mandat të dytë katërvjeçar.

“Dikush duhet të ngrihet dhe duhet të ekzistojë një alternativë”, tha zoti Walsh.

Niveli i miratimit të Presidentin Trump në anketime vazhdon të jetë në kuotën e 40%-shit, por ai gëzon mbështetje të dyfishuar në radhët e republikanëve, të cilët vazhdojnë të miratojnë periudhën e tij në detyrë prej 2 vitesh e gjysëm.

Rreth 24 demokratë konkurojnë për të marrë nominimin e partisë së tyre për t’iu kundërvënë Presidentit Trump në zgjedhjet e 3 nëntorit 2020, ndërkohë që zoti Walsh është vetëm republikani i dytë që kërkon t’i marrë Presidentit nominimin republikan. Ish-guvernatori i Masaçusetsit, Bill Weld, shpalli kandidaturën e tij në muajin prill, por ka marrë mbështetje të vogël.

Zoti Walsh tha për Presidentin Trump: “Vendi është i lodhur nga inatosjet e këtij njeriu; ai është një fëmijë”. Zoti Walsh, i cili është si Presidenti Trump mbështetës i vijës së ashpër për emigracionin, tha se do ta sfidojë me pikëpamje konservatore dhe mbi baza morale. za

Ushtria amerikane do të ngrejë javën e ardhshme një komandë të re luftarake, e para e këtij lloji në më shumë se një dekadë.

Zëvendës Presidenti Mike Pence dhe zyrtarët e Pentagonit njoftuan se Komanda amerikane e Hapësirës do të ngrihet zyrtarisht më 29 gusht.

Pentagoni nuk ka ngritur një entitet të tillë që nga viti 2009, kur u krijua Komanda Kibernetike e SHBA. Departamenti i Mbrojtjes aktualisht ka 10 komanda luftarake, dhe secila ka ose një mision gjeografik ose një funksional për operacionet ushtarake.

Gjenerali i Forcave Ajrore John Raymond është konfirmuar nga Senati si drejtuesi i parë i Komandës së Hapësirës.

Krijimi i komandës shihet nga disa zyrtarë si një hap i mundshëm drejt krijimit të një force hapësinore si entitet i veçantë ushtarak.

“Forca Hapësinore e Shteteve të Bashkuara do të bëjë që vendi ynë të jetë i përgatitur të mbrojë njerëzit tanë, interesat tona dhe vlerat tona në një hapësirë të gjerë dhe këtu në Tokë me teknologjitë që do të mbështesin mbrojtjen tonë të përbashkët për zonat e gjera të hapësinore,” tha zoti Pence.

Ai tha se Forca e Hapësirës në të ardhmen ka ende nevojë për financim dhe autorizim të Kongresit, por ai shtoi se pret që kjo të ndodhë së shpejti.

Ngritja e Komandës Hapësinore do të përshpejtojë përpjekjen prej disa dekadash për të riorganizuar dhe përmirësuar aftësitë teknologjike të ushtrisë në hapësirë, të cilat nganjëherë kanë marrë më pak vëmendje pasi Forcat Ajrore janë përqendruar tek aeroplanët e luftës dhe përparësitë e tjera luftarake.

Roli i ushtrisë në hapësirë ka qenë vazhdimisht objekt analizash të hollësishme, sepse SHBA gjithnjë e më shumë po mbështetet në orbitë tek satelitët, të cilët të vështira për tu mbrojtur. Satelitët ofrojnë komunikime, navigacion, inteligjencë dhe shërbime të tjera jetësore për ushtrinë dhe ekonominë kombëtare.

Gjatë vitit të kaluar, kjo çështja mori urgjencë në klimën e konkurrencës në rritje dhe kërcënimeve nga vendet rivale. za

Financieri amerikan, Jeffrey Epstein ka nënshkruar një testament dy ditë para se të kryente vetëvrasje në një burg të Nju Jorkut, kanë raportuar mediat në Shtetet e Bashkuara.

