VOAL

VOAL

Copyright © 2022

VOAL

SHBA

Agjentja ruse Maria Butina dëbohet nga SHBA-ja

Një grua ruse, e cila ka pranuar se ka vepruar si agjente e paregjistruar në Shtetet e Bashkuara, do të lirohet nga burgu në Florida dhe do të dëbohet.

Avokati i Maria Butinas, Bob Driscoll, tha se autoritetet amerikane të emigracionit do ta shoqërojnë atë deri në Rusi.

Butina është arrestuar në korrik të vitit 2018 në SHBA dhe është dënuar me 18 muaj burgim në prill, pasi ka pranuar se ka mbledhur informacione për Shoqatën Kombëtare të Pushkëve në SHBA dhe grupe të tjera amerikane, nën udhëzimet e një ish-ligjvënësi rus.

Ajo ka këmbëngulur se nuk është spiune dhe se të gjitha veprimet i ka bërë në mënyrë të hapur.

Autoritetet ruse thanë se Butina pritet të arrijë në Moskë të shtunën.

Detaje rreth largimit të saj nga SHBA-ja nuk janë të disponueshme tash për tash, tha avokati Driscoll.

Presidenti rus, Vladimir Putin, e ka kritikuar dënimin e Butinas, duke e cilësuar si “arbitrar”, dhe ka thënë se autoritetet në Moskë “nuk e kuptojnë se përse është dënuar ajo”. rel

Raporti i Muellerit bëhet cak i hetimeve penale

Rishikimi i hetimeve rreth ndërhyrjes ruse në zgjedhjet presidenciale të vitit 2016 në Shtetet e Bashkuara nga Departamenti amerikan i Shtetit, tani ka kaluar në fazën e hetimeve penale, kanë raportuar mediat amerikane.

Një person që ka folur në kushte anonimiteti për agjencinë e lajmeve Reuters, ka mohuar të deklarojë nëse është krijuar ndonjë juri e madhe për këto hetime.

Raportimet e para rreth kësaj çështjeje janë parë në të përditshmen amerikane, The New York Times.

Prokurori i Përgjithshëm amerikan, William Barr ka nisur një rishikim të hetimeve më herët gjatë vitit, pas ankesave që ka bërë presidenti amerikan, Donald Trump se fushata e tij është shënjestruar gabimisht nga inteligjenca amerikane dhe agjencitë për zbatim të ligjit në zgjedhjet e vitit 2016.

Demokratët dhe disa ish-zyrtarë për zbatim të ligjit kanë thënë se Barr është duke shfrytëzuar Departamentin e Drejtësisë për të ndjekur teori konspirative pa substancë, nga të cilat mund të përfitojë politikisht presidenti republikan si dhe të dëmtohen hetimet e kryera për Rusinë nga këshilltari special, Robert Mueller.

Në kuadër të hetimeve të tij, Barr u ka kërkuar ndihmë zyrtarëve britanikë dhe atyre australianë të drejtësisë, si dhe ka vizituar dy herë Romën, për takime me agjentë të inteligjencës, në mënyrë që të mësojë më shumë për njerëzit e përmendur në raportin e Muellerit.

Hetimet e Muellerit patën gjetur se Moska ka ndërhyrë në zgjedhjet e vitit 2016 në të mirë të Trumpit, çka ka rezultuar me ngritje të padive penale për disa ish-ndihmës të fushatës së presidentit. Mirëpo Mueller ka thënë se nuk ka pasur të dhëna të mjaftueshme për të prezantuar komplot kriminal për Rusinë.

Barr ka emëruar Prokurorin, John Durham për të udhëhequr rishikimin e hetimeve, rreth asaj nëse agjenci amerikane të inteligjencës apo ato për zbatim të ligjit kanë vepruar në përputhje me ligjin kur kanë hetuar lidhjet e mundshme në mes të fushatës së Trumpit dhe Rusisë, veprime të cilat më pas kanë rezultuar me hetimet e Muellerit.

Në prill, Barr u pati thënë anëtarëve të Kongresit se beson që në fushatën e Trumpit më 2016 ka ndodhur një “spiunim”.

“Pyetja është nëse është planifikuar në mënyrë adekuate. Nuk po them se ka qenë në mënyrë jo të duhur. Mirëpo më duhej ta hetoj atë”.

Trump i cili i cilëson hetimet rreth Rusisë si “gjueti shtrigash” dhe mashtrim, ka thënë se zyrtarët amerikanë kanë nisur hetimet për të dëmtuar atë në fitoren e pozitës së presidentit në Shtëpinë e Bardhë, pavarësisht pse ai dhe mbështetësit e tij nuk ofrojnë të dhëna për këtë pretendime.

Aktualisht Trump është duke u përballur edhe me një hetim tjetër të demokratëve për shkarkim të tij, pasi një informator ka treguar detaje rreth bisedës së presidentit amerikan me homologun e tij ukrainas, Volodymyr Zelenskiy më 25 korrik, në të cilin Zeleskiyt i kërkohet të kryejë hetime për ish nën-presidentin amerikan, Joe Biden dhe djalin e tij Hunter.

Hetimet e Dhomës së Përfaqësuesve mund të rezultojnë me gjykim në Senat rreth asaj nëse Trump duhet të largohet nga zyra e presidentit.

Sipas Kushtetutës amerikane, Dhoma e Përfaqësuesve ka fuqi për të shkarkuar presidentin për “shkelje të rënda dhe keqbërje”.

Kjo është hera e katërt në historinë amerikane që ka nisur një procedurë për shkarkim të presidentit, ndonëse asnjëri prej presidentëve nuk është larguar nga pozita përmes këtij procesi.

Përgatiti: Krenare Cubolli

Senatori Johnson: Kosova dhe Serbia kërkuan angazhim më të madh të SHBA-së

Prishtina dhe Beogradi donin një angazhim më të madh të Shteteve të Bashkuara për zgjidhjen e çështjes së Kosovës, madje kërkuan që edhe unë të angazhohem për këtë, tha senatori republikan në Uashington, Ron Johnson.

Në një intervistë për Zërin e Amerikës në gjuhën serbe, Johnson tha se i dërguari i posaçëm i Shtëpisë së Bardhë për dialogun, Richard Grenell, dhe përfaqësuesi special i Departamentit amerikan të Shtetit për Ballkanin, Matthew Palmer kanë plan të përbashkët për zgjidhjen e çështjes së Kosovës, fokusi kryesor i të cilit është ekonomia.

Johnson tha se Kosova duhet të formojë qeverinë dhe se nuk dëshiron të japë “afate artificiale”, për kohën kur mund të arrihet marrëveshja.

“Palmer dhe Grenell janë duke bashkëpunuar. Unë kam biseduar me të dy dhe e di se kanë plan, i cili përqendrohet në mundësitë ekonomike. Unë mendoj se ata mund të arrijnë diçka dhe pastaj të përpiqen t’i kthejnë të dyja palët në tryezë që të punojnë së bashku”, tha senatori amerikan, i cili është kryetar i nën-Komitetit për Evropën dhe Bashkëpunimin Rajonal.

Johnson theksoi se do të ishte mirë që Kosova të heqë taksën që u ka vënë prodhimeve të importuara nga Serbia, ndërsa Beogradit i bëri thirrje që të ndalojë të kërkojë nga vendet e tjera t’i tërheqin njohjet për Kosovën.

“Ky do të ishte një hap i rëndësishëm. Mendoj se edhe Palmer edhe Grenell kërkojnë një lloj investimi që do t’i inkurajojë të dyja vendet të bashkëpunojnë. Ne po bëjmë gjithçka që mundemi për të promovuar mundësi më të mira ekonomike, për tërheqjen e investimeve dhe për të dërguar sinjal te qytetarët e të dyja vendeve se këto do të jenë rezultat i një marrëveshjeje të suksesshme”, tha senatori Johnson.

Ai theksoi se fundi i këtij viti nuk është afat real për zgjidhjen e çështjes së Kosovës dhe tha se është mirë të shkohet “hap pas hapi”.

I dërguari i posaçëm Grenell ka vizituar ditë më parë Prishtinën dhe Beogradin, duke takuar krerët më të lartë të të dyja shteteve.

Ai ka theksuar në Prishtinë se një marrëveshje ndërmjet dy shteteve do të vë themelin për rritje ekonomike dhe do të kontribuojë për mirëqenien e gjithë qytetarëve.

Dialogu mes Kosovës dhe Serbisë ka nisur më 2011.

Aktualisht ky proces i ndërmjetësuar nga Bashkimi Evropian është pezulluar për shkak të taksës 100 për qind që autoritetet e Kosovës kanë vënë në mallrat e Serbisë dhe Bosnjës në nëntor të vitit të kaluar.

Kjo pasi, presidenti i Serbisë, Aleksandar Vuçiq ka përmendur këtë masë si arsyetim për mosvazhdim të dialogut.

Heqjen e taksës e kanë kërkuar Bashkimi Evropian dhe Shtetet e Bashkuara. rel

Palmer: Kosova të heqë tarifat, Serbia të ndalë fushatën për deligjitimim

Një zyrtar i lartë i Departamentit të Shtetit shprehu zhgënjimin për mos-hapjen e negociatave nga Bashkimi Evropian me Shqipërinë dhe Maqedoninë e Veriut dhe bëri thirrje për rifillimin e bisedimeve mes Kosovës dhe Serbisë. Në një seancë të Komisionit të Jashtëm të Senatit, i dërguari i Posaçëm për Ballkanin Perëndimor, Matthew Palmer tha se emërimi i tij dhe i të dërguarit të posaçëm për dialogun Prishtinë-Beograd, Richard Grenell është shenjë e angazhimit amerikan në rajon. Siç njofton kolegia Keida Kostreci ai iu shmang përmendjes së afateve të veçanta për arritjen e një marrëveshjeje.

Toni i seancës së Komisionit për Marrëdhëniet me Jashtë duket se u përcaktua shumë larg Uashingtonit, nga zhvillimet e fundit që përfshinë zgjedhjet në Kosovë dhe pamundësinë e rënies dakord të vendeve të BE-së për hapjen e bisedimeve me Shqipërinë dhe Maqedoninë e Veriut.

“Ne jemi thellësisht të zhgënjyer me dështimin e vendeve anëtare të BE-së për të miratuar hapjen e negociatave për anëtarësimin e me Maqedoninë e Veriut dhe Shqipërisë javën e kaluar në Bruksel. Megjithëse ne nuk jemi anëtarë të BE-së, jemi dakord me vlerësimin e Komisionit Evropian se të dyja vendet kanë bërë përparim të konsiderueshëm në reforma”, tha zoti Palmer.

Zyrtari i lartë amerikan tha se ky vendim dërgon sinjalin tek vendet e tjera se dera për ne BE është mbyllur, rrezikon gërryerjen e besueshmërisë së BE-së dhe krijon një boshllëk udhëheqjeje që Rusia, Kina dhe të tjerë janë mëse të gatshëm ta mbushin.

Por për zotin Palmer pasojat mund të jenë të ndjeshme edhe për perspektivën e bisedimeve Prishtinë Beograd.

“Vendimi përcjell mesazhin e gabuar tek Beogradi dhe Prishtina dhe mesazhi është: mund të bëni gjëra të vështira, mund të bëni zgjedhje të vështira, mund të arrini kompromis dhe në fund të fundit t’ju mohohet rruga përpara drejt Evropës”.

Zoti Palmer tha se Shtetet e Bashkuara do të punojnë me vendet e Bashkimit Evropian për ta ndryshuar atë mesazh. Në seancë nuk u përmend ndonjë afat për një marrëveshje mes Kosovës dhe Serbisë. Por …

“Në presim që qeveria e re e Kosovës të demonstrojë angazhimin për objektivat e përbashkëta duke hequr tarifat ndaj mallrave serbe dhe boshnjake që kanë dëmtuar pozicionin ndërkombëtar të Kosovës. Nga ana tjetër, Serbia duhet të heqë dorë nga fushata për të delegjitimuar Kosovën në komunitetin ndërkombëtar”.

Zoti Palmer tha se Shtetet e Bashkuara duan të shohin një marrëveshje gjithëpërfshirëse, që përbën normalizim të plotë, që është shumë dimensionale. Sa për idenë e ndryshimit të kufijve…

“A do të jenë apo jo kufijtë pjesë e një marrëveshjeje gjithëpërfshirëse, u takon palëve të vendosin nëse kjo është një zgjidhje e pranueshme”.

Por zoti Palmer e njohu realitetin e ri politik në Kosovë kur tha se partitë politike fituese të zgjedhjeve në Kosovë e kanë bërë të qartë se nuk duan të flasin për çështjen e ndryshimit të kufijve.

Ai tha se zgjedhjet e 6 tetorit ishin të rëndësishme për Kosovën, pasi do të sjellin qeverinë e parë që nuk drejtohet nge ish pjesëtarë të UÇK-së:

“E shoh si impuls nga ana e popullit të Kosovës për ndryshim. Dhe është e kuptueshme. Ka një shkallë të lartë zhgënjimi nga ana e popullit të Kosovës me gjendjen se ku ndodhen, si izolimi ndërkombëtar, stanjacioni ekonomik dhe dështimi I qeverive të Kosovës për të mbajtur angazhimet dhe premtimet për të luftuar korruspionin dhe krimin”.

Por ai bëri thirrje që Kosova ta formojë së më shpejt qeverinë.

Disa nga pyetjet përfshirë nga senatori demokrat, Chris Murphy kishin të bënin me disa spekullime lidhur me faktin që Shtëpia e Bardhë caktoi të dërguarin e posaçëm të Richard Grenell për bisedimet Kosovë-Serbi, pas emërimit të vetë zotit Palmer si të dërguar të Ballkanit.

“Emërimi im nga Sekretari Pompeo dhe emërimi i ambasadorit Grenell nga Presidenti, tregon angazhimin nga ana e administratës, nga ana e Shteteve të Bashkuara, për të rritur profilin tonë në rajon, për t’i treguar rajonit që jemi të pranishëm që jemi partnerët e tyre, që jemi të gatshëm që të investojmë kapital politik dhe përpjekje, energji dhe për të ndihmuar vendet e Ballkanit Perëndimor që të ecin përpara”.

Edhe ekspertët që dëshmuan, i pranuan sfidat e mbetura në rajon.

Analisti Janusz Bugajski, tha se megjithë përparimin e konsiderueshëm 25 vitet e fundit rajoni nuk mund të konsiderohet i sigurt derisa të eliminohen gjendja jofunksionale në Bosnje-Hercegovinë, ngrirja e bisedimeve Prishtinë-Beograd dhe bllokimi nga ana e Bashkimit Evropian.

“Mungesa e zgjidhjes së tyre, i komplikon problemet e rajonit, që janë të dukshme tek stanjacioni ekonomik, korrupsioni i zyrtarëve, paqendrueshmëria sociale, tensionet etnike dhe rrjedhjet e popullsisë”.

Majda Ruge e Universitetit Johns Hopkins thotë se zgjidhja e këtyre problemeve shkon përtej përfitimeve të vetë vendeve.

“Ruajtja e paqes dhe stabilitetit në Ballkanin Perëndimor vazhdon të jetë një interes strategjik i Shteteve të Bashkuara, pasi paqendrueshmëria në Ballkan përbën rrezik të madh për vendet anëtare të NATO-s dhe Bashkimit Evropian”.

Pjesëmarrësit në seancë ishin dakord se roli i Shteteve të Bashkuara është i nevojshëm për të mbështetur vendet e rajonit në rrugën euro-atlantike. Zoti Palmer tha se ky angazhim ekziston. Por sfidat e shumta, përfshirë pasigurinë se cilat do të jenë hapat e mëtejshëm nga Prishtina dhe Beogradi dhe mungesa e konsensusit në BE, e bëjnë të vështirë që të parashikohet dinamika në vendet e rajonit dhe hapat e mëtejshme në të ardhmen e afërt.

