Presidenti Donald Trump tha të enjten se Shtetet e Bashkuara mund të ndërmarrin veprime tregtare ndaj vendeve që nuk kontribuojnë sa duhet për NATO-n.

Presidenti Trump, i sapokthyer nga udhëtimi në Londër për samitin e NATO-s, po u bën trysni vendeve anëtare që të kontribuojnë më shumë financiarisht për aleancën.

Ai tha se shumë vende po i afrohen objektivit të shpenzimeve prej dy përqind të Prodhimit të Brendshëm Bruto përsa i përket kontributit për NATO-n.

“Shumë vende janë afër dhe po afrohen. Disa nuk janë shumë afër, dhe ne mund të ndëmarrim gjëra që kanë të bëjnë me tregtinë. Nuk është e drejtë që ata të kenë mbrojtjen amerikane dhe të mos paguajnë,” tha ai.

Presidenti Trump dhe udhëheqësi francez Emmanuel Macron debatuan ashpër rreth të ardhmes së NATO-s në prag samitit që u mblodh për të shënuar 70 vjetorin e aleancës ushtarake perëndimore.

Në shkëmbimet e mprehta mes tyre, Presidenti Trump kërkoi që Evropa të paguajë më shumë për mbrojtjen e saj kolektive dhe të bëjë lëshime në favor të interesave tregtare amerikane.

Ndërkaq, ai foli me optimizëm për aleancën dhe tha se takimet e tij gjatë samitit shkuan mirë dhe se “NATO-ja është në formë shumë, shumë të mirë.” Edhe marrëdhëniet me vendet e tjera janë “vërtet të jashtëzakonshme,” tha Presidenti Trump në komentet që bëri të enjten. zëri i amerikës

Kryetarja e Dhomës së Përfaqësuesve Nancy Pelosi njoftoi të enjten se Dhoma e Përfaqësuesve do të hartojë listën me akuza për shkarkimin e Presidentit Donald Trump.

“Bëhet fjalë për fatin e demokracisë sonë. Presidenti nuk na la zgjidhje tjetër veçse të veprojmë,” tha zonja Pelosi.

Ajo e bëri njoftimin historik ndërsa demokratët po kërkojnë me ngulm që Dhoma e Përfaqësuesve, ku ata kanë shumicën, ta hedhë në votë propozimin, ndoshta para Krishtlindjeve.

Zonja Pelosi tha se e kishte autorizuar hartimin e akuzave për shkarkimin e presidentit “me një ndjenjë trishtimi por me besim dhe përulje.”

“Veprimet e presidentit kanë shkelur seriozisht Kushtetutën,” tha zonja Pelosi.

Në qendër të hetimeve është një telefonatë e Presidentit Trump me presidentin e Ukrainës në korrik të këtij viti, ku zoti Trump i bëri presion bashkëbiseduesit për të hetuar rivalin demokrat Joe Biden si kusht që Ukrainës t’i livrohej ndihma ushtarake. Presidenti Trump i ka mohuar akuzat. Shtëpia e Bardhë tha se demokratëve duhet t’u vijë turp.

Nëse Dhomae Përfaqësuesve e miraton listën e akuzave, në Senat, ku shumicën e kanë republikanët, zhvillohet një gjyq. Në këtë rast, anëtarët e Dhomës së Përfaqësuesve luajnë rolin e prokurorëve dhe senatorët rolin e jurisë. Kreu i Gjykatës së Lartë kryeson gjyqin. Presidenti lejohet të ketë në gjyq avokatë mbrojtës, të cilët thërrasin dëshmitarë dhe kërkojnë dokumente.

Presidenti Trump tha sot se nëse Dhoma e Përfaqësuesve vendos të miratojë akuzat për shkarkimin e tij, ajo duhet ta bëjë këtë tani dhe sa më shpejt, në mënyrë që çështja t’i kalojë senatit dhe vendi t’i kthehet punës.

Ai tha se një vendim i tillë i demokratëve nënkupton që presidentët e ardhshëm do të përballen në mënyrë rutinë me kërcënime për shkarkim nga ligjvënësit. zëri i amerikës

Në Shqipëri, prokuroritë e Tiranës dhe Durrësit njoftuan se kanë nisur prej disa ditësh hetimet lidhur me ndërtesat e dëmtuara si pasojë e tërmetit të fortë që goditi vendin, të martën e shkuar. Kryeqyteti dhe zona e Durrësit janë më të prekurat nga tërmeti. “Hetimi ka si objekt kryerjen e veprimeve të shpejta në drejtim të sqarimit të rrethanave konkrete, që kanë çuar në pasojat e ardhura dhe gjendjen e ndërtimeve. Veprat penale që po hetohen janë ato të “Shpërdorim detyre”, parashikuar nga neni 248 i Kodit Penal, ku do hetohet për organet qe kanë miratuar lejet e ndërtimit dhe nëse ato janë dhënë në mbështetje të ligjit, si dhe nëse ndërtuesit kanë respektuar lejen e marrë, “Ndërtim i paligjshëm”, parashikuar nga neni 199/a i Kodit penal, si dhe “Dhënia e ndihmës për ndërtim të paligjshëm”, neni 199/b i Kodit Penal”, shojegon Prokuroria e Tiranës e cila shpjegon se i është kërkuar “informacion Bashkisë së Tiranës për banesat e evidentuara tashmë si të prekura nga termeti dhe të klasifikuara jo në kushtet e duhura për banim. I njëjti informacion i është kërkuar dhe strukturave të tjera shtetërore”.

Prokuroria e Durrësit nga ana e saj, thotë se “dyshohet se pasojat kanë ardhur si shkak i ndërtimeve pa leje dhe të moskryerjes së detyrës nga inxhinierët zbatues dhe personave pergjegjës si dhe nga mospërmbushja e rregullt e detyrës nga nepunësit shtetëror të ngarkuar me mbikqyerjen e këtyre ndërtimeve”. Kjo prokurori ka rregjistruar çështjen për veprat penale; “Ndërtim pa leje”, dhe “Shpërdorim detyre”.

Të dhëna ende paraprake flasin për të paktën afro 900 pallatet dhe mbi 5100 banesat e dëmtuara nga tërmeti. Në Tiranë rezultojnë për momentin 640 pallate dhe 4 mijë banesa të dëmtuara, nga të cilat 371 pallate dhe afro 2500 banesa të dëmtuara rëndë. Në Durrës, numri rezulton më i ulët, por vetëm për shkak se këtu procesi i verifikimit ka nisur me vonesë, ndërsa ditët e para vëmendja ishte përqëndruar te njerëzit e mbetur nën rrënoja. Në këtë qytet për momentin rezultojnë 185 pallate dhe afro 730 banesa të dëmtuara, nga të cilat 38 pallate dhe 620 banesa të prekura rëndë.

