Një burrë që, sipas autoriteteve, kaloi 12 orë jashtë fushës së golfit të ish-presidentit amerikan, Donald Trump, përpara se Shërbimi Sekret ta pikaste, u deklarua i pafajshëm ndaj akuzave federale, që përfshijnë akuzën për tentim vrasjeje.

I akuzuari Ryan Wesley Routh u paraqit në gjykatën federale në West Palm Beach disa ditë pasi u paraqit aktakuza me pesë pika, që lidhej me përpjekjen e dytë për të vrarë Trumpin që nga korriku.

Routh hyri në sallën e gjyqit i prangosur dhe i përshëndeti gazetarët e mbledhur për ta ndjekur procesin. Avokatët e tij refuzuan të komentojnë pas seancës.

Përpjekja e pretenduar për vrasje u pengua kur një anëtar i Shërbimit Sekret vuri re tytën e pushkës e Routh që dilte përtej gardhit të fushës së golfit, ku po luante Trump, sipas autoriteteve. Një agjent qëlloi në drejtim të Routhit, i cili u largua me shpejtësi dhe pastaj u arrestua pranë vendit të ngjarjes.

Zyrtarët kanë thënë se Routh nuk qëlloi asnjë plumb dhe nuk e kishte Trump në rrezen e shikimit të tij. Ai la pas një kamerë digjitale, një çantë shpine, një pushkë dhe një qese plastike me ushqime.

Prokurorët kanë thënë se Routh kishte shkruar për planet e tij për ta vrarë Trumpin në një shënim të shkruar me dorë disa muaj para arrestimit të tij më 15 shtator, ku e përshkruante veprimin e tij si një “përpjekje të dështuar për vrasjen e Donald Trump” dhe ofronte 150.000 dollarë për këdo që mund ta “mbaronte punën”.

Ky shënim ishte në një kuti që Routh raportohet se e kishte dorëzuar në shtëpinë e një dëshmitari të paidentifikuar disa muaj para arrestimit të tij.

Seanca e ardhshme në këtë rast do të mbikëqyren nga gjyqtarja federale Aileen Cannon, e cila u emërua në këtë post nga Trump dhe gjithashtu është caktuar të merrej me çështjen penale ku ish-presidenti akuzohet për mbajtjen e dokumenteve të klasifikuara në pronën e tij në Mar-a-Lago.

Cannon ka tërhequr vëmendje për mënyrën e saj të trajtimit të çështjes penale të Trumpit, të cilën e hodhi poshtë në korrik, vendim që tani po apelohet nga ekipi i këshilltarit special Jack Smith.

Arrestimi i Routhit ndodhi dy muaj pasi Trump u qëllua dhe u plagos në vesh gjatë një përpjekje për vrasje në një tubim fushate në Pensilvani. Shërbimi Sekret ka pranuar se ka pasur mangësi në sigurinë para atij sulmi, por ka thënë se masat e sigurisë funksionuan siç duhet për të parandaluar një sulm të mundshëm në Florida.

Fillimisht, Routh u akuzua vetëm për vepra penale që lidheshin me armët, përpara se prokurorët të ngrinin akuza të tjera më serioze. Prokurorët shpesh ngrenë fillimisht akuzat më të lehta për t’u provuar dhe më pas shtojnë akuza më të rënda gjatë zhvillimit të hetimit.

Akuzat e tjera përfshijnë posedimin e paligjshëm të armës, pavarësisht se ai kishte disa dënime penale, duke përfshirë dy akuza për posedim të mallrave të vjedhura në vitin 2002 në Karolinën e Veriut. Ai gjithashtu akuzohet për posedimin e një arme me numrin serik të fshirë, në kundërshtim me ligjin federal. rel

Presidenti ukrainas, Volodymyr Zelensky, u takua në Nju Jork me Donald Trumpin, kandidatin republikan për president të Shteteve të Bashkuara.

Trump tha se nëse zgjidhet president, “ne do të punojmë me të dyja palët” për t’i dhënë fund luftës në Ukrainë, që ai tha se beson se “mund të zgjidhet shumë shpejt”.

“Kam raport shumë të mirë [me Zelenskyn] dhe po ashtu kam një raport shumë të mirë, siç e dini, me presidentin [rus, Vladimir] Putin”, tha Trump më 27 shtator në Kullën Trump në Nju Jork, ku u mbajt takimin.

“Mendoj se nëse fitoj [në zgjedhjet presidenciale të nëntorit], do të kemi një zgjidhje shumë të shpejtë”, shtoi ai.

Takimi vjen mes rritjes së tensioneve mes dy zyrtarëve lidhur me mbrojtjen e Ukrainës kundër pushtimit të nisur nga Rusia në shkurt të vitit 2022.

Mbajtja e këtij takimi ishte vënë në pikëpyetje paraprakisht, por Trump tha se “vetë fakti që jemi bashkë sot është shenjë e mirë”.

“Mendoj se kemi një qëndrim të përbashkët se lufta në Ukrainë duhet të ndalet dhe [presidenti rus, Vladimir] Putin nuk mund të fitojë”, tha Zelensky në nisje të takimit.

Takimi u zhvillua në Kullën Trump në Nju Jork, një ditë pasi nënpresidentja amerikane Kamala Harris, kundërshtarja demokrate e Trumpit në zgjedhjet e nëntorit, u takua me liderin ukrainas dhe shprehu mbështetje të palëkundur për Ukrainën.

Trump dhe Harris kanë qëndrime të ndryshme sa i përket mbështetjes së Ukrainës, teksa lufta mes Ukrainës dhe Rusisë po vazhdon.

Trump në ditët e fundit ka lavdëruar fitoret historike ushtarake të Rusisë dhe ka insistuar se SHBA-ja ka nevojë “të largohet” dhe t’i japë fund përfshirjes me Ukrainën.

Gjatë një interviste për The New Yorker, që u publikua më herët gjatë kësaj jave, Zelensky la të kuptohet se Trumpi nuk e kupton dhe e thjeshton konfliktin. Udhëheqësi ukrainas tha se kandidati i Trumpit për nënpresident, JD Vance, ishte “shumë radikal” dhe po avokon që Ukraina “të bëjë një sakrificë” duke “hequr dorë nga territori i saj”.

Gjatë kësaj jave, Trumpi në dy raste ka kritikuar Zelenskyn. Duke folur gjatë një ngjarjeje në Karolinën e Veriut të mërkurën, Trump tha:

“Çdo marrëveshje – qoftë marrëveshja më e keqe – do të ishte më e mirë nga ajo që kemi tani”.

Ndërkaq, Harris në takim me Zelenskyn tha se Trumpi po kërkon që Ukraina të arrijë një marrëveshje të shpejtë dhe propozimet e tij, sipas saj, “nuk janë propozime për paqe, por propozime për dorëzim”. Por, Trump ka deklaruar se ai nuk po avokon për dorëzim.REL

“Ashtu siç Putini akuzoi Perëndimin për rënien e Bashkimit Sovjetik dhe kaloi jetën e tij duke u përgatitur për hakmarrjen e vitit 2022, Presidenti serb po përgatit hakmarrjen e tij për vitet ’90”.

Këtë skanim i bëri studiuesja e njohur që vepron në Shtetet e Bashkuara, Ivana Stradner, fjalimit të Aleksandër Vuçiç në Asamblenë e Përgjithshme të Kombeve të Bashkuara.

“Ai po pret vetëm momentin e duhur gjeopolitik”, lëshon alarmin ekspertja e njohur e sigurisë. Ndërsa, studiuesi europian, Jakub Bielamowicz, vlerëson se presidenti serb shkoi plotësisht me një retorikë anti-perëndimore duke dënuan dominancën e kapitalizmit perëndimor.

“Ai fajësoi perëndimin për shpërbërjen e Bashkimit Sovjetik dhe rrëzimin e Jugosllavisë, gjithashtu dhe bombardimet e NATO-s të vitit 1999 që i hapën rrugën pavarësisë së Kosovës”, thekson eksperti evropian. sn

Në muajt e parë pas pushtimit të plotë të Ukrainës nga Rusia, Ryan Wesley Routh ishte shpesh në Kiev. Fliste me kalimtarë në rrugën e famshme të qytetit “Khreschatyk”, iu drejtohej atyre në anglisht, shkëmbente numrat e telefonit dhe kërkonte ndihmë për të mbështetur forcat e armatosura të Ukrainës.

Ai shihej nga vullnetarët që shkonin në Kiev si një lloj nuske për ushtrinë e Ukrainës, thotë Christian Lutz, një gjerman që drejton një organizatë ndihme të quajtur Phoenix dhe që u takua me Routhin disa herë në vitin 2022.

“Burri rekrutues me një flamur amerikan rreth qafës së tij – kështu i referoheshin të gjithë”, thotë Lutz për Radion Evropa e Lirë.

“Ai dukej se ishte një ujk i vetmuar. Nuk kishte kolegë apo miq me vete”, shton ai.

Routh, 58 vjeç, tani dyshohet për përpjekje të mundshme për të vrarë ish-presidentin amerikan, Donald Trump, tani kandidat i Partisë Republikane për president.

Routh u arrestua nga policia në Floridë më 15 shtator, pasi agjentët e Shërbimit Sekret e panë duke drejtuar një pushkë në drejtim të Trumpit, derisa ai luante golf në një klub në Uest Pallm Biç.

Routh u arrestua pasi u largua nga vendi i ngjarjes dhe agjentët gjetën një pushkë “AK-47”, së bashku me dy çanta shpine dhe një kamerë GoPro në vendin e ngjarjes, u tha gazetarëve sherifi i Qarkut Pallm Biç, Ric Bradshaw.

Ndërkohë që nuk ka ende prova që i lidhin përpjekjet e Routhit në Ukrainë me incidentin në Floridë, arrestimi i tij ka habitur njerëzit që i kanë kryqëzuar rrugët me të në Ukrainë.

“Çfarë është duke ndodhur? Kjo nuk mund të jetë e vërtetë”, tha Lutz kur dëgjoi lajmin për arrestimin e Routhit.

Disa nga njësitë luftarake vullnetare më të njohura në Ukrainë u distancuan shpejt nga Routhi, duke lëshuar deklarata që i mohonin të gjitha lidhjet me të.

“Routh nuk ka shërbyer kurrë në Legjionin Ndërkombëtar të Drejtorisë Kryesore të Inteligjencës të Ministrisë së Mbrojtjes në Ukrainë. Ai nuk ka asnjë lidhje me njësinë”, tha Legjioni Ndërkombëtar – një njësi e përbërë nga vullnetarë të huaj – në një postim në Telegram.

“Thashethemet që qarkullojnë në media të caktuara, nuk janë të vërteta”, tha grupi.

Në prill të vitit 2022, Routh u shfaq në një tubim në Kiev në mbështetje të batalionit Azov – një njësi ushtarake e diskutueshme, por e nderuar nga shumë në Ukrainë për aftësitë e saj luftarake.

Pas disa javësh qëndrese në qytetin port të Mariupolit kundër rrethimit rus, anëtarët e batalionit u dorëzuan dhe shumë prej tyre u zunë robër nga Rusia. Familjarët, ndërkohë, organizuan mitingje, në përpjekje për të bërë presion për lirimin e të afërmve të tyre.

Sipas një videoje të Associated Press nga vendi i ngjarjes, Routh u pa i veshur me një jelek blu, me një flamur të SHBA-së në shpinë dhe me një pankartë ku shkruante: “Ne nuk mund të tolerojmë korrupsionin dhe të keqen edhe për 50+ vjet të tjerë. Jepni fund Rusisë për fëmijët tanë”.

Routh u shfaq edhe në një video të publikuar në maj të vitit 2022 nga një llogari në Twitter, e drejtuar nga të afërmit e anëtarëve të Azovit.

“Duam të deklarojmë zyrtarisht se Ryan Wesley Routh nuk ka asnjë lidhje me Azovin dhe nuk ka pasur asnjë lidhje me Azovin”, tha grupi në një postim në X më 16 shtator.

“Demonstrata paqësore në të cilën mori pjesë ai, ishte e hapur dhe çdokush mund t’i bashkohej. Ai u kap rastësisht në videon e filmuar nga protestuesit”, u tha në atë postim.

Duke folur për Radion Evropa e Lirë me telefon nga Gjermania, Lutz thotë se është takuar me Routhin në udhëtimin e tij të parë në Kiev, në qershor të vitit 2022.

“Dukej shumë komunikues, ekstrovert dhe i përqendruar në detyrën e tij për t’i futur të huajt në ushtrinë ukrainase”, thotë Lutz.

“Njëherë po udhëtonim nëpër Kiev, kur ai doli me idenë për të kërkuar një fabrikë për ndërtimin e dronëve, një fabrikë për prodhimin e dronëve”, thotë ai.

Lutz tregon se, më vonë, e bllokoi atë në mediat sociale, sepse, siç thotë, ai po e bombardonte me mesazhe.

Këmbëngulja dhe prania publike i sollën Routhit vëmendjen e disa gazetarëve, përfshirë ata të revistës Newsweek, e cila botoi një intervistë të shkurtër me të në publikimin rumun.

“Ky konflikt është padyshim bardh e zi. Kjo ka të bëjë me të mirën kundër së keqes”, citohet të ketë thënë ai.

Sipas gazetës Greensboro News & Record, një burrë që gazeta e identifikoi si Routh dhe që kishte të njëjtën moshë, u arrestua nga policia në vitin 2002, pasi u barrikadua brenda një ndërtese me një armë automatike.

Ai më vonë u transferua nga Karolina e Veriut në Havaje, sipas disa raporteve në SHBA.

Llogaritë e tij në mediat sociale, X dhe Facebook, janë mbyllur që nga 16 shtatori, por postimet e arkivuara tregojnë për një përzierje interesash për politikën e SHBA-së, si dhe për luftën në Ukrainë.

Në një seri postimesh në X në vitin 2023, Routh pretendonte se po rekrutonte ushtarë afganë që ishin të gatshëm të shërbenin në Tajvan ose Haiti.

Në rrjetin LinkedIn, një profil nën emrin e Routhit përputhet me shumë nga detajet e tij biografike dhe aty thuhet se ai është i vetëpunësuar në një kompani në Havaje, e quajtur Camp Box Honolulu.

Në një postim në mars të vitit 2023, i njëjti profil në LinkedIn nxori dy fotografi, pa datë. Në njërën duket Routh përpara ndërtesës së Kongresit amerikan në Uashington dhe në tjetrën ai është në Sheshin e Pavarësisë në Kiev. Fotografitë mbajnë mbishkrimin: “Në DC dhe në Kiev për të siguruar ushtarë për luftë”.

Routh, gjithashtu, duket se ka botuar vetë një libër në Amazon, të quajtur “Lufta e pafitueshme e Ukrainës” – një gjetje kjo e raportuar për herë të parë nga Associated Press.

Në hyrjen e botuar në ueb-faqen e Amazonit, ku libri mbetet në shitje, Routh shkroi se përse ai mendon se mbrojtja e Ukrainës është e rëndësishme.

“Unë supozoj se duhet të jem i qartë, se në rrugën aktuale Ukraina nuk do të fitojë, dhe është e domosdoshme për botën që ajo të fitojë. Kjo është arsyeja përse ky libër është aq i rëndësishëm, që të gjithë ne të kuptojmë se humbja nuk është opsion dhe çfarë duhet të bëjmë për të fituar”, shkroi Routh.

Radio Evropa e Lirë

Përgatiti: Valona Tela

Shpallja e aktgjykimit kundër ish-presidentit amerikan, Donald Trump, në rastin penal për blerjen e heshtjes, është shtyrë deri pas përfundimit të zgjedhjeve presidenciale të nëntorit.

Gjykatësi Juan Merchan tha të premten se e ka shtyrë shqiptimin e dënimit deri më 26 nëntor, ndër të tjera, për shkak të “kornizës së veçantë kohore në të cilën kjo çështje gjen veten”.

Avokatët e Trumpit, kandidatit republikan për president, kanë përdorur disa manovra ligjore për ta shtyrë shpalljen e aktvendimit, i cili ishte paraparë për 18 shtator.

Trumpi u shpall fajtor në maj nga një gjykatë në Nju Jork për të gjitha 34 akuzat me të cilat përballej për falsifikimin e regjistrave biznesore të kompanisë, duke u bërë presidenti apo ish-presidenti i parë amerikan që dënohet për vepër penale.

Në vendimin e tij të premten, gjykatësi Merchan shkroi se rasti i Trumpit kërkon “që seanca për shqiptimin e dënimit të jetë plotësisht e përqendruar në aktgjykimin e jurisë”.

Trump mund të dënohet deri me katër vjet burgim, por gjykatësi Merchan e ka pushtetin për ta dënuar atë edhe me gjobë, dënim me kusht, apo dënim të shkurtër me burgim.

Ai e ka mohuar vazhdimisht çdo akuzë dhe e ka cilësuar gjykimin ndaj tij si të “turpshëm”.

Trumpi u shpall fajtor për falsifikimin e regjistrave biznesore për të ndikuar jashtëligjshëm në zgjedhjet presidenciale të vitit 2016, përmes pagesave për heshtjen e një aktoreje të pornografisë, e cila tha se kishte kryer marrëdhënie seksuale me të.

Ai ngarkohej me 34 akuza penale, përfshirë për falsifikimin e 11 faturave, 12 kuponëve dhe 11 çeqe, për ta fshehur pagesën në vlerë prej 130.000 dollarëve që ia kishte bërë Stormy Danielsit për ta blerë heshtjen e saj në lidhje me pretendimet e saj se kishte kryer marrëdhënie seksuale me Trumpin më 2006.

Daniels donte të fliste publikisht për lidhjen e dyshuar seksuale me Trumpin një muaj para zgjedhjeve të vitit 2016, gjë që do t’ia kishte dëmtuar fushatën presidenciale të nominuarit republikan. REL

Ndihmës Sekretari amerikan i Shtetit për Evropën, Jim O’Brien i quajti “të pakoordinuara dhe provokuese” veprimet e qeverisë së Kosovës, pas mbylljes së komunave paralele serbe në veri të vendit.

“Shtetet e Bashkuara janë të shqetësuara nga veprimet e vazhdueshme të pabashkërenduara dhe provokuese të Qeverisë së Kosovës”, shprehet zoti O’Brien në një postim në platformën X, duke i bërë jehonë një deklarate të mëparshme të Ambasadës amerikane në Prishtinë.

Në postimin e tij, zoti O’Brien tha se Shtetet e Bashkuara i bëjnë thirrje “Kryeministrit Kurti dhe qeverisë së tij që të konsultohen dhe të bashkërendohen me komunitetin ndërkombëtar dhe të ndërpresin veprimet e pabashkërenduara që ndikojnë negativisht në partneritetin tonë”.

“Ne vlerësojmë punën e atyre, përfshirë EULEX-in dhe KFOR-in, që parandalojnë dhunën dhe bëjmë thirrje për vetëpërmbajtje të vazhdueshme nga të gjitha palët”, shprehet zoti O’Brien.

Më herët të premten ambasada amerikane në Prishtinë tha se operacioni i autoriteteve të Kosovës për mbylljen e komunave paralele serbe në veri të vendit, “nuk ishte i bashkërenduar” dhe vazhdimi i veprimeve të tilla paraqet “përkeqësim real dhe në rritje të partneritetit tonë”.

Autoritetet mbyllën të premten komunat paralele serbe në veri, në një veprim që ka të ngjarë të nxisë tensione të reja, me gjithë thirrjet e diplomacisë perëndimore për shmangien e “hapave të njëanshëm” në zonë.

Në një reagim të publikuar nga ambasada amerikane në Prishtinë, thuhet se “qeveria e Shteteve të Bashkuara përsërit shqetësimin dhe zhgënjimin e saj me veprimet e vazhdueshme të pabashkërenduara të qeverisë së Kosovës që vazhdojnë të kenë një ndikim të drejtpërdrejtë dhe negativ ndaj pjesëtarëve të komunitetit etnik serb dhe komuniteteve të tjera pakicë në Kosovë”.

Policia e Kosovës, tha se operacioni në katër komunat në veri të vendit u zhvillua për të ndërprerë veprimtaritë në “pesë objekte të cilat janë shfrytëzuar në cilësi të komunave ilegale, e të cilat janë në kundërshtim me rendin juridik kushtetues”.

Ministri i Pushtetit Lokal, Elbert Krasniqi, tha se “janë mbyllur institucionet paralele ilegale të vetëqeverisjes Lokale, të cilat kanë funksionuar nën direktiva të Serbisë duke cenuar kushtetutshmërinë dhe ligjet e Republikës së Kosovës”.

Ministri Krasniqi tha se “komunat e mbyllura janë Qarku i Mitrovicës së Kosovë, Komuna paralele e Mitrovicës, Komuna paralele e Zveçanit, Komuna paralele e Zubin Potokut dhe Komuna paralele e Leposaviqit”.

Më herët gjatë këtij viti, autoritetet mbyllën shtatë komuna të tjera paralele serbe në pjesë tjera të vendit.

Në reagimin e ambasadës amerikane thuhet mes tjerash se “çështjet që kanë të bëjnë me strukturat e mbështetura nga Serbia në Kosovë duhet të trajtohen përmes dialogut të lehtësuar nga Bashkimi Evropian. Ky veprim nuk ishte i bashkërenduar me asnjë element të bashkësisë ndërkombëtare”.

Në reagim theksohet se Shtetet e Bashkuara dhe partnerët ndërkombëtarë kanë kërkuar vazhdimisht nga qeveria e Kosovës që ta ketë përparësi bashkërendimin dhe të mos ndërmarrë veprime të njëanshme për çështjet që përfshihen në agjendën e bisedimeve.

“Dështimi i Qeverisë së Kosovës për t’iu përgjigjur këtyre kërkesave, pasqyron një përkeqësim real dhe në rritje të partneritetit tonë. Siç e kemi theksuar më parë, veprimet e pabashkërenduara të qeverisë së Kosovës i vënë në rrezik më të madh qytetarët e Kosovës dhe ushtarët e KFOR-it, përshkallëzojnë në mënyrë të panevojshme tensionet rajonale dhe dëmtojnë emrin e Kosovës si një partner i besueshëm ndërkombëtar”.

Më tej në reagim thuhet se ndërsa “qeveria e Shteteve të Bashkuara është krenare që ka mbështetur themelimin dhe profesionalizimin e Policisë së Kosovës gjatë shumë viteve si pjesë e angazhimit tonë për të promovuar sigurinë dhe qëndrueshmërinë, instrumentalizimi i vazhdueshëm i policisë së Kosovës nga qeveria për të kryer veprime të pabashkërenduara nuk është në përputhje me premtimin e Kosovës se do të “vazhdojë këshillimin dhe bashkërendimin me komunitetin ndërkombëtar. Veprimet e qeverisë do të ndikojnë edhe në cilësinë dhe natyrën e bashkëpunimit tonë me ministrinë e Punëve të Brendshme dhe elementët vartës të saj”.

Kosova i cilëson institucionet komunale të emëruara nga Beogradi të paligjshme.

Shuarja e institucioneve paralele serbe është paraparë me marrëveshjen e vitit 2013, për normalizimin e marrëdhënieve Kosovë-Serbi, por zbatimi i saj ka ngecur.

Zyrtarët e Serbisë reaguan me zemërim ndaj operacionit të sotëm. Shefi i zyrës për Kosovën në qeverinë e Serbisë, Petar Petkoviç, tha se ky veprim “do të ketë pasoja afatgjata në procesin e normalizimit të marrëdhënieve” dhe sipas tij “ka për qëllim të nxisë konflikte në veri”.

Ai tha se me mbylljen e këtyre institucioneve (kryeministri Albin) Kurti “dëshiron të shuajë jetën e serbëve në veri të Kosovës dhe të realizojë spastrimin përfundimtar etnik”.

Në fillim të muajit gusht autoritetet mbyllën Postën e Serbisë në veri dhe shpalosën planet për të hapur urën kryesore mbi lumin Ibër në Mitrovicë për trafikun e makinave.

Të enjten Presidenti francez Emmanuel Macron u shpreh i shqetësuar me ato që i quajti “veprime të njëanshme” të Kosovës, që sipas tij, nuk paraqesin shenja të mira drejt normalizimit të marrëdhënieve me Serbinë.

Gjatë një vizite që e përmbylli të premten në Serbi, ai tha se Franca do të vëzhgojë “kushtet në të cilat jeton komuniteti serb në Kosovë”, duke nënvizuar se “në këtë aspekt, jemi veçanërisht të përkushtuar në formimin e Asociacionit të komunave me shumicë serbe”, që është pjesa më e vështirë e bisedimeve Kosovë – Serbi.

Kryeministri i Kosovës, Albin Kurti, tha të premten qeveria e tij është duke vendosur sundim të ligjit dhe rendit publik, si dhe duke siguruar paqe dhe siguri për të gjithë qytetarët e Kosovës, pa dallim.

“Në këtë aspekt duam edhe bashkëpunimin e ngushtë, edhe mbështetjen ndërkombëtare, përfshirë këtu edhe Francën, që e konsiderojmë vend mik, aleat dhe partner shumë të rëndësishëm edhe në Bashkimin Evropian, edhe në NATO”, tha kryeministri Kurti.

Perëndimi kërkon nga Kosova që çështjet që lidhen me situatën në veri të Kosovës të trajtohen në kuadër të dialogut në Bruksel.

Në intervistën e saj të parë të rëndësishme të fushatës presidenciale të enjten, Nënpresidentja Kamala Harris mbrojti qëndrimet e saj të reja, duke hequr dorë nga pikëpamjet liberale në raport me disa çështje.

Por ajo këmbënguli se “parimet e saj nuk kanë ndryshuar”.

Zonja Harris u intervistua nga rrjeti televiziv CNN së bashku me guvernatorin e Minesotës, Tim Walz, i cili kandidon krah saj për postin e nënpresidentit.

Nënpresidetja u pyet në mënyrë specifike lidhur me ndryshimin e qëndrimeve të saj në raport me ndalimin e shpimeve për nxjerrjen e naftës si dhe dekriminalizimit e kalimit të paligjshëm të kufirit, pozicione që i kishte mbështetur kur kandidoi për herë të parë si presidente, në vitin 2020.

Ajo tha se nuk ka në plan t’i ndalë shpimet, një çështje kyç kryesisht për ekonominë e shtetit të Pensilvanisë, ndërsa shtoi se “duhet të ketë pasoja për ata që kalojnë kufirin pa leje”.

“Mendoj se aspekti më i rëndësishëm dhe më domethënës i perspektivës dhe vendimeve të politikës sime është se parimet e mia nuk kanë ndryshuar“, tha zonja Harris.

Gjatë intervistës së saj zonja Harris tha se ajo beson se mbi këto çështje “është e rëndësishme të arrihet konsensus dhe mirëkuptim se si mund të zgjidhen problemet”.

Intervista me gazetaren Dana Bash të rrjetit televiziv CNN, vjen në një kohë kur zgjedhësit po përpiqen ende të mësojnë më shumë rreth kandidates demokrate, brenda një harku kohor jashtëzakonisht të ngjeshur.

Presidenti Joe Biden i dha fund garës për t’u rizgjedhur vetëm pesë javë më parë.

Megjithëse ka dhënë disa intervista gjatë kohës që Presidenti Biden vazhdonte të ishte në garë, zonja Harris nuk kishte dhënë asnjë intervistë të thelluar, prej momentit kur mori stafetën e demokratëve për garën për Shtëpinë e Bardhë.

Ajo tha se puna me Presidentin Biden ishte “një nga nderet më të mëdha të karrierës së saj” si dhe tregoi mbi momentin kur ai e kishte telefonuar për ta njoftuar se do të tërhiqej nga gara dhe se do ta mbështeste atë si kandidate për presidente.

“Ai më tha se çfarë kishte vendosur të bënte dhe unë e pyeta: “A je i sigurt?” ai tha: “Po”. Kështu e mësova këtë gjë”.

Zonja Harris tha se nuk i kishte kërkuar Presidentit Biden që ta mbështeste për garën presidenciale pasi siç tha: “ai ishte shumë i qartë se do të më mbështeste”.

Gjatë intervistës Nënpresidetja Harris mbrojti punën e administratës Biden lidhur me kufirin jugor dhe imigracionin. Ajo vuri në dukje se e kishte për detyrë të përpiqej të trajtonte “shkaqet që qëndrojnë në rrënjë të problemit” në vendet e tjera, që janë dhe burimi i emigracionit.

“Ne kemi ligje që duhen zbatuar, e që përcaktojnë masat për ata që kalojnë kufirin tonë në mënyrë të paligjshme. Për këtë duhet të ketë pasoja”, tha zonja Harris.

E pyetur mbi luftën e Izraelit në Gazë, pas sulmit të Hamasit më 7 tetor, zonja Harris tha se ajo “pamëdyshje është e palëkundur në angazhimin për të mbrojtur Izraelin dhe kapacitetet e tij për të mbrojtur veten”.

Por nënpresidentja përsëriti gjithashtu atë që ka thënë prej muajsh, se ofensiva izraelite ka shkaktuar një numër të lartë vdekjesh mes popullatës civile.

Zonja Harris u pyet edhe mbi komentet e ish-Presidentit Donald Trump mbi identitetin e saj racor. Zoti Trump ka sugjeruar në mënyrë të rreme se zonja Harris ka ndryshuar mënyrën se si e prezanton veten për arsye politike, duke thënë se ajo papritur nisi të thoshte që ishte zezake.

Zonja Harris, me prindër zezakë dhe Azia Jugore, i cilësoi komentet e zotit Trump si “i njëjti avaz i vjetër”.

Ajo nuk komentoi gjatë mbi këtë çështje, duke i kërkuar gazetares Bash të kalonte tek pyetja tjetër.

Zoti Trump dhe zonja Harris do të përballen në një debat më 10 shtator. Në një postim të enjten në mbrëmje, dukej se zoti Trump po i kushtonte vëmendje intervistës.

Pasi u përmend çështja e debatit, ai shkroi në median sociale:

“Mezi pres të debatoj me shoqen Kamala Harris dhe ta ekspozoj atë si mashtruese“.

Zoti Trump shkruante më tej se kundërshtarja e tij demokrate “ka ndryshuar çdo pozicion të saj të mbajtur prej kohësh, për gjithçka. Amerika nuk do të lejojë kurrë që një marksiste të përdorë zgjedhjet për qëllimet e saj politike, e të bëhet presidente e vendit”.

Debati do të jetë takimi i parë që zonja Harris dhe zoti Trump kanë zhvilluar ndonjëherë me njëri-tjetrin.

Dy kundërshtarët politikë duket se qenë në të njëjtin ambjent vetëm kur zoti Trump ka mbajtur fjalime përpara Kongresit dhe zonja Harris ka qenë e pranishme aty, në cilësinë e senatores.

Në pjesën e dytë të intervistës gazetarja e CNN-it u përqëndrua edhe tek zoti Walz. Ai u pyet rreth informacioneve të pasakta që ka dhënë mbi të shkuarën e tij, duke filluar nga mënyra se si i ka përshkruar 24 vitet e shërbimit që ka kryer në Gardën Kombëtare.

Në një videoklip të vitit 2018, zoti Walz fliste kundër dhunës me armë zjarri duke u shprehur: “Ne mund të sigurohemi që këto armë sulmuese, që unë i kam mbajtur në luftë, të jenë i vetmi rast, ku ato të përdoren”, shprehej ai në atë kohë.

Kritikët thonë se komentet e zotit Walz sugjeronin se ai kishte qenë në luftë, gjë që siç thonë ata, nuk është e vërtetë.

Duke sqaruar deklaratat e tij zoti Walz tha se ishte shprehur gabim pas një sulmi me armë zjarri në një shkollë, duke shtuar se: “Gramatika ime nuk është gjithmonë e saktë”.

I pyetur në lidhje me deklaratat që dukej se tregonin se bashkëshortja e tij kishte mbetur shtatzënë përmes fekondimit artificial in-vitro, kur në fakt kishin përdorur një trajtim tjetër, ai tha se besonte se shumica e amerikanëve e kishin kuptuar se çfarë donte të thoshte.

Më pas ai foli lidhur me kundërshtimin që republikanët i bëjnë se drejtës për abort.

Ndërkaq një sondazh i kompanisë Gallup tregon se entuziazmi i demokratëve lidhur me zgjedhjet në nëntor është rritur gjatë muajve të fundit.

Rreth 8 në 10 demokratë ose 80 % tashmë thonë se janë më entuziastë se zakonisht lidhur me zgjedhjet, krahasuar me 55% që ishin në mars.

Entuziazmi i republikanëve është rritur shumë më pak gjatë së njëjtës periudhë. Aktualisht rreth dy të tretat e republikanëve thonë se janë më entuziastë se zakonisht për votimet.

Në një mjedis të mbushur plot me njerëz, për një tubim të enjten në Savanah të Xhorxhias, zonja Harris inkurajoi demokratët të punonin fort për ta zgjedhur atë në nëntor.

“Ne jemi këtu për të thënë të vërtetën dhe një nga gjërat që dimë është se kjo do të jetë një garë e ngushtë deri në fund“, tha ajo.

Zonja Harris foli për një sërë të shqetësimesh që kanë demokratët. Ajo tha se zoti Trump do të kufizonte më tej të drejtat e grave, duke kujtuar se kur ishte në Shtëpinë e Bardhë ai kishte emëruar tre anëtarë të Gjykatës së Lartë, që ndihmuan në rrëzimin e vendimit historik që garantonte mbrojtje për abortin, Roe kundër Wade.

Ajo tha se zoti Trump do të shfuqizonte Aktin e Kujdesit të Përballueshëm Shëndetësor ndërsa ngriti pikëpyetje mbi veprimet që mund të ndërmerrte ish-presidenti nëse vinte sërish në pushtet duke pasur parasysh imunitetin dhënë presidentëve, falë një vendimi të Gjykatës së Lartë.

“Imagjinoni Donald Trumpin pa asnjë kufizim“, tha ajo.

Tubimi në Xhorxhia ishte fundit i një turneu dy-ditor me autobus në pjesën jugore të këtij shteti. Zonja Harris do të zhvillojë fushatë javën tjetër në Ditën e Punës në Detroit dhe Pitsburg me në krah Presidentin Biden ndërsa procesi zgjedhor po afrohet me shpejtësi.

Fletët e para të votimit me postë do t’u dërgohen votuesve pas dy javësh.

Prokurori i Posaçëm amerikan, Jack Smith, ka ngritur aktakuzë të re kundër ish-presidentit amerikan, Donald Trump, për dyshimet se ai ishte përpjekur ta zhbënte rezultatin e zgjedhjeve presidenciale të vitit 2020.

Aktakuza e re e ngarkon Trumpin me akuzat e njëjta kriminale sikurse ajo e vjetra, por përmban disa ndryshime pas aktvendimit të Gjykatës Supreme se ish-presidenti gëzon imunitet të gjerë nga ndjekja penale.

Aktakuza e re përqendrohet në rolin e Trumpit si kandidat politik që kërkonte rizgjedhjen, në vend se si president i vendit asokohe.

Më 1 korrik, Gjykata Supreme tha se Trumpi gëzon imunitet nga ndjekja penale për veprimet që i kishte ndërmarrë si president.

Zyra e Prokurorit të Posaçëm tha se aktakuza e përditësuar, e dorëzuar në gjykatën federale në Uashington, “pasqyron përpjekjet e Qeverisë për t’i respektuar dhe zbatuar vendimet e Gjykatës Supreme”.

Në një reagim në platformën e vet Truth Social, Trump e quajti aktakuzën e re “dëshpërim” dhe “përpjekje për ta ringjallur gjuetinë e vdekur të shtrigave”. Ai tha se aktakuza e re i ka “të gjitha problemet e aktakuzës së vjetr dhe duhet të hidhet poshtë menjëherë”.

Aktakuza e re i heq referencat ndaj akuzave të cilat mund të cilësohen si veprime zyrtare për të cilat Trumpi gëzon imunitet, sipas vendimit të Supremes. Kjo përfshin akuzat se Trumpi u përpoq ta përdorte Departamentin e Drejtësisë në përpjekjet e tij të dështuara për ta zhbërë humbjen në zgjedhje, përfshirë duke kryer hetime të rrejshme dhe duke u thënë shteteve – gabimisht – se është vërejtur mashtrim i madh në zgjedhje.

Gjykata Supreme tha në vendimin e saj se bashkëveprimi i presidentit me Departamentin e Drejtësisë është veprim zyrtar dhe për këtë ai gëzon imunitet.

Aktakuza e re heq edhe referencat ndaj komunikimit të Trumpit me zyrtarët e qeverisë federale – si avokatë të lartë të Shtëpisë së Bardhë – të cilët i kishin thënë atij se nuk kishte dëshmi për mashtrim që do ta ndryshonin rezultatin e zgjedhjeve 2020. Ajo i heq edhe referencat ndaj deklaratave të caktuara të Trumpit, përfshirë një pretendim që ai e kishte bërë në një konferencë për media në Shtëpinë e Bardhë dy ditë pas zgjedhjeve për një kosh të dyshimtë të mbushur me vota në Detroit.

Por, aktakuza e re përmban njërën prej akuzave më tronditëse të ngritura nga Smith, se Trumpi mori pjesë në një skemë të orkestruar nga aleatët për rekrutimin e pjesëtarëve të rrejshëm zgjedhorë në terren në shtetet ku demokrati Joe Biden kishte fituar, të cilët do të dëshmonin rrejshëm se Trumpi i kishte fituar ato shtete.

Gjithashtu aktakuza ruan edhe dyshimet se Trumpi i kishte bërë trysni nënpresidentit Mike Pence për ta hedhur poshtë ligjshmërinë e votave dhe se Trumpi dhe aleatët e tij e shfrytëzuan kaosin në Capitol më 6 janar, në përpjekje për ta shtyrë edhe më shumë certifikimin e fitores së Bidenit.

Trump është sërish kandidat republikan për president në zgjedhjet e 5 nëntorit, dhe këtë herë ai do të garojë kundër zëvendëspresidentes Kamala Harris, e cila, sipas sondazheve, ka një epërsi të vogël ndaj tij në nivel kombëtar.

Në maj, Trump u bë presidenti apo ish-presidenti i parë amerikan që dënohet për vepër penale.

Një gjykatë në Nju Jork e shpalli Trumpin fajtor për falsifikimin e regjistrave biznesore për të ndikuar jashtëligjshëm në zgjedhjet presidenciale të vitit 2016, përmes pagesave për heshtjen e një aktoreje të pornografisë, e cila tha se kishte kryer marrëdhënie seksuale me të. REL

Guvernatori i Minesotës, Tim Walz, ka pranuar nominimin e partisë së tij për të kandiduar për nënpresident të Shteteve të Bashkuara. Gjatë fjalimit në Kuvendin Kombëtar të demokratëve ai falënderoi të pranishmit për sjelljen “e gëzimit” në zgjedhjet që janë transformuar nga hyrja në garë e nënpresidentes amerikane, Kamala Harris.

“Jemi të gjithë këtu sonte për një arsye të bukur dhe të thjeshtë: E duam këtë vend”, tha Walz para mijëra delegatëve që mbanin në duar pankarta ku shkruhej “Trajneri Walz”.

Shumë amerikanë nuk kishin dëgjuar kurrë për Walzin para se Harris ta zgjidhte për kandidat për nënpresident dhe ky fjalim ishte mundësi që ta prezantonte veten. Ai foli për përvojën e tij si trajner futbolli, për shërbimin në Gardën Kombëtare dhe për problemet e familjes së tij me fertilitetin – të gjitha këto pjesë të biografisë së tij që republikanët kanë vënë në pikëpyetje që kur Harris e zgjodhi atë.

Ekipi i fushatës së Harrisit tha se Walz kishte punuar në fjalimin e tij për disa ditë dhe ai për herë të parë përdori teleprompterin, duke bërë prova në mënyrë që të ishte i përgatitur. Ai u tha të pranishmëve se “nuk kam mbajtur shumë fjalime si kjo, por më kanë këshilluar shumë”.

“Disa njerëz nuk e kuptojnë se çfarë duhet të bësh për të qenë fqinj i mirë”, tha Walz. “Për shembull, Donald Trump dhe JD Vance”.

Trump, kandidati republikan për president, kritikoi Kuvendin e demokratëve duke e quajtur “qesharak” dhe theksoi se ai është shpesh është temë e fjalimeve. Ai po ashtu foli për ish-presidentin Barack Obama, i cili gjatë fjalimit në Kuvend të martën ishte mjaft kritik, duke thënë se Obama ishte “i ndyrë”.

Ndërkaq, gjatë fjalimit Walz foli për fëmijërinë e tij në Nebraska dhe për karrierën e tij si mësues dhe trajner futbolli në Minesota. “Faