Presidenti Joe Biden u bëri thirrje amerikanëve të hënën të mos nënvlerësojnë masat e kujdesit për të frenuar pandeminë, ndërkohë që SHBA po përjeton një rritje të infektimeve në të gjithë vendin.

Në komentet e bëra nga Shtëpia e Bardhë, Presidenti Biden tha të hënën se deri më 19 prill, 90% e të rriturve në Shtetet e Bashkuara do të kualifikohen për vaksinën ndaj koronavirusit.

Por ai u kërkoi amerikanëve të vazhdojnë të përdorin maskën. Ai tha se disa nga sjelljet e papërgjegjshme që shihen nëpër televizione javët e fundit nënkuptojnë më shumë raste me COVID në ditët e ardhshme.

“Tani nuk është koha të festojmë, është koha të bëjmë më të mirën si vend… Le ta çojmë luftën deri në fund,” tha ai.

Ndërkohë, Dr. Rochelle Walensky, drejtoreshë e Qendrave të SHBA për Kontrollin dhe Parandalimin e Sëmundjeve, me emocion të dukshëm në zërin e saj, u kërkoi zyrtarëve publikë dhe të tjerëve të flasin për seriozitetin e situatës, në përpjekje për të parandaluar një valë të katërt të COVID-19.

Të dielën Shtetet e Bashkuara tejkaluan 30 milionë raste me COVID-19 në total ndërsa mesatarja shtatë-ditore e rasteve të reja ka qenë rreth 60,000 në ditë, tha ajo. Kjo përfaqëson një rritje prej 10% krahasuar me periudhën shtatë ditore paraardhëse. Shtrimet në spital gjithashtu u rritën dhe vdekjet kanë filluar të shtohen.

“Një situatë e kobshme po afron… tani për tani jam e frikësuar”, tha zonja Walensky në një konferencë me gazetarët.

Zyrtarët përmendën shtetet që hapën ekonomitë dhe lehtësuan kufizimet e pandemisë para kohe si dhe shtimin e udhëtimeve, si arsye për keqësimin e gjendjes.

Zonja Walensky tha se trajektorja e pandemisë në Shtetet e Bashkuara dukej e ngjashme me vendet e Evropës, të tilla si Gjermania, Italia dhe Franca, të cilat kanë përjetuar një rritje të rasteve kohët e fundit.

“Ne nuk kemi luksin e mosveprimit. Për … shëndetin e vendit tonë, ne duhet të punojmë së bashku tani për të parandaluar një valë të katërt,” tha ajo.

Presidenti Biden ka vendosur objektivin për të vaksinuar 200 milionë njerëz në 100 ditët e tij të para në detyrë, dhe vaksinimet po shtohen në të gjithë vendin.

Por disa pjesë të Shteteve të Bashkuara kanë hequr dorë nga urdhërat e mbajtjes së maskave dhe kufizime të tjera për COVID-19n, ndërkohë që amerikanët po udhëtojnë tani më shumë për pushimet e pranverës.

“Duroni dhe pak”, tha eksperti i sëmundjeve infektive Dr. Anthony Fauci rreth mbajtjes së masave mbrojtëse. “Do të jetë një garë midis vaksinës dhe asaj që po ndodh me dinamikën e shpërthimit. Ne mund ta fitojmë këtë garë duke qëndruar pak më gjatë.”

E pyetur në lidhje me udhëtimin e vetë zotit Biden për arsye biznesi dhe personale, zëdhënësja e Shtëpisë së Bardhë Jen Psaki tha se ai udhëtoi me avionin Air Force One, i cili nuk ishte i njëjtë me avionët e pasagjerëve.

Me shtimin e emigrantëve në kufirin jugor të Shteteve të Bashkuara, administrata Biden ndodhet nën presion për krijimin e shpejtë të politikave dhe procedurave që rregullojnë situatën, veçanërisht kur bëhet fjalë për fëmijët.

“Mesazhi është i qartë, mos ejani. Kufiri është i mbyllur. Kufiri është i sigurt”, thotë Alejandro Mayorkas, Sekretari i Sigurisë Kombëtare.

Ky është mesazhi nga administrata Biden ndërsa numri i emigrantëve në kufurin jugor është drejt shifrës më të lartë në 20 vjet. Aministrata thotë se për shkak të pandemisë, tani nuk është koha që njerëzit të udhëtojnë. Të rriturit e pamartuar, të cilët përbëjnë shumicën e njerëzve në kufi, po dëbohen. E njëjta edhe me familjet.

Fëmijët që udhëtojnë vetëm nuk dëbohen. Sipas raporteve, mijëra fëmijë pa përkujdesje po mbahen në kufi.

Administrata Biden po përpiqet të gjejë strehim të përshtatshëm për ta dhe thotë se duhet të rindërtohet sistemi i trajtimit të emigrantëve që u shpërbë nga administrata Trump.

“Po rindërtojmë sistemin ndërsa merremi me nevojat e fëmijëve që arrijnë në kufijtë tanë“, thotë Alejandro Mayorkas, Sekretari i Sigurisë Kombëtare.

Disa ligjvënës republikanë thonë se është Presidenti Biden ai që krijoi situatën me mesazhe të paqarta, duke i dhënë fund të ashtuquajturës politikë Trump për Meksikën, e cila kërkonte që aziklërkuesit të prisnin atje për procedurat e tyre gjyqësore. Sipas tyre politika Trump dekurajonte emigrantët nga Hondurasi, Guatemala dhe vende tjera të nisin rrugëtimin.

“Gjëndja do të përkeqësohet edhe më shumë gjatë pranverës dhe verës. Mesazhi është Tani që kemi një president të ri, ejani; jemi të hapur për biznes me trafikantët’. Parashikoj që deri në verë një milion njerëz do të provojnë të futen në këtë vend”, thotë Ligjvënësi Republikan, Michael McCaul.

Fëmijët ndalohen për 72 orë para transferimit në qendra kujdesi për të miturit. Administrata hapi tre mjedise të reja javën që shkoi por nuk pranoi të jepte afat kohor të hapjes së qendrave të tjera për të përballuar valën e emigrantëve.

Sekretari amerikan i Shtetit, Antony Blinken, udhëton të hënën drejt Brukselit, për të takuar udhëheqësit e NATO-s dhe të Bashkimit Evropian.

Blinken do të ndjekë një takim të ministrave të Jashtëm të NATO-s dhe do të konsultohet me aleatët dhe sekretarin e përgjithshëm të aleancës, Jens Stoltenberg, më 23 mars dhe 24 mars, tha Departamenti i Shtetit.

Takimet në Bruksel kanë për qëllim “të nënvizojnë vendosmërinë” e administratës së presidentit Joe Biden “për të forcuar aleancën transatlantike dhe për të gjallëruar lidhjet tona me aleatët përmes NATO-s”, tha po ashtu Departamenti i Shtetit.

Sipas tij, në agjendë të diskutimeve do të jenë Kina dhe Rusia, ashtu si edhe roli i NATO-s në Afganistan, siguria kibernetike, luftimi i terrorizmit, ndryshimet klimatike, siguria energjetike dhe sfida të tjera të përbashkëta.

Blinken do të takojë edhe presidenten e Komisionit Evropian, Ursula von der Leyen, dhe shefin e politikës së jashtme të BE-së, Josep Borrell, për të biseduar rreth rimëkëmbjes nga pandemia COVID-19 dhe forcimit të demokracisë.

Në një deklarim përpara udhëtimit në Bruksel, Philip Reeker, ushtrues detyre i ndihmëssekretarit të Shtetit për Çështje të Evropës dhe Euro-Azisë, tha se Shtetet e Bashkuara do të konsultohen ngushtë me aleatët e NATO-s dhe partnerët e tjerë për misionin ushtarak në Afganistan.

“Ne kemi hyrë së bashku. Do të përshtatemi së bashku, siç kemi bërë me vite dhe, kur të jetë koha e duhur, do të largohemi së bashku”, tha Reeker.

Forca e NATO-s në Afganistan, e udhëhequr nga SHBA-ja, ka rreth 10,000 trupa, që ndihmojnë në trajnimin dhe këshillimin e forcave afgane të sigurisë.

Biden ka thënë më herët se afati i 1 majit për tërheqjen e trupave të NATO-s nga Afganistani “do të jetë i vështirë”.

Ky afat ishte përcaktuar me një marrëveshje midis ish-administratës amerikane dhe talibanëve në Afganistan.

Marrëdhëniet me Rusinë do të jenë po ashtu temë gjatë udhëtimit të Blinkenit në Evropë, tha Reeker, duke vënë në dukje se administrata Biden përpiqet të krijojë një marrëdhënie që është e parashikueshme dhe e qëndrueshme.

“Ne do të angazhohemi me aleatët tanë, për të diskutuar pikëpamjet e ndryshme të Rusisë dhe mënyrat se si mund të angazhohemi me Rusinë, duke i shtyrë përpara interesat tona kolektive, por duke mbetur syhapur ndaj sfidave që paraqet Rusia”, tha Reeker.

