Kurt Volker ka dhënë dorëheqje nga pozita e të dërguarit të posaçëm të Shteteve të Bashkuara në Ukrainë, disa ditë pasi u përfshi në një polemikë mbi vendimin e presidentit, Donald Trump për të bllokuar ndihmën ushtarake për Kievin.

Universiteti shtetëror i Arizonës, ku Volker punon, konfirmoi raportimet e CNN, The New York Times dhe disa mediave tjera, se Volker ka dhnë dorëheqje.

Megjithatë, Shtëpia e Bardhë dhe Departamenti amerikan i Shtetit ende nuk e kanë konfirmuar këtë lajm.

Emri i Volker është përmendur në ankesën e një informatori, i cili ka alarmuar mbi vendimet e Trumpit me Ukrainën, ku sipas informatorit, presidenti amerikan ka bllokuar ndihmën ushtarake për Ukrainën, shtet i cili po lufton me separatistët e mbështetur nga Rusia në pjesën lindore të vendit, që prej vitit 2014.

Dhoma e Përfaqësuesve po ashtu ka kërkuar nga Sekretari amerikan i Shtetit, Mike Pompeo që të dorëzojë dokumentet e nevojshme për hetimet lidhur me procedurën e shkarkimit të Trumpit.

Demokratët kanë nisur procedurat për shkarkimin e Trumpit, pas një bisede ndërmjet tij dhe presidentit ukrainas, Volodymyr Zelenksiy.

Në telefonatën e 25 korrikut, Trump thuhet se i ka bërë presion homologut ukrainas, Zelensky, për të hetuar rivalin e tij kryesor nga Partia Demokratike, Joe Biden.

Demokratët thonë se presidenti Trump ka kërkuar ndihmë nga jashtë për të njollosur Bidenin – i cili shihet si kandidat i mundshëm për zgjedhjet presidenciale të vitit 2020 – dhe se ka përdorur ndihmën ushtarake për Ukrainën si mjet për të bërë pazare. rel

Debatet rreth ankesës së një informatori mbi bisedën telefonike të Presidentit Donald Trump me homologun e tij të Ukrainës, kanë marrë një zhvillim të ri me kërkesën e zotit Trump për dorëheqjen e një ligjvënësi kyç të lidhur me këtë çështje.

Zoti Trump pretendon se Adam Schiff, kryetari demokrat i komisionit të Zbulimit të Dhomës së Përfaqësuesve, i kishte keqintepretuar fjalët e tij gjatë një seance të Kongresit të enjten.

Zhvillimet pasojnë ankesën e një informatori që pretendon se zoti Trump i kishte kërkuar ndihmë Presidentit të ri të Ukrainës gjatë bisedës telefonike më 25 korrik për të kërkuar informacion inkriminues për ish-nënpresidentin Joe Biden dhe djalin e tij Hunter. Informacioni do të dëmtonte potencialisht të ardhmen e zotin Biden për t’u bërë kandidati zyrtar i demokratëve për të sfiduar zotin Trump në vitin 2020.

Zoti Trump bëri thirrje të premten për dorëheqjen e zotit Schiff, të cilin e akuzon për keqintepretimin gjatë një seance të ditës së enjte të arsyeve mbi vonesën e administratës në paraqitjen e ankesës së informatorit, Kongresit.

“Ai gjoja po lexonte variantin e saktë të zbardhur të bisedës, por ai i ndryshoi tërësish fjalët në mënyrë që të tingëllonte si diçka e tmerrshme dhe që unë të dukesha fajtor“, shkruante presidenti Trump në një postim në Twitter.

“Ndaj Adam Schiff gënjeu Kongresin dhe u përpoq të mashtrojë publikun. Bëj thirrje që ai të japë dorëheqjen menjëherë bazuar në këtë mashtrim!”, shkruan zoti Trump.

Në fjalën e hapjes gjatë seancës të së enjtes zoti Schiff tha se ankesa është “prova më e gjallë që Presidenti i Shteteve të Bashkuara ka shkelur betimin e bërë për pozitën që mban”.

Zoti Schiff tha se ndërsa Presidenti i Ukrainës Volodymyr Zelenskiy u përpoq ta bëjë për vete zotin Trump gjatë bisedës telefonike, përgjigja e presidentit siç tha ai “ishte si përgjigjja e një organizate klasike të krimit të organizuar” duke vazhduar më tej me interpretimin e tij të fjalëve që kishte thënë zoti Trump gjatë bisedës.

Në një intervistë të premten për rrjetin televiziv MSNBC zonja Pelosi tha se zoti Barr, zyrtari më i lartë i zbatimit të ligjit në vend “është një mashtrues” lidhur me mënyrën se si e kishte trajtuar ankesën.