William Taylor: Trump i kërkoi Kievit “një nder në këmbim të një tjetri”

Zëvendës Ndihmës Sekretarja e Mbrojtjes për Rusinë, Ukrainën dhe Euroazinë Laura Cooper mbërriti të mërkurën në Kongres për të dëshmuar mbi ndihmën ushtarake prej 250 milionë dollarësh për Ukrainën e cila u mbajt e ngrirë nga Shtëpia e Bardhë, megjithë këmbënguljen e Pentagonit që ajo të lëvrohej.

Dëshmia vjen në kuadër të hetimeve që ligjvënësit po zhvillojnë rreth veprimeve të Presidentit Donald Trump lidhur me Ukrainën, në një përpjekje për ta shkarkuar atë.

Dje diplomati më i lartë amerikan në Ukrainë dëshmoi përpara Kongresit se i atij i ishte thënë se Shtëpia e Bardhë do ta zhbllokonte ndihmën ushtarake vetëm nëse Ukraina premtonte publikisht se do të hetonte demokratët, ish-Nënpresidentin Joe Biden si dhe djalin e tij.

Dëshmia me dyer të mbyllura e ambasadorit amerikan në detyrë në Ukrainë William B. Taylor bie ndesh me pohimet e presidentit sipas të cilit nuk ka patur “quid pro quo” me Ukrainën. “Quid pro quo” është një shprehje latine që nënkupton shkëmbimin e një favori me një tjetër favor. Por Shtëpia e Bardhë vazhdon ta mohojë një gjë të tillë.

“Sot kishte thjesht më shumë thashetheme dhe rrjedhje selektive informacioni nga seancat e fshehta e të motivuara politikisht të demokratëve. Kjo marrëzi vazhdon çdo ditë duke u harxhuar më shumë kohë e para taksapaguesve“, tha zëdhënësja e Shtëpisë së Bardhë Stephanie Grisham në një deklaratë të martën në mbrëmje.

Gjatë dëshmisë së tij ambasadori Taylor përsëriti qëndrimin e tij se ishte diçka e “çmendur” që të kushtëzoje ndihmën e nevojshme ushtarake për Ukrainën me premtimin nga Kievi për të hetuar dyshimet për korrupsion ndaj ish-Nënpresidentit Biden.

Në fjalën e tij të hapjes në seacën me dyer të mbyllura zoti Taylor bëri të ditur se kishte zhvilluar një bisedë telefonike me ambasadorin e SHBA-së në Bashkimin Evropian Gordon Sondland, i cili dëshmoi javën e kaluar.

“Gjatë telefonatës, ambasadori Sondland më tha se Presidenti Trump i kishte thënë se dëshironte që (Presidenti i Ukrainas) Volodymyr Zelenskiy të deklaronte publikisht se Ukraina do të hetojë Burisma-n dhe pretendimet për ndërhyrje të Ukrainës në zgjedhjet (amerikane) e vitit 2016“, tha në dëshminë e tij zoti Taylor.

Djali i Joe Biden-it, Hunter Biden, ishte anëtari i bordit të Burisma-s, një kompani gazi në Ukrainë. Sipas zotit Trump kur zoti Biden mbante detyrën e nënpresidentit, ai kishte kërcënuar se do ta ndalte ndihmën ndaj Ukrainës, nëse Kievi nuk ndalte një hetim për korrupsion ndaj Burisma-s.

Por zoti Trump nuk ka ofruar asnjëherë ndonjë dëshmi për korrupsion nga ana e Joe Biden apo djalit të tij. Akuza se Ukraina ndërhyri në zgjedhjet presidenciale 2016-s për llogari të demokratëve bazohet në një teori konspirative.

Zoti Taylor tha se zoti Sondland i kishte thënë atij se zoti Trump donte që zoti Zelenskiy “të bënte një deklaratë publike, duke urdhëruar nisjen e hetimeve”.

Sipas zotit Taylor zoti Sondland pranoi se kishte bëri “gabim” kur u kishte thënë zyrtarëve ukrainas se nga premtimi publik i zotit Zelenskiy për të nisur hetimet, varej vetëm takimi në Shtëpinë së Bardhë me zotin Trump.

“Në fakt ambasadori Sondland tha se nga një njoftim i tillë, varej gjithçka, përfshirë ndihma për sigurinë“, shtoi zoti Taylor.

Zoti Sondland u kishte thënë më herët diplomatëve të tjerë se zoti Trump këmbënguli se nuk do kishte pasur një “quid pro quo” në raport me Ukrainën, por në fakt ai po përsëriste atë që zoti Trump i kishte thënë atij.

Komisionet e Dhomës së Përfaqësuesve të udhëhequra nga Demokratët po zhvillojnë seanca dëgjimore me dyer të mbyllura për të përcaktuar nëse do të rekomandojnë ngritjen e akuzave zyrtare për shkarkimin e presidentit Trump, pjesërisht lidhur me dyshimet për përfshirjen e një vendi të huaj në zgjedhjet amerikane.

Ligjvënësja demokrate Debbie Wasserman Schultz e quajti dëshminë e zotit Taylor “si më inkriminuesen që kishte dëgjuar”. zëri i amerikës

Diplomati më i lartë amerikan në Ukrainë dëshmon në Kongres

William Taylor gjatë një konference në Kiev (27 korrik 2019)

Një diplomat veteran amerikan dëshmon sot para ligjvënësve në Dhomën e Përfaqësuesve që po heton nëse Presidenti Donald Trump kushtëzoi asistencën për Ukrainën me çeljen e një hetimi ndaj ish-Nënpresidentit Joe Biden dhe djalit të tij.

William Taylor, zyrtari më i lartë në ambasadën amerikane në Ukrainë, dëshmon sot në një seancë me dyer të mbyllura, ku do të pyetet për një seri mesazhesh të shkëmbyera me zyrtarë të tjerë ku shprehte shqetësimin për veprimet e Shtëpisë së Bardhë. Zoti Taylor shkruajti se ishte “çmenduri të pezullohej asistenca për sigurinë në këmbim të ndihmës për një fushatë politike”.

Zv.Ndihmës Sekretarja e Mbrojtjes Laura Cooper, e cila ka mbuluar politikat për Rusinë dhe Ukrainën në Pentagon, pritet të dëshmojë të mërkurën.

Hetimi i udhëhequr nga demokratët filloi kur një informator nga radhët e shërbimeve të zbulimit i shprehu shqetësimin inspektorit të përgjithshëm për telefonatën e 25 korrikut mes Presidentit Trump dhe Presidentit ukrainas Volodymyr Zelenskiy, ku duket se i bën thirrje zotit Zelenskiy për të hapur një hetim ndaj ish-nënpresidentit, i cili po konkuron tashmë për të marrë emërimin e demokratëve për zgjedhjet e vitit 2020.

Presidenti Trump ka aluduar se ishte zoti Biden që kërcënoi të tërhiqte garancitë për borxhin ukrainas, në rast se nuk ndalej një hetim i filluar ndaj kompanisë së gazit që kishte punësuar djalin e tij Hunter.

Nuk ka dalë asnjë evidencë shkeljesh nga Joe Biden apo Hunter Biden. Por, ti kërkosh një qeverie të huaj të rrëmojë për një rival politik, konsiderohet ndërhyrje në zgjedhjet presidenciale dhe është një shkelje ligjore që mund të sjellë shkarkimin e presidentit.

Presidenti Trump ka këmbëngulur se nuk pati “quid pro quo” gjatë telefonatës së tij me Presidentin Zelenskiy, duke shtuar se biseda ishte “perfekte” dhe duke akuzuar demokratët për gjueti shtrigash.

Por, ky qëndrim u rrëzua javën e kaluar nga Mick Mulvaney, shefi i personelit i Presidentit Trump. Zoti Mulvaney pranoi para gazetarëve se Presidenti Trump ngriu 400 milionë dollarë ndihma për Kievin për shkak të shqetësimeve të presidentit për korrupsionin në Ukrainë dhe dyshimeve se ky vend ishte përfshirë në ndërhyrjen kompjuterike ruse tek email-et e Komitetit Kombëtar Demokrat në vitin 2016.

Zoti Mulvaney tha në mënyrë sfiduese se do të ketë gjithnjë influencë të politikës tek politika e jashtme dhe se njerëzit duhet “të mësohen me këtë”. Më vonë, ai qarkulloi një deklaratë ku përpiqej të qartësonte komentet e tij.

Pasi Presidenti Trump u bëri thirrje të hënën ligjvënësve republikanë që “të ashpërsohen dhe të luftojnë” hetimin, ata duket se reaguan duke propozuar një rezolutë që vendoste kufizime ndaj Ligjvënësit demokrat Adam Schiff, i cili drejton hetimin në cilësinë e kreut të Komisionit të Zbulimit. Rezoluta u hodh poshtë me 218 vota kundër dhe 185 pro. zëri i amerikës

Ish-nënpresidenti Joe Biden vazhdon fushatën me vrull

Ish-nënpresidenti Joe Biden ka bërë thirrje për shkarkimin e Presidentit Donald Trump, pas akuzave se presidenti ka kërkuar të nxjerrë informata që do të dëmtonin zotin Biden dhe të birin. Politikani veteran është pretendenti kryesor në radhët e kandidatëve demokratë për zgjedhjet presidenciale. Por tani ai e gjen veten në mes të një beteje mes demokratëve në Kongres dhe Presidentit Trump që mund të çojë në procesin për shkarkimin e presidentit. Siç njofton korrespondentja e Zërit të Amerikës Katherine Gyson, kjo betejë politike nuk e ka ngadalësuar fushatën e zotit Biden:

Zoti Biden tingëlllon sfidues në komente:

“Presidenti ka hapur sherr me personin e gabuar,” tha ish-nënpresidenti.

Zoti Biden është hedhur në fushatë me një vrull të ri, për të ruajtur epërsinë mes rivalëve demokratë në fushëbeteja elektorale si Nju Hampshër, një ndër shtetet e para që zhvillon zgjedhje partiake.

“Donald Trumpi do të bënte çdo gjë për t’u rizgjedhur, madje do të shkelte edhe format më bazë të demokracisë sonë”.

Demokratët në Dhomën e Përfaqësuesve hapën zyrtarisht një proces hetimor mbi shqetësimet e ngritura nga një informator i brendshëm se Presidenti Trump pezulloi ndihmat për Ukrainën si presion që Kievi të nxirrte informata që do të dëmtonin zotin Biden dhe të birin.

Zoti Biden i ka hedhur poshtë akuzat.

“Nuk ka asnjë të vërtetë në akuzat dhe sulmet e tij kundër meje apo djalit. Asnjë. Zero”.

Ai thotë se është kandidati më i fortë për të mundur presidentin.

“E kam thënë: po konkurroj për të ringjallur shpirtin e Amerikës, pasi në këto zgjedhje është në rrezik. Prandaj kanë rëndësi këto zgjedhje. Prandaj nuk do ta lemë Donald Trumpin të diktojë se kush do të jetë kandidati demokrat në zgjedhje”.

Duket se ky argument ka bindur edhe disa votues të lëkundur demokratë:

“Për herë të parë sot u emocionova. Mendoj se me Nënpresidentin Biden nuk ka lojra. Nuk ka premtime të ekzagjeruara. Dëgjova thjesht një analizë të ndershme të situatës aktuale dhe synimit që kemi. Dëgjova shpresë. Më dha shpresë,” thotë një votuese.

Por përkrahësit e presidentit thonë se duhen parë me vëmendje edhe shkëmbimet e zotit Biden me udhëheqës të huaj.

“Duhet të ketë turp me gjithë këto lojra që ka bërë gjatë viteve dhe tani po akuzon presidentin për gjëra që janë në fakt pjesë e përgjegjësive të presidentit. Kjo është absurde,” thotë një aktivist për fushatën e Presidentit Trump.

Shumë përkrahës e pranojnë shpjegimin e presidentit se po luftonte korrupsionin në Ukrainë:

“Ai më bën të besoj se politika mund të bëhet me energji, duke angazhuar njerëzit, duke folur me një spektër të gjerë njerëzish. Nuk jam ende plotësisht i sigurtë por e shoh të mundur që të votoj për të,” thotë një votues.

Votuesit në Nju Hempshër kanë ende katër muaj për të vendosur se kë do zgjedhin ndër kandidatët demokratë. Shumë gjëra mund të ndryshojnë në katër muaj, por hetimet që po zhvillohen në Kongres e bëjnë pothuajse të garantuar se emri i zotit Biden do të vazhdojë të jetë në qendër të debatit politik.

Mulvaney rithekson – fondet për Ukrainën nuk ishin të lidhura me hetimet politike

Shefi në detyrë i Personelit të Shtëpisë së Bardhë, Mick Mulvaney mbrojti pretendimin e tij se Presidenti Donald Trump nuk pezulloi gati 400 milion dollarë ndihmë ushtarake për Ukrainën, me qëllim që Kievi të ndërmerrte hetime për rivalët demokratë dhe zgjedhjet e vitit 2016.

Mulvaney u tha gazetarëve javën e kaluar se nuk kishte një kërkesë detyruese nga Trump, por disa orë më vonë e tërhoqi deklaratën dhe vazhdoi të avancojë versionin e tij të rishikuar të diskutimeve të politikave të Shtëpisë së Bardhë në një intervistë në emisionin “Fox News Sunday”.

“Kishte dy arsye që ne e pezulluam ndihmën,” tha zoti Mulvaney. “E para ishte korrupsioni i shfrenuar në Ukrainë. Është kaq keq në Ukrainë sa që në vitin 2014 Kongresi miratoi një ligj … duke na kërkuar që të sigurohemi që lufta kundër korrupsionit po lëvizte në drejtimin e duhur. Pra, korrupsioni është një çështje e madhe Të gjithë e dinë atë. ”

Ai shtoi se, “Presidenti ishte gjithashtu i shqetësuar nëse vendet e tjera, konkretisht ato evropiane, do të ndihmonin me ndihmën e huaj për Ukrainën”.

Mulvaney përmendi gjithashtu gjatë konferencës së tij për shtyp në Shtëpinë e Bardhë të enjten e kaluar se presidenti Trump dëshironte të dinte nëse Ukraina kishte në pronësi një serveri kompjuterik të përdorur për hakerimin në Komitetin Kombëtar Demokrat në vitin 2016 që tregoi se mbështeti ish-sekretaren e shtetit të SHBA Hillary Clinton në fushatën e saj të pasuksesshme kundër zotit Trump për Shtëpinë e Bardhë. Vendndodhja e kompjuterit është pjesë e një teorie se Ukraina ishte përzierë në zgjedhjet e vitit 2016, dhe jo Rusia, siç arriti në përfundim komuniteti i inteligjencës amerikane.

Por zoti Mulvaney tha të dielën se përmendja e shqetësimeve të presidentit Trump për kompjuterin “nuk ishte e lidhur me ndihmën”, megjithëse javën e kaluar kishte thënë: “Kjo është arsyeja pse ne i mbajtëm fondet”.

“Ne e bëjmë këtë praktikë gjatë gjithë kohës me politikën e jashtme,” ka thënë Mulvaney në Shtëpinë e Bardhë.

Të dielën, ai tha, “Unë kurrë nuk thashë se kishte një ‘quid pro quo’ sepse nuk ka”.

Trump, ndërsa fillimisht bllokoi ndihmën për Ukrainën, përfundimisht lejoi lëvrimin e fondeve për Kievin.

“Ndihma u dha,” tha Mulvaney të dielën. “Sapo u siguruam se ata po bënin më të mirën për të luftuar korrupsionin…” dhe ndihma e vendeve të tjera për Ukrainën ishte rritur, “paratë u dhanë”. Gjatë konferencës për shtyp javën e kaluar, Mulvaney shtoi një kusht të tretë, nëse Ukraina po ndihmonte një hetim të Departamentit amerikanë të Drejtësisë për origjinën e hetimeve të zgjedhjeve të vitit 2016 që përfundimisht implikuan ndërhyrjen e Rusisë për të ndihmuar Trump të fitonte.