Po sot, gjatë ditës presidenti Ilir Meta mblodhi Këshillin e Sigurisë Kombëtare. “Diskutuam për një bashkëveprim dhe koordinim më të ngushtë midis të gjitha institucioneve për përballimin e emergjencës deri në rivendosjen e normalitetit të plotë. E mbështetëm prokurorinë të çojë përpara hetimet dhe të vendosë para përgjegjësisë penale të gjithë ata që do të rezultojnë përgjegjës. Të sigurojmë burimet e brendshme dhe mbështetjen e duhur ndërkombëtare për tejkalimin e pasojave të rënda të këtij tërmeti të tmerrshëm”, u shpreh presidenti Meta, përmes një postimi në Facebook, në përfundim të takimit. zëri i amerikës

Fushës së mbushur me kandidatët që shpresojnë të marrin emërimin presidencial të partisë demokrate iu shtua një emër i ri së fundmi, ish kryetari i bashkisë së New York Michael Bloomberg. Korrespondentja e Zërit të Amerikës Ardita Dunellari thotë se investitori dhe filantropi miliarder 77-vjeçar është një emër i njohur dhe ka në dispozicion miliona dollarë të pasurisë së tij për shpenzimet e fushatës, por sondazhet tregojnë se politikani i moderuar i cili dikur ka garuar si republikan, përballet me skepticizëm mes disa demokratëve.

Michael Bloomberg po bën fushatë për politika që ai thotë se do të ndihmojnë klasën e mesme dhe do të rivendosin drejtësi në ekonominë amerikane.

Miliarderi kandidon në një kohë kur shumë demokratë po kritikojnë pabarazinë e të ardhurave në Amerikë dhe mbajnë qëndrim ndaj ultra të pasurve. Bloombergu po mbështetet tek përvoja e tij për të fituar votues: pozicionin e tij të suksesshëm si mogul në media dhe teknologji dhe si kryetari i bashkisë që rigjallëroi qytetin e Nju Jorkut pas sulmeve të 11 shtatorit.

“Ajo që trashëgoi Michael Bloomberg ishte fjalë për fjalë një zonë katastrofash në Manhattanin e Poshtëm dhe ai ishte në gjendje ta rindërtonte qytetin në mënyrë të konsiderueshme dhe ta rindërtonte atë në mesin e një recesioni”, thotë John Hudak me institutin Brookings

Si kryetar bashkie, Bloomberg krijoi një politikë të veçantë për forcat e rendit të njohur si ndalo dhe kontrollo, e cila lejoi ndalimin në mënyrë disproporcionale të afrikano-amerikanëve për kontrolle të rastësishme të policisë. Kohët e fundit zoti Bloomberg kërkoi falje për politikën, duke thënë se ai nuk e kuptonte plotësisht se si ndikoi ajo tek pakicat, të cilat shihen si mbështetës të rëndësishëm të Partisë Demokrate.

Bloomberg, njeriu i nëntë më i pasur në botë, pritet të derdh miliona dollarë në reklama.

“Asnjëherë nuk ka patur një kandidat që ka njoftuar se do të garojë për president dhe brenda disa ditësh të shpenzojë 37 milionë dollarë dhe ky është vetëm fillimi”, thotë analisti Larry Sabato.

Sondazhet tregojnë se Bloombergu ka tani rreth 3 përqind mbështetje mes demokratëve. Por pa asnjë favorit të qartë në zgjedhjet paraprake, disa analistë thonë se paratë e tij i japin Bloombergut ndikim dhe perceptimin e pavarësisë në arenën politike.

“Është më mirë për një kandidat të shpenzojë paratë e veta, sesa të mbledhë qindra miliona dollarë nga njerëz që duan diçka në këmbim, qoftë ky posti i një ambasadori apo një dispozitë në ligj për të përfituar për biznesin e tyre”, thotë analisti Larry Sabato.

Në të njëjtën kohë, ato para mund të jenë një përgjegjësi politike në një parti që premton të ngushtojë hendekun në rritje mes të pasurve dhe të varfërve.

“Unë e kuptoj që njerëzit e pasur do të kenë më shumë këpucë se sa ne, do të kenë më shumë makina se sa ne, do të kenë më shumë shtëpi, por nuk mund të marrin një pjesë më të madhe të demokracisë”, tha kandidatja Elizabeth Warren.

Bloomberg argumenton se ai është kandidati më i mirë për të mposhtur Presidentin Trump, me centrizmin e tij politik dhe pasurinë e madhe. A do të bien dakord votuesit?

Popullariteti nuk blihet lehtë thotë analisti Hudak.

“Presidenti Trump u lidh me votuesit në një mënyrë shumë personale. Nuk është e qartë në se Michael Bloombergu ka të njëjtën karizëm politike”.

Tani për tani, Bloombergu po i anashkalon zgjedhjet paraprake në katër shtete në shkurt. Prova e tij e parë e madhe vjen në 3 Mars, kur 14 shtete do të zhvillojnë zgjedhjet paraprake në atë që njihet si “Super E Marta”.

Departamenti amerikan i Shtetit, shprehu ngushëllimet e Shteteve të Bashkuara për viktimat e tërmetit në Shqipëri.

“Sot ne lutemi për familjet e tyre, si edhe për ata që janë lënduar. Në emër të popullit amerikan, u urojmë të gjithë atyre që janë prekur shërim të shpejtë. Sot, ashtu si në kohë të tjera të vështira, Shtetet e Bashkuara janë në krah të miqve tanë në Shqipëri”, thuhet në një deklaratë të Sekretarit të Shtetit Mike Pompeo, me rastin e 107 vjetorit të pavarësisë.

Departamenti i Shtetit shpreh gjithashtu mbështetjen e fortë për integrimin e evropian dhe përgëzon vendosmërinë e Shqipërisë për këtë objektiv,

“Ne vlerësojmë përpjekjet e qeverisë shqiptare për të zbatuar reformat e nevojshme, përfshirë ato që kanë si synim konsolidimin e një sistemi gjyqësor të pavarur”, thuhet më tej në deklaratë.

Departamenti i Shtetit vlerëson gjithashtu kontributin e Shqipërisë në koalicionin e NATO-s dhe mirëpret udhëheqjen e Shqipërisë në kryesinë e radhës së OSBE-së për vitin 2020.

“Miqësia SHBA-Shqipëri qëndron si një shtyllë e qendrueshme paqeje dhe stabiliteti dhe ne shpresojmë për shumë vite të tjera miqësie dhe bashkëpunimi”, përfundon deklarata.

Republikani Nunes nuk i përgjigjet pyetjes nëse është takuar me ish-kryeprokurorin e Ukrainës

Devin Nunes, republikani kryesor i komisionit të Zbulimit (Dhoma e Përfaqësuesve) që po heton Presidentin Donald Trump, nuk pranoi t’i përgjigjej të dielën pyetjeve nëse ishte takuar me një ish-zyrtar ukrainas për të mbledhur informacione rreth djalit të ish-Nënpresidentit Joe Biden.

Avokati që përfaqëson zotin Lev Parnas, një bashkëpunëtor i avokatit personal të zotit Trump, Rudy Giuliani, ndaj të cilit rëndon një aktpadi, tha për disa media të premten se zoti Nunes ishte takuar me ish-Kryeprokurorin e Ukrainës Victor Shokin në Vjenë në vitin 2018.