Në një dokument të publikuar këtë javë nga Shtëpia e Bardhë me bisedën e zbardhur mes dy presidentëve shkruhet se zoti Trump i kishte kërkuar Presidentit Volodymyr Zelenskiy që të punojë me zotin Barr dhe avokatin e tij personal Rudy Giuliani për të hetuar zotin Biden dhe djalin e tij.

Zonja Pelosi akuzoi zotin Barr se ishte pjesë e një “fshehjeje” të telefonatës bashkë me Shtëpinë së Bardhë. “Mendoj se ajo që ata po bëjnë është mbulimi i asaj çka fshehën”, tha zonja Pelosi.

Të enjten, përpara se të largohej nga Nju Jorku ku mori pjesë në punimet e Asamblesë së Përgjithshme të Kombeve të Bashkuara, zoti Trump u tha disa anëtarëve të stafit amerikan në OKB se ai kërkon të dijë se kush ia dha informacionin informatorit.

Zoti Trump tha se kushdo që e ka bërë këtë “ishte pothuaj një spiun” dhe se “në kohërat e vjetra spiunët trajtoheshin ndryshe” siç shkruante gazeta The New York Times. za

Drejtori në detyrë i Zbulimit Kombëtar, i cili bllokoi publikimin e ankesës së një informatori, ankesë që ndodhet në qendër të një hetimi për shkarkimin e Presidentit Donald Trump, tha të enjten se punonjësi i paidentifikuar i zbulimit “veproi drejt” kur raportoi për shqetësimet lidhur me mënyrën se si e trajtoi Shtëpia e Bardhë një telefonatë mes Presidentit Donald Trump dhe udhëheqësit të Ukrainës.

Joseph Maguire tha në dëshminë e tij përpara komisionit të Zbulimit të Dhomës së Përfaqësuesve se informatori respektoi ligjin “në çdo hap të procesit” dhe shtoi se situata është e pashembullt. Ai tha se nuk i takon atij të përcaktojë se si ndërvepron Presidenti me udhëheqësin e një vendi tjetër.

Zoti Maguire u tha ligjvënësve se ai kishte vepruar në përputhje me “përgjegjësinë e tij për të respektuar ligjin në çdo hap” ndërsa u përball me pyetjet se pse fillimisht e kishte bllokuar publikimin e ankesës së informatorit.

Ai tha se nuk mund ta bënte publike ligjërisht ankesën sepse “nuk kishte kompetenca të hiqte” privilegjin ekzekutiv mbi informacionin.

“Unë nuk kritikova vendimin e Inspektorit të Përgjithshëm për faktin nëse shqetësimi ishte i besueshëm. Pyetja ime ishte nëse plotësonte kriterin për të qenë një shqetësim urgjent dhe kornizën shtatë ditëshe për të njoftuar për të. Nuk e vë në diskutim gjykimin e tij se kjo ishte një çështje serioze”, tha zoti Maguire.

Zoti Maguire pritet gjithashtu të dëshmojë edhe në komisionin e Zbulimit të Senatit në një seancë me dyer të mbyllura.

Para dëshmisë së tij, komisioni i Dhomës së Përfaqësuesve bëri publik tekstin e ankesës së punonjësit të zbulimit. “Gjatë kryerjes së detyrave të mia zyrtare, kam marrë informacion nga shumë zyrtarë të qeverisë amerikane se Presidenti i Shteteve të Bashkuara po përdor kompetencat e postit për të nxitur ndërhyrjen e një vendi të huaj në zgjedhjet e vitit 2020”, thuhej në ankesë.

Në ankesë thuhej gjithashtu se Shtëpia e Bardhë u përpoq më pas “të bllokonte” informacionin për të mos lejuar publikimin e tij.

Të mërkurën në mbrëmje, disa ligjvënës të komisionit të Zbulimit janë lejuar të shohin ankimin e informatorit. Përfundimet e tyre janë të ndara sipas linjave partiake. Demokratët thonë se në ankim ka fakte që tregojnë keqbërje nga ana e Presidentit ndërsa republikanët thonë se publikimi i tij nuk do të shkaktonte asnjë shqetësim për presidencën e zotit Trump.

Një nga ligjvënësit republikanë të komisionit të Zbulimit në Senat dha një mesazh për ligjvënësit e të dyja palëve.

“Ka gjëra vërtet shqetësuese këtu“, tha Ben Sasse për gazetarët pasi lexoi dokumentin. “Republikanët nuk duhet thjesht të shtrëngojnë radhët dhe demokratët nuk duhet të kishin përdorur fjalën shkarkim pa ditur asgjë mbi thelbin e ankimit“.