Ambasadori i Rusisë në SHBA, Anatoly Antonov, është kthyer në Moskë të dielën, pasi është thirrur në konsultime emergjente, pas deklaratës së Bidenit se ai beson se homologu i tij rus, Vladimir Putin, është vrasës.

Udhëtimi i Blinkenit në Evropë, sipas analistëve, po ashtu vë në dukje politikën e re të jashtme amerikane pas administratës së ish-presidentit Donald Trump.

Qasja e Trumpit ka qenë “Amerika e para” dhe aleatët tradicionalë i ka trajtuar shpesh si rivalë dhe jo partnerë.

Pas Trumpit, administrata e re e Bidenit pritet të koordinohet me partnerët evropianë edhe për një mori çështjesh tjera, përfshirë marrëveshjen bërthamore me Iranin, politikën ndaj Kinës, ndryshimin e klimës dhe mosmarrëveshjet mbi tregtinë.

Përgatiti: Valona Tela

Shtetet e Bashkuara arritën objektivin e vendosur nga Presidenti Joe Biden për të injektuar 100 milionë doza të vaksinës kundër koronavirusit, pothuajse një muaj përpara afatit të vendosur prej tij për 100 ditët e para në detyrë.

Shtetet e Bashkuara po bëjnë tashmë rreth 2.5 milionë vaksinime në ditë.

Në Britani, gjysma e të gjithë të rriturve kanë marrë tashmë të paktën një dozë vaksine për koronavirusin, duke u bërë ekonomia e parë e madhe në botë që arrin një moment të tillë të rëndësishëm.

Ministri i Shëndetësisë Matt Hancock tha në Twitter se vetëm të premten ishin përdorur një rekord prej mbi 660 mijë dozash.

Dje Kryeministri britanik Boris Johnson mori dozën e tij të parë të vaksinës, duke u imunizuar me AstraZeneca – të cilën disa vende evropiane e kishin pezulluar përkohësisht për shkak të shqetësimeve të sigurisë.

Izraeli është ndër vendet më të suksesshme në vaksinimin e popullsisë, i ndjekur nga Emiratet e Bashkuara, Kili dhe më pas Mbretëria e Bashkuar. Investitorët po vëzhgojnë me kujdes se cilat ekonomi do të mund të rimëkëmben së pari.

Shtëpia e Bardhë tha të hënën se Presidenti Joe Biden i sheh shqetësuese zhvillimet në lidhje me aludimet ndaj Guvernatorit të Nju Jorkut Andrew Cuomo për sjellje të pahijshme seksuale dhe se hetimi duhet të jetë i shpejtë dhe i plotë.

Presidenti Biden nuk ka folur drejtpërdrejt me zotin Cuomo, i cili aktualisht kryeson Shoqatën Kombëtare të Guvernatorëve dhe pritet të marrë pjesë të martën në një telefonatë të përjavshme me presidentin, tha sekretarja e shtypit e Shtëpisë së Bardhë Jen Psaki.

63-vjeçari Cuomo përballet me aludime për ngacmim dhe sjellje të pahijshme seksuale, të ngritura nga të paktën shtatë gra, duke përfshirë ish ndihmëse të tij. Ai është gjithashtu nën presion pas të dhënave të zbuluara se administrata e tij e mbajti të fshehtë numrin e vërtetë të personave që humbën jetën nga COVID-19 në shtëpitë e të moshuarve në shtetin e Nju Jorkut.

“Zhvillime të reja duket se po ndodhin çdo ditë. Ne i shohim shqetësuese. Presidenti i sheh këto zhvillime si shqetësuese dhe të vështira për t’u interpretuar,” tha zonja Psaki. “Çdo grua që ngre aludime të tilla duhet të trajtohet me dinjitet dhe respekt,” tha ajo.

Zoti Biden nuk pranoi të dielën t’i bëjë thirrje zotit Cuomo për të dhënë dorëheqjen, duke thënë se dëshironte të priste rezultatin e një hetimi mbi çështjen.

I pyetur nëse zoti Cuomo, i cili është po ashtu demokrat, duhet të japë dorëheqjen, Presidenti Biden u tha gazetarëve: “Unë mendoj se hetimi është duke u zhvilluar dhe duhet të shohim se çfarë do të sjellë.”

Të premten, dy senatorë demokratë të Nju Jorkut, Chuck Schumer dhe Kirsten Gillibrand, si dhe shumica e ligjvënësve nga ky shtet, i kërkuan zotit Cuomo, tashmë në mandatin e tij të tretë si guvernator, të japë dorëheqjen.

Duke u përballur me një izolim të pashembull politik, Guvernatori i Nju Jorkut Andrew Cuomo u shfaq përsëri sfidues duke këmbëngulur të premten se nuk do të dorëhiqet pavarësisht akuzave në rritje ndaj tij për ngacmim seksual. Ai kritikoi koalicionin e gjerë të demokratëve që po kërkojnë dorëheqjen e tij duke i cilësuar si “të nxituar e të rrezikshëm”.

Në fund të ditës, guvernatori kishte humbur mbështetjen e pothuajse të gjithë delegacionit të kongresit të shtetit të tij. Goditja më e rëndë erdhi kur dy senatorët e Nju Jorkut, udhëheqësi i shumicës në senat Chuck Schumer dhe senatorja Kirsten Gillibrand bënë thirrje për dorëheqjen e tij.

“Për shkak të akuzave të shumta, të besueshme të ngacmimit seksual dhe sjelljes së papërshtatshme, është e qartë se Guvernatori Cuomo ka humbur besimin e partnerëve të tij qeverisës dhe banorëve të Nju Jorkut,” shkruanin senatorët Demokratë në një deklaratë të përbashkët.

Disa orë më herët, guvernatori demokrat prej tre mandatesh, një nga kritikët kryesorë të mënyrës se si ish-Presidenti Donald Trump trajtoi pandeminë evokoi ish-presidentin republikan për t’u mbrojtur kundër asaj që e cilësoi si “kultura e përjashtimit”.

“Unë nuk do të jap dorëheqjen“, tha zoti Cuomo gjatë një telefonate pasdite me gazetarët. “Nuk i kam bërë ato që pretendohen dhe pikë“.

Ai shtoi se: “Njerëzit e dinë dallimin mes lojës politike, përkuljes përpara kulturës së përjashtimit dhe së vërtetës”, tha ai.

Komentet e guvernatorit vijnë në një ditë kur partia e tij në Nju Jork e më gjerë është kthyer ashpër kundër tij në vazhdën e akuzave për ngacmim si dhe kritikave ndaj zotit Cuomo për mos publikimin e të dhënave lidhur me numrin e saktë të banorëve që kanë humbur jetën në shtëpitë e të moshuarve në Nju Jork si pasojë e COVID-19-s.

Të premten Partia Demokrate e ashpërsoi qëndrimin ndaj Guvernatorit të Nju Jorkut Andrew Cuomo. Një koalicion i gjerë udhëheqësish të Kongresit iu bashkuan disa dhjetra ligjvënësve të shtetit të Nju Jorkut duke kërkuar dorëheqjen e guvernatorit.

Lista në rritje e kritikëve të zotit Cuomo tashmë mbulon praktikisht çdo rajon të shtetit dhe qendrat e pushtetit politik atë të qytetit të Nju Jorkut dhe kryeqytetit të vendit Uashington. Aleatët e tij këmbëngulin se ai nuk duhet të japë dorëheqjen, por ndërsa akuzat për ngacmim seksual rriten, izolimi i tij politik ka arritur nivele të pashembullta.

“Më shumë sesa politika apo vlerësime të tjera të ngushta më shqetësojnë më shumë viktimat e sulmit seksual ndaj unë besoj se Guvernatori Cuomo duhet të largohet“, tha ligjvënësi demokrat i Nju Jorkut Sean Patrick Maloney.

Ligjvënësja progresiste e Nju Jorkut Alexandria Ocasio-Cortez, thotë se ajo u beson grave që kanë akuzuar guvernatorin demokrat prej tre-mandatesh.

“Pas dy raportimesh për sulme seksuale, katër të tjerave për ngacmimeve, hetimit të Prokurores së Përgjithshme që zbuloi se administratorja e Guvernatorit nuk i kishtë raportuar të dhëna të sakta organit legjilativ dhe publikut, lidhur me numrin e viktimave nga COVID-19 në shtëpitë e pleqve, ne pajtohemi me rreth 55 anëtarët e organit ligjvënës të shtetit të Nju Jorkut se Guvernatori duhet të japë dorëheqjen”, shkruante në twitter zonja Ocasio-Cortez.

Zoti Cuomo thotë se ai nuk ka prekur askënd në mënyrë të papërshtatshme dhe ka shprehur keqardhjen e tij nëse ka bërë dikë të ndihet keq.

