VOAL

SHBA

Parnas: Presidenti ishte në dijeni të lëvizjeve të Giulianit

Lev Parnas

Lev Parnas, bashkëpunëtori i akuzuar i avokatit personal të Presidentit Trump, i cili u përpoq të bindë Ukrainën që të hetonte ish-nënpresidentin Joe Biden, tha se Presidenti ishte në dijeni të aktiviteteve të avokatit të tij personal Rudy Giuliani në Ukrainë.

Presidenti Trump e ka mohuar se e dërgoi avokatin personal Rudi Giuliani në Ukrainë për të kërkuar fakte diskredituese për zotin Biden, rivalin e tij në zgjedhjet presidenciale të 2020-s.

Por Lev Parnas i tha rrjetit televiziv MSNBC se Presidenti Trump ishte në dijeni të të gjitha lëvizjeve të tij. “Unë nuk do të bëja asgjë pa pëlqimin e Rudy Giulianit ose të presidentit,” tha ai.

Parnas tha gjithashtu se ai kishte shkuar në terren pikërisht për të bërë punën e tyre.

Parnas, biznesmen me origjinë ruse dhe Igor Fruman, një bashkëpunëtor tjetër i zotit Giuliani, janë akuzuar për kontribute të paligjshme ndaj fushatës së kandidatit Trump në zgjedhjet e 2016. Që dy kanë deklaruar se nuk janë fajtorë.

Parnas i tha rrjetit MSNBC se udhëheqësit e Ukrainës nuk kishin asnjë arsye të takoheshin me të. “Por ishin ata, njerëzit e Presidentit Trump, që u thanë të takoheshin me mua. Dhe ky është sekreti që ata përpiqen të fshehin,” tha Lev Parnas.

Ai shtoi se interesi i Presidentit Trump për Ukrainën nuk ishte aspak çrrënjosja e korrupsionit qeveritar. Gjithçka ishte “për Joe Bidenin dhe të birin, Hunter Biden”.

I pyetur për pohimet e Presidentit Trump se nuk e njeh atë, Lev Parnas tha: “Ai gënjen” dhe shtoi se ai ishte me avokatin Giuliani katër ose pesë ditë në javë në Ukrainë, kohë gjatë së cilës Presidenti Trump ishte në kontakt të vazhdueshëm me avokatin. zëri i amerikës

Dhoma e Përfaqësuesve dhe dërgimi në Senat i akuzave për shkarkimin e Presidentit

Dhoma e Përfaqësuesve pritet të votojë të mërkurën për të dërguar në Senat akuzat për shkarkimin e Presidentit Trump, duke lejuar fillimin e gjykimit të presidentit.

Kjo është hera e tretë në histori që në Senat zhvillohet gjyqi për shkarkimin e një presidenti.

Në një mbledhje me dyer të mbyllura të martën me ligjvënësit demokratë, zonja Pelosi bëri të ditur planin e saj për të emëruar të mërkurën ekipin e ligjvënësve që do të luajnë rolin e prokurorit në gjyqin që zhvillohet në Senat.

Procesi gjyqësor drejtohet nga Kryetari i Gjykatës së Lartë, ndërsa senatorët janë në rolin e anëtarëve të jurisë që ka në dorë të shpallë presidentin të fajshëm ose jo, për akuzat e ngritura nga Dhoma e Përfaqësuesve.

Republikanët, që kanë shumicën në Senat, i kanë kundërshtuar akuzat kundër presidentit Trumë dhe nuk pritet që ai të shpallet fajtor. Kryetarja e Dhomës së Përfaqësuesve Pelosi, priti gati katër javë për të dërguar akuzat në Senat, gjë për të cilëmn ajo është kritikaur nga republikanët. Zonja Pelosi thotë se ajo kërkonte të dinte më shumë hollësi rreth mënuyrës së si do ta zhvillonin procesin gjyqësor republikanët, duke i akuzauar ata për bashkëpunim me presidentin për ta shpallur atë të pafajshëm.

Dy presidentët e tjerë në të kaluarën që i janë nënshtruar gjyqit në Senat, janë Bill Klinton në vitin 1999 dhe Andrew Johnson 1868. zëri i amerikës

Dhoma e Përfaqësuesve miratoi rezolutën që kufizon veprimet ushtarake kundër Iranit

Dhoma e Përfaqësuesve miratoi një rezolutë më të cilën i kërkohet presidentit Donald Trump të marrë miratimin e Kongresit për veprimet ushtarake ndaj Iranit. Në favor të rezolutës ishin 224, ndërsa kundër votuan 194 ligjvënës.

Në një deklaratë të mëhershme, kryetarja e Dhomës së Përfaqësuesve, Nancy Pelosi, kritikoi administratën e presidentit Trump për kryerjen e sulmit ajror javën e kaluar që vrau komandantin e forcave iraniane Quds, Qassem Soleimani, pa u këshilluar me Kongresin.

Ajo e quajti sulmin ajror një veprim “provokues dhe jo proporcional” që rrezikonte trupat dhe diplomatët amerikanë.

Rezoluta kërkon që presidenti të ndalojë përdorimin e forcave amerikane kundër Iranit derisa Kongresi nuk ka shpallur luftë ose nuk ka dhënë miratim ligjor, apo derisa një veprim i tillë ushtarak është i nevojshëm për t’u mbrojtur kundër një sulmi të menjëhershëm kundër Shteteve të Bashkuara, territoreve të saj apo forcave të armatosura.

“Administrata duhet të punojë me Kongresin për të çuar përpara një strategji të menjëhershme, efektive shtendosjeje që parandalon dhunën e mëtejshme,” tha zonja Pelosi. “Amerika dhe bota nuk mund t’i lejojnë vetes një luftë”, shtoi ajo.

Zëdhënësja e Shtëpisë së Bardhë, Hogan Gidley, e cilësoi rezolutën e së enjtes “të gabuar” dhe “qesharake”.

Rezoluta nuk është detyruese, ndërsa vështirë që do të sigurojë votat e mjaftueshme në Senatin e kontrolluar nga republikanët. zëri i amerikës

Yuri Kim bën betimin për detyrën e ambasadores së SHBA në Shqipëri

Yuri Kim bëri të enjten betimin si ambasadore e Shteteve të Bashkuara në Shqipëri.

Zonja Kim, u emërua nga Presidenti Donald Trump në qershor të këtij viti. Ajo ka thënë se do të nxisë udhëheqësit e Shqipërisë për të zgjidhur ngërçin aktual politik në mënyrë që të forcohet perspektiva e hapjes së negociatave të anëtarësimit në BE.

Zonja Kim ka thënë gjithashtu se do të inkurajojë Shqipërinë të zbatojë plotësisht reformat në drejtësi. Ajo është shprehur se sheh si përparësi edhe ndihmën teknike për Shqipërinë në hetimin, ndjekjen dhe ndëshkimin e korrupsionit dhe krimit të organizuar ndërnacional.

onja Kim pritet gjithashtu të inkurajojë Shqipërinë për të arritur nivelin 2 përqind në shpenzimet e mbrojtjes deri në vitin 2024.

Yuri Kim është gruaja e parë koreano-amerikane që përfaqëson SHBA në postin e një ambasadori dhe personi i parë nga territori amerikan i Guamit që shërben në një post të tillë. Ajo ka lindur në Kore dhe është rritur në ishullin Guam, një territor i SHBA në Oqeanin Paqësor.

Ajo ka shërbyer në Departamentin e Shtetit si Drejtore e Zyrës së Çështjeve të Evropës Jugore, ka qenë drejtoreshë e Qendrës së Departamentit të Shtetit për Studimin e Diplomacisë, Shefe e Stafit për Zëvendëssekretarin e Shtetit dhe Drejtore e Zyrës për Sigurinë Evropiane dhe Çështjeve Politiko-Ushtarake. zëri i amerikës

Presidenti Trump paralajmëron sanksione të reja kundër Iranit

Presidenti amerikan Donald Trump deklaroi se do të vendosë sanksione më të fuqishme ekonomike ndaj Iranit, pas sulmit iranian me raketa kundër dy bazave ushtarake në Irak që strehojnë trupa amerikane. Në fjalimin përpara vendit që mbajti të mërkurën, ai njoftoi gjithashtu se asnjë amerikan nuk u dëmtua në sulmin e mbrëmshëm.

“Të gjithë ushtarët tanë janë të sigurt dhe në bazën tonë ushtarake pati vetëm dëme minimale,” tha ai.

Pas sulmit me raketa, tha Presidenti Trump, “Irani duket se është tërhequr, gjë që është diçka e mirë për të gjitha palët e interesuara dhe një gjë shumë e mirë për botën.” “Asnjë jetë amerikane ose irakiane nuk humbi për shkak të masave paraprake të shpërndarjes së forcave dhe të një sistemi paralajmërimi të hershëm që funksionoi shumë mirë.”

Vendet e botës, tha Presidenti Trump, “e kanë toleruar gjatë sjelljen shkatërruese dhe destabilizuese të Iranit në Lindjen e Mesme dhe më gjerë. Por ato ditë kanë marrë fund.”

Irani, tha ai, ka qenë sponsori kryesor i terrorizmit dhe synimi i tyre për të patur armë bërthamore kërcënon botën e civilizuar. “Përsa kohë që unë të jerm president, Irani nuk do të lejohet të ketë armë bërthamore,” deklaroi Presidenti Trump.

Javën e kaluar, tha ai, ushtria e Shteteve të Bashkuara eliminoi “terroristin më të madh në botë”, Kasem Soleimani.

Solejmani, tha Presidenti Trump, ishte personalisht përgjegjës për disa prej mizorive më të rënda. “Ai trajnoi ushtri terroriste, përfshirë Hezbollahun, nxiti luftëra të përgjakshme civile, në të gjithë rajonin. Ai plagosi dhe vrau mijëra trupa amerikane. Duke eliminuar soleimanin ne i kemi dërguar një mesazh të fuqishëm për terroristët,” tha Presidenti.

Ai tha se SHBA vazhdojnë të shqyrtojnë opsionet në përgjigje të sulmit iranian. Ne, tha ai “do të vendosim menjëherë sanksione shtesë ndëshkuese ekonomike ndaj regjimit iranian, të cilat do të qëndrojnë në fuqi derisa Irani të ndryshojë sjelljen e tij.”

Irani, tha Presidenti, “duhet të braktisë ambiciet e tij bërthamore dhe mbështetjen për terrorizmin. Ka ardhur koha që Mbretëria e Bashkuar, Gjermania, Franca, Rusia dhe Kina ta njohin këtë realitet.”

Këto vende, tha Presidenti, “tani duhet të shkëputen nga marrëveshja bërthamore me Iranin” dhe “ne të gjithë duhet të punojmë së bashku” për një marrëveshje të re me Iranin.

Ne, tha Presidenti, “gjithashtu duhet të bëjmë një marrëveshje që lejon Iranin të lulëzojë dhe përparojë.”

Presidenti Trump i kërkoi NATO-s “të përfshihet shumë më tepër në procesin e Lindjes së Mesme”.

“Ekonomia jonë, tha ai, është më e fortë se kurrë më parë Tani jemi prodhuesi numër një i naftës dhe gazit natyror kudo në botë. Ne jemi të pavarur. Dhe ne nuk kemi nevojë për naftë të Lindjes së Mesme.”

Ushtria amerikane, tha Presidenti, “është rindërtuar plotësisht nën administrimin tim me një kosto 2.5 trilion dollarë. Forcat e Armatosura të SHBA janë më të forta se kurrë më parë. Raketat tona janë po aq të fuqishme, vdekjeprurëse dhe të shpejta.”

“Në ndërtim e sipër janë shumë raketa hipersonike. Megjithatë, fakti që ne kemi këtë ushtri dhe pajisje të shkëlqyer, nuk do të thotë që duhet t’i përdorim ato. Fuqia amerikane, si ushtarake, ashtu edhe ekonomike është parandaluesi më i mirë,” tha Presidenti Trump.

Tre muaj më parë, tha Presidenti, “na u desh të shkatërrojnë 100 për qind të ISIS-it dhe kalifatin e tij territorial. Ne vramë udhëheqësin e egër të ISIS-it Al-Bagadi, i cili ishte përgjegjës për aq shumë vdekje, përfshirë therjet masive të të krishterëve, myslimanëve dhe të gjithë atyre që ishin pengesë në rrugën e tij. Ai ishte një përbindësh.”

“ISIS-i, tha Presidenti Trump, është një armik natyror i Iranit. Shkatërrimi i ISIS-it është diçka e mirë për Iranin. Dhe ne duhet të punojmë së bashku për këtë dhe përparësi të tjera të përbashkëta.” zëri i amerikës

Kushtetuta e SHBA: Si dhe kush e shpall luftën

Dhoma e Përfaqësuesve në Shtetet e Bashkuara do të votojë këtë javë mbi legjislacionin që synon parandalimin e një angazhimi të forcave amerikane me ato të Iranit derisa Kongresi të japë miratimin.

Votimi pason vrasjen e gjeneralit iranian Qassem Soleimani me urdhër të Presidenti Donald Trump javën e kaluar, duke përshkallëzuar tensionet në rajon. Shumë demokratë të kongresit kanë shprehur

shqetësimin se kjo mund të çojë në luftë të hapur mes Shteteve të Bashkuara dhe Iranit.

Si e shpallin luftën Shtetet e Bashkuara?

Sipas Nenit I të Kushtetutës amerikane, Kongresi ka autoritetin për të shpallur luftë ndërsa neni II i jep Presidentit përgjegjësinë për të qenë komandant i përgjithshëm i forcave të armatosura. Autorët e Kushtetutës i ndanë qëllimisht këto kompetenca midis degëve të qeverisë amerikane për të parandaluar një lëvizje të pamenduar, të njëanshme drejt luftës.

Gjatë historisë amerikane, degët legjislative dhe ekzekutive janë përplasur rreth interpretimit të këtyre kompetencave siç përcaktohet në Kushtetutë. Këto pyetje u shtuan pas angazhimit të Shteteve të Bashkuara në konfliktet në Kore dhe Vietnam, që u bënë pa shpallje zyrtare të luftës. Hera e fundit që Kongresi miratoi një deklaratë zyrtare të luftës ishte pothuajse 80 vjet më parë, gjatë Luftës së Dytë Botërore.

Çfarë thotë Ligji për Luftërat i vitit 1973 për të drejtën për të shpallur luftë?

Në vitin 1973, Kongresi miratoi legjislacionin që përcaktonte më tej rolin e Presidentit në drejtimin e veprimeve ushtarake jashtë vendit pas zbulimit që Presidenti i atëhershëm Richard Nixon kishte urdhëruar operacione të fshehta bombardimi në Kamboxhia. Ligji përcaktonte që presidentët amerikanë kanë 48 orë afat për ta njoftuar Kongresin pas operacioneve të forcave amerikane jashtë vendit, si dhe për të detajuar arsyetimet për ato veprime.

Sipas ligjit, këto masa mbrojtëse sigurojnë që “gjykimi kolektiv i Kongresit dhe i Presidentit do të duhet të zbatohet” për dislokimin e trupave amerikane jashtë shtetit. Ligji, gjithashtu kërkon që presidentët të përfundojnë përfshirjet jashtë shtetit pas 60 ditësh nëse Kongresi nuk miraton shpalljen zyrtare të luftës.

Presidentë nga të dyja partitë kanë kundërshtuar ose ripërcaktuar interpretime të këtij ligji pasi ai u quajt “jokushtetues dhe i rrezikshëm” nga Presidenti Nixon.

Cili është Autorizimi i vitit 2001 për përdorimin e forcës ushtarake, ose AUMF, dhe si lidhet ai me debatin e tanishëm?

Pas sulmeve terroriste të 11 shtatorit 2001, Presidenti George W. Bush i përshkroi ato sulme kundër Shteteve të Bashkuara si “akt lufte”. Presidenti Bush punoi me Kongresin për miratimin e një rezolute që autorizoi gjerësisht veprimet për të luftuar kërcënimin nga terrorizmi ndërkombëtar.

AUMF ka ndezur debate të vazhdueshme pasi Presidentët Bush, Obama dhe Trump kanë përdorur përkufizimet të përgjithshme të legjislacionit në lidhje me kërcënimet terroriste për të justifikuar veprimet ushtarake jashtë vendit. Për dallim nga autorizimet e tjera për konfliktet kundër vendeve ose zonave të veçanta, AUMF lejon veprime kundër organizatave ose individëve.

Përpjekjet në Kongres për të miratuar një ligj të ri të autorizimit për përdorimin e forcës jashtë vendit, i cili trajton natyrën në ndryshim të kërcënimeve terroriste, si dhe përcaktimin më specifik të individëve dhe subjekteve që përbëjnë një kërcënim, kanë dështuar. Ligjvënësit miratuan një ligj të tillë të dytë (AUMF të dytë) në vitin 2002, posaçërisht autorizimin e Shteteve të Bashkuara për të pushtuar Irakun.

Si i interpreton Presidenti Trump këto ligje?

Megjithëse administrata e Presidentit Trump nuk e ka cituar AUMF-in e vitit 2001 si justifikim për sulmin ajror që vrau gjeneral Soleimanin, Nënpresidenti Mike Pence postoi në Twitter një pretendim të pasaktë se gjenerali kishte mbështetur udhëtimin e disa prej rrëmbyesve të 11 shtatorit. Zyra e Nënpresidentit sqaroi më vonë se ai ishte duke iu

referuar Iranit, që ka lejuar disa nga rrëmbyesit të kalonin nëpër vend gjatë rrugëtimit të tyre drejt Afganistanit.

Analistët thonë se presidenti duket se po përdor të drejtën e tij për të autorizuar sulme në bazë të Ligjit mbi Kompetencat e Luftës.

“Përdorimi i autorizuar i forcës ushtarake aktualisht është i lidhur me operacionet tona antiterroriste kundër ISIS-it dhe bashkëpunëtorëve të tyre në rajon. Pra, është e vështirë që kjo të shtrihet edhe për kërcënimin nga Irani dhe njerëzit si Qassem Soleimani”, i tha Zërit të Amerikës Kirsten Fontenrose, drejtore e Nismës Scowcroft për Sigurinë e Lindjes së Mesme në Këshillin Atlantik.

“Administrata ndërmori një përpjekje për të shpallur Qassem Soleimanin terrorist të huaj për t’i dhënë autoritet mbi personin e tij në kuadër të ligjeve mbi luftën kundër terrorizmit. Pra, në mënyrë që administrata të kishte autoritet ta godiste Qassem Soleimani. Ata nuk kishin nevoj të mbështeteshin tek AUMF për sulmin sepse ata mund të mbështeten në Ligjin mbi Kompetencat e Luftës që i jep presidentit autoritet për këtë lloj sulmi”, tha ajo.

Administrata e Presidentit Trump e njoftoi Kongresin për sulmin ajror që vrau Soleimanin të Shtunën, duke cituar informacione e kundërzbulimit për sulme të planifikuar ndaj personelit amerikan.

Kryetarja e Dhomës së Përfaqësuesve, Nancy Pelosi tha se njoftimi bazuar në informacione sekrete “ngre më shumë pyetje” për operacionin.

Në një mesazh në Twitter të dielën, Presidenti Trump u duk se po fliste për Ligjin e Luftës, duke thënë, “Këto raportime të mediave do të shërbejnë si njoftim për Kongresin e Shteteve të Bashkuara që nëse Irani godet ndonjë person ose objektiv amerikan, Shtetet e Bashkuara do të kundërpërgjigjen, dhe mbase në një mënyrë disproporcionale. Një njoftim i tillë ligjor nuk kërkohet, megjithatë ai është dhënë!”

Udhëheqësit e Kongresit nuk kanë folur drejpërdrejt lidhur me pretendimet e Presidentit se njoftimi në mediat sociale është adekuat. Një postim në Twitter nuk do të mund të konsiderohej njoftim zyrtar, sipas Ligjit mbi Kompetencat e Luftës.

Si po përgjigjet Kongresi?

Demokratët e Kongresit kanë shprehur një numër shqetësimesh për vrasjen e Soleimanit, duke filluar nga komunikimet e administratës me degën legjislative në lidhje me sulmin ajror.

“Ne jemi të shqetësuar që administrata ndërmori këtë veprim pa u konsultuar me Kongresin dhe pa respektuar kompetencat e luftës që Kushtetuta ia jep Kongresit,” tha kryetarja e Dhomës së Përfaqësuesve, Nancy Pelosi në një letër ku informonte anëtarët për votimin e ardhshëm të Dielën. Ajo tha se rezoluta “përsërit kompetencat mbikëqyrëse të vendosura prej kohësh nga Kongresi, sipas të cilave, nëse nuk ndërmerret ndonjë veprim i mëtutjeshëm nga Kongresi, operacionet ushtarake të administratës me Iranin duhet të pushojnë brenda 30 ditësh.”

Të premten, udhëheqësi i pakicës demokrate në senat, Chuck Schumer vuri në dukje se vrasja e Soleimanit ishte pasojë e mjaftueshme për ta çuar vendin në konflikt të hapur me Iranin.

“Unë mendoj që presidenti nuk ka autoritet për një luftë me Iranin,” tha Schumer gjatë një debati në senat. “Nëse ai planifikon një rritje të madhe të nivelit të trupave dhe armiqësi të mundshme për një kohë më të gjatë, administrata do të duhet të kërkojë miratimin e kongresit dhe të popullit amerikan. Vendimi i presidentit mund të përkeqësojë një situatë tashmë të rrezikshme dhe të vështirë në Lindjen e Mesme. Rreziku i një angazhimi shumë më të gjatë ushtarak në Lindjen e Mesme është akut. Ky veprim mund ta ketë afruar vendin tonë në një luftë tjetër të pafund, saktësisht llojin e një lufte të pa fund nga e cila presidenti ka premtuar se do të na largonte”.

Senatori demokrat Tim Kaine ka prezantuar një rezolutë mbi kompetencat e luftës që do të detyronte një votim në Senat për këtë çështje. Teksti i këtij legjislacioni thekson se administrata Trump nuk e ka pranuar se ligjet mbi kompetencat e luftës, AUMF, të vitit 2001 dhe 2002 nuk i japin autorizim të veçantë ligjor për veprime ushtarake kundër Iranit.

“Çështja nëse forcat e Shteteve të Bashkuara duhet të përfshihen në konflikt të armatosur kundër Iranit duhet të bëhet vetëm pas një njoftimi të plotë për Kongresin dhe publikun amerikan për çështjet në fjalë, një debat publik në Kongres dhe një votim në kongres, siç parashikohet nga Kushtetuta”, thuhet në tekstin e legjislacionit.

Legjislacioni shoqërues që do të hidhet për votim në Dhomën e Përfaqësuesve këtë javë akoma nuk është publikuar, por do të jetë në linja të ngjashme, sipas kryetares Pelosi.

Pushtetet piramidale po na fusin në labirinte politike…! – Nga Skënder MULLIQI

Zyrtarët e lartë partiakë dhe shtetëror, në pa kufi si në kor të përbashkët na i përseritën gjithë ato sllagane vëtem sa për të krijuar disponim publik…

Kurse në anën tjetër punuan më zell duke e ndarë shoqërinë, në miqë dhe armiqë ?! E ndanë shoqërinë në patriotë dhe tradhëtarë, në mercenarë me pagesë e kështu më radhë… Duke krijuar praktikë të “rrenave të grumbulluara”! Folën diçka tjetër dhe vepruan krejt ndryshe në praktikë. Na u paraqitën si të rëndësishëm në kohë të fushatave para opinionit publik,dhe para elektoratit duke krijuar para tyre disponim dhe shkëlqim të rrem , sa për të marrë vota. E kur erdhën në pushtet, nuk bën asgjë për popullin dhe as për shtetin e Kosovës. Edhe sot, e kësaj dite, po vazhdojnë të na krypin më rrena, dhe të simulojnë bukur në debate publike…

Nuk i lan kurrë kampanjat, nuk i lanë asnjëherë zënkat, prodhimin e krizave politike, prodhimin e krizave edhe institucionale… Gjitha këto vetëm sa për ta zhvendosur vëmendjën nga problemet e shumta të grubulluara, dhe për ta kullotë pushtetin të cilën e lidhën më të mira materjale. Natyrisht vunë kontroll të rreptë në të gjitha sistemet e jetës, për të mbetur të paprekshem nga ligji. Na dëshpruan dhe na mashtruan keq.Krijuan pushtet piramidal! Shkaqët për ti bojkotuar çdo zgjedhje te ardhshme , ekzistojnë, së në vazhdimësi, dhe në menyrë të pashembullt na diskriminuan këta oponent politikë më përkrahësit e tyre.Fatkeqësisht faktët po grumbullohen edhe më shumë pas gjithë kësaj çka po shohim që tre muaj, nga partnerët e koalicionit LVV dhe LDK!

Këto pushtete të sistemit piramidal na futën në labirinte politike , dhe na treguan të gjithëve së nuk janë të fjalës , të besës dhe së nuk janë as për shtet dhe për komb!Janë aty për ti ruajtë privilegjet që po ju sjellin postet pushtetare.Po i dëshprojmë miqët , dhe po ua bëjmë shumë qejfin armiqëve…!Aferim ju qoftë o burra, me ju thene…!

Bolton: Jam i gatshëm të dëshmoj

Ish Këshilltari amerikan i Sigurisë Kombëtare, John Bolton tha të hënën se ai është i gatshëm të dëshmojë në gjyqin që synon shkarkimin e Presidentit Donald Trump, nëse Senati ia kërkon këtë gjë.

Një dëshmi e zotit Bolton në Senat do t’u jepte demokratëve një element kyç në lidhje me përpjekjet e Presidentit Trump për të bindur Ukrainën të ndërmerrte hetime, nga të cilat ai mund të përfitonte politikisht.

Zoti Bolton, një mbështetës i fortë i fuqisë amerikane në të gjithë globin, ishte për 17 muaj rresht këshilltar i sigurisë kombëtare të Presidentit Trump deri sa ai e shkarkoi shtatorin e kaluar në një klimë mosmarrëveshjesh për politikat e SHBA ndaj Iranit, Koresë së Veriut dhe Afganistanit.

Në prag të votimit të Dhomës së Përfaqësuesve muajin e kaluar mbi ngritjen e akuzave për shkarkimin e zotit Trump, hetuesit vendosën që të mos e kërkonin paraqitjen e zotit Bolton. Ata shqetësoheshin se kjo mund të çonte në një betejë të gjatë ligjore në gjykatat amerikane për çështjen nëse ai do të duhej të dëshmonte apo do t’i përmbahej udhëzimit të Presidentit, i cili ua kishte ndaluar ndihmësve kryesorë të paraqiteshin. Disa prej ndihmësve iu përmbajtën udhëzimit, të tjerë jo.

Por ndërsa gjyqi i zotit Trump në Senat po afron, edhe pse asnjë datë nuk është vendosur, zoti Bolton tha në një deklaratë se atij i takon të “zgjidhë çështjet serioze të shtruara, sa më mirë që të jetë e mundur për të, bazuar në një shqyrtim të kujdesshëm dhe të studiuar.”

Ai tha: “Kam arritur në përfundimin se, nëse Senati kërkon dëshminë time, jam i gatshëm të dëshmoj”.

Zoti Bolton ishte në qendër të debateve të rëndësishme për politikën e jashtme të Shtëpisë së Bardhë, përfshirë përpjekjet e zotit Trump për të bindur Presidentin ukrainas Volodymyr Zelenskiy që të hapte hetime rreth njërit prej sfiduesve të tij kryesorë demokratë në zgjedhjet e 2020-s, ish-nënpresidentit Joe Biden, djalit të tij Hunter dhe një teorie konspiracioni, tashmë të diskredituar, sipas së cilës Ukraina u përpoq të minonte fushatën zgjedhore të kandidatit Trump në vitin 2016.

Në një moment gjatë hetimit të Dhomës së Përfaqësuesve, avokati i zotit Bolton tha se klienti i tij ka “njohuri personale” rreth takimeve dhe bisedave që lidhen me Ukrainën “të cilat ende nuk janë diskutuar në dëshmitë e deritanishme”. zëri i amerikës

SHBA akuzon Rusinë dhe Kinën

Shtetet e Bashkuara akuzuan të hënën Rusinë dhe Kinën për bllokimin e një deklarate në Këshillin e Sigurimit të Kombeve të Bashkuara që nënvizonte paprekshmërinë e objekteve diplomatike dhe konsullore.

Deklarata erdhi pas një sulmi kundër ambasadës amerikane në Bagdad më 31 dhjetor.

Deklarata të tilla të Këshillit të Sigurimit, i cili ka 15 anëtarë, miratohen vetëm me konsensus.

Misioni amerikan në Kombet e Bashkuara tha se 27 vende u shprehën ashpër kundër sulmit ndaj ambasadës amerikane në Bagdad, në kontrast me heshtjen e Këshillit të Sigurimit për shkak të dy anëtarëve të përhershëm – Rusisë dhe Kinës, që nuk e lejuan miratimin e deklaratës. zëri i amerikës

Presidenti Trump paralajmëron Iranin

Turma masive u mblodhën të hënën në Teheran për të nderuar gjeneralin e lartë Qassem Soleimani, ndërsa personi që do ta zëvendësojë atë premtoi se do të hakmerrej për goditjen ajrore që shkaktoi vdekjen e tij dhe Presidenti amerikan Donald Trump kërcënoi se do të godiste objektet kulurore iraniane, nëse Irani hakmerret.

Presidenti Trump foli me gazetarët në avionin presidencial të dielën vonë.

“Ata lejohen të përdorin bomba në anë të rrugës për të vrarë njerëzit tanë dhe ne nuk lejohemi të prekim objektet kulturore? Nuk funksionon kështu”, tha ai.

Sipas konventave të Gjenevës që përcaktojnë kufizimet ligjore për luftë, sulmi ndaj objekteve kulturore të një vendi tjetër është një krim lufte. Por Sekretari amerikan i Shetit, Mike Pompeo, i cili nuk e kritikoi komentin në Twitter të Presidentit Trump tha për ABC-në se:

“Ne (SHBA) do të veprojmë sipas ligjit e brenda sistemit. Çdo objektiv që godasim do të jetë një objektiv i ligjshëm dhe veprimet do të hartohet me një mision të vetëm, atë të mbrojtjes së popullit Amerikan”.

Kryetarja e Dhomës së Përfaqësuesve, Nancy Pelosi tha në një letër për kolegët e saj demokratë se Dhoma do të votojë këtë javë për një rezolutë për kompetencat e luftës “për të kufizuar veprimet ushtarake të Presidentit lidhur me Iranin”.

“Ajo rikonfirmon përgjegjësitë mbikqyrëse të Kongresit, duke përcaktuar se nëse nuk ndërmerren hapa të tjera, veprimet ushtarake të administratës ndaj Iranit do të ndalen brenda 30 ditësh”, shkruante zonja Pelosi.

Ajo e quajti goditjen ajrore të javës së kaluar “provokuese dhe disproporcionale” dhe tha se vinte në rrezik trupat amerikane dhe përshkallëzonte tensionet me Iranin.

Zoti Pompeo tha se goditja erdhi në momentin e duhur.

“Nuk kishte asnjë mosbesim mes udhëheqësve të lartë që kishin qasje tek të gjitha informacionet e zbulimit. Vlerësimi i tyre, bënte të qartë se ishte shumë më e rrezikshme të lejohej Soleimani të vazhdonte komplotet e tij, fushatën e tij të terrorit, sesa të ndërmerrnim veprimin që morëm javën e kaluar”.

Republikanët e mbrojtën vendimin e zotit Trump.

Udhëheqësi suprem iranian Ayatollah Ali Khamenei ka berë të ditur se “hakmarrja e Teheranit do të jetë e ashpër”. Këshilltari i tij i lartë ushtarak, gjeneral brigade Hossein Dehghan tha për rrjetin CNN se “me siguri përgjigja do të jetë ushtarake dhe kundër objekteve ushtarake”.

Irani po mban tri ditë zie para varrimit të Soleimanit të martën. zëri i amerikës

Presidenti Trump kërcënon Irakun me sanksione nëse dëbohen forcat amerikane

Presidenti amerikan, Donald Trump, tha se Shtetet e Bashkuara nuk do të largohen nga Iraku, përderisa nuk shpaguhen për një bazë ajrore të ndërtuar atje.

Ai i bëri këto komente duke reaguar ndaj rezolutës së miratuar nga parlamenti irakian, i cili i kërkoi të dielën qeverisë të largojë 5 mijë e 200 trupat amerikane që ndodhen aty.

Presidenti Trump u tha gazetarëve në avionin presidencial të dielën se Shtetet e Bashkuara kanë një bazë ajrore “jashtëzakonisht të shtrenjte” që kushton miliarda dollarë.

“Ne nuk largohemi derisa ata nuk paguajnë”, tha ai duke kërcënuar me sanksione “çfarë nuk i kanë parë kurrë më parë”, nëse Shtetet e Bashkuara nuk janë në gjendje të largohen “miqësisht” nga Iraku.

Shtetet e Bashkuara përdorin 12 objekte të ndryshme ushtarake gjithandej Irakut. Presidenti Trump nuk e saktësoi se për cilën bazë po fliste.

Parlamenti irakian kërkoi largimin e trupave amerikane, në shenjë proteste ndaj sulmit me dron në aeroportin e Bagdadit, që vrau gjeneralin iranian Qasem Soleimani.

Shumica shiite në parlament votoi për rezolutën nëpërmjet së cilës i bëhet thirrje qeverisë t’i japë fund marrëveshjes dypalëshe me koalicionin e udhëhequr nga SHBA-ja që parashikon qëndrimin e trupave në tokën irakiane.

Sekretari amerikan i Shtetit Mike Pompeo u shpreh skeptik se forcat amerikane do të dëboheshin. Ai tha për rrjetin televiziv “Fox News” se “Uashingtoni ka besim se populli irakian dëshiron që Shtetet e Bashkuara të qëndrojnë atje”.

Zëdhënësja e Departamentit të Shtetit, Morgan Ortagus, tha Shtetet e Bashkuara janë të “zhgënjyera” nga vendimi i Irakut dhe po presin sqarimin e ligjshmërisë së vendimit. Ajo tha se Shtetet e Bashkuara i kërkojnë Irakut të ndryshojë qëndrimin e tij.

“Ne besojmë se është në interesin e përbashkët të Shteteve të Bashkuara dhe Irakut që të vazhdojnë të luftojnë ISIS-in bashkërisht. Kjo administratë mbetet e përkushtuar për një Irak sovran, të qëndrueshëm dhe të përparuar”, tha ajo.

Shtetet e Bashkuara dhe Iraku, ranë dakord për rikthimin e trupave amerikane në Irak katër vite më parë për të ndihmuar në luftën kundër terroristëve të Shtetit Islamik. Kjo ndodhi pas tërheqjes së të gjitha forcave amerikane që kishin ndërhyrë në vitin 2003 për rrëzimin e diktatorit irakian Saddam Hussein.

Rezolutat e parlamentit irakian nuk janë detyruese. Por, kryeministri në detyrë Adel Abdul Mehdi, i kishte kërkuar parlamentit më herët që të merrte masa urgjente dhe t’i jepte fund pranisë së trupave të huaja sa më parë që është e mundur.

Por, ai tha se çdo vendim rreth trupave amerikane duhet të ketë parasysh që interesat kombëtare dhe siguria e Irakut nuk do të dëmtohen.

Riyad Muhammad Ali Al Masoudi, anëtar i parlamentit Irakian, i tha shërbimit kurd të Zërit të Amerikës se “nuk duam të krijojmë një boshllëk politik ose të sigurisë në këtë drejtim. Ajo që ne duam me të vërtetë, është të ruajmë sovranitetin e Irakut dhe të ardhmen politike të vendit. Ne shpresojmë se kjo marrëveshje do të shërbejë në interes të Irakut dhe nuk do të përdoret kundër Irakut”.

Ndërkohë, udhëheqësi i Hezbollahut pro-iranian në Liban, Sheiku Hassan Nasrallah, mbajti një fjalim të zjarrtë para përkrahësve të tij në Bejrut, duke i kërkuar parlamentit Irakian “të dëbojë Shtetet e Bashkuara”, ndërsa nguli këmbë për hakmarrje pas vrasjes se Soleimanit.

Trump: SHBA do të godasë Iranin me “pajisje të reja” nëse sulmohet

Presidenti amerikan Donald Trump tha se shteti i tij do të godasë Iranin me “pajisje të reja të bukura” nëse Irani do të sulmonte bazat amerikane ose shtetasit amerikanë pas vrasjes së komandantit të Forcave Kuds të Gardës Revolucionare të Iranit, Qasem Soleimani, transmeton Anadolu Agency (AA).

“SHBA sapo ka shpenzuar 2 trilionë dollarë për pajisje ushtarake. Ne jemi më të mëdhenjtë dhe deri tani më të mirët në botë! Nëse Irani sulmon një bazë amerikane, apo ndonjë amerikan, ne do të dërgojmë rrugës disa nga pajisjet e reja të bukura, pa asnjë hezitim!”, shkroi Trump në Twitter.

Në komente tjera në Twitter, Trump gjithashtu “këshilloi fuqishëm” Iranin të mos sulmojë SHBA-të pasi Washingtoni do të “kthente goditjen”.

“Ata na sulmuan dhe ne kthyem sulmin. Nëse ata sulmojnë sërish, gjë që do t’i këshilloja fuqishëm që të mos e bëjnë, ne do t’i godasim më fuqishëm se sa ishin goditur më parë!”

Të shtunën, Trump është kërcënuar se do të godasë 52 caqe iraniane në rast të një sulmi ndaj shtetasve apo pronave amerikane.

Ai tha se Teherani zyrtar “po fliste me shumë guxim për shënjestrimin e disa pronave të SHBA-ve si hakmarrje” për vrasjen e Soleimanit, duke shtuar se gjenerali ishte përgjegjës për vdekjen e një amerikani dhe qindra protestuesve iranianë.

Në një sulm ajror jashtë aeroportit të Bagdadit u vranë Soleimani dhe nënkryetari i grupit Hashd al-Shaabi të mbështetur nga Irani, Abu Mahdi al-Muhandis.

Vrasja e Soleimanit shënon një përshkallëzim dramatik në tensionet mes SHBA-ve dhe Iranit, të cilat shpesh kanë qenë të përkeqësuara që kur presidenti Donald Trump në vitin 2018 zgjodhi që të tërhiqte SHBA-të në mënyrë të njëanshme nga marrëveshja bërthamor që fuqitë botërore e nënshkruan me Teheranin.

Udhëheqësi suprem i Iranit, Ali Khamenei, i cili i dha Soleimanit çmimin më të lartë shtetëror vitin e kaluar, u zotua për “një hakmarrje të hidhur” si reagim ndaj vrasjes.

Pas vdekjes së një kontraktori amerikan në sulmet me raketa ndaj një baze amerikane në Irak, Washingtoni kreu një seri sulmesh që çuan në vdekjen e të paktën 25 luftëtarëve nga grupi i milicisë Kataib Hezbollah i mbështetur nga Irani.

Ky ishte sulmi i parë i madh nga SHBA ndaj një grupi të lidhur me Iranin që nga tërheqja e trupave nga Iraku në vitin 2011.

Ambasada amerikane në Bagdad më pas u sulmua nga një turmë e madhe e protestuesve, duke çuar në një bllokim dyditor midis forcave amerikane dhe protestuesve.

Pentagoni akuzoi Soleimanin për planifikimin e një sulmi ndaj kompleksit të Ambasadës së SHBA-ve në Bagdad dhe se planifikonte të kryente sulme shtesë mbi diplomatët dhe anëtarët e shërbimit amerikan në Irak dhe rajon.

SHBA-ja paralajmëron për sulme të mundshme kibernetike nga Irani

Departamenti i Sigurisë Kombëtare të Shteteve të Bashkuara, ka lëshuar një buletin këshillues kombëtar të terrorizmit, ku paralajmërojë për sulme të mundshme kibernetike nga Irani, pas sulmit me dron të SHBA-së, ku u vra një gjeneral iranian.

“Irani ka një program të fortë kibernetik dhe mund të kryejë sulme kibernetike ndaj Shteteve të Bashkuara”, thuhet në këtë buletin.

Shtetet e Bashkuara po përgatiten për veprime të mundshme hakmarrëse nga Teherani, pas sulmit të 3 janarit, ku u vra Qasem Soleimani, që udhëhiqte forcat elite iraniane, Quds, një krah i Gardës Revolucionare Islamike të Iranit.

Forcat Quds nga Shtetet e Bashkuara konsiderohen organizatë e huaj terroriste.

Në buletinin e Departamentit për Siguri Kombëtare theksohet se forcat amerikane “kanë kryer një sulm vdekjeprurës ku kanë vrarë komandantin e forcave Quds, Qasem Soleimani, teksa ai ishte në Irak”.

“Udhëheqësia iraniane dhe disa organizata ekstremiste publikisht kanë deklaruar se synojnë të hakmerren kundër Shteteve të Bashkuara”, thuhet në buletin.

“Irani është i aftë, që minimumi të kryejë sulme me efekte të përkohshme shkatërruese kundër infrastrukturës kritike të Shteteve të Bashkuara”, thuhet në buletinin e Departamentit për Siguri Kombëtare.

Vetëm disa orë pas këtij paralajmërimi, një grup i hakerëve, që pretendoi se janë nga Irani, hyn në ueb-faqen e një agjencie qeveritare të SHBA-së dhe postuan mesazhe ku zotoheshin se do të hakmerren për vrasjen e gjeneralit Soleimani.

Ueb-faqja e Programit të Bibliotekës së Thesarit Federal u zëvendësua me një faqe të titulluar “Hakerët iranianë”, ku u vendos edhe fotografia e liderit suprem të Iranit, Ayatollah Ali Khamenei, së bashku me flamurin iranian.

Qeveria amerikane nuk ka komentuar lidhur me këtë sulm kibernetik.

Trump: Nëse Irani na sulmon, ne do të godasim 52 pozicione iraniane

Presidenti i Shteteve të Bashkuara, Donald Trump, thotë se Uashingtoni ka identifikuar 52 “pozicione iraniane” që do të sulmojë “shumë shpejt dhe shumë fuqishëm” nëse Teherani kryen ndonjë sulm në caqet amerikane, si shenjë hakmarrje për vrasjen e gjeneralit iranian Qasem Soleimani.

“Irani po flet me shumë guxim për sulmet ndaj disa aseteve të SHBA-së në shenjë hakmarrjeje për shkak se ne vramë liderin e tyre të terrorizmit, i cili sapo kishte vrarë një amerikan dhe plagosi disa të tjerë, për të mos përmendur edhe njerëzit e tjerë që ai kishte vrarë gjatë jetës së tij, përfshirë edhe kohëve të fundit qindra protestues iranianë”, shkroi Trump në llogarinë e tij në Twitter.

Trump shtoi se Qasem Soleimani, që u vra nga një sulm me dron i kryer nga SHBA-ja, teksa po udhëtonte në Irak më 3 janar, kishte sulmuar ambasadën amerikane në Bagdad dhe po “përgatiste sulme të tjera në lokacione të ndryshme”.

“Irani, viteve të fundit ka sjell vetëm probleme. Le të shërbejë si PARALAJMËRIM se sulmet e Iranit ndaj çdo amerikani apo aseteve amerikane, ne kemi 52 lokacione iraniane (që përfaqësojnë 52 amerikanë të marrë peng nga Irani shumë vite më parë), disa në nivel shumë të lartë dhe të rëndësishëm për Iranin dhe kulturën iraniane”, tha Trump.

Trump shkroi se “këto caqe edhe vetë Irani, do të kryhen sulme shumë të shpejta dhe të fuqishme. SHBA-ja nuk do më kërcënime”.

Referenca e Trumpit për pengjet amerikane, i referohet marrjes nën kontroll të ambasadës amerikane në Teheran më 1979 nga revolucionarët iranianë, ku 52 amerikanë u mbajtën peng për 444 ditë.

Ndërkaq, përmendja nga presidenti amerikan për lokacionet kulturore, ngriti mjaft shqetësime në mesin e kritikëve.

Colin Kahl, i cili ka qenë zyrtar i sigurisë kombëtare në administratën e ish-presidentit Barack Obama, ka shkruar në Twitter se ai e kishte të vështirë “të besoj se Pentagoni do t’i jepte të dhëna Trumpit për lokacione të ndryshme, përfshirë ato kulturore. Trump mund të mos brengoset për ligjet e luftës, por Departamenti i Mbrojtjes dhe avokatët brengosen… dhe sulmi ndaj pozicioneve kulturore përbën krim lufte”.

Irani është zotuar se do të hakmerret, por deri tani nuk ka marrë ndonjë veprim ushtarak. Në sulmin e 3 janarit, përveç liderit të Forcave elite iraniane Quds, Soleimanit, është vrarë edhe Abu Mahdi aë-Muhandis, zëvendëskomandanti i milicisë në Irak, Hashd Shaabi, milici kjo që mbështetet nga Irani.

Komentet e Trumpit u pasuan nga komente të ngjashme nga një komandant i Gardës Revolucionare Islamike të Iranit, i cili përmendi 35 caqe amerikane, të cilat Irani mund t’i godasë në kundërpërgjigje.

Agjencia e lajmeve iraniane, Tasnim, ka cituar gjeneralin Gholamali Abuhamzeh të ketë thënë se Teherani do të ndëshkojë amerikanët kudo që mundet dhe ka sugjeruar se mund të kryejë sulme ndaj anijeve në Gjirin Persik.

Lideri suprem i Iranit, Ayatollah Ali Khamenei gjithashtu ka kërcënuar se do të ndërmarrë veprime hakmarrëse ndaj “kriminelëve” që kanë vrarë gjeneralin Soleimani, përderisa presidenti iranian, Hassan Rohani deklaroi se vrasja e gjeneralit iranian, do ta bëjë Teherani më të vendosur në rezistencën e tij kundër Shteteve të Bashkuara.

Vendimi i Trumpit për të vrarë Soleimanin është mirëpritur nga mbështetësit e tij republikanë, por ka hasur në kritika nga demokratët, të cilët thonë se një gjë e tillë mund që SHBA-në ta fusë në luftë me Iranin.

Në Irak, qytetarët kanë marrë pjesë në varrimin e Qassem Soleimani

Forcat Quds, që udhëhiqte Soleimani, nga SHBA-ja konsiderohen organizatë e huaj terroriste.

Në shumë qytete amerikane, protestuesit kanë kundërshtuar vrasjen e gjeneralit Soleimani.

“Pa drejtësi, pa paqe, SHBA-ja jashtë Lindjes së Mesme”, kanë brohoritur protestuesit në qendër të Nju Jorkut. Disa nga protestuesit kanë mbajtur në duar pano me mbishkrime “Ndaloni bombardimet në Irak” dhe “Jo luftë apo sanksione ndaj Iranit”.

Rreth 200 protestues para Shtëpisë së Bardhë kanë brohoritur “jo luftë në Iran” dhe tubime të ngjashme janë mbajtur edhe në Çikago, Filadelfi, San Francisko dhe vende të tjera në SHBA.

Shumë prej aleatëve tradicionalë të SHBA-së gjithashtu kanë shprehur shqetësimin e tyre se vrasja e gjeneralit iranian mund të nxisë një konflikt të armatosur në Lindje të Mesme.

Ndërkaq, në Irak, koalicioni i udhëhequr nga SHBA-ja, më 5 janar tha se kanë ndodhur dy sulme me raketa në afërsi të bazave irakiane ku janë të vendosur trupat e koalicionit, por nuk është raportuar se ka pasur të plagosur në mesin e forcave. Megjithatë, koalicioni ka raportuar se nga këto sulme janë plagosur civilë irakianë.

“Në natën e 4 janarit, dy raketa kanë goditur në afërsi të bazave irakiane ku janë të vendosur trupat e koalicionit në Bagdad dhe Balad”, tha zëdhënësi i koalicioni, koloneli, Myles B. Caggins III.

Uashingtoni e fajëson Iranin se ka orkestruar sulmet ndaj SHBA-së, përfshirë edhe sulmin ndaj ambasadës amerikane në Bagdad më 31 dhjetor.

Përgatiti: Mimoza Sadiku

Demokratët dhe republikanët të ndarë mbi sulmin ajror që vrau gjeneralin iranian

Sulmi ajror amerikan që vrau Komandantin e Forcave Quds të Iranit, gjeneralin Qassem Soleimani, ka ndarë në vija partiake ligjvënësit amerikanë. Presidenti Donald Trump urdhëroi të enjten kryerjen e sulmit, pas protestave të mbështetësve të milicive pro-iraniane ndaj Ambasadës së Shteteve të Bashkuara në Bagdat. Urdhëri i presidentit u përshëndet nga ligjvënësit republikanë, por demokratët thanë se ai mund të sjellë pasoja serioze për stabilitetin në Lindjen e Mesme.

Vrasja e Qassem Soleimanit shkaktoi reagime të forta në mbarë botën. Sulmi ajror i urdhëruar nga Presidenti Trump ngjalli debat të ashpër politik në Shtetet e Bashkuara si përgjatë aktiviteteve në kuadër të fushatës elektorale ashtu edhe në Kongresin amerikan.

Por veprimi u përshëndet nga republikanët…

“Për shumë kohë, ky njeri i keq vepronte pa kufizim. Të pafajshëm të panumërt kanë vuajtur prej kësaj. Tashmë, ky udhëheqës terrorist ka marrë fund”, tha Senatori Mitch McConnell, udhëheqës i shumicës republikane.

Disa udhëheqës republikanë shprehën në Twitter mbështetjen e tyre për vendimin që Pentagoni tha se ishte i nevojshëm për të parandaluar sulme të planifikuara ndaj diplomatëve amerikanë dhe ushtarakëve.

Presidenti Trump veproi pasi protestuesit pro-iranianë rrethuan Ambasadën e Shteteve të Bashkuara në Bagdat.

“Duhej të merrej vendimi nëse do të kishte një përgjigje proporcionale, apo nëse do të shfrytëzohej momenti ndërsa krerët e tyre ndodheshin në terren dhe të eliminohej kështu lojtari kryesor negativ në fushëbetejë”, thotë Kirsten Fontenrose, e Këshillit të Atlantikut.

Por Kryetarja e Dhomës së Përfaqësuesve Nancy Pelosi, tha se presidenti urdhëroi një sulm ajror pa autorizimin e Kongresit. Të njëjtin shqetësim pati edhe kreu i pakicës demokrate në Senat.

“Nevoja për konsultim paraprak dhe transparencë me Kongresin është vendosur në Kushtetutë për një arsye, për shkak se moskonsultimi dhe mungesa e transparencës me Kongresin mund të çojnë në vendime të nxituara dhe keqmenduara”, tha senatori Chuck Schumer, udhëheqës i pakicës demokrate në Senat.

Sulmi ajror ringjalli përpjekjet në Kongres për të ushtruar autoritetin e legjislativit mbi operacionet ushtarake, megjithëse administrata gëzon të drejtën të ndërmarrë veprime të tilla.

“Administrata ndërmori hapin e futjes së Qassem Soleimanit në listën e terroristëve të huaj, duke zgjeruar kështu edhe autoritetin e saj. Pra, administrata e fitoi autoritetin për të goditur Qassem Soleimanin”, thotë zonja Fontenrose.

Efekti më i gjerë i sulmit ajror është ajo që shqetëson demokratët që po kandidojnë përballë Presidentit Trump.

“Fatkeqësisht asgjë nga ato që kemi parë nga kjo administratë gjatë tre viteve të fundit nuk na sugjeron se është e përgatitur të përballet me rreziqet që shfaqen”, tha Joe Biden, kandidat demokrat për president.

Një tjetër kandidat demokrat senatori Bernie Sanders, pretendon se goditja ajrore shkeli premtimin elektoral të Presidentit Trump.

“Trump-i premtoi të ndalë luftërat pa fund. Tragjikisht, veprimet e tij na kanë futur në rrugën drejt një tjetër lufte”, tha senatori Bernie Sanders, kandidat demokrat për president.

Pete Buttigieg, ish-zyrtar i zbulimit dhe më vonë ish-kryebashkiak në South Bend të shtetit Indiana, tha se rreziku i përshkallëzimit nga Irani është shumë real.

“Kjo është gjëja më provokative që mund të bënte SHBA-ja, pa e pushtuar realisht Iranin”, tha Pete Buttigieg, kandidat demokrat për president.

Senatorët amerikanë pritet të informohen javën e ardhshme rreth sulmit ajror. Senatori McConnell bëri thirrje për vetëpërmbajtje deri në atë moment.

“Siç mund të pritet nga kjo klimë politike, operacioni që solli vdekjen e Soleimanit mund të sjellë polemika e përçarje. Megjithëse e mirëpres një debat për interesat e politikës së jashtme amerikane në Lindjen e Mesme, sugjeroj që të gjithë senatorët të presin derisa të shohin faktet dhe të dëgjojnë argumentat e administratës, përpara se të ofrojnë publikisht gjykimet e tyre për të këtë operacion dhe pasojat e tij të mundshme”, tha senatori McConnell.

Ndërkohë senatori Tim Kaine ka njoftuar se do të hartojë një projektligj që do të parashikonte votimin në Kongres përpara çdo veprimi të ardhshëm të Shteteve të Bashkuara ndaj Iranit, duke e zgjeruar kështu për disa javë të tjera debatin e ligjvënësve për këtë çështje. zëri i amerikës

Trump: Vrasja e Qassem Soleimanit, e vonuar

Presidenti amerikan Donald Trump doli në mbrojtje vendimit për sulmuar e vrarë gjeneralin më të fuqishëm të Iranit, duke injoruar kërcënimet e Teheranit për një hakmarrje të ashpër.

Në komentet e para të tij, pasi zyrtarët amerikanë të mbrojtjes konfirmuan sulmin ajror në afërsi të aeroportit ndërkombëtar të Bagdadit të premten herët në mëngjes me orën lokale, zoti Trump fajësoi komandantin e forcës elitare Quds për vdekjen e mijëra amerikanëve dhe tha se sulmi ishte i vonuar.

“Gjenerali Qassem Soleimani ka vrarë apo plagosur rëndë me mijëra amerikanë gjatë një periudhe të gjatë kohore dhe po komplotonte të vriste shumë më tepër“, shkruante në një postim në Twitter të premten presidenti Trump.

“Soleimani ishte një figurë e urryer dhe e rrezikshme. Ai duhej të ishte hequr qafe vite më parë“, shkruante ai.

Ndërkohë zrasja nga forcat amerikane e udhëheqësit të forcës elitë “Quds” të Iranit gjatë një sulmi ajror në Irak, ka nxitur thirrje nga për përmbatje, tek ato për hakmarrje.

Ministri iranian i Punëve të Jashtme Mohammad Javad Zarif e quajti vrasjen e gjeneralit Qassem Soleimani “një akt terrorizmi shtetëror dhe shkelje të sovranitetit të Irakut”.

Sekretari amerikan i Shtetit, Mike Pompeo tha sot se vrasja e tij shmangu një “sulm që pritej të ndodhte nga momenti në moment” kundër interesave amerikane. Departamenti amerikan i Mbrojtjes shtoi se Soleimani “po hartonte në mënyrë vazhdueshme plane për të sulmuar diplomatët dhe anëtarët e shërbimit amerikan në Irak, si dhe në të gjithë rajonin”. Gjenerali ishte një nga strategët kryesorë ushtarakë të Iranit.

“Martirizimi i Soleimanit do ta bëjë Iranin më të vendosur t’i rezistojë ekspansionit amerikan si dhe të mbrojë vlerat tona islamike”, tha Presidenti iranian Hassan Rouhani në një deklaratë. “Pa dyshim që Irani dhe vendet e tjera që kërkojnë liri në rajon do të hakmerren”, shtoi ai.

Kryetarja e Dhomës së Përfaqësuesve të Kongresit amerikan, Nancy Pelosi tha se sulmi ishte kryer “pa u këshilluar” me Kongresin dhe se rrezikonte “të provokonte një përshkallëzim të mëtejshëm e të rrezikshëm të dhunës”. Ajo shtoi se “SHBA dhe bota nuk mund ta përballojnë përshkallëzimin e tensioneve deri në pikë që të mos ketë kthim pas”.

Ministri i jashtëm i Britanisë Dominic Raab u bëri thirrje të gjitha palëve për vetëpërmbatje.

Një zëdhënës i grupit palestinez Hamas tha se vdekja e gjeneralit “hap dyert e rajonit për të gjitha zhvillimet e mundshme, përveç qetësisë e stabilitetit”. Bassem Naim tha se “përgjegjësia për këtë është e SHBA-së”.

Një zëdhënës i qeverisë kineze tha se Kina “e kundërshton përdorimin e forcës në marrëdhëniet ndërkombëtare”. Ai tha se Pekini “u bën thirrje të gjitha palëve përkatëse, veçanërisht SHBA-së për vetëpërmbatje si dhe për parandalim të përshkallëzimit të tensioneve”.

Senatori amerikan Jim Risch, kryetari republikan i komisionit të Marrëdhënieve me Jashtë në Senat shkruante në Twitter se “sot u dha drejtësi”, duke shtuar se siç kishte paralajmëruar edhe më parë qeverinë iraniane, ajo nuk duhet “ta merrte si dobësi përmbatjen e arsyeshme amerikane ndaj sulmeve të mëparshme të Teheranit”.

“Ky është një akt i fortë përshkallëzues në një rajon tashmë të rrezikshëm”, tha ish-nënpresidenti Joe Biden, një nga kandidatët demokratë për garën presidenciale. Presidenti amerikan Donald Trump tha se zoti Biden “duhet t’i japë popullit amerikan një shpjegim mbi strategjinë dhe planet për të garantuar sigurinë për trupat dhe personelin e ambasadës, amerikanët dhe interest amerikane si brenda dhe jashtë vendit si dhe për partnerët tanë në të gjithë rajonin e më gjerë”.

Moshen Rezaei, ish-komandanti i Gardës Revolucionare të Iranit tha se “Teherani do të hakmarret fuqishëm ndaj SHBA-së”. zëri i amerikës

Pompeo: Vrasja e Soleimanit shmangu një sulm të pritshëm

Vrasja nga forcat amerikane e udhëheqësit të forcës elitë “Quds” të Iranit gjatë një sulmi ajror në Irak, ka nxitur thirrje nga për përmbatje, tek ato për hakmarrje.

Ministri iranian i Punëve të Jashtme Mohammad Javad Zarif e quajti vrasjen e gjeneralit Qassem Soleimani “një akt terrorizmi shtetëror dhe shkelje të sovranitetit të Irakut”.

Ministri i jashtëm i Britanisë Dominic Raab u bëri thirrje të gjitha palëve për vetëpërmbatje.

Moshen Rezaei, ish-komandanti i Gardës Revolucionare të Iranit tha se “Teherani do të hakmarret fuqishëm ndaj SHBA-së”. zëri i amerikës

Giuliani, gati të dëshmojë në gjyqin ndaj Presidentit Trump

Rudy Giuliani, avokati personal i Presidentit amerikan Donald Trump dhe një figurë kryesore në presionin ndaj Ukrainës për të nisur hetimet për të përfituar politikisht Trump-i, thotë se ai do të dëshmonte në gjyqin për shkarkimin e presidentit dhe do të bënte gjithçka që mundej për ta nxjerrë atë të pafajshëm.

“Do të dëshmoja. Do të jepja leksione, do të jepja përmbledhje faktesh”, tha zoti Giuliani ndërsa mbrriti të martën në darkë me kravatë të zezë në festën e Vitit të Ri në pronën e Presidentit Trump në Florida.

Giuliani, ish kryetar i Bashkisë së Nju Jorkut dhe mik i ngushtë prej një kohe të gjatë Presidentin Trump, nuk pritet të jetë një nga avokatët e tij që do ta mbrojnë në një gjykim të Senatit, që ende nuk është planifikuar, me këshilltarin e Shtëpisë së Bardhë, Pat Cipillone, që ka gjasa të jetë avokati kryesor i Trumpit.

Trump përballet me dy akuza të fajësimit të miratuara muajin e kaluar nga shumica e ligjvënësve demokratë në Dhomën e Përfaqësuesve të kontrolluar nga demokratët ndërsa republikanët i kundërshtuan ato njëzëri. Trump akuzohet se ka abuzuar me pushtetin duke i bërë trysni Kievit për të hapur një hetim ndaj një prej sfiduesve të tij më të mirë demokratë në vitin 2020, ish-nënpresidentin Joe Biden dhe akuzën e pengimit të Kongresit në hetimin për veprimet e tij të lidhura me Ukrainën.

Dëshmia e zotit Giuliani, nëse ndodh ndonjëherë, mund të jetë informuese. zëri i amerikës

Mbyll dyert muzeu i gazetarisë

Anna Rice Rice

Një nga muzetë më unikë në Uashington DC, i quajtur Newseum, u mbyll në prag të Vitit të Ri. Për 12 vjet ai ka shërbyer si një mjedis ndërveprimi, kushtuar gazetarisë si dhe inkurajimit të mesazhit që përcjell Amendamenti i Parë i Kushtetutës Amerikane. Më shumë detaje na sjell materiali i përgatitur nga korrespondentja e Zërit të Amerikës Anna Rice.

Pjesë të murit të Berlinit dhe kullave binjake pas rrëzimit më 11 shtator të vitit 2001, makina e shpartalluar nga plumbat e një ekipi televiziv që punonte në ish-Jugosllavi, faqet e para të gazetave nga e gjithë bota, kanë qenë simboli i shtypit të lirë dhe Amendametit të Parë të Kushtetutës Amerikane për më shumë se një dekadë të ekspozuara në godinën e Newseum-it që ndodhet në zemër të kryeqytetit amerikan, Uashington DC.

“Mbi dhjetë milionë vetë e kanë vizituar Newseum-in gjatë gjithë periudhës kohore që ka qenë i hapur në Uashington DC. Gjysma e vizitorëve kanë qenë nxënës shkollash. Është diçka që na ka gëzuar pa masë kur i shihnim ata të ndërvepronin me gjëra të tilla si muri i Berlinit, të mësonin mbi Luftën e Ftohtë apo të shihnin galerinë tonë mbi 11 shtatorin “, thotë Sonya Gavankar, drejtoreshë për Marrëdhëniet me Publikun, Newseum.

Pasi qëndroi i hapur për më shumë se 12 vjet, muzeu falimentoi. Ndërtesa që e strehoi atë gjatë gjithë kësaj periudhe i është shitur universitetin Johns Hopkins për 372.5 milionë dollarë.

“Ideja për Newseum-in nisi mbi njëzet vite më parë, nga themeluesi ynë Al Neuharth, me qëllimin për të edukuar e zhvilluar biseda në lidhje me Amendamentin e Parë të Kushtetutës dhe profesionin e gazetarisë. Kjo ide u jetësua në Rosslyn-in të Virxhinias, në një muze të bukur dhe pas rreth një dekade atje, u transferua këtu në Uashington DC”.

Për të blerë godinën që ndodhet shumë pranë Kongresit u shpenzuan me miliona dollarë. Por megjithëse u arritën të gjitha objektivat e parashikuar, muzeu nisi të përjetojë probleme.

“Amendamenti i Parë, liria e fjalës dhe e shtypit janë të rëndësishme. Jam rritur duke besuar në këto vlera dhe tashmë mendoj se ato janë në rrezik këtu në vendin tonë. Kjo është diçka e trishtë“, thonë Tiffany dhe Jessica Crabtree, vizitore të Newseum-it

“Është shumë e trishtueshme ta shohësh tek mbyllet. Ka kaq shumë histori të dokumentuar ….Kjo të bën të mendosh se sa i rëndësishëm është një shtyp i lirë”, thotë Seth, vizitor i Newseum-it.

Mbyllja e Newseum-t vjen në një kohë të vështirë për gazetarinë tradicionale. Rreth 2 mijë gazeta amerikane janë mbyllur gjatë 15 viteve të fundit. Sipas sondazhe të Gallup-it më pak se gjysma e popullsisë amerikane i besojnë medias, një rënie e madhe nga më shumë se 70 për qind që llogaritej në vitet 1970.

Gazetari Ron Lyons thotë se ai erdhi në Uashingtom DC nga Detroit posaçërisht për të parë Newseum-it.

“Kjo është ajo për të cilën po luftojmë. Kjo është arsyeja pse punojmë si gazetarë, jo thjesht për të marrë çmime e tituj, por për të treguar se liria e shtypit dhe zëri i publikut janë të rëndësishme“, thotë Ron Lyons, gazetar.

Drejtuesit e Newseum-it shpresojnë ta vazhdojnë misionin me theksin tek profesioni i gazetarisë e të paturit të një shtypi të lirë, në një forum në internet.

Trumpi dënon sulmin antisemitik në New York

Presidenti i SHBA-ve, Donald Trump, dënoi sulmin në New York që plagosi pesë hebrenj gjatë festës së tyre fetare Hanukkah, transmeton Anadolu Agency (AA).

“Sulmi antisemitik në Monsey, New York, natën e 7-të të Hanukkah, mbrëmjen e kaluar i tmerrshëm”, shkroi Trump në Twitter të dielën.

“Të gjithë duhet të bashkohemi për të luftuar, për t’u përballur dhe për të zhdukur belanë e keqe të antisemitizmit. Melania dhe unë u dëshirojmë viktimave shërim të shpejtë dhe të plotë”, tha ai.

Grafton Thomas, 38 vjeç, i armatosur me hanxharë të shtunën goditi pesë persona gjatë festivalit Hanukkah në shtëpinë e një rabi në Rockland County. Sulmuesi nga Greenwood Lake u arratis pas sulmit, por më vonë u arrestua nga policia në Harlem.

Ai u arrestua të dielën dhe u deklarua i pafajshëm për pesë akuza të tentimit për vrasje dhe një akuzë për vjedhjeje. Garancia e tij u caktua në 5 milionë dollarë.

Hanukkah është një festë tetë-ditore hebraike që shënon ridedikimin e tempullit të dytë hebre në Kuds, Tempullin e Shenjtë në shekullin II p.e.s.

Nju Jork: Sulm në shtëpinë e rabinit, 5 të plagosur me thikë

Autoritetet njoftuan se një person ka sulmuar të shtunën vonë në mbrëmje shtëpinë e një rabini gjatë festës së Hanukës duke plagosur me thikë pesë persona përpara se largohej nga vendngjarja. Incidenti ndodhi në veri të qytetit të Nju Jorkut.

Ky është sulmi më i fundit në një varg sulmesh që kanë patur si objektiv komunitetin hebre.

Policia tha se sulmi me thikë ndodhi rreth orës 10 të mbrëmjes në Monsey, një prej disa qyteteve të Luginës Hudson, që vitet e fundit ka njohur një rritje të numrit të hebrenjve Hasidik.

Shefi i policisë Brad Weidel tha disa orë më vonë se policia e qytetit të New York-ut kishte dijeni mbi vendndodhjen e personin të dyshuar si autor i sulmit si dhe automjetit të tij. Zyrtarë të lartë të shtetit përfshirë guvernatorin Andrew Cuomo dhe Prokuroren e Përgjithshme Leticia James e dënuan sulmin.

Monsey ndodhet rreth një orë në veri të qytetit të Nju Jorkut.

Këshilli për Punët Publike i Orthodoksëve Hebre i Luginës Hudson në një postim në Twitter shkruante se sulmi ndodhi në shtëpinë e një rabini Hasidik ndërsa po festonin Hanukën.

Disa zyrtarë shtetërorë e lokalë thane se sulmi me thikë ndodhi në një sinagogë. Shtëpia e rabinit ndodhet ngjitur me një sinagogë. zëri i amerikës

Presidenti Trump dhe raportet me udhëheqësit botëror

Cindy Sain

Presidenti Donald Trump ka marrëdhënie të tensionuara me aleatët e NATO-s, por duket se mban lidhje më të ngrohta me një numër udhëheqësish jo demokratë, përfshirë Kim Jong Unin e Koresë së Veriut, Presidentin turk, Recep Tayyip Erdogan dhe atë rus, Vladimir Putin. Megjithë këtë, një anketë e kohëve të fundit tregon se një shumicë e konsiderueshme e amerikanëve, është për një politikë të jashtme tradicionale, të mbështetur tek aleancat e fuqishme ushtarake, tregëtia e lirë dhe promovimi i demokracisë e të drejtave të njeriut në botë.

Presidenti Donald Trump ka një qëndrim të tijin, të pazakontë në politikën e jashtme. Ai shpesh përdor fjalë të ashpra për NATO-n dhe aleatë të tjerë tradicionalë të Shteteve të Bashkuara gjë që u vu re kur sulmoi udhëheqësin e Kanadasë, i cili u kap në video në një takim të NATO-s në Londër, duke ironizuar zotin Trump.

Megjithatë ai shpesh vlerëson udhëheqësit autoritarë, si presidentin rus, Vladimir Putin dhe atë kinez Xi Jinping, të cilin e ka quajtur “një njerpi të mirë me punë të vështirë”, në Twitter.

Edhe takimet e zotit Trump me udhëheqësin koreano-verior Kim Jong Un janë shumë ndryshe nga ato të paraardhësve të tij, ashtu si edhe fakti që ai i quajti “të bukura” letrat e Kimit.

“Dhe mendoj se do të keni një të ardhme të mrekullueshme me vendin tuaj, një udhëheqës të madh”, është shprehur ai.

Frances Brown, që ka punuar për Këshillin e Sigurisë Kombëtare, për administratat e presidentëve Obama dhe Trump, thotë se duket se zotit Trump i pëlqejnë njerëzit e fortë autoritarë.

“Mendoj se shpesh ata ia bëjnë qejfin Presidentit Trump personalisht dhe atij i pëlqen një gjë e tillë. Problemi është se gjithë qeveria e tij, është kundër këtyre udhëheqësve me grusht të hekurt me tendenca anti-demokratike”, thotë Frances Brown e Fondacionit Carnegie për Paqe Ndërkombëtare.

Dhe anketat tregojnë se shumë amerikanë kanë pikëpamje më tradiocionale të politikës së jashtme.

Anketa e vitit 2019 e Këshillit të Çikagos, tregon se 78 për qind mendojnë se Shtetet e Bashkuara duhet të mbajnë të njëjtën mbështetje për NATO-n ose ta rrisin atë dhe pothuajse 60 për qind besojnë se promovimi i demokracisë dhe të drejtave të njeriut në botë, e bën më të sigurt Amerikën.

Prandaj duket se amerikanët e refuzojnë me forcë largimin nga aleancat globale, thotë ish-ambasadori amerikan në NATO, Ivo Daalder.

“Vetëm 20 për qind e amerikanëve mendojnë ashtu si presidenti, pra që nga aleancat përfitojnë vetëm partnerët. E njëjta gjë është e vërtetë për tregëtinë”.

I pyetur nëse politika e jashtme e zotit Trump do të jetë faktor për votuesit amerikanë në zgjedhjet e vitit 2020, një ekspert tha se disa mund ta gjykojnë si çështje karakteri.

“Mendoj se ndoshta këtë radhë më shumë se më parë, njerëzit do të gjykojnë karakterin dhe mënyrën sesi presidenti sillet me aleatët dhe botën”, thotë Dina Smeltz, e Këshillit të Çikagos për Çështje Globale.

Qëndrimi i zotit Trump ndaj politikës së jashtme mund të mos jetë vendimtar në kutinë e votimit, duke qenë se amerikanët përmendin kujdesin shëndetësor, ekonominë dhe emigracionin si çështje me përparësi për ta.

Astronautja amerikane Christina Koch vendos rekord të ri në hapësirë

Astronautja amerikane Christina Koch vendosi të shtunën një rekord të ri për fluturimin më të gjatë në hapësirë të kryer nga një grua. Rekordi i mëparshëm ishte 288 ditë dhe ishte vendosur nga ish-komandantja e Stacionit Hapësinor Peggy Whitson mes viteve 2016-2017. Dyzet vjeçarja Christina Koch, me profesion inxhiniere elektrike nga Livingstoni i Montanës mbërriti në Stacionin Ndërkombëtar Hapësinor më 14 Mars. Zonja Koch pritet të qëndrojë aty plot 328 ditë, ose afro 11 muaj, përpara se të kthehet në Tokë. Misionet janë zakonisht gjashtë muajore, por NASA njoftoi në muajin prill se do ta zgjasë misionin deri në shkurt.

Rekordi amerikan për fluturimin më të gjatë në hapësirë është 340 ditë i vendosur nga astronauti Scott Kelly mes viteve 2015-2016. Rekordi botëror është 15 muaj i vendosur në vitet 1990 nga një astronaut rus në ish-stacionin hapësinor Mir.

Misioni i zgjatur i Christina Koch-ut do të ndihmojë NASA-n të mësojë më shumë në lidhje me efektet e fluturimeve të gjata në hapësirë, të dhëna këto të nevojshme sipas zyrtarëve të NASA-n, për të mbështetur misionet e ardhshme për kërkime më të thelluara në hapësirë, në Hënë dhe Mars. zëri i amerikës

Gjyqi në Senat, çfarë mund ta zgjidhë ngërçin?

Më shumë se një javë nga dita kur Dhoma e Përfaqësuesve miratoi ngritjen zyrtarisht të akuzave që synojnë shkarkimin e Presidentin Donald Trump, procesi i gjykimit në Senat mbetet i bllokuar. Zoti Trump akuzohet për abuzim me detyrën dhe pengimit të hetimeve që po kryente Kongresi mbi këtë çështje.

Udhëheqësi i shumicës në Senat Mitch McConnell ka thënë se ai dëshiron ta nisë procesin gjyqësor sapo ligjvënësit të kthehen nga pushimet, në muajin janar, por demokratët kërkojnë paraprakisht një marrëveshje për të marrë në pyetje disa dëshmitarë si dhe për t’i dorëzuar Senatit dokumenta të rëndësishme për procesin.

Mes polemikash se si mund të ecet përpara, palët po sjellin në vëmendje gjyqin e zhvilluar në Senat pas ngritjes së akuzave për shkarkim të ish-Presidentit Bill Clinton. Ato akuzojnë njëra-tjetrën për shmangie ndaj asaj që e konsiderojnë si precedent i vendosur nga ai gjykim. Demokratët e Kongresit janë shprehur kritik ndaj një deklarate të zotit McConnell se ai do të koordinojë procesin gjyqësor në Senat me Shtëpinë e Bardhë dhe se të bëjë gjithçka që mundet për ta liruar nga akuzat zotin Trump.

Duke e quajtur procesin për shkarkimin e presidentit “politik”, zoti McConnell ka thënë se ai nuk do të jetë “i paanshëm” në gjykim. Kjo sipas kritikëve bie ndesh me një betim për paanshmëri që të gjithë senatorët duhet të bëjnë përpara se të nisë gjyqi.

Në mënyrë që gjykimi të fillojë zyrtarisht, Senati i përbërë nga 100 anëtarë duhet të miratojë me shumicë të thjeshtë një rezolutë që autorizon procedurën. Por për ta bërë këtë, Dhoma e Përfaqësuesve duhet të dërgojë akuzat.

Kryetarja e Dhomës së Përfaqësuesve Nancy Pelosi ka thënë se nuk ka në plan t’i çojë akuzat Senat dhe se nuk do të zgjedhë ata që do të luajnë rolin e prokurorëve në procesin e gjykimit, “derisa të dihet se çfarë lloj gjykimi do të zhvillojë Senati”, siç është shprehur ajo.

Por zoti McConnell refuzon të pajtohet me këto kërkesa pa nisur gjykimi dhe ka sjellë në vëmendje si precedent gjyqin zhvilluar në vitin 1999 ndaj ish-Presidentit Clinton.

Çfarë ndodhi gjatë gjykimit të zotit Clinton?

Gjyqi ndaj Bill Clintonit, i dyti i këtij lloji në historinë amerikane, nisi më 7 janar 1999, më shumë se dy javë pasi ndaj tij u miratuan akuzat në Dhomën e Përfaqësuesve, se kishte gënjyer nën betim një juri të madhe si dhe kishte penguar drejtësinë lidhur me një hetim për një skandal seksual.

Gjyqi nisi pasi u arrit një marrëveshje mes republikanëve që kontrollonin Senatin dhe pakicës demokrate.

Pastaj këtij momenti u miratuan dy rezoluta të tjera të cilat rregullin mënyrën e gjykimit në Senat.

Fillimisht u miratua unanimisht një rezolutë mbi procedurat e gjykimit. Ajo u dha të dyja palëve kohë të barabartë, deri në 24 orë, për të paraqitur argumentet e tyre, ndërsa senatorëve që shërbenin si gjykatës, 16 orë për të pyetur palët.

Më pas, ndërsa kishte nisur gjykimi, Senati miratoi kryesisht sipas linjave partiake, planin republikan për kufizimin e dëshmive. Dëshmitarët, praktikantja e Shtëpisë së Bardhë Monica Lewinsky, ndihmësja e zotit Clinton Sidney Blumenthal si dhe avokati nga Uashingtoni Vernon Jordan, zhvilluan seanca me dyer të mbyllura. Senatit iu shfaqen vetëm disa pjesë të filmuara të këtyre dëshmive. Në fund, pesha e dëshmisë së tyre dështoi të bindë Senatin për të fajësuar zotin Clinton.

Çfarë duan demokratët?

Hetimi i Dhomës së Përfaqësuesve ndaj zotit Trump nisi pasi një informator i shërbimeve të zbulimit akuzoi presidentin Trump se i kishte bëri presion presidentit të Ukrainës për të hetuar kundërshtarin e tij politik, Joe Biden, djalin e tij Hunter Biden, si dhe mbi një teori të pabazuar në fakte, se Ukraina kishte ndërhyrë në zgjedhjet presidenciale amerikane.

Ndërsa më shumë se një 12 persona dëshmuan gjatë hetimit, zoti Trump ndaloi zyrtarë të tjerë të rangut të lartë që të dëshmonin apo t’i dorëzonin dokumente Kongresit. Sipas demokratëve zyrtarët që nuk u lejuan të dëshmojnë kishin informacion të dorës së parë mbi atë që ndodhi.

Në një letër drejtuar zotit McConnell javën e kaluar, udhëheqësi i pakicës në Senat Chuck Schumer foli për 4 zyrtarë kyç që duhet të dëshmojnë, përfshirë shefin në detyrë të kabinetit në Shtëpinë e Bardhë Mick Mulvaney si dhe ish-Këshilltarit e Sigurisë Kombëtare John Bolton. Përveç kësaj, ai kërkoi dhe dokumente që sipas tij hedhin dritë mbi presionin e supozuar që zoti Trump ushtroi ndaj Kievit që të nisë hetimet, si dhe rreth ndalimit të përkohshëm nga administrata të një ndihme ushtarake të nevojshme për Ukrainën.

Çfarë duan republikanët?

Republikanët thonë se ata dëshirojnë të ndjekin modelin Clinton, të hapin procedurat në janar dhe ta marrin vendimin nëse do të thërrasin dëshmitarët kur gjyqi të jetë duke u zhvilluar.

“Ajo që ishte e mjaftueshme për Presidentin Clinton është e tillë edhe për Presidentin Trump”, tha zoti McConnell në programin televiziv “Fox & Friends” të së hënës.

Ai këmbënguli se “nuk është përjashtuar thirrja e dëshmitarëve”. Por zoti McConnell nuk dha ndonjë shenjë nëse ishte është dakort me thirrjen e katër dëshmitarëve të kërkuar nga demokratët.

Çfarë kërkon Presidenti Trump?

Pasi ishte fillimisht në favor të një gjyqi të shpejtë, Presidenti Trump duket se ka ndryshuar kursin duke mbështetur tashmë një procedurë më të plotë që do ta shfajësonte atë plotësisht.

Presidenti Trump kishte përmendur më parë mundësinë e thirrjes së zonjës Pelosi, të kryetarit të Komisionit të Zbulimit të Dhomës së Përfaqësuesve Adam Schiff, të Joe Biden dhe djalit të tij Hunter, si dhe shumë personave të tjerë për të dëshmuar, ndërkohë që i akuzonte demokratët se po kërkonin me ngulm dëshmitarë që do të forconin çështjen e tyre të dobët ligjore, sipas tij.

“E vetmja mënyrë për ta bërë këtë që të funksionojë është të krijohet një lloj presioni publik për të kërkuar thirrjen e dëshmitarëve, por McConnell i ka votat dhe mund ta drejtojë këtë gjyq si të dëshirojë”, shkruante Presidenti Trump në Twitter të martën.

Çfarë domethënieje ka e gjithë kjo për gjyqin?

Derisa t’i dorëzohen akuzat, Senati nuk mund ta nisë gjyqin, duke i lënë kështu procedurat në një rreth vicioz. Zoti McConnell gjendet nën një presion në rritje për të arritur një marrëveshje, qoftë edhe vetëm për të mbrojtur besueshmërinë institucionale të Senatit. Por duke patur parasysh ndasitë e tanishme partiake, janë të pakta prishmëritë që senatorët të bien dakort për një kuadër rregullash të ngjashme me ato të gjyqit për Presidentin Clinton.

“Problemi është se këtë radhë, republikanët në veçanti janë shumë shumë më të zhurmshëm sesa ishin demokratët kur mbronin Presidentin Clinton”, thotë Jeffrey Tulis, profesor i shkencave politike në Universitetin e Teksasit në Austin.

Sa do të zgjasë gjyqi?

Një marrëveshje që mund të arrihej për dëshmitarët është ajo që përcakton kohëzgjatjen e gjyqit.

미국 역사상 탄핵 심판을 받거나 받게 된 3명의 대통령. 왼쪽부터 앤드류 존슨, 빌 클린턴, 도널드 트럼프 대통령.

Si krahasim mund të përmendim gjyqin e vitit 1868 ndaj Presidentit Andrew Johnson që zgjati rreth 80 ditë, ndërsa ai ndaj Presidentit Clinton zgjati pak më shumë se një muaj. Zoti McConnell ka thënë se shpreson që gjyqi të mos zgjasë shumë.

Atmosfera e festave në kopshtin botanik

Atmosfera e Krishtlindjes është pasqyruar përsëri në kopshtin botanik në kryeqytetin amerikan. Ekspozita e këtij viti nxjerr në pah bukurinë e kopshteve publike të Amerikës. Në këtë ekspozitë, mes të tjerash, mund të gjesh kopshte në miniaturë, shatërvanë dhe skulptura të ndërtuara nga materiale me bazë bimore. Korrespondetja e Zërit të Amerikës Deborah Block sjell nga afër kopshtet e larmishme dhe trenat lodra që gjarpërojnë mes peisazheve në miniaturë.

Thomas, treni personazh i librave për fëmijë, tërheq vëmendjen e vizitorëve si Patricia Kim.

“Trenat duhen parë sepse janë diçka magjike dhe speciale për fëmijët”, thotë zonja Kim.

Në ekspozitë mund të gjesh që nga parajsat tropikale, deri tek peisazhet e shkretëtirës. Tingujt e këmbanave kanë influencuar në emërtimin e “Kullës Këngëtare” në Florida. Në këtë “Piramidë Shkencore” në kopshtin e Denverit, vizitorët mund të mësojnë për bimët. Ato janë ndërtuar me mbi 70 lloje të ndryshme bimësh, thotë Nick Nelson i kopshtit botanik.

“Në disa raste përdoren gjethe ose lëvore pemësh për muret dhe pastaj shkopinj të ndryshëm dhe boçe lisi për zbukurime përreth dritareve dhe dyerve”, thotë ai.

Për Fabian Winkler-in, kjo është hera e parë që viziton panairin.

“Jam i befasuar nga gjitha këto ndërtime me bazë bimore dhe se si të gjitha kopshtet botanike nga mbarë vendi kontribuojnë për këtë ekspozitë. Është vërtet shumë bukur”, thotë ai.

Elementi më i ri i panairit është kjo shtëpi në miniaturë e huazuar nga “Biltmore Estate” në Karolinën e Veriut. Kjo shtëpi me kopshte u ndërtua në fund të viteve 1800 dhe sot tërheq shumë turistë.

“Është prona më e madhe e ndërtuar ndonjëherë në Amerikë, por edhe një model shumë mbresëlënës që mori mbi 2500 orë pune për ta ndërtuar”, thotë Nick Nelson.

Në mes të panairit gjendet edhe pema e Krishtlindjes tetë metra e lartë. Mijëra shkurre shumëngjyrëshe të njohura si lulja e Krishtlindjes, rrethojnë monumentet e kryeqytetit amerikan po ashtu të ndërtuara me materiale bimore.

“Kemi 13 monumente të ndryshme nga kryeqyteti amerikan. Kemi përshembull ndërtesën e Kongresit, monumentin e Uashingtonit, Shtëpinë e Bardhë dhe Librarinë e Kongresit”, thotë arkitekti Nick Nelson.

Vizitorja Patricia Kim u mahnit nga imagjinata pas ekspozitës në miniaturë.

“Mesazhi kryesor është se gjithçka është organike dhe e bërë nga diçka botanike. Gjithka është e gjallë dhe i jep një kuptim të ri shprehjes se fryma e Krishtlindjes është e gjallë”, thotë ajo.

Kjo frymë është e gjallë për të gjithë gjatë sezonit të festave.

Trumpi nënshkruan ligjin për krijimin e Forcës Hapësinore

Presidenti amerikan Donald Trump nënshkroi projektligjin për buxhetin, i cili përfshinë edhe krijimin e Forcës Hapësinore dhe dhënien e 12 javëve pushim me pagesë për punonjësit federal me fëmijë të sapolindur. Senati i kontrolluar nga republikanët miratoi buxhetin e mbrojtjes prej 738 miliardë dollarësh të martën, pasi Dhoma e Përfaqësuesve e kontrolluar nga demokratët e votoi atë javën e kaluar. Kjo javë ka qenë një nga javët më të mira dhe më të këqija të presidencës së Donald Trump-it.

Më e keqja ishte miratimi nga Dhoma e Përfaqësuesve i dy akuzave kundër Presidentit Trump pas një procesi hetimor për shkarkimin e tij, duke e bërë atë Presidentin e tretë amerikan ndaj të cilit Kongresi ka ngritur akuza.

Momenti më i mirë i tij ishte nënshkrimi i legjislacionit për krijimin e një dege të re ushtarake amerikane, atë të Forcës Hapësinore, për të mbrojtur interesat e Shteteve të Bashkuara në hapësirë, veçanërisht satelitët që përdoren për navigim dhe komunikim.

“Kemi një lajm të mirë për ju. Në emër të zonjës së parë, nënpresidentit Mike Pence, Zonjës Pence, ju urojmë të gjithëve një Krishtëlindje shumë të gëzuar dhe Vit të Ri të lumtur. Kjo është një ditë me të vërtetë historike për forcat e armatosura amerikane. Pas disa minutave, unë do të nënshkruaj me krenari investimin më të madh ndonjëherë në ushtrinë e Shteteve të Bashkuara. Në fakt, mund të them edhe më të madhin deri më tani. Sot shënohet edhe një arritje tjetër e madhe, krijimi i një dege të re të ushtrisë sonë. Është një moment shumë i madh dhe i rëndësishëm. Quhet Forca Hapësinore”.

Forca Hapësinore është dega e parë e re ushtarake që kur Presidenti Harry Truman krijoi Forcën Ajrore mbi 70 vjet më parë dhe për herë të parë në historinë amerikane, dy milionë punonjës federalë do të kenë të drejtë të marrin 12 javë pushim me pagesë nëse bëhen prindër të rinj. zëri i amerikës

Presidenti Trump në qendër të debatit të kandidatëve demokratë

Shtatë kandidatët kryesor demokrat për zgjedhjet presidenciale amerikane, u përfshinë në një debat të nxehtë të enjten mbrëma, duke e cilësuar presidentin Donald Trump, si udhëheqësin më të korruptuar në historinë e vendit.

Të gjithë sfiduesit që synojnë kandidaturën demokrate për t’u përballur me presidentin Trump në zgjedhjet e vitit të ardhshëm, thanë se e mbështesin miratimin e akuzave ndaj tij nga Dhoma e Përfaqësuesve, për shpërdorim të pushtetit dhe pengim të Kongresit.

“Ne duhet të përtërijmë integritetin e presidencës”, tha ish nënpresidenti Joe Biden, i cili edhe më tej kryeson në anketat kombëtare për të qenë kandidat i demokratëve. Më vonë, zoti Biden, duke komentuar ndarjen e mprehtë politike në mes të republikanëve dhe demokratëve që është thelluar në tre vitet e presidencës së zotit Trump, tha se refuzon “të pranojë pikëpamjet që ne kurrë nuk mund të bashkohemi përsëri”.

Senatori nga Vermonti, Bernie Sanders, që e përshkruan veten si demokrat socialist dhe i cili renditet i dyti pas zotit Biden në shumë anketa, e quajti presidentin Trump “një gënjeshtar patologjik” i cili “i ka shitur njerëzit punonjës të këtij vendi”.

Senatorja Elizabeth Warren nga Massachusetts e përshkroi presidentin Trump si “presidentin më të korruptuar të shekullit”.

“Presidenti nuk është mbreti i Amerikës”, tha senatorja Amy Klobuchar nga Minnesota. Ajo krahasoi veprimet e presidentit Trumpit për t’i kërkuar Ukrainës që të hetojë zotin Biden dhe të birin, me skandalin e korrupsionit politik Watergate të viteve të 70-ta, që çoi në dorëheqjen e presidentit Richard Nixon, pasi u përball me shkarkimin.

Pete Buttigieg, nga South Bend, Indiana, tha se presidenti Trump “e ka bërë të qartë se nuk do të ndalet para asgjëje për të ruajtur pushtetin”.

Gjatë tërë debatit që u mbajt në universitetin në Los Angeles, kandidatët përsëritën sulmet ndaj zotit Trump si president i dështuar. Në të rrallë ata sulmuan edhe njëri tjetrin.

Zoti Biden dhe zoti Sanders, debatuan ashpër për sigurimet shëndetësore. Senatori Sanders mbrojti fuqishëm propozimin e tij për një program të përgjithshëm të sigurimit shëndetësor të drejtuar nga qeveria, ndërsa ish nënpresidenti Biden vazhdoi të bëj thirrje për reforma më të matura që do të lejonin amerikanët të bashkohen me një plan qeveritar.

Debati i radhës do të mbahet më 14 janar të vitit 2020 në universitetin Drake në Des Moines./zëri i amerikës

Dhoma e Përfaqësuesve miraton akuzat për shkarkimin e Presidentit Trump

Dhoma e Përfaqësuesve e Kongresit amerikan miratoi të mërkurën në mbrëmje dy akuza për shkarkimin e presidentit Trump, hera e tretë në histori që një president i nënshtrohet procesit të shkarkimit në bazë të shkeljeve të parashikuara në Kushtetutë.

Votimi historik, i ndarë prerazi në vija partiake, ashtu siç është ndarë mbarë vendi për këtë çështje, e akuzon presidentin e 45 për abuzim të pushtetit të zyrës së tij, pasi i kërkoi një vendi të huaj të hetojë rivalin e tij politik për zgjedhjet presidenciale të vitit 2020. Akuza e dytë është për pengim të hetimeve të Kongresit për këtë çështje.

Gjyqi ndaj presidentit do të zhvillohet në Senat. Nëse Senati e shpall presidentin të pafajshëm, ashtu siç pritet të ndodhë, presidenti Trump do të hyjë në zgjedhjet e ardhshme presidenciale me barrën e një kandidati të akuzar nga Dhoma e Përfaqësuesve.

Gjyqi ndaj presidentit pritet të zhvillohet në muajin janar. Për shkarkimin e presidentit duhen dy-të-tretat e votave të Senatit prej 100 vendesh. Demokratët kanë shumicën në Dhomën e Përfaqësuesve, që miratoi ngritjen e akuzave, ndërsa Senatin e kontrollojnë republikanët, ku pak, ose asnjë republikan, pritet të votojë për shkarkimin e presidentit.

Gjatë ditës së mërkurë, ndërsa Dhoma e Përfaqësuesve debatonte rreth akuzave, presidenti Trump u shpreh përmes një postimi në Twitter se e gjitha kjo ishte “një gënjeshtër e shëmtuar e të majtës radikale, një sulm ndaj Amerikës dhe një sulm ndaj Partisë Republikane”.

Ligjvënësit demokratë thonë se Presidenti Trump duhet larguar nga detyra pasi përdori ndihmën për Ukraninën për interesat e tij personale politike.

Demokrati Jerrold Nadler është Kryetar i Komisionit Juridik në Dhomën e Përfaqësuesve.

“Cili është rreziku nëse nuk veprojmë? Gjatë 94 ditëve që nga fillimi i hetimeve nga Dhoma e Përfaqësuesve dhe realisht gjatë tre viteve të shkuara, një e vërtetë e padiskutueshme ka dalë: nëse nuk reagojmë ndaj abuzimit të pushtetit nga Presidenti Trump, abuzimi do të vazhdojë. Nuk mund të mbështetemi tek zgjedhjet për të zgjidhur problemin tonë kur Presidenti Trump kërcënon vetë integritetin e zgjedhjeve”, tha ai.

Nga ana tjetër, republikanët argumentojnë se telefonata e presidentit me homologun ukrainas Volodymyr Zelenskiy ishte përpjekje për të trajtuar korrupsionin në Ukraninë dhe jo për avantazhe politike në Amerikë. Ata këmbëngulin se demokratët gjatë gjithë kohës kishin në mendje shkarkimin e zotit Trump.

Debbie Lesko është ligjvënëse republikane.

“Ata paracaktuan se do ta bënin dhe e bënë pavarësisht çdo gjëje. Ata nuk kishin asnjë provë, asnjë fakt por gjithsesi vepruan në të tyren. Ata po e coptojnë këtë vend”, tha ajo.

Historikisht proceset për shkarkimin e presidentit e kanë përçarë vendin. Ndërsa pothuajse gjysma e vendit mbështet procesin ndaj zotit Trump, demokratët argumentojnë se opinioni publik është në anën e tyre.

Nancy Pelosi është kryetare e Dhomës së Përfaqësuesve.

“Publiku mendon se ata duhet të vendosin se kush është president i Shteteve të Bashkuara dhe jo ndonjë fuqi e huaj. Ata mendojnë se askush nuk është mbi ligjin dhe ne mendojmë kështu. Presidenti duhet të mbahet përgjegjës për abuzim pushteti dhe pengim të Kongresit”, tha ajo.

Edhe pse gjyqi në Senatin e kontrolluar nga republikanët pritet ta shfajësojë zotin Trump, duke e mbajtur atë në detyrë, republikanët thonë se procesi i shkarkimit do të ketë pasoja mbarëbotërore për diplomacinë amerikane.

Kevin McCarthy është udhëheqës i pakicës republikane në Dhomën e Përfaqësuesve.

“Presidentit iu desh të publikonte për mbarë botën përmbajtjen e telefonatës. Kjo e ka dobësuar zyrën e presidentit, për këdo që vjen më pas. Cili udhëheqës botëror do të ndajë me presidentin amerikan qëndrime të vërteta dhe mirëkuptim dhe të mos frikësohet se biseda e tyre telefonike do të publikohet për tërë botën?”, tha ai.

Procesi i shkarkimit të presidentit është një moment i rrallë në historinë politike të Shteteve të Bashkuara. zëri i amerikës

Këtë javë, votimi historik mbi akuzat për shkarkimin e Presidentit

Arash Arabasadi

Dhoma e Përfaqësuesve pritet të votojë këtë javë për miratimin e dy akuzave për shkarkimin e mundshëm të Presidentit Donald Trump, të rekomanduara nga Komisioni Juridik. Ka gjasa që Donald Trumpi të bëhet presidenti i tretë në historinë amerikane ndaj të cilit Kongresi ngre zyrtarisht akuza për shkarkim. Demokratët e kanë akuzuar atë për shpërdorim pushteti, duke i kërkuar Ukrainës të hetojë një nga rivalët e tij kryesorë demokratë për zgjedhjet e vitit 2020. Zoti Trump dhe përkrahësit e tij, këmbëngulin se ai nuk ka bërë asgjë të gabuar.

Dhoma e Përfaqësuesve pritet që të mbajë një votim historik këtë javë, duke ngritur zyrtarisht akuzat që mund të çojnë në shkarkimin e një presidentit. Është vetëm hera e tretë e në historinë amerikane që ndodh një gjë e tillë..

“Votojmë tani për akuzën e parë në rezolutën për shkarkimin e Presidentit Donald J. Trump për abuzim të pushtetit”, tha kryetari demokrat i Komisionit Juridik të Dhomës së Përfaqësuesve, Jerry Nadler në seancën e këtij komisioni.

Komisioni Juridik miratoi dy akuza: pengim i Kongresit dhe abuzim i pushtetit në dy votime që ndoqën vijën partiake, pas seancave të ashpra në ditët e mëparshme.

“Do të vijë një ditë që shumica do të kthehet në pakicë. Dhe do të ngrenë zërin për të drejtat e pakicave. Dhe unë do t’u kujtoj 2019-ën si vitin kur ata goditën të drejtat e pakicës”, tha nënkryetari republikan i komisionit, Doug Collins.

“Akuza të mjegullta për abuzim me pushtetin, pengim të Kongresit… Këto i ka bërë vetë shumica duke mos na lejuar të sjellim dëshmitarë që mund të hedhin dritë mbi akuzat”, tha kongresmeni republikan, Louie Gohmert.

“Jepini lamtumirën shumicës. Dhe ju ftojmë të merrni pjesë në inaugurimin e dytë të Presidentit Trump, në janar 2021”, tha Ken Buck, anëtar republikan i Kongresit.

Të dielën në mëngjes, në prag të votimeve në seancat e Dhomës së Përfaqësuesve, kryetari Jerry Nadler e mbrojti votimin e Komisionit Juridik.

“Ky president bëri konspiracion, kërkoi ndërhyrje të huaj në zgjedhjet e vitit2016. Ai po bën thirrje hapur për ndërhyrje në zgjedhjet e vitit 2020, dhe paraqet një kërcënim të vazhdueshëm për sigurinë tonë kombëtare … A kemi një demokraci kushtetuese apo kemi monarki ku presidenti nuk i jep llogari askujt?”

Nëse anëtarët e Kongresit, votojnë siç është e pritshme pro ngritjes së akuzave, dhe ia kalojnë çështjen senatit të kontrolluar nga republikanët, anëtarë si Ted Cruz do të shërbejnë si anëtarë jurie të një procesi gjyqësor.

“I pamë akuzat për shkarkim të Dhomës së Përfaqësuesve dhe gjithë argumentat e tyre, ranë poshtë. Mendoj se ky është fillimi i fundit për këtë spektakël që po shohim në Dhomën e Përfaqësuesve. Do të kemi një proces të drejtë që nuk do të çojë asgjëkundi, sepse nuk ka fakte”, tha senatori republikan, Ted Cruz.

Dy senator me peshë thanë hapur javën e kaluar, pa i dëgjuar ende argumentat për shkarkim, se do të votojnë kundër, duke ngjallur dyshime nëse procesi i gjykimit do të jetë i drejtë.

Demokratët kërkojnë dëshminë e Boltonit në hetimet kundër Trumpit

Lideri i demokratëve në Senatin amerikan, Chuck Schumer ka propozuar marrjen e dëshmive nga katër ndihmës dhe ish-ndihmës të Shtëpisë së Bardhë, në kuadër të hetimeve për shkarkim të presidentit të Shteteve të Bashkuara, Donald Trump.

Schumer i ka kërkuar udhëheqësit të republikanëve, Mitch McConnell, që në këtë proces të marrin pjesë, ish-Këshilltari për Siguri Kombëtare, John Bolton, ushtruesi i detyrës së shefit të stafit në Shtëpinë e Bardhë, Mick Mulvaney, ndihmësi i tij, Robert Blair, dhe zyrtari për buxhet, Michael Duffey.

Në një letër nisur republikanit McConnell, ligjvënësi demokrat ka bërë thirrje për proces gjyqësor “të drejtë dhe të sinqertë”, që sipas tij do të mund të fillonte më 7 janar.

Presidenti Trump përballet me akuza për abuzim të pushtetit dhe pengim të punës së Kongresit, në përpjekjet e tij për të shtyrë Ukrainën që të hetojë rivalët e tij politikë, duke përfshirë ish-nën presidentin amerikan, Joe Biden, duke kushtëzuar këtë gjë me ndihmën ushtarake në vlerë të 391 milionë dollarëve për aleatin e Evropës Lindore.

Dhoma e Përfaqësuesve, që drejtohet nga demokratët, pritet të votojë këtë javë për dy artikujt rreth hetimeve për shkarkim, të cilat më pas do ta bartin procesin në Senat për gjykim, nën udhëheqjen e Shefit për Drejtësi, John Roberts.

Trump pritet të lirohet nga akuzat nga republikanët në Senat, derisa McConnel ka dhënë shenja se procesi gjyqësor do të zhvillohet me shpejtësi.

Hetimet kanë nisur pas zbulimit të një bisede të 25 korrikut në mes të presidentit Trump dhe presidentit të Ukrainës, Volodymyr Zelenskiy.

Informatori është ankuar duke pretenduar se Trump “ka përdorur pozitën e tij për të kërkuar ndihmë nga një shtet i huaj”, në prag të procesit zgjedhor për një mandat tjetër presidencial.

Trump e ka konsideruar hetimin për shkarkim si “mashtrim” mirëpo e ka pranuar se “i ka vështirësuar punën”.

Sipas Kushtetutës amerikane, Dhoma e Përfaqësuesve ka fuqi për të shkarkuar presidentin për “shkelje të rënda dhe keqbërje”.

Kjo është hera e katërt në historinë amerikane që ka nisur një procedurë për shkarkim të presidentit, ndonëse asnjëri prej presidentëve nuk është larguar nga pozita përmes këtij procesi. rel

Senati miratoi rezolutën për gjenocidin armen

Senati amerikan miratoi njëzëri një rezolutë që i cilëson si gjenocid vrasjet masive të armenëve një shekull më parë, një veprim që zemëroi Turqinë dhe u dha një goditje marrëdhënieve tashmë problematike midis Ankarasë dhe Washingtonit.

Rezoluta e përkujton si gjenocid vrasjen e 1.5 milion armenëve nga Perandoria Osmane nga viti 1915 deri në vitin 1923.

Turqia dënoi rezolutën që u miratua një muaj pas vizitës zyrtare në Shtëpinë e Bardhë të presidentit turk Recep Tayyip Erdogan, i cili gëzon një marrëdhënie të veçantë me presidentin Donald Trump, me gjithë problemet e shtuara që kanë dëmtuar marrëdhëniet midis dy aleatëve të NATO-s.

Presidenti Trump e kishte cilësuar takimin e tij më 13 nëntor me presidentin Erdogan si “të mrekullueshëm”, pavarësisht se nuk ishte shënuar ndonjë përparim konkret rreth mosmarrëveshjeve të thella siç është blerja e sistemeve të armëve ruse nga Ankaraja dhe pikëpamjet e ndryshme rreth Sirisë.

Dhoma e Përfaqësuesve e udhëhequr nga demokratët, e kishte miratuar rezolutën me një shumicë dërrmuese në tetor. Por votimi në Senat u bllokua në mënyrë të përsëritur nga senatorët republikanë të presidentit Trump që nga takimi me presidentin turk.

“Ky është një nderim për kujtimin e 1.5 milion viktimave të genocidit të parë të shekullit të 20-të dhe hap i guximshëm në promovimin e agjendës së parandalimit. Kurrë më”, shkroi kryeministri i Armenisë, Nikol Pashinyan.

Turqia pranon që shumë armenë që jetonin në Perandorinë Osmane u vranë në përleshje me forcat osmane gjatë Luftës së Parë Botërore, por kundërshton shifrat dhe mohon që vrasjet ishin orkestruar në mënyrë sistematike dhe paraqesin gjenocid.

Ministri i jashtëm turk, Mevlut Cavusoglu, e quajti vendimin një “shfaqje politike” ndërsa zëdhënësi i presidentit, Ibrahim Kalin, tha se Ankaraja e dënon me forcë dhe e kundërshton atë. Rezoluta nuk është detyruese.

“Historia do t’i shënojë këto rezoluta si veprime të papërgjegjshme dhe joracionale nga disa anëtarë të Kongresit amerikan kundër Turqisë,” tha Fahrettin Altun, drejtori i komunikimeve të Turqisë.

Punonjës të Kongresit thanë se Shtëpia e Bardhë nuk dëshiron që legjislacioni të ecë përpara ndërsa negocion me Ankaranë për çështje të ndjeshme. Sidoqoftë, që nga vizita në SHBA, presidenti Erdogan në mënyrë të përsëritur ka theksuar se Turqia nuk ka ndërmend të heqë dorë nga sistemin raketor i mbrojtjes ajrore ruse S-400, duke shuar shpresat për përparim. zëri i amerikës

Komiteti i Senatit amerikan miraton sanksionet ndaj Turqisë

Komiteti për Marrëdhënie me Jashtë i Senatit amerikan miratoi legjislacionin për vendosjen e sanksioneve ndaj Turqisë, pas ofensivës së saj në veri të Sirisë dhe blerjes së një sistemi raketash S-400 nga Rusia.

Kjo vlerësohet të jetë masa vendimtare, e cila mund ta shtyjë presidentin amerikan, Donald Trump, të mbajë një qëndrim më të ashpër kundër Ankarasë.

“Tani është koha që Senati të mblidhet dhe të shfrytëzojë këtë mundësi për të ndryshuar sjelljen e Turqisë”, tha senatori Jim Risch, kryesues i Komitetit për Marrëdhënie me Jashtë.

Një tjetër republikan, senatori Rand Paul, mbajti qëndrim kundër projektligjit. Ai tha se administrata Trump e ka kundërshtuar këtë masë, sepse kjo do të dobësonte fuqinë e presidentit (Trump) dhe mund ta vështirësojë negociimin me presidentin e Turqisë, Reccep Tayip Erdogan.

Shumë ligjvënës amerikanë – republikanë dhe demokratë – janë të zemëruar me Turqinë për shkak të blerjes së sistemit rus S-400, të cilin ata e shohin si një kërcënim për sistemet e NATO-s.

Ata janë gjithashtu të zemëruar për ofensivën e Turqisë kundër luftëtarëve kurdë në Siri, të cilët deri vonë po luftonin së bashku me forcat amerikane kundër militantëve të Shtetit Islamik.

Turqia ka thënë se votimi në senat nuk e ndalon atë të përdorë sistemin rus të mbrojtjes raketore. rel

Hetimet e FBI-së për Rusinë; dëshmon në Senat Inspektori i Përgjithshëm i Departamentit të Drejtësisë

Inspektori i Përgjithshëm i Departamentit të Drejtësisë po dëshmon sot përpara Komisionit të Ligjeve të Senatit rreth raportit të tij që nuk gjeti evidencë për anshmëri politike në fillimin e hetimeve nga FBI-ja për ndërhyrjen e Rusisë në zgjedhjet amerikane.

Michael Horowitz publikoi raportin e tij të hënën. Konkluzionet e tij hedhin poshtë pretendimin e përsëritur të Presidentit Donald Trump se hetimi i FBI-së ishte një gjueti shtrigash që synonte zhbërjen e presidencës së tij.

Presidenti Trump megjithatë u shpreh se raporti konfirmon se pati një “përpjekje për të rrëzuar” qeverinë, në një formë shumë më të keqe nga ç’e kishte menduar.

Presidenti kritikoi të martën Drejtorin e FBI-së Christopher Wray, i cili tha në një intervistë për kanalin ABC News se hetimi “u çel me parapërgatitjen dhe autorizimin e duhur”. Zoti Wray gjithashtu vuri në dukje se Inspektori i Përgjithshëm Horowitz konstatoi se FBI-ja bëri disa gabime gjatë hetimit.

“Nuk di se çfarë raporti ka qenë duke lexuar Drejtori aktual i FBI-së, Christopher Wray, por jam i sigurtë se nuk është raporti që kam marrë unë”, shkruajti Presidenti Trump në Twitter. “Me këtë lloj sjelljeje, ai nuk do t’ia arrijë kurrë ta ndreqë FBI-në, e cila është goditur keqazi, megjithëse aty punojnë disa prej burrave dhe grave më të shkëlqyera”.

Gjatë një interviste të transmetuar të martën me korrespondentin e NBC News, Pete Williams, Prokurori i Përgjithshëm William Barr përsëriti mendimin e tij se FBI-ja mund të ketë vepruar “me qëllim të keq” kur zhvilloi hetime nëse fushata Trump pati bashkëpunuar fshehtazi me Rusinë.

“Mendoj se vendi ynë u kthye me kokë poshtë për tre vite, bazuar në një version krejtësisht të rremë, i cili u fry dhe u nxit nga një shtyp krejtësisht i papërgjegjshëm”, tha zoti Barr. “Mendoj se pati abuzime të mëdha… dhe një sjellje të pashpjegueshme që nuk tolerohet në FBI”.

Komentet e Prokurorit të Përgjithshëm duket se do ta nxisin më tej debatin rreth pyetjes nëse ai vërtet po vepron në mirëbesim, apo si një mbështetës i Presidentit Trump.

Zoti Horowitz shprehet në raportin e tij se FBI-ja ishte e justifikuar në çeljen e hetimit në vitin 2016 për lidhjet e dyshuara mes anëtarëve të fushatës elektorale Trump dhe Rusisë. Raporti konkludon se zyrtarët patën evidencë të mjaftueshme për të autorizuar një hetim.

Shtëpia e Bardhë: Akuzat e demokratëve e forcojnë presidentin

Presidenti i SHBA Donald Trump do t’u përgjigjet akuzave të demokratëve për shkarkimin e tij, kur procedura të kalojë në fazën e gjykimit në Senat, ku republikanët kanë shumicën, njoftoi Shtëpia e Bardhë.

Reagimi vjen pas shpalljes të martën nga demokratët e Dhomës së Përfaqësuesve të dy akuzave: shpërdorim të pushtetit dhe pengim të Kongresit. Dhoma e Përfaqësuesve ka votuar vetëm tre herë në historinë e saj për shkarkimin e një presidenti amerikan.

Shtëpia e Bardhë ka zgjedhur të mos ngrejë argumente kundër akuzave në prag të hedhjes së tyre në votë në Dhomën e Përfaqësuesve, që pritet të bëhet së shpejti.

“Presidenti do t’u përgjigjet këto akuza të rreme në Senat dhe pret që ai ta nxjerrë plotësisht të pafajshëm, sepse nuk ka bërë asgjë të gabuar, tha sekretarja e shtypit e Shtëpisë së Bardhë, Stephanie Grisham në një deklaratë.

Deklarata nuk sqaron se si do t’u përgjigjet akuzave Presidenti. E pyetur në një intervistë për Fox News nëse zoti Trump do të donte të dëshmonte në Senat, zonja Grisham tha se nuk ishte në dijeni.

“Unë nuk dua t’i paraprij asaj që ai mund të bëjë por jam e sigurt se ne do të marrim pjesë në një farë mënyre, sigurisht me këshilltarin tonë,” tha ajo. “Gjithashtu do të sjellim dëshmitarët tanë, që ne shpresojmë se ata do të marrin pjesë”.