Polemikat nisën javën e kaluar pas njoftimeve në media se një informator i paidentifikuar brenda komunitetit të zbulimit kombëtar ishte alarmuar lidhur me një seri veprimesh brenda administratës Trump, të cilat përfshijnë atë që dihet tashmë, një telefonatë në muajin korrik mes zotit Trump dhe Presidentit të Ukrainës Volodymyr Zelenskiy.

Informatori kontaktoi Inspektorin e Përgjithshëm të Zbulimit, i cili e quajti ankesën “serioze” dhe “urgjente”.

Avokatët e informatorit kanë qenë në kontakt me të dy komisionet e zbulimit në Kongres, në një përpjekje për të përpunuar detajet e një takimi të drejpërdrejtë të tij me ligjvënësit e këtyre komisioneve, nëse do të ishte e nevojshme. za

Adam Schiff

Adam Schiff, i cili kryeson Komitetin e Inteligjencës në Dhomën e Përfaqësuesve të Shteteve të Bashkuara, i cilësoi veprimet e presidentit Donald Trump, të detajuara në ankesën e një informatori, si “krim i organizuar klasik”.

Schiff i bëri komentet të enjten, teksa hapi një seancë dëgjimore për ushtruesin e detyrës së drejtorit të Inteligjencës Kombëtare, Joseph Maguire.

Paraprakisht, Komiteti i Dhomës së Përfaqësuesve publikoi një version të paklasifikuar dhe të redaktuar të ankesës, që informatori e ka ngritur tek inteligjenca, ditë më parë.

Në ankesë thuhet se Trump ka kërkuar ndihmë nga Ukraina që të ndërhyjë në zgjedhjet presidenciale në SHBA, vitin e ardhshëm.

Trump e mohoi çdo keqbërje.

“A ka rrethana për fajësim? Absolutisht jo”, tha Trump në një postim në Twitter.

Maguire tha në seancën dëgjimore se informatori “e ka bërë gjënë e duhur” me ngritjen e ankesës dhe se ai ka treguar “më shumë përkushtim për vendin dhe më shumë respekt për betimin e presidentit, sesa vetë presidenti”.

Ankesa e informatorit është në qendër të hetimeve që po bën Dhoma e Përfaqësuesve – e kontrolluar nga demokratët – kundër presidentit Trump.

Demokratët synojnë ta nxjerrin çështjen e shkarkimit të presidentit në Senat.

Ankesa e informatorit përqendrohet rreth një bisede telefonike midis Trumpit dhe homologut të tij ukrainas, Volodymyr Zelenskiy, të zhvilluar më 25 korrik.

Informatori ka thënë se Trump i ka kërkuar Zelenskiyt të hetojë ish-nënpresidentin amerikan, Joe Biden, dhe djalin e tij për korrupsion.

Joe Biden mund të jetë rival i Trumpit në zgjedhjet e 2020-ës. rel

Komiteti për Shërbime Ushtarake në Senatin Amerikan ka mbajtur një seancë në të cilën është diskutuar për një sërë çështjes që ndërlidhen me sigurinë në rajonin e Evropës Juglindore, interesin e Shteteve të Bashkuara dhe rreth forcimit të ndikimit ruso-kinez, shkruan Gazeta Express.

Në këtë mbledhje ka marrë pjesë edhe, Janusz Bugajski, bashkëpunëtor i lartë në Qendrën për Analizën e Politikave Evropiane, i cili ka thënë se situata në Bosnje e Hercegovinë dhe problemi i pazgjidhur ndërmjet Kosovës dhe Serbisë mbesin dy pikat më të nxehta në Ballkan.

“Një Ballkan i paqëndrueshëm dhe konfliktuoz dëmton sigurinë kombëtare të SHBA’së, dhe një tërheqje diplomatike do të ishte një humbje e madhe për SHBA’në. Nëse iu kujtohet, ne kemi investuar jashtëzakonisht kapital diplomatik, politik dhe ushtarak në atë rajon përgjatë 20-30 viteve të fundit. Për ne, çdo dështim dhe luftë e re , veçanërisht në Bosnjë ose në mes të Kosovës dhe Serbisë do të ishte një fatkeqësi e madhe. Jo vetëm që Rusia dhe Kina do të përfitonin nga kjo, por ata do ta përdornin një moment të tillë për të minuar edhe vendet tjera evropiane”, ka thënë Bugajski, transmeton Gazeta Express.

Për të parandaluar një gjë të tillë, Bugajski ka thënë se Washingtoni duhet të përqendrohet në katër qëllime kryesore.