Në disa dokumente të gjykatës është bërë e ditur se pasuria e Epstenit kap shifrën e 577 milionë dollarëve, mirëpo nuk është detajuar se kush janë përfituesit, ka raportuar agjencia e lajmeve, The Associated Press.

Epstein ka vdekur teksa ka qenë duke pritur nisjen e seancës gjyqësore kundër tij për akuzat e trafikimit seksual dhe komplote tjera.

Një ekzaminues mjekësor në Nju Jork ka thënë se 66-vjeçari, trupi i të cilit është gjetur i vdekur më 10 gusht, ka kryer vetëvrasje.

Ai ishte deklaruar i pafajshëm për akuzat që rëndojnë kundër tij, mirëpo ka mundur të përballet me burgim deri në 45 vjet.

Ditë më parë, Prokurori i Përgjithshëm amerikan, William Barr, ka thënë se Departamenti i Drejtësisë ka gjetur “parregullësi serioze” në burgun federal ku Epstein ka kryer vetëvrasje.

Barr po ashtu ka paralajmëruar se ky rast nuk është as afër përfundimit dhe se kushdo që ka bërë komplot me Epstein “nuk duhet të pushojë i qetë”.

Policia në shtetin e Ohajos.

Policia e shtetit Ohajo të SHBA-së, ka arrestuar një person, për të cilin besohet se ka kërcënuar se do të sulmojë me të shtëna një qendër të komunitetit hebre.

James Reardon, 20 vjeçar, u arrestua pasi kishte postuar një video të dyshimtë në internet, ku shkruante se “policia ka identifikuar sulmuesin në qendrën hebreje. Ai është Seamus O’Reardon, një nacionalist i bardhë”.

Policia beson se ky emër është pseudonimi i James Reardon.

Një kontroll në shtëpinë e tij zbuloi disa armë, dhe një maskë gazi, tha policia.

Gjatë kontrollit është gjetur edhe material me përmbajtje të nacionalistëve të bardhë.

Të shtënat në një sinagogë në Pittsbourg, vitin e kaluar, lanë të vdekur 11 persona. rel

Policia arrestoi të paktën 13 vetë të shtunën në Portland të shtetit Oregon, si edhe vendosi barrierë betoni, mbylli rrugë dhe ura, si edhe konfiskoi një numër të madh armësh në një përpjekje për të parandaluar dhunën mes grupeve të së djathtës së skajshme dhe kundërprotestuesve anti-fashistë.

Shefja e policisë, Danielle Outlaw e përshkroi të shtunën si një “ditë të gjatë dhe të mundimshme” dhe tha se shufra metalike, mburoja dhe sende të tjera të forta u konfiskuan nga forcat e policisë, në qendrën e qytetit ku pati shumë njerëz, por jo incidente madhore mes dy grupeve.

Protesta ishte organizuar nga grupi i së djathtës së skajshme “Proud Boys”. Përballë tyre ishte grupi i veshur me të zeza i protestuesve antifashistë.

Danielle Outlaw tha se autoritetet arritën të mbajnë grupet larg njëri tjetrit.

Zëdhënësja e policisë tha se në një periudhë të ditës rreth 1 mijë e 200 veta ishin në rrugë por numri ra në rreth 400 më vonë pasdite.

Kryebashkiaku i Portlandit, Ted Wheeler tha se afro 1 mijë oficerë të policisë së Portlandit ishin në terren të shtunën të ndihmuar nga Policia Shtetërore e Oregonit, forca të tjera policie dhe FBI-ja.

Në një konferencë shtypi në mbrëmje au the se ngjarja kishte lidhje me “një lëvizje në rritje të nacionalizmit të bardhë” dhe një ndjesi në frike në rritje.

Kryebashkiaku tha se Joe Biggs, organizatori i demonstratës së të djathtës së skajshme, nuk ishte i mirërpritur në Portland.