Pretendimi është i diskutueshëm sepse zoti Nunes nuk ka folur për ndonjë takim të kësaj natyre gjatë mbrojtjes që i ka bërë në emër të republikanëve Presidentit Donald Trump gjatë seancave dëgjimore në kuadër të hetimeve për shkarkimin e tij.

Duke folur të dielën për rrjetin televiziv “Fox News” zoti Nunes u pyet drejtpërndrejtë nëse ai ishte takuar me Victor Shokin. Ligjvënësi u përgjigj se ai kishte në plan t’u përgjigjej pyetjeve, por nuk mund ta bënte këtë gjë “tani”.

Zoti Nunes e ka kritikuar në mënyrë të përsëritur procesin hetimor që mund të çojë në shkarkimin e presidentit. Ligjvënësit po hetojnë nëse zoti Trump i ka bërë presion të Ukrainës për të hapur hetime që mund të dëmtonin potencialisht zotin Biden, një pretendent kryesor për të qenë kandidati zyrtar i Partisë Demokrate për zgjedhjet e 2020-s përballë Donald Trump-it.

Demokratët kanë thënë se nëse pretendimi i zotit Parnas vërtetohet, zoti Nunes mund të përballet me një hetim për shkelje të etikës. Zoti Parnas ndaj të cilit janë ngritur akuza në lidhje me kontribute të dyshimta politike, kërkon imunitet për të dëshmuar përpara komisionit të Zbulimit të Dhomës së Përfaqësuesve. Kongresi nuk pritet të mblidhet deri më datë 3 dhjetor. Por gjatë një interviste të dielën për rrjetin televiziv “CNN” kryetari i komisionit Adam Schiff tha se egzistojnë mundësitë për më shumë dëshmi në kuadër të hetimeve për shkarkimin e presidentit.

Afati kohor për një votim për ngritjen zyrtarisht të akuzave nga Dhoma e Përfaqësuesve është ende i paqartë. Komisioni që drejton zoti Schiff ka ende punë me hartimin e një raporti bazuar në hetimet e deritanishme i cili i dorëzohet më pas komisionit Jurik po të kësaj dhome. Ky i fundit përgatit akuzat që do t’i shkojnë për votim Dhomës së Përfaqësuesve.

Demokratët, të cilët kontrollojnë Dhomën e Përfaqësuesve, mund t’i zyrtarizojnë akuzat me shumicë të thjeshtë votash. Çështja i kalon Senatit që pas zhvillimit të një procesi gjyqësor duhet të marrë një vendim me dy të tretat e votave për të shkarkuar nga detyra presidentin Trump. Deri tani asnjë prej republikanëve, në të dyja dhomat e Kongresit, nuk kanë dhënë ndonjë sinjal se është pro ngritjes zyrtarisht të akuzave ndaj presidentit.

Në një postim në Twitter të dielën zoti Trump kritikoi seancat dëgjimore dhe tha se sondazhet “tashmë janë kthyer shumë fuqishëm kundër procesit për shkarkimin e tij, veçanërisht në shtetet e lëkundura”, ato shtete ku si demokratët dhe republikanët i kanë shanset e barabarta për të fituar. Zoti Trump nuk sqaroi se për çfarë sondazhesh bëhej fjalë. Sipas të dhënave sondazhet tregojnë se opinioni publik është i ndarë në mënyrë të barabartë nëse duhet apo jo që ndaj presidentit të zyrtarizohen akuzat për shkarkim.

Gjatë dy javëve të fundit në Kongres u paraqitën dymbëdhjetë dëshmitarë. Ata sollën detaje të reja lidhur me dyshimet se zoti Trump i bëri presion Presidentin ukrainas Volodymyr Zelenskiy që të hetojë kundërshtarin e tij politik Joe Biden dhe djalin e tij, Hunter Biden.

Dëshmitarët i thanë ligjvënësve se zoti Giuliani kishte luajtuar një rol kryesor në presionin ushtruar ndaj zyrtarëve ukrainas për të nisur hetimin.

“Të gjithë e kuptuam se nëse nuk do të pranonim të punonim me zotin Giuliani, do të humbisnim një mundësi të madhe për të forcuar marrëdhëniet mes Shteteve të Bashkuara dhe Ukrainës. Ndaj ne zbatuam urdhrat e presidentit“, tha në dëshminë e tij të mërkurën Gordon Sondland, ambasadori amerikan në Bashkimin Evropian. zëri i amerikës

Michael Bloomberg njoftoi sot se po kandidon për President të Shteteve të Bashkuara.

Ish kryetari i Bashkisë së Nju Jorkut, një nga njerëzit më të pasur në botë, u bashkua zyrtarisht në fushatën presidenciale demokrate të dielën. Ish republikani 77-vjeçar i njoftoi planet e tij në një faqe elektronike të fushatës.

Ai shkroi: ” Po kandidoj për president për të mposhtur Donald Trumpin dhe për të rindërtuar Amerikën. ”

Hyrja e Bloomberg-ut në garë, vetëm 10 javë para fillimit të zgjedhjeve paraprake, reflekton shqetësimin e tij se lista aktuale e kandidatëve nuk është e pozicionuar mirë për të mposhtur presidentin Trump.

Investimet masive të Bloombergut në çështjet me përparësi për demokratët si ndryshimet klimatike dhe kontrolli i armëve të mbështetura nga pasuria e tij personale, mund ta bëjnë atë një kandidat të fuqishëm. Ai tashmë ka rezervuar më shumë se 30 milion dollarë në reklama televizive nëpër disa shtete, megjithëse nuk do të marrë pjesë në katër zgjedhjet e para paraprake. zëri i amerikës

Kompania Amazon ka ngritur një padi kundër Departamentit amerikan të Mbrojtjes.

Ankesa, e paraqitur të premten në një gjykatë federale amerikane, kundërshton vendimin e Departamentit të Mbrojtjes për dhënien e një kontrate informatike prej 10 miliardë dollarësh Mikrosoftit.

Amazon kishte pritur të merrte kontratën për modernizimin dixhital të Pentagonit.

Në gusht, megjithatë, Presidenti Donald Trump publikisht hodhi dyshime nëse Amazonit duhet t’i jepej kontrata.

Jeff Bezos është Drejtori i Përgjithshëm i Amazon. Ai është gjithashtu pronari i gazetës The Washington Post, kritike ndaj Trumpit dhe administratës së tij.

Presidenti Trump e ka quajtur gazetën pjesë të “mediave të rreme të lajmeve”.

Javën e kaluar, Sekretari i Mbrojtjes Mark Esper tha se kontrata ishte dhënë në mënyrë të drejtë dhe me paanëshmëri. zëri i amerikës

Presidenti Donald Trump bëri një vizitë të papritur në një spital ushtarak pasditen e së shtunës për atë që Shtëpia e Bardhë thotë se është një fillim i hershëm i kontrollit të tij të përvitshëm shëndetësor.

“Duke parashikuar një 2020 shumë të ngarkuar, presidenti po përfiton nga një fundjavë e lirë këtu në Uashington, D.C., për të filluar pjesët e rutinës së tij të ekzaminimit vjetor fizik në qendrën Walter Reed,” thanë një deklaratë sekretarja e Shtypit të Shtëpisë së Bardhë, Stephanie Grisham .