“Fillimisht, duke rritur sigurinë me përfshirjen e të gjithë Ballkanit në NATO, besoj se edhe vetë Serbia përfundimisht do të dëshironte të bëhej anëtare. Së dyti, zgjidhja e mosmarrëveshjes në mes të Kosovës dhe Serbisë dhe problemet e brendshme në Bosnje e Hercegovinë. Së treti kufizimi i investimeve të Kinës dhe rritja e investimeve amerikane, dhe së katërti zhbërja e ndikimit rus në gjithë Evropën”, ka potencuar Bugasjki në këtë seancë të Komitetit për Shërbime Ushtarake në Senatin Amerikan

Në këtë mbledhje ka marrë pjesë edhe nënkryetari ekzektutiv i “Atlantic Council, Damon Wilson, i cili ka thënë se Rusisë i mbetet rruga e lirë që të ketë ndikim në Ballkan, derisa nuk ka një marrëveshje ndërmjet Prishtinës dhe Beogradit.

“Pa marrëveshjen e Kosovës, Rusia ka një ndikim të madh mbi Serbinë dhe për rrjedhojë në të gjithë rajonin”, ka thënë Wilson, shkruan edicioni në gjuhën serbe i “Zërit të Amerikës”, transmeton Gazeta Express

Sipas tij mungesa e një marrëveshje nxit edhe debatet politike nacionaliste të cilat ngadalësojnë zhvillimin e demokracisë dhe u lejon politikanëve në Serbi dhe Kosovës të shmangen nga çështjet e rëndësishme të qeverisjes.

Në anën tjetër Bugajski ka thënë se nuk mund të imagjinojë një konflikt të armatosur ndërmjet Kosovës dhe Serbisë

Unë nuk mendoj se udhëheqja e Serbisë dhe Republika Srpska do të arrinin në këtë pikë. Por ata po luajnë me idenë e ndarjes, ata po luajnë edhe me idenë e de-funskionalizimit apo shtetit të dështuar. Unë mund të them se Banja Lluka është shndërruar një vend ku ndikimi i Rusisë është shumë i madh. Ndoshta më i madh se sa i Beogradit”, ka thënë ndër të tjera Bugajski.

Presidenti amerikan Donald Trump tha të dielën se nuk kishte bërë asgjë gabim në një bisedë telefonike me presidentin e ri të Ukrainës, duke iu referuar lajmeve se zoti Trump e kishte nxitur atë që të bënte hetime lidhur me djalin e ish-nënpresidentit dhe kandidatit demokrat për president, Joe Biden.

Duke folur me gazetarët, zoti Trump e cilësoi telefonatën me Presidentin Volodymyr Zelensky si “absolutisht të përkryer”.

“Biseda me të ishte përgjithësisht për ta uruar, folëm kryesisht për korrupsionin, korrupsioni i madh. Kishte të bënte kryesisht me faktin se ne nuk duam që njerëzit tanë, si nënpresidenti Biden dhe djali i tij, të kontribuojnë në korrupsionin që ekziston në Ukrainë”, tha zoti Trump.

Sipas njoftimeve të medias, presidenti amerikan e kishte nxitur zotin Zelensky rreth tetë herë gjatë bisedës së tyre që të hetonte të birin e zotit Biden. Sipas disa burimeve, synimi i zotit Trump ishte që të bindte zotin Zelensky të bashkëpunonte me avokatin e zotit Trump, Rudolph Giuliani për një hetim që mund të sabotonte zotin Biden.

Ministri i Jashtëm ukrainas, Vadym Prystaiko të shtunën mohoi që zoti Trump i kishte bërë presion zotit Zelensky gjatë telefonatës, duke i thënë organizatës mediatike Hromadski se Ukraina nuk do të merrte pozicione në politikën amerikane.

Presidenti Trump dhe zoti Guiliani kanë bërë thirrje prej javësh për një hetim për familjen Biden, pas njoftimeve të mediave këtë vit sipas së cilave një kompani energjitike ukrainase ishte përpjekur të siguronte ndikim në Shtetet e Bashkuara duke punësuar të birin e zotit Biden, Hunter.

Demokratët po e dënojnë atë që ata e shohin si fushatë të bashkërenduar për të goditur zotin Biden, emri i të cilit është përzier në ankesën e një punonjësi të paidentifikuar të zbulimit, i cili kishte shprehur shqetësime për veprimet e zotit Trump lidhur me familjen Biden. za

Ish-zëvendëspresidenti amerikan Joe Biden, kandidat demokrat për president në zgjedhjet e ardhshme presidenciale, ka kërkuar nga presidenti Donald Trump që të bëjë publike bisedën me presidentin ukrainas Volodymyr Zelenskiy, pas dyshimeve se Trump kishte kërkuar nga ai hetimin e Biden dhe djalit të tij që kishte biznes në Ukrianë.