Biseda e Presidentit Trump me Presidentin ukrainas Volodymyr Zelenskiy janë në qendër të hetimit të demokratëve në Dhomën e Përfaqësuesve për të shkarkuar presidentin Trump. zëri i amerikës

Trupat amerikane tërhiqen nga baza më e madhe në veri të Sirisë

Mark Esper

Trupat amerikane u tërhoqën nga baza e tyre më e madhe në veri të Sirisë të dielën. Sekretari amerikan i Mbrojtjes Mark Esper tha se të gjitha forcat amerikane që u larguan nga Siria do të vendosen në Irakun perëndimor dhe do të vazhdojnë të kryejnë operacione anti-terroriste kundër Shtetit Islamik në rajon.

Sekretari Esper tha se më shumë se 700 trupa amerikane do të zhvendoseshin në Irak dhe nuk do të ktheheshin në Shtetet e Bashkuara së shpejti, siç ka sugjeruar Presidenti Donald Trump.

Shefi i Pentagonit nuk e përjashtoi mundësinë e sulmeve amerikane kundër terrorizmit nga Iraku në Siri. Por ai tha se planet do të zhvilloheshin me kalimin e kohës dhe përfshijnë diskutime me aleatët në një takim të NATO-s në ditët e ardhshme. Ai tha se nëse forcat amerikane kthehen në Siri ato do të mbrohen nga avionët luftarakë amerikanë.

Shtetet e Bashkuara kanë aktualisht rreth 5000 trupa në Irak sipas një marrëveshjeje midis Bagdadit dhe Uashingtonit. Shtetet e Bashkuara u tërhoqën në vitin 2011 kur operacionet luftarake përfunduan, por u kthyen përsëri pas tre vjetësh kur Shteti Islamik mori nën kontroll një numër të madh të vendit para se ta humbasë atë më vonë. zëri i amerikës

SHBA: Të zhgënjyer nga vendimi i Këshillit Europian

Shtetet e Bashkuara u shprehën “të zhgënjyer që Këshilli Europian nuk njohu përpjekjet shumë të forta për reforma të secilit vend me anë të një vendimi për të hapur negociatat për anëtarësim në këtë kohë”. Në një deklaratë të zëdhënësit të Departamentit amerikan të Shtetit Morgan Ortagus, theksohet se “një vendim pozitiv do të kishte riafirmuar besueshmërinë e rrugës së tyre për në BE dhe do t’i ishte kundërvënë vendosmërisht aktorëve të huaj dashakeqës, të cilët kërkojnë të minojnë vlerat perëndimore dhe komunitetin euro-atlantik”.

Deklarata nënvizon faktin që “Këshilli Europian nuk i tha “jo” as Shqipërisë dhe as Maqedonisë së Veriut, dhe as nuk përcaktoi kushte të reja për hapjen e negociatave për anëtarësim. Shpresojmë që Këshilli Europian do të arrijë konsensus për një vendim pozitiv për të dy vendet kohë përpara Samitit BE-Ballkani Perëndimor verën tjetër”.

Në deklaratën e Departamentit Amerikan të Shtetit theksohet se “Shtetet e Bashkuara do të mbeten partner strategjik i Maqedonisë së Veriut dhe Shqipërisë teksa vazhdojnë punën për të forcuar sundimin e ligjit, për të çuar përpara përpjekjet anti-korrupsion, për të zhvilluar ekonomitë e tyre dhe për të luftuar krimin e organizuar. I nxisim të dy vendet të mbeten të palëkundur në ndërtimin e shoqërive transparente, të bazuara në rregulla dhe demokratike që iu përgjigjen nevojave të qytetarëve. Shtetet e Bashkuara do të vazhdojnë të punojmë me partnerët europianë për të çuar përpara synimet e përbashkëta të stabilitetit dhe sigurisë në Ballkanin Perëndimor”, përfundon deklarata, e cila u postua menjëherë në Facebook nga kryeministri Edi Rama shoqëruar me një falenderim. zëri i amerikës

Ndahet nga jeta ligjvënësi veteran Elijah Cummings

Ligjvënësi nga Marylandi, Elijah E. Cummings, vdiq të enjten herët në spitalin Johns Hopkins në moshën 68 vjeçare.

Karriera e gjatë e ligjvënësit Cummings filloi më veprimtarinë prej shumë dekadash në politikën e Marylandit. Ai u ngrit në radhët e Dhomës së Delegateve në Maryland para se të fitojë vendin e tij në Kongres në një palë zgjedhje të jashtëzakonshme në vitin 1996 për të zëvendësuar ish ligjvënësin Kweisi Mfume.

Ai ishte një nga mbështetësit e hershëm të fushatës së ish presidentit Barack Obama në vitin 2008.

Zoti Cummings u bë kryesues i fuqishëm i Komisionit të Dhomës së Përfaqësuesve që hetoi presidentin Donald Trump dhe ishte një orator i fuqishëm që mbronte të varfrit në Baltimor.

Elijah Cummings u lind më 18 janar të vitit 1951. Në shkollën fillore një nga mësuesit i kishte thënë se ishte shumë i ngadalshëm për të mësuar dhe fliste keq dhe kurrë nuk do ta përmbushte ëndrrën e tij për t’u bërë avokat.

“Isha i dërmuar” tha Cummings për agjencinë e lajmeve Associated Press në vitin 1996, pak para se të fitonte vendin e tij në Kongres. “E gjithë jeta ime ndryshoi. Unë u bëra shumë i vendosur ”.

Elijah Cummings vendosi të dëshmojë se mësuesi e kishte gabim. Ai u bë jo vetëm avokat, por një nga oratorët më të fuqishëm në Dhomën e Delegatëve në Maryland, ku ai mori detyrën në vitin 1983.

Gjatë tërë jetës së tij ai do të fillonte komentet e tij ngadalë, duke zhvilluar temën dhe duke ngritur shkallën emocionale derisa të shndërrohej në një predikues nga foltorja. zëri i amerikës

Arrestimi i katërt për financimin e paligjshëm të fushatave zgjedhore

Një person i katërt është arrestuar në lidhje me çështjet e financimit paligjshëm të fushatave zgjedhore federale që përfshijnë dhe dy bashkëpunëtorë të avokatit personal të Presidentit Donald Trump, Rudy Giuliani.

Autoritetet federale njoftuan se biznesmeni amerikan David Correia u arrestua të mërkurën në aeroportin Kennedy të Nju Jorkut. Ai kishte mbërritur aty me qëllimin për t’u vetëdorëzuar.

Arrestimi i tij e çon në katër numrin e të pandehurve që janë arrestuar nën akuzat federale se kanë kryer me qindra mijëra dollarë kontribute të paligjshme në fushatat republikane, përfshirë dhe ndaj një komiteti për veprim politik pro-Trump.

Biznesmeni me origjinë nga Ukraina, bashkëpunëtor me zotin Correia, Andrey Kakushkin, u arrestua javën e kaluar në Kaliforni.

Fillimish u arrestuan dy bashkëpunëtorët e zotit Xhuliani.

Dy biznesmenët me bazë në Florida, të cilët dyshohet se kanë lobuar për largimin e ish-ambasadores amerikane në Ukrainë vitin e kaluar, ishin parashikuar të dëshmonin përpara ligjvënësve që po hetojnë lidhur me shkarkimin e presidentit në kohën e arrestimit të tyre.

Lev Parnas, një qytetar amerikan i lindur në Ukrainë dhe Igor Fruman, një shtetas me origjinë nga Bjellorusia, u arrestuan nga FBI-ja në aeroportin Ndërkombëtar të Dulles-it në shtetin e Virxhinias ndërsa prisnin të largoheshin nga SHBA-ja, sikurse tha një zyrtar i zbatimit të ligjit. Ata dolën përpara një gjykate federale në Alexandria të Virxhinias të enjten e kaluar.

Akuzat ndaj biznesmenëve rrjedhin nga një ankesë e paraqitur vitin e kaluar në Komisionit Federal të Zgjedhjeve nga një organizatë e pavarur sipas të cilës ata kishin krijuan një kompani fantazëm në mënyrë që të transferonin paratë e fushatës tek komiteti politik pro-Trump të quajtur America First Action. Aktakuza prej 22 faqesh duket se konfirmon gjetjet e Qendrës Ligjore mbi Fushatat.

Sipas aktakuzës zoti Parnas dhe zoti Fruman përdorën kompaninë Global Energy Producers (GEP) për t’i kaluar 325 mijë dollarë komitetit politik pro Trump në maj 2018, dhe 15 mijë dollarë një tjetër komiteti politik. Zoti Parnas kishte paguar edhe 50 mijë dollarë për përpjekje për zgjedhjet e zotit Trump në 2016-n.

Zoti Kukushkin dhe zoti Correia përmenden gjithashtu në aktakuzë lidhur me një tjetër skemë të shkeljes së ligjit për financimin e fushatave zgjedhore. zëri i amerikës

Qindra mijëra njerëz në kërkim të thesarit

Rreth 350 mijë kërkues thesaresh nga e gjithë bota po eksplorojnë një zonë të madhe në Malet Rocky, që shtrihet nga pjesa veriore e shtetit “New Mexico” deri në “Montana”. Ata janë në kërkim të një thesari. Thuhet se ajo që një fatlum duhet të bëjë, është të deshifrojë nëntë të dhëna nga një poemë e shkruar nga koleksionuesi i pasur dhe sipërmarrësi Forrest Fenn. Në poemë ai shkruan se e kishte fshehur thesarin vite më parë, ndërsa fjala mori dhenë pas librit të publikuar nga ai me titull “The Thrill of a Chase”. Në libër ai flet për jetën e tij dhe thesarin. Ndërsa shumë besojnë se thesari është i vërtetë, të tjerët besojnë se nuk është më shumë se sa një rreng. Korrespondentja e Zërit të Amerikës Penelope Poulou, vizitoi zonën për të cilën flitet se gjendet thesari dhe bisedoi me shkrimtarin Forrest Fenn mbi efektet që ka sjellë poema enigmatike.

Sacha Johnson ka mbi pesë vite e gjysëm që kërkon për thesarin e fshehur, gjoja të groposur në Malet Rosky nga koleksionisti dhe sipërmarrësi Ferrest Fenn.

“Sipas përllogaritjeve të mia kam mbi 300 herë që kam kërkuar për thesarin.”

Këtu shtrihet kampi i Kanionit të Zi në veri të qytetit të Santa Fe-së në shtetin e Nju Meksikos.

“Kjo është pika e nisjes”, thotë zonja Johnson.

Nëse është e vërtetë, thesari mund të jetë mes kësaj hapësire dhe shtetit të Montanës. Por çfarë e shtynë atë dhe të tjerët si ajo që të përpiqen kaq shumë?

“Jam bërë një me natyrën dhe kam zbuluar një eksperiencë të dobishme, pra kjo më shtyn. Por nga ana tjetër kemi bërë përparime në deshifrimin e të dhënave nga poezia e autorit Forest Fenn”.

Zoti Fenn thotë se mbushi arkën e thesarit me gurë të çmuar, flori dhe xhevahire dhe se shkroi poezinë duke ofruar të dhëna pasi u diagnostikua me kancer në vitin 1988.

“Nëse do vdisja, doja t’u jepja njerëzve të njëjtat mundësi që kam patur vetë.”

Ai e mundi kancerin dhe mbajti në zotërim arkën e thesarit deri në vitin 2010, kur Amerika vuante pasojat e recesionit .

“Doja t’u jepja njerëzve shpresë. Ndoshta është një qyp me florinjë në fund të rrugëtimit tënd, nëse del dhe e kërkon.”

Ai thotë se ishte 79 vjeç kur e fshehu thesarin.

“Nuk është në një vend të rrezikshëm.”

Në shtëpinë e tij në Santa Fe, Fenn është i rrethuar nga koleksione arti të grumbulluara gjatë jetës së tij. Një ciceron peshkimi që në moshën 9

vjeçare në “Yellowstone”, Fenn pati një jetë të jashtëzakonshme, sikurse edhe thesari i tij. Ai është një pilot luftarak i dekoruar i cili doli vullnetar për luftën në Vietnam. Ai thotë se kreu qindra misione luftarake dhe i shpëtoi vdekjes disa herë.

“Jam rrëzuar me aeroplan pesë apo gjashtë herë. Jam rrëzuar nga zjarri armik dhe jam hedhur me parashutë në Laos.”

Ai ruan një kujtim nga aeroplani i rrëzuar. Ai e konsideron veten si njeri të momenteve vendimtare. Thesari flet shumë për të, thotë argjendari Marc Howard.

“Kjo është trashgimia e tij.”

Marc Howard ka një miqësi mbi 25 vjeçare me zotin Fenn. Edhe ai ka mbi 9 vite që kërkon thesarin e fshehur.

“Jam argjendar. Do të doja të kisha një furnizim me flornjë, që nuk do të më duhej të paguaja 1,500 dollarë për 30 gramë.”

Por mungesa e një prove të qartë për vendndodhjen e thesarit dhe mundësinë e gjetjes vë në dyshim ekzistencën e tij.

“Kam folur me disa njerëz që e kanë parë thesarin kur Fenn e mbante në kasafortë para se ta fshihte”, thotë zoti Howard.

Gjurmimi i thesarit ka bërë që turizmi të rritet shumë në Santa Fe.

“Bashkia më vlerësoi me një çertifikatë sepse për dy vite rrjesh u shtua me 6 për qind hoteleria në Sanata Fe dhe askush nuk e di se përse”, thotë Fenn.

Por kjo prirje ka shkaktuar edhe viktima.

“Do t’u kërkoja njerëzve që të dinë se ku shkojnë dhe të njoftojnë njerëzit e tyre. Malet janë të ashpëra për ata që nuk i vlerësojnë rreziqet që paraqet natyra.”

Por a beson Fenn se njerëzit janë pranë gjetjes së thesarit?

“Është e mundur që thesari të gjendet këtë pasdite, ose mund të kalojnë 100 apo 500 vite, ku i dihet.”

Zonja Johnston nuk dorëzohet.

“Nuk kam nevojë që njerëzit e tjerë të besojnë se Fenn fshehu një thesar. Më duhet besimi tek vetja sepse sa herë dal të kërkoj kam të njëjtën ndjesi dhe gjallëri. Ndjehem mirë në kërkim të thesarit, madje edhe nëse nuk gjendet aty.”

SHBA: Kandidatët demokratë mbështesin ‘shkarkimin’ e presidentit Trump

Dymbëdhjetë kandidatë demokratë për zgjedhjet presidenciale 2020, u përfshinë të martën mbrëma në një debat të ndezur duke kërkuar përballjen me presidentin Donald Trump në zgjedhjet e radhës, ndërsa demokratët në Kongres kanë hapur një hetim për procedurën e shkarkimit të presidentit.

Të gjithë kandidatët demokrat mbështesin shkarkimin ndonëse ai duket pak i besueshëm.

Në deklaratën e parë në hapje të debatit, ish nënpresidenti Joe Biden, një nga sfiduesit kryesor të presidentit Trump tha se “ky presidenti është më i korruptuari … në gjithë historinë tonë”, një vlerësim që bëri jehonë përgjatë debatit.

Një nga kandidatët kryesor, senatorja nga Massachusetts, Elizabeth Warren, tha se “nganjëherë ka gjëra që janë më të rëndësishme sesa politika. Donald Trumpi e ka shkelur ligjin. Askush nuk është mbi ligjin. Shkarkimi duhet të ecë përpara”.

Kundërshtarët e presidenti Trump hodhën disa nga sulmet e tyre më të ashpra kundër presidentit për shkak të tërheqjes së trupave amerikane nga veriu i Sirisë, duke lënë luftëtarët kurdë, të cilët ishin aleatë të amerikanëve në luftën kundër terroristëve të Shtetit Islamik, të pambrojtur nga sulmet e trupave turke që po pushtojnë veriun.

Zoti Biden e vlerësoi braktisjen e luftëtarëve kurdë nga presidenti Trump “veprimin më të turpshëm që kam parë të ketë bërë ndonjë president”.

Senatorja nga Kalifornia, Kamala Harris, e quajti gjakderdhjen në Sirinë veriore “një krizë të shkaktuar nga Donald Trump”, ndërsa senatorja nga Minsesota, Amy Klobuchar tha se “presidenti ynë e shkaktoi atë dhe është shumë krenar për ta thënë atë”.

Debati i së martës shënoi edhe kthimin në fushatë të senatorit nga Vermonti, Bernie Sanders, që po merr veten nga problemet me zemrën.