Presidenti kaloi rreth dy orë e 15 minuta në kompleksin mjekësor në Bethesda, Merilend. Një fotograf e pa Presidentin të dilte nga qendra mjekësore me një jakë të hapur dhe pa kravatë.

Sekretarja Grisham, menjëherë pas largimit të Trumpit, tha se presidenti iu nënshtrua një “ekzaminimi të shpejtë dhe analiza” dhe ai “mbetet i shëndetshëm dhe energjik pa ankesa, siç dëshmohet edhe nga prezantimet e tij të fuqishme në mitingjet para mijëra amerikanëve disa herë në javë”.

Sekretarja e shtypit nuk dha hollësi të tjera se çfarë lloji analizash iu nënshtrua Presidenti Trump.

Në një mesazh të mesnatës në Twitter (herët në mëngjes të së dielës), Presidenti Trump tha se ai kishte filluar “fazën e parë të kontrollit të përvitshëm fizik. Gjithçka shumë mirë (shkëlqyeshëm). Do ta përfundojë atë vitin e ardhshëm ”

Sekretarja Grisham tha gjithashtu se Presidenti, ndërsa ishte në qendrën mjekësore, përshëndeti gjithashtu stafin mjekësor “për t’i falenderuar të gjithë për kujdesin e jashtëzakonshëm që ata ofrojnë për luftëtarët tanë të plagosur dhe u uroj atyre një Ditë të mbarë Falenderimesh”.

Para se të largohej nga qendra Walter Reed, Presidenti Trump u takua gjithashtu me familjen e një ushtari të forcave speciale të plagosur në Afganistan.

Trump, 73 vjeç, u vlerësua në gjendje të mirë nga mjeku i tij zyrtar, Komandanti i Marinës, Sean Conley, pas një ekzaminimi në fillim të shkurtit në Qendrën Kombëtare Mjekësore Ushtarake Walter Reed në Bethesda, Merilend.

Presidenti, i cili pëlqen gatimet fastfood dhe mishin e kuq, nuk pi alkool apo duhan. Ai nuk dihet të ketë patur ndonjë problem shëndetësor që kur u bë president në janar 2017, por ka një histori të kolesterolit të lartë dhe merr një dozë të ulët ditore të aspirinës për shëndetin kardiak. zëri i amerikës

Kundër këshillave të zyrtarëve të mbrojtjes Presidenti Trump fali të premten dy ushtarakë amerikanë të akuzuar për krime lufte në Afganistan, përfshirë një që ishte dënuar dhe një që ishte në pritje të gjykimit. Presidenti Trump i riktheu gjithashtu gradën një anëtari të ekipit SEAL i cili ishte ndëshkuar pasi pozoi me një viktimë në Irak.

Presidenti fali lejtnantin Clint Lorance dhe majorin Mathew Golsteyn. Lorance i urdhëroi ushtarët e tij të hapnin zjarr ndaj tre burrave të paarmatosur dhe u shpall fajtor për vrasje të shkallës së dytë dhe pengim të drejtësisë; Majori Golsteyn ishte në pritje të gjyqit për vrasjen e dyshuar të një afgani të dyshuar për një sulm me auto-bombë në 2010. Gjyqi i Golsteynit ishte caktuar të fillonte vitin e ardhshëm.

Trump gjithashtu i riktheu gradën e Shefit të Operatorit Special të Luftës, Edward Gallagerit, i cili ishte ndëshkuar pasi kishte pozuar me një kufomë luftarake të armikut, por ishte liruar nga akuzat për vrasje me paramendim dhe përpjekje për vrasje.

Sipas një raporti të CNN-it, zyrtarët e mbrojtjes e kishin paralajmëruar presidentin Trump se faljet mund të dëmtonin integritetin e sistemit gjyqësor ushtarak.

Shtëpia e Bardhë e mbrojti veprimin e Presidentit.

“Për më shumë se dyqind vjet, presidentët kanë përdorur autoritetin e tyre për t’u ofruar një shans të dytë individëve që e meritojnë, përfshi njerëzit me uniformë që i kanë shërbyer vendit tonë,” tha sekretarja i Shtypit të Shtëpisë së Bardhë Stephanie Grisham në një deklaratë të premten vonë. “Këto veprime janë në përputhje me këtë histori të gjatë.”

Ish-ambasadorja amerikane në Ukrainë Marie Yovanovich i tha Kongresit se sulmet që e kanë origjinën te interesat korruptive kanë krijuar një krizë në Departamentin e Shtetit.

Yovanovich u tha ligjvënësve se ajo ishte viktimë e ”fushatës së dezinformimit” ku u përdorën “kanale të pasme jozyrtare” që çuan në largimin e saj nga Ukraina. Ajo tha se “vazhdon të jetë e habitur” për faktin që pati amerikanë, të cilët bënë partneritet me “disa ukrainas të cilët preferuan të luanin sipas rregullave të vjetra korruptive” në përpjekjet për largimin e saj.

Yovanovich dha gjithashtu alarmin se zyrtarë të lartë të Departamentit të Shtetit nuk e mbrojtën nga sulmet e aleatëve të presidentit, përfshirë ish-kryebashkiakun e Nju Jorkut Rudy Giuliani.

“U ndjeva shumë keq kur dëgjova se Presidenti kishte humbur besimin tek unë,” tha ajo. Ajo foli para ligjvënësve për një “krizë në Departamentin e Shtetit”.

Dhoma e Përfaqësuesve dëgjoi të premten një dëshmitare të vetme në seancën e dytë publike për hetimin e Presidentit Donald Trump.

Ajo është Marie Yovanovitch, ish ambasadorja amerikane në Ukrainë, e cila u vu në shënjestër të aleatëve të presidentit në një fushatë “njollosjeje” që tani është në qendër të hetimit.

Ndërkohë që zonja Yovanovitch po dëshmonte, Presidenti Trump e sulmoi atë në Twitter, duke thënë se kudo që ajo ka shërbyer, punët kanë shkuar keq. Ish-Ambasadorja u përgjigj se fjalët e presidentit tingëllonin kërcënuese.

Diplomatja e karrierës, u ka shërbyer si presidentëve republikanë, ashtu edhe atyre demokratë.

Ajo dhe zyrtarë të tjerë që po dëshmojnë publikisht në seancat historike të Dhomës së Përfaqësuesve, po japin versionet e tyre të ngjarjeve, ku demokratët po mbështeten për të ngritur argumentin se sjellja e presidentit është e pafalshme.

Adam Schiff, kryetari demokrat i Komisionit të Inteligjencës, vlerësoi zonjën Yovanovitch, duke thënë se ajo u tregua “tepër e ashpër ndaj korrupsionit për disa, dhe qëndrimi i saj parimor i krijoi asaj armiq.”

U bë e qartë se “Presidenti Trump donte që ajo të linte postin,” tha ai.

Numri dy i komisionit, republikani Devin Nunes i Kalifornisë, u ankua se seancat dëgjimore ishin një “shfaqje televizive që zgjaste tërë ditën”.