Në një komunikatë të lëshuar të premten, Biden tha se Trump duhet që menjëherë të bëjë publik transkriptin e bisedave dhe pastaj populli do ta gjykojë vetë rastin.

Shtëpia e Përfaqësuesve është duke hetuar raportimet e mediave ku thuhet se Trump kishte kërcënuar administratën e Zelenskiyt gjatë një bisede telefonike për tërheqje të mbështetjes ushtarake ndaj Ukrainës nëse nuk hetohen Biden dhe djali i tij Hunter Biden.

Demokratët deklaruan se nëse kjo është e vërtetë, atëherë do të ishte keqpërdorim i pushtetit.

Pas fillimit të hetimeve të telefonatës mes Trump dhe Zelenskiyt, Shtëpia e Bardhë ka njoftuar javën e kaluar se do të lëshojë 250 milionë dollarë për ushtrinë e Ukrainës. rel

Presidenti i Shteteve të Bashkuara, Donald Trump, më 17 shtator, shpalli pesë emra si zëvendësues të mundshëm, për pozitën e lirë të këshilltarit të sigurisë kombëtare, katër prej të cilëve kanë punuar në Këshillin e Sigurisë Kombëtare, raportoi Reuters.

Duke folur para gazetarëve në bordin e aeroplanit presidencial, Trump renditi fillimisht, Ricky Waddell, një ish-këshilltar i sigurisë kombëtare, së bashku me Keith Kellogg, i cili aktualisht shërben si këshilltar për siguri i nënpresidentit amerikan, Mike Pence.

Më pas, Robert O’Brien, u veçua si një pasardhës i mundshëm i John Boltonit, i cili u shkarkua javën e kaluar nga ana e presidentit Trump. O’Brien është një veteran i politikës së jashtme në qarqet e partisë republikane.

Ish-oficeri i Agjencisë Qendrore të Inteligjencës (CIA), Fred Fleitz është një tjetër zëvendësim i mundshëm. Ai shërbeu si sekretar ekzekutiv i Këshillit të Sigurisë Kombëtare. Fleitz është kritik ndaj Iranit dhe ka pikëpamje të linjës së ashpër mbi islamin.

Lisa Gordon-Hagerty, nënsekretare e sigurisë bërthamore në Departamentin e Energjisë, gjithashtu u rendit si zëvëndësuese e mundshme e Boltonit. Ajo gjithashtu ka shërbyer në Këshillin e Sigurisë Kombëtare.

Pozita e këshilltarit të sigurisë kombëtare nuk kërkon konfirmim të Senatit të SHBA-së. Këshilltari-ja e sigurisë kombëtare jep këshilla për çështjet e mbrojtjes, të sigurisë dhe diplomacisë dhe është pozicioni më i lartë i Shtëpisë së Bardhë për sigurinë kombëtare.

Megjithëse këta emra u përmendën nga presidenti Trump, më vonë përmes një deklarate zëdhënësja e Shtëpisë së Bardhë, Stephanie Grisham, tha se lista nuk është e plotë.

Më 10 shtator, presidenti Donald Trump, e shkarkoi këshilltarin e sigurisë kombëtare, John Bolton, duke i thënë se shërbimet e tij në Shtëpinë e Bardhë nuk janë më të nevojshme.

Zëdhënësja e Shtëpisë së Bardhë, Stephanie Grisham u tha gazetarëve se “Presidenti (Donald Trump) nuk i kanë pëlqyer shumë politikat e tij (John Boltonit), dhe se ata kanë pasur mospajtime”.

Ish analisti i CIA-s komenton shkarkimin e Këshilltarit të Sigurisë nga Presidenti Donald Trump.

Ish analisti i CIA-s John Kiriakou diskuton rreth largimit të John Bolton nga Këshilltar i Sigurisë Kombëtare dhe hamëndëson se kush mund ta zëvendësojë.

John Kiriakou parashikon se Presidenti Donald Trump të mund emërojë  Stephen Biegun ose Douglas Macgregor për këshilltar të ardhshëm të sigurisë kombëtare.

“Unë duhet të pajtohem me Elizabeth Warren dhe Bernie Sanders se bota është një vend më i sigurt pa John Bolton që të merrte vendime të luftës dhe paqes,” vazhdoi Kiriakou.