Skandali i përshkallëzuar rrezikon rizgjedhjen e zoti Cuomo në vitin 2022, në një shtet me shumicë dërrmuese demokrate, por gjithashtu kërcënon të mjegullojë fillimin e mandatit të Presidentit Joe Biden. Republikanët në të gjithë vendin po u bëjnë jehonë akuzave në rritje ndaj zotit Cuomo duke u përpjekur të heqin vëmendjen nga suksesi i zotit Biden me pandeminë e të sfidojnë avantazhin e fortë të partisë së tij me votueset gra.

Sekretarja e shtypit e Shtëpisë së Bardhë, Jen Psaki ka thënë vazhdimisht se Presidenti Biden dhe Nënpresidentja Kamala Harris mbështesin hetimin e nisur nga zyra e Prokurores së Përgjithshme të Shtetit lidhur me akuzat për ngacmim.

Ditët e fundit Guvernatori u ka bërë thirrje ligjvënësve dhe mbështetësve që të mos kërkojnë dorëheqjen e tij, por të mbështesin hetimet që po zhvillohen lidhur me akuzat e ngritura. Strategjia e tij duket se nuk po funksionon.

Asambleja e shtetit miratoi të enjten nisjen e hetimit, një proces që mund të çojë në shkarkimin zotit Cuomo.

Së bashku me një pretendim se guvernatori ka ngacmuar vitin e kaluar një ndihmëse të tij në rezidencës e tij në pronësi të shtetit të Nju Jorkut, zoti Cuomo përballet me akuza për komente me natyrë seksuale ndaj grave. Pjesa më e madhe e akuzueseve janë ish-ndihmëse të tij. Një prej këtyre të fundit tha se ai e kishte pyetur nëse do të kryente ndonjëherë marrëdhënie seksuale me një burrë shumë më të madh se ajo në moshë. Dhe një tjetër ndihmëse pretendon se guvernatori e ka puthur një herë pa pëlqimin e saj dhe tha se ndihmës të tjerë të tij e kishin denigruar publikisht, pasi ajo e kishte akuzuar zotin Cuomo për ngacmim seksual.

Gjatë javëve të kaluara, thirrjet për shkarkim ose dorëheqjen e guvernatorit kanë ardhur edhe nga republikanë apo demokratë me prirje të majta në qytetin e Nju Jorkut. Por ditët e fundit numri është shtuar.

Një shumicë e ligjvënësve të shtetit dhe më shumë se gjysma e anëtarëve demokrat të organit legjilativ të Nju Jorkut po bëjnë tashmë thirrje që ai të largohet.

Të premten ligjvënësit Jerry Nadler, Ocasio-Cortez, Jamaal Bowman, Mondaire Jones, Nydia Velazquez, Adriano Espaillat, Carolyn Maloney, Grace Meng, Antonio Delgado, Brian Higgins dhe Yvette Clarke kërkuan dorëheqjen e zotit Cuomo, duke iu bashkuar ligjvënëses Kathleen Rice, e cila kishte kërkuar më parë dorëheqjen e tij.

Republikanë të organit legjilativ të Nju Jorkut kanë kërkuar gjithashtu dorëheqjen e zotit Cuomo, mes tyre Nicole Malliotakis, Elise Stefanik, Claudia Tenney dhe Lee Zeldin.

Ligjvënësi Jerry Nadler tha se zoti Cuomo e ka humbur besimin e njujorkezëve.

“Akuzat e përsëritura kundër guvernatorit dhe mënyra në të cilën ai u është përgjigjur atyre, e kanë bërë të pamundur në këtë pikë që ai të vazhdojë të drejtojë shtetin“, tha zoti Nadler.

Demokratët e Nju Jorkut gjithashtu vunë në dukje kritikat e ngritura ndaj zotit Cuomo lidhur me mbajtjen sekret prej muajsh të numrit të banorëve në shtëpitë e të moshuarave që kanë humbur jetën nga COVID-19. Guvernatori ka thënë se administrata e tij duhej të verifikonte fillimisht numrin e vdekjeve në spitale të atyre personave që jetonin në azile përpara se të dilte me shifra të sakta, por kritikët kanë ngritur pikëpyetje se pse një gjë e tillë nuk ka penguar lëshimin e të dhënave nga ana e shteteve të tjera.

Zëdhënësit e senatorëve demokrate të Nju Jorkut, Chuck Schumer dhe Kirsten Gillibrand, nuk i janë përgjigjur ende kërkesa të premten për komente.

Guvernatori 63-vjeçar pritet të konkurojë për një mandat të katërt vitin e ardhshëm. Nju Jorku nuk ka kufizime për sa i takon numrit të mandateve.

Zoti Cuomo është përballur gjithnjë e më shumë me kritika se ai shpesh ka përdorur në mënyrë agresive fuqinë e tij për të forcuar imazhin dhe jo për interesa të njujorkezëve.

Në një raport të publikuar në janar nga zyra e prokurorit të përgjithshëm të shtetit thuhej se administrata e zotit Cuomo nuk kishte bërë publike me mijëra vdekje si pasojë e COVID-it mes banorëve në shtëpitë e të moshuarave. Një anëtar demokrat i asamblesë së Nju Jorkut e ka akuzuar guvernatorin se e kishte kërcënuar pasi kishte folur hapur kundër tij.

Gjatë ditëve të fundit, përfaqësues të demokratëve të Nju Jork me qasje të moderuar kanë ngritur shqetësime në lidhje me akuzat e ngritura ndaj zotit Cuomo, i cili prej kohësh ka gëzuar mbështetjen e votuesve në periferi e qendër të shtetit. Të premten një grup prej pesë demokratësh të moderuar nga ishulli i Long Island-it të shtetit të Nju Jorkut, i bënë thirrje zotit Cuomo të largohet, derisa të përfundojë hetimi i Prokurores së Përgjithshme.

Ligjvënësit e Long Island-it thanë se pretendimet “janë tejet shqetësuese dhe përshkruajnë një model shqetësues të sjelljes që përfshin potencialisht një shkelje penale, siç thanë ata. VOA

Qyteti Mineapolis pranoi të premten të paguajë 27 milionë dollarë për të përmbyllur një proces gjyqësor civil të çelur nga familja e George Floyd-it mbi vdekjen e tij ndërsa mbahej nga policia, edhe pse ndërkohë përzgjedhja e jurisë vazhdonte për gjyqin e ish-oficerit të policisë të akuzuar për vrasje.

Këshilli Bashkiak i Mineapolisit doli nga një seancë e mbyllur për të njoftuar shifrën rekord, e cila përfshin 500,000 dollarë për lagjen ku zoti Floyd u arrestua.

Avokati i familjes Floyd, Ben Crump, në një deklaratë të përgatitur, tha se ishte marrëveshja paraprake më e madhe ndonjëherë për një çështje të të drejtave civile dhe se “dërgon një mesazh të fuqishëm se jeta e afrikano-amerikanëve ka rëndësi dhe brutaliteti i policisë kundër njerëzve me ngjyrë duhet të marrë fund”.

George Floyd, i cili ishte afrikano-amerikan, u shpall i vdekur më 25 maj pasi Derek Chauvin, një ish-oficer policie i bardhë, i vendosi gjurin në qafë për rreth nëntë minuta. Vdekja e zotit Floyd shkaktoi disa herë protesta të dhunshme në Minneapolis dhe më gjerë dhe solli një reflektim kombëtar për drejtësinë racore.

“Shpresoj që dita e sotme të përqendrohet tek zërat e familjes dhe gjithçka që ata do të dëshironin të ndanin”, tha Kryetarja e Këshillit Lisa Bender. “Por unë dua që, në emër të të gjithë Këshillit Bashkiak, t’i shpreh ngushëllimet e mia më të thella familjes së George Floyd-it, miqve të tij dhe të gjithë komunitetit tonë që po vajtojnë për humbjen e tij”.

Familja e zotit Floyd ngriti padinë federale për të drejtat civile në korrik kundër qytetit, oficerit Chauvin dhe tre oficerëve të tjerë të pushuar nga puna të akuzuar për vdekjen e tij. Ajo pretendonte se oficerët shkelën të drejtat e zotit Floyd kur e ndaluan dhe se qyteti lejoi që një kulturë e forcës së tepruar, racizmit dhe mosndëshkimit të lulëzonte në forcën e tij policore.

Në vitin 2019, qyteti Minneapolis pranoi të paguante 20 milionë dollarë familjes së Justine Ruszczyk Damond, një grua e paarmatosur e cila u qëllua nga një oficer policie pasi ajo i telefonoi numrit të urgjencës për të raportuar se po dëgjonte kryerjen e një krimi të mundshëm që po ndodhte pas shtëpisë së saj.