Aparati politik i Shtëpisë së Bardhë dhe i Presidentit Trump, që përfshijnë fushatën e tij të rizgjedhjes dhe Komitetin Kombëtar Republikan, kanë zgjedhur të sulmojnë procesin e shkarkimit në vend që të debatojnë faktet e paraqitura nga demokratët.

Presidenti Trump dhe aleatët e tij e kanë quajtur procesin partiak, duke thënë se atij i mungon paanshmëria. Ata i përshkruajnë akuzuesit demokratë të Presidentit si njerëz që përpiqen të zhbëjnë zgjedhjen e tij në vitin 2016.

Akuzat e ngritura nga Dhoma i Përfaqësuesve të martën i japin fund disa javëve hetime dhe seanca dëgjimore, të cilat Presidenti Trump i ka cilësuar të njëanshme. Ai thotë se seancat nuk i kanë dhënë atij asnjë mundësi për të paraqitur pikëpamjen e tij.

Shtëpia e Bardhë nuk ka pranuar kërkesat e përsëritura që zyrtarët e saj të lartë të dëshmojnë në Kongres apo që të dorëzojnë dokumente në komisionet e Dhomës së Përfaqësuesve, ku demokratët kanë shumicën.

Dhoma e Përfaqësuesve është pothuajse e sigurtë se procesi i shkarkimit do të marrë miratimin e saj, që nuk mund të ndodhë përveçse në linja partiake. Më pas, në muajin janar Senati, i kontrolluar nga republikanët do të zhvillojë gjykimin. Asnjë republikan në asnjërën prej dhomave të Kongresit nuk është shprehur pro shkarkimit të Presidentit Trump.

Zoti Trump dhe aleatët e janë përpjekur ta përshkruajnë krejt procesin si në fakt një fitore për presidentin, duke argumentuar se orvatjet e demokratëve ka bërë që mbështetja e përkrahësve të të forcohet akoma më shumë.

“Shpallja e dy akuzave të pabaza për shkarkimin e presidentit Trump nuk e dëmton atë, por dëmton popullin amerikan, i cili pret që zyrtarët e zgjedhur prej tij të punojnë për të forcuar vendin,” tha zonja Grisham në deklaratë.

ASHPËRSOHET BETEJA POLITIKE

Votimi në Dhomën e Përfaqësuesve pritet para Krishtlindjeve. Presidenti Trump reagoi në Twitter duke e quajtur procesin kundër tij një “çmenduri të pastër politike.”

Shpallja e akuzave shënon një hap të ri drejt votimit historik që pritet të ndërmarrë Dhoma e Përfaqësuesve ku demokratët kanë shumicën. Ata e akuzojnë presidentin se ka korruptuar procesin e zgjedhjeve dhe ka vënë në rrezik sigurinë kombëtare.

Kryetarja e Dhomës, Nancy Pelosi, e shoqëruar nga kryetarët e komisioneve që kanë organizuar hetimet kundër presidentit, e quajti hapin e sotëm “një akt solemn”.

Akuzat i shpalli kryetari i komisionit të ligjeve, demokrati Jerrod Nadler.

“Ai rrezikon demokracinë tonë, rrezikon sigurinë tonë kombëtare. Zgjedhjet tona të rradhës janë në rrezik. Kjo është arsyeja pse ne duhet të veprojmë tani”, tha zoti Nadler.

From left House Speaker Nancy Pelosi, Chairwoman of the House Financial Services Committee Maxine Waters, D-Calif., Chairman of the House Foreign Affairs Committee Eliot Engel, D-N.Y., House Judiciary Committee Chairman Jerrold Nadler, D-N.Y., Chairwoman

Akuzat e shpallura të martën burojnë nga presioni që demokratët thonë se presidenti Trump i bëri Ukrainës që ajo të ndërmerrte hetime kundër rivalit të tij politik, ndërkohë që pezulloi ndihmën ushtarake për Kievin.

Por, republikanët thonë se demokratët nuk kanë asnjë bazë.

“Nuk kemi krim, nuk kemi asgjë dhe askush nuk po kupton se çfarë po përpiqet të bëjë maxhoranca. Përveçse të ndërhyjë për t’u siguruar që Presidenti të mos fitojë vitin e ardhshëm pasi ndaj tij janë ngritur akuza”, thotë ligjvënësi republikan Doug Collins.

Presidenti Trump publikoi një koment në Twitter përpara njoftimit ku thoshte se të përpiqesh të shkarkosh një president me arritje si të tijat është “çmenduri e pastër politike.”

Dhoma e Përfaqësuesve ka votuar vetëm tre herë në historinë e saj për shkarkimin e një presidenti amerikan.

Votimi në Komisionin e Ligjeve pritet brenda pak ditëve, ndërsa para Krishtlindjeve do të hidhet në votë në të gjithë Dhomën e Përfaqësuesve.

SHBA do të dërgojnë 20 000 trupa në Evropë

Shtetet e Bashkuara do të dërgojnë 20 000 trupa në Evropë në muajt prill dhe maj për manovra ushtrake. Këto do të jenë manovrat më të mëdha ushtarake në tokën evropiane që nga Lufta e Ftohtë dhe nënvizojnë angazhimin e Uashingtonit ndaj NATO-s. Njoftimi u bë të martën nga një komandant i lartë i NATO-s dhe vjen pak ditë pas një samiti të Aleancës në Londër.

Ushtria e Shteteve të Bashkuara synon të pengojë Rusinë nga një përsëritje e aneksimit të gradishullit ukrainas të Krimesë në vitin 2014. SHBA do të provojnë aftësinë për të transportuar trupat e tyre përtej Atlantikut, në Belgjikë dhe Hollandë dhe pastaj për t’i lëvizur me shpejtësi drejt Lindjes përmes Gjermanisë në Poloni dhe përgjatë krahut lindor të NATO-s. Pas manovrave, trupat do të kthehen në Shtetet e Bashkuara.

NATO-ja ka dërguar tashmë batalione në Balltik dhe Poloni për të parandaluar inkursione të mundshme ruse, por tani synon të jetë në gjendje të mbështesë çdo operacion ushtarak. Qeveritë evropiane janë gjithashtu duke shpenzuar më shumë për t’i mbajtur në gatishmëri forcat e tyre ushtarake.

Rusia thotë se nuk ka ndërmend të sulmojë NATO-n dhe akuzon aleancën për destabilizimin e Evropës. zëri i amerikës

Demokratët shpallin akuzat për shkarkimin e presidentit

Nga njoftimi i krerëve të komisioneve të Dhomës së Përfaqësuesve

Në SHBA, demokratët e Dhomës së Përfaqësuesve shpallën të martën dy akuza në procesin e ndërmarrë prej tyre për shkarkimin e Presidentit Donald Trump: shpërdorim të pushtetit dhe pengim të Kongresit. Votimi në Dhomën e Përfaqësuesve pritet para Krishtlindjeve. Presidenti Trump reagoi në Twitter duke e quajtur procesin kundër tij një “çmenduri të pastër politike.”

Kryetarja e Dhomës, Nancy Pelosi, e shoqëruar nga kryetarët e komisioneve që kanë organizuar hetimet kundër presidentit, e quajti hapin e sotëm “një akt solemn”.

Akuzat i shpalli kryetari i komisionit të ligjeve, demokrati Jerrod Nadler.

“Ai rrezikon demokracinë tonë, rrezikon sigurinë tonë kombëtare. Zgjedhjet tona të rradhës janë në rrezik. Kjo është arsyeja pse ne duhet të veprojmë tani”, tha zoti Nadler.

Por, republikanët thonë se demokratët nuk kanë asnjë bazë.

Presidenti Trump publikoi një koment në Twitter përpara njoftimit ku thoshte se të përpiqesh të shkarkosh një president me arritje si të tijat është “çmenduri e pastër politike.”

Dhoma e Përfaqësuesve ka votuar vetëm tre herë në historinë e saj për shkarkimin e një presidenti amerikan.

Votimi në Komisionin e Ligjeve pritet brenda pak ditëve, ndërsa para Krishtlindjeve do të hidhet në votë në të gjithë Dhomën e Përfaqësuesve. zëri i amerikës

Demokratët përpilojnë akuzat ndaj Presidentit Trump

Komisioni i Ligjeve i Dhomës së Përfaqësuesve organizon një tjetër dëgjesë sot në kuadrin e hetimeve me qëllim shkarkimin e Presidentit Donald Trump. Hetimet janë zhvilluar rreth akuzave se presidenti abuzoi me pushtetin duke i bërë presion Ukrainës të njoftonte çeljen e hetimeve për rivalin e tij politik Joe Biden, kandidatin kryesor demokrat. Siç njofton korrespondenti i Zërit të Amerikës, Arash Arabasadi, tensionet partiake në Uashington pritet të intensifikohen më tej.

Ajo që filloi si një mision faktmbledhës u përshkallëzua me njoftimin e Kryetares së Dhomës së Përfaqësuesve.

“Me hidhërim, por me besim dhe përulësi, me besnikëri ndaj etërve tanë, dhe me një zemër plot dashuri për Amerikën, sot do kërkoj fillimin e hartimit të akuzave për shkarkimin”, deklaroi Nancy Pelosi, Kryetarja e Dhomës së Përfaqësuesve.

Dëgjesat më të fundit janë zhvilluar në Komisionin e Ligjeve.

“Secili nga ne është betuar të mbrojë Kushtetutën dhe faktet përpara nesh janë të qarta. Presidenti Trump nuk kërkoi thjesht të përfitonte nga ndërhyrja e huaj në zgjedhjet tona, por ai e ftoi në mënyrë të drejtpërdrejtë dhe të hapur këtë ndërhyrje të huaj në zgjedhjet tona”, tha Jerry Nadler, Kryetar i Komisionit të Ligjeve të Dhomës së Përfaqësuesve.

Presidenti Trump i ka kritikuar ashpër këto procese dhe aleatët e tij republikanë thonë se hetimi është i motivuar politikisht.

“Kryetari citoi shumë nga themeluesit dhe se prandaj po e zhvillojmë këtë dëgjesë, pasi themeluesit ishin të shqetësuar për influencën e huaj. Por, ai nuk citoi se themeluesit ishin gjithashtu vërtet të shqetësuar për procesin politik të shkarkimit vetëm pse nuk na pëlqen personi”, tha Ligjvënësi republikan Doug Collins.

Shtëpia e Bardhë ka urdhëruar anëtarët e kabinetit qeveritar, me njohuri të drejtpërdrejtë të telefonatës gjatë së cilës Presidenti Trump i kërkonte favore Presidentit të Ukrainës, të injorojnë fletëthirrjet e Kongresit.

“Presidenti i ka ndalur me të padrejtë këta dëshmitarë. Ideja se ekziston imuniteti absolut është absurde. Kjo nuk bazohet askund në ligje apo në Kushtetutë. Është një kërcënim i vazhdueshëm për sigurinë kombëtare dhe është abuzim me pushtetin”, tha Ligjvënësja demokrate Zoe Lofgren.

Republikanët thonë se nëse detyrohen të dëshmojnë anëtarët e kabinetit qeveritar, kjo do të vendoste një precedent të rrezikshëm.

“Nëse në të ardhmen të gjithë do të ngurrojnë t’i japin mendim presidentit për sfidën e radhës, pasi fjalët e tyre do të merren dhe t’i lexohen Kongresit dhe publikut fjalë për fjalë, atëherë kjo mund të dëmtojë kreativitetin dhe mendimin novator që dëshirojmë të shohim tek dega ekzekutive”, tha Ligjvënësi republikan Matt Gaetz.

Dëgjesa e sotshme e Komisionit të Ligjeve të Dhomës së Përfaqësuesve do të rishqyrtojë evidencën kundër Presidentit Trump. Kryetari Nadler është shprehur se akuzat e përgatitura ndaj Presidentit Trump mund të bëhen gati për t’u votuar që nga fundi i kësaj jave.

Nadler: Ekziston një “çështje e fortë” kundër Presidentit Trump

Udhëheqësi i komisionit të Dhomës së Përfaqësuesve që po shqyrton listën e akuzat kundër Presidentit Donald Trump argumentoi se ekziston një “çështje e fortë” kundër udhëheqësit amerikan.

Kongresmeni Jerrold Nadler deklaroi në CNN se Presidenti Trump do të shpallej fajtor në “tri minuta” nëse ai do të ndeshej me këto akuza para një jurie të gjykatës penale se abuzoi me postin e tij duke i kërkuar Ukrainën për të hetuar një nga kundërshtarët e tij kryesorë të demokratëve në zgjedhjet e vitit 2020, ish-nënpresidentin Joe Biden.

Zoti Nadler tha se nëse Presidenti Trump “kishte ndonjë provë shfajësuese”, do ta kishte bërë të ditur, sesa të refuzonte pjesëmarrjen, siç ka bërë Shtëpia e Bardhë, përpara se Komisioni Juridik i Dhomës së Përfaqësuesve kontrolluar nga demokratët të shqyrtonte akuzat për shkarkimin nga detyra të presidentit republikan.

Zoti Nadler tha se paneli juridik, pas një seance dëgjimore të hënën mbi provat e mbledhura tashmë nga Komisioni i Inteligjencës së Dhomës së Përfaqësuesve për ndërveprimet mes Presidentit Trump dhe ndihmësve të tij për Ukrainën, mund të votojë mbi listën e akuzave deri në fund të javës. Më pas, një votë e plotë e Dhomës së Përfaqësuesve mund të jetë në rrugën e duhur për të fajësuar Trump përpara se të fillojnë pushimet për festat e Krishtlindjeve në dy javë, duke hapur rrugën për një gjykim në Senatin me shumicë republikane në janar, megjithëse dënimi dhe shkarkimi i Presidentit Trump mbetet i pamundur.

Por zoti Nadler nuk pranoi të spekulojë se sa akuza do të sillen kundër Presidentit Trump dhe përmbajtjen e tyre. zëri i amerikës

SHBA: Sajmir Alimehmeti dënohet me 22 vjet heqje lirie për mbështetje të terrorizimit

Një gjykatë në New York, dënoi me 22 vjet heqje lirie një shqiptar me vendbanim në Bronx, që synonte të bëhej pjesë e grupit ekstremist Shteti Islamik.

Sipas akuzës, që nga viti 2015, Sajmir Alimehmeti, i cili veten e quante “Dentisti”, kishte blerë thika dhe pajisje të tipit ushtarak.

“Ju jeni një bombë e kurdisur”, tha të premten gjykatësi federal i Manhatanit, Paul Engelmayer, derisa po publikonte vendimin për dënimin e tij nën akuzat për ofrim të mbështetjes materiale për ISIS-it dhe për mashtrim me pasaportë.

Alimehmeti, shtetas i natyralizuar amerikan ishte arrestuar në vitin 2016. Një agjent i fshehtë ishte takuar me Alimehmetin në banesën e tij në Bronx, ku ai kishte luajtur video, ku shihej një prej luftëtarëve të ISIS-it duke u prerë kokën të burgosurve.

Alimehmeti i kishte thënë agjentit të fshehtë se “ai dhe vëllai i tij kishin patur në plan për të udhëtuar nga Shqipëria në Raka të Sirisë, por i vëllai ishte arrestuar.”

Ai kishte qenë në vëmendje të autoriteteve të paktën që nga viti 2014, kur atij i ishte mohuar dy herë hyrja në Britani, prej nga synonte të udhëtonte për në Siri. Në vitin 2015 ai kishte aplikuar për një pasaportë të re amerikane, duke pretenduar se e kishte humbur të parën. Sipas FBI-së, ai mendonte se përdorimi i pasaportës së vjetër me vulat britanike të refuzimit do të ngjallte dyshime.

Në vitin 2018 ai kishte pranuar fajësinë, duke theksuar se ka gënjyer gjatë aplikimit për pasaportë si dhe për ofrim të mbështetjes materiale për ISIS-in. zëri i amerikës

Faqja 53 prej 134« Fillimi ‹ Prapa 49 50 51 525354 55 56 57 Para ›Fundi »

Përgatiti: Mimoza Sadiku

Lajmet me interesante

Lajmet e fundit

ARKIVA E LAJMEVE

RRETH NESH

NEWS LETTER

SOCIAL