Ky ishte debati i katërt i demokratëve dhe ai i radhës do të mbahet muajin e ardhshëm. zëri i amerikës

Ish-këshilltarja e Presidentit Trump jep detaje për kontaktet me Ukrainën

Fiona Hill, ish-këshilltarja e lartë e presidentit amerikan, Donald Trump për Rusinë dhe Evropën dëshmoi të hënën se ajo e kishte kundërshtuar me forcë shkarkimin e ambasadores amerikane në Ukrainë, Marie Yovanovitch, dhe se ish-Këshilltari i Sigurisë Kombëtare John Bolton e kishte udhëzuar atë të fliste me juristët e Shtëpisë së Bardhë lidhur me përpjekjet për presion ndaj Ukrainës.

Zonja Hill dëshmoi të hëhën me dyer të mbyllura, por detajet u bënë të njohura nga agjencia Associated Press dhe gazetat “New York Times” dhe “Washington Post”, që citojnë burime me dijeni për dëshminë e saj.

“New York Times” njofton se sipas tre personave që ishin të pranishëm në dëshminë e zonjës Hill, zoti Bolton u përfshi në një këmbim të tensionuar më 10 korrik me ambasadorin amerikan në Bashkimin Evropian, Gordon Sondland, i cili po bashkëpunonte me avokatin e Presidentit Trump, Rudy Giuliani për t’i bërë presion Ukrainës të hetonte demokratët.

Deri para se të largohej nga Shtëpia e Bardhë në korrik, zonja Hill ishte drejtoreshë për Evropën dhe Rusinë në Këshillin e Sigurisë Kombëtare të zotit Trump, me njohuri direkte për kryerjen e politikës së jashtme amerikane. Avokati i saj, Lee Wolosky, tha se ajo ishte thirrur nga Komisioni i Dhomës së Përfaqësuesve për Zbulimin dhe kishte në plan t’u përgjigjej pyetjeve të ligjvënësve.

Javën e kaluar zonja Yovanovitch, një diplomate karriere e Departamentit të Shtetit, u tha ligjvënësve se zoti Trump e kishte larguar atë nga detyra bazuar në “informacione të pabaza e të rreme”, pasi avokati personal i zotit Trump, Rudy Giuliani kishte kritikuar efektshmërinë e punës së saj në Kiev.

Zoti Giuliani është përpjekur që të vërë në lëvizje autoritetet në Ukrainë që të hetojnë një nga kundërshtarët kryesorë politikë të zotit Trump, ish-nënpresidentin Joe Biden. Ai ka kërkuar të nisin hetimet lidhur me rolin që zoti Biden ka luajtur disa vite më parë në largimin e një prokurori ukrainas si dhe çdo lidhje që ai mund të ketë pasur me kompaninë ukrainase të energjisë “Burisma” ku djali i tij Hunter Biden shërbente si anëtar i bordit. Hunter Biden u largua nga bordi i Burisma-s disa muaj më parë. Si Joe Biden ashtu edhe djali i tij kanë hedhur poshtë çdo akuzë për shkelje të ligjit.

Gjatë një bisedë telefonike në fund të muajit korrikut presidenti Trump i pati kërkuar Presidentin ukrainas Volodymyr Zelenskiy, që Kievi të hetojë zotin Biden dhe djalin e tij si dhe që të komunikojë për këtë çështje me zotin Giuliani si dhe Prokurorin e Përgjithshëm William Barr.

Sipas një përmbledhje të zbardhur të bisedës telefonike publikuar nga Shtëpia e Bardhë, zoti Trump i kishte thënë zotin Zelenskiy se:

“Ambasadorja e Shteteve të Bashkuara ishte ‘problematike’ dhe se njerëzit me të cilët ajo merrej në Ukrainë ishin gjithashtu ‘probelmatikë’. Ka shumë zëra lidhur me djalin e zotit Biden dhe se Joe Biden ndaloi një hetim penal. Shumë njerëz duan të dinë lidhur me këtë… pra çdo gjë që mund të bësh me Prokurorin e Përgjithshëm do të ishte shumë e rëndësishme. Bideni shkoi gjithëandej duke u mburrur se e kishte penguar ndjekjen penale… kështu që a mund ta shihni këtë çështje….pasi mua më tingëllon e tmerrshme“, i kishte thënë zoti Trump homologut të tij.

Të dielën, Hunter Biden i mbrojti marrëdhëniet e tij të biznesit në Ukrainë dhe Kinë, ndërsa njoftoi se në fund të tetorit do të largohej nga pozicioni i tij si anëtar i papaguar i një bordi të një kompanie kineze investimesh.

Presidenti Trump që e ka etiketuar të birin e ish-presidentit si “dështak”, e sulmoi atë në Twitter duke shkruajtur: “Hunter Biden po detyrohet të lërë një kompani kineze. Shihni tani se si Media e rreme do ta përqafojë me krahët e veta të pista dhe mbrojtëse. Vetëm pyetje të lehta për të, ju lutem!”

Komisioni i zbulimit i Dhomës së Përfaqësuesve është ende në fazat e hershme të hetimit mbi të cilin do të vendosë për ngritjen ose jo të akuzave zyrtare për shkarkimin e presidentit Trump. Hetimet kërkojnë të hedhin dritë nëse zoti Trump ka shkelur interesat që lidhen me sigurinë kombëtare amerikane në një përpjekje për të fituar një mandat tjetër vitin e ardhshëm.

Joe Biden, i cili ka bërë thirrje për ngritjen e akuzave për shkarkimin e presidentit Trump, është një nga pretendentët kryesorë për të qenë kandidati zyrtar i Partisë Demokratike për garën e ardhshme presidenciale përballë Donald Trump-it.

Hetimi u nxit nga ankimi i një informatori sekret të komunitetit amerikan të zbulimit lidhur me përmbajtjen e bisedës telefonike mes presidendit Trump dhe homologut të tij ukrainas. Por presidenti thotë se biseda e tij me zotin Zelenskiy ishte “perfekte”.

Kryetari i komisionit të Zbulimit në Dhomës së Përfaqësuesve Adam Schiff ka thënë më parë se informatori do të dëshmojë përpara ligjvënësve, por tashmë ai duket hezitues nëse një gjë e tillë do të ndodhë.

Zoti Trump iu referua hezitimit të zotit Schiff në Twitter, duke thënë se tani duket se nuk u duhet më informatori. “Arsyeja është se Informatori e ka humbur të gjithë besueshmërinë, sepse varianti i tyre është aq larg transkriptit”. zëri i amerikës

Shtëpia e Bardhë dënon video parodinë e dhunshme

Shtëpia e Bardhë tha se të hënën se Presidenti Donald Trump nuk e ka parë ende, por e “dënon me forcë” një video parodi me imazhe grafike të dhunshme ku një personazh multiplikativ që i ngjan zotit Trump shfaqet duke qëlluar e goditur me thikë kundërshtarët e tij dhe përfaqësues të medias televizive.

Parodia u shfaq gjatë një takimi të mbështetësve të zotit Trump në rezidencën e tij turistike në Majemi.

Gazetarët që mbulojnë Shtëpinë e Bardhë i bënë thirrje zotit Trump ta dënojë videon, në të cilën kritikët e tij dhe përfaqësuesit e medias portretizohen si anëtarë të një famullie që largohen nga kisha për t’i shpëtuar tërbimit të tij. Personazhi multiplikativ që i ngjan presidentit godet në qafë senatorin e ndjerë John McCain, godet me thikë në fytyrë personalitetin televiziv Rosie O’Donnell, i vë flakën senatorit Bernie Sanders si dhe gjuan personazhe të tjerë, fytyrat e të cilëve janë zëvendësuar me logot e disa organizatave mediatike.

Nën shënjestër janë dhe ish-presidenti Barack Obama, përfaqësuesit e organizatës Black Lives Matters, ligjvënësja demokrate Maxine Waters, Bill dhe Hillary Clinton si dhe ligjvënësi Adam Schiff, i cili në cilësinë e kryetarit të komisionit të Zbulimit të Dhomës së Përfaqësuesve po udhëheq hetimin për shkarkimin e presidentit Trump.

Në një postim në twitter sekretarja e shtypit në Shtëpinë e Bardhë Stephanie Grisham tha se presidenti Trump do ta shohë videon së shpejti dhe se “bazuar në gjithçka që ka dëgjuar, ai e dënon atë me forcë atë”.

Ishte gazeta “New York Times” e cila raportoi e para rreth videos.

“Një video e paautorizuar u shfaq javën e kaluar në një nga dhomat anësore të konferencës mbi Përparësitë Amerikane në rezortin e zotit Trump në Doral Miami”, tha organizatori i ngjarjes Alex Phillips në një deklaratë.

Ai tha se zoti Trump nuk ishte i pranishëm në këtë ngjarje. Sipas tij kjo video nuk është miratuar apo parë nga organizatorët e takimit.

Shoqata e Korrespondentëve të Shtëpisë së Bardhë, e cila përfaqëson gazetarët që mbulojnë presidentin, në një deklaratë të dielën vonë në mbrëmje shkruante se ishte “tmerruar” nga përmbajtja e videos.

“Të gjithë amerikanët duhet ta dënojnë këtë shfaqje dhune drejtuar gazetarëve dhe kundërshtarëve politikë të Presidentit”, tha Jonathan Karl, presidenti i shoqatës.

“Ne i kemi thënë më parë Presidentit se retorika e tij mund të nxisë dhunë. Tani ne i bëjmë thirrje atij dhe të gjithëve të lidhur me këtë konferencë ta denoncojnë këtë video dhe të pohojnë se dhuna nuk ka vend në shoqërinë tonë”, shtoi ai.

Videoja përmban logon e fushatës së zotit Trump për garën presidenciale të 2020-s, por zëdhënësi i fushatës Tim Murtaugh, i tha gazetës New York Times se “videoja nuk është prodhuar nga fushata dhe se ne nuk e tolerojmë dhunën”.

Si vendngjarje për atë që në video shfaqet si masakër është ajo që quhet “kisha e lajmeve të rreme”, duke iu referuar refrenit të njohur të zotit Trump në lidhje me me organizatat mediatike dhe lajmet që ai i gjykon si të pavërteta.

CNN, Washington Post, BBC, PBS, NBC dhe Politico janë ndër organizatat e lajmeve që përshkruhen si viktima të tërbimit të personazhit multiplikativ që ngjan me presidentin Trump. zëri i amerikës

SHBA tërheqin të gjitha trupat e mbetura nga Siria veriore

Shtetet e Bashkuara po tërheqin të gjitha trupat e mbetura nga Siria veriore, pasi Presidenti Donald Trump tha të dielën se ishte një veprim “shumë i zgjuar … ndryshe nga e kaluara” për të mos u përfshirë në luftimet e nisura nga sulmi i Turqisë kundër aleatëve për një kohë të gjatë të Amerikës, luftëtarëve kurdë.

Presidenti Trump tha se ishte duke punuar me drejtuesit e Kongresit, përfshirë demokratët e opozitës, për të vendosur sanksione ekonomike “të fuqishme” kundër Turqisë për sulmet e saj ndërkufitare, edhe pse Ankaraja ka shprehur paraprakisht kundërshtime. Ai tha në Twitter se ka “konsensus të madh” për të vepruar kundër Turqisë, një anëtar i NATO-s përkrah Shteteve të Bashkuara.

Sekretari amerikan i Mbrojtjes Mark Esper tha për kanalin Fox News të dielën se presidenti Trump urdhëroi të shtunën në mbrëmje “tërheqjen e qëllimshme” të 1000 trupave të mbetura amerikane nga veriu i Sirisë. Zoti Esper tha se zyrtarët amerikanë kishin frikë se trupat amerikane do të goditeshin në përparimin e Turqisë kundër luftëtarëve kurdë, të cilët Turqia i sheh si terroristë, por që shumica e Perëndimit i shikon si partnerë kryesorë në luftën kundër militantëve të Shtetit Islamik.

Televizioni shtetëror sirian tha se forcat qeveritare kanë lëvizur në veri drejt kufirit për të “përballur agresionin turk”, por nuk dhanë hollësi të tjera.

Një zëdhënës i administratës së drejtuar nga kurdët në qytetin sirian të Kobanit tha se Forcat Demokratike Siriane kishin arritur një marrëveshje që trupat siriane të vendoseshin në tre pika në ose pranë qytetit.

Presidenti francez Emmanuel Macron dhe kancelarja gjermane Angela Merkel i bënë thirrje Turqisë që të përfundojë inkursionin e saj. “Ne nuk mund ta pranojmë më këtë situatë kundër kurdëve”, thanë të dy udhëheqësit.

Sekretari Esper hodhi poshtë polemikën nga kritikët në Kongres, përfshirë kolegët republikanë të Trump-it, se Shtetet e Bashkuara kanë braktisur kurdët.

“Ne e kundërshtuam Turqinë të mos e bënte këtë operacion,” tha zoti Esper. Por ai tha se Turqia ishte “plotësisht e angazhuar për ta bërë këtë pa marrë parasysh se çfarë do të bënim ne.”

Megjithatë, shtoi sekretari Esper, “Ne po bëjmë gjithçka mundemi për ta bërë Turqinë të ndalë këtë sjellje skandaloze”.

Ai pranoi se luftëtarët kurdë dhe civilët po vriten në sulmet turke.

“Është e tmerrshme,” tha ai. “Situata përkeqësohet për çdo orë.”

“Kjo është pjesë e situatës së tmerrshme ku na ka futur Turqia”, tha shefi i Pentagonit. Por ai tha se Shtetet e Bashkuara “nuk janë gati për të luftuar Turqinë, një aleat i vjetër, në emër të kurdëve”. Ai tha se konflikti turko-kurd “është 200 vjeçar”.

Megjithatë, sekretari Esper dënoi inkursionin e Turqisë dhe vendimet e tjera, përfshirë blerjen e një sistemi mbrojtës raketor rus kundër dëshirave të Shteteve të Bashkuara dhe vendeve të tjera.

“Sjellja e tyre gjatë viteve të fundit ka qenë e tmerrshme,” tha sekretari Esper, duke shtuar se Turqia “po dilte nga orbita jonë”.

Një kritik i presidentit Trump, senatori demokrat Chris Van Hollen, tha në të njëjtin emision të Fox News: “Njerëzit po vriten tani”. Ai tha se administrata Trump ” tani duket qesharake. Ata nuk po bëjnë gjë tjetër veçse po flasin”.

Por presidenti Trump tha se kritikët që kanë kundërshtuar tërheqjen e trupave të tij nga Siria veriore po nxisin “luftëra të pafundme” për Shtetet e Bashkuara në Lindjen e Mesme.

“Ata që gabimisht na futën në Luftërat e Lindjes së Mesme ende po bëjnë presion për të luftuar”, tha presidenti Trump në Tweeter. “Ata nuk e kanë idenë se çfarë vendimi të keq kanë marrë. Pse nuk kërkojnë një Deklaratë të Luftës?

Ai tha se vende të tjera “mund të duan të hyjnë e të luftojnë për njërën palë ose tjetrën. Le t’i lemë!”

Zyrtarët kurdë sirianë ndërkohë thonë se qindra mbështetës të dyshuar të Shtetit Islamik dhe familjarë kanë shpëtuar nga një kamp në veri të Sirisë, ndërsa Turqia vazhdon operacionin e saj ushtarak në zonë.

Jelal Ayaf, zyrtar i kampit Ayn Issa, vlerësoi se 850 të huaj të lidhur me ISIS-in shpëtuan dhe kishin ndihmë nga celulat e fjetura që depërtuan në një pjesë të kampit. Pjesëtarët dhe përkrahësit e familjeve të shpëtuara të ISIS-it mendohet se janë nga Britania, Irlanda, Rusia, Pakistani, Bangladeshi dhe Indonezia.

Turqia nisi operacionin e saj të planifikuar ushtarak të mërkurën e kaluar që synon të largojë forcat kurde në veri të Sirisë që i sheh si terroristë, por që shumica e Perëndimit i shikon si partnerë kryesorë në luftën kundër militantëve të Shtetit Islamik.