Biggs tha se e shtuna ishte një sukses, duke iu referuar një mesazhi të Presidentit Donald Trump në Twitter, ku ai linte të kuptohej se do të merrte masa ndaj grupit Antifa që organizonte kundërprotestën, por nuk përmendi protestën e së djathtës së skajshme. za

Udhëheqësja e Dhomës së Përfaqësuesve në SHBA, Nancy Pelosi.

Marrëveshja tregtare në mes të Shteteve të Bashkuara dhe Britanisë së Madhe nuk do të përfshihet për diskutim në Kongres, nëse Brexiti minon të ashtuquajturën Marrëveshja e të Premtes së Mirë, ka thënë udhëheqësja e Dhomës së Përfaqësuesve në SHBA, Nancy Pelosi.

Pelosi ka thënë se largimi i Britanisë së Madhe nga Bashkimi Evropian nuk mund të lejohet që të rrezikojë marrëveshjen për paqe me Irlandën.

Komentet e saj kanë ardhur pasi Këshilltari amerikan për Siguri Kombëtare, John Bolton ka thënë se Britania e Madhe do të jetë “e para në listë” për marrëveshje tregtare me SHBA-në.

Bolton i ka bërë këto deklarata pasi ka biseduar me kryeministrin britanik, Boris Johnson në Londër.

Rivendosja e kontrolleve kufitare në mes të Irlandës Veriore dhe Republikës së Irlandës, nëse Britania largohet nga BE-ja pa marrëveshje më 31 tetor të këtij viti, konsiderohet rrezik për një marrëveshje të arritur më 1998, e cila i ka dhënë fund konfliktit të përgjakshëm në Irlandën Veriore.

“Pavarësisht rrethanave, Brexiti nuk duhet të lejohet që të rrezikojë Marrëveshjen e të Premtes së Mirë”, ka thënë Pelosi përmes një deklarate.

Bolton në anën tjetër, ka thënë se administrata e presidentit amerikan, Donald Trump mbështet një Brexit pa marrëveshje.

Bolton: SHBA-ja do ta mbështeste vendimin e Britanisë për Brexit pa marrëveshje

Kryeministri i ri britanik, Boris Johnson ka thënë se do ta largojë Britaninë në këtë datë me apo pa marrëveshje nga blloku evropian, derisa ligjvënësit britanikë janë zotuar se do të rrëzojnë secilën qeveri që tenton të largojë Britaninë nga blloku evropian pa një marrëveshje.

Vendimi për largim të Britanisë nga blloku evropian ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.

Prokurori i Përgjithshëm amerikan, William Barr, ka thënë se Departamenti i Drejtësisë ka gjetur “parregullsi serioze” në burgun federal ku biznesmeni, Jeffrey Epstein, ka kryer vetëvrasje gjatë fundjavës.

Barr ka thënë të hënën se ai është zemëruar kur ka kuptuar se punëtorët e Qendrës Korrektuese në Nju Jork, “kanë dështuar që ta mbrojnë të burgosurin”, transmeton agjencia e lajmeve, The Associated Press.

Epstein ka vdekur të shtunën, pasi zyrtarët e burgut kanë thënë se ai ka kryer vetëvrasje.

Jeffrey Epstein.

Ai ka qenë në pritje të gjykimit pas akuzave për trafikime seksuale.

Barr nuk ka ofruar të dhëna specifike, mirëpo ka thënë se hetimet e Byrosë Federale të Hetimit (FBI) dhe inspektorëve të Departamentit të Drejtësisë janë duke vazhduar.

Ai i ka bërë këto deklarata në një konferencë për media në Nju Orlliens.

Barr po ashtu ka paralajmëruar se ky rast nuk është as afër përfundimit dhe se kushdo që ka bërë komplot me Epstein “nuk duhet të pushojë i qetë”.