“Nuk më shqetëson fakti se tani nuk kemi një këshilltar të sigurisë kombëtare; është më mirë të mos kesh askënd në këtë pozitë sesa të kesh John Bolton në pozitë. ”

“Ai u përpoq aktivisht të rrëzonte qeverinë e Venezuelës; ai u përpoq aktivisht të rrëzonte qeverinë iraniane; ai u përpoq në mënyrë aktive të rrëzonte qeverinë Siriane – dhe ky është vetëm në vitin e fundit! Pra, po, është më mirë të mos e kemi John Bolton në këtë pozicion, “tha Kiriakou./thegrayzone.com

SHBA-të tejkaluan Arabinë Saudite si eksportuesja më e madhe e naftës në botë në qershor, falë rritjes së prodhimit të naftës së argjilës në vend dhe kufizimeve të OPEC-ut që prekën kryesisht Arabinë Saudite.

“SHBA aktualisht është numër një në qershor, pasi eksportet e naftës së papërpunuar u rritën mbi 3 milionë fuçi në ditë, duke rritur eksportet totale të naftës së papërpunuar dhe produkteve në gati 9 milionë fuçi në ditë”, tha të enjten Agjencia Ndërkombëtare e Energjisë (IEA).

“Në të njëjtën kohë, Arabia Saudite zvogëloi eksportet e produkteve të naftës së papërpunuar dhe ato të rafinuara”, shtoi IEA në Raportin e Tregut të Naftës për shtatorin.

Raporti i IEA-së nuk jep shifra specifike për eksportet e naftës së papërpunuar të SHBA-së dhe Arabisë Saudite, megjithatë, shifrat e Nismës së Organizatave të Përbashkëta (JODI) tregojnë se eksportet e naftës së papërpunuar të Arabisë Saudite mesatarisht ishin 6.72 milionë fuçi në ditë në qershor, ndërsa eksportet e produkteve të përgjithshme të naftës mesatarisht ishin 1.27 milionë fuçi në ditë. Kjo solli sasinë totale të eksporteve të naftës për vendin në qershor në 7.99 milionë fuçi në ditë.

Në qershor, eksportet e naftës së papërpunuar të SHBA-së mesatarisht ishin 3.41 milionë fuçi në ditë ndërsa eksportet e përgjithshme të produkteve të naftës arritën në 5.44 milionë fuçi në ditë, duke sjellë vlerën totale të eksporteve të naftës në 8.85 milionë fuçi në ditë.

IEA tha se kompletimi i tubacioneve dhe terminaleve të nevojshme të naftës në SHBA tani bën të mundur rritjen e eksporteve të naftës në vend.

Megjithatë, Arabia Saudite riktheu pozitën e parë në eksportet e naftës në muajt korrik dhe gusht, tha IEA.

“Prodhimi amerikan u ndikua nga goditja e uraganit. Mosmarrëveshja tregtare e SHBA-së me Kinën gjithashtu e ka vështirësuar gjetjen e tregjeve për produktet e argjilës”, tha IEA.

Sa i përket prodhimit të naftës së papërpunuar, SHBA tejkaloi Arabinë Saudite në tetor 2018 me 11.2 milionë fuçi në ditë të prodhimit dhe më pas u tejkalua nga Rusia me 11.7 milionë fuçi në ditë në nëntor 2018 duke u bërë prodhuesja më e madhe e naftës së papërpunuar në botë.

Për shkak të marrëveshjes për kufizimin e prodhimit midis vedeve të OPEC-ut dhe aleatëve të saj, prodhimi i naftës së papërpunuar të Arabisë Saudite ishte mesatarisht 9.83 milionë fuçi në ditë në qershor, duke zbritur 4.6 për qind nga niveli mesatar i 2018 prej 10.31 milionë fuçi në ditë, thuhet në Raportin Mujor të Tregut të Naftës të OPEC-ut për shtator.

Eksportet e naftës së papërpunuar të SHBA-së u rritën gradualisht pas dhjetorit 2015 kur ish-presidenti Barack Obama hoqi ndalimin e vetë-imponuar katër dekada të eksporteve të naftës bruto të prodhuar në vend që ishte aktive që nga viti 1973 gjatë krizës së naftës të OPEC-ut. aa

Presidenti amerikan, Donald Trump ka shkarkuar nga detyra Këshilltarin e tij të Sigurisë Kombëtare, John Bolton.

“Unë e njoftova John Bolton mbrëmë se shërbimet e tij nuk janë më të nevojshme në Shtëpinë e Bardhë,” shkroi ai.

“Unë nuk isha dakord me shumë nga sugjerimet e tij,” shkruajti Trump, duke shtuar se një këshilltar i ri i sigurisë kombëtare do të emërohet javën e ardhshme.

Sekretari i shtypit i Shtëpisë së Bardhë Stephanie Grisham u tha gazetarëve: “Presidentit nuk i pëlqyen shumë politikat e tij, ata nuk pajtohen.”