Operacioni ushtarak filloi disa ditë pas një njoftimi të befasishëm dhe që u kritikua gjerësisht se forcat amerikane do të tërhiqeshin nga rajoni./zëri i amerikës

Christiane Amanpour në Twitter: Peter Handke mbështetës i Kasapit të Ballkanit s’ka busull morale!

 

Ka shkaktuar zemërim dhe indinjatë fituesi i çmimit Nobel për letërsinë e Peter Handke.

Ka reaguar gjithë bota e qytetëruar duke denoncuar Peter Handke të padenjë për këtë çmimi.

Po ju sjellim më poshtë reagimin e Christiane Amanpour e cila ka reaguar në Twitter si më poshtë:

 

 

“Kam mbuluar Millosheviçin dhe genocidin e tij dhe të ithtarëve gjatë gjithë luftës në Bosnje, dhe më vonë gjyqet e tyre për krime lufte.

Ishte kasaphana etnike e parë dhe e vetme në shkallë Europe që nga Lufta e Dytë Botërore. Kaq shpejt janë harruar kujtimet?

Ndërsa më poshtë Christiane Amanpour po në Twitter shkruan:

 

“Shumë mirë që Olga Tokarczuk fitoi Nobelin për Letërsi, por çfarë turpi që ajo u njoftua së bashku me Peter Handke.

Mbështetja e tij për Slobodan Millosheviçin, madje fjalimi i tij gjatë varrimit të Kasapit të Ballkanit, rrefen ashpër busullën e tij morale.”

 
 

Presidenti Trump emëron diplomatin John Sullivan për postin e ambasadorit në Rusi

Presidenti amerikan Donald Trump tha të premten se do të emërojë zëvendës sekretarin amerikan të Shtetit John Sullivan në postin e ambasadorit të Shteteve të Bashkuaranë Rusi.

Nëse konfirmohet nga Senati, zoti Sullivan do të jetë diplomati më i lartë amerikan në Rusi, në një kohë veçanërisht sfiduese për administratën e Presidentit Trump.

Ky i fundit po përballet me një hetim për ngritjen e akuzave për shkarkimin e tij për shkak të dyshimeve se ka ushtruar presion ndaj Presidentit të Ukrainës Volodymyr Zelenskiy për të hetuar kundërshtarin e tij politik, ish-nënpresidentin Joe Biden.

Presidenti Trump kishte thënë në muajin gusht se po shqyrtonte emrin e zotit Sullivan për postin e ambasadorit në Moskë. Emri i tij u lakua edhe për postin e këshilltarit të Sigurisë Kombëtare të Presidentit, një detyrë që iu dha ish të dërguarit special të Shteteve të Bashkuara për çështjen e pengjeve Robert O’Brien.

Zoti Sullivan do të zëvendësojë ish-ambasadorin John Huntsman, i cili dha dorëheqjen në muajin gusht pas dy vitesh në këtë detyrë, mes spekulimesh se do të kandidojë për postin e guvernatorit të shtetit të Jutas. Zoti Sullivan ka qenë një diplomat karriere që nga viti 1990. Ai ka shërbyer në poste të ndryshme përfshirë misionet diplomatike amerikane në Ukrainë, Bashkimin Evropian, Korenë e Jugut dhe Honduras. Moska ka qenë në qendër të kritikave të Uashingtonit pasi agjencitë amerikane të zbulimit arritën në përfundimin se Rusia kishte ndërhyrë në zgjedhjet presidenciale të vitit 2016. Rusiaika hedhur poshtë këto akuza. zëri  i amerikës

Gjykata e Apelit: Të dhënat financiare të Presidentit Trump t’i dërgohen Kongresit

Sipas vendimit të një gjykate federale të apelit të dhënat financiare të Presidentit Donald Trump duhet t’i dorëzohen Dhomës së Përfaqësuesve.

Gjykata e Apelit e Uashingtonit tha të premten se kompania Mazars, e cila ka kryer shërbime kontabiliteti për zotin Trump, duhet t’i dorëzojë Kongresit dokumentet e kërkuara.

Pas këtij zhvillimi presidenti Trump mund të apelojë vendimin në Gjykatën e Lartë.

Komisioni për Mbikëqyrjen dhe Reformë në Dhomën e Përfaqësuesve i kishte bërë një kërkesë zyrtare kompanisë Mazars që në muajin prill. Kërkesa i referohet dokumenteve nga viti 2011 deri në 2018-n të cilat Dhoma e Përfaqësuesve i sheh me interes për të hetuar mbi vërtetësinë e deklaratave të presidentit mbi të ardhurat financiare të tij dhe pagesën e taksave si dhe për konflikt të mundshëm interesi.

Gjykatësja federale Neomi Rao, e cila është emëruar nga Presidenti Trump, nuk u pajtua me vendimin e trupit gjykues të përbërë nga tre anëtarë. Gjykatësit e tjerë janë Patricia Millett e emëruar nga Presidenti Barack Obama dhe David Tatel, i emëruar nga Presidenti Bill Klinton. zëri i amerikës

Ish-ambasadorja amerikane në Ukrainë thotë se shkarkimi i saj ishte bërë nën presion

Ish-ambasadorja amerikane në Ukrainë Marie Yovanovitch u tha ligjvënësve të premten se Presidenti Donald Trump i ka bërë presion Departamentit të Shtetit për largimin e saj nga detyra.

Në një deklaratë të saj të siguruar nga “Associated Press” zonja Yovanovitch shkruante se largimi i saj në muajin maj ishte “i papritur” dhe se i ishte thënë se presidenti e kishte humbur besimin tek ajo.

Ish-ambasadorja tha gjithashtu se një zyrtar i kishte thënë se kundër saj “po zhvillohej një fushatë e bashkërenduar” dhe se zoti Trump prej rreth një viti kishte bërë presion ndaj zyrtarëve për ta hequr atë.

“Megjithëse e kuptoj se jam caktuar dhe hiqem nga presidenti, ishte tepër e pabesueshme që qeveria amerikane zgjedh të largojë një ambasador mbi pretendime të pabaza e të rreme nga njerëz me motive qartësisht të dyshimta”, shkruante në deklaratën e saj zonja Yovanovitch.

Zonja Yovanovitch u paraqit në Capitol Hill të premten për një seancë dëgjimore në kuadër të hetimit që po kryejnë demokratët me qëllim ngritjen e akuzave për shkarkimin e presidentit. Ajo pranoi ftesën e ligjvënësve për të dëshmuar pavarësisht deklaratës së zotit Trump se askush nga administrata e tij nuk do të bashkëpunojë me hetimin, të cilin e konsideron si antikushtetues.

Zonja Yovanovitch është ende punonjëse e Departamentit të Shtetit, por përkohësisht është studiuese në universitetin Georgetown.

Zoti Trump tha në fillim të kësaj jave se do të bllokojë të gjithë zyrtarët që të dëshmojnë në Kongres, duke quajtur hetimin të padrejtë dhe të paligjshëm.

Është e paqartë nëse shfaqja e ish-ambasadores sinjalizon një ndryshim në strategji apo nëse zonja Yovanovitch shkeli urdhrat e Shtëpisë së Bardhë me paraqitjen e saj.

Hetimi i demokratëve u nxit nga një telefonatë që zoti Trump bëri me presidentin ukrainas më 25 korrik.

Demokratët po hetojnë kërkesat e zotit Trump ndaj zyrtarëve ukrainas për të filluar hetimet ndaj kundërshtarit të tij politik Joe Biden dhe djalit të tij si dhe nisjen e një hetimi për përfshirjen e Ukrainës në zgjedhjet presidenciale të vitit 2016. Zonja Yovanovitch u tërhoq nga detyra e saj si ambasadore në Kiev në një kohë që Rudy Giuliani, avokati personal i zotit Trump, po nxiste zyrtarët ukrainas të hetonin akuzat e pafaktuara për korrupsion kundër Joe Biden-it dhe djalit të tij.

Zonja Yovanovitch u hoq nga kjo detyrë pasi kishte këmbëngulur që kërkesat e zotit Giuliani drejtuar zyrtarëve ukrainas për hetime të përcilleshin përmes kanaleve zyrtare, sipas një ish-diplomati që kishte biseduar me të (Marie Yovanovitch).

Gjatë telefonatës së 25 korrikut, zoti Trump i kishte thënë Presidentit të Ukrainës Volodymyr Zelenskiy se zonja Yovanovitch ishte një “lajm i keq“, bazuar në dokument që përmbante pjesë të zbardhura të telefonatës publikuar nga Shtëpia e Bardhë. As zoti Giuliani dhe as zoti Trump nuk i kanë specifikuar publikisht kundërshtimet e tyre ndaj zonjës Yovanovitch.

Ndërkohë biznesmenë me lidhje me zotin Giuliani patën lobuar tek një ligjvënës amerikan në vitin 2018 për të ndihmuar për largimin e zonjës Yovanovitch, sikurse thuhet në një aktakuzë të bërë publike të enjten pas arrestimit të tyre.

Zoti Trump vazhdon t’i qëndrojë pozicionit se përmbatja e bisedës së tij telefonike zhvilluar më 25 korrik me presidentin e Ukrainës Volodymyr Zelenskiy, e cila nxiti hetimet për shkarkim, nuk përbën asnjë problem ligjor.

Një ditë më parë zoti Zelenskiy deklaroi se nuk i është bërë “asnjë shantazh” gjatë telefonatës në të cilën zoti Trump i kërkoi të nisë hetimin ndaj ish-nënpresidentit Joe Biden dhe djalit të tij, Hunter. Pas komentit të zotit Zelenskiy udhëheqësi amerikan u tha gazetarëve se presidenti i Ukrainës thjesht konfirmoi atë që ai ka thënë më parë dhe kërkoi që kësaj çështjeje t’i jepet fund.

Zoti Trump pretendon, por pa dhënë asnjë fakt, se gjatë kohës që zoti Biden mbante detyrën e nënëresidentit kishte kërcënuar se do të ndalte ndihmën financiare për Ukrainën, nëse Kievi nuk ndalte hetimin ndaj një kompanie gazi ku Hunter Biden, ishte anëtar bordi.

Të enjten komisionet e Dhomës së Përfaqësuesve që drejtojnë hetimin, njoftuan se do të thërrasin për të dëshmuar sekretarin e Energjisë Rick Perry si dhe dy bashkëpunëtorë të avokatit të presidentit Rudy Giuliani. zëri i amerikës

Jep dorëheqjen sekretari amerikan i Sigurisë kombëtare

Presidenti amerikan, Donald Trump tha se sekretari në detyrë i Sigurisë Kombëtare Kevin McAleenan, po largohet nga posti, ndërsa paralajmëroi se do të emërojë sekretarin e ri javën që vjen.

Presidenti tha se “Kevin McAleenan ka bërë një punë të jashtëzakonshme si ushtrues i detyrës së Sekretarit të Sigurisë Kombëtare’ dhe se ai dëshiron “të kalojë më shumë kohë me familjen e tij dhe të punojë në sektorin privat”.

Presidenti Trump tha se do të shpallë emrin e ushtruesit të ri të kësaj detyre javën që vjen dhe ka “shumë kandidatë të mrekullueshëm”.

Zoti McAleenan mori postin e sekretarit në detyrë në muajin prill pas dorëheqjes së ish sekretares Kirstjen Nielsen, duke u bërë personi i katërt që drejtoi departamentin në dy vjet.

McAleenan, një zyrtar karriere në fushën e sundimit të ligjit, mbikëqyri goditjet e presidentit Trump mbi imigrantët pa dokumente gjatë gjashtë muajve të punës si sekretar në detyrë.

Gjatë mandatit të tij, McAleenan paraqiti disa nisma për të zvogëluar valën e emigrantëve në kufirin ndërmjet Shteteve të Bashkuara dhe Meksikës. Ato përfshinin lejimin e zyrtarëve amerikanë që të ndalonin familjet migruese me fëmijë për periudha më të gjata kohore dhe punën me vendet e Amerikës Qendrore për të krijuar marrëveshje sipas të cilave strehimkërkuesit do të aplikonin për strehim në Amerikën Qendrore në vend se në Shtetet e Bashkuara.

Ai është kritikuat nga disa prej mbështetësve të presidentit se nuk ishte mjaft i zëshëm në përkrahjen e politikave të imigracionit dhe retorikës së presidentit Trump.

Para se të shërbente si sekretar në detyrë i Sigurisë Kombëtare, McAleenan drejtonte doganat dhe sigurinë kufitare të Shteteve të Bashkuara. zëri i amerikës

PEN America: Mëzitje e madhe që shkrimtari zëdhënës i Millosheviçit e Karaxhiçit merr Nobelin

VOAL – PEN America lëshoi ​​deklaratën e mëposhtme, nga autori dhe Presidenti i PEN America Jennifer Egan, në përgjigje të zgjedhjes së Akademisë Suedeze të Peter Handke për çmimin Nobel në Letërsi 2019 (së bashku me Olga Tokarczuk):

PEN America zakonisht nuk komenton çmimet letrare të institucioneve të tjera. Ne e pranojmë që këto vendime janë subjektive dhe se kriteret nuk janë uniforme. Sidoqoftë, shpallja e sotme e çmimit Nobel në Letërsi për Peter Handke duhet të jetë një përjashtim. Jemi mërzitur nga përzgjedhja e një shkrimtari që ka përdorur zërin e tij publik për të nënvizuar të vërtetën historike dhe duke ofruar ndihmë publike për autorët e gjenocidit, si ish Presidenti serb Slobodan Milosevic dhe udhëheqësi serb i Bosnjës, Radovan Karadzic. PEN America është angazhuar që nga miratimi i Kartës sonë PEN të vitit 1948 për të luftuar kundër botimit të rremë, gënjeshtrës së qëllimshme dhe shtrembërimit të fakteve. Karta jonë më tej na angazhon të punojmë për të “davaritur të gjitha urrejtjet dhe për të mbrojtur idealin e një njerëzimi që jeton në paqe dhe barazi.” Ne e hedhim poshtë vendimin që një shkrimtar që i ka vënë vazhdimisht në dyshim krimet e dokumentuara të luftës, të meritojë të vlerësohet për “Zgjuarsi gjuhësore”. Në një moment të nacionalizmit në rritje, udhëheqjes autokratike dhe dezinformimit të gjerë në të gjithë botën, bashkësia letrare meriton diçka më mirë se kjo. Ne kemi shumë keqardhje për zgjedhjen e Komitetit Nobel për Letërsinë.

SHBA, Nën arrest dy biznesmenë që kanë lidhje me avokatin e presidentit

Rudy Giuliani me Presidentin Trump

Dy biznesmenë nga Florida të lidhur me avokatin personal të Presidentit Donald Trump, Rudy Giuliani, janë arrestuar për shkelje të ligjit për financimin e fushatës zgjedhore. Njoftimi u bë të enjten nga një zëdhënës i zyrës së prokurorit të Manhatanit ku thuhej se biznesmenët Lev Parnas dhe Igor Fruman, u arrestuan në lidhje me një rast që është nën hetim në Nju Jork.

Sipas një burimi që ka dijeni mbi çështjen, dy biznesmenët kishin planifikuar të udhëtonin drejt Vjenës të mërkurën të mbrëmje.

Sipas një ankpadie të paraqitur në gjykatën e Nju Jorkut, Parnas dhe Fruman kanë bashkëpunuar për të “kanalizuar para nga burime të huaja për kandidatë për poste federale e shtetërore”.

John Dowd, avokati i dy biznesmenëve nuk pranoi të komentojë rreth akuzave.

Lev Parnas është një biznesmen Ukrainas ndërsa Igor Fruman insvetitor në fushën e pasurive të paluajtshme. Të dy, sipas njoftimeve në media, kanë ndihmuar

zotin Giuliani të krijojë lidhje me qarqet më të larta politike në Ukrainë.

Arrestimet vijnë ndërsa Dhoma e Përfaqësuesve e udhëhequr nga demokratët ka nisur një hetim për shkarkimin e presidentit Trump. Hetimi u nxit nga një kërkesë që zoti Trump i bëri presidentin të Ukrainës gjatë një bisede telefonike në muajin korrik, për të nisur një hetim mbi ish-zëvendës Presidentin Joe Biden, rivali I tij I mundshëm në zgjedhjet presidenciale të vitin 2020.