Ai u ankua se demokratët po mbështeten në dëshmi të formës së thashethemeve, nga dëshmitarë që kanë informacion për veprimet e zotit Trump vetëm nga burime të dorës së dytë. Ai bëri gjithashtu presion që komisioni të dëgjojë dëshmi edhe nga një informator anonim, i cili paralajmëroi për herë të parë zyrtarët në lidhje me thirrjen telefonike të Presidentit Donald Trump me presidentin ukrainas Volodymyr Zelenskiy në muajin korrik, që është në qendër të hetimeve.

“Këto dëshmi nuk duhet të bëheshin fare,” tha ai.

Me hapjen e seancave dëgjimore të premten, Shtëpia e Bardhë publikoi një transkriptim të përafërt të një telefonate të mëparshme që zoti Trump kishte patur me Presidentin e Ukrainës dhe që ishte kryesisht urim me rastin e zgjedhjes së Zelenskiy-t.

Zonja Yovanovitch dhe diplomatë të tjerë kanë thënë se Rudy Giuliani, avokati personal i Presidentit Trump, ishte njeriu që drejtonte atë që ata e quajnë ‘kanal të parregullt’ jashtë rrjedhës diplomatike të marrëdhënieve SHBA-Ukrainë.

DEMOKRATËT DHE REPUBLIKANËT FORCOJNË MESAZHET

Sot, në ditën e dytë të seancave historike për të shqyrtuar shkarkimin e presidentit të 45-të të SHBA, demokratët dhe republikanët po forcojnë mesazhet e tyre për votuesit ndërsa përpiqen të bëjnë për vete opinionin publik.

Amerikanët janë të pozicionuar thellë në dy kampe në lidhje me hetimin për shkarkimin e Presidentit.

Kjo ka rezultuar në një betejë politike në rritje që do të verë në provë vendin në një nga epokat më polarizuese të kohëve moderne.

Kryetarja e Dhomës së Përfaqësuesve Nancy Pelosi të enjten preferoi të përdorte një fjalë më popullore, “rryshfet” për të përshkruar veprimet e zotit Trump, në vend të frazës latine “quid pro quo” (më jep të jap) që demokratët kanë përdorur rëndom deri tani.

“Quid pro quo: rryshfeti”, tha zonja Pelosi për thirrjen telefonike të Presidentit Trump më 25 korrik, në të cilën ai i kërkoi Presidentit ukrainas Volodymyr Zelenskiy një favor.

Presidenti Trump thotë se telefonata ishte e përsosur.

Nga ana e saj zonja Pelosi tha: “Ishte përsosmërisht e gabuar. Ishte rryshfet”.

Të enjten, Presidenti Trump vazhdoi të sulmonte hetimet si “një mashtrim”. Ndërkaq, udhëheqësi i republikanëve të pakicës në Dhomën e Përfaqësuesve, Kevin McCarthy hodhi poshtë dëshmitë e paraqitura në seanca si thashetheme dhe informacion të dorës së dytë.

Në thelbin e tij, hetimi për shkarkimin e presidentit ka të bëjë me telefonatën e Presidentit Trump në muajin korrik me Zelenskiy-n që fillimisht tërhoqi vëmendje kur një kallëzues anonim paraqiti një ankesë.

Në bisedën telefonike të korrikut, zoti Trump kërkoi një “favor”, sipas një versioni të dhënë nga vetë Shtëpia e Bardhë. Ai shprehu dëshirën që Ukraina të hetonte demokratët dhe rivalin e tij Joe Biden, kandidat për zgjedhjet presidenciale të 2020-s. Më vonë u zbulua se administrata po ia vononte ndihmën ushtarake Ukrainës. zëri i amerikës

Vetëm 25 vjet më parë, gratë në SHBA nuk lejoheshin të ishin pilote avionësh luftarakë apo të përdornin tanke. Por megjithë pengesat fizike dhe kulturore, gratë gjithmonë kanë dashur të shërbejnë në ushtri. Iuliia Iarmolenko e Zërit të Amerikës bisedoi me një nga veteranet të Luftës së Dytë Botërore që gjeti një mënyrë për ta realizuar ëndrrrën e saj në një kohë kur dukej e pamundur.

Libby Haynes është 92 vjeç. Avionët kanë qenë pasioni i saj për mbi 75 vjet. Kur mamaja i dhe 10 dollarë si dhuratë për ditëlindje në moshën 17 vjeçare, Haynes dinte ç’të bënte.

“Prenotova një mësim fluturimi. Shpenzova 6 dollarë për të marrë me qera një avion të lehtë për një orë, 3 dollarë për një instruktor dhe një dollar për bllokun e regjistrimit të orëve”.

Në vitin 1945, Libby kishte përfunduar një kurs trajnimi për Programin e Patrullës Civile Ajrore për Kadetët dhe u bë infermiere. Por pas Luftës së Dytë Botërore, ajo vendosi t’i rikthehej fluturimit.

“E vetmja mënyrë që mund ta përshkruaj është që kisha një pasion të jashtëzakonshëm dhe që isha e destinuar të hyja në Forcën Ajrore. Nuk di nëse mund ta quaj një forcë të padukshme por ishte vendimi më i mirë që kam marrë ndonjëherë në jetë!”

Ushtria amerikane nuk pranonte gra në shërbimin aktiv ushtarak deri në vitin 1972, por më parë Haynes monitoronte motin për avionët. Ajo ishte edhe pilote me Patrullën Ajrore Civile dhe bleu një avion të vogël që e përdorte për të shkuar në shtëpi për fundjavë.

“Akoma kisha një patentë provizore kur e bleva avionin PG-23 Surplus për 500 dollarë, që ishte sa rroga e dy muajve!”

Puna nuk i solli vetëm kënaqësi profesionale, sepse përmes saj Haynes takoi edhe të shoqin, një pilot. Por kur mbeti shtatzënë, një nga kolegët e raportoi tek zyrtarët e lartë dhe ajo u lirua nga ushtria. Marilla Cushman e Memorialit për Gratë Amerikane në Shërbimin Ushtarak, thotë se nuk ishte një vendim personal.

“Në atë kohë nëse kishte fëmijë, nëse mbesje shtatzënë, ishe apo nuk ishe e martuar duhej të largoheshe”, thotë ajo.

Cushman hyri në ushtri në vitet 70, por nuk ishte në gjendje të bënte atë që donte.

“U zhgënjeva që nuk bëja dot më shumë, që nuk mund të bëja disa nga ato që lejoheshin të bënin burrat”, thotë ajo.

Në mes të viteve 1970, rregullat ndryshuan dhe gratë u lejuan si pilote për avionë joluftarakë. Pas luftës së Gjirit në 1990-1991, edhe ai kufizim ishte eliminuar.Cushman beson se ushtria amerikane e kuptoi që kishte nevojë për gratë.

“Veçanërisht në luftën kundër terrorizmit, filluam të rekrutojmë më shumë gra, në njësitë e këmbësorisë dhe forcat e posaçme, sepse ndërsa forcat shkonin në Afganistan dhe Irak, për shkak të çështjeve kulturore u bë e qartë se nuk mund t’ia dilnim pa pjesëmarrjen e tyre”.

Sot gratë në ushtrinë amerikane, përbëjnë 14 për qind të personelit. Por u deshën vite luftime për të arritur në këtë pikë.

“Brezat e ardhshëm duhet ta dine se edhe gratë në uniformë, garantuan lirinë e tyre. Se vendosmëria jonë ishte po aq e madhe sa edhe e burrave…”

Si Libby Haynes, edhe Marilla Cushman thonë se janë të lumtura të shohin pozicionin që gëzojnë gratë në ushtri sot. Megjithëse Haynes thotë se kufizimet asnjëherë nuk arritën ta frenojnë.

Presidenti i SHBA Donald Trump tha se ai nuk është i shqetësuar në lidhje me hetimin e Dhomës së Përfaqësuesve, tani që dëshmitë do të bëhen të hapura për publikun. Por ai tha se nuk dëshiron ta mbështesë procesin duke lejuar ndihmësin e tij kryesor të dëshmonte të premten.

Duke folur para gazetarëve në Shtëpinë e Bardhë, Presidenti Trump nuk u kushtoi rëndësi teksteve të zbardhura të dëshmive me dyer të mbyllura nga ana e zyrtarëve të tjerë që tashmë janë bërë publike.

Demokratët në Dhomën e Përfaqësuesve po hetojnë mbi akuzat se Presidenti republikan i ka bërë presion Ukrainës për të hetuar rivalin e tij politik, ish-nënpresidentin Joe Biden, i cili kandidon për zgjedhjet e 2020s.

Presidenti kritikoi gjithashtu demokratët për zhvendosjen e hetimit të tyre në seanca të hapura për publikun javën tjetër.

“Ata nuk duhet të zhvillojnë seanca dëgjimore publike; ky është një mashtrim,” tha Presidenti Trump, i cili ka mohuar se ka bërë ndonjë shkelje.

Ai akuzoi demokratët se po kërkonin njerëz që e urrejnë presidentin dhe tha se ai nuk ishte i njohur me shumicën e dëshmitarëve, të cilët mes të tjerash përfshijnë një numër zyrtarësh të lartë të Departamentit të Shtetit.

“Unë nuk jam i shqetësuar për asgjë. Për mua dëshmitë nuk kanë asnjë problem. Dua të them, në pjesën më të madhe, as që i kam dëgjuar këta njerëz. Nuk e di se kush janë,” u tha ai gazetarëve.

“Le të gjejmë 10 personat që urrejnë më shumë Presidentin Trump dhe le t’i sjellim atje”, shtoi ai.

Hetuesit vazhdojnë të kërkojnë dëshmi pas dyerve të mbyllura nga zyrtarë dhe ish-zyrtarë, përfshirë edhe nga shefi i stafit në detyrë të Presidentit Trump, Mick Mulvaney.

Zotit Muvaney iu kërkua të enjten mbrëma të paraqitej për dëshmi të premten, por ai nuk u paraqit. Shtëpia e Bardhë ka thënë se nuk do të bashkëpunojë me hetimin e Kongresit. zëri i amerikës

8 nëntori shënon përvjetorin e tretë të zgjedhjes së Donald Trumpit si Presidenti i 45-të i Shteteve të Bashkuara në vitin 2016.

Zoti Trump mbetet një personazh i fuqishëm në politikën amerikane. Por përvjetori i tretë i ardhjes së tij në pushtet vjen në një kohë kur ai po përballet me kërcënimin më të madh ndonjëherë për presidencën e tij: hetimin për shkarkim, të udhëhequr nga demokratët e Kongresit, lidhur me dyshimet për përpjekjet e tij për të bërë presion ndaj Ukrainës për të hetuar rivalin politik Joe Biden.

Korrespondenti i Zërit të Amerikës Jim Malone sjell më shumë informacion nga Uashingtoni.

Kanë kaluar tre vjet nga ajo natë nëntori kur Donald Trump tronditi botën me zgjedhjen e tij si presidenti i 45-të i Amerikës

“Ju them republikanëve, demokratëve dhe të pavarurve në të gjithë vendin, se është koha që të bashkohemi si një popull i tërë,” tha President Donald Trump​.

Kjo thirrje e hershme për unitet u zbeh shumë kohë më parë.

Zoti Trump tani po mbështetet tek baza e tij besnike e përkrahësve që së pari t’i rezistojë procesit të shkarkimit, dhe më pas ta ndihmojë në përpjekjet për t’u rizgjedhur vitin e ardhshëm.

“Në këtë luftë është në rrezik vetë demokracia amerikane. Mos u gënjeni. Kjo është ajo që ata duan. Ata po shkatërrojnë këtë vend, por ne kurrë nuk do ta lejojmë që kjo të ndodhë. Asnjëherë”, tha President Donald Trump​.

Hetimi për shkarkimin e Presidentit nga Dhoma e Përfaqësueve është përqendruar në dyshimet për përpjekjet e zotit Trump për të bërë presion ndaj Ukrainës për të hetuar rivalin politik Joe Biden.

Zoti Biden e ka vënë çështjen në qendër të përpjekjeve të tij për të fituar kandidaturën presidenciale të Partisë Demokrate vitin e ardhshëm.

“Ai thotë se do të ketë luftë civile. Ky njeri nuk është mirë mendërisht. Nuk është mirë. Jam i shqetësuar se çfarë do të bëjë. Jo për mua apo familjen time. Jam i shqetësuar çfarë do të bëjë vitin tjetër të presidencës së tij”, tha zoti Biden.

Ashtu si shumë çështje gjatë presidencës Trump, edhe hetimi për shkarkimin po luhet përgjatë linjave partiake, thotë analisti John Fortier:

“Demokratët besojnë se presidenti ka bërë diçka të gabuar. Ata mendojnë se do të sjellin më shumë prova duke shpresuar se do të kthejnë opinionin publik kundër presidentit dhe ndoshta do ta shkarkojnë atë nga detyra. Republikanët nga ana tjetër, po shikojnë tek rastet e shkuara si ky, për të thënë se kjo lëvizje mund të jetë diçka që do t’i dëmtojë vetë demokratët ose të paktën nuk do të shkaktojë problem”.

Anketat tregojnë se vlerësimi për punën e presidentit Trump është pak më shumë se 40 përqind, një vlerësim historikisht i dobët për një president në detyrë që përpiqet të luftojë kundër shkarkimit dhe të kërkojë të rizgjidhet në të njëjtën kohë.

Por nënvlerësimi i mbështetjes që ka Trumpi tek baza e tij politike është i rrezikshëm, thotë strategu republikan John Feehery:

“A po japin ekspertët e Uashingtonit një vlerësim të gabuar për Trumpin? Absolutisht. Ata nuk e kanë idenë e fuqisë së tij tek baza. Një nga arsyet që ata e mbështesin është mbajtja e premtimeve dhe përparimi në ekonomi.”

Edhe nëse zoti Trump akuzohet përfundimisht nga Dhoma e Përfaqësuesve e kontrolluar nga demokratët, ai ka të ngjarë t’i mbijetojë një procesi gjyqësor në Senatin e kontrolluar nga republikanët, thotë analisti William Galston:

“Kam besuar që në fillim të diskutimeve për shkarkimin e tij, që filluan më shumë se një vit më parë, se nëse demokratët duan ta heqin Presidentin Trump nga detyra, do të duhet të bëjnë këtë përmes procesit zgjedhor në vitin 2020. Asgjë që kam parë deri tani nuk më nxit të ndryshoj aspak mendimin tim”.

Tre vjet në presidencën e tronditur të zotit Trump, amerikanët tani po përgatiten për perspektivën e një beteje partiake në procesin hetimor për shkarkimin e presidentit dhe ndoshta për garën zgjedhore më të ashpër në kujtesën e tyre.

Sekretari amerikan i Shtetit Mike Pompeo tha të premten se NATO-ja duhet të rritet dhe të ndryshojë përndryshe rrezikon të vjetërohet. Komentet e tij vijnë një ditë pas deklaratës së presidentit francez Emmanuel Macron dhënë revistës The Economist se aleanca është në vdekje klinike, komente që u hodhën poshtë nga kancelarja gjermane Angela Merkel.

Zoti Pompeo tha se aleanca është ndoshta një nga më të rëndësishmet “në të gjithë historinë e derisotme”.

Pas fjalimit në Berlin, sekretari Pompeo iu përgjigj pyetjes nëse NATO-ja është e vjetëruar ose klinikisht e vdekur. Ai u përgjigj se pas 70 vjetësh, aleanca duhet të rritet dhe të ndryshojë, duhet të përballet me realitetet dhe sfidat e sotme.

“Nëse vendet e ndryshme besojnë se mund të marrin përfitimet që sjell siguria pa i siguruar NATO-s burimet që i duhen, nëse ato nuk i respektojnë angazhimet e tyre, ekziston rreziku që NATO-ja të bëhet e paefektshme ose e vjetëruar,” tha ai.

Në fjalim, zoti Pompeo kritikoi trajtimin e Rusisë ndaj kundërshtarëve politikë dhe tha se taktikat e Kinës duhet të jenë mjaft të njohura për njerëzit e ish-Gjermanisë Lindore. Ai tha se vendet e lira janë në konkurrencë vlerash me vendet më pak të lira.

Zoti Pompeo ndodhet në Gjermani në prag të 30 vjetorit të rënies së Murit të Berlinit.

Duke reflektuar mbi mësimet e nxjerra nga rënia e Muri në vitin 1989, zoti Pompeo tha se “Perëndimi dhe të gjithë ne humbëm rrugën në muzgun që ra pas atij momenti krenar“.

“Ne menduam se mund t’i zhvendosnim burimet tona larg aleancave dhe ushtrive tona, por e kishim gabim,” tha ai.

“Sot, Rusia udhëhiqet nga një ish oficer i KGB-së, dikur i stacionuar në Dresden. Ajo pushton fqinjët dhe vret kundërshtarët politikë”.

“Ne nuk duam që furnizimet me energji të Evropës të varen nga Vladimir Putini,” shtoi ai, duke iu referuar tubacionit të gazit Nord Stream 2 i cili do të transportojë gaz natyror nga Rusia në Gjermani.

Zoti Pompeo tha se Partia Komuniste Kineze po “formon një vizion të autoritarizmit” dhe paralajmëroi Gjermaninë që të mos përdorë pajisjet e firmës kineze Huawei Technologies për ndërtimin e rrjetit 5G të të dhënave.

“Shefi juaj i inteligjencës ka thënë se Huawei nuk mund të besohet plotësisht“, tha ai.

Në Pekin, Ministria e Jashtme e Kinës e kritikoi zotin Pompeo për komentet e tij të mëparshme në adresë të Partisë Komuniste Kineze, duke thënë se komentet ishin “jashtëzakonisht të rrezikshme” dhe kishin nxjerrë në pah “qëllimet e tij të errëta” siç i cilësoi ajo. zëri i amerikës

Një libër i ri, i pa publikuar ende, me titullin “Paralajmërimi” portretizon profilin publik më kritik të presidentit Trump që kur mori detyrën gati tre vjet më parë.

Trump është “si një 12 vjeçar në një kullë të kontrollit të trafikut ajror” thuhet në librin nga një autor pa emër.

Shkrimtari anonim e përshkruan veten si “një zyrtar të lartë në administratën Trump”, i cili vendosi të mos publikojë emrin e tij për të mbajtur Trumpin në qendër të vëmendjes.

Autori është i njëjti person që shkroi një artikull opinionist në gazetën New York Times vitin e kaluar duke përshkruar sesi disa zyrtarë të lartë po përpiqen të mbrojnë vendin nga ajo që ai e quan një president impulsiv.

Sipas një kopje paraprake të librit të marrë nga gazeta The Washington Post, Presidenti Trump është mizor, i paaftë dhe i rrezikshëm.

Sipas librit “ai pengohet, ngatërrohet, irritohet lehtë dhe ka probleme në sintetizimin e informacionit, jo herë pas here, por rregullisht,”.

Presidenti është krahasuar me një “12 vjeçar në një kullë të kontrollit të trafikut ajror duke shtypur butonat pa dallim”, ndërsa avionët përpiqen të shmangin një përplasje.

Shkrimtari flet për ato që përshkruhen si komentet seksiste të Trumpit për gratë, duke komentuar veshjen dhe peshën e tyre.

Në një takim, presidenti dyshohet të ketë përqeshur me një theks hispanik për t’u ankuar për imigrantet që vinin nga Meksika, duke i quajtur ato të padobishme dhe duke thënë se nëse do të vinin me burra, burrat mund të përdoren për të mbledhur misër.

Trump është përshkruar gjithashtu si i paaftë për të udhëhequr vendin në një krizë, duke thënë se ai nuk dëgjon informacionet e inteligjencës dhe të sigurisë kombëtare dhe cilësohet si një njeri që komplimentohet me lehtësi, të cilin udhëheqësit e tjerë botërorë e konsiderojnë si “një njeri që influencohet lehtë”.

Sipas librit “Paralajmërimi”, zyrtarë të lartë të administratës kishin konsideruar një dorëheqje masive dhe thonë se Nënpresidenti Mike Pence ishte gati të mbështeste një shumicë të anëtarëve të Kabinetit, nëse ata do të përpiqeshin të largonin Trump përmes amendamentit të 25-të.

Nënpresidenti e mohon këtë, duke thënë se libri është “tmerrues” dhe tha se ai kurrë nuk ka dëgjuar askënd në Shtëpinë e Bardhë të fliste për një veprim të tillë.

Zëdhënësja e Shtëpisë së Bardhë Stephanie Grisham e cilësoi librin si “një trillim” dhe “farsë”, duke e quajtur shkrimtarin një “frikacak” që dëshiron të mbetet anonim.

Por autori thotë se shumë zyrtarë aktualë dhe të mëparshëm të administratës ndajnë pikëpamje jo të mira për Trump.

Shkrimtari gjithashtu thotë se ai ose ajo me qëllim shmang ngjarje specifike në hollësi për të mbrojtur identitetin e tij ose të saj. zëri i amerikës

Shtetet e Bashkuara paralajmëruan aleaten e rëndësishme evropiane, Gjermaninë, mbi kërcënimet në rritje që vijnë nga Rusia, ndërkohë që Berlini përgatitet të shënojë 30 vjetorin e rënies së Murit.

Sekretari i Shtetit Mike Pompeo arriti të mërkurën në Gjermani, një vizitë për të shënuar tre dekadat nga rrëzimi i murit dhe për të nënvizuar atë që zyrtarët e SHBA e quajnë nevojë për vazhdimin e një partneriteti të fortë ndëratlantik.

Takimet e diplomatit të lartë amerikan me udhëheqësit në Gjermani vijnë gjithashtu pak ditë pasi Danimarka hoqi një nga pengesat e fundit ligjore për një tubacion të propozuar të gazit natyror që lidh Rusinë dhe Gjermaninë, i njohur si Rrjedha Veriore 2.

Një zyrtar i lartë i Departamentit të Shtetit tha se SHBA janë të shqetësuara për “sigurinë e energjisë” për partnerët evropianë, duke e quajtur tubacionin e propozuar “kryesisht një mjet politik” të Rusisë dhe “jo një projekt thjesht komercial”.

Zyrtari tha se tubacioni në fjalë “rrezikon” përparësitë e sigurisë energjitike, duke i “bërë vendet evropiane dhe aleatët më të varur nga burimet e energjisë të një vendi të vetëm”.

Gjermania është konsumatori më i madh i gazit natyror në Evropë dhe varet shumë nga importet. Zyrtarët e atjeshëm nuk u kanë kushtuar rëndësi shqetësimeve amerikane për sigurinë dhe gjeopolitikën.

Në një lëvizje tjetër që shihet si sfidë ndaj paralajmërimeve të SHBA, Berlini nuk po e përjashton firmën Huawei Technologies, shitëse kryesore e pajisjeve të telekomit me qendër në Shenzhen të Kinës, nga pjesëmarrja në rrjetin 5G të Gjermanisë.

“Ne u kemi bërë thirrje të gjitha vendeve, veçanërisht partnerëve dhe aleatëve, të vlerësojnë me kujdes ndikimin afatgjatë nëse lejojnë kompani të cilave nuk mund t’u besohet, të kenë qasje në infrastrukturën e rëndësishme të rrjetit 5G,” i tha Zërit të Amerikës zyrtari i lartë i Departamentit të Shtetit.

Bruno Kahl, kreu i shërbimit gjerman të inteligjencës, kohët e fundit u tha ligjvënësve se firmës Huawei “nuk mund t’i besohet plotësisht”.

Për të zbutur shqetësimet, Kancelarja gjermane Angela Merkel ka ngulur këmbë në nënshkrimin e një pakti me firmën Huawei, ku të sanksionohet se ajo nuk do të merret me aktivitete përgjimi, ndërkohë që kancelarja ka vendosur ta lejojë kompaninë kineze të marrë pjesë në instalimin e teknologjisë 5G.

Drejtori i Përgjithshëm i firmës Huawei Ren Zhengfei ka thënë se kompania e tij nuk ndan informacione konfidenciale të përdoruesve, duke mohuar se ajo kontrollohet nga qeveria.

Nëntori shënon 30 vjet nga rënia e Murit të Berlinit. Prishja e murit i dha fund Berlini të ndarë, dhe simbolizoi çlirimin e Gjermanisë Lindore, e më vonë të pjesës tjetër të Evropës Lindore, nga sundimi komunist sovjetik.

Zoti Pompeo, i cili dikur shërbente në Gjermani si oficer i ri, do të vizitojë qytetet Grafenwohr, Vilseck, Modlareuth, Leipzig dhe Berlin për të marrë pjesë në përkujtimet e fundit të Luftës së Ftohtë.

Në Leipzig, shefi i diplomacisë amerikane do të takohet me Ministrin e Jashtëm gjerman Heiko Maas, për të diskutuar mbi partneritetin ndëratlantik përballë kërcënimeve në rritje nga Rusia, Kina dhe Irani, sipas Departamentit të Shtetit.

Në Berlin, ai do të takohet me Kancelaren Merkel dhe zyrtarë të tjerë të lartë për të folur mbi fushat e bashkëpunimit dhe shqetësimet e ndërsjella.

Zoti Pompeo do të mbajë një fjalim pranë Portës së Brandenburgut “mbi domosdoshmërinë e vazhdueshme për të mbrojtur vendet e lira dhe popujt e lirë”, tha Departamenti i Shtetit. zëri i amerikës

Një komision i pavarur qeveritar në SHBA tha të hënën se financimi i qeverisë amerikane në sferën e inteligjencës artificiale ka mbetur prapa dhe se vendit i duhet të investojë në kërkime, të trajnojë një forcë pune të gatshme për inteligjencën artificiale dhe ta zbatojë këtë teknologji në misionet e sigurise kombëtare.

Komisioni i Sigurisë Kombëtare për Inteligjencën Artificiale (NSCAI) ngriti shqetësime për përparimet e arritura nga Kina në këtë fushë. Komisioni gjithashtu tha se qeveria e SHBA ende përballet me një punë të madhe para se të mund ta shndërrojë inteligjencën artificiale nga “një teknologji e re premtuese në një teknologji të pjekur, të integruar në misionet bazë të sigurisë kombëtare.”

Komisioni mendon se një përpjekje e përbashkët për inteligjencën artificiale në fushën e sigurisë kombëtare është e rëndësishme, tha për gazetarët Robert Work, nënkryetar i komisionit dhe ish-sekretar i mbrojtjes. Komisioni ka folur me Japoninë, Kanadanë, Mbretërinë e Bashkuar, Australinë dhe Bashkimin Evropian, tha ai.

Kina po investon më shumë se Shtetet e Bashkuara në inteligjencë artificiale, thuhet në raportin, i cili i referohet vendit aziatik më shumë se 50 herë.

“Kina përfiton nga hapja e shoqërisë amerikane në aspekte të shumta – herë në mënyrë të ligjshme e herë jo – për të përvetësuar njohuritë e inteligjencës artificiale,” thotë raporti, i cili publikohet në një kohë tensionesh të rritura midis dy vendeve.

Një zëdhënëse e ambasadës së Kinës në Uashington nuk iu përgjigj menjëherë kërkesës për koment.

“Kina është përpara në dy fusha. Njëra është survejimi me anë të njohjes së fytyrës. Tjetra është në teknologjinë financiare. Kjo nuk do të thotë se ata janë përpara përgjithësisht në inteligjencën artificiale,” tha Eric Schmidt, kryetar i komisionit dhe njëri nga disa prej drejtuesve të industrisë në komision.

Nga një sondazh del se Kina është një “ndjekëse e shpejtë” por “shumica e zbulimeve origjinale dhe më të mirat prej tyre realizohen në Perëndim,” tha zoti Schmidt, këshilltar teknik i firmës Alfabet Inc, pararendëse e kompanisë Google, si dhe ish kreu ekzekutiv i saj. zëri i amerikës