Në përgjigje, Bolton shkroi në Twitter: “Unë ofrova të jepja dorëheqjen mbrëmë dhe Presidenti Trump tha:” Le të flasim për këtë nesër. “

Komisioni Juridik i Dhomës së Përfaqësuesve ka në plan të votojë për të përcaktuar kriteret për nisjen e procedurave për shkarkimin e Presidentit Donald Trump.

Kompania mediatike “Politico” njoftoi e para rreth këtij zhvillimi, duke thënë se raporti i saj bazohej në “shumë burime që ishin informuar rreth kësaj çështjeje”.

Komisioni pritet të votojë javën e ardhshme. Sipas Politico-s një projekt-rezolutë pritet të bëhet publike të hënën në mëngjes. Në artikull thuhet se demokratët “shpresojnë se një përcaktim i qartë i procesit për shkarkimin e presidentit do të forconte shanset tyre për të detyruar dhënien e dëshmive”.

Sidoqoftë mbetet e paqartë nëse ky proces do të çojë në ngritjen e një akuze ndaj presidentit si dhe nëse Senati që udhëhiqet nga republikanët do të votonte për largimin e presidentit nga detyra.

Komisione të ndryshme të Kongresit po shqyrtojnë një sërë çështjesh që lidhen me presidentin. Ato përfshijnë dështimin e tij për të publikuar deklaratat mbi të ardhurat, pagesat e bëra për të detyruar dëshmitarë që të mbyllin gojën e të mos bëjnë publike histori të sikletshme rreth tij si dhe shpenzimin e parave të taksapaguesve në hotelet dhe pronat e presidentit. za

Sekretari amerikan i Mbrojtjes, Mark Esper, tha se Irani mund të jetë më afër një mundësie për bisedime të reja rreth programit të tij bërthamor.

Deklarata vjen edhe pse Teherani njoftoi se ka ndërprerë edhe disa angazhime që ia kërkon marrëveshja bërthamore e vitit 2015.

Duke folur të premten në Londër, Esper tha se së shpejti mund të ketë vend për bisedime mbi programin bërthamor dhe raketor të Iranit.

“Duket se Irani, në njëfarë mënyre, po lëviz drejt atij vendit ku mund të bisedojmë. Shpresoj se do të luajë në atë drejtim”, tha Esper në Institutin e Shërbimeve të Bashkuara Mbrëtërore.

Irani dhe fuqitë botërore kanë arritur një marrëveshje në vitin 2015, në bazë të së cilës Irani ka kufizuar programin bërthamor në këmbim të lehtësimit të sanksioneve ndërkombëtare.

Por, presidenti i Shteteve të Bashkuara, Donald Trump, vitin e kaluar, është tërhequr nga kjo marrëveshje, duke thënë se nuk ka qenë e ashpër mjaftueshëm sa për të penguar Iranin nga zhvillimi i armës bërthamore.

Që atëherë, Uashingtoni ka vënë sanksione të ashpra mbi ekonominë e Iranit, ndërsa ky i fundit ka nisur të shkelë kufizimet e përcaktuara me marrëveshjen bërthamore.

SHBA-ja do marrëveshje të re dhe, këtë javë, Trump foli për mundësinë e një takimi me presidentin e Iranit, Hassan Rohani, në Asamblenë e Përgjithshme të Kombeve të Bashkuara.

Por, Rohani, më herët, e ka përjashtuar një mundësi të tillë, ashtu si edhe atë për negocimin e një marrëveshjeje të re bërthamore. rel

Bahamas

Uragani Dorian u forcua sërish në stuhi të kategorisë 3, pasi shkaktoi vdekjen e së paku 20 personave në ishujt Bahamas.

Komisionari për çështje humanitare i Kombeve të Bashkuara, Mark Lowcock, tha se rreth 70,000 njerëz “kanë nevoja të menjëhershme për ndihmë” në Bahamas.

Ndihmat urgjente përfshijnë strehimin, ujin e pijshëm, ushqimet dhe ilaçet, tha ai.

Qendra Kombëtare e Uraganeve e Shteteve të Bashkuara tha se stuhia po lëviz drejt bregdetit të Atlantikut në SHBA, me erëra deri në 184 kilometra në orë.

Dorian kërcënon të përfshijë brigjet e ulëta nga Xhorxhia në jugperëndim të Virxhinias.

Të enjten, suhia pritet të zbarkojë në dy Karolinat.

Dorian ka zbarkuar në Bahamas në fillim të javës, fillimisht si stuhi e kategorisë pesë, me erëra deri në 250 kilometra në orë.

Kryeministri i Bahamas, Hubert Minnis, i cilësoi dëmet e shkaktuara atje si “historike”.

SHBA

Librat që e bënë të famshme J.K.Rowling duke u shndërruar në një fenomen të rrallë letrar me 500 milionë kopje të shitura në mbarë botën, tetë filma, një muzikal në Broadway, dhe tematike të parqeve të lojërave, nuk do të gjenden më në raftet e librarisë së një shkolle katolike në Tennessee, të Shteteve të Bashkuara.

Që prej kohës kur ata u botuan për herë të parë, librat dhe shkrimtarja Joanne Rowling, kanë fituar kundërshtarë si mes të krishterëve ashtu edhe myslimanëve. Një përplasje e fundit raportohet se ka ndodhur në Nashville, SHBA shkruan CNN.

Pastori Dan Reehil nga një shkollë famullie katolike ka zbuluar se librat për magjistarin anglez Harry Potter nuk janë më në dispozicion për studentët për shkak të përmbajtjes së tyre, raporton ‘The Tennessean’.

Ai ka këmbëngulur në heqjen e tyre me pretendimin se magjitë dhe mallkimet që përmbajnë, janë të vërteta. Ai i përshkruan si një lloj shpërthimi të magjisë dhe okultit që synon t`i shtyjë gjeneratat e reja drejt paganizmit, duke minuar vlerat e krishtera e duke nxitur kureshtjen e më të vegjëlve në drejtim të magjisë.

“Këto libra paraqesin magji si të mirë ashtu edhe të keqe, gjë që nuk është e vërtetë, por në fakt një mashtrim i zgjuar. Mallkimet dhe magjitë e përdorura në libra janë mallkime dhe magji aktuale; të cilat kur lexohen nga një qenie njerëzore rrezikojnë të çojnë në përhapjen e shpirtrave të këqij te personi që lexon tekstin””- raporton prifti.

Guvernatorët e Floridas dhe Karolinës Veriore kanë nisur urdhra për evakuim të detyrueshëm në disa pjesë të këtyre vendeve teksa Uragani Dorian, një stuhi e kategorisë së pestë me erëra deri në 295 kilometra në orë, u afrohet brigjeve të kësaj zone.

Guvernatori i Karolinës Veriore, Henry McMaster ka urdhëruar evakuimin e gjithë personave që jetojnë në zonat bregdetare në shtetin e tij.

Në Florida, guvernatori, Ron DeSantis, ka bërë thirrje për evakuim nga qarku, Palm Beach County deri në zonën Daytona Beach, ka raportuar agjencia e lajmeve, Reuters.

Miliona banorë janë përgatitur për këtë stuhi.

Qendra Kombëtare për Uragane ka thënë se stuhia pritet të përfshijë brigjet e Floridës në orët e vona të 2 shtatorit.

Kjo stuhi ka përfshirë Ishujt Bahamas, duke përmbysur veturat, ka shkatërrruar linjat e energjisë elektrike, teksa mijëra persona janë strehuar në shkolla, xhami apo vende tjera.

Dorian konsiderohet uragani i dytë më i fuqishëm në Oqeanin Atlantik nga viti 1950.

Një milioner i cili është shef i një agjencie modelingu që mendohet se ka informata kyçe rreth skandalit të Jeffrey Epstein ‘është zhdukur si një fantazmë pa asnjë gjurmë’.

Jean-Luc Brunel, 72 vjeçar, është zhdukur ndërkohë që policia ka kërkuar nga autoritetet franceze që ai të merret urgjentisht në pyetje. Hetuesit e rastit të Epstein kanë prova se ai ka përdorur seksualisht vajza të mitura. E këto abuzime mund të kenë ndodhur në Brazil, SHBA dhe Evropë.

Epstein e vrau veten në burg më 10 gusht. Të paktën kështu mendohet sepse ka akuza dhe teori që kanë ngjallur dyshime se ai mund të jetë vrarë, transmeton Gazeta Express.

Brunel, i cili për herë të fundit është parë në Nju Jork, mohon të gjitha akuzat se mund të jetë i përfshirë në të njëjtat krime me të cilat është akuzuar Epstein.

Një burim ligjor nga Parisi për Daily Mirror ka thënë: ‘Ai është një fantazmë e cila është zhdukur pa asnjë gjurmë’.

Akuzat ndaj tij vijnë pasi që modelja Svetlana Pozhidaeva, e cila punonte në kompaninë e tij, u fotografua në shtëpinë e Epstein, i cili akuzohej për pedofili. Rasti kishte ndodhur në vitin 2016.

Rusja, Pozhidaeva, babai i së cilës është Kolonel në Ushtrinë e Kuqe, mohon se ajo është në atë fotografi.