Lëvizja Black Lives Matter, është vënë përsëri në qendër të vëmendjes, pas vdekjes së afrikano-amerikanit, George Floyd, kur polici i bardhë Derek Chauvin, e mbajti gjurin mbi qafën e tij për 8 minuta dhe 46 sekonda.
Black Lives Matter filloi në korrik të vitit 2013, kur George Zimmerman u shpall i pafajshëm pasi hapi zjarr duke shkaktuar vdekjen e 17 vjeçarit, Trayvon Martin, një adoleshent i paarmatosur afrikano-amerikan.
Martin u vra nga Zimmerman ndërsa po kthehej nga një dyqan në shtëpinë e të atit, në Sanford të Floridës. Zimmerman, një rojë vullnetar i vetëshpallur, telefonoi departamentin e policisë, përmendi se kishte pasur vjedhje në lagje dhe tha se po shihte një “djalë shumë të dyshimtë”, që dukej se kishte synime të shkaktonte probleme.
Megjithëse dispeçeri i policisë i tha Zimmermanit se nuk ishte nevoja për shërbimin e tij, Zimmerman doli nga makina, gjë që u pasua nga një konfrontim i dhunshëm mes tij dhe Martinin. Zimmerman hapi zjarr, duke e lënë të vdekur Martinin dhe më pas i tha policisë se Martin e kishte sulmuar dhe ai kishte vepruar për t’u vetëmbrojtur. Kjo ishte baza për shpalljen e tij të pafajshëm.
Pasi u rrëzuan akuzat ndaj Zimmermanit, Alicia Garza, që atëherë ishte veprimtare dhe bashkëthemeluese e fondacionit Black Lives Matter Foundation, e përfundoi një postim të saj në Facebook, duke shkruar: “Njerëz me ngjyrë. Ju dua. Jeta jonë ka vlerë”.
Patrisse Cullors, një veprimtare tjetër dhe bashkëthemeluese e Fondacionit Black Lives Matter, pas postimit të Garzas krijoi sloganin #BlackLivesMatter në mediat sociale, i cili fitoi popullaritet.
Lëvizja u përhap në shkallë vendi, një vit më pas, në kurrik 2014, kur vdiq Eric Garner.
Garner, një afrikano-amerikan, u ndalua nga policia e Nju Jorkut nën dyshimin se shiste cigare në broduaret e Staten Island. Oficeri i policisë, Daniel Pantaleo e rrëzoi në tokë Garnerin duke i zënë frymën, ndërsa dëshmitarët e regjistruan Garnerin, i cili thoshte “Nuk marr dot frymë”.
43 vjeçari, baba i gjashtë fëmijëve, u shpall i vdekur më pas në spital. Raporti i mjekësisë ligjore arriti në përfundimin se shtrëngimi i fytit nga polici, shkaktoi vdekjen e tij.
Pothuajse dy muaj pas vdekjes së Garnerit, adoleshenti 18 vjeçar afrikano-amerikan, Michael Brown u vra me armë zjarri nga oficeri i polcisë, Darren Wilson në Ferguson të shtetit Missouri.
Slogani #BlackLivesMatter ka vazhduar të përdoret për të protesuar ndaj asaj që lëvizja e sheh si zbatim i pabarabartë i padrejtësisë, veçanërisht në lidhje me vrasjen e afrikano-amerikanëve nga policët e bardhë apo të tjerë që pretendojnë se veprojnë në emër të mbrojtjes së ligjit.
Ndërsa lëvizja gëzon mbështetje të gjerë nga afrikano-amerikanët, është kritikuar nga konservatorët. Disa politikanë republikanë e akuzojnë se përforcon paragjykime kundër policisë. Një sondazh në vitin 2015, arriti në përfundimin se 41 për qind e amerikanëve të bardhë mendojnë se ky grup nxit dhunën, diçka që udhëheqësit e saj e mohojnë.
Organizata përpiqet gjithashtu të also seeks to amplify anti-Black racism across the country, and
Organizata përpiqet gjithashtu të ekspozojë raczimin në gjithë vendin dhe bashkëthemeluesit e Fondacionit Black Lives Matter Foundation — Garza, Cullor dhe Opal Tometi — kanë këmbëngulur se misioni i organzatës së tyre është “çrrënjosja e supremacisë së bardhë dhe konsolidimi i strukturave lokale për të ndërhyrë në dhunën e shkaktuar në komunitetet afrikano-amerikane nga shteti dhe të tjerë që marrin rolin e vendosjes së rendit mbi vete”.
Uashington – Më shumë se 200 gazetarë kanë raportuar se janë sulmuar, plagosur apo ndaluar ose u janë shkatërruar pajisjet gjatë mbulimit të protestave mbarëkombëtare për vdekjen e George Floyd, ndërsa ishte ndaluar nga policia në Mineapolis.
Mes turmave, zjarreve dhe plaçkitjeve, gazetarët janë bërë vetë lajm kur janë përballur me policinë apo protestuesit, ndërsa kanë bërë punën e tyre për të informuar publikun.
Jason Patinkin, një gazetar i Zërit të Amerikës, ishte një nga që u gjend mes “zjarrit”.
Patinkin tha se ndërsa ai po largohej nga protesta rreth Sheshit Lafayette dhe Shtëpisë së Bardhë rreth orës 11 të mbrëmjes, ditën e dielë, policia qëlloi ndaj tij dhe një ekipi tjetër lajmesh që ishin aty.
Patinkin tha se ndërsa po largohej nga zona, u dëgjua një zhurmë e fortë dhe ajo që dukej të ishte një “granatë zhurmuese”, u lëshua dhe përfundoi pranë këmbëve të ekipit të lajmeve.
Ai tha se e ktheu kamerën përsëri dhe më pas pa se si një oficer ngriti një armë dhe qëlloi në drejtim të tij. Patinkin tha se ai “nuk mendoj fare se do të më gjuante mua”. Në pamjet e incidentit, një gezhojë duket se bie në tokë.
Gazetari tha se ai atëherë ndjeu diçka që goditi jelekun mbrojtës që kishte veshur, pranë shpatullës së majtë.
Patinkin tha se mjeti i identifikimit të gazetarit dukej, megjithëse ishte natë. Të paktën një person në videon e tij dëgjohet duke bërtitur, “Media”.
“Unë jam media, është e qartë që unë jam media”, tha Patinkin, një gazetar me përvojë që ka mbuluar konflikte dhe trazira jashtë shtetit, përfshirë në Kartoum të Sudanit. “Nuk e prisja këtë me të vërtetë.”
Videoja e tij tregon një rresht prej më shumë se njëzetë oficerësh në një kryqëzim, në kryeqytetin amerikan. Protestuesit ishin gjithashtu në zonë, tha ai.
“Unë isha me fat në dy anë,” tha Patinkin, duke përmendur se objekti që e goditi atë ishte hedhur larg tij nga e majta.
“Nëse do të ishte hedhur në të djathtë, mund të më kishte goditur në sy, të më godiste në fytyrë,” tha ai, duke përmendur se disa njerëz janë verbuar nga këto lloj armësh. Nuk ishte e mundur për të identifikuar se cilës polici i përkisnin oficerët.
Gazetarët në të gjithë Shtetet e Bashkuara kanë shpërndarë ngjarjedhe imazhe të ngjashme, duke përfshirë dëmtimet nga plumbat e gomës.
Në Long Beach të Kalifornisë, reporteri i radios KPCC, Adolfo Guzman-Lopez u godit në fyt me një plumb gome. Në një konferencë shtypi të hënën, kryetari i Bashkisë së qytetit kërkoi falje dhe shefi i policisë tha që ai do të hetojë.
Gazetarja e pavarur Linda Tirado i tha Udhëheqësit të Lirisë së Shtypit të Shteteve të Bashkuara, një grup që dokumenton shkelje të lirisë së shtypit në Shtetet e Bashkuara, se ajo kërkonte trajtim spitalor pasi u godit nga një gëzhojë në anë të kokës, ndërsa mbulonte protestat në Mineapolis. Tirado më vonë ka postuar në Twtter se humbi shikimin në njërin sy, përkohësisht.
Zyra e informacionit në Mineapolis i tha Zërit të Amerikës më herët këtë javë se disa agjenci të zbatimit të ligjit po ndihmonin në protesta dhe se kontaktet me policinë e qytetit ishin nën rishikim.
Ndjekësi i Lirisë së Shtypit po heton më shumë se 200 incidente që përfshijnë gazetarë, duke përfshirë 40 të cilët u arrestuan ose u ndaluan dhe më shumë se 150 sulme. Shumica e këtyre të fundit përfshinin policinë që sulmonte me gaz lotsjellës dhe plumba gome ose duke përdorur spraj piperi.
“Jemi të tmerruar nga përdorimi i vazhdueshëm i veprimeve të ashpra dhe nganjëherë të dhunshme të policisë kundër gazetarëve që bëjnë punët e tyre. Këto janë shkelje të drejtpërdrejta të lirisë së shtypit, një vlerë themelore kushtetuese e Shteteve të Bashkuara,” tha drejtori i Programit të CPJ, Carlos Martinez de la Serna në një deklaratë të hënën.
Patinkin tha se ai kishte qenë në situata të tensionuara ose kërcënuese më parë. Ai u arrestua për pak kohë ndërsa mbulonte protestat paqësore në Tanzani, ose kur grupe të armatosura rrethuan një hotel ku ai dhe media të tjera po qëndornin në Kartoum.
“Por unë kurrë nuk jam qëlluar”, tha ai.
Sulmet ndaj mediave, tha ai, janë “jashtëzakonisht të dëmshme” sepse ato ndërhyjnë në punën e ofrimit të informacionit kur publikut i duhet më shumë. “Unë nuk e di se çfarë ndodhi me ata protestues atje, sepse unë u qëllova, kështu që unë u largova,” tha ai./ZiA
Ndërkohë që vazhdojnë protestat në qytetet kryesore amerikane, Sekretari i Mbrojtjes Mark Esper tha mbrëmë se nuk mbështet përdorimin e forcave aktive ushtarake për të penguar protestuesit. Kjo deklaratë e vë Shefin e Pentagonit në kundërthënie me Presidentin Trump, i cili ka kërcënuar se do të dërgojë trupa për të shtypur protestat që vazhdojnë prej një jave, të nxitura nga vdekja e një afrikano-amerikani gjatë arrestimit nga një polic i bardhë. Korrespondentja e Zërit të Amerikës në Shtëpinë e Bardhë Patsy Widakuswara njofton:
Protestat, në pjesën më të madhe paqësore, vazhduan mbrëmë në qytetet kryesore amerikane ku dhjetëra mijëra vetë nuk përfillën urdhrat për ndalim-qarkullim dhe rrezikun nga koronavirusi, për të shprehur revoltim për racizmin dhe dhunën policore.
Në fillim të javës, Presidenti Trumë kërcënoi se do të përdorte një ligj që i jep atij mundësinë të autorizojë dërgimin e forcave aktive ushtarake për të shtypur protestat, pa parapëlqimin e guvernatorëve.
Në sfidë ndaj kërcënimit të presidentit, Sekretari i Mbrojtjes Mark Esper tha se forcat aktive ushtarake duhet të përdoren vetëm në rastet më urgjente dhe ekstreme:
“Nuk jemi aktualisht në një nga këto situata. Nuk mbështes aktivizimin e Ligjit të Kryengritjes,” tha zoti Eper.
Të mërkurën në mëngjes, Sekretari Esper u dha urdhër 200 ushtarëve në shërbim aktiv të ktheheshin në bazë pas dy ditë demonstratash paqësore në Uashington, por e anuloi vendimin brenda pak orësh pas një takimi në Shtëpinë e Bardhë.
Sekretari Esper po ashtu u distancua nga vizita e Presidentit Trump në një kishë pranë Shtëpisë së Bardhë, ku ai pozoi për gazetarët me biblën në dorë. Fotografia nxiti revoltim dhe kritika të forta, pasi policia përdori gazën lotsjellës dhe granata zhurmuese për shpërndarjen e turmës. Ky akt dhe reagimi ndaj protestave kanë dëmtuar popullaritetin e presidentit.
“Jemi në mes të protestave më të ndezura që kemi parë që në vitet 1960. Kjo nuk është atmosferë e mirë për një president që po konkurron për rizgjedhje. Do t’i duhet të bëjë shumë gjëra që të rikthejë normalitetin, pasi për momentin nuk është në avantazh,” thotë Larry Sabato i Universitetit të Virxhinias.
Trazirat filluan pas vdekjes së George Floyd, një afrikano-amerikan i cili vdiq pasi një polic i bardhë e mbajti me gjurin në qafë për më shumë se 8 minuta.
Ish-presidentët amerikanë që janë gjallë sot, përfshirë Jimmy Carter, George W Bush dhe Bill Clinton kanë dënuar aktet që çuan në këtë vdekje.
Në një diskutim të hapur të zhvilluar online, ish-presidenti Barak Obama u bëri thirrje kryebashkiakëve të rishikojnë përdorimin e forcës në qytetet që drejtojnë:
“Kur shikon protestat sot, ato përfaqësojnë një përzgjedhje demografike shumë më të gjerë të Amerikës që e ndjeu të nevojshme të bënte diçka si rezultat i padrejtësive që janë vërejtur,” tha ish-presidenti Obama.
Protestat kanë hedhur dritë mbi një sistem padrejtësish racore në këtë vend.
“Revoltimi lidhet me kushtet e strehimit, me mundësinë për punësim, me gjendjen në shkollat publike, me ritmet e burgosjes. Nuk ka të bëjë vetëm me reagimin e policisë. Gjithë këta njerëz kanë dalë sot sepse ka diçka rrënjësisht problematike, jofunksionale në këtë sistem për sa u përket miliona amerikanëve,” thotë Peniel Joseph me Universitetin e Teksasit.
Polici që mbajti të mbërthyer me gjurin tek qafa afrikano-amerikanin George Floyd është akuzuar tani me vrasje me dashje të gradës së dytë, që përkufizohet si vrasje e qëllimtë por pa paramendim. Tre oficerët e tjerë që qëndruan pasivë në skenën e ngjarjes janë akuzuar për ndihmë dhe mbështetje të një vrasjeje të qëllimtë.
Prokurorët akuzuan me vrasje të shkallës së dytë ofierin Derek Chauvin, dhe për herë të parë ngritën akuza kundër tre oficerëve të tjerë në vendngjarje, sipas ankesës penale.
Në aktakuzën e rënduar nga shkalla e tretë në të dytën ndaj Derek Chauvin thuhet se veprimet e oficerit ishin një “faktor i konsiderueshëm” shkaktar për vdekjen e George Floyd.
“Frenimi i zotit Floyd nga oficeri Chauvin në atë mënyrë për një periudhë të zgjatur ishte një faktor thelbësor, shkaktar në humbjen e ndjenjave të Z. Floyd, duke sjellë një dëmtim të konsiderueshëm trupor, dhe gjithashtu vdekjen e Z. Floyd”, thuhet në ankesën penale.
Videoja e regjistruar nga një kalimtar, që tregon vdekjen në 25 maj të Floidit, ka ngjallur protesta në mbarë Shtetet e Bashkuara dhe në mbarë botën kundër brutalitetit dhe diskriminimit policor. Oficeri, Derek Chauvin, u pushua nga puna më 26 maj dhe fillimisht u akuzua për vrasje të shkallës së tretë dhe vrasje pa paramendim të shkallës së dytë. Tre oficerët e tjerë të përfshirë gjithashtu u pushuan nga puna, por nuk u akuzuan menjëherë.
Prokurori i Përgjithshëm i Minesotës, Keith Ellison e ngriti një shkallë më lartë akuzën kundër Chauvin në vrasje të paqëllimshme të shkallës së dytë. Ai gjithashtu akuzoi Thomas Lane, J. Kueng dhe Tou Thao për ndihmën dhe bashkëfajësi në vrasje së shkallës së dytë dhe vrasje të shkallës së dytë.
Avokat Earl Grei, i cili përfaqëson oficerin Lane, i tha Associated Press se raporti fillestar i Star Tribune për akuzat ishte i saktë, përpara se të mbaronte thirrja. Para lajmeve për akuzat e azhurnuara, një avokat për Chauvin tha që ai nuk po bënte deklarata në këtë kohë. Avokatët për Thao dhe Kueng nuk u kthyen mesazhet që kërkojnë koment për akuzat.
Para njoftimit për akuzat e shtuata, një avokat për oficerin Chauvin tha se ai nuk kishte për të bërë deklarata në këtë kohë. Avokatët për oficerët Thao dhe Kueng nuk iu përgjigjën thirrjeve për koment ndaj akuzave.
Avokat Ben Crump tha në Twitter se familja Floyd ishte “thellësisht e kënaqur” nga veprimi i prokurorit Ellison dhe e quajti atë “një burim paqeje për familjen Floyd në këtë kohë të vështirë”. Ai tha se Prokurori i Përgjithshëm Ellison i kishte thënë familjes se zyra e tij do të vazhdojë të hetojë dhe përmirësojë akuzat kundër Chauvin në vrasje të shkallës së parë nëse është e nevojshme.
Avokati Crump nuk pranoi të flasë përtej deklaratës ose të sqarojë se kur prokurori Ellison kishte folur me familjen dhe nëse ai ishte informuar direkt se ishin ngritur akuza shtesë.
Familja e George Floyd dhe protestuesit kanë thirrur vazhdimisht për kallëzime penale kundër të katër oficerëve, si dhe akuza më serioze për Derek Chauvin, i cili i mbajti gjurin në qafë Floydit, megjithë protestën e tij se nuk mund të merrte frymë, dhe vazhdoi të qëndrojë edhe pasi Floyd ndaloi së lëvizuri. Floyd ishte në pranga kur vdiq me fytyrën e shtypur në rrugë.
“Ai vdiq sepse nuk mund të merrte frymë,” tha avokati Crump në një konferencë shtypi të mërkurën. “Ai kishte nevojë për ajët. Kështu që ne po kërkojmë drejtësi. Ne presim që të gjithë oficerët e policisë të arrestohen para se të kemi ceremoninë përkujtimore këtu në Mineapolis nesër.”
Crump tha që oficerët e tjerë nuk arritën të mbronin një njeri që ishte duke u lutur për ndihmë dhe tha se ai nuk mund të merrte frymë.
“Ne presim që këta oficerë të akuzohen si bashkëpunëtorë,” tha ai. zëri i amerikës
Jim Mattis, ish-Sekretar i Mbrojtjes në administratën Trump, i cili dha dorëheqjen për të protestuar ndaj tërheqjes së trupave amerikane nga Siria, akuzoi Presidentin e Shteteve të Bashkuara se po përpiqet të “përçajë” Amerikën.
“Në jetën time, Donald Trumpi është presidenti i parë që nuk përpiqet t’i bashkojë amerikanët, dhe as pretendon ta bëjë një gjë të tillë,” shkroi ai në një deklaratë të botuar në internet nga revista The Atlantic të mërkurën.
“Përkundrazi, ai po përpiqet të na ndajë”, tha ish gjenerali i respektuar i marinsave, i cili deri më tani kishte shfaqur rezervat e tij pa komentuar kurrë drejtpërdrejt për mandatin e miliarderit republikan.
“Vëzhgova ngjarjet e kësaj jave, i zemëruar dhe i shqetësuar”, vazhdon ai në këtë aktakuzë të paepur, duke mbështetur demonstruesit që pretendojnë, sipas tij “me të drejtë”, të drejta të barabarta.
Që nga vdekja më 25 maj në Mineapolis e George Floyd, një afrikano-amerikan i asfiksuar nga një polic i bardhë, një valë historike zemërimi është përhapur në qytetet amerikane, duke denoncuar racizmin, dhunën e policisë dhe pabarazinë sociale. Qindra mijëra njerëz protestuan paqësisht në të gjithë vendin, por plaçkitjet dhe trazirat gjithashtu dëmtuan lëvizjen.
Donald Trump, shumë i heshtur për përgjigjen e tij ndaj praktikave të denoncuara nga demonstruesit, nga ana tjetër përdori një ton ushtarak dhe kërcënoi të drejtohej tek ushtria për të shuar protestat, duke e prezantuar veten si “president të ligjit dhe rendit”.
“Ne nuk duhet të shpërqendrohemi nga një pjesë e vogël veprimesh të jashtëligjshme. Demonstruesit janë dhjetëra mijëra njerëz me parime që këmbëngulin që të mbrojmë vlerat tona,” tha Jim Mattis.
“Ne duhet t’i kundërshtojmë dhe t’i mbajmë përgjegjës ata që janë në pushtet që tallen me Kushtetutën tonë,” shtoi ai. zëri i amerikës
Presidenti Donald Trump “ka autoritetin e vetëm për të vënë në veprim Ligjin e Rebelimit” dhe “nëse është e nevojshme, ai do ta përdorë atë”, tha Sekretarja të Shtypit të Shtëpisë së Bardhë, Kayleigh McEnany, para gazetarëve të mërkurën pasdite.
Më herët gjatë ditës, Sekretari i Mbrojtjes Mark Esper tha se, “mundësia për të përdorur trupat në detyrë aktive në rolin e forcave të zbatimit të ligjit duhet të përdoret vetëm si shansi i fundit dhe vetëm në situatat urgjente dhe të ndera.”