Padia federale kërkonte dëmshpërblim të papërcaktuar dhe të veçantë në një shumë që do të përcaktohej nga një juri. Ajo gjithashtu kërkonte që të emërohej një zyrtar për t’u siguruar që qyteti të trajnojë dhe mbikëqyrë siç duhet oficerët në të ardhmen.

Ndërkohë, një anëtare tjetër e mundshme e jurisë u shkarkua të premten pasi ajo pranoi se kishte pikëpamje negative për të pandehurin.

Gruaja, e sapodiplomuar nga kolegji, tha se kishte parë videon e filmuar nga një kalimtar të arrestimit të zotit Floyd dhe kishte lexuar nga afër mbulimin e lajmeve për këtë çështje. Në përgjigje të një pyetësori për jurinë, ajo tha se ajo kishte një perceptim “disi negativ” për oficerin Chauvin dhe se ajo mendon se ai e mbajti shumë gjatë gjurin e tij në qafën e zotit Floyd.

“Munda të shikoj vetëm një pjesë të videos, dhe nga ajo që pashë, si njeri, mua kjo nuk më dha përshtypje të mirë”, tha ajo. Ajo tha se nuk e shikoi videon e kalimtarit të plotë sepse “unë thjesht nuk mundesha ta shikoja më”.

Gruaja në mënyrë të përsëritur tha se mund të linte mënjanë mendimet e saj dhe të vendoste për çështjen bazuar tek faktet, por avokati i oficerit Chauvin, Eric Nelson megjithatë përdori një nga 15 autorizimet që i jep ligji për të përjashtuar anëtarë të jurisë.

Me zgjedhjen e jurisë në ditën e katërt, gjashtë vetë janë përzgjedhur tashmë – pesë burra dhe një grua. Tre janë të bardhë, një është multi-racial, një është hispanik dhe një është afrikano-amerikan, sipas Gjykatësit të Qarkut Hennepin, Peter Cahill.

Gjykatësi Cahill ka caktuar tre javë për seleksionimin e jurisë, dhe deklaratat hapëse do të mbahen jo më shpejt se 29 marsi.

Shkarkimi i shpejtë i së premtes i ngjasonte shkarkimeve pararendëse në këtë çështje, për arsye të ngjashme. Të enjten, një grua u shkarkua pasi tha se “nuk mundej ta shikonte videon” ku oficeri Chauvin mban të mbërthyer në tokë zotin Floyd.

Avokati Nelson e pyeti në mënyrë të përsëritur gruan nëse ajo do të mund të ishte e drejtë pavarësisht nga opinionet e saj të forta.

“Duke parë në zemrën tuaj dhe duke parë në mendjen tuaj a mund të na siguroni se mund t’i lini mënjanë të gjitha ato, të gjitha ato, dhe të përqendroheni vetëm në provat që paraqiten në këtë sallë gjyqi?” – pyeti avokati Nelson.

“Unë mund t’ju siguroj. Por ashtu siç ju përmendët më parë, videoja do të jetë një pjesë e madhe e provave dhe nuk kam asnjë ndryshim mendimi për këtë”, u përgjigj ajo.

Identitetet e anëtarëve të mundshëm të jurisë po mbrohen dhe ato nuk tregohen në videon e transmetuar drejtpërdrejtë nga zhvillimi i procedurave.

Oficeri Chauvin dhe tre oficerë të tjerë u pushuan nga puna. Të tjerët përballen me një gjyq në gusht me akuzën se ndihmuan dhe inkurajuan autorin. Mbrojtja nuk ka thënë nëse zoti Chauvin do të dëshmojë për të mbrojtur veten. VOA

Presidenti Joe Biden shënoi një vit që kur pandemia e koronavirusit filloi të përhapej në Shtetet e Bashkuara, me fjalimin e tij të parë televiziv të enjten në mbrëmje, duke përkujtuar humbjen e më shumë se gjysmë milioni jetësh dhe ofruar shpresë për ditë më të mira përpara.

“Një vit më parë, ne u goditëm nga një virus që u prit pa përgjigje dhe u përhap në mënyrë të pakontrolluar. Për ditë, javë dhe muaj, refuzimi për ta pranuar këtë fakt rezultoi në më shumë vdekje, më shumë infeksione, më shumë stres dhe më shumë vetmi”, tha Presidenti Biden.

Ai tha se do të udhëzojë shtetet që deri më 1 maj të gjithë të rriturit të kenë të drejtën të vaksinohen për koronavirusin dhe u bëri thirrje amerikanëve të mbeten vigjilentë ndaj virusit, disa orë pasi nënshkroi një ligj për paketën stimuluese prej 1.9 trilionë dollarësh.

Zoti Biden foli me forcë për ndikimin e zymtë që pati virusi dhe tha se po punonte për të shpejtuar vaksinimet ndaj COVID-19 për të krijuar një ndjenjë më të madhe normaliteti në vend deri në Ditën e Pavarësisë amerikane më 4 korrik.

Kjo datë është një pikësynim i ri për presidentin, i cili ka paralajmëruar amerikanët se virusi do të vazhdojë të shkaktojë dhimbje dhe vdekje të mëtejshme. Mbi 530,000 njerëz kanë vdekur nga koronavirusi në Shtetet e Bashkuara, shifra më e lartë mes të gjiha vendeve. Bllokimet dhe kufizimet e lidhura me koronavirusin kanë shkaktuar humbjen e miliona vendesh pune.

“Gjetja e dritës në mes të errësirës është një karakteristikë tipike e amerikanëve. Në fakt, mund të jetë më tipikja”, tha ai.

Ndërsa një numër në rritje njerëzish që po vaksinohen përfitojnë nga paketa financiare, presidenti Biden shprehu optimizëm të përmbajtur në një vend që ashtu si pjesa tjetër e botës, është lodhur nga kufizimet pandemike dhe pasojat ekonomike.

Biden tha se po urdhëronte shtetet dhe territoret amerikane që të hapnin vaksinimet për të gjitha grupet e të rriturve të popullatës deri më 1 maj. Shtëpia e Bardhë ka thënë se do të ketë furnizim të mjaftueshëm me vaksina për të imunizuar popullatën deri në fund të majit. Rreth 10% e amerikanëve janë vaksinuar plotësisht deri tani.

Presidenti njoftoi gjithashtu një shtesë prej 4,000 trupash amerikane që do të ndihmojë në përpjekjet e vaksinimit, duke e çuar numrin e përgjithshëm në 6,000 dhe tha se familjet dhe miqtë duhet të jenë në gjendje të mblidhen përsëri në grupe të vogla deri më 4 korrik, një festë që shumë amerikanë e shënojnë me piknike, ushqime dhe fishekzjarre.

Shtëpia e Bardhë po kërkon gjithashtu ta zgjerojë grupin e njerëzve në gjendje të administrojnë vaksina, duke përfshirë dentistë, optometristë, paramedikë, veterinerë dhe studentë të mjekësisë.

Presidenti Biden bëri fushatë vitin e kaluar me premtimin se do ta menaxhonte pandeminë në mënyrë më efektive sesa presidenti republikan Donald Trump dhe ka synuar ta bëjë sjelljen e tij model, duke inkurajuar masa si mbajtja e maskave, diçka që zoti Trump e kiste shmangur.

Ai inkurajoi amerikanët që të vazhdonojnë me masat për frenimin e pandemisë – duke mbajtur maska, duke ruajtur distancën fizike dhe duke praktikuar një higjienë të mirë – për të ndaluar përhapjen e tij ndërsa ritmi i vaksinimeve rritet. Një numër shtetesh kanë lehtësuar kufizimet.

“Ne u përballëm dhe kapërcyem një nga periudhat më të vështira dhe të zymta në historinë e këtij vendi, më e errëta që kemi njohur. Ju premtoj që do të dalim prej saj më të fortë”, tha ai.

Fjalimi i zotit Biden në Shtëpinë e Bardhë po vjen 50 ditë pasi ai mori detyrën dhe pothuajse saktësisht një vit pasi pjesa më e madhe e ekonomisë amerikane pasi koronavirusi u përhap shtet pas shteti në një vend që ishte i papërgatitur për krizën më të madhe shëndetësore që nga epidemia e gripit të vitit 1918 .

Një shans për rimëkëmbje

Më herët të enjten, Presidenti Joe Biden nënshkroi duke e kthyer në ligj paketën stimuluese prej 1.9 trilionë dollarësh, një masë që synon të lehtësojë amerikanët e të forcojë ekonominë, në praninë e nënpresidentes Kamala Harris.

Paketa mori të mërkurën miratimin përfundimtar të Kongresit, duke i dhënë presidentit demokrat një fitore të madhe në këto muaj të parë të mandatit të tij. Zoti Biden dhe anëtarë të lartë të administratës së tij do të bëjnë një turne në shtete të ndryshme për të folur për meritat e legjislacionit dhe për ta shpjeguar atë.