Në një ankesë të dorëzuar në korrik të vitit 2018, Qendra Ligjore për Fushatat, një organizatë jofitimprurëse, i kishte kërkuar një agjencie qeveritare të hetonte nëse biznesmenët Parnas dhe Fruman kishin shkelur ligjin duke përdorur një kompani të regjistruar në parajsat fiskale, për të fshehur burimin e një donacioni prej 325 mijë dollarësh ndaj një komiteti për veprim politik pro Donald Trump-it.

Më vonë organizata ia paraqiti ankesën edhe Komisionit Federal Zgjedhor duke përfshirë edhe prova për transferime bankare që tregonin lëvizjen e fondeve. /Zëri i Amerikës

Presidenti Trump dhe procesi për shkarkim nga posti

Demokratët e opozitës po avancojnë në hetimet për të hapur procesin për shkarkimin e mundshëm të Presidentit Trump, ndërkohë që administrata ka bllokuar dëshmitë e disa prej personave kyçë dhe ka vonuar dorëzimin e dokumenteve të rëndësishme. Demokratët e shumicës në Dhomën e Përfaqësuesve mund të votojnë së shpejti për të hapur procesin për shkarkimin e presidentit lidhur me kontaktet me Ukrainën. Kjo do të çonte në hapjen në Senat të gjyqit për largim nga posti të presidentit, por republikanët kanë shumicën në Senat dhe parashikohet që do të votonin për ta shpallur presidentin të pafajshëm. Korrespondenti i Zërit të Amerikës Jim Malone sjell hollësi mbi betejën politike që po vazhdon në Uashington:

Presidenti Trump mbetet sfidues përballë hetimeve të hapura nga demokratët për të nisur procesin për shkarkimin e tij:

“Ato që po i bëjnë vendit janë të paimagjinueshme. Është fat i madh që jam unë president, sepse shumë veta e kanë thënë që të paktë janë ata që mund ta përballonin. Mua në fakt më jep energji kjo situatë. E dini përse? Sepse është e rëndësishme,” tha presidenti.

Në zemër të procesit janë përpjekjet e presidentit për të bindur vende të tjera të hapnin një hetim mbi rivalin politik të zotit Trump, ish-nënpresidentin Joe Biden.

Demokratët i shohin veprimet e presidentit si abuzim autoriteti. Ndër ta kreu i Komisionit të Dhomës së Përfaqësuesve, Adam Schiff:

“Ky është një ndër hetimet e pakëta që mund të çojë në procesin për shkarkimin e mundshëm të presidentit të vendit. Është direkt i lidhur me pyetjen nëse presidenti abuzoi pushtetin duke kërkuar ndihmë për fushatën e tij zgjedhore, në një mënyrë që dëmton sigurinë kombëtare”.

Presidenti Trump ka mohuar se ka patur shkelje dhe thotë se synimi i tij ishte lufta kundër korrupsionit, jo politika.

Ligjvënësit republikanë, të cilët i kanë dalë në mbrojtje presidentit, u janë kundërvënë përpjekjeve për shkarkimin e mundshëm të presidentit.

Por Dhoma e Përfaqësuesve, nën kontrollin e demokratëve, po tenton që për herë të tretë në historinë e vendit të hapë procesin për shkarkimin e mundshëm të presidentit, thotë analisti ligjor Paul Schiff Berman.

“Këto janë akuza shumë të rënda. Nuk mendoj se ka shembuj të tjerë në historinë e vendit kur një president ka vepruar në politikën e jashtme në mënyra që i sigurojnë përfitime personale”.

Analisti William Galston thotë se hapja e procesit është vetëm hapi i parë:

“Nëse Dhoma e Përfaqësuesve voton pro ngritjes së akuzave, pasi në këtë rast Dhoma e Përfaqësuesve luan rolin e një prokurori që ngre akuzat, çështja i kalon Senatit. Aty zhvillohet gjyqi, por do të duhen 2/3 e senatorëve që të largohet presidenti nga posti”.

Republikanët kanë shumicën në Senat dhe presidenti mbetet optimist për rezultatin edhe nëse hapet procesi gjyqësor:

“Çështja do t’i kalojë më pas Senatit dhe aty do të fitojmë. Republikanët kanë qenë shumë të bashkuar. Kjo është gjuetia më e madhe e shtrigave në historinë e vendit,” tha presidenti.

Ngritja e akuzave dhe më pas largimi i presidentit nga posti kërkojnë 2/3 e votave në Senat, ose 67 nga 100 senatorët.

Ky është një objektiv shumë ambicioz, duke pasur parasysh realitetin thotë analisti Galston:

“Kjo kërkon që 20 nga 53 senatorët republikanë të bashkohen me demokratët për ta realizuar shkarkimin e presidentit. Pra kërkohet një koalicon shumë më i gjerë dypartiak se ç’kemi parë në realitet”.

Procesi i fundit për shkarkimin e një presidenti u zhvillua në Senat në 1999, kur Presidenti Bill Clinton u lirua nga akuzat për shkelje që lidheshin me marrëdhëniet jashtëmartesore me një praktikante.

DASH urdhëron ambasadorin Sondland të mos dëshmojë në Kongres

Administrata e Presidentit Donald Trump urdhëroi të martën ambasadorin amerikan në Bashkimin Evropian Gordon Sondland, që të mos paraqitet përpara Kongresit për t’u marrë në pyetje lidhur me komunikimet mes zotit Trump dhe zyrtarëve ukrainas që janë bërë shkak për një hetim për shkarkimin e presidentit.

Tre komisione të Dhomës së Përfaqësuesve kishin planifikuar të merrnin në pyetje të martën në mëngjes zotin Sondland në seanca me dyer të mbylluara. Por avokati i zotit Sondland tha se një urdhër i Departamentit të Shtetit e detyroi klientin e tij të mos paraqitej.

“Ai është ambasador në detyrë dhe punonjës i Departamentit të Shtetit dhe duhet të zbatojë urdhrin e tyre”, tha avokati i tij Robert Luskin.

Seanca me dyer të mbyllura ishte pjesë e hetimit për ngritjen e akuzave ndaj Presidentit Trump.

Në një reagim kryetari i Komisionit të Zbulimit në Dhomën e Përfaqësuesve Adam Schiff tha se Departamenti i Shtetit nuk po i jep Kongresit mesazhet e ambasadorit amerikan në Bashkimin Evropian që siç tha ai janë të rëndësishme për hetimin.

“Kongresi jo vetëm që po privohet nga dëshmia e tij, por ne jemi gjithashtu në dijeni se ambasadori ka mesazhe telefonike dhe emaile në një pajisje personale, që i është dhënë Departamentit të Shtetit, megjithëse ne i kemi kërkuar të na i japë. Departamenti i Shtetit nuk po lejon që ne t’i marrim ato”, u tha Adam Schiff gazetarëve.

“Ato mesazhe janë shumë të rëndësishme për hetimin për ngritjen e akuzave për shkarkimin e Presidentit”, shtoi zoti Schiff.

Në një postim në twitter që pasoi këtë zhvillim presidenti shkruante:

“Do të doja ta dërgoja ambasadorin Sondland për të dëshmuar, një njeri me të vërtetë të mirë dhe amerikan i madh, por për fat të keq ai do të dëshmonte përpara një gjykate krejtësisht të kompromentuar, që injoron standardet e drejtësisë e të ligjit, ku të drejtat e republikanëve janë hequr dhe ku faktet nuk lejohen për publikun”.

Të hënën Presidenti Trump e kritikoi sërisht hetimin duke e quajtur “një skemë mashtruese” të demokratëve, të cilët siç tha, nuk duan që ai të fitojë një mandat të dytë si president.

Zoti Sondland është bërë një figurë e rëndësishme e hetimit që po kryen Kongresi, për shkak të përpjekjeve të tij që Ukraina të angazhohej në hetimin e kundërshtarit të mundshëm të zotit Trump në garën presidenciale, ish-nënpresidentin Joe Biden dhe djalin e tij, Hunter Biden.

Sipas ankesës së një informatori, e cila nxiti hetimin ndaj Presidentit, thuhet se një ditë pas bisedës telefonike të zotit Trump me Presidentin e Ukrainës Zelenskiy, zoti Sondland dhe Kurt Volker i cili ishte i dërguar i posaçëm amerikan në Ukrainë, u takua me udhëheqësin e Ukrainës e figura të tjera politike.

Informatori shkruan se sipas bisedave të zbardhura të atyre takimeve e të rrëfyera nga zyrtarë amerikanë “ambasadorët Volker e Sondland i kanë këshilluar udhëheqësit ukrainas se si t’u “qaset” kërkesave që Presidenti i kishte bërë atij.

Duke folur për gazetarët të hënën në Shtëpinë e Bardhë, zoti Trump përsëriti se biseda e tij me zotin Zelenskiy ishte “perfekte”. Në përgjigje të interesimit të gazetarëve, presidenti tha se nuk ndihej i shqetësuar nga njoftimet për një informator të dytë mbi këtë çështje. Zoti Trump tha gjithashtu se telefonata e tij me udhëheqësin e Ukrainës ishte “miqësore” duke shtuar se nuk kishte patur “presion”.

Komisionet e Zbulimit, Punëve të Jashtme dhe Mbikëqyrjes të Dhomës së Përfaqësuesve që janë në krye të hetimit, kanë zhvilluar seanca dëgjimore dhe kanë bërë kërkesa zyrtare për dokumente nga anëtarët e administratës Trump dhe avokati personal i presidentit, Rudy Giuliani.

Të hënën ata lëshuan një kërkesë të re drejtuar sekretarit të Mbrojtjes Mark Esper dhe drejtorit në detyrë të zyrës së menaxhimit dhe buxhetit Russell Vought për dorëzimin deri më 15 tetor të dokumenteve në lidhje me vendimin e zotit Trump për të ndaluar ndihmën ushtarake për Ukrainën.

Një pjesë e hetimit përfshin shqyrtimin nëse vendimi i zotit Trump për të ndaluar ndihmën ushtarake për Ukrainën ishte i lidhur me kërkesën e tij për një hetim ndaj Joe Bidenit dhe djalit të tij. Ndërkohë autoritetet në Ukrainë nuk është gjetur asnjë provë për përfshirjen e tyre në korrupsion. za

SHBA: Presim që qeveria e re e Kosovës të rifillojë menjëherë bisedimet me Serbinë

Në deklaratën e parë për zgjedhjet në Kosovë, një zëdhënës i Departamentit të Shtetit tha se Shtetet e Bashkuara presin që udhëheqja e re të rifillojë menjëherë bisedimet me Serbinë drejt një marrëveshjeje për normalizimin e marrëdhënieve.

Shtetet e Bashkuara tha zëdhënësi, urojnë popullin e Kosovës për përfundimin e suksesshëm të zgjedhjeve parlamentare.

“Ne mirëpresim mundësinë të punojmë me një qeveri të re pro-dialog, që të jetë e angazhuar për forcimin e demokracisë dhe paqes, për drejtësi dhe mirëqenie për gjithë qytetarët e Kosovës. Ne kemi qenë të qartë për pritshmërinë tonë, që udhëheqja e re e Kosovës të jetë e gatshme të rifillojë menjëherë bisedimet me Serbinë dhe të punojë drejt një marrëveshjeje për normalizimin e marrëdhënieve”, thotë zëdhënësi në deklaratën për Zërin e Amerikës.

Gjykatësi në Nju Jork, Trump të dorëzojë formularët e taksave

Sipas vendimit të një gjykatësi federal të marrë të hënën, Presidenti Donald Trump duhet të dorëzojë formularët e taksave për 8 vitetet e fundit, në bazë të kërkesës së prokurorit në Manhatan. Avokatët e presidentit kishin argumentuar se zoti Trump gëzonte imunetet ndaj padive dhe nuk kishte pse dorëzonte formularët e taksave.

Zoti Trump e apeloi menjëherë vendimin në gjykatën federale të apelit në Manhatan. Në vendimin e tij gjykatësi Victor Marrero kritikon argumentin e avokatëve të zotit Trump se “presidenti, familja dhe bizneset e lidhura me të, qëndrojnë mbi ligjin”.

Prokurori i Qarkut të Manhatanit Cyrus Vance kishte kërkuar zyrtarisht taksat personale dhe të kompanive të zotit Trump nga 2011 në 2018.

Avokatët e zotit Trump kishin argumentuar se presidenti gëzon imunitet dhe nuk mund të ishte subjekt i hetimit penal për sa kohë është në detyrë dhe se Kushtetuta sipas tyre kërkonte që prokurori të priste derisa zoti Trump të largohej nga posti.

Donald Trump pritet të kandidojë për t’u rizgjedhur. Mandati aktual i tij përfundon më 20 janar 2021.

Presidenti është përpjekur të mos ofrojë të dhëna mbi shumë aspekte të financave të tij, pavarësisht se gjatë fushatës për Shtëpinë e Bardhë kishte premtuar se do publikonte të dhënat mbi taksat.

Prokurori Vance bëri kërkesë zyrtare për taksat, katër javë pasi lëshoi një tjetër kërkesë drejtuar organizatës Trump për të dhëna mbi pagesat e bëra ndaj dy grave përpara zgjedhjeve të vitit 2016, për të blerë sipas tij, heshtjen e tyre.Ato pretendojnë se kanë patur marrëdhënie seksuale me zotin Trump, por ai e mohon këtë gjë. za

Presidenti Trump sulmon Senatorin republikan Mitt Romney

Trump/Romney

Fundjava nuk po shërben si një pushim për betejën e hetimit për shkarkimin e Presidentit Donald Trump. Ai shkruajti disa mesazhe të forta në Twitter, duke sulmuar si demokratët, ashtu edhe anëtarë të rëndësishëm të partisë së tij republikane.

Presidenti Trump e sulmoi ashpër në Twitter Senatorin republikan Mitt Romney, të cilin e quajti të “kapardisur” dhe një “naiv që po bie plotësisht në prehrin e demokratëve”.

Arsyeja kishte të bënte me reagimin e Senatorit Romney, ndaj këtij komenti të Presidentit Trump:

“Kina duhet të hetojnë Biden-at”, u tha gazetarëve Presidenti Trump ditën e enjte.

Senatori Romney shkruajti në Twitter se “thirrja e paprecedentë dhe pa takt drejtuar Kinës dhe Ukrainës për të hetuar Joe Biden-in është e gabuar dhe revoltuese”.

Ai është senatori i parë republikan që kritikon drejtpërsëdrejti sjelljen e Presidentit Trump.

Mbrëmë, Senatorja Collins e shtetit Maine, iu bashkua me kujdes Senatorit Romney. Megjithëse, asaj do t’i duhet të përballet me një betejë të vështirë për t’u rizgjedhur, Senatorja Collins e quajti thirrjen e Presidentit Trump drejtuar Kinës “krejtësisht të papërshtatshme”. Megjithatë, ajo nuk tha nëse Presidenti Trump ka bërë shkelje duke i bërë presion Ukrainës për të hetuar Biden-at.

“Unë do të jem në rolin e anëtares së jurisë, siç isha gjatë gjykimit të Presidentit Clinton. Prandaj nuk dëshiroj të paragjykoj evidencën, e cila nuk është marrë ende e tëra”, u tha gazetarëve Senatorja Collins.

Siç pritej, demokratët po e kritikojnë më haptazi Presidentin Trump, në veçanti ata që kandidojnë për zgjedhjet presidenciale.

“Ky President ka vënë interesat e tij të biznesit, interesat e tij politike, si dhe interesat e tij partiake, mbi interesat e vendit”, deklaroi Amy Klobuchar, kandidate demokrate për zgjedhjet e ardhshme presidenciale.

“Let të jemi të qartë – këtu shohim qartë një shkarkim të ardhshëm, me kollare të kuqe”, tha kandidatja demokrate Kamala Harris.

Në vazhdim të hetimeve, komisionet e Dhomës së Përfaqësuesve pritet të dëgjojnë nga dy diplomatë amerikanë.

Të martën pritet të paraqitet ambasadori amerikan në Bashkimin Evropian, ndërsa të premten, do të dëgjohet Marie Yovanovitch, ish-ambasadorja amerikane në Ukrainë, e larguar nga kjo detyrë nga Presidenti Trump.

Sekretari amerikan i Shtetit Mike Pompeo tha se Departamenti i Shtetit do të bashkëpunojë, por pa tejkaluar masën.

“Ka patur hetime nga Kongresi që i kanë shqetësuar dhe abuzuar punonjësit e Departamentit të Shtetit, duke i kontaktuar drejtpërsëdrejti dhe u kërkuar të ofrojnë dokumenta që janë pronë e Departamentit të Shtetit. Kjo është përndjekje, dhe unë nuk do të lejoj kurrë që t’i ndodhë ekipit tim”, deklaroi nga Athina, Sekretari amerikan i Shtetit. za

Ambasadori i ShBA në Gjermani përfaqësues i presidentit Trump për bisedimet Kosovë Serbi

Presidenti Trump njoftoi të enjten se do të emërojë ambasadorin amerikan në Gjermani, Richard Grenell si të dërguarin e tij të posaçëm për bisedimet e paqes midis Kosovës dhe Serbisë.

Richard A. Grenell është ambasador i Shteteve të Bashkuara në Gjermani që nga muaji maj i vitit të kaluar. Zoti Grenell, ekspert i politikës së jashtme, është themelues i firmës “Capitol Media Partners” në vitin 2010, që ofron konsulencë për çështje të jashtme.

Ambasadori Grenell, ka qënë zëdhënës i ambasadës së Shteteve të Bashkuara në OKB për shtatë vjet, 2001-2008, duke e mbajtur këtë post më gjatë se çdo ambasador tjetër, duke shërbyer për katër ambasadorë të ndryshëm.

Ai mban gradën Master për Administratën Publike nga universiteti i Harvardit.

Kosova mirëpret emërimin e zotit Grenell

Presidenti i Kosovës, Hashim Thaçi, mirëpriti emërimin e zotit Grenell, duke theksuar se ky emërim “është një tjetër dëshmi që presidenti Trump, administrata amerikane, tërë shteti amerikan, qëndrojnë pranë nesh në çdo hap të rëndësishëm. Tash jemi edhe më konfident në procesin e dialogut dhe në mundësinë që të arrijmë njohjen nga Serbia dhe anëtarësimin në Kombet e Bashkuara, dhe kështu ta përmbyllim konsolidimin ndërkombëtar të shtetit tonë. Ky është lajm i mirë edhe për rajonin si dhe të gjithë ata që angazhohen për paqe të qëndrueshme, për zhvillim, për jetë më të mirë për të gjitha shtetet në Evropën Juglindore. E kemi thënë gjithmonë dhe besojmë gjithmonë se jemi me fat që kemi përkrah Shtetet e Bashkuara të Amerikës“, shkroi ai në rrjetet sociale.

Kryeministri në largim i Kosovës, Ramush Haradinaj mirëpriti emërimin ndërsa shkroi se pret që të punojnë së bashku “në bisedimet e pakushtëzuara për arritjen e njohjes së ndërsjellë (më Serbinë) në kufijtë ekzistues“.

Emërimi i zotit Grenell pasoi emërimin më 31 gusht të zotit Matthew Palmer si përfaqësuesi i Posaçëm i Departamentit amerikan të Shtetit për Ballkanin Perëndimor. Zoti Palmer që vazhdon të mbajë edhe postin e Zëvendës Ndihmës Sekretarit për Çështjet Evropiane, ishte përfshirë në përpjekjet për të nxitur ripërtëritjen e bisedimeve ndërmjet Kosovës e Serbisë, të ndërmjetësuara nga Bashkimi Evropian.

Emërimi i tij ishte cilësuar si një dëshmi e përfshirjes më të madhe të Shteteve të Bashkuara në procesin e bisedimeve ndërmjet Kosovës dhe Serbisë, ndërsa emërimi i zotit Grenell shënon një zhvillim të ri në këtë përfshirje.

Drejtori i Qendrës për Studime të Evropës Juglindore, Florian Bieber, në një postim në rrjetet sociale ngriti mëdyshjet për rolin e zotit Palmer pas emërimit të zotit Grenell.

Bisedimet ndërmjet Kosovës dhe Serbisë janë pezulluar që nga nëntori i vitit të kaluar, kur Kosova u vuri tarifa prej 100 për qind mallrave serbe në shenjë kundërshtimi ndaj qasjes së Serbisë ndaj shtetësisë së saj. Beogradi kushtëzon rifillimin e bisedimeve me heqjen e tarifave.

Shtetet e Bashkuara kanë kërkuar në vazhdimësi pezullimin e tarifave, ndërsa Bashkimi Evropian heqjen e tyre për të rihapur bisedimet me Serbinë, por qeveria në largim e Kosovës i ka rezistuar kësaj trysnie duke nxitur shqetësime për cenimin e marrëdhënieve me aleatët e saj.

Gazeta amerikane “Washington Post” kishte shkruar në muajin janar se presidenti i Kosovës Hashim Thaçi, më 21 dhjetor (2018) kishte zhvilluar një takim të pa raportuar diplomatik në Berlin me ambasadorin amerikan, Richard Grenell, në të cilin ishte zotuar për heqjen e tarifave prej 100 për qind ndaj mallrave serbe.

Zoti Palmer i tha Zëri të Amerikës në një intervistë muajin e kaluar se duhet pritur zgjedhjet e 6 tetorit në Kosovë dhe se pritshmërinë amerikane janë që “qeveria e ardhshme e Kosovës do të jetë një qeveri pro dialogut, e gatshme të pezullojë tarifat të cilat janë pengesë për rifillimin e procesit të dialogut, e gatshme të formojë një ekip negociator të fuqizuar si dhe e gatshme të angazhohet me Serbinë në tryezën e bisedimeve me seriozitetin e qëllimit për të arritur një marrëveshje për normalizimin e marrëdhënieve. Shtetet e Bashkuara do të jenë me ta së bashku në çdo hap të këtij procesi, por Kosova duhet të marrë kontrollin e fateve të veta“.

Vazhdimi i bisedimeve mund të pritet pas zgjedhjeve në Kosovë dhe diplomatët shpresojnë që kjo të ndodhë para se Serbia të hyjë në periudhën e zgjedhjeve që mbahen në pranverën e vitit të ardhshëm./za

Departamenti i Shtetit: Whitaker nuk e përfaqëson Trumpin

Matthew Whitaker, që e vizitoi Kosovën ditë më parë, nuk numërohet njeri i Trumpit dhe nuk përfaqëson asgjë nga qeveria amerikane.

Një zëdhënëse e Departamentit Amerikan të Shtetit ka thënë për VICE News se Whitaker nuk e përfaqëson qeverinë amerikan.

“Zoti Whitaker është qytetar privat. Ai nuk flet në emër të qeverisë së SHBA-së”, ka thënë zëdhënësja Morgan Ortagus për Vice Neës.

Gazeta Express ka raportuar në ditën kur Whitaker erdhi në Kosovë, se, bazuar në shkrimet e publikuara në mediat huaja, ai është nën hetime nga FBI për dyshime se ka qenë pjesë e një kompanie mashtruese.

Whitaker ka qenë ushtrues detyre i Prokurorit të Përgjithshëm në SHBA prej nëntorit në vitin 2018 deri në shkurt të këtij viti.

Presidenti Trump përshëndet vendimin e OBT

Presidenti amerikan Donald Trump e cilësoi të enjten një fitore të rëndësishme vendimin e Organizatës Botërore të Tregtisë, falë të cilit SHBA-ja gëzon tashmë të drejtën t’u vendosë tarifa mallrave të Bashkimit Evropian si kundërpërgjigje ndaj subvencionit të paligjshëm të linjës ajrore Airbus.

“SHBA-ja arriti një fitore prej 7.5 miliardë dollarësh nga OBT-ja kundër Bashkimit Evropian që për shumë vite e ka trajtuar vendin tonë shumë keq në tregti për shkak të tarifave, barrierave tregtate dhe shumë çështje të tjera”, shkruante zoti Trump në Twitter.

Vendimi i njoftuar të mërkurën i jep Shteteve të Bashkuara të drejtën t’u vendosë tarifave mallrave të BE-së në vlerën e 7.5 miliardë dollarëve, duke filluar nga 18 tetori.

“Për vite me radhë, Evropa ka siguruar subvencione masive për Airbus-in duke dëmtuar rëndë industrinë amerikane të hapësirës ajrore dhe punonjësit tanë” tha përfaqësuesi amerikan për Tregtinë Robert Lighthizer.

“Më në fund, pas 15 vitesh procesesh gjyqësore, OBT-ja ka konfirmuar se Shtetet e Bashkuara kanë të drejtë t’u kundërpërgjigjen subvencioneve të paligjshme të BE-së”, tha ai.

Por sipas gjetjeve të OBT-së edhe Shtetet e Bashkuara kanë siguruar subvencione të paligjshme për prodhuesin e kompanisë Boeing me bazë në SHBA. Vendimi i BE-së mbi tarifat që mund t’i vendosë mallrave amerikane, pritet të merret vitin e ardhshëm.

Vendimi i së mërkurës është përfundimtar dhe nuk mund të apelohet. BE-ja lëshoi një deklaratë ku thuhej se “nëse Uashingtoni merr vendim të imponojë tarifat e autorizuara nga OBT-ja, nuk do t’i japë Brukselit asnjë zgjidhje tjetër përveçse të bëjë të njëjtën gjë”.

Shtetet e Bashkuara planifikojnë të vendosin një tarifë prej 10 për qind ndaj avionëve tregtarë të prodhuar në Evropë dhe një tarifë prej 25 për qind ndaj një game të gjerë mallrash evropiane, përfshirë uiskin skocez dhe atë irlandez, veshjet, mjete të ndryshme e ushqimet. za

Trumpi i bën thirrje Ukrainës dhe Kinës të hetojnë Bidenin

Presidenti Donald Trump i bëri thirrje të enjten një vendi tjetër, Kinës, të hetojë rreth ish-nënpresidentit Joe Biden. Thirrja vjen në klimën e polemikave që lidhen me hetimin e demokratëve të Dhomës së Përfaqësuesve rreth marrëdhënieve të Presidentit me Ukrainën, me qëllim ngritjen e akuzave për shkarkimin e tij.

“Kina duhet të fillojë një hetim rreth Joe Bidenit dhe djalit të tij”, tha Presidenti Trump gjatë komenteve për gazetarët jashtë Shtëpisë së Bardhë.

Ai tha se nuk i kishte kërkuar drejtpërdrejt presidentit kinez Xi Jinping to hetonte për zotin Biden dhe djalin e tij Hunter, por shtoi se “kjo është diçka për të cilën mund të fillojmë të mendojmë.”

Presidenti Trump dhe avokati i tij personal Rudy Giuliani janë përpjekur të ngrejnë dyshime për marrëdhëniet e biznesit të zotit Hunter Biden në Kinë, duke u mbështetur në disa artikuj të konservatorit Peter Schweizer. Por deri tani nuk ka dalë ndonjë provë që ish-nënpresidenti të ketë përfituar financiarisht nga marrëdhëniet e biznesit të djalit të tij.

Ndërkohë anëtarët e stafit të tre komisioneve të Dhomës së Përfaqësuesve që po udhëheqin procedurat për shkarkimin e Presidentit Trump po mbajnë sot (të enjten) takime me dyer të mbyllura me zotin Kurt Volker, i cili dha dorëheqjen pak ditë më parë si i dërguar i SHBA-së në Ukrainë.

Pyetjet ka të ngjarë të përqendrohen tek telefonata e muajit korrik mes Presidentit Trump dhe homologut ukrahinas Zelenskiy, veprimet e zotit Volker pas telefonatës si dhe aktivitetet e avokatit personal të zotit Trump Rudy Giuliani në lidhje me pretendimet se zoti Trump i ka bërë presion zotit Zelenskiy për të hetuar ish-nënpresidentin Joe Biden. Pretendimet u ngritën në një ankesë të një informatori e cila u bë publike javën e kaluar. Në ankesë thuhej se sipas disa zyrtarëve të Shtëpisë së Bardhë zoti Trump i kishte bërë presion zotit Zelenskiy që të “takohet ose të bisedojë me dy persona që ai i kishte përmendur në mënyrë të qartë si të dërguarit e tij personal për këto çështje”, zotin Giuliani dhe Prokurorin e Përgjithshëm William Barr.

Zoti Volker dha dorëheqjen një ditë pas publikimit të ankesës. Ai ndihmoi në organizimin e takimeve mes zotit Giuliani me zotin Zelenskiy. Sipas Departamentit të Shtetit, në përgjigje të një kërkese të një këshilltari të zotit Zelenskiy, zoti Volker e kishte vënë atë në kontakt me zotin Giuliani.

Ankesa e informatorit nxiti demokratët në Dhomën e Përfaqësuesve që të nisin zyrtarisht hetimin për shkarkim të presidentit. Informatori thotë se një ditë pas telefonatës Trump-Zelenskiy, zoti Volker dhe ambasadori amerikan në Bashkimin Evropian Gordon Sondland u takuan me presidentin ukrainas e personalite të tjera politike.

Duke iu referuar zyrtarëve amerikanë informatori tha se gjatë këtyre takimeve “ambasadorët Volker dhe Sondland i dhanë këshilla udhëheqësve ukrainas se si t’u “qasen” kërkesave që Presidenti i kishte bërë zotit Zelenskiy.

Të mërkurën vonë në mbrëmje, republikani më e lartë i komisionit të Punëve të Jashtme ligjvënësi Michael McCaul tha se u alarmua kur mësoi se marrja në pyetje e zotit Volker do të udhëhiqej nga stafi i komisionit të Zbulimit. Ai foli me shqetësim edhe rreth faktit se gjatë kësaj seance demokratëve të komisionit të Punëve të Jashtme do t’u lejohej të kishin të pranishëm dy anëtarë të stafit të tyre ndërsa republikanëve vetëm një.

Sanders ndal fushatën për president, shtrohet në spital

Senatori amerikan Bernie Sanders ka ndërprerë fushatën për president pasi të martën u shtrua në spital me dhimbje gjoksi.

Mjekët i vendosën dy unaza në një arterie të bllokuar, njoftoi të mërkurën fushata e tij.

“Senatori Sanders po bisedon me njerëzit dhe është në humor,” tha këshilltari i fushatës së tij Jeff Weaver në një deklaratë.

“Ai do të pushojë gjatë ditëve të ardhshme. Ne po anulojmë takimet e planifikuara deri në një njoftim të mëtejshëm, dhe do të vazhdojmë të bëjmë përditësimet e nevojshme,” tha ai.

Hetimi për shkarkim, Trump: Është një grusht shteti

Presidenti Donald Trump kritikoi hetimin për shkarkimin e tij duke e quajtur atë një “grusht shteti”. Komentet e tij vijnë ndërsa krerët e disa komisioneve në Dhomën e Përfaqësuesve kanë akuzuar sekretarin e Shtetit Mike Pompeo për bllokimin e përpjekjeve të tyre për të mbledhur dokumente dhe intervistuar dëshmitarët.

“Çdo ditë e më shumë po arrij në përfundimin se ajo që po ndodh nuk është një hetim për shkarkim. Ky është një grusht shteti i planifikuar për t’ia hequr fuqinë e popullit, të drejtën e tij për të votuar, lirinë e tij, amendametin e dytë të kushtetutës, fenë, ushtrinë, murin në kufi dhe të drejtat që ia ka dhënë zoti si qytetarë të Shteteve të Bashkuara të Amerikës“, shkruante zoti Trump në një postim në Twitter.

Demokratët që kanë shumicën në Dhomën e Përfaqësuesve po vazhdojnë me hetimin për të parë nëse mund të ngrejnë zyrtarisht akuza për shkarkimin e zotit Trump, bazuar në parimin kushtetues që largon zyrtarët që angazhohen në akte “tradhtie, marrje ryshfi, apo krime të tjera të mëdha, e kundërvajtje”.

Inspektori i Përgjithshëm i Departamentit të Shtetit pritet të takohet të mërkurën me stafin e komisioneve të Mbikëqyrjes, Punëve të Jashtme e Zbulimit të të dyja dhomave të Kongresit për të diskutuar mbi dokumentet që ligjvënësit kanë kërkuar ndërsa hetojnë telefonatën e muajit korrik mes Presidentit Trump dhe homologut të tij të Ukrainës, Volodymyr Zelenskiy.

Komisionet e Zbulimit, Mbikëqyrjes dhe Punëve të Jashtme të Dhomës së Përfaqësuesve kanë kërkuar të dëgjojnë të mërkurën dëshminë e ish-ambasadores amerikane në Ukrainë Marie Yovanovitch, por seanca u shty për javën tjetër. Ndërkohë të enjten ish-i dërguari amerikan në Ukrainë Kurt Volker pritet të dëshmojë përpara këtyre komisioneve.

Zhvillimet vijnë pas ankesës së paraqitur nga një informator në të cilën ai shpreh shqetësimin se zoti Trump po kërkonte ndërhyrje të huaj në zgjedhjet e vitit 2020 duke i kërkuar Ukrainës të hetojë kandidatin demokrat Joe Biden. Por zoti Trump ka thënë se ai nuk ka bërë asgjë të keqe gjatë diskutimet që ka patur me zotin Zelenskiy. za

Avokatit të presidentit, Giuliani, i kërkohet të dorëzojë dokumente

Presidenti i SHBA Donald Trump u shpreh të hënën me zemërim rreth hetimit të Dhomës së Përfaqësuesve që synon ngritjen e akuzave për shkarkimin e tij, ndërkohë që udhëheqësi republikan i Senatit deklaroi se ai nuk do të kishte “zgjedhje tjetër” përveçse të lejojë hapjen e një gjyqi në Senat nëse Dhoma vendos të nisë procedurat.

Senatori Mitch McConnell duket se u dha fund hamendjeve se ai mund të përdorë pozitën e tij për të shmangur një gjyq në senat, duke minuar çdo përpjekje të Dhomës së Përfaqësuesve për shkarkimin e presidentit.

Republikanët kontrollojnë Senatin dhe përgjithësisht kanë heshtur rreth aludimeve apo përpjekjeve për të hetuar presidentin, i cili i përket partisë së tyre.

Dhoma e Përfaqësuesve nisi javën e kaluar një hetim me synimin për ta shkarkuar presidentin Trump, pas raportit të një informatori, i cili ngriti shqetësimin se presidenti ishte përpjekur të shfrytëzonte dhënien e rreth 400 milion dollarëve ndihmë në këmbim të një favori politik nga udhëheqësi i Ukrainës.

Tre komisione të Dhomës së Përfaqësuesve thanë se i kishin dërguar kërkesa ligjore për dorëzim dokumentesh avokatit të zotit Trump, Rudy Giuliani.

Giuliani, ish-Kryetar i Bashkisë së Nju Jorkut, ka thënë në televizion se i kishte kërkuar qeverisë së Ukrainës të “verë në shënjestër” ish-nënpresidentin Joe Biden, kandidat demokrat, që synon të rivalizojë me Presidentin Trump në zgjedhjet e vitit 2020.

Nëse Dhoma e Përfaqësuesve miraton ngritjen e akuzave, të njohura si “nenet e shkarkimit ndaj një presidenti”, atëherë procesi kalon në Senat, i cili zhvillon një gjyq.

“Nuk do të kisha zgjedhje tjetër përveçse ta pranoj çështjen,” i tha senatori McConnell rrjetit televiziv CNBC.

“Sipas rregullave të Senatit, nga ne kërkohet që ta pranojmë çështjen, nëse Dhoma e Përfaqësuesve i hyn asaj rruge. Rregullat e gjykimit në Senat janë shumë të qarta,” tha zoti McConnell.

Presidenti Trump e kaloi një pjesë të ditës duke ia drejtuar zemërimin e tij ligjvënësit demokrat që drejton hetimin, duke thënë në Twitter se kongresmeni Adam Schiff, kreu i komisionit të zbulimit, duhet të arrestohet për “tradhti”.

Më vonë, duke folur para gazetarëve në Shtëpinë e Bardhë, Presidenti Trump e akuzoi ligjvënësin Schiff për shtrembërimin e bisedës së tij të 25 korrikut me Presidenti ukrainas Volodymyr Zelenskiy.

“Adam Schiff bëri një mashtrim dhe e lexoi atë në Kongres, e lexoi përpara popullit të Shteteve të Bashkuara dhe kjo është një poshtërsi”, tha Presidenti Trump.

Në komentet e tij, zoti Schiff tha se biseda e presidentit Trump me presidentin ukrainas Zelenskiy “i ngjan një episodi klasik të krimit të organizuar”. Ai gjithashtu ironizoi komentet e bëra nga Presidenti Trump në Twitter.

Dëshmitarë të ndryshëm do të japin dëshmi këtë javë në Dhomën e Përfaqësuesve, lidhur me kërkesën e Presidentit Trump që Ukraina të hetojë kandidatin demokrat Joe Biden.

“Ju deklaruat së fundmi se jeni në posedim të provave – në formën e mesazheve tekst, regjistrimeve telefonike dhe komunikimeve të tjera – gjë që tregon se nuk keni vepruar i vetëm dhe që zyrtarë të tjerë të administratës Trump mund të kenë qenë të përfshirë në këtë skemë,” i shkruanin zotit Giuliani kryetarët e tre komisioneve të Dhomës së Përfaqësuesve. Atij i është dhënë kohë të përgjigjet deri në 15 tetor. za

Themeluesi i Space X zbulon prototipin e ri të raketës Starship

New York

Themeluesi i kompanisë hapësinore amerikane “Space X”, Elon Musk, ka zbuluar një prototip të raketës së tij Starship, e cila sipas tij, mund të transportojë njerëz në Hënë.

“Zbulimi i madh kritik që është i nevojshëm për ne për t’u civilizuar në hapësirë është të udhëtojmë në hapësirë si udhëtim ajror”, u tha Musk entuziastëve të hapësirës dhe gazetarëve të tubuar në vendin e zhvillimit të kompanisë Space X në Teksas.

Ai më tej tha se ideja për një civilizim hapësinor, të qenit atje midis yjeve, është një nga gjërat më të mira.

Musk pretendon se fluturimi i parë në orbitë i raketës mund të realizohet brenda gjashtë muajve të ardhshëm, ndërsa misionet në hapësirë brenda raketës me njerëz vitin e ardhshëm. aa

Presidenti Jimmy Carter mbush 95 vjet

Ish-Presidenti amerikan Jimmy Carter mbush 95 vjeç më 1 tetor. Ai konsiderohet si presidenti më jetëgjatë në historinë e Shteteve të Bashkuara. Siç raporton korrespondenti i Zërit të Amerikës Kane Farabaugh, zoti Carter, i ka kaluar momentet historike duke u angazhuar me të rinjtë ndërsa vazhdon të punojë për të përmbushur objektivat e tij për sa kohë që është gjallë.

Pas katër vitesh luftë me sëmundjen e kancerit, e pas katër muajsh nga një rrëzim që i kërkoi terapi të vazhdueshme fizike, ish-Presidenti Jimmy Carter nuk tregon asnjë shenjë lodhjeje apo dhimbje. Ai qëndron pa ndihmën e askujt dhe i përgjigjet pyetjeve të studentëve në një aktivitet në universitin Emory, ku ai merr pjesë çdo vit, tashm prej 38 vitesh.

“Mendoj se ka një problem kur ne i mbivlerësojmë figurat politike, por kam shumë respekt për Jimmy Carterin”, thotë Gian-Luigi Zaninelli, student i universitetit Emory.

Gian-Luigi Zaninelli, i cili merr pjesë për herë të parë në një bashkëbisedim të kësaj natyre në universitet, thotë se erdhi me një mendje të hapur për presidentin democrat, që ka shërbyer në këtë zyrë për një mandat të plotë.

“Kam dëgjuar shumë konservatorë të cilët janë jashtëzakonisht kritikë ndaj Jimmy Carter-it”, thotë ai.

Por student Zaninelli thotë se kjo vjen për shkak të periudhës së trazuar gjatë kohës kur zoti Carter qëndronte në Shtëpinë e Bardhë katër dekada më parë, kur ai nuk kishte lindur ende.

“Për shkak të punës së mirë që ai ka bërë prej më shumë se 30 vitesh, kemi një mendim shumë të mirë për atë si njeri. Ajo që është e padiskutueshme është se Jimmy Carter kujdeset për njerëzit dhe i është përkushtuar shërbimit ndaj të tjerëve”.

“Unë ende i përmbahem këshillave që më ka dhënë drejtori i shkollës: duhet t’u përshtateni ndryshimeve që vijnë me kohën dhe koha po ndryshon, por duhet që t’i përmbaheni edhe atyre parimeve që nuk ndryshojnë kurrë. Ndaj unë kam besim tek këto parime, sikurse të thuash të vërtetën e t’u vish në ndihmë të tjerëve”, thotë ish-Presidenti Jimmy Carter.

Në një intervistë ekskluzive për Zërin e Amerikës, 95-vjeçari fitues i çmimit Nobel për Paqen, thotë se më në fund, mosha po bën të vetën.

“Udhëtoja drejt Afrikës tre ose katër herë në vit dhe gjithmonë shkoja në Kinë e kështu me radhë. Tashmë i ka rralluar udhëtimet, por ende vazhdoj punën me qendrën Carter”.

Një qendër të cilën ai e drejton sëbashku me gruan e tij Rosalynn, në përpjekje për paqe, luftë ndaj sëmundjeve e ndërtim shpresë në të gjithë botën përmes programeve që përfshijnë monitorim zgjedhjesh apo dhe çrrënjosjen e një sëmundje që vjen nga një krimb i veçantë në Guinea.

Por pengesat e fundit, përfshirë rastet e reja të transmetimit të krimbit mes qenve, mund të rrezikojnë objektivin e tij për shfarrosjen e sëmundjes përgjatë gjithë viteve të mbetura të jetës së tij.

“Kemi parandaluar rreth 80 milionë njerëz që të preken nga krimbi i Guinesë, të cilët kishin shumë shanse të prekeshin prej tij. Kemi bërë përparim domëthënës shumë, por kemi edhe pak punë për të bërë”.

“Presidenti Carter është një lloj shenjtori laik i Amerikës së sotme”, thotë Joseph Crespino, profesor i Historisë, universiteti Emory.

Profesori i historisë në universitetit Emory, Joe Crespino, thotë se zoti Carter ka vendosur një standard të lartë mbi atë çka pritet nga një president amerikan pasi lë detyrën.

“Jetëgjatësia e tij, angazhimi i tij për të bërë sa më shumë të jetë e mundur për sa kohë është gjallë, është një model i mrekullueshëm, jo vetëm për bashkëkombasit e tij, por edhe për njerëzit në mbarë botën”.

Një botë që është transformuar pjesërisht edhe falë punës që Presidenti Carter dhe zonja e tij do të vazhdojnë të bëjnë, për aq kohë sa munden.

Presidenti Trump sugjeron arrestimin e kongresmenit demokrat për “tradhti”

Presidenti amerikan Donald Trump përshkallëzoi të hënën sulmet ndaj kreut demokrat të Komisionit të Dhomës së Përfaqësuesve për Zbulimin, Adam Schiff, duke sugjeruar se ai duhet të arrestohet për “tradhëti”.

Zoti Schiff drejton hetimin për procedurën për shkarkim ndaj presidentit.

“Ligjvënësi Adam Schiff, në mënyrë të paligjshme sajoi një deklaratë TË RREME & të tmerrshme, me pretendimin se e kisha bërë unë, e paraqiti si pjesën më të rëndësishme të telefonatës sime me presidentin ukrainas dhe e lexoi para Kongresit dhe popullit amerikan. Nuk kishte ASNJË lidhje me çka thashë unë në telefonatë. Arrestim për Tradhëti?” shkruante ai në Twitter.

Presidenti Trump ka bërë disa postime në Twitter të hënën, duke përsëritur mbrojtjen e një telefonate në korrik me Presidentin ukrainas, Volodymyr Zelenskiy, e cila është në qendër të ankesës së një informatori

“E përsëris, Presidenti i Ukrainës tha se nuk ka pasur ASNJË PRESION NDAJ TIJ NGA UNË. Çështja është e mbyllur”, tha zoti Trump në Twitter.

Ndërkohë, avokatët që përfaqësojnë informatorin, po theksojnë nevojën për mbrojtjen e identitetit të tij, ndërsa presidenti thotë se duhet të “takojë akuzuesin” e tij.

“Si çdo amerikan, unë kam të drejtën të takoj akuzuesin tim, veçanërisht kur ky akuzues, i ashtuquajtur ‘informator’ interpretoi një bisedë të përkryer me një udhëheqës të huaj në një mënyrë krejtësisht të pasaktë dhe mashtruese”, shkruante zoti Trump në Twitter të dielën.

“Përveç kësaj, dua të takoj jo vetëm akuzuesin tim, që paraqiti informacion TË DORËS SË DYTË & DHE TË TRETË, por edhe personin që në mënyrë të paligjshme i dha atij informacionin, që ishte përgjithësisht i pasaktë. A po PËRGJONTE ky person presidentin amerikan? Pasoja të rënda!” vazhdonte ai.

Ekipi ligjor i kryesuar nga Andrew Bakaj nxorri një deklaratë të dielën, ku thuhej se avokatët vazhdojnë të punojnë me demokratët dhe republikanët në Kongres për të finalizuar detajet logjistike të takimit të informatorit me ligjvënësit, por shtoi se nuk është caktuar ndonjë datë.

Një tjetër avokat mohoi një njoftim sipas së cilit, informatori ishte nën mbrojtje federale për shkak të shqetësimeve të sigurisë.

Grupi ligjor publikoi një letër që i kishte dërguar Zyrës së Drejtorit të Zbulimit Kombëtar ku thuhej se shqetësimet e tyre për sigurinë personale të informatorit, janë shtuar javën e fundit dhe se “parashikojnë që situata të keqësohet”. Ata përmendën si tregues një deklaratë të presidentit.

“Dua të di se cili është personi që i dha informatorit të dhënat, sepse është si të jetë spiun. E mbani mend se si vepronim dikur kur ishim të zgjuar, apo jo? Me spiunët dhe tradhëtarët…Silleshim pak ndryshe nga ç’bëjmë tani”, tha zoti Trump të enjten.

Avokatët thanë gjithashtu se kishte njerëz që po ofronin shuma të konsiderueshme parash në këmbim të informacionit për identitetin e informatorit.

Në një letër tjetër për udhëheqësit demokratë dhe republikanë të komisioneve të zbulimit të Senatit dhe Dhomës së Përfaqësuesve, avokatët e informatorit u bënë thirrje ligjvënësve “të ngrenë zërin në mbrojtje të informatorit dhe të rikonfirmojnë se ky është një sistem mbrojtjeje ku hakmarrja nuk lejohet, as drejtpërdrejt dhe as e nënkuptuar”.

Informatori ka thënë se Presidenti Trump, në një telefonatë të 25 korrikut, kërkoi ndihmë nga presidenti i ri i Ukrainës për të nxjerrë informacione inkriminuese për ish-nënpresidentin Joe Biden dhe djalin e tij Hunter që do të dëmtonin perspektivat e zotit Biden për të fituar emërimin presidencial të partisë demokrate dhe për të sfiduar Donald Trump-in në vitin 2020.

Si nënpresident, Biden dhe drejtues të tjerë perëndimorë ushtruan presion ndaj Ukrainës për të hequr prokurorin e lartë të vendit, Viktor Shokin, sepse ai shihej si jo i ashpër sa duhet për korrupsionin.

Zoti Trump ka pohuar se Biden po kërkonte të mbronte djalin e tij, por ky pretendim është hedhur poshtë. za

Lajmet me interesante

Lajmet e fundit

ARKIVA E LAJMEVE

Kliko këtu për të parë arkivën e lajmeve

Send this to a friend