Esper shtoi, “Ne nuk jemi në një nga këto situata tani. Unë nuk e mbështes vënien në veprim të Ligjit të Rebelimit”.
Ligji federal i vitit 1807 lejon presidentin, në rrethana të ndera, të vendosë trupa ushtarake dhe të Gardës Kombëtare brenda vendit për të shtypur mosbindje civile, kryengritje apo rebelim.
Mes njoftimeve se deklaratat e sekretarit të Mbrojtjes kanë zemëruar presidentin dhe zyrtarët e lartë të Shtëpisë së Bardhë, sekretarja e Shtypit u pyet nëse presidenti Trump vazhdon të ketë besimin e anëtarit kryesor të Kabinetit të tij që drejton Pentagonin.
“Tani për tani, Sekretari Esper është ende Sekretar Esper,” u përgjigj zonja McEnany. Kjo përgjigje e shpejtë do të shtojë më tej spekulimet se sekretarit të Mbrojtjes së shpejti mund t’i kërkohet nga presidenti të japë dorëheqjen.
Ndërkohë Pentagoni thotë se Sekretari Esper ka kthyer mbrapsh një vendim të mëparshëm për të dërguar dy qindra trupa me detyrë aktive në shtëpi nga rajoni i Uashingtonit. Vendimi i sotëm vjen mes tensioneve në rritje mes Shtëpisë së Bardhë dhe Pentagonit për përgjigjen ushtarake ndaj protestave.
Sekretari i ushtrisë Ryan McCarthy i tha agjencisë Associated Press se vendimi erdhi pasi sekretari Esper mori pjesë në një takim në Shtëpinë e Bardhë, dhe pas diskutimeve të tjera të brendshme të Pentagonit. Ai tha se beson se ndryshimi i vendimit ishte i bazuar në sigurimin e një mbështetje të mjaftueshme ushtarake në rajon për t’iu përgjigjur problemeve të protestës nëse do të ishte e nevojshme.
Në mbrojtje të shëtitjes në Parkun Lafayette Park
Trump po mbron shëtitjen e tij në Parkun Lafayette për të shkuar në një kishë historike, ku ai mbajti lart një Bibël vetëm disa minuta pasi forcat e rendit pastruan me dhunë rrugën.
Veprimet e presidentit Trump të hënën në mbrëmje janë kritikuar ashpër nga drejtuesit e Kishës Episkopale, përfshirë peshkopen e saj kryesuese, si dhe klerikë të shquar të emërtimeve të tjera të krishtera.
“Shumica e udhëheqësve fetarë e pëlqyen atë veprim,” pohoi Trump të mërkurën. “Pse të mos ta pëlqenin? Unë qëndrova para një kishe që kaloi përmes traumave.”
Trump, në një bisedë telefonike në mëngjesin e së mërkurës me radion Fox News, deklaroi se kisha, e cila daton në fillim të shekullit të 19-të dhe ka një lidhje të gjatë me presidentët amerikanë, “pati një djegie shumë të keqe” gjatë vandalizmeve të së dielës në Uashington.
Një zjarr i vogël në bodrumin e kishës u shua shpejt, sipas departamentit të zjarrfikësave të Uashingtonit.
“Ishte jashtëzakonisht e rëndësishme” që presidenti të shëtiste drejt kishës për të “dërguar një mesazh shumë të fuqishëm se ne nuk do të mposhtemi nga plaçkitja”, tha zonja McEnany.
Presidenti Trump tha se askush nuk i kishte thënë atij për turmën e protestuesve përgjatë rrugës H, një bllok në veri të Shtëpisë së Bardhë, përpara se të shkonte në kishë.
“Kur shkova, nuk thashë,‘ Largojini ata. “Unë nuk e dija kush ishte atje,” tha presidenti Trump në programin e radios.
Prokurori i Përgjithshëm William Barr “vendosi atë mëngjes të zgjerohej perimetri,” u tha sekretarja McEnany gazetarëve.
Kur ai dëshmoi më vonë gjatë ditës se kjo nuk ishte zbatuar ai urdhëroi veprime të menjëhershme, tha McEnany.
Është procedurë normale që Shërbimi Sekret dhe forcat e zbatimit të ligjit të krijojnë një kordon në zonat para lëvizjeve nga çdo president.
Sekretari amerikan i Mbrojtjes, Mark Esper, tha sot se nuk mbështet propozimin e presidentit amerikan Donald Trump që të aktivizojë Aktin e Kryengritjes për të shuar protestat që po mbahen në gjithë vendin pas vrasjes së George Floyd, transmeton Anadolu Agency (AA).
“Mundësia për të përdorur forcat aktive ushtarake në një rol të zbatimit të ligjit duhet të përdoret vetëm si mjet i fundit dhe vetëm në situatat më urgjente dhe më të skajshme. Ne tani nuk jemi në një nga këto situata. Unë nuk e mbështes aktivizimin e Aktit të Kryengritjes”, tha Esper gjatë një takimi me gazetarët në Pentagon.
Trump të hënën tha se është gati të dërgojë trupa ushtarake për t’u dhënë fund protestave të dhunshme pas vrasjes së Floyd, një afro-amerikan i paarmatosur që u vra nga policia në Minneapolis, Minesota.
Presidenti po i referohej Aktit të Kryengritjes të vitit 1807, një ligj federal që fuqizon presidentin të vendosë trupa ushtarake në rrethana të veçanta, siç janë kryengritjet dhe rebelimet, apo për t’i dhënë fund trazirave civile.
SHBA që prej javës së kaluar është përballur me protesta pasi në internet u publikua një video që u bë e famshme, ku shihej Floyd teksa rrëzohej përtokë nga Derek Chauvin, një oficer i bardhë policor. Chauvin i vuri gjurin në qafë për gati nëntë minuta.
Pas kësaj, Floyd dukej se humbi vetëdijen, por Chauvin mbajti pozicionin e tij ndaj viktimës. Ai vdiq menjëherë pasi u dërgua në një spital.
Fjalët e tij të fundit ishin “Nuk mund të marr frymë”, që u bënë slogani i protestave mbarëkombëtare. Rezultatet e një autopsie të pavarur të publikuar të hënën treguan se Floyd u vra shkaku i “asfiksimit nga presioni i gjatë”.
Kongresmeni Joe DioGuardi një nga emrat që kanë ndryshuar historinë dhe fatin e Kosovës dhe çështjes shqiptare! Voal.ch po ju sjell raportet që ai ka ndërtuar me Presidentët e SHBA George W.H Bush & George W. Bush! Botuesit e voal.ch janë krenarë që kanë mbi çerek shekulli që bashkëpunojnë me Presidentin e LQSHA dhe eksperten e Ballkanit Shirley Cloyes DioDuardi!
——-
Voal.ch – Ish kongresmeni shqiptaro – amerikan, Joe DioGuardi, i cili është kryetar i Lidhjes Qytetare Shqiptaro-amerikane, thotë se ka mjaft kujtime nga presidenti i 41-të amerikan. Ai e ka takuar atë shumë herë, por kujton sidomos një takim në vitin 1984, kur ish-Presidenti George Herbert Walker Bush, në atë kohë nënpresident, erdhi të bëjë fushatë për të në Nju Jork.
“Ishte George H. W. Bush, i cili bëri paralajmërimin e Krishtlindjeve, në dhjetor 1992, duke i shkruar një letër presidentit Sllobodan Millosheviç, ku thoshte: nëse e shkallëzoni më tej situatën, do të shihni se ne do të ndërhyjmë. Por edhe përpara kësaj, në vitin 1988, në tetor ose nëntor të atij viti, unë i kërkova nëse mund të bënte diçka, pas gjithë atyre gjërave që po ndodhnin me shqiptarët në ish-Jugosllavi, sidomos në Kosovë. I kërkova nëse mund të shkruante një letër të shkurtër për t’u dhënë zemër shqiptarëve. I dhashë disa sugjerime, për t’i treguar se cili ishte problemi. Ai si duket u këshillua me sekretarin e tij të shtetit dhe më dërgoi një letër të shkruar bukur. Aty ai thoshte se shqiptarët janë një popull trim dhe fisnik, pikërisht këto fjalë përdori. Ishte diçka e mrekullueshme. Më kujtohet kur ia shpërndava këtë letër komuniteteve shqiptare. Pikërisht një vit më vonë Serbia ndërhyri në Kosovë, prandaj ajo letër pati shumë rëndësi për t’u dhënë shqiptarëve shpresë.
“Unë e mbështeta qysh në fillim kandidaturën e të birit të tij George W. Bush. Ne organizuam një pritje për Bushin e ri në Hotel Sheraton të Nju Jorkut dhe unë sigurisht i përmenda atë që kishte bërë i ati për shqiptarët, sidomos në Kosovë.
“Ka rëndësi të kujtojmë se ai ishte njeriu të cilit ne i dorëzuam një peticion me 1 milion nënshkrime nga Kosova. Miku im, kongresmeni Henry Hide, i dorëzoi nënshkrimet në Shtëpinë e Bardhë. Unë besoj se ishin ato nënshkrime që sollën një kthesë, duke e bërë presidentin George W. Bush të kuptonte se ai duhet të ishte i pari që do të njihte pavarësinë e Kosovës më 17 shkurt 2008. Pra, ne kemi një trashëgimi të pasur me familjen Bush, jo vetëm me Presidentin George H. W. Bush por edhe me të birin, George W. Bush. Dhe unë jam krenar që shërbeva si një lloj ure mes të dyve.”
Ish-presidenti George W. Bush i kërkoi sot Amerikës të shqyrtonte pa kompromis dështimet e saj tragjike duke përmendur padrejtësinë radikale që po dëmton shoqërinë amerikane.
“Ky mbetet një dështim tronditës që shumë afro-amerikanë, veçanërisht të rinj, ngacmohen dhe kërcënohen në vendin e tyre”, shkruan ish-presidenti (2001-2009) në një komunikatë për vdekjen e George Floyd, i asfiksuar nën gjurin e një polici të bardhë.
“Kjo tragjedi, që është pjesë e një serie të gjatë tragjedish të ngjashme, ngre një pyetje të pashmangshme: Si do t’i jepet fund racizmit të vazhdueshëm në shoqërinë tonë?”, pyet ai.
“Ka ardhur koha për Amerikën të shqyrtojë dështimet tona tragjike”, shtoi ai.
Vdekja e George Floyd, një javë më parë në Minneapolis ka indinjuar Amerikën dhe ka shkaktuar manifestime të shumta në mbarë vendin, që kanë degjeneruar dhe në përleshje.
Edhe pse nuk e përmend kurrë presidentin amerikan, Donald Trump, ish-presidenti republikan këmbëngul mbi nevojën për të dëgjuar zërat e atyre që vuajnë.
“Ata që përpiqen të kufizojnë këto zëra në heshtje nuk e kuptojnë domethënien e Amerikës”, shkruan ai.
“Heronjtë e Amerikës nga Frederick Douglass te Harriet Tubman, Abraham Lincoln apo Martin Luther King Jr – janë heronjtë e unitetit”, nënvizoi ai.(Atsh)
Në adresimin e parë të madh pas disa javësh, ish-nënpresidenti i Shteteve të Bashkuara, Joe Biden, u zotua se “nuk do t’iu fryejë flakëve të urrejtjes” nëse zgjidhet president, porse do të përpiqet “të shërojë plagët racore që kanë pllakosur” Shtetet e Bashkuara.
Biden, rivali i pritur i presidentit Donald Trump në zgjedhjet presidenciale të nëntorit në SHBA, i bëri komentet në Sallën e Qytetit në Filadelfia.
Ai iu referua trazirave aktuale në Shtetet e Bashkuara, që pasojnë vdekjen e afrikano-amerikanit George Floyd, gjatë arrestimit nga policia.
Incidenti ndodhi në Mineapolis të Minesotës, më 25 maj.
Demonstratat kanë qenë kryesisht paqësore, por policia në disa qytete ka përdorur forcë kundër gazetarëve dhe protestuesve, ndërsa demonstruesit janë përleshur me forcat e rendit.
Shumë qytete amerikane kanë vendosur orë policore.
Më 1 qershor, policia është detyruar të zmbrapsë protestuesit pranë Shtëpisë së Bardhë, në mënyrë që Trump të mund të shkonte në një kishë pranë.
Kisha ka pësuar dëme gjatë protestave të një dite më parë.
“Ky president sot është pjesë e problemit dhe e përshpejton atë”, tha Biden dhe shtoi se Trump është “i konsumuar me egon e tij verbuese”.
Trump ka paralajmëruar se do ta urdhërojë ushtrinë të veprojë në shtetet që refuzojnë të marrin masa më të ashpra kundër protestuesve rebelë, që kanë dalë në rrugë. rel
Ish-Nënpresidenti amerikan Joe Biden ka shprehur shqetësimin “për vetë shpirtin e vendit tonë” pasi Presidenti Donald Trump u zotua të hënën të përdorë ushtrinë për t’i dhënë fund “trazirave dhe paligjshmërisë” që kanë shpërthyer në të gjithë Shtetet e Bashkuara pas vdekjes së një afrikano-amerikani që mbahej nga policia një javë më parë në Minneapolis.
Në një fjalim televiziv kombëtar në Kopshtin e Trëndafilave të Shtëpisë së Bardhë, presidenti paralajmëroi se “nëse një qytet ose shtet nuk pranon të ndërmarrë veprimet e nevojshme për të mbrojtur jetën dhe pronën e banorëve të tyre, atëherë unë do të dislokoj ushtrinë e Shteteve të Bashkuara dhe do ta zgjidh problemin me shpejtësi”.
Komenti i referohej me sa duket Ligjit për Rebelimin të vitit 1807, i cili lejon presidentët të veprojnë ndaj paligjshmërisë gjatë emergjencave. Ligji u përdor së fundmi më 1992 në mes të trazirave në Los Angeles pasi një tjetër afrikano-amerikan, Rodney King, u rrah nga policia.
Presidenti Trump tha se ai “po mobilizonte të gjitha burimet e mundshme federale, civile dhe ushtarake, për të ndaluar trazirat dhe plaçkitjet, për t’i dhënë fund shkatërrimit dhe zjarrvënies dhe për të mbrojtur të drejtat e amerikanëve që respektojnë ligjin, përfshirë këtu edhe të drejtën tuaj të bazuar tek Amendamenti i Dytë”. Amendamenti i Dytë i Kushtetutës së Shteteve të Bashkuara mbron të drejtat e të gjithë qytetarëve amerikanë për të mbajtur armë zjarri.
Pak para se presidenti të fliste, gazetarët që prisnin për komentet e tij në Kopshtin e Trëndafilave dëgjonin shpërthime të larta nga gazi lotësjellës që hidhej përreth Parkut Lafayette, ku forcat e policisë të veshura me paisje mbrojtëse shtynin me mburoja demonstruesit paqësorë. Gjithashtu u qëllua me plumba gome dhe u fut policia me kuaj për të pastruar zonën.
Lëvizja nga organet e zbatimit të ligjit erdhi më pak se gjysmë ore para orës 7 pasdite, kur shtetrrethimi hyri në fuqi për Uashingtonin.
Aksioni pastroi rrugën – por jo erën e gazit lotsjellës – rreth Kishës së Shën Gjonit, një bllok më në veri të Shtëpisë së Bardhë, ku Presidenti Trump eci vetëm disa minuta pasi hyri në fuqi shtetrrethimi. Kisha historike Episkopale, e njohur në Uashington si “kisha e presidentëve”, pësoi dëme të vogla mbrëmjen e së dielës kur një zjarr i vogël u ndez në bodrumin e saj.
Përpara kishës së mbyllur, Presidenti Trump mbajti një Bibël, duke iu referuar Shteteve të Bashkuara si “vendi më i madh në botë” dhe tha: “ne do ta ruajmë të sigurt”.
Presidenti Trump mban në dorë Biblën ndërsa qëndron përpara kishës së mbyllur
Në vazhdim, Presidenti Trump u kthye përsëri në Shtëpinë e Bardhë i rrethuar nga masa të mëdha sigurie.
Disa orë pas fjalimit të presidentit dhe paraqitjes së tij para kishës së Shën Gjonit, Joe Biden, kundërshtari i prezumuar demokrat i presidentit në zgjedhjet presidenciale të nëntorit të këtij viti, denoncoi veprimet e Presidentit Trump në llogarinë e tij në Twitter. “Ai po përdor ushtrinë amerikane kundër popullit amerikan”, shkruajti Biden. “Ai përdori gaz lotsjellës ndaj protestuesve paqësorë dhe gjuajti me plumba gome. Për një foto”.
“Për fëmijët tanë, për vetë shpirtin e vendit tonë, ne duhet ta mposhtim atë.”
Peshkopja Mariann Budde, udhëheqëse e Dioqezës Episkopale të Uashingtonit, gjithashtu shprehu në Twitter pakënaqësinë e saj me veprimet e Presidentit Trump. “Sonte Presidenti sapo përdori një Bibël dhe një kishë të dioqezës time si sfond për një mesazh që ishte e kundërta e mësimeve të Jezusit dhe gjithçkaje që përfaqëson kisha jonë. Për ta bërë këtë, ai sanksionoi përdorimin e gazit lotsjellës nga oficerët e policisë të veshur me paisje mbrojtëse për të pastruar oborrin e kishës”, shkruajti Peshkopja Budde.
“Vendimi i Presidentit Trump për të mobilizuar Ligjin për Rebelimin dhe retorika e tij provokuese, dëshmojnë se ai nuk mund të na udhëheqë në këto kohë të trazuara dhe të bashkojë vendin. Në vend të kësaj, ai ka vendosur të mbështetet në përdorimin e forcës ndaj atyre që ai i konsideron si kërcënim”, tha në një deklaratë Ligjvënësi Adam Smith, kryetar i Komisionit të Forcave të Armatosura të Dhomës së Përfaqësuesve.
Presidenti, sipas zyrtarëve të Departamentit të Mbrojtjes, ka urdhëruar ushtrinë që të dislokojë një batalion të policisë ushtarake në Uashington, juridiksioni i vetëm ku ushtria mund ta bëjë këtë pa u këshilluar më parë me guvernatorin e shtetit.
Njësitë e Gardës Kombëtare
Të gjitha forcat prej 1200 anëtarësh të Gardës Kombëtare në kryeqytetin amerikan janë mobilizuar. Sipas zyrtarëve, pesë shtete po dërgonin me shpejtësi nga 600 deri në 800 ushtarakë të tjerë, disa të armatosur me armë vdekjeprurëse.
Forca të tjera ushtarake në shërbim aktiv, ndër to polici ushtarake dhe njësi xheniere, janë vendosur në gatishmëri përreth Distriktit të Kolumbias dhe mund të sillen nëse do të lindë nevoja, njoftuan zyrtarët.
Në orët e vona të së hënës, një helikopter Black Hawk i ushtrisë amerikane fluturoi mbi çatitë e lagjes historike Chinatown të Uashingtonit në një manovër “demonstrimi force”, duke i detyruar protestuesit të shpërndahen për të shmangur pluhurin dhe sendet që ngrinin helikat e helikopterit, që thyen edhe degët e pemëve.
Një automjet ushtarak qëndron në mes të K Street në kryeqytetin amerikan
Veprimet e Presidentit Trump po shihen si demonstrimi më i hapur i forcës autoritare që kur ai mori detyrën 3 vjet e gjysëm më parë.
“Jemi duke u përsiatur drejt një diktature”, tha Don Lemon në rrjetin e kabllove të lajmeve, CNN, menjëherë pas fjalës së presidentit. “Unë mendoj se presidenti po luan një lojë shumë, shumë të rrezikshme këtu”.
Presidenti i është referuar vazhdimisht CNN-it si “lajme të rreme” dhe shpesh i karakterizon mediat kryesore amerikane si “armiq të popullit”.
Presidenti Trump i quan guvernatorët “të dobët”
Më herët të hënën, guvernatorët morën një leksion nga Presidenti Trump, sekretari i mbrojtjes dhe prokurori i përgjithshëm, duke i nxitur ata të bëhen të ashpër me protestuesit e pabindur në rrugët e qyteteve të Amerikës.
Në një konferencë nëpërmjet telefonit me guvernatorët për demonstratat e dhunshme në të gjithë vendin, udhëheqësit e shteteve u kritikuan ashpër nga presidenti.
“Shumica prej jush janë të dobët”, u tha presidenti, sipas një regjistrimi audiofonik të telefonatës. “Ju duhet të dominoni. Nëse nuk mbizotëroni, po humbni kohën tuaj. Ata do t’ju shkelin me këmbë; do të dukeni si një tufë budallenjsh”.
Presidenti Trump është duke u përballur me kritika për mosmarrjen e rolit tradicional presidencial të “krye-ngushëlluesit”, që kur vdekja e afrikano-amerikanit George Floyd ndërsa mbahej nga policia në Minneapolis, shkaktoi një rrjedhë agonie dhe zemërimi kombëtar.
Në vend të kësaj, presidenti ka kaluar kohën në Twitter duke sulmuar Biden-in dhe politikanë të tjerë demokratë, dhe duke i njehsuar me radikalët e majtë që ai fajëson për dhunën e ditëve të fundit.
Telefonata me Presidentin Trump të hënën ishte “thellësisht shqetësuese”, tha guvernatorja demokrate e Miçiganit Gretchen Whitmer.
“Në vend që të ofrojë mbështetje ose udhëheqje për të ulur temperaturën në protesta, Presidenti Trump u tha qeveritarëve që ta ‘shtypni’ ose do na ‘mposhtin’,” tha ajo në një deklaratë.
Rreth gjysma e guvernatorëve kanë aktivizuar tashmë njësitë e Gardës Kombëtare për të ndihmuar organet e zbatimit të ligjit në shuarjen e trazirave. Por më shumë ushtarakë janë të nevojshëm në rrugë, sipas presidentit.
“Ata janë të gatshëm, kanë dëshirën dhe aftësitë. Ata duan të luftojnë për vendin”, u tha Presidenti Trump guvernatorëve. “Do të doja të kishim një forcë okupuese prezente”.
Qyteti Los Angeles, konkretisht, “nuk është duke përdorur burimin më të mrekullueshëm që mund të përdorni”, tha Presidenti Trump për forcat ushtarake nën kontrollin e shtetit.
Presidenti Trump dhe Shtëpia e Bardhë po fajësojnë për dhunën një koalicion mes aktivistëve të së majtës së largët, të njohur si “antifa” (shkurtim i fjalës antifashist), anëtarët e të cilës bëjnë fushatë kundër asaj që i shikojnë si akte të autoritarizmit, homofobisë, racizmit ose ksenofobisë.
Presidenti republikan paralajmëroi më herët në Twitter se “kur plaçkitjet fillojnë, të shtënat fillojnë”. Presidenti Trump mohoi më vonë që fraza ishte një paralajmërim se vandalët do të qëlloheshin me armë dhe tha se nuk e dinte që shprehja ishte përdorur në mënyrë të dukshme nga shefi i policisë së Majamit në 1967 në përgjigje të kriminalitetit të dhunshëm në lagjet e afrikano-amerikanëve.
“Është një lëvizje që nëse nuk e shtypni, do të përkeqësohet dhe përkeqësohet”, u tha guvernatorët Presidenti Trump të hënën. “Këta janë radikalë dhe janë anarkistë.”
Sekretarja e Shtypit e Shtëpisë së Bardhë, Kayleigh McEnany, e pyetur gjatë një konference për shtyp në Shtëpinë e Bardhë në lidhje me reagimin e guvernatores së Miçiganit, tha se ajo nuk e kupton pse Guvernatorja Whitmer do të shqetësohej që presidenti u thotë guvernatorëve të bëjnë punën e tyre.
Një tjetër demokrat, Guvernatori J.B. Pritzker i shtetit Illinois, i tha presidentit, “Unë jam jashtëzakonisht i shqetësuar për retorikën që është përdorur nga ju. Është provokuese”.
Presidenti u përgjigj: “Edhe mua nuk më pëlqen shumë retorika juaj,” duke kritikuar përgjigjen e Guvernatorit Pritzker ndaj pandemisë së koronavirusit. “Sinqerisht mendoj se mund të kishit bërë një punë shumë më të mirë”.
Prokurori i Përgjithshëm William Barr u tha guvernatorëve, “ne duhet të kontrollojmë rrugët … dhe kjo kërkon një prani të fortë”.
Provokatorë profesionistë po kërkojnë të lëvizin nga shtetet e fortë drejt shteteve të dobët për të shkaktuar rrëmujë, tha zoti Barr, duke shtuar se kjo bazohej në raportet e shërbimeve të zbulimit.
“Të gjithë po kërkojnë pika të dobëta,” tha Presidenti Trump.”Duhet të arrestohen këta njerëz” dhe të burgosen për disa vite. “Këta janë terroristë. Ata janë antifa dhe e majta radikale”.
Presidenti Trump posaçërisht u bëri thirrje qytetit të Nju Jorkut dhe Filadelfias që “të ashpërsohen .”
Presidenti Trump tha se përgjigjja fillestare në Minesota ishte “e dobët dhe patetike”, por se Guvernatori i Minnesotas Tim Walz, një demokrat, meritonte lavdërime për dislokimin e Gardës Kombëtare, e cila rrëzoi demonstruesit “si kunjat e lojës bowling – një gjë e bukur për tu parë”.
Gjatë konferencës me telefon, Sekretari i Mbrojtjes Mark Esper u tha guvernatorëve se “sa më shpejt që të mbushni dhe mbizotëroni hapësirën e betejës, aq më shpejt do të shpërndahet kjo gjë”.
Një javë pasi Floydi, 46 vjeç, vdiq ndërsa mbahej nga policia dhe u filmua një oficer i bardhë i policisë që e shtypte në qafë me gjurin e tij për më shumë se 8 minuta, demonstratat paqësore janë lënë në hije nga dhuna urbane në mbarë Amerikën. Bizneset janë vandalizuar dhe plaçkitur, monumentet publike janë dëmtuar dhe oficerët e organeve të zbatimit të ligjit kanë qëlluar me plumba gome dhe gaz lotsjellës ndaj protestuesve, disa prej të cilëve kanë goditur policinë me tulla, fishekzjarre dhe qese me lëngje trupore.
Mijëra njerëz u arrestuan në demonstratat në mbarë Shtetet e Bashkuara të shtunën dhe të dielën.
Të hënën Kalifornia urdhëroi mbylljen e ndërtesave të qeverisë së këtij shteti në qendrat e qyteteve.
Në Çikago, dy njerëz u vranë gjatë demonstratave të hënën në zonën periferike Cicero dhe u arrestuan 60 persona, raportoi agjensia e lajmeve Associated Press.
Në Uashington, D.C., Kryebashkiakja Muriel Bowser u shtriu orarin e shtetrrethimit me katër orë, duke filluar nga ora 7 pasdite.
Zëdhënësja e Shtëpisë së Bardhë McEnany tha për Presidentin Trump se, “ai e kupton dhimbjen” e demonstruesve të ligjshëm. Ajo shtoi se, “është vërtet një turp” që radikalët në rrugë po dëmtojnë mesazhin e protestuesve paqësorë.
Joe Biden u takua me drejtuesit e komunitetit në një kishë kryesisht Afrikano-Amerikane në Delauer të hënën në mëngjes, duke dalë nga shtëpia për dy ditë radhazi për të trajtuar tensionet racore që kanë filluar të riformulojnë zgjedhjet e ardhshme presidenciale.
Biden, ish-nënpresidenti i cili do të përfaqësojë demokratët kundër Presidentit Donald Trump në zgjedhjet presidenciale këtë vjeshtë, është gjendur në vështirësi në përpjekjet për të gjetur hapësirë në debatet kombëtare rreth dy krizave që kanë përfshirë vendin në javët e fundit nga studioja e tij televizive në bodrum. Por pas një nate tjetër të protestave të dhunshme, demokrati 77-vjeçar u takua me një numër udhëheqësish afrikano-amerikanë në qytetin e tij përpara një takimi virtual me kryetarët e bashkive në të gjithë vendin.
Kjo qasje e takimeve më udhëheqës të nivelit më të ulët është në kontrast të madh me atë të Presidentit Trump në ditët e fundit, i cili ka bërë pak përpjekje për të unifikuar vendin. Presidenti republikan foli me guvernatorët dhe zyrtarët e forcave të zbatimit të ligjit të hënën, por ai e kaloi pjesën më të madhe të fundjavës duke përdorur Twitter-in si një platform për të nxitur respektimin e “ligjit dhe rendit” dhe veprime më të ashpra nga policia kundër protestuesve në të gjithë vendin. Ai paralajmëroi të premten se, “kur plaçkitjet fillojnë, të shtënat fillojnë.”
Presidenti Trump gjithashtu kritikoi zotin Biden të hënën, duke thënë ne një postim në Twitter se “Njerëzit e Joe Bidenit të përgjumur janë aq të dhënë pas të Majtës Radikale sa që po punojnë për t’i nxjerrë anarkistët nga burgu, dhe ndoshta më shumë”.
Në momentet e para të mbledhjes së të hënës në kishën Bethel AME në qytetin ku jeton zoti Biden, Uilmington, ish-nënpresidenti dëgjonte me qetësi dhe mbante shënime në një fletore. Të gjithë të pranishmit, përfshirë edhe vetë zotin Biden, përdorën maska.
“Nënpresidenti erdhi të dëgjojë nga ne. Ky është një djalë lagjeje,” tha Pastori Sylvester Beaman, përpara se zoti Biden dhe të pranishmit të ulnin kokat për fillimin e lutjeve.
Qasja më e butë e zotit Biden mund të kumtoj se si kandidati që pritet të marrë emërimin e partisë demokrate do paraqitet pesë muaj para zgjedhjeve presidenciale, duke theksuar qetësinë dhe kompetencën si një kontrast me një president që flet shpejtë. Është një qasje që mbart me vete rrezikun për t’u mbytur nga angazhimi shumë më i zëshëm, më këmbëngulës i Presidentit Trump.
“Ai nuk është në detyrë, dhe ai sigurisht që nuk ka megafonin e personit që aktualisht ndodhet në Shtëpinë e Bardhë, por unë mendoj se njerëzit tanë janë duke kërkuar dikë që mund t’i bëjë ata të ndjehen më mirë gjatë këtyre kohërave jashtëzakonisht të vështira,” tha ligjvënësja Val Demings nga Florida, të cilën Biden po e konsideron si kandidate të tij për nënpresidente. “Amerika thjesht duhet të sigurohet që ka një njeri që është mirëkuptues, dhe i gatshëm të thotë,”Po, ne kemi disa çështje, ” dhe dikush që është i gatshëm t’i trajtojë ato.”
Megjithatë, sigurimi kërkon praninë, dhe kjo ka qenë një pengesë për ish-nënpresidentin, i cili u detyrua të vetëizolohej nga pandemia e koronavirusit, ende po punon për t’u përshtatur me fuqinë e mediave sociale si një zëvendësuese të pranisë fizike dhe pa platformën e zakonshme të një posti publik.
Zoti Biden mbajti një fjalim të mirëpritur të premten, duke u bërë thirrje të bardhëve që të mbanin përgjegjësinë në përpjekjet për t’i dhënë fund racizmit sistemik të Amerikës. Por, ai ishte kryesisht jashtë vëmendjes gjatë fundjavës, e cila shënoi përvjetorin e pestë të vdekjes së djalit të tij Beau Biden.
Të hënën ai pati paraqitjen e tij të tretë publike që nga shpërthimi i pandemisë në mes të marsit.
Zoti Biden dhe bashkëshortja e tij, Jill, shënuan Ditën e të Rënëve duke vendosur një kurorë me lule të bardha në një memorial të veteranëve në afërsi të shtëpisë së tij në Uilmington javën e kaluar, dhe fushata e ish-nënpresdentit postoi fotografi të tij gjatë vizitës në një pjesë tjetër të qytetit ku po mbahej një protestë, të dielën pasdite. Më parë, ai bëri një postim në platformën Medium duke shprehur empati për ata që janë të dëshpëruar nga vdekja e afrikano-amerikanit George Floyd gjatë kohës që ai ishte nën arrest.
“E vetmja mënyrë për të përballuar këtë dhimbje është kthimi i këtij ankthi në një qëllim”, thuhej në postimin e zotit Biden të publikuar të dielën. “Dhe si President, unë do të ndihmoj në udhëheqjen e kësaj bisede – dhe më e rëndësishmja, unë do t’i dëgjoj shqetësimet tuaja”.
Në mbledhjen e mëngjesit të së hënës morën pjesë 15 udhëheqës fetarë, politikë dhe të arsimit, përfshirë ligjvënësin demokrat të Delauerit, Blunt Rochester. Ata të gjithë mbanin maska dhe mbanin një distancë fizike në ulëset e kishës. Njoftimet e ngjitura në hyrjen kryesore i paralajmëruan njerëzit të mos hynin nëse kishin kollë ose simptoma të tjera të koronavirusit.
Pjesa më e madhe e strategjisë së fushatës së zotit Biden përqendrohet në përpjekjen për të nxjerrë në pah një kontrast me Presidentin Trump nga pikëpamja e temperamentit dhe vlerave. Ai e ka quajtur garën për Shtëpinë së Bardhë një betejë për shpirtin e vendit dhe ka qenë veçanërisht i fuqishëm në dënimin e trajtimit nga Presidenti Trump të momenteve të tensioneve racore.
Demokratët besojnë se ish-nënpresidenti ofron një kontrast ndaj Presidentit Trump në momente të tilla, që i jemi atij (zotit Biden) një avantazh. Ata theksojnë se ndërsa zoti Biden nuk u shfaq në televizion tërë fundjavën, ai foli për vdekjen e afrikano-amerikanit George Floyd para Presdientit Trump dhe tregoi dhembshuri për protestuesit.
Trump ka alternuar midis shprehjes së alarmit për vdekjen e zotit Floyd dhe simpatisë për familjen e tij dhe postimin e mesazeve në Twitter duke antagonizuar protestuesit dhe përçmuar armiqtë e tij politikë.
Dhe në zgjedhjet që ka të ngjarë të jenë një referendum për presidentin e tanishëm, disa ndihmës të zotit Biden thonë privatisht se plani më i mirë mund të jetë që të lejojnë Presidentin Trump që të dëmtojë veten.
Megjithatë ekziston edhe mendimi se Biden duhet të bëjë më shumë sesa thjesht të presë votuesit që mund të mos jenë të kënaqur me zotin Trump. Disa demokratë që e kanë kritikuar zotin Biden në të kaluarën për mungesë të pranisë në publik gjatë fillimit të pandemisë së koronavirusit thanë se ai po bën lëvizjet e duhura tani.
“Jam i sigurt se ata kanë hezitime, të kutpueshme, tani për ta politizuar këtë. Kjo nuk është pjesë e natyrës së tij”, tha strategu demokrat James Carville. “Mund të ketë një kohë për elokuencë, por unë mendoj se thjeshtësia është elokuencë tani”.
Në mes të trazirave racore në të gjithë vendin, Presidenti Donald Trump të hënën tha se ai është “president i ligjit dhe rendit” dhe kërcënoi se do të dislokonte ushtrinë në qytetet amerikane për të shuar protestat e dhunshme.
Ndërkohë që Presidenti Trump po mbante fjalimin në kopshtin e Shtëpisë së Bardhë, një numër automjetesh ushtarake po lëviznin aty pranë në rrugën Pensylvania Avenue dhe policia ushtarake dhe forcat e zbatimit të ligjit po përplaseshin me protestuesit në Parkun Lafayette.
“Ne kemi vendin më të madh në botë”, deklaroi Trump. “Ne do ta mbajmë atë të sigurt.”
Trump tha se ai do të mobilizojë “mijëra e mijëra” ushtarë për të mbajtur paqen nëse guvernatorët nuk e përdorin Gardën Kombëtare për t’i dhënë fund protestave të dhunshmne.
“Të gjithë amerikanët me të drejtë u trishtuan dhe u revoltuan nga vdekja brutale e George Floydit”, tha Presidenti Trump. Ai theksoi se administrata e tij është plotësisht e përkushtuar që drejtësia për zotin Floyd dhe familjen e tij të vihet në vend. “Por ne nuk mund të lejojmë që thirrjet e drejta dhe protestuesit paqësorë të mbyten nga një turmë e zemëruar. Viktimat më të mëdha të trazirave janë qytetarët paqedashës në komunitetet tona më të varfra dhe si President i tyre, unë do të luftoj për t’i mbajtur ata të sigurt. Unë do të luftoj për t’ju mbrojtur”, tha Presidenti Trump.
Sipas një zyrtari të lartë të Departamentit të Mbrojtjes, mes 600 dhe 800 anëtarë të Gardës Kombëtare nga pesë shtete po dërgohen në Uashington për të ofruar ndihmë në ruajtjen e sigurisë. Ky kontigjent trupash ose tashmë ndodhet në terren ose do të arrinte në mesnatë.
Më parë, forcat e rendit shpërndanë me forcë një grup protestuesish në Kishën St. Johns Episcopal Church, e cila njihet si “Kisha e Presidentëve” dhe ndodhet afër Shtëpisë së Bardhë. Kisha pësoi dëme nga djegiet gjatë protestave të kësaj jave në Uashington.
Sipas Aktit të Epokës së Luftës Civile- Posse Comitatus Act, trupave federale nuk u lejohet të kryejnë operacione të brendshme të zbatimit të ligjit si arrestime, konfiskim të pronave ose kontrollime të njerëzve. Në raste ekstreme, megjithatë, presidenti mund të përdor Aktin e Kryengritjes (Insurrection Act), gjithashtu nga epoka e Luftës Civile, i cili lejon përdorimin e trupave ose Gardën Kombëtare për zbatimin e ligjit.
Zyrtarët thanë që një pjesë e Gardës Kombëtare në Uashington do të jenë të armatosur dhe të tjerët jo. Ata thanë se anëtarët e Gardës Kombëtare në Uashington nuk kanë armë jo vdekjeprurëse. Policia ushtarake që tashmë është e pranishme në qytet është pjesë e Gardës Kombëtare.
Vdekja e afrikano-amerikanit George Floyd ka shkaktuar një numër protestash të dhunshme në shumë qytete amerikane. Kjo ishte një nga vdekjet e fundit në një seri incidentesh të ngjashme që nxitën zemërim dhe protesta kundër racizmit në mesin e forcave të zbatimit të ligjit. Incidenti rindezi zemërimin në vendin e ndarë nga pikëpamja politike dhe racore, të goditur rëndë nga pandemia e koronavirusit, që ka goditur më rëndë afrikano-amerikanët.
Shumë qytete të prekura nga trazirat sapo kanë rifilluar disa aktivitete normale ekonomike pas masave kufizuese mbi dy mujore për frenimin e përhapjes së Covid-19, që ka vrarë mbi 104,000 njerëz dhe ka lënë pa punë mbi 40 milion vetë. zëri i amerikës
Kompanitë amerikane zakonisht qëndrojnë të heshtura gjatë protestave. Jo këtë herë.
Kompani të teknologjisë, bankave, veshjeve dhe argëtimit publikuan mesazhe në mbështetje të atyre që demonstrojnë kundër trajtimit policor ndaj personave me ngjyrë.
“Jam e tronditur nga numri i drejtuesve që kanë folur për herë të parë,” tha Kellie McElhaney, një profesore në Shkollën e Biznesit në Universitetin Berkeley dhe themeluese e Qendrës për Barazi, Gjini dhe Udhëheqje në këtë shkollë.
Ajo që po i bën firmat të flasin apo të mbajnë një qëndrim, thotë ajo, është brutaliteti i videos që tregon një oficer policie në Mineapolis duke vendosur gjurin në pjesën e pasme të qafës së George Floyd, i cili vdiq.
Kompanitë “drejtohen nga njerëzit”, tha ajo. “Ata kanë punonjës, drejtues dhe klientë afrikano-amerikanë dhe me ngjyrë. Ekzistojnë rreziqe sigurisht, por përfitimi i tejkalon shumë herë rreziqet”.
Netflix, Google dhe Citibank
Netflix ka thënë në Twitter se “të heshtësh është njësoj si të jesh bashkëfajtorë”, duke shtuar “ne e kemi për detyrë që të flasin për anëtarët tanë, punonjësit, krijuesit dhe talentet tonë”
Google shtoi në faqen kryesore të kërkimit: “Ne mbështesim barazinë racore dhe të gjithë ata që e kërkojnë atë.”
Twitter ndryshoi paraqitjen e llogarisë duke shkruar hashtegun #BlackLivesMatter.
Drejtori ekzekutiv i Mikrosoftit Satya Nadella u tha punonjësve “bashkohuni me mua dhe të gjithë ekipin e drejtuesve të lartë, në mbështetje për ndryshime në kompaninë tonë, në komunitetet tona dhe në shoqërinë në përgjithësi.”
“Racizmi vazhdon të jetë në rrënjët e kaq shumë dhimbjeje dhe poshtërimi në shoqërinë tonë,” shkroi shefi i financave të kompanisë Citibank, Mark Mason, i cili është afrikano-amerikan, në një postim në blog. “Për sa kohë që kjo është e vërtetë, idealet e Amerikës për liri dhe barazi do të mbeten jashtë mundësive.”
Kompanitë e shitjeve me pakicë si Target, që është plaçkitur dhe vandalizuar në të gjithë vendin, gjithashtu kanë folur në mbështetje të protestave. Vdekja e Xhorxh Floidit nga një oficer i bardhë i policisë ka nxjerrë në dritë “dhimbjen e shtypur të shumë viteve”, tha drejtori ekzekutiv i Target, me seli në Mineapolis.
Rreziqet e të shprehurit përkundër heshtjes
Duke marrë një qëndrim, kompanitë rrezikojnë të humbasin klientët, partnerët, furnitorët dhe punonjësit që nuk pajtohen me pozicionin e korporatës, thotë zonja McElhaney. Ata gjithashtu rrezikojnë të akuzohen se po përdorin rastin për të promovuar markat e tyre pasi disa nuk i shohin deklaratat e mbështetjes së korporatave si autentike.
Por bizneset gjithashtu përballet me rreziqe nëse nuk thonë asgjë, shpjegon ajo. Punonjësit e rinj kërkojnë që drejtuesit e kompanive të shprehin qëndrimin e tyre.
“Kam tendencën të besoj se njerëzit janë duke folur sepse nuk ka asnjë mundësi tjetër,” thotë ajo. “Çdo punonjës po kërkon që drejtuesit e tyre të flasin, veçanërisht punonjësit me ngjyrë.”
Në vitin 2018, Nike realizoi një reklamë në mbështetje të Colin Kaepernick, ish-futbollisti profesionist që protestoi kundër trajtimit policor të afrikano-amerikanëve. Disa njerëz e pëlqyen atë. Të tjerë dogjën produktet e Nike-it. Sipas raportimeve, reklamimi i debatueshëm nuk e dëmtoi në fund të fundit kompaninë.
Ndërsa protestat u përhapën në SH.B.A. pas vdekjes së Floidit, Nike publikoi një video në mbështetje të mesazhit të protestuesve: “Mos i ktheni shpinën racizmit. Mos pranoni të merren jetë të pafajshme. Mos bëni më justifikime”,
Adidas, rivalja e Nike, e pubkoi këtë përsëri në Twitter. zëri i amerikës
Presidenti i SHBA Donald Trump vlerësoi Gardën Kombëtare, duke thënë se ajo po bën një punë të shkëlqyer, në përgjigje të protestave që u shndërruan në dhunë në dhjetëra qytete amerikane, pas vdekjes së një afrikano-amerikani që ishte nën prangat e policisë.
Në komentet që bëri të dielën në Twitter, Presidenti Trump fajësoi “anarkistët e udhëhequr nga ANTIFA” për nxitjen e kaosit. Ai tha se Shtetet e Bashkuara do ta shpallin Antifën një organizatë terroriste.
Lidhja Amerikane Kundër Shpifjes e përshkruan Antifën si “një grumbullim të lirë grupesh, rrjetesh dhe individësh që besojnë në kundërshtimin aktiv dhe agresiv ndaj lëvizjeve të së djathtës ekstreme.”
Trazirat në të gjithë Amerikën kanë pasuar protestat përgjithësisht paqësore pas vdekjes në Mineapolis të 46-vjeçarit George Floyd, afrikano-amerikanit që humbi jetën pasi një oficer i bardhë e kishte vënë poshtë, duke i mbajtur gjurin mbi qafë për më shumë se tetë minuta.
Në programin e Presidenti Trump për ditën e sotme përfshihej një videokonferencë me guvernatorët e shteteve, zyrtarët ligjzbatues dhe ata të sigurisë kombëtare për një diskutim që Shtëpia e Bardhë tha se synon “të mbajë të sigurta komunitetet amerikane”.
Prej disa netësh me radhë dhuna i është afruar edhe Shtëpisë së Bardhë. Mbrëmë, forcat e rendit u përballën përsëri me protestuesit në Sheshin Lafayette të Uashingtonit, ndërsa zjarrfikësit shuan një zjarr në pjesën e poshtme të kishës historike të Shën Gjonit në anën tjetër të rrugës që e ndan nga Shtëpia e Bardhë. zëri i amerikës
Protesta paqësore u shndërruan në plaçkitje, vënie zjarri dhe dhunë në të gjithë Shtetet e Bashkuara pas vdekjes së George Floyd-it ndërsa ishte në paraburgim policor në Minneapolis të Minesotës. Siç njofton Kane Farabaugh i Zërit të Amerikës, megjithë vendosjen e ndalim-qarkullimeve dhe një rritje të pranisë së forcave të rendit në rrugët e shumicës së qyteteve më të mëdha amerikane, tensionet racore kanë arritur një pikë të nxehtë.
Në trazira të përhapura që nuk janë parë në dekada … qytetet amerikane nga Siatëlli në Uashington D.C u dogjën ndërsa më shumë protesta paqësore gjatë ditës u kthyen në trazira dhe shkatërrime gjatë natën.
Guvernatorët në 12 shtete amerikane kanë aktivizuar trupat e Gardës Kombëtare për të shuar dhunën dhe për të rivendosur rendin.
Ishte masa më e fundit pas një javë tensionesh të përshkallëzuara pasi George Floyd vdiq në arrest policor. Derek Chauvin, oficeri i Mineapolisit i cili e mbërtheu Floydin në tokë duke përdorur gjurin e tij, tani përballet me akuzën e vrasjes së shkallës së tretë në lidhje me vdekjen e Floydit. Por protestuesit kërkojnë më shumë, përfshirë akuzat kundër oficerëve të tjerë të përfshirë.
“Dua të sjell ndryshim për njerëzit e mi sepse kjo ka ndodhur për shumë gjatë dhe gjërat duhet të ndryshojnë kudo sepse asgjë nuk do të ndryshojë nëse vazhdojmë të flasim, ose të vazhdojmë të postojmë diçka në mediat sociale. Kjo është e gjitha”, thotë një protestues në Mineapolis.
Që nga e enjtja, Associated Press raporton se policia ka arrestuar rreth 1.700 njerëz në 22 qytete në të gjithë vendin në lidhje me dhunën që ka lënë të djegura dhjetra biznese, oficerë të plagosur dhe disa demonstrues të vrarë.
Ajo që filloi si përgjigje ndaj vdekjes së Floydit në Mineapolis ka kapërcyer kufijtë e SHBA, duke tërhequr qindra njerëz në rrugët e Londrës në shenjë solidariteti me ata që kërkojnë barazi racore.
“Kemi parë për qindra vjet afrikano-amerikanët dhe njerëzit me ngjyra të abuzohen dhe të vriten në rrugë dhe kjo thjesht po përkeqësohet. Mjaft më, nëse ata nuk do të dëgjojnë ne” thjesht do të thërrasim me zë edhe më të lartë. Nuk do të ndalemi derisa të bëhet diçka. Mjaft Më!. Këta janë njerëz që nuk mbajnë më. Është koha për të bërë disa ndryshime”, thotë një protestues në Londër.
Ligjvënësja e Minesotës në Kongres, Ilhan Omar përfaqëson pjesë të qytetit të Mineapolis në qendrën e demonstratave dhe thotë se duhet të ketë “reforma mbarëkombëtare”.
“Trazirat që po shohim në vendin tone nuk janë vetëm për shkak të jetës që u mor, por gjithashtu sepse shumë njerëz e kanë provuar këtë përvojë. Shumë njerëz kanë përjetuar padrejtësi brenda sistemit tonë”.
Në fjalimin e përgatitur pas nisjes së suksesshme të astronautëve të parë amerikanë në një anije hapësinore komerciale, Presidenti Donald Trump tha se ndërsa ai mbështet protestat paqësore, nuk do të tolerojë shkeljet ligjore dhe shkatërrimin.
“Kujtimi i Xhorxh Floidit po përdhoset nga rebelët, plaçkitësit dhe anarkistët. Dhuna dhe vandalizmi po drejtohet nga Antifa dhe grupe të tjera radikale të krahut të majtë, të cilët po terrorizojnë të pafajshmit, po shkatërrojnë vendet e punës, po dëmtojnë bizneset dhe po djegin ndërtesat “.
Ishte një mesazh që Këshilltari i tij për Sigurinë Kombëtare Robert O’Brien mbrojti pas një nate tjetër trazirash.
“Presidenti është i indinjuar nga kjo dhe të gjithë jemi. Kjo duhet të ndalet, dhe ne po i bëjmë thirrje FBI-së të hetojë Antifan dhe të arrijë në konkluzion për këta rebelues të dhunshëm. Nuk dua që ata të ngatërrohen me protestuesit paqësorë që kanë çdo të drejtë për të dalë në rrugë dhe kjo është ajo që e bën Amerikën ndryshe nga shumë vende të tjera të botës”.
Me turmat e mëdha që mblidhen për të demonstruar vjen rreziku i përhapjes së mëtejshme të COVID-19. Ndërsa vazhdojnë trazirat në Amerikë, numri i infeksioneve në Sh.B.A nga koronavirusi po rritet gjithashtu së bashku me numrin e vdekjeve, i cili tani e kalon 100,000./VOA
Qindra njerëz u tubuan në një park pranë Shtëpisë së Bardhë në Uashington, për të protestuar për vdekjen e afrikano-amerikanit në Mineapolis të Minesotës.
Policia u rreshtua përgjatë hyrjes së parkut ndërsa protestuesit brohorisnin “jeta e afrikano-amerikanëve ka vlerë”, “duart lart, mos qëllo” dhe “pa drejtësi nuk ka paqe”.
Policët përdorën gaz lotsjellës pasi disa protesues hodhën shishe të plastikës në drejtim të tyre.
Vdekja e afrikano-amerikanit George Floyd në duart e autoriteteve javën e kaluar, ka shkaktuar tensione në Shtetet e Bashkuara.
Protestat filluan në Mineapolis, por shumë shpejt ato u zgjeruan në shumë qytete të SHBA-së, përfshirë Nju Jorkun dhe Los Angelosin , ku protestuesit u kanë vënë flakën veturave të policisë dhe kanë thyer xhamat e dyqaneve.
Video: Protesta të dhunshme në SHBA
Në qytetin e Nju Jorkut të paktën një makinë u dogj ndërsa mijëra njerëz marshuan nëpër lagje të shumta, duke brohoritur. Më pas ata mbajtën një minut heshtje para stacionit të policisë në Times Square për nder të njerëzve të vrarë nga policia.
Tensione u shënuan në qytetin Shën Pali, qyteti binjak i Mineapolis kur një kamion u drejtua drejt një turme njerëzish. Njerëzit vrapuan për t’i shpëtuar goditjes dhe pasi kamioni u ndal, ata nxorën jashtë shoferin dhe e rrahën. Policia më pas e arrestoi dhe e çoi në spital për trajtim.
Presidenti amerikan, Donald Trump, i cili besohej se ishte në Shtëpinë e Bardhë gjatë demonstratave, përgëzoi Gardën Kombëtare për përpjekjet e tyre për të parandaluar dhunën. Ai sulmoi mediat për siç tha “bërjen e gjithçkaje në fuqinë e tyre për të nxitur urrejtjen dhe anarkinë”.
Autoritetet kanë zbatuar masa të izolimit dhe urdhëruan vendosjen në rrugë të Gardës Kombëtare pasi demonstratat u zhvilluan në më shumë se 75 qytete amerikane më 25 maj.
Trump gjithashtu tha në rrjetin social Twitter se Shtetet e Bashkuara planifikojnë të shpallin Antifa-n, një rrjet i grupeve që shpesh promovojnë militantizmin e majtë – si një organizatë terroriste pasi zyrtarët federal kanë sugjeruar se mund të jenë përfshirë në valën e protestave këtë javë.
Prokurori i Përgjithshëm, Bill Barr, tha se “dhuna e nxitur dhe e kryer nga Antifa dhe grupe të tjera të ngjashme në lidhje me trazirat është terrorizëm dhe do të trajtohet në përputhje me rrethanat”.
Trump më 30 maj e quajti vdekjen e George Floyd një “tragjedi të rëndë” që e ka mbushur vendin me zemërim dhe pikëllim, por ai tha se administrata e tij nuk do të tolerojë që demonstratat të shëndrrohen në dhunë.
Si filluan trazirat?
Disa video të publikuara treguan sesi një polic i bardhë, gjatë arrestimit të George Floyd, bëri presion me gju në qafën e tij, teksa ka tentuar ta arrestojë, ndërsa Floyd dëgjohej duke bërtitur “të lutem, nuk mund të marr frymë” dhe “mos më vrit”.
George Floyd më vonë ka vdekur në spital. Videoja e incidentit nuk tregon se si nisi konfrontimi..
Uashington, 31 maj
Katër oficerët e përfshirë në çështjen Floyd janë pushuar nga puna. Ndaj policit që shihej tek bënte presion me gju në qafën e viktimës, është ngritur kallëzim penal.
Vdekja e Floyd-it është ngjarja e fundit në një seri rastesh të ngjashme të brutalitetit të policisë ndaj njerëzve me ngjyrë, përfshirë shumë raste të kapura tjera të cilët kalimtarët i kanë incizuar me telefonat e tyre dhe më pas janë publikuar nga mediat.
Rasti i afrikano-amerikanit, George Floyd, ka nxitur reagime të shumta edhe në mesin e personaliteteve të njohura të artit dhe sportit.
Legjenda e basketbollit Michael Jordan më 31 maj foli për vdekjen e Floydit, duke thënë në një deklaratë të lëshuar në Twitter se njerëzit me ngjyrë dhe pakicat “kanë pasur mjaft” racizëm në Shtetet e Bashkuara.
Ish-ylli i Chicago Bulls tha se e kupton zemërimin dhe ai ndjehet “thellësisht i trishtuar dhe i zemëruar”.
Ai tha se qëndron me ata që “thërrasin kundër racizmit dhe dhunës së rrënjosur ndaj njerëzve me ngjyrë”.
Jordan gjithashtu u bëri thirrje njerëzve që “të dëgjojnë njëri-tjetrin, të tregojnë dhembshuri dhe kurrë mos t’i kthejnë shpinën brutalitetit të pakuptimtë”.
Gjatë fundjavës, demonstrues në Kanada, Mbretëri të Bashkuar dhe Gjermani u mblodhën po ashtu për të shfaqur mbështetje për protestat.
Presidenti amerikan Donald Trump njoftoi shtyrjen e takimit të Grupit të Shtatëshes që pritej të mbahej muajin tjetër, për në shtator ose më vonë gjatë vitit. Ai tha gjithashtu se do të zgjeronte listën e vendeve pjesëmarrëse duke përfshirë Australinë, Rusinë, Korenë e Jugut dhe Indinë.
Duke folur para gazetarëve të shtunën pas kthimit të tij në Uashington nga Florida, zoti Trump tha se G7, që bën bashkë vendet me ekonomitë më të përparuara në botë, ishte një “grup shumë i vjetëruar vendesh” në formatin e tij aktual.
“Po e shtyj sepse nuk mendoj se G7 përfaqëson siç duhet atë që po ndodh në botë“, tha Presidenti Trump. Shumica e vendeve evropiane nuk bën komente të menjëhershme rreth propozimit. Një zëdhënës i qeverisë gjermane tha se Berlini ishte në pritje të informacioneve të mëtejshme. Nuk ishte e qartë nëse dëshira e zotit Trump për të ftuar vende të tjera ishte një përpjekje për ta zgjeruar përgjithmonë formatin e G7-s.
Në disa raste të mëparshme zoti Trump ka sugjeruar se duhet të shtohej edhe Rusia, duke e quajtur Moskën me rëndësi strategjike globale.
Rusia u përjashtua nga ajo që asokohe ishte G8 në 2014, pasi Moska aneksoi rajonin e Krimesë nga Ukraina. Rusia ka ende kontrollin mbi këtë territor dhe qeveri të ndryshme të G7-s i kanë kundërshtuar thirrjet e mëparshme të Presidentit Trump për të rifutur Moskës brenda këtij grupimi.
voal.ch – Një ekuipazh i lajmeve CNN të tremten transmetoi drejtpërdrejt nga shteti amerikan të Minesota arrestimin e tyre nga policia, pasi ata po mbulonin protestat për vdekjen e afrikano-amerikanit George Floyd.
Policia ka prangosur dhe arrestuar reporterin e CNN, Omar Jimenez, producentin Bill Kirkos dhe fotoreporterin Leonel Mendez rreth orës 5 të mëngjesit në CT në Minneapolis. Të tre u liruan më vonë pa pagesë.
Arrestimet erdhën mes protestave të gjera për vdekjen e George Floyd, një afrikano-amerikani që nuk mundi të marrë frymë, kur një polic i bardhë kur e prangosi i vuri gjurin në qafë.
Guvernatori i Minesota Tim Walz kërkoi një “falje publike” për arrestimin e ekuipazhit të CNN, duke thënë, “” Nuk ka asnjë arsye pse diçka e tillë duhet të ndodhë. ”
CNN reagoi në Twitter se arrestimet ishin një “shkelje e qartë e të drejtave të tyre që garantohen nga Amendamenti i Parë”.
Josh Campbell, një reporter për CNN i cili po mbulonte protestat, tha se atij i ishte afruar policia, por nuk ishte arrestuar.
“Unë u trajtova shumë ndryshe,” i tha Campbell për CNN. Transmetuesi raportoi se Jimenez është afrikan dhe latino, Mendez është spanjoll, dhe Kirkos dhe Campbell janë të dy të bardhë.
Presidenti i Shoqatës Kombëtare të Gazetarëve Afrikano-Amerikanë (NABJ), Dorothy Tucker, i dënoi arrestimet si “të panevojshme, dhe si një shkelje të Amandamentit të Parë”./VOA
Në Shtetet e Bashkuara vazhduan demonstratat në dhjetra qytete, përfshirë kryeqytetin Washington, DC për të protestuar ndaj vdekjes së afrikano-amerikanit George Floyd nën prangat e policisë së Mineapolis. Shumë prej tyre u shndërruan përsëri të dhunshme të shtunën mbrëma dhe në orët e para të së dielës. Guvernatorët e Minesotës dhe 11 shteteve të tjera kanë aktivizuar trupat e Gardës Kombëtare.
Në pesë netët e kaluara, protestat fillimisht paqësore kanë degjeneruar në plaçkitje, vënie zjarri dhe akte të tjera të dhunshme në Mineapolis ku ndodhi vrasja e George Floydi, dhe në qytete të tjera.
“Jemi nën sulm,” tha guvernatori i Minesotës, Tim Walz, i cili premtoi se do të përdoret “forcë maksimale” për të rivendosur rendin.
Megjithatë protestuesit dolën përsëri, megjithë një urdhër për ndalim qarkullimi që nga ora 8 e mbrëmjes.
“Dua të sjell ndryshim, për njerëzit e mi sepse kjo ka vazhduar për një kohë të gjatë dhe gjërat duhet të ndryshojnë”, tha një protestues në Minneapolis.
Në kryeqytetin amerikan, Uashington DC policia lëshoi spërkatës djegës ndaj demonstruesve pranë Shtëpisë së Bardhë dhe Garda Kombëtare u thirr, ndërsa shpërtheu dhuna aty këtu, natën e dytë të protestave ndaj vdekjes së Floyd-it dhe reagimit të Presidentit Donald Trump ndaj saj.
Nga Florida, ku kishte shkuar për të parë nisjen e raketës SpaceX, ai shprehu keqardhjen për vrasjen e Floydit dhe foli për dhunën në qytetet amerikane.
“Kriminelë të së majtës radikale, banditë dhe të tjerë në gjithë vendin dhe në gjithë botën, nuk do të lejohen t’u vënë flakën komuniteteve. Nuk do ta lejojmë. Dëmton ata që janë më në nevojë dhe ne do t’i mbrojmë ata që kanë më pak”.
Ai vlerësoi vendosjen e trupave të Gardës.
Protestuesit thërrisnin “Pa drejtësi, nuk ka paqe”. Disa objekte, si dyqane dhe restorante u vandalizuan.
Los Angeles, pa një nga protestat më masive, por edhe ndër dëmet më të mëdha, siç u shpreh Shefi i Policisë së qytetit, Michel Rey Moore.
“Kemi pësuar dëme të jashtëzakonshme dhe humbje të jashtëzakonshme pronash të bizneseve që po vuajnë në pandeminë më të rëndë në 100 vjet”.
Përmasat e shkatërrimit në Los Angeles po krahasohej me trazirat e vitit 1992, ku pati mbi 1 miliardë dëme materiale.
Associated Press njofton se afro 1.400 njerëz janë arrestuar në 17 qytete që nga e enjtja. Por ndërsa protestat vazhduan deri në orët e para të së dielës ky numër mund të jetë më i lartë.
Në Nju Jork, edhe mbrëmë pati konfrontime mes policisë dhe protestuesve megjithë thirrjen e autoriteteve për qetësi. Një protestuese, foli për dëshpërimin që ndjejnë afrikano-amerikanët, por tha se dhuna nuk është rruga e duhur.
“Policia e Nju Jorkut ka punën e vet për të bërë, ashtu si ne. Si afrikano-amerikanë në këtë komunitet, duhet ta kuptojmë se policia ka punën e saj. Mund të protestojmë paqësisht. Gjithë kjo djegie gjithandej ëshë e pajustifikueshme”, tha ajo.
Oficeri i policisë, Derek Chauvin, ishte kapur në video të hënën me gjurin në qafën e Floyd-it, që ishte me duar në pranga dhe i paarmatosur. Chauvin e kishte mbajtur gjurin në qafën e Floydit për tetë minuta dhe 46 sekonda. Mbi të janë ngritur akuza për vrasje./ZiA
Vdekja e afrikano-amerikanit George Floyd në duart e autoriteteve të hënën, ka shkaktuar tensione të mëdha në Shtetet e Bashkuara. Protestat janë zgjeruar në shumë qytete të SHBA-së, përfshirë Nju Jorkun, Los Angelosin dhe Tulsën, ku protestuesit u kanë vënë flakën veturave të policisë dhe kanë thyer xhamat e dyqaneve.
Protestat filluan në Mineapolis pas vdekjes së Floyd të hënën.
Policët po ndiqnin veturën me të cilën po udhëtonte Floyd, nën dyshimin për përdorim të parave të falsifikuara. Sipas policisë, atij iu tha që të largohej nga makina dhe ai tregoi rezistencë fizike, pas së cilës u prangos.
Videot treguan sesi një polic i bardhë bëri presion me gju në qafën e tij, teksa ka tentuar ta arrestojë, ndërsa Floyd dëgjohej duke bërtitur “të lutem, nuk mund të marr frymë” dhe “mos më vrit”.
George Floyd më vonë ka vdekur në spital.
Zyrtari policor të premtën u arrestua nga autoritetet nën akuzat për vrasje. Por, protestuesit janë duke kërkuar arrestimin edhe të tre zyrtarëve tjerë policorë të përfshirë.
Incidenti nxiti protesta brenda komunitetit dhe krahasime me një seri të ngjarjeve të ngjashme të viteve të fundit, kur persona me ngjyrë kanë vdekur derisa janë arrestuar nga zyrtarë policorë të racës së bardhë.
Protestuesit përplasen me forcat e sigurisë
Shumë ndërtesa dhe prona private e dyqane u sulmuan nga protestuesit në Mineapolis gjatë kësaj jave të protestave të vazhdueshme.
Një protestues pranë Shtëpisë së Bardhë në Uashington
Në Indianapolis, policia ka nisur hetimet për gjuajtje me armë zjarri, një nga të cilat la një person të vdekur në mesin e protestuesve. Policia dha pak detaje, por theksoi se nuk ka pasur zyrtarë policorë të përfshirë.
Në Uashington, qindra protestues pranë Departamentit të Drejtësisë kanë brohoritur “Nuk mund të marrë frymë”. Më vonë, ata u zhvendosën pranë Shtëpisë së Bardhë ku policia tentoi t’i shpërndajë me sprej për sy.
Njësitë e forcave ushtarake u mobilizuan në Ohajo, Misuri, Uiskonsin, Tenesi dhe Minesota.
Mijëra protestues vërshuan edhe rrugët e Çikagos dhe Nju Jorkut, pas 200 arrestimeve të premtën.
Protestuesit duke sulmuar objektin e CNN në Atlanta
Ndërkaq, Në Los Angelos, protestuesit i vunë zjarrin shumë veturave të policisë, thyen xhamat e dyqaneve të shumta. Policia tentoi t’i shpërndajë protestuesit me shkopinj gome dhe plumba gome.
Përplasja e policisë me protestuesit vjen tri ditë pasi policia tentoi në mënyrë më paqësore të shpërndajë ata, deri kur u vendosën 4,000 trupa ushtarake në Minapolis dhe u tha se numri do të shkojë në 11,000.
Presidenti i SHBA-së, Donald Trump, kishte reaguar më herët në Twitter duke urdhëruar vendosjen e trupave ushtarake në Mineapolis dhe tha se policia në Nju Jork duhet të lejohet të kryej punën e saj.
Më herët, Trump e quajti vdekjen e Floyd “tragjedi të thellë” që ka mbushur vendin me zemërim dhe mërzi.
Por, ai theksoi se administrata e tij nuk do të lejojë që protestat të eskalojnë në dhunë.
“Situata në Mineapolis nuk është më vetëm për vdekjen e George Floyd”, tha guvernatori Tim Walz.
Më shumë se 1,300 persona janë arrestuar në 16 qytete të SHBA-së që nga e enjtja.
Dhjetëra-mijëra protestues në rrugë, pa maska dhe distancë sociale, kanë ngritur shqetësim tek ekspertët shëndetësorë për përhapje më të madhe të koronavirusit, në kohën kur SHBA-ja është duke tentuar rihapjen e ekonomisë.
Protestat vazhduan të shtunën për ditën e pestë radhazi në disa pjesë të SHBA-së në shenjë pakënaqësie për vdekjen e George Floyd, afro-amerikanit të paarmatosur që vdiq pasi u arrestua nga një ish-polic i bardhë, raporton Anadolu Agency (AA).
Në kryeqytetin e vendit, Washington, vendi i tubimit ishte Lafayette Park, afër Shtëpisë së Bardhë, ku mijëra njerëz, përfshirë të bardhë dhe muslimanë, u mblodhën të shtunën vonë.
Protestuesit brohorisnin “Nuk mund të marr frymë”, “Jeta e të zinjëve është e rëndësishme” dhe “Nuk ka drejtësi, nuk ka paqe!”, midis tjerash, për natën e dytë me radhë. Gjashtë veta u arrestuan gjatë protestave të premten në mbrëmje, sipas Shërbimit Sekret të SHBA-së.
Protestat vazhduan të shtunën për ditën e pestë radhazi në disa pjesë të SHBA-së në shenjë pakënaqësie për vdekjen e George Floyd, afro-amerikanit të paarmatosur që vdiq pasi u arrestua nga një ish-polic i bardhë. Në kryeqytetin e vendit, Washington, vendi i tubimit ishte Lafayette Park, afër Shtëpisë së Bardhë, ku mijëra njerëz, përfshirë të bardhë dhe muslimanë, u mblodhën të shtunën vonë. ( Yasin Öztürk – Anadolu Agency )
Demonstruesit hoqën barrikadat e sigurisë, hodhën shishe me ujë në drejtim të policisë dhe brohorisnin parulla kundër presidentit Donald Trump.
Garda Kombëtare i doli në ndihmë Policisë në Park dhe Shërbimit Sekret, pasi më shumë protestues u mblodhën në vendin e ngjarjes. Policia përdori gaz lotsjellës për të shpërndarë protestuesit.
Protestat e para shpërthyen pasi Floyd, 46 vjeç, vdiq pasi oficeri tashmë i shkarkuar dhe i arrestuar Derek Chauvin i vuri gjurin në qafë gjatë arrestimit fatal në Minneapolis të Minesotas të hënën.
Chauvin, 44 vjeç, u arrestua të premten dhe u akuzua për vrasje të shkallës së tretë dhe vrasje të shkallës së dytë, por kjo nuk e shuajti zemërimin në lidhje me brutalitetin dhe dhunën e policisë.
Tre oficerë të tjerë policorë, të përfshirë në vdekjen e Floidit, fjalët e fundit të të cilit ishin “Nuk mund të marr frymë”, u pushuan së bashku me Chauvin por nuk janë akuzuar.
Kërkesa për drejtësi
Protestuesit po kërkojnë arrestimin e tre oficerëve të tjerë dhe drejtësi për Floyd si dhe dhënien fund brutalitetit policor kundër afro-amerikanëve.
Protestat e së shtunës u përhapën në California, New York, Texas, Massachusetts, Kentucky, Georgia, Illinois, Michigan, dhe Washington, ndër të tjera.
Ushtarët e Gardës Kombëtare janë aktivizuar në disa shtete.
Pas protestave në Texas, guvernatori Gregg Abbott aktivizoi Gardën Kombëtare, duke thënë në një deklaratë se “dhuna dhe plaçkitja nuk do të tolerohen”.
Në më shumë se 30 qytete, përfshirë Los Angeles, Chicago, Atlanta dhe Seattle, autoritetet vendosën orë policore me shpresën për të shuar protestat e dhunshme.
Në New York City, protestuesit marshuan në Harlem dhe bllokuan trafikun në autostradën përgjatë Lumit Lindor në Manhattan, sipas raporteve të shumta.
Departamenti i Policisë në New York raportoi se ka rrestuar mbi 200 veta pas protestave të së premtes në mbrëmje.
Në Nashville, policia vendosi orë policore të shtunën pasi protestat u shndërruan në incidente të dhunshme dhe u dogj bashkia, sipas një uebfaqeje të lajmeve nga Tennessee.
Protestuesit paqësorë
Përveç atyre që u kthyen në të dhunshme, pati protesta paqësore. Në Minneapolis, një grup demonstruesish pastruan rrugët e shkatërruara nga përleshjet midis policisë dhe protestuesve.
Më parë gjatë ditës, guvernatori Tim Walz tha se protestat e dhunshme nuk kanë “më” të bëjnë me Floyd dhe mobilizuan plotësisht Gardën Kombëtare të shtetit.
Vendimi i tij erdhi një ditë pasi protestuesit injoruan orën policore të detyrueshme në Minneapolis dhe St. Paul, ku demonstruesit u përleshën me policinë dhe dogjën pronat private.
Kryetarët e këtyre dy qyteteve u thanë gazetarëve se shumica e protestuesve të dhunshëm nuk ishin banorë të Minneapolis dhe St. Paul.
“Ne kemi parë që institucionet e komunitetit janë vënë në flakë. Dhe unë dua të jem shumë, shumë i qartë. Njerëzit që po e bëjnë këtë nuk janë banorë të Minneapolis”, tha kryebashkiaku Jacob Frey në një konferencë për shtyp të shtunën.
Trump tha se përkujtimi për Floyd-in po njolloset nga trazirat, plaçkitësit dhe anarkistët.
Duke folur në Qendrën Hapësinore Kennedy në Florida, ai tha: “Ajo që ne po shohim tani në rrugët e qyteteve tona nuk ka asnjë lidhje me drejtësinë apo paqen”.
Që nga e enjtja, disa dyqane në Minneapolis dhe Dallas u grabitën dhe u raportuan zjarrvënie.
Vdekja e Floyd ka paralele të forta me atë të Eric Garner, i cili vdiq gjatë një arrestimi fatal të vitit 2014 në New York, duke përgjëruar vazhdimisht oficerët: “Nuk mund të marr frymë”.
Fraza u bë një moto e marshimit për protestuesit kundër vrasjeve të burrave dhe grave të paarmatosur nga policia.
Presidenti Donald Trump dhe nënpresidenti Mike Pence shohin lëshimin e anijes së kompanisë SpaceX
Nisja drejt Stacionit Ndërkombëtar të Hapësirës e dy astronautëve të NASA-s në bordin e raketës Falcon 9, u bë realitet të shtunën pasdite, pas një prove të dytë.
Lëshimi i astronautëve, Kolonelit të Marinsave Doug Hurley dhe Kolonelit të Forcave Ajrore Bob Behnken, i jep fund një pauze nëntë vjeçare të NASA-s.
Raketa e kompanisë private SpaceX, në pronësi të miliarderit Elon Musk, u lëshua nga Qendra e Hapësirës Kennedy në Florida dhe udhëtimi deri në Stacionin Ndërkombëtar të Hapësirës zgjat 19-orë.
SpaceX
Presidenti Donald Trump dhe nënpresidenti Mike Pence panë lëshimin e anijes vga Cape Canaveral i Floridës.
10 minuta pas nisjes, faza e parë e raketës Falcon 9 u nda nga pjesa tjetër dhe u ul me sukses në Tokë për t’u përdorur përsëri. Më pas u nda edhe faza e dytë e raketës dhe kapsula e astronautëve vazhdoi udhëtimin drejt Stacionit Ndërkombëtar të Hapësirës.
Për Elon Musk, ngjarja e së shtunës shënon një tjetër moment historik për raketat me shumë përdorime të kompanisë kaliforniane Hawthorne, të cilat e bëjnë fluturimin hapësinor më pak të kushtueshëm dhe më të shpeshtë.
Elon Musk
Kjo shënon gjithashtu herën e parë që një mjet hapësire i zhvilluar dhe operuar në mënyrë private, e jo NASA, dërgon amerikanë në orbitë rreth Tokës.
ASTRONAUTËT
Kur anija e hapësirës Atlantis u nis për herë të fundit nga Cape Canaveral më 8 korrik 2011, ajo drejtohej nga astronauti i NASA-s Doug Hurley.
Tani gati një dekadë më vonë, Hurley është një nga dy pilotët e provës për anijen raketë krejt të re të prodhuar nga SpaceX për këtë fluturim.
Astronautët e NASA-s, Koloneli i Marinsave në pension Doug Hurley dhe Koloneli i Forcave Ajrore Bob Behnken janë shokë klase, miq, veteranë të eksplorimit të hapësirës, të martuar me veterane të hapësirës dhe kanë të dy djem të rinj.
Douglas Hurley, left, and Robert Behnken
Ata përdorin të njëjtën platformë lëshimi ku Atlantis mbylli programin e nisjeve në 2011, viti i fundit i lëshimit nga vendi i tyre për astronautët e NASA-s.
“Tetë vite e gjysëm, nëntë vite më vonë, shohim se jo vetëm jemi gati të fluturojmë mjetin e parë me ekuipazh drejt Stacionit Hapësinor, por kemi edhe ngazëllimin se mund të rikthehemi ndoshta në Hënë pas pak vitesh. Pasi ulëm anijen Atlantis në 2011, nuk do të kishim menduar kurrë se do ndodheshim këtu nëntë vite më vonë. Është shumë më mirë se ç’e kisha imagjinuar“, thotë Hurley.
Që atëherë, e vetmja mënyrë për të shkuar në stacionin hapësinor për astronautët ka qenë me raketa ruse të lëshuara nga Kazakistani.
Hurley do të drejtojë nisjen dhe uljen, një detyrë e përshtatshme për pilotin e fluturimit të fundit të anijes hapësinore të NASA-s.
Behnken, një inxhinier mekanik me gjashtë shëtitje në hapësirë në biografinë e tij, do të mbikëqyrë kontaktin dhe uljen në Stacionin Ndërkombëtar Hapësinor (ISS).
Hurley, 53 vjeç dhe Behnken, 49 vjeç, janë ekuipazhi i parë i pilotëve të NASA-s në dekada.
Hurley dhe Behnken janë martuar me kolege astronaute të NASA-s: Karen Nyberg dhe Megan McArthur. Secili çift ka nga një djalë, në moshën dhjetë dhe gjashtë vjeçare.
Megjithëse kapsula e ekuipazhit Dragon dhe sistemi i saj i shpëtimit tashmë janë demonstruar në fluturime me manekinë, nuk ka ndonjë garanci. Në fluturimin hapësinor, kurrë nuk ekziston një gjë e tillë.
“Mendoj se janë kaq shumë faktorë teknikë dhe gjëra tek të cilat duhet të përqëndrohemi për t’u siguruar që do t’ia dalim mbanë, për vendin tonë në histori, apo qoftë edhe duke u përpjekur t’i vendosim emrat tanë në të njëjtat fjali si njerëzit që kanë qenë përpara nesh. Duket e parakohshme derisa ta kemi realizuar“, thotë Behnken.
Fluturimi i tyre shënon rikthimin e nisjes së astronautëve nga Shtetet e Bashkuara, si dhe të parin e këtij lloji nga një kompani private. zëri i amerikës
Presidenti Donald Trump tha të premten se Shtetet e Bashkuara po ndërpresin marrëdhëniet me Organizatën Botërore të Shëndetit për shkak të trajtimit nga ana e saj të koronavirusit, duke thënë se OBSH-ja ishte bërë në thelb një organizatë kukull e Kinës.
Duke u shfaqur në Kopshtin e Trëndafilave të Shtëpisë së Bardhë, Trump shkoi më tej kërcënimeve të përsëritura për të eleminuar fondet amerikane për organizatën, që shkon në disa qindra milion dollarë në vit.
Trump tha se OBSH-ja kishte dështuar të bënte reforma në organizatë që presidenti kishte kërkuar përmes një letre më 18 maj drejtuar Drejtorit të Përgjithshëm të OBSH-së Tedros Adhanom Ghebreyesus. Në letër jepej 30 ditë afat për t’u angazhuar për reforma.
Në paraqitjen e tij në Kopshtin e Trëndafilave, Trump e lidhi OBSH-në ngushtë me Kinën, nga e kishte origjinën koronavirusi.
Ai tha se zyrtarët kinezë “injoruan detyrimet e tyre të raportimit” në OBSH në lidhje me virusin dhe i bëri presion OBSH që të “mashtrojë botën” kur virusi u zbulua për herë të parë nga autoritetet kineze.
“Kina ka kontroll të plotë mbi Organizatën Botërore të Shëndetit, pavarësisht se ka paguar vetëm 40 milion dollarë në vit në krahasim me ato që kanë paguar Shtetet e Bashkuara, shumë e cila është afërsisht 450 milion dollarë në vit. Ne kemi detajuar reformat që duhet të bëjë dhe të angazhohen drejtpërdrejt me to, por OBSH nuk ka pranuar të veprojnë “, tha Presidenti Trump.
“Për shkak se ata nuk kanë arritur të bëjnë reformat e kërkuara dhe të nevojshme, ne po ndërpresim sot marrëdhëniet tona me Organizatën Botërore të Shëndetit dhe do të ridrejtojmë ato fonde në të gjithë botën duke plotësuar nevoja urgjente globale të shëndetit publik,” tha presidenti.
Shkurtimi i kontributit të Sh.B.A mund të ketë pasoja globale pasi OBSH është e përfshirë në përgjigjen ndaj pandemisë, e cila ka goditur dhjetra vende.
Presidenti Trump ka kohë që ka vënë në dyshim vlerën e Kombeve të Bashkuara dhe ka përçmuar rëndësinë e multilateralizmit ndërsa përqendrohet në një moton “Amerika e Para”. Që nga marrja e postit, Presidenti Trump ka tërhequr Shtetet e Bashkuara nga Komisioni i të Drejtave të Njeriut të OKB-së, agjencia kulturore e UNESCO, një marrëveshje globale për të adresuar ndryshimin e klimës dhe marrëveshjen bërthamore të Iranit.
Organizata Botërore e Shëndetit është një organ i pavarur ndërkombëtar që punon me Kombet e Bashkuara. OBSH nuk iu përgjigj menjëherë një kërkese për koment për vendimin e presidentitTrump.
“Ne kemi bërë thirrje në mënyrë të vazhdueshme që të gjitha shtetet të mbështesin OBSH-në”, tha një zëdhënës i Sekretarit të Përgjithshëm të OKB-së. Antonio Guterres kur u pyet për vendimin e presidentit Trump.
Vdekja e një burri afrikano-amerikan në pranga, që humbi jetën ndërsa një oficer i bardhë policie, i bllokonte frymën duke mbajtur gjurin në grykën e tij, ka shkaktuar protesta në gjithë Shtetet e Bashkuara.
Presidenti Donald Trump tha se mbështet protestat paqësore por se nuk do të lejojë situatën “të degradohet më tej në anarki dhe kaos të paligjshëm”, njofton korrespondentja e Zërit të Amerikës pranë Shtëpisë së Bardhë, Patsy Widakuswara.
Protestat vazhduan të premten në Mineapolis të Minesotës, për vdekjen e George Floyd-it. Floyd, një afrikano-amerikan vdiq më 25 maj pasi një një oficer i bardhë policie kishte mbajtur gjurin në qafën e tij për mbi tetë minuta.
Floyd ishte nën pranga dhe i paarmatosur dhe mund të dëgjohet të lutet për jetën e tij, duke thënë “nuk marr dot frymë”.
Oficeri Derek Chauvin është arrestuar dhe mbi të janë ngritur akuza për vrasje.
Presidenti Donald Trump ka kërkuar përshpejtimin e hetimit për vdekjen e Floyd-it. “Kemi protestues paqësore dhe unë e mbështes të drejtën për protesta paqësore. Nuk mund të lejojnë një situatë si ajo që ndodhi në Mineapoli të shkojnë më tej në anarki dhe kaos të paligjshëm”, tha ai.
Në një mesazh të premten që Twitter-i e konsideroi si “nxitje të dhunës”, zoti Trump shkruante se nëse ishte e nevojshme do të dërgonte ushtrinë.
Ai tha gjithashtu se “kur fillojnë plaçkitjet, fillojnë të shtënat”, një frazë e përdorur në vitet ’60 nga një oficer policie në Majami, i akuzuar për metoda raciste.
Kritikët akuzojnë zotin Trump se po nxit dhunë.
“Ai po nxit ndasitë racore. Kemi qenë në një situatë shpërthyese e cila është keqësuar kur ai mori detyrën në vitin 2016. Mund të themi që kemi qindra vjet me këtë situatë, që ai po e ndez më tej”, thotë Keith Mayes, porfesor i marrëdhënieve racore në Universitetin e Minesotës.
Guvernatori i Minesotës, Tim Walz e pranoi dhimbjen dhe ankthin e komunitetit me ngjyrë, por bëri thirrje për ndalejne plaçkitjes dhe dhunës. “Nuk mund ta pranoj se nuk funksionojmë dot si shoqëri dhe nuk dua të largohet vëmendja nga njolla që duhet të heqim, që është ajo që ndodh kur ka racizëm të institucionalizuar që lejon trajtimin e tillë të një njeriu në mes të ditës”, tha ai.
Protestat janë përhapur në gjithë vendin.
“Dikur, varnim një flamur në dritare për të treguar se dikush tjetër ishte linçuar. Ka ardhur koha të bëjmë të njëjtën gjë në median sociale, për të thënë: nuk duam të vdesim më”, thotë Derrick Johnson, President i Shoqatës Kombëtare për Avancimin e Personave me Ngjyrë.
Kandidati demokrat për President, Joe Biden nga shtëpia e tij në Delaware tha se pas vdekjes së Floyd-it ishte “plaga e hapur” e racizmit të vazhdueshëm. “Nuk mund të shohim nga ana tjetër. Nuk mund të heshtim. Nuk mund t’i dëgjojmë më fjalët ‘nuk marr dot frymë’ dhe të mos bëjmë asgjë”, tha ai.
Numri i protestuesve në afërsi me njëri-tjetrin në gjithë Shtetet e Bashkuara, ka ngritur shqetësime se grumbullimet e mëdha do të shkaktojnë një rritje të rasteve me koronavirus në vend.
Protestuesit janë përplasur me forcat e sigurisë në shumë qytete në Shtetet e Bashkuara, pas vdekjes së afrikano-amerikanit, George Floyd, në duart e autoriteteve në Mineapolis ditë më parë.
Qindra njerëz kanë protestuar para Shtëpisë së Bardhë, duke brohoritur “Nuk mund të marrë frymë”, fjalët të cilat i kishte thënë Floyd.
Shtëpia e Bardhë u vendos në izolim të premten për shkak të kërcënimeve për sigurinë.
Minesota, Nju Jorku dhe Atlanta kanë nuk kanë pushuar nga protestat e dhunshme për ditë me radhë, në kërkim të drejtësisë për Floyd.
Protestuesit i kanë vendosur zjarrin një stacioni të policisë në Mineapolis dhe veturave.
Në Atlanta u shpall gjendje e jashtëzakonshme në disa zona për të ruajtur qytetarët dhe pronat, pasi shumë ndërtesa u sulmuan nga protestuesit.
Si vdiq George Floyd?
Policët po ndiqnin veturën me të cilën po udhëtonte Floyd, nën dyshimin për përdorim të parave të falsifikuara. Sipas policisë, atij iu tha që të largohej nga makina dhe ai tregoi rezistencë fizike, pas së cilës u prangos.
Videot treguan sesi një polic i bardhë bëri presion me gju në qafën e tij, teksa ka tentuar ta arrestojë, ndërsa Floyd dëgjohej duke bërtitur “të lutem, nuk mund të marr frymë” dhe “mos më vrit”.
George Floyd më vonë ka vdekur në spital.
Një oficer policie, i pushuar nga puna pas vdekjes së afrikano-amerikanit George Floyd, u arrestua dhe u akuzua për vrasje.
Oficeri Derek Chauvin, pritet të paraqitet para gjykatës në Mineapolis të hënën.
Presidenti Donald Trump e ka përshkruar incidentin si të tmerrshëm dhe tha se ka biseduar me familjen e viktimës. rel
Drejtori i ri i shërbimeve amerikane të zbulimit duket se është zhytur në ujëra politike që në javën e parë në detyrë, duke hequr klasifikimin sekret për dokumente që sipas aleatëve të presidentit mbështesin argumentin e tyre se Michael Flynn, ish-këshilltari i presidentit, u ndoq pa të drejtë penalisht.
Ky vendim i pazakontë për të nxjerrë transkripte të telefonatave të zotit Flynn me ambasadorin rus, është pjesë e përpjekjeve të administratës Trump për të bërë publike element dhe të dhëna nga hetimi për kontaktet me Rusinë, me shpresën se do të krijohet bindja që zyrtarë të administratës Obama nuk vepruan në përputhje me rregullat.
Transkriptet e telefonatave me ambasadorin e atëhershëm rus Sergey Kislyak, u japin rastin të dyja palëve për të forcuar argumentet e tyre.
Siç kanë argumentuar prokurorët, duket se transkriptet tregojnë se zoti Flynn i kërkoi ambasadorit Kislyak që Rusia të tregohej e duruar dhe të mos rriste tensionet me SHBA, në përgjigje të sanksioneve të reja amerikane kundër Moskës. Flynn pranoi fajësinë se kishte gënjyer në deklaratat e dhëna FBI-së për këtë telefonatë.
Por republikanët që këmbëngulin se zoti Flynn thjesht po përpiqej të shmangte keqësimin e situatës me Kremlinin menjëherë theksuan se transkriptet tregojnë që s’kishte asgjë të parregullt në këtë telefonatë. Departamenti i Drejtësisë i administratës Trump e shpalli të pavlefshëm këtë çështje muajin e kaluar duke thënë se FBI-ja nuk kishte arsye për të marrë në pyetje zotin Flynn.
Dokumentet u bënë publike të premten nga republikanët e Senatit pasi u hoq klasifikimi “sekret” nga John Ratcliffe, ish-ligjvënës nga Teksasi, një person i besuar i Presidentit Trump, i cili në fillim të javës bëri betimin si drejtor i inteligjencës kombëtare.
Pararendësi i zotit Ratcliffe, Ambasadori Richard Grenell këtë muaj hoqi klasifikimin sekret për një listë emrash me zyrtarë të zbulimit dhe të administratës Obama, të cilët në fund të 2016 dhe në fillim të 2017 kërkuan të dinë kush ishte një shtetas amerikan, i cili nuk ishte identifikuar me emër në raportet e zbulimit. Siç rezultoi, ai emër ishte Michael Flynn.
Ky proces nuk është i pazakontë në vetvete, pasi “demaskimi” siç quhet procesi i zbulimit të identitetit të një shtetasi amerikan bëhen shpesh me kërkesë të zyrtarëve të autorizuar, por përkrahësit e presidentit kanë këmbëngulur se kërkesa u bë për arsye politike. zëri i amerikës
Një ndër katër policët e përfshirë në arrestimin e George Floyd, një 46-vjeçar afrikano-amerikan i cili vdiq pas arrestit të hënën në Minesota, është arrestuar dhe është tani akuzuar për vrasje me paramendim të grades së tretë, si dhe vrasje pa paramendim.
Oficeri Derek Chauvin është polici që shihet në videon e xhiruar nga një kalimtar, duke mbajtur gjurin në qafën e viktimës, ndërkohë që George Floyd dëgjohet duke u ankuar se nuk merr dot frymë. Videoja vazhdon mbi pesë minuta, kur George Floyd është i shtrirë përtokë dhe oficeri Derek Chauvin vazhdon ta mbajë nën kontroll me gjurin në qafë.
Qyteti i Minesotës është përfshirë nga trazirat, ndërkohë që autoritetet kanë thirrur Gardën Kombëtare për të ruajtur rendin, pas natës së të enjtes që u shoqërua me protesta të dhunshme të ndezura nga vdekja e 46-vjeçarit George Floyd.
Ky rast ka tërhequr vëmendjen e mbarë vendit si dhe vëmendje ndërkombëtare dhe ka rindezur debatin për trajtimin e personave me ngjyrë në SHBA. Demonstratat tani janë përhapur në qytete të ndryshme amerikane./ZiA
Kryetari i bashkisë së Mineapolisit Jacob Frey shpalli të enjten gjendjen e jashtëzakonshme për shkak të protestave të dhunshme që kanë përfshirë qytetin dhe që u shtrinë edhe gjatë ditës së premte. Një stacion policie dhe ndërtesa të tjera u dogjën në qytetin e mbushur me tension, pas vdekjes së një afrikano-amerikani nën arrest. Personi ishte nën pranga dhe një polic i bardhë i kishte vënë gjurin në qafë, ndërsa ai thërriste se nuk po mbushej dot me frymë.
Guvernatori i Minesotës Tim Walz thirri Gardën Kombëtare në një përpjekje për të ndalur përhapjen e mëtejshme të dhunës. Garda Kombëtare njoftoi të enjten vonë se janë aktivizuar pesëqind ushtarë të cilët do të vendosen në qytetet Saint Paul, Mineapolisit e në disa zona përreth.
Një reporter i gazetës “Minneapolis Star Tribune” postoi në twitter se automjete të blinduara po lëviznin drejt qendrës së qytetit përpara agimit të ditës së premten. Kryetari i Bashkisë së Mineapolisit Jacob Frey tha të premten herët në mëngjes se në qytet ka “shumë dhimbje e zemërim”, por ai shtoi se plaçkitjet dhe djegiet janë akte të papranueshme. Pronat e dëmtuara ishin thelbësore për komunitetin, shtoi ai.
Të enjten vonë në mbrëmje, qindra demonstrues marshuan fillimisht paqësisht, më pas një rajon policie në Mineapolis u përfshi nga flakët. Gazetarët në vendngjarje thanë se policia ishte larguar tërësisht nga zona dhe se ata nuk ishin të sigurt se ku ndodheshin punonjësit e policisë.
Postimet në Twitter tregonin se stacioni policor ishte braktisur dhe se nuk kishte zjarrfikës. Ndërkohë zyrtarët e qytetit bënë të ditur se sipas informacionesh të pakonfirmuara linjat e furnizimit me gaz ishin prerë dhe se ndërtesa e bashkisë mund të shpërthente. Disa dyqane në Mineapolis si dhe ne qytetin e Saint Paul u dogjën të enjten në mbrëmje. Policia e Saint Paul njoftoi se punonjës të saj ishin goditur me gurë dhe shishe.
Të premten herët në mëngjes policia e këtij qyteti shkruante në një postim twitter se më shumë se 170 biznese ishin dëmtuar apo plaçkitur dhe qyteti ishte përfshirë nga disa vatra zjarri, por nuk kishte të plagosur në gjendje serioze. Protestestat u nxitën nga vdekja e George Floyd nje afrikano-amerikan, ndërsa ishte ndaluar nga një polic i bardhë. Sipas rrjetit televiziv CNN ndaj oficerit të policisë ishin bërë 18 ankesa më parë pranë shërbimit të brendshëm të Departamentit të Policisë së Mineapolisit.
Policia e Minneapolis thotë se Floyd i ngjante një të dyshuari që ishte përpjekur të përdorte një kartmonedhë të falsifikuar 20 dollarëshe në një dyqan ushqimesh. Policia thotë se ai i kishte rezistuar arrestimit. Kalimtarët filmuan me celular momentin kur oficerët ndaluan Floydin. Videoja u përhap gjerësisht kur u postua në internet.
“Të lutem, të lutem, të lutem, nuk mund të marr frymë. Të lutem, o burrë”, u përgjërua Floyd, ndërsa mbahej nga një polic i bardhë. Sipas videove të celularit, oficeri e mbajti Floydin në tokë dhe i vendosi gjurin në qafë. Floyd ishte ndërkohë me pranga.
Protestuesit duke i vënë flakën stacionit të policisë në Minneapolis
Oficeri që e prangosi Floydin e nxiste të “qetësohej”, por oficeri e mbajti gjurin në qafën e Floydit edhe pasi Floyd pushoi së lëvizuri. Një dëshmitar tha se ai dëgjoi Floydin duke thirrur për nënën e tij para se të vdiste.
Për shkak të thirrjes së tij “Nuk marr dot frymë”, vdekja e tij u krahasua shpejt me atë të Eric Garnerit, një afrikano-amerikan i paarmatosur në New York i cili vdiq në 2014 pasi një oficer i bardhë e shtrëngoi rreth qafës me krah, ndërsa ai lutej për jetën e tij. Garner gjithashtu u tha oficerëve “Nuk marr dot frymë”, dhe klithma e tij u bë simbol kombëtar kundër brutalitetit të policisë.
Tubime po mbaheshin edhe në qytete të tjera të enjten. Agjensia e lajmeve Associated Press (AP) raportoi se qindra demonstrues qëndruan në rrugët në qendër të qytetit dhe brohorisnin ndërsa errësira binte jashtë Kapitolit të Shtetit të Kolorados në Denver, ku protestuesit spërkatën me bojë dhe thyen xhama makinash.
AP raportoi se videoklipi i xhiruar nga protestuesja Anabel Escobar, 29 vjeçare, tregon një burrë mbi kofanon e një fuoristrade që po çante përmes turmës përpara Kapitolit. Videoja tregonte se shoferi po rriste shpejtësinë dhe më pas dukej se po përpiqej të shtypte personin pasi ra nga makina. Automjeti u largua ndërsa protestuesit e tjerë e ndoqën atë. Është e paqartë nëse njeriu mbi makinë ishte plagosur.
Në pjesë të tjera të qendrës së qytetit Denver, policia hodhi gaz lotsjellës dhe përdori plumba gome për të larguar njerëzit që po bllokonin rrugët, tha agjensia e lajmeve AP. Gazeta Washington Post raportoi se pati të shtëna me armë.
Departamenti i Policisë në Minneapolis shkarkoi të katër oficerët e përfshirë në arrestimin e Floydit. FBI-ja i është bashkuar hetimeve të policisë së Minneapolisit dhe zyrës së prokurorit të kontesë Hennepin. Departamenti i Drejtësisë tha se hetimi është një përparësi kryesore.
Presidenti Donald Trump shkruajti në Twitter se ka kërkuar që hetimi të “shpejtohet. … Zemra ime shkon familja dhe miqtë e Xhorxhit. Drejtësia do të bëhet!”.
Ai më vonë kritikoi udhëheqësit e qytetit si “të dobët”, tha se ishte i gatshëm të “dërgoj Gardën Kombëtare dhe ta kryejë punën si duhet” dhe paralajmëroi se në rast se do të ketë ndonjë vështirësi, “ne do të marrim kontrollin, por kur fillon plaçkitja, të shtënat fillojnë…”. Twitter më vonë e shënoi mesazhin, duke thënë se “shkelte Rregullat e Twitter-it në lidhje me lavdërimin e dhunës”.
Kryebashkiaku Jacob Frey, kur u njoftua nga gazetarët për këto mesazhe në Twitter, tha se: “Donald Trump nuk di asgjë për forcën e Minneapolisit.” dhe “Ne jemi të fortë si dreqi”.
Sindikata e policisë së qytetit po i kërkon publikut të presë derisa hetimi të përfundojë përpara se të “nxitojnë në një përfundim dhe të dënojnë menjëherë oficerët tanë.”
Por publiku po reagon për videon, e cila tregon se koka e Floydit është e kthyer mënjanë, ndërsa ai nuk duket se po reziston. Nga fundi i videos, vijnë mjekët e urgjencës, ngrenë Floyd-in e mpirë mbi një barelë dhe e vendosin atë në një ambulancë.
“Ai nuk po rezistonte në mënyrë aktive dhe po thoshte se nuk mund të merrte frymë,” tha Charles P. Stephenson, një ish-oficer policie dhe ish-agjent i FBI-së me ekspertizë në taktikat e përdorimit të forcës, i cituar nga Associated Press. “Duhet ta kishin parasysh se ekzistonte mundësia (që Floyd nuk mund të merrte frymë), dhe të lironin menjëherë çdo lloj kufizimi që mund t’u kishin bërë rrugëve të frymëmarrjes”.
Zyrtarët e zbatimit të ligjit kanë shumë mënyra për të ndaluar njerëzit, por “asnjë akademi policie që ne njohim nuk i mëson oficerët e policisë të përdorin gjurin e tyre, tua vendosin atë në qafë”, thotë Chuck Wexler, drejtor i Forumit Ekzekutiv të Hulumtimit Policor, i cili studion dhe jep këshilla për praktikat e policisë. “Kjo thjesht nuk u mësohet sepse mund të ndikojë në frymëmarrje dhe tek arteriet karotide (një enë e rëndësishme që furnizon gjakun në tru). Kështu që kur policia shikon atë video, ata janë të tronditur që janë përdorur ato taktika”.
Të enjten, Jacob Frey, kryetari i bashkisë së Minneapolisit, u bëri thirrje të gjithëve në qytet që të mbajnë qetësinë pas dy netëve të dhunës kur pati zjarrvënie dhe njerëz – të bardhë dhe afrikano-amerikanë – që duket se grabisnin një dyqan Target, duke shtyrë karrocat me mallra në rrugë.
Brenda supermarketit të grabitur
Dritaret e pothuajse çdo dyqani përreth supermarketit Target u thyen dhe një restorant hamburgerash u dogj krejtësisht.
Policia me veshje mbrojtëse hodhi gaz lotsjellës për të shpërndarë turmën që demonstronte para një rajoni të policisë në Minneapolis. Ndërtesa dhe një makinë policie u dëmtuan.
Nuk u raportuan plagosje serioze, por policia e Minneapolisit ka arrestuar një të dyshuar që ata thanë se qëlloi dhe vrau një person që besonte se po përpiqej të plaçkiste një dyqan.
Disa banorë që jetojnë pranë dyqaneve të plaçkitura kritikuan ashpër policinë, por thanë se nuk mund ta kuptojnë pse njerëzit po shkatërrojnë lagjen e tyre, përfshirë vendet ku bënin pazar.
Në qytetin Nju Jork, raportoi Associated Press, protestuesit sfiduan masat ndaluese për koronavirusin në tubimet publike të enjten, duke u përplasur me policinë. Demonstrata u zhvilluan gjithashtu në Albuquerque, New Mexico. Një ditë më parë, demonstruesit kishin dalë në rrugë në Los Angeles dhe Memfis.
Vdekja e Floydit tërhoqi vëmendje ndërkombëtare.
Komisionerja e Lartë e OKB-së për të Drejtat e Njeriut, Michelle Bachelet, tha se autoritetet amerikane kanë për detyrë të sigurohen që do të bëhet drejtësi, pasi ajo lexoi listën e burrave afrikano-amerikanë që kanë humbur jetën në paraburgimin e policisë amerikane gjatë viteve të fundit.
“Në shumë raste në të kaluarën, hetime të tilla i kanë konsideruar vrasjet të arsyeshme mbi baza të dyshimta, ose janë vendosur vetëm masa administrative,” tha ajo.
Ndërsa zonja Bachelet tha se racizmi “i ngulitur dhe i përhapur” në Shtetet e Bashkuara duhet të njihet dhe trajtohet, ajo gjithashtu tha se më shumë dhunë dhe plaçkitje nuk do ta zgjidhin problemin:
“Unë u bëj thirrje protestuesve të shprehin kërkesat e tyre për drejtësi në mënyrë paqësore, dhe i bëj thirrje policisë që të bëjë kujdes maksimal për të mos ndezur situatën aktuale edhe më shumë me ndonjë përdorim të mëtejshëm të forcës së tepruar.”
Vëllai i Floydit, Philonise Floyd, i tha kanalit CNN të enjten se ai është “lodhur duke parë afrikano-amerikanë që vdesin” dhe u bëri thirrje protestuesve të ruajnë paqen. Ai i bëri thirrje policisë “të filloni të bëni punën tuaj në mënyrën e duhur, sepse unë nuk e kam parë këtë. … dua drejtësi. Unë thjesht dua drejtësi”, tha ai, duke u munduar të mbante lotët.
Kryebashkiaku Frey tha të enjten se reagimi i dhunshëm ndaj vdekjes së Floyd-it është “rezultat i zemërimit dhe trishtimit kaq shumë të akumuluar … që është gdhendur në komunitetin tonë afrikano-amerikan, jo vetëm për shkak të pesë minutave të tmerrit, por për 400 vjet”, – një referencë kjo për skllavërinë dhe racizmin që e pasoi.
Zoti Frey është i bardhë, dhe qyteti që ai drejton është rreth 64 përqind i bardhë, sipas Censusit të Shteteve të Bashkuara. Vetëm rreth 19 përqind e banorëve të qytetit janë afrikano-amerikanë.
Vdekja e Floydit vjen disa javë pasi tre persona u akuzuan për të shtënat fatale në shtetin Georgia, të Ahmaud Arbery-it. Afrikano-amerikani aludohet se u vra në shkurt nga një ish-polic i bardhë i kontesë Glynn dhe djali i tij, i cili me sa duket e mori gabimisht për një hajdut ndërsa ai bënte vrap. Të dy u akuzuan vetëm pasi një video nga të shtënat u shfaq disa javë më vonë. Akuza u ngritën edhe ndaj personit që kishte filmuar. zëri i amerikës
Gjykata Kushtetuese e Kosovës tha të enjten mbrëma se “Dekreti i kontestuar i Presidentit është në përputhshmëri me paragrafin 2 të nenit 82 të Kushtetutës, duke konstatuar rrjedhimisht, që votimi i suksesshëm i një mocioni mosbesimi të Kuvendit ndaj Qeverisë, nuk rezulton në shpërndarjen e detyrueshme të Kuvendit dhe mundëson formimin e një Qeverie të re në pajtim me nenin 95 të Kushtetutës.
Në vendim thuhet më tej se “dekreti i kontestuar është në përputhshmëri me paragrafin 14 të nenit 84 të Kushtetutës në lidhje me paragrafin 4 të nenit 95 të Kushtetutës.
Vendimi i sontëm i Gjykatës Kushtetuese pasoi kërkesën e lëvizjes Vetëvendosje për vlerësimin e kushtetutshmërisë së dekretit të presidentit Thaçi për mandatarin e ri për qeverinë e re.
Më 30 prill presidenti Thaçi shpalli dekretin me të cilin i propozon parlamentit të Kosovës, Avdullah Hotin nga Lidhja Demokratike për formimin e qeverisë së re të Kosovës.
Ai e mirëpriti të enjten mbrëma vendimin e gjykatës duke bërë thirrje që “partitë politike dhe të gjitha institucionet duhet të tregojnë pjekuri politike, respekt dhe përkushtim për rendin, ligjin dhe institucionet e Republikës së Kosovës. Ato duhet t’i respektojnë, pranojnë dhe zbatojnë vendimet e autoritetit përfundimtar për interpretimin e Kushtetutës dhe përputhshmërisë së ligjeve e akteve të tjera me Kushtetutën. Kosovën e presin shumë sfida përpara, prandaj tash nuk duhet të humbet më kohë për formimin e Qeverisë së re, me legjitimitet të plotë nga Kuvendi i Kosovës”, shkroi ai në rrjetet sociale.
Ambasada amerikane në Prishtinë në një komunikatë tha se “Shtetet e Bashkuara u bëjnë thirrje të gjitha institucioneve dhe partive politike të zbatojnë vendimin e sotëm dhe të gjitha vendimet e Gjykatës Kushtetuese të Kosovës. Ne kërkojmë nga të gjithë udhëheqësit të punojnë së bashku për një tranzicion të rregullt në interes të paqes, qëndrueshmërisë dhe përparimit për të gjithë qytetarët e Kosovës”.
Ambasadori Richard Grenell i dërguari i posaçëm i presidentit Donald Trump për bisedimet e paqes Kosovë-Serbi, nëpërmjet një komunikate bëri thirrje poshtu për respektimin e vendimit.
“Gjykata Kushtetuese foli. Për të siguruar paqen dhe qëndrueshmërinë dhe për të mbështetur integritetin e sistemit të drejtësisë së Kosovës, të gjithë duhet të respektojnë vendimin e Gjykatës. Mezi pres të vazhdoj punën time me njerëzit e Kosovës dhe qeverinë e tyre për të sjellë përparim, zhvillim dhe vende pune në rajon”, thuhet në njoftimin e zyrës së ambasadorit Grenell.
Lëvizja Vetëvendosje ka kërkuar shpërndarjen e parlamentit dhe organizimin e zgjedhjeve të reja, ndërsa ka akuzuar presidentin për “krijim të vullnetit politik”, përtej përgjegjësive të tij.
Të enjten pasdite veprimtarët e kësaj lëvizjeje organizuan të enjten pasdite në sheshin qendror të Prishtinë një, siç thanë ata, provë proteste, duke kërkuar zgjedhje të reja.
Në kohën e shpalljes së vendimit të Gjykatës Kushtetuese, ministri i Jashtëm në detyrë, Glauk Konjufca, që ishte në një debat politik në Klan Kosova, e cilësoi “skandaloz” dhe që mund të çojë në “revoltë qytetare”.
“Skandaloz” e cilësoi vendimin edhe ministrja në detyrë e Drejtësisë, Albulena Haxhiu e cila shkroi se “Gjykata Kushtetuese i dha grusht vullnetit të popullit!”
Kosova mbeti me qeveri në detyrë në mes të pandemisë së koronavirusit dy muaj ma parë, kur u votua mocioni i mosbesimit i paraqitur nga Lidhja Demokratike e Kosovës për rrëzimin e qeverisë së koalicionit të saj me lëvizjen Vetëvendosje.
Lidhja Demokratike arriti ndërkohë marrëveshje me Aleancën për Ardhmërinë e Kosovës, Nismën Socialdemokrate dhe partitë e pakicave kombëtare për krjimin e një qeverie të re dhe është zotuar se do të kërkojë votimin në parlament menjëherë pas vendimit të Gjykatës Kushtetuese.
Kryetari i Lidhjes Demokratike, Isa Mustafa, tha të enjten mbrëma se vendimi i Gjykatës Kushtetuese dëshmon se shteti i Kosovës dhe drejtësia po funksionojnë.
“LDK gjthëherë ka respektuar vendimet e kësaj Gjykate dhe kemi kontribuar që ky institucion të jetë i pavarur dhe ta gëzojë besimin e plotë. Janë këto personalitete që mbajnë peshën e drejtësisë dhe demokracisë në shtetin tonë të ri. Vendimi i Gjykatë nuk i destinohet një partie dhe një grupi por një zgjidhjeje kushtetuese e cila do të vlejë për të gjithë ne, tani dhe në të ardhmen. I takon Qeverisë së ardhshme, të drejtuar nga LDK që të mbajë peshën e demokracisë dhe të kesaj drejtesie të ndarë nga Gjykata Kushtetuese. Vendimi i Gjykatës Kushtetuese është i qartë . Të gjithë duhet ta respektojmë dhe ta zbatojmë”, shkroi ai në rrjetet sociale.
Ndërsa kryetari i Aleancës për Ardhmërinë e Kosovës, Ramush Haradinaj, mirëpriti vendimin që sic shkroi ai “i hap rrugë formimit të qeverisë së re. Ftoj të gjitha palët që ta respektojnë këtë vendim dhe të veprojnë konform tij. I mandatuari për krijimin e Qeverisë së re, Avdullah Hoti, duhet që sa më parë të kompletojë ekipin dhe Kuvendi pa humbur kohë të caktojë seancën për votimin e Qeverisë. Në rrethanat e krijuara, çdo ditë e humbur ka kosto për ekonominë dhe mirëqenien e qytetarëve. Kosova nuk ka kohë për të humbur”, shkroi ai. zëri i amerikës
President Donald Trump speaks in the Oval Office of the White House, Thursday, May 28, 2020, in Washington.
Duke përshkallëzuar luftën e tij me kompanitë e mediave sociale Presidenti Donald Trump nënshkroi një urdhër ekzekutiv të enjten që sfidon mbrojtjen ndaj detyrimeve ligjore që këto kompani kanë për materialet e postuara nga përdoruesit e tyre.
Megjithatë, masa duket se ka të bëjë më shumë me politikën sesa substancën, pasi presidenti kërkon të mbledhë pas vetes mbështetësit e tij pasi ai sulmoi Twitter-in për aplikimin e konceptit të kontrollit të fakteve në dy nga postimet e tij.
Presidenti Trump tha se kontrollet e fakteve ishin “vendime editoriale” nga Twitter dhe kishin të bënin me një aktivizëm politik. Ai tha se kjo lëvizje do t’u kushtojë kompanive të mediave sociale mbrojtjen nga paditë për ato që janë postuar në platformat e tyre.
Trump, i cili personalisht mbështetet shumë tek Twitter-i për të sulmuar armiqtë e tij, ka akuzuar prej kohësh gjigantët e teknologjisë në Silicon Valley që anojnë nga liberalët, se po vënë në shënjestër konservatorët duke i kontrolluar ose duke hequr postimet e tyre.
Masa udhëzon agjencitë e degës ekzekutive të kërkojnë nga agjenci të pavarura që hartojnë rregullore, përfshirë Komisionin Federal të Komunikimit dhe Komisionin Federal të Tregtisë, të studiojnë mundësinë nëse ata mund të vendosin rregullore të reja për kompanitë – megjithëse ekspertët shprehin dyshime se kjo mund të bëhet pa një akt të Kongresit.
Kompanive si Twitter dhe Facebook u jepet mbrojtje nga përgjegjësitë ligjore në bazë të nenit 230 të Aktit për Komunikimin e Qytetëruar sepse ato trajtohen si “platforma” dhe jo “botues”, të cilët mund të përballen me padi mbi përmbajtjen që publikojnë.
Një urdhër i ngjashëm ekzekutiv ishte konsideruar më parë nga administrata, por ishte lënë mënjanë mes shqetësimeve se nuk plotësonte detyrimet ligjore dhe shkelte parimet e lirisë së fjalës.
Trump dhe fushata e tij reaguan pasi kompania Twitter shtoi një frazë paralajmëruese në dy postime të presidentit Trump ku ai i quante votimet me postë “mashtruese” dhe parashikuante se “kutitë postare do të grabiteshin”. Nën postimet në Twitter, tani ekziston një hallkë ku lexohet “Njihuni me faktet për votimet me postë” që i udhëzon përdoruesit në një faqe me kontrolle faktesh dhe lajme mbi njoftimet mbi pretendimet e pabazuara të Trump.
Presidenti Trump akuzoi Twitter-in për ndërhyrje në zgjedhjet presidenciale të vitit 2020″ dhe deklaroi se “si president, unë nuk do të lejoj që kjo të ndodhë”.
Presidenti dhe konservatorë të tjerë kanë pohuar, për vite me rradhë, se kompanitë e teknologjisë në Silicon Valley janë treguar paragjykues ndaj tyre.
Por nuk ka asnjë provë për këtë – dhe ndërsa drejtues dhe shumë punonjës të Twitter-it, Facebook-ut dhe Google-it mund të anojnë nga liberalët, kompanitë kanë theksuar se nuk kanë asnjë interes të biznesit për të favorizuar një parti politike ndaj të tjere.
REAGIMET
Marcus Messner, ekspert për mediat në Universitin e Komonuelthit të Virxhinias i tha Zërit të Amerikës se “kompanitë e mediave sociale prej vitesh luftojnë kundër përhapjes së dezinformatave dhe për nevojën e verifikimit të fakteve, sidomos gjatë zgjedhjeve të fundit presidenciale.”
“Twitter ka të drejtë të vënë në dukje informacionet që janë të pasakta, edhe kur kjo ka të bëjë me tweete të Presidentit Trump,” tha profesor Messner.
Profesori i gazetarisë vuri në dukje se hapi i ndërmarrë nga Twitteri prek linjën delikate “mes verifikimit të fakteve dhe rrezikut se mund të akuzohesh për censurim të fjalës politike me veprime më drastike, si fshirja e postimeve apo pezullimi i llogarive.”
Profesor Messner tha se çështja që shtrohet është: “nëse u shton postimeve një link për verifikim faktesh që të çon tek shkrime të ndryshme të mediave, a do të pranoheshin ato nga mbështetësit e Presidentit Trump, të cilët regullisht i mohojnë raportimet e mediave të mëdha?”
Efekti i veprimeve të tilla në këtë atmosferë të ndezur partiake do të ishte i kufizuar, thotë profesori.
Shefi ekzekutiv i firmës Twitter Jack Dorsey tha në faqen e internetit të kompanisë se tweetet e presidentit “mund t’i bëjnë njerëzit të mendojnë gabimisht se ata nuk kanë nevojë të regjistrohen për të marrë një fletëvotimi me postë. Synimi ynë është të sqarojmë deklarimet konfliktuale dhe të japim informacionet për të cilat ka debate, në mënyrë që njerëzit të mund të gjykojnë vetë.”
Steve DelBianco, president i NetChoice, një grup komercial që ka në klientelën e tij edhe kompanitë Twitter, Facebook dhe Google, tha se “presidenti është duke shkelur Amendamentin e Parë të Kushtetutës, duke kërcënuar të drejtat themelore të fjalës së lirë për platformat e mediave sociale”. Ky hap i administratës “i nxit qeveritë e huaja të kontrollojnë lirinë e shprehjes në internet,” tha ai në një deklaratë të enjten.
Presidenti Trump nuk kursehet në kërcënime, që nga kanosja se do të mbyllë Twiterin, tek zotimi për të superuar vendimet e guverntorëve që mbajnë të mbyllura objektet fetare. Ai është shprehur se ka “autoritet total” për të detyruar shtetet të rihapin aktivitetin ekonomik, megjithëse udhëheqësit localë thonë se është herët për rihapje.
Në përballjen me pandeminë presidenti është shprehur se gëzon autoritet të gjerë, por studiuesit e së drejtës kushtetuese nuk mendojnë kështu.
“Presidenti në fakt ka autoritetet shumë të madh për t’u përgjigjur në një krizë të shëndetit publik. Por ai thjesht nuk ka këtë atoritet që pretendon,” thotë Stephen Vladeck, profesor i së drejtës në Universitetin e Teksasit.
Presidenti tha fillimisht se mund të detyronte guvernatorët të rihapnin ekonominë para se ata ishin gati për këtë hap. “Dikush që është president i Shteteve të Bashkuara ka autoritet total,” tha zoti Trump.
Presidenti hoqi dorë nga ky kërcënim, duke thënë se do ia linte vendimin shteteve. Por ai e përsëriti këtë kërcënim kur foli javën e kaluar se gëzon autoritet për rihapjen e objekteve fetare edhe në zona ku mbeten në fuqi urdhrat e qëndrimit në shtëpi.
Të martën, atij iu drejtua një pyetje lidhur me autoritetin që gëzon për një veprim të tillë. Presidenti nuk dha një përgjigje të drejtpërdrejtë.
“Mund ta bëj nëse dua. Kemi mënyra të ndryshme për të superuar vendimet e guvernatorëve dhe nëse është e nevojshme, do ta bëj,” tha presidenti.
Shtëpia e Bardhë nuk ka sjellë si argument ndonjë statut specifik, por zëdhënësi i presidentit tha në një deklaratë “çdo vendim i presidentit gjatë pandemisë është udhëzuar nga synimi për të mbrojtur shëndetin dhe jetën e amerikanëve”.
Presidenti Trump “nuk ka asnjë autoritet nëse e lexon dhe interpreton normalisht Kushtetutën dhe autoritetin federal për të dhënë urdhër që të rihapen objektet fetare,” thotë historiani Matthew Dallek.
Por historiani Dallek shtoi se thjesht fakti që zoti Trump nuk gëzon autoritetin për të bërë gjëra që zotohet të bëjë, nuk do të thotë që nuk do t’i bëjë, pra ai mund të nënshkruajë urdhra ekzekutive që më pas bllokohen nga gjykatat.
“Cfarë e ka ndalur më parë Presidentin Trump? Ai nuk është rezervuar shumë. Mendoj se do të bëjë ato që i duken në interes të tij në një moment të caktuar,” shton historiani.
Kur presidenti deklaroi gjendje emergjente për pandeminë në muajin mars, ai aktivizoi 100 agjenci të ndryshme qeveritare. Por ai nuk i ka vënë shumë prej tyre në punë, thotë zoti Vladeck.
“Një ndër ironitë e këtij momenti është se presidenti ka një numër kompetencash që në fakt nuk i ka përdorur. Por ai vazhdon të flasë për pushtetin e pakufi që gëzon”.
Këtu përfshihet Ligji për Prodhim për Mbrojtje, të cilin presidenti mund ta kishte përdorur në mënyrë më agresive për të detyruar kompanitë amerikane të prodhonin artikuj si maska apo aspiratorë. Por ai e përdori këtë ligj vetëm në mënyrë të kufizuar.
Studiuesit e së drejtës kushtetuese thonë se edhe në rastet kur presidenti nuk vepron për të vënë në jetë kërcënimet e tij, thjesht kanosjet nga posti i presidentit kanë ndikim.
Ndër kanosjet e fundit të presidentit është reagimi i tij ndaj platformës së medias sociale Twitter, pasi Twitter vuri një paralajmërim për përdoruesit pranë komenteve të presidentit, duke sinjalizuar se në postime kishte të pavërteta.
Presidenti nënshkroi një urdhër ekzekutiv të enjten ku kufizon mbrojtjen ekzistuese që gëzonin mediat sociale nga padi gjyqësore për deklarata të postuara në faqet e tyre.
“Twitter po mbyt LIRINË E FJALËS dhe unë si president nuk do ta lejoj të ndodhë,” tha presidenti të martën.
Kongresi mund të miratojë rregullore shtesë lidhur me operimin e platformave të medias sociale, por “presidenti nuk ka autoritet të tillë,” thotë ish-gjykatësi federal Michael McConnell, i cili tani drejton Qendrën Ligjore në Universitetin Stanford. “Ai thjesht shfryn,” thotë zoti McConnell.
“Nuk ka asgjë që bie ndesh me Amendamentin e Parë që mbron lirinë e fjalës në aktin e Twitterit për të vënë një shenjë paralajmëruese pranë komenteve të presidentit,” shton Jameel Jaffer, studiues në Universitetin Columbia. “E vetmja gjë që lidhet me Amendamentin e Parë është kërcënimi i presidentit të ndëshkojë Twitterin thjesht se vuri një paralajmërim për kontrollin e fakteve”.
Por Jack Balkin, profesor i së drejtës në Universitetin Yale thotë se presidenti ka tjetër synim:
“Presidenti do t’u çojë një mesazh arbitrave, jo lojtarëve. Ai do të paralajmërojë drejtuesit e kompanive të mos bëjnë numra me të”.
Profesori i medias në Universitetin Rutgers thotë se kjo është shumë e thjeshtë: presidenti do të ndezë bazën e tij politike:
“Për Presidentin Trump, çdo gjë fillon e mbaron me synimet politike,” thotë ai. zëri i amerikës
Presidenti Donald Trump i quajti të enjten vdekjet më të larta në botë nga koronavirusi në Shtetet e Bashkuara “një moment historik shumë të trishtuar”.
Në fillim të vitit, Trump shpesh e minimizonte kërcënimin e koronavirusit, duke thënë se numri i rasteve në Sh.B.A do të zvogëlohej shumë shpejt. Por ai e pranoi numrin e vdekjeve – një shifër më e lartë nga numri i vdekjeve amerikane në luftërat e Vietnamit dhe Koresë të marra së bashku – në një koment në Twitter.
“Për gjithë familjet dhe miqtë e atyre që janë ndarë nga jeta,” tha ai, “dua të shpreh simpatinë dhe dashurinë time nga zemra për të gjitha vlerat që mishëronin dhe përfaqësonin këta njerëz të mëdhenj. Zoti qoftë me ju!”
Të mërkurën, ish-nënpresidenti Joe Biden tha në një mesazh të postuar në Twitter “Ka momente në historinë tonë kaq të zymta, kaq të dhimbshme, saqë ato janë fiksuar përgjithmonë në secilën prej zemrave tona si ngushëllim i përbashkët. Sot është një nga ato raste”. Biden, kundërshtari i presidentit Trumpit në zgjedhjet e nëntorit, i dha fund mesazhit duke thënë “Për ata që vajtojnë, më vjen shumë keq për humbjet tuaj. Kombi trishtohet me ju”.
Me Sh.B.A që kaloi 100,000 vdekje në më pak se katër muaj, një grup senatorësh nga të dyja partitë ripërsëritën thirrjen e tyre për një moment heshtjeje që do të mbahej të hënën për të nderuar të vdekurit.
“Kombi duhet ta kujtojë këtë moment të errët me unitet dhe qartësi,” tha senatori Brian Schatz, një demokrat nga Hauai. “Në këtë kohë dhimbje gati të paimagjinueshme, është thelbësore që të ndalemi për të nderuar çdo jetë të humbur dhe që të ngushëllohemi së bashku”.
“Pandemia” COVID-19 “ka shkatërruar vendin tonë,” tha senatorja republikane Lisa Murkowski nga Alaska. “Shumë familje kanë parë të dashurit e tyre të vuajnë. Për shkak të masave të rrepta të izolimit, shumë prej atyre që kanë humbur dikë nga sëmundja nuk kanë mundur të japin lamtumirën e tyre të fundit në spitale. Shumë gjithashtu nuk kanë qenë në gjendje të kenë ceremoni të duhura për të nderuar njerëzit që kanë humbur. ”
Një propozim tjetër në Dhomën e Përfaqësuesve kërkon një moment të përditshëm heshtjeje sa herë që dhoma të fillojë një seancë, si dhe një ditë kombëtare zie pasi të përfundojë pandemia dhe krijimi i një memoriali kombëtar për viktimat.
Shtetet e Bashkuara kanë parë njëfarë përmirësimi në numrin e përditshëm të vdekjeve, por ky përparim bëri një hap të mprehtë prapa të mërkurën me 1.400 vdekje të reja të raportuara.
Sipas statistikave të Universitetit Johns Hopkins, në të gjithë botën, më shumë se 356,000 njerëz kanë vdekur nga COVID-19. Ka rreth 5.7 milion raste të konfirmuara, me gati 30% në Shtetet e Bashkuara.
Koreja e Jugut raportoi 79 raste të reja të enjten ndërsa vazhdon të punojë për të parandaluar një ringjallje të përhapjes së virusit. Me shumicën e rasteve të reja të vendosura në zonën e Seulit, Ministri i Shëndetësisë Park Neung-hoo u bëri thirrje njerëzve të shmangin tubimet e panevojshme dhe kompanive të mbajnë punëtorët e sëmurë në shtëpi.
Ka shqetësime edhe në shumë vende të Amerikës Latine, ku Programi Botëror i Ushqimit thotë se pandemia mund të lerë 14 milion njerëz të uritur.
“Ne po hyjmë në një fazë shumë të ndërlikuar,” tha Miguel Barreto, drejtori rajonal i WFP për Amerikën Latine dhe Karaibet. “Ne po e quajmë këtë një epidemi urie.”
Brazili ka patur goditjen më të fortë në rajon, me 411,000 rastet e saj, duke u radhitur vetëm pas Shteteve të Bashkuara. Peruja ka parë gjithashtu një rritje të mprehtë të rasteve, përfshirë raportimin e të mërkurës me një rritje rekord ditore prej 6.154 rastesh të reja.
India raportoi një kërcim të ngjashëm të enjten me 6.566 raste të reja, një rekord për vendin që tani renditet e 10 në botë për nga numri i rasteve të konfirmuara. zëri i amerikës
Shtetet e Bashkuara shpresojnë se Kosova dhe Serbia do t’u rikthehen bisedimeve për normalizimin e marrëdhënieve ndërmjet tyre, ka thënë Zëvendës Ndihmës Sekretari i Shtetit për Evropën dhe Euroazinë, Matthew Palmer.
Siç transmeton Zëri i Amerikës në gjuhën shqipe, gjatë një debati mbi Angazhimin Strategjik të Shteteve të Bashkuara në Ballkanin Perëndimor, Egje dhe në Turqi gjatë pandemisë së koronavirusit, të organizuar nga Fondi Gjerman Marshall, Palmer ka thënë se normalizimi i marrëdhënieve ndërmjet Kosovës dhe Serbisë është thelbësor për të hapur rrugën evropiane për të dyja vendet. Por, tha ai, ende ka shumë punë për të bërë.
“Kosovës i duhet një qeveri. Ne po presim për vendimin e Gjykatës Kushtetuese që do t’i hapte rrugën zgjidhjes së çështjeve që kanë të bëjnë me formimin e qeverisë. Dua të nënvizoj se Shtetet e Bashkuara nuk duan të ndikojnë procesin në asnjë mënyrë, nuk duam të zgjedhim qeverinë e re të Kosovës, nuk kemi favorit, nuk mbajmë anë. Ajo çfarë duam të shohim është një proces që është i mbështetur në Kushtetutën e Kosovës dhe kuadrin ligjor të Kosovës, që prodhon një qeveri që është përfaqësuese dhe ka fuqi të angazhohet në procesin e bisedimeve”, tha ai.
Astronautët e NASA-s Douglas Hurley dhe Robert Behnken
Marrë nga Reuters
Udhëtimi drejt Stacionit Ndërkombëtar të Hapësirës, i astronautëve të NASA-s në bordin e raketës Falcon 9, Koloneli i Marinsave në pension Doug Hurley dhe Koloneli i Forcave Ajrore Bob Behnken, i jep fund një pauze nëntë vjeçare të NASA-s.
Raketa e kompanisë private SpaceX, në pronësi të miliarderit Elon Musk, pritet të lëshohet të mërkurën nga Qendra e Hapësirës Kennedy në Florida në orën 4:33 pasdite (22:33 sipas kohës së Evropës Qendrore) dhe udhëtimi deri në Stacionin Ndërkombëtar të Hapësirës zgjat 19-orë.
Presidenti Donald Trump dhe Zëvendës Presidenti Mike Pence kanë në plan të shkojnë në Cape Canaveral për të parë nisjen.
Lëshimi i anijes do të varet nga moti. Parashikuesit thanë se ekziston 40 për qind mundësi që misioni të shtyhet për shkak të stuhive në Florida.
Nëse kjo ndodh, një mundësi e dytë për lëshimin e Falcon 9 do të ishte pasditja e së shtunës.
Kur anija e hapësirës Atlantis u nis për herë të fundit nga Cape Canaveral më 8 korrik 2011, ajo drejtohej nga astronauti i NASA-s Doug Hurley.
Tani gati një dekadë më vonë, Hurley është një nga dy pilotët e provës për anijen raketë krejt të re të prodhuar nga SpaceX për këtë fluturim.
Astronautët e NASA-s, Koloneli i Marinsave në pension Doug Hurley dhe Koloneli i Forcave Ajrore Bob Behnken janë shokë klase, miq, veteranë të eksplorimit të hapësirës, të martuar me veterane të hapësirës dhe kanë të dy djem të rinj.
Ata përdorin të njëjtën platformë lëshimi ku Atlantis mbylli programin e nisjeve në 2011, viti i fundit i lëshimit nga vendi i tyre për astronautët e NASA-s.
“Tetë vite e gjysëm, nëntë vite më vonë, shohim se jo vetëm jemi gati të fluturojmë mjetin e parë me ekuipazh drejt Stacionit Hapësinor, por kemi edhe ngazëllimin se mund të rikthehemi ndoshta në Hënë pas pak vitesh. Pasi ulëm anijen Atlantis në 2011, nuk do të kishim menduar kurrë se do ndodheshim këtu nëntë vite më vonë. Është shumë më mirë se ç’e kisha imagjinuar“, thotë Hurley.
Që atëherë, e vetmja mënyrë për të shkuar në stacionin hapësinor për astronautët ka qenë me raketa ruse të lëshuara nga Kazakistani.
Hurley do të drejtojë nisjen dhe uljen, një detyrë e përshtatshme për pilotin e fluturimit të fundit të anijes hapësinore të NASA-s.
Behnken, një inxhinier mekanik me gjashtë shëtitje në hapësirë në biografinë e tij, do të mbikëqyrë kontaktin dhe uljen në Stacionin Ndërkombëtar Hapësinor (ISS).
Hurley, 53 vjeç dhe Behnken, 49 vjeç, janë ekuipazhi i parë i pilotëve të NASA-s në dekada.
Hurley dhe Behnken janë martuar me kolege astronaute të NASA-s: Karen Nyberg dhe Megan McArthur. Secili çift ka nga një djalë, në moshën dhjetë dhe gjashtë vjeçare.
Kapsula Dragon në bordin e raketës Falcon 9
Megjithëse kapsula e ekuipazhit Dragon dhe sistemi i saj i shpëtimit tashmë janë demonstruar në fluturime me manekinë, nuk ka ndonjë garanci. Në fluturimin hapësinor, kurrë nuk ekziston një gjë e tillë.
“Mendoj se janë kaq shumë faktorë teknikë dhe gjëra tek të cilat duhet të përqëndrohemi për t’u siguruar që do t’ia dalim mbanë, për vendin tonë në histori, apo qoftë edhe duke u përpjekur t’i vendosim emrat tanë në të njëjtat fjali si njerëzit që kanë qenë përpara nesh. Duket e parakohshme derisa ta kemi realizuar“, thotë Behnken.
Fluturimi i tyre shënon rikthimin e nisjes së astronautëve nga Shtetet e Bashkuara, si dhe të parin e këtij lloji nga një kompani private. zëri i amerikës
Presidenti Trump kërcënoi të mërkurën se do të marrë masa për rregullimin ose mbylljen e kompanive të caktuara të mediave sociale.
Kërcënimi vjen një ditë pasi kompania Twitter Inc për herë të parë u shtoi një paralajmërim disa prej tweet-eve të Presidentit, duke i shtyrë lexuesit të kontrollonin me fakte disa nga pohimet e tij.
Të martën, kur ata që shikonin tweet-et e Presidentit Trump klikonin në paralajmërimin e vendosur nga Twitter-i, rrjeti social i drejtonte ata tek një njoftim i titulluar: Trump bën pretendimin e pabazuar se fletëvotimet me postë do të çojnë në mashtrim zgjedhor.
Paralajmërimi përmbante një link që të çonte tek shkrime të rrjetit CNN dhe gazetës Washington Post, si dhe përfshinte një shënim me titull “Çfarë duhet të dini”, si më poshtë:
“Çfarë duhet të dini:
– Trump pretendon në mënyrë të gabuar se fletëvotimet me postë do të çonin në “zgjedhje të falsifikuara”. Por, kontrolluesit e fakteve thonë se nuk ka asnjë provë që fletëvotimet me postë kanë lidhje me mashtrim zgjedhor.
– Trump pohon në mënyrë të rreme se Kalifornia do të dërgojë fletëvotimi me postë për “këdo që jeton në këtë shtet, pavarësisht se cili është ose si ka ardhur aty.” Në fakt, vetëm votuesit e regjistruar do të marrin fletëvotime.
– Megjithëse Trump kishte në shënjestër Kaliforninë, fletëvotimet me postë tashmë përdoren në disa shtete, si Oregoni, Juta dhe Nebraska.”
Presidenti kishte thënë përmes një postimi se votat e dërguara me postë do të bëheshin shkak për “manipulime të konsiderueshme” duke sjellë zgjedhje të manipuluara.
Sot në mëngjes Presidenti shkroi në Twitter se “Republikanët ndiejnë se platformat e mediave sociale i lënë në heshtje të plotë zërat konservatore. Ne do t’i rregullojmë ato fuqishëm, ose do t’i mbyllim para se të lejojmë që kjo të ndodhë”.
PARALAJMËRIMI I TWITTER INC
Të martën kompania Twitter për herë të parë paralajmëroi përdoruesit të kontrollonin faktet në postimet që vë Presidenti Trump në Twitter. Kompania paralajmëronte se pretendimet e presidentit për dërgimin e votave me postë ishin të pavërteta dhe të kundërshtuara nga faktet.
Një pikëçuditëse ngjyrë blu nxit përdoruesit të “kontrollojnë faktet për votat”.
“Presidenti Trump ngre pretendime të pabaza se fletëvotimet e dërguara me postë do të çojnë në falsifikime votash” shkruante një faqe pasuar me shpjegime për ato që i cilësonte si pretendime fallso.
Presidenti kishte thënë përmes postimit në Twitter se votat e dërguara me postë do të sillnin “manipulime të konsiderueshme” duke sjellë zgjedhje të manipuluara. Ai veçonte guvernatorin e Kalifornisë lidhur me këtë temë, megjithëse ky nuk është shteti i vetëm që lejon votimin me postë.
“Unë, si President, nuk do të lejoj që kjo të ndodhë,” shkruante ai.
Kalifornia po planifikon t’i dërgojë çdo votuesi të regjistruar një fletëvotim me postë për zgjedhjet e 3 nëntorit. Ky plan bëri që Komiteti Kombëtar Republikan të padisë guvernatorin e Kalifornisë, Gavin Newsom.
Sekretari i shtetit i Kalifornisë Alex Padilla tha se veprimi i ndërmarrë nga Twitter-i për t’u shtuar shenjën e paralajmërimit tweet-eve të Presidentit Trump “është një hap i vogël në drejtimin e duhur. Por ne të gjithë mund të bëjmë pjesën tonë për të ekspozuar gënjeshtrat.” “Presidenti, – tha ai, – po përhap me qëllim informacione të rreme për votimin me postë, duke u përpjekur haptazi të shtypë votën.”
Twitter pohoi se kjo ishte hera e parë që vendoste një paralajmërim lidhur me një postim të presidentit, që lidhet me politikën e re të kësaj kompanie të vënë në funksionim në fillim të muajit për të luftuar dizinformimin.
Khalifa Haftar dhe Ministri rus i Mbrojtjes, Sergei Shoigu në një takim në Moskë më 13 janar 2020.
Komanda e Ushtrisë amerikane për Afrikën tha se Rusia kohët e fundit dislokoi avionë luftarakë në Libi për të mbështetur kontraktorët ushtarakë të sponsorizuar nga shteti rus, të cilët po ndihmojnë forcat që po luftojnë qeverinë libiane të mbështetur nga Shtetet e Bashkuara.
Avionët luftarakë rusë mbërritën në aeroportin al-Jufra në Libi nga një bazë ajrore në Rusi pas një ndalese në Siri, ku ata u ringjyrosën për të kamufluar origjinën e tyre ruse, tha të martën Komanda e Forcave Amerikane në Afrikë, AFRICOM.
Avionët luftarakë pritet të ofrojnë mbështetje ajrore për kontraktorët ushtarakë rusë të kompanisë Wagner, të cilët po mbështesin Ushtrinë Kombëtare Libiane (LNA) të udhëhequr nga Gjenerali Khalifa Haftar në ofensivën e tyre një vjeçare kundër Qeverisë së Pajtimit Kombëtar (GNA).
Komandanti i AFRICOM-it, Gjenerali Stephen Townsend kritikoi Rusinë në një deklaratë për shtyp të martën për shtimin e pranisë së saj ushtarake në Afrikë duke dërguar pilotë mercenarë për të “bombarduar libianët”.
“Për një kohë të gjatë, Rusia ka mohuar nivelin e plotë të përfshirjes në konfliktin e vazhdueshëm libian. Tani përfshirja e saj nuk mund të mohohet. Ne pamë se si Rusia fluturoi avionët e saj luftarakë të gjeneratës së katërt në Libi, në çdo hap të udhëtimit të tyre”, tha gjenerali Townsend.
Ai shtoi se as LNA (Ushtria Kombëtare Libiane) dhe as nismat private ushtarake nuk mund të armatosin dhe të operojnë këtë lloj avioni pa “mbështetjen që ata po marrin nga Rusia”.
Presidenti Donald Trump dhe Presidenti turk Recep Tayyip Erdogan në një takim në Shtëpinë e Bardhë më 13 nëntor të vitit 2019.
Në një telefonatë të shtunën, Presidenti Donald Trump dhe Presidenti turk Rexhep Tajip Erdogan ndanë shqetësimet e tyre për keqësimin e ndërhyrjeve të huaja në Libi, sipas Shtëpisë së Bardhë.
Turqia ka siguruar mbështetje ushtarake për qeverinë libiane të njohur ndërkombëtarisht dhe ka paralajmëruar se sulmet nga forcat e gjeneralit Haftari do të kenë “pasoja të rënda”.
Kritikët e përfshirjes ruse në Libi thonë se mbështetja e Moskës për zotin Haftari ka rritur paqëndrueshmërinë rajonale dhe ka ndihmuar në nxitjen e krizës së imigracionit në Evropë.
Komandanit i Forcave Ajrore të Shteteve të Bashkuara në Evropë dhe Afrikë, Gjenerali Jeff Harrigian paralajmëroi të martën se Rusia po krijonte kushtet për “shqetësime reale të sigurisë” për Evropën Jugore në të ardhmen e afërt.
“Nëse Rusia pushton bazat në bregdetin e Libisë, hapi tjetër logjik është dislokimi i aftësive të përhershme ushtarake për të mohuar qasjen në distancë të largët në zonat përreth”, që përdoren për të parandaluar udhëtimin e kundërshtarëve nëpër zonën që mbrohet nga arma, tha ai në një njoftim për shtyp.
Joe Biden bëri paraqitjen e tij të parë publike në më shumë se dy muaj ndërsa shënoi Ditën e Përkujtimit të të Rënëve duke vendosur një kurorë me lule në një memorial të veteranëve të ushtrisë pranë shtëpisë së tij në Delauer.
Që nga anulimi i papritur i një tubimi elektoral më 10 Mars në Klivëlend në fillim të pandemisë së koronavirusit, i emëruari i supozuar për kandidat presidencial të partisë demokrate ka zhvilluar pjesën më të madhe të fushatës virtualisht nga shtëpia e tij në Uilmington. Të hënën, Biden doli me maskë, në kontrast me Presidentin Donald Trump, i cili ka refuzuar të përdorë maskën në aktivitetet e tij publike, siç sugjerojnë zyrtarët amerikanë të shëndetësisë. Ish-nënpresidenti Biden dhe bashkëshortja e tij, Jill Biden, vunë një kurorë me lule të bardha dhe u përkulën në heshtje para memorialit për të rënët e Luftës së Dytë Botërore dhe atyre të Luftës Koreane. “Asnjëherë mos harroni sakrificat që bënë këta burra dhe gra,” tha ai më pas. “Asnjëherë, kurrë, mos harroni”.
“Ndihem mirë që jam këtu,” u tha Biden gazetarëve. Vizita e tij në memorialin e të rënëve ishte e pa njoftuar dhe nuk pati asnjë turmë në pritje të tij.
Joe Biden në Ditën e të Rënëve
Por zoti Biden përshëndeti shkurtimisht një zyrtar të qarkut dhe një burrë tjetër, të dy të veshur me maska dhe duke mbajtur një distancë fizike mes tyre. Fushata e tij thotë se zoti Biden ka shkuar në park për Ditën e Të Rënëve shpesh në të kaluarën, megjithëse shërbimet ishin anuluar të hënën për shkak të pandemisë.
Megjithëse me shumë pak fjalë, paraqitja ishte një moment historik në një fushatë presidenciale që kryesisht është ngrirë nga shpërthimi i koronavirusit. Ndërsa mundësia e zhvillimit të ngjarjeve tradicionale siç janë tubimet dhe konventat presidenciale janë në dyshim, shfaqja e zotit Biden sugjeron se ai nuk do t’i kalojë gati pesë muaj që mbeten deri në ditën e zgjedhjeve tërësisht në shtëpi.
Presidenti Trump, i etur për të demonstruar se vendi po kthehet në jetë edhe kur numri i vdekjeve nga pandemia ka arritur në 100’000, mori pjesë në një aktivitet në Varrezat Kombëtare në Arlington të Virxhinias dhe në një ngjarje tjetër në Fort McHenry në Baltimore.
Presidenti Trump në Ditën e Të Rënëve
Pas ceremonisë së vendosjes së kurorave me lule në Arlington, Presidenti Trump mbajti një fjalim për nder të të rënëve në fortesën McHenry në Baltimore dhe vlerësoi kontributin e personelit ushtarak “në vijat e para të luftës sonë kundër këtij virusi të tmerrshëm.”
Koronavirusi ka prekur pothuajse të gjitha aspektet e jetës amerikane dhe ka ndryshuar kushtet e zgjedhjeve. Argumenti i Presidentit Trump se ai meriton një mandat tjetër për shkak të ekonomisë së fortë është venitur ndërsa papunësia rritet në nivele që nuk janë parë që nga koha e Depresionit të Madh.
Duke u bazuar në përvojën e tij si senator dhe ish nënpresident, zoti Biden po përpiqet të pozicionohet si një kandidat me përvojën dhe ndjeshmërinë e duhur për ta udhëhequr vendin në përpjekjet për të dalë nga kriza. Presidenti Trump është kundërpërgjigjur se ai është udhëheqësi që mund të drejtonte rimëkëmbjen ekonomike më vonë këtë vit ose në vitin 2021.
Zoti Biden është përshtatur në epokën e koronavirusit duke ndërtuar një studio televizive në shtëpinë e tij, të cilën ai e kishte përdorur për të bërë paraqitje në emisionet e lajmeve, dhe emisionet satirike dhe ngjarje të fushatës virtuale. Disa nga këto përpjekje janë dëmtuar nga problemet teknike dhe momente të tjera të vështira.
Disa strategë demokratë e kanë shprehur hapur shqetësimin e tyre se zoti Biden po i jep shumë terren Presidentit Trump duke qëndruar në shtëpi. Vetë Presidenti Trump e ka kritikuar zotin Biden për zhvillim të fushatës nga bodrumi i shtëpisë së tij.
Këshilltarët e zotit Biden thonë se ata planifikojnë të kthehen në aktivitete normale të fushatës në një moment në të ardhmen, përfshirë udhëtimet në shtetet e pavendosura. Por ata nuk janë me ngut, duke preferuar respektimin e këshillave të ekspertëve shëndetësorë, udhëzimet e autoriteteve për të qëndruar në shtëpi dhe rekomandimet për distancim fizik.
Në moshën 77 vjeçare, zoti Biden është në grupin e moshuar të popullatës së vendit që mendohet të jetë veçanërisht e pambrojtur ndaj efekteve të koronavirusit, megjithëse edhe Presidenti Trump, i cili mbush 74 vjeç muajin tjetër, është pothuaj në një njejtën kategori.
“Ne kurrë nuk do të bëjmë zgjedhje që mund të dëmtojë në një mënyrë a tjetër, personelin tonë ose votuesve,” tha kohët e fundit menaxherja e fushatës së zotit Biden, Jen O’Malley Dillon, duke shtuar se fushata do të rifillonte me aktivitete më tradicionale “kur siguria do ta lejonte, dhe ne nuk do ta bëjmë atë asnjë ditë më shpejt.”
Presidenti Trump nuk ka rifilluar tubimet e mëdha që ishin shenjë dalluese e fushatës së tij të vitit 2016 dhe presidencës së tij, por ka filluar të udhëtojë jashtë Uashingtonit javët e fundit. Ai vizitoi një fabrikë të prodhimit të maskave në Arizona dhe një fabrikë të kompanisë amerkane të makinave, Ford në Miçigan, e cila tani po prodhon pajisje mjekësore.
Trump Biden
Presidenti Trump madje luajti golf në klubin e tij në Virxhinia gjatë fundjavës, duke shpresuar se të tjerët do të ndjekin hapat e tij dhe do t’i kthehen jetës normale dhe gradualisht do të ndihmojnë në rimëkëmbjes së ekonomisë së dëmtuar rëndë nga pandemia e koronavirusit.
Ky ishte udhëtimi i parë i presidentit në një nga pronat e tij fitimprurëse që nga 8 marsi, kur ai vizitoi klubin e tij privat të golfit në West Palm Beach. Organizata Botërore e Shëndetit e shpalli koronavirusin një pandemi botërore më 11 mars, dhe Presidenti Trump e ndoqi hapat e saj dy ditë më vonë duke shpallur pandeminë Covid-19 një urgjencë kombëtare.
Fushata e zotit Biden menjëherë nxorri një video në internet duke ofruar pamje të paqarta dhe nga një distancë e largët të Presidentit Trump në fushën e golfit, të shoqëruara me imazhe të virusit që po shkatërron vendin pasi numri i amerikanëve të vdekur nga pandemia po arrinte shifrën 100,000. Videoja përfundoi me fjalët: “Numri i vdekjeve është ende në rritje. Presidenti po luan golf ”.
Presidenti Trump e kaloi Ditën e të Rënëve duke vizituar Varrezat Kombëtare të Arlingtonit dhe fortesën Fort McHenry në Baltimore, që do të pasohen me një udhëtim në brigjet e Floridës të mërkurën për të parë nisjen e astronautëve amerikanë në orbitë.