“Ky ligj historik ka të bëjë me rindërtimin e shtyllës kurrizore të këtij vendi dhe synon t’u japë njerëzve të këtij vendi, – njerëzve që punojnë dhe njerëzve të klasës së mesme, njerëzve që ndërtuan vendin – një shans për të luftuar“, tha zoti Biden para nënshkrimit.

Paketa siguron 400 miliardë dollarë të cilat do të jepen në formë pagesash direkte prej 1400 dollarësh për shumicën e amerikanëve, 350 miliardë dollarë ndihmë për shtetet dhe qeveritë lokale, një zgjerim të pagesës për fëmijët dhe rritje të fondeve për shpërndarjen e vaksinave kundër COVID-19-s.

Projekt-ligji u miratua pa një votë të vetme nga republikanët, të cilët ishin ankuas se kostoja e saj ishte shumë e lartë.

Masat për izolimin filluan nën administratën e zotit Trump, i cili e minimizoi krizën në fazat e saj të hershme ndërsa bëri shpesh parashikimin se virusi do të zhdukej së shpejti, megjithëse administrata e tij bëri përpjekje për të përshpejtuar zhvillimin e vaksinave.

Ish- presidenti dhe gruaja e tij, Melania Trump, nuk u shfaqën në mesazh televiziv publik të enjten ku të gjithë ish-presidentët amerikanë që jetojnë dhe bashkëshortet e tyre, inkurajuan amerikanët të bënin vaksinat COVID-19.

Presidenti Joe Biden parashtroi një plan ambicioz pune për 100 ditët e tij të para në detyrë, duke premtuar veprim të shpejtë për gjithçka, që nga ndryshimi i klimës, reforma e emigracionit e deri tek pandemia e koronavirusit.

Në ditën e tij të 50-të në detyrë (të mërkurën), administrata e tij arriti një moment të rëndësishëm: miratimin përfundimtar në Kongres të paketës së tij masive të ndihmës ekonomike prej 1.9 trilionë dollarësh për koronavirusin. Projekt-ligji përfshin pagesa të drejtpërdrejta për miliona amerikanë dhe fonde për të ndihmuar Shtëpinë e Bardhë të realizojë një numër premtimesh të bëra gjatë fushatës së presidentit Biden, si rihapja e shkollave dhe vaksinimi i më shumë amerikanëve.

Në pesëdhjetë ditët e para në detyrë, presidenti Biden ka bërë përparime të mëdha për një numër premtimesh ndërsa mbetet ende punë për të përmbushur premtime të tjera që kërkojnë veprim. Ja disa nga arritjet në premtimet e tij kryesore:

PREMTIMET E PËRMBUSHURA

Presidenti Biden i dha përparësi zgjidhjes së problemit të pandemisë së koronavirusit gjatë javëve të tij të para në detyrë dhe fokusi në këtë çështje ka sjellë rezultate. Ai pritet ta realizojë synimin e tij për të bërë 100 milionë doza vaksine në 100 ditët e tij të para qysh në fund të javës së ardhshme. Shkalla e vaksinimeve tani është mesatarisht më shumë se 2 milionë vaksina në ditë. Janë bërë më shumë se 75 milionë doza që prej inaugurimit të zotit Biden.

Joe Biden ndërmori gjithashtu disa veprime të hershme duke përmbushur premtimet e bëra për politikat ndaj klimës. Ditën e Inaugurimit ai nënshkroi një urdhër ekzekutiv që pezullonte lejen për ndërtimin e naftësjellësit Keystone XL, ndaloi shpimet në Zonën Kombëtare Natyrore në Rrethin e Arktikut dhe urdhëroi rishikimin e rregullave të periudhës së Trumpit për mjedisin, shëndetin publik dhe shkencën. Një urdhër ekzekutiv i 27 janarit ndaloi kontratat e reja të shpimit për naftë dhe gaz në tokat federale dhe në det të hapur.

Presidenti Biden gjithashtu realizoi me lehtësi premtimet kryesore të bëra në fushatë për anulimin e politikave të ish-administratës Trump në pothuajse çdo fushë, që nga ndryshimi i klimës e deri tek imigracioni. Së pari, administrata Biden e ktheu vendin në Organizatën Botërore të Shëndetësisë dhe Marrëveshjen e Parisit për Klimën, ndaloi ndërtimin e murit kufitar, u dha fund kufizimeve të udhëtimit për njerëzit nga një numër vendesh me shumicë myslimane dhe krijoi një grup pune për të bashkuar familjet e ndara në kufirin SHBA-Meksikë.

Në lidhje me imigracionin, presidenti Biden u zotua për një projekt-ligj reformash bashkëkohore në Kongres brenda 100 ditëve të tij të para dhe ai u parashtrua muajin e kaluar, megjithëse presidenti Biden ka sinjalizuar se është i hapur për një qasje më të tërthortë nëse është e nevojshme. Presidenti Biden nënshkroi gjithashtu një urdhër ekzekutiv që udhëzon Këshilltarin e Sigurisë Kombëtare për të “ruajtur dhe forcuar” mbrojtjen e emigrantëve të rinj të sjellë në Shtetet e Bashkuara nga prindërit e tyre.

Joe Biden bëri gjithashtu disa lëvizje të për të përmbushur premtimin e tij për të forcuar standardet e etikës në administrate, duke përfshirë një urdhër ekzekutiv të 20 janarit që imponon një premtim etik mbi të emëruarit qeveritarë për aktivitete të tilla si lobimi dhe marrja e dhuratave, e që përfshin edhe ndalimin e ndërhyrjeve politike në Departamentin e Drejtësisë .

NË PROCES

Premtimet e tjera të zotit Biden mbeten një punë në vazhdim.

Strategjia kombëtare e presidentit Biden për COVID-19 parashikonte krijimin e 100 qendrave të reja të vaksinimit deri në fund të shkurtit, të mbështetura nga qeveria federale në të gjithë vendin. Deri tani, administrata ka krijuar rreth 20 vende për vaksinime masive të drejtuara nga qeveria federale dhe e plotësuar me trupa ushtarake në detyrë të dislokuara nga Pentagoni. Administrata thotë se në total, të paktën 441 qendra vaksinimi mbështeten tani nga qeveria federale. Shumë prej tyre nuk janë qendra të reja, por pothuajse të gjitha kanë zgjeruar kapacitetin me burimet federale shtesë.

Në lidhje me imigracionin, zoti Biden u zotua të kthejë rregullin e “akuzës publike” të vendosur nga administrata Trump për të dekurajuar emigrantët nga përdorimi i përfitimeve publike, të thjeshtojë procesin e natyralizimit dhe të reformojë sistemin e azilit në SHBA brenda 100 ditëve të tij të para. Një urdhër ekzekutiv që ai nënshkroi në fillim të shkurtit udhëzon agjencitë përkatëse të rishikojnë këto politika dhe të rekomandojnë ndryshime brenda 60 ditësh.

Administrata ka ndërmarrë disa veprime për të reformuar sistemin e azilit, duke përfshirë një lëvizje nga Departamenti i Sigurisë Kombëtare për të pezulluar një program të administratës Trump që kërkonte që azilkërkuesit të presnin në Meksikë ndërsa pretendimet e tyre merreshin në shqyrtim. Por presidenti Biden ende nuk ka artikuluar një plan për të menaxhuar fluksin e azilkërkuesve, përtej propozimit që të shpenzohen miliarda dollarë për të adresuar shkaqet themelore të këtij problemi në Amerikën Qendrore.

Presidenti ka mbajtur gjithashtu urdhëra të lidhura me pandeminë që lejojnë administratën e tij të dëbojë menjëherë njerëzit në kufi pa patur një mundësi për të kërkuar azil. Ndihmësit e presidentit Biden kanë thënë se nuk kanë plane të menjëhershme për t’i dhënë fund këtij autoriteti, të cilin ish presidenti Trump e futi në fuqi një vit më parë duke përdorur një ligj të paqartë të vitit 1944 për shëndetin publik.

Presidenti Biden premtoi gjithashtu t’i japë fund ndalimit afatgjatë të familjeve migrante. Agjencia e Imigracionit dhe Doganave sinjalizoi javën e kaluar se planifikon të ndërpresë përdorimin e një strukture të tillë, por do të vazhdojë të mbajë familjet për tre ditë ose më pak në dy objekte të tjera në Teksas. Administrata Biden po zgjeron kapacitetin në një numër objektesh që mbajnë fëmijët emigrantë, për të adresuar një rritje të vazhdueshme të të miturve të pashoqëruar që kalojnë kufirin.

Në lidhje me ndryshimin e klimës, zoti Biden u zotua të vendosë angazhime të zbatueshme nga vendet e tjera për të zvogëluar emetimet në transportin global dhe aviacion dhe të organizojë një samit botëror të klimës për të diskutuar premtime të reja dhe më ambicioze për të adresuar ndryshimet klimatike, brenda 100 ditëve të tij të para. SHBA do të zhvillojë një samit të tillë më 22 prill, që është edhe Dita e Tokës.

Rihapja e shkollave është një nga premtimet kryesore të fushatës së zotit Biden që ka provuar të jetë më e vështirë për t’u zbatuar, pjesërisht pasi vendimi u është lënë zyrtarëve lokalë dhe sindikatave të mësuesve.

Këtë muaj presidenti Biden udhëzoi shtetet t’u japin përparësi mësuesve të vaksinohen dhe njoftoi se po caktonte burime federale për vaksinimin e mësuesve në mars.

Administrata Biden shpreson që me miratimin e projekt-ligjit të ndihmës ekonomike për koronavirusin dhe shpërndarjen e miliona dollarëve për shkollat për të përmirësuar masat e sigurisë, mësuesit do të ndihen më të sigurtë për t’u kthyer në klasa.

Rreth 47% e nxënësve deri në klasën e 12-të kanë qasje fizike në shkolla çdo ditë.

PRITJA PËR VEPRIM

Administrata Biden ende nuk ka ndërmarrë veprime të rëndësishme mbi reformën në drejtësinë penale, përveç një urdhri ekzekutiv që përfundon kontratat e burgjeve private. Zoti Biden u zotua të krijojë një bord mbikqyrës policie brenda 100 ditëve të tij të para, por deri tani nuk ka pasur lëvizje të qartë në atë drejtim.

Premtime të tjera për 100-ditët e para që gjithashtu presin veprim: krijimi i një grupi pune në nivel kabinetit për t’u përqendruar në promovimin e pjesëmarrjes së sindikatës dhe një rishikim të FBI-së për çështjen e kontrollit të biografisë për blerjen e armëve.

Disa nga premtimet e zotit Biden për 100 ditët e para do të kërkojnë veprime në Kongres, si premtimi i tij për të riautorizuar Aktin e Dhunës Kundër Grave dhe për të rritur taksat ndaj korporatave. Zoti Biden premtoi gjithashtu të miratohet Akti i Barazisë, i cili ndalon diskriminimin në bazë të seksit, orientimit seksual dhe identitetit gjinor. Ky projektligj është miratuar në Dhomën e Përfaqësuesve por jo në Senat.

Disa nga premtimet e tij presin konfirmimin nga Senati të sekretarëve të Kabinetit të tij.

Sekretari i Shtetit Antony Blinken mbajti sot fjalimin e tij të parë të rëndësishëm si kryediplomat i vendit, ku parashtroi në linja të gjera politikën e jashtme të administratës Biden.

Ai riafirmoi vendosmërinë e administratës për më tepër angazhim në çështjet globale. “Bota nuk organizohet vetë,” tha zoti Blinken. Kur Amerika tërhiqet, ose dikush tjetër do të përpiqet të zerë vendin e saj, ose askush nuk del për të mbajtur barrën dhe kjo çon në kaos, tha ai.

Sekretari i Shtetit tha se për të mposhtur pandeminë, është e nevojshme që qeveritë, shkencëtarët dhe bizneset kudo në botë të punojnë së bashku. Ai tha se nga pandemia duhen nxjerrë mësimet e duhura dhe të investohet si duhet në të ardhmen për çështjet e shëndetit global.

Zoti Blinken premtoi se Amerika do të përdorë fuqinë e shembullit të saj. “Ne do të inkurajojmë të tjerët të bëjnë reforma të rëndësishme, të anulojnë ligje të këqia, të luftojnë korrupsionin dhe të ndalin praktikat e padrejta,” tha ai. Por ai shtoi se SHBA nuk do ta nxisin demokracinë përmes ndërhyrjeve të shtrenja ushtarake ose duke u përpjekur të përmbysin me forcë regjime autoritare.

“Ne i kemi provuar këto taktika në të kaluarën. Sado me qëllime të mira, ato nuk kanë funksionuar. Ato i kanë dhënë ‘nxitjes së demokracisë’ një emër të keq,” tha zoti Blinken.

Ai tha se zgjidhja e problemeve të demokracisë brenda SHBA ka rëndësi të dorës së parë për diplomacinë e saj jashtë. Përndryshe, tha ai, “ne do të bënim lojën e Rusisë dhe Kinës të cilët shfrytëzojnë çdo rast për të mbjellë dyshime rreth demokracisë sonë.”

Lidhur me imigracionin, Sekretari i Shtetit tha se një kufi i fortë është me rëndësi thelbësore për sigurinë e vendit, por shtoi se Amerika është vend imigrantësh dhe se duhet ta zgjidhë me diplomaci faktin që vit pas viti, njerëz nga vende të tjera rrezikojnë çdo gjë për të ardhur në Shtetet e Bashkuara.

Në fjalimin e tij, zoti Blinken tha se Amerika po bën një përpjekje të madhe për të rivendosur lidhjet me miqtë dhe aleatët. Por ai shtoi se partneriteti me ta nënkupton që secili do të bëjë pjesën që i takon dhe barra nuk do të mbahet vetëm nga SHBA.

Duke folur për revolucionin e sotëm teknologjik, Sekretari i Shtetit bëri thirrje për forcimin e aftësive mbrojtëse kompjuterike të vendit. Ai solli shembullin e ndërhyrjes kibernetike në kompaninë SolarWinds vitin e kaluar, për të cilën dyshohet Rusia dhe që u shoqërua me një depërtim masiv në rrjetet kompjuterike të qeverisë amerikane.

Zoti Blinken tha se Kina është i vetmi vend që ka fuqinë për të sfiduar seriozisht sistemin e qëndrueshëm dhe të hapur ndërkombëtar me të gjitha rregullat dhe vlerat e tij.

Ai i përshkroi marrëdhëniet me Kinën si komplekse, ku do të ketë edhe bashkëpunim por edhe qëndrime nga këndvështrimi i një kundërshtari. Sekretari i Shtetit tha se Amerika do të mbrojë vlerat për të cilat lufton, kur shikon se të drejtat e njeriut shkelen në Sinkiang ose kur demokracia nëpërkëmbet në Hong Kong.

SHBA, tha zoti Blinken, do ta angazhojnë Kinën nga pozitat e forcës.

Ai i përshkroi marrëdhëniet me Kinën si komplekse, ku do të ketë edhe bashkëpunim por edhe qëndrime nga këndvështrimi i një kundërshtari.

Sekretari i Shtetit tha se Amerika do të mbrojë vlerat për të cilat lufton, kur shikon se të drejtat e njeriut shkelen në Sinkiang ose kur demokracia nëpërkëmbet në Hong Kong. SHBA, tha zoti Blinken, do ta angazhojnë Kinën nga pozitat e forcës.

Drejtori i Byrosë Federale të Hetimeve Chris Wray po dëshmon në Kongresin amerikan lidhur me trazirat vdekjeprurëse të 6 janarit në Kapitolin amerikan. Ndër të tjera, ai po përballet edhe me pyetjet nëse FBI-ja komunikoi në mënyrë adekuate me agjencitë e tjera të zbatimit lidhur me mundësitë për dhunë më 6 janar.

Seanca në Komisionin e Senatit për Gjyqësorin, ku po dëshmon zoti Wray, pritet të dominohet nga pyetjet lidhur me përgatitjet e Byrosë Federale të Hetimeve për trazirat dhe hetimet që pasuan. Një tjetër temë e nxehtë pritet të jetë dhe mënyra se si FBI-ja po përballet me kërcënimin e sigurisë kombëtare nga nacionalistët e bardhë dhe ekstremistët e dhunshëm të brendshëm dhe nëse agjencia e tij ka burimet e duhura për të trajtuar këtë problem.

Dhuna në Kapitol e bëri të qartë se agjencia e zbatimit të ligjit që revolucionarizoi veten pas sulmeve të 11 shtatorit 2001, për t’u marrë me terrorizmin ndërkombëtar, tani po përpiqet të adresojë dhunën në rritje nga amerikanët e bardhë.

Administrata e Presidentit Joe Biden ka ngarkuar drejtorin e zbulimit kombëtarë për të punuar me FBI-në dhe Departamentin e Sigurisë Kombëtare për të vlersëuar kërcënimin.

Drejtori Wray ka mbajtur një profil relativisht të ulët që nga dhuna në Kapitolin amerikan dy muaj më parë. Megjithëse ka informuar ligjvënësit privatisht dhe ndarë të dhëna me organet lokale të zbatimit të ligjit për seanca dëgjimore, për zotin Wray dita e sotme shënon daljen e parë publike para Kongresit që nga zgjedhjet presidenciale të nëntorit.

FBI-ja po përballet me pyetje se si i trajtoi të dhënat e zbulimit në ditët para trazirës dhe nëse paralajmërimet për dhunë të mundshme u transmetuan tek zyrtarët e duhur.

Javën e shkuar, shefi i përkohshëm i policisë së Kapitolit tha se raporti i 5 janarit nga FBI-ja ra në dorën e hetuesve brenda forcës së policisë dhe tek njesia e zbulimit, por asnjëherë nuk u dërgua tek hallkat drejtuese.

Raporti në fjalë paralajmëroi në lidhje me postimet në internet që flisinin për “luftë” në kryqytetin amerikan me 6 janar. FBI-ja ka thënë se raporti i saj i përpiluar në të dhëna të paverifikuara, u nda me të gjithë aktorët që janë pesë e forcës kundër terrorizmit.

Një tjetër çështje që mund të ngrihet në seancën e sotme dëgjimore është edhe hetimi i FBI-së lidhur me hakerimin masiv rus të korporatave amerikane dhe agjencive qeveritare, kur hakerë me njohuri të larta injekuan një kod elektronik infektues në përditësimin e programeve kompjuterike.

Ish-Presidenti i SHBA Donald Trump u shfaq të dielën si republikani dominues i vendit, me përpjekjen që partia të fitojë përsëri kontrollin e Kongresit vitin e ardhshëm dhe ndoshta të kandidojë vetë përsëri për presidencën në vitin 2024.

Ai mbajti të dielën pasdite një fjalim në Konferencën vjetore të Veprimit Politik Konservator në Orlando të Floridës, ku ishin mbledhur qindra republikanë, ndër më të flaktët e kësaj partie. Ky ishte fjalimi i tij i parë i rëndësishëm pas humbjes së presidencës ndaj demokratit Joe Biden.

“Qëndroj sot para jush për të deklaruar se rrugëtimi i jashtëzakonshëm që nisëm së bashku katër vjet më parë është shumë larg nga të qënit i përfunduar”, tha zoti Trump.

“Jemi mbledhur këtë pasdite për të folur për të ardhmen – të ardhmen e lëvizjes sonë, të ardhmen e partisë tonë dhe të ardhmen e vendit tonë të dashur,” tha ai.

Por zoti Trump gjithashtu afirmoi synimin e tij si figura mbizotëruese e partisë, duke e lënë të hapur alternativën për të kandiduar përsëri pas tre vjetësh për një mandat tjetër katër-vjeçar në Shtëpinë e Bardhë.

“Ku i dihet. Unë mund të vendos t’i mposht demokratët për herë të tretë,” tha ish-presidenti nën brohoritjet e të pranishmëve, duke përsëritur pretendimin e pa mbështetur në fakte se i kishte fituar zgjedhjet e nëntorit 2020.

Ai argumentoi se partia është “e bashkuar”, pavarësisht disa ligjvënësve republikanë që thonë se ata duhet ta anashkalojnë ish-presidentin, mandati i vetëm i të cilit përfundoi me protesta të pafrytshme zgjedhore dhe me trazirat e 6 janarit në Kapitol.

Ish-presidenti tha se ai nuk ka në plan të krijojë një parti të re për të garuar me Partinë Republikane dhe shtoi se njoftime të tilla janë “lajme të rreme”.

BETEJA BRENDA REPUBLIKANËVE

Një betejë po zhvillohet brenda Partisë Republikane, ku disa nga figurat e njohura si udhëheqësi i pakicës së Senatit Mitch McConnell duan që ta anashkalojnë zotin Trump, ndërsa të tjerë, si aleati i ish-presidentit, Senatori Lindsey Graham, besojnë se e ardhmja e partisë varet nga energjia e bazës konservatore pro-Trump.

Rezultatet e një sondazhi të kryer me pjesëmarrësit në konferencë, i dhanë zotit Trump një mbështetje të fortë me 55 përqind, duke thënë se do të votonin për të në garën e emërimit presidencial republikan në vitin 2024. Guvernatori i Floridës, Ron DeSantis doli në vendin e dytë me 21 përqind.

Pa zotin Trump, DeSantis udhëhiqte me 43 përqind mes kandidatëve të tjerë, të cilët mëron shumë më pak vota.

Por jo të gjithë e mbështetën zotin Trump. Njëra pyetje e anketës ishte nëse Trump duhet të kandidojë përsëri në vitin 2024 dhe rezultati ishte i përzier: 68 përqind thanë se ai duhej të kandidonte ndërsa 32 përqind ishin kundër ose pa ndonjë opinion.

Deklaratat e zotit Trump në konferencë të paktën shërbejnë për të frenuar ndonjë kandidat tjetër të mundshëm republikan për 2024-ën, si senatorët Marco Rubio, Ted Cruz dhe Tom Cotton, ish-ambasadoren në Kombet e Bashkuara Nikki Haley ose të tjerë që aspirojnë presidencën.

E ardhmja e zotit Trump si figura mbizotëruese republikane e vendit mbetet një pyetje e hapur. Ai është i vetmi president në historinë e SHBA ndaj të cilit u ngritën dy herë akuza për shkarkim nga Dhoma e Përfaqësuesve dhe që u shpall i pafajshëm të dyja herët. Është gjithashtu presidenti i parë në 90 vjet që humbi kontrollin politik të Shtëpisë së Bardhë dhe të dy dhomave të Kongresit në një mandat të vetëm në detyrë.

Konservatorët në konferencën tre-ditore e kanë brohoritur përmendjen e emrit të tij. Shumë prej tyre madje kanë pozuar për foto me një statujë të madhe të artë të fytyrës së tij që ishte skalitur në Meksikë dhe që shëtiti nëpër sallën e konferencës.

Në fillim të shkurtit, Senati votoi 57-43, me shtatë republikanë që iu bashkuan të 50 demokratëve, për ta shpallur fajtor zotin Trump për nxitjen e një turme prej qindra mbështetësve që sulmuan Kapitolin, kur ligjvënësit po çertifikonin humbjen e tij në zgjedhje. Megjithatë, Senati nuk arriti shumicën e dy të tretave të nevojshme për shpalljen e tij fajtor.

Trazira la pesë të vdekur, duke përfshirë një oficer të Policisë së Kapitolit. Më shumë se 200 protestues janë arrestuar ndërsa hetimi vazhdon.

Konferenca republikane ishte një nga tubimet vjetore më të spikatura për konservatorët dhe erdhi në një kohë debatesh në rritje brenda Partisë Republikane nëse duhet apo jo që të distancohet nga ish-presidenti apo të vazhdojnë ta lidhë të ardhmen e saj me të.

Zoti Trump ka sinjalizuar se do të përpiqet të dëmtojë imazhin politik të 10 republikanëve në Dhomën e Përfaqësuesve që votuan për ta hequr atë në janar, një javë para se ai të linte detyrën dhe shtatë të tjerëve në Senat që u shprehën pro shpalljes së tij fajtor.

Senatori Mitch McConnell, udhëheqësi i pakicës republikane të Senatit, votoi për ta shfajësuar zotin Trump në gjyq, por më pas e kritikoi ashpër ish-presidentin për rolin e tij në nxitjen e sulmit në Kapitol, ku protestuesit thyen dritaret, shkatërruan zyrat e Kongresit dhe u përleshën me policinë.

Senatori McConnell tha se zoti Trump ishte “praktikisht dhe moralisht përgjegjës për provokimin e ngjarjeve” që çuan në trazirat në Kapitol.

Trump u kundërpërgjigj, duke e portretizuar senatorin si një politikan të zellshëm që nuk i qesh buza kurrë dhe tha nëse senatorët republikanë do të qëndrojnë me zotin McConnell, “ata nuk do të fitojnë dot përsëri”.

Sidoqoftë, senatori McConnell tha javën e kaluar se do të mbështeste zotin Trump për presidencën nëse votuesit republikanë e emërojnë atë përsëri në vitin 2024.

I pyetur nëse Trump ende kontrollon Partinë Republikane, senatori Rick Scott nga Florida tha në emisionin “Fox News Sunday”, se kjo është “parti e votuesve”. Por ai shtoi se beson që zoti Trump do “të jetë i dobishëm” në të ardhmen e afërt.

“Ne jemi në anën e duhur të çështjeve, ndërsa demokratët janë në anën e gabuar” tha senatori Scott.

Një ligjvënës republikan që votoi për ta shpallur fajtor zotin Trump, senatori Bill Cassidy i Luizianës, tha për CNN se nëse republikanët rimarrin Shtëpinë e Bardhë pas katër vjetësh, “kjo do të ndodhë sepse ne flasim për çështjet, jo duke vendosur një person (Trump ) në piedestal.”

“Konferenca e tanishme nuk përfaqëson të gjithë Partinë Republikane,” tha ai. “Nëse ne kthejmë në idhull një njeri të vetëm atëherë do të humbasim.” “Unë nuk mendoj se ai do të jetë i emëruari ynë,” tha senatori. “Ne kemi nevojë për një njeri që punon për të gjithë.”

SULME KUNDËR PRESIDENCËS BIDEN

Fjalimi i zotit Trump përfshinte sulme kundër Presidentit Biden, në përpjekje për t’u pozicionuar si kritiku kryesor i presidentit të ri, në çështje të tilla si imigracioni dhe siguria përgjatë kufirit të SHBA me Meksikën apo rihapja e ngadaltë e shkollave të mbyllura për shkak të pandemisë.

“Të gjithë e dinim që administrata Biden do të ishte e keqe – por askush nga ne nuk e imagjinonte se sa e keqe do të ishte dhe sa larg do të shkonte”, tha ish-Presidenti Trump. “Joe Biden ka pasur muajin e parë më katastrofik se sa çdo president në historinë moderne,” tha ai.

Shtëpia e Bardhë e ka bërë të qartë se nuk do t’i kushtojë vemendje fjalimit.

“Fokusi ynë sigurisht nuk është në atë që thotë Presidenti Trump” në konferencë, u tha zëdhënësja e Shtëpisë së Bardhë Jen Psaki javën e kaluar gazetarëve.

Sondazhet e hershme kombëtare tregojnë se votuesit i japin miratim të gjerë muajit të parë të zotit Biden si president, duke përfshirë edhe disa republikanë. Por ish-Presidenti Trump, edhe nëse refuzohet gjerësisht nga demokratët dhe një shumicë e të pavarurve, mbetet mjaft popullor mes shumë votuesve republikanë.

Raporti i agjencive amerikane të zbulimit liston 21 persona për të cilët SHBA ka besim të madh se ishin përgjegjës për vdekjen e gazetarit në emër të princit të kurorës. Zyrtarët amerikanë besojnë se princi saudit i kurorës Mohammed bin Salman miratoi operacionin për “kapjen ose vrasjen” e gazetarit, thuhet në dokumentin e sapo lëshuar.

Ky lajm është në përditësim

Presidenti i Shteteve të Bashkuara, Joe Biden, telefonoi mbretin Salman të Arabisë Saudite, ndërsa administrata e tij pritet të publikojë një version të deklasifikuar të mandatuar nga kongresi të një raporti të zbulimit, që pritet të vërë në pah se i biri i mbretit, princi i Kurorës, Mohammed bin Salman, ka miratuar vrasjen e gazetarit saudit, Jamal Khashoggi, në vitin 2018.

Sipas Shtëpisë së Bardhë, gjatë bisedës telefonike, presidenti Biden dhe mbreti Salman “diskutuan mbi sigurinë rajonale, duke përfshirë përpjekjet e ripërtërira diplomatike të drejtuara nga Kombet e Bashkuara dhe Shtetet e Bashkuara për t’i dhënë fund luftës në Jemen dhe angazhimin amerikan për të ndihmuar Arabinë Saudite që të mbrojë territorin e saj, teksa përballet me sulme nga grupe të lidhura me Iranin”.

Njoftimi i Shtëpisë së Bardhë mbi telefonatën, vuri në dukje lirimin e fundit të disa aktivistëve amerikanë sauditë dhe veprimtares saudite për të drejtat e grave, Loujain al-Hathloul nga paraburgimi dhe pohoi rëndësinë që Shtetet e Bashkuara u kushtojnë të drejtave universale të njeriut dhe sundimit të ligjit. Njoftimi nuk përmendi raportin mbi vrasjen e Jamal Khashoggit, i planifikuar për t’u publikuar pas telefonatës.

Shtëpia e Bardhë nuk dha një shpjegim se pse njoftimi nuk përmendi Khashoggin, i cili ishte një banor i ligjshëm i Shteteve të Bashkuara dhe me fëmijë me shtetësi amerikane.

Jamal Khashoggi, kolumnist në Washington Post, u josh në konsullatën Saudite në Stamboll më 2 tetor 2018 dhe u vra nga një ekip operativësh të lidhur me princin e kurorës. Ata më pas e copëtuan trupin e tij. Eshtrat e tij nuk u gjetën kurrë.

Riadi përfundimisht pranoi se gazetari Khashoggi u vra gabimisht në një operacion që shkoi keq, por mohoi çdo përfshirje të princit të kurorës

Roli i princit të kurorës, i njohur nga nistoret e tij MBS, në vrasjen e Jamal Khashoggit, është subjekt i raporteve të medias që nga fundi i vitit 2018. Administrata e ish presidentit Donald Trump hodhi poshtë kërkesat e ligjvënësve për të publikuar një version të deklasifikuar të raportit, pasi që Shtëpia e Bardhë i dha përparësi shitjes së armëve në mbretëri dhe aleancës me Riadin, mes tensioneve në rritje të Shteteve të Bashkuara me rivalin e saj rajonal, Iranin.

Rivlerësimi i marrëdhënieve ndërmjet Shteteve të Bashkuara dhe Arabisë Saudite, dhe synimi për të vënë theksin tek të drejtat e njeriut, është një zotim fushate i presidentit Biden. Që nga marrja e detyrës, ai i ka dhënë fund shitjes së armëve që Riadi mund të përdorë në Jemen dhe emëroi diplomatin veteran Timothy Lenderking si të dërguarin e posaçëm për të udhëhequr përpjekjet e diplomacisë amerikane “për t’i dhënë fund luftës në Jemen, një luftë e cila ka krijuar katastrofë humanitare”.

“Presidenti Biden dëshiron të jetë i qartë se rruga e vjetër nuk është rrugë e e re,” tha Gerald Feierstein, nënkryetar i Institutit për Lindjen e Mesme.

Administrata po kërkon gjithashtu të distancohet nga MBS, sundimtari 35 vjeçar de facto vendit. Zëdhënësja e Shtëpisë së Bardhë, Jen Psaki, shpesh ka theksuar se presidenti Biden do të komunikojë vetëm me mbretin saudit.

Ndërsa Shtetet e Bashkuara po rishikojnë marrëdhëniet me sauditët, Shtëpia e Bardhë po përpiqet të nxisë rivalin rajonal të Riadit, Iranin, që të veprojë në përputhje me marrëveshjen bërthamore që u prish pasi ish presidenti Trump u tërhoq prej saj në vitin 2018.

Marrëveshja e njohur si Plani i Përbashkët Gjithëpërfshirës i Veprimit u arrit nga Irani dhe P5 + 1 (Kina, Franca, Gjermania, Rusia, Britania e Madhe dhe Shtetet e Bashkuara) nën administrimin e ish presidentit Barack Obama, në vitin 2015.

Dhënia fund e shitjeve të armëve sulmuese në Riad është pjesë e kalkulimeve më të mëdha gjeopolitike që përfshin drejtpeshimin e këtyre dy fuqive rajonale, tha zoti Feierstein, i cili ishte gjithashtu ambasador në Jemen në kohën e ish presidentit Obama.

“Ideja është që nëse ka një zgjidhje politike të konfliktit në Jemen, kjo mundet, në fakt, të zvogëlojë tensionin në rajon…”. tha ai.

Krahasuar me Libanin dhe Irakun, Jemeni është një përparësi më e vogël e sigurisë kombëtare për Iranin. Zbutja e tensioneve mund të jetë një masë e ndërtimit të besimit për të nxitur Teheranin përsëri në bisedimet bërthamore dhe përfundimisht të trajtojë shqetësimet tjera, duke përfshirë programin e tij të raketave balistike dhe mbështetjen për milicitë në Irak dhe Liban. Në fakt, tha zoti Feierstein, rirreshtimi i presidentit Biden me sauditët në Jemen, mund të ndihmojë më tej interesat e Shteteve të Bashkuara në rajon.

Por, analistë të tjerë thonë se rivlerësimi i marrëdhënieve me Riadin dhe riangazhimi me Teheranin mund të ketë kundërefekt. Kjo mund të bëjë që sauditët të ndjehen të braktisur nga Shtetet e Bashkuara dhe t’i shtyjë ata drejt veprimeve kundër interesave amerikane, tha Bradley Bowman, nga Fondacioni për Mbrojtjen e Demokracive, një institucion pro-izraelit i njohur për qëndrimet kundër marrëveshjes bërthamore me Iranin.

Por, Kelsey Davenport, nga Shoqata për Kontrollin e Armëve, kërkimet e së cilës përqendrohen në programet bërthamore dhe raketore në Iran, tha se mënyra më e mirë për të parandaluar një garë rajonale bërthamore është rivendosja e marrëveshjes bërthamore.

“Përballja me programin bërthamor të Iranit do të parandalojë që Arabia Saudite të ndjejë nevojën që të barazohet me mundësitë e Iranit,” tha ajo.

Zonja Davenport theksoi se gjatë disa viteve të fundit, sauditët kanë hedhur bazat për të zhvilluar një armë bërthamore, nëse do të zgjidhnin të bënin një gjë të tillë.

“Nga pikëpamja e sigurisë së Shteteve të Bashkuara dhe qëndrueshmërisë rajonale, rivendosja e një marrëveshjeje bërthamore është një hap i parë i rëndësishëm për të siguruar që nuk do të ketë krizë me Iranin që kalon në një krizë bërthamore rajonale”, tha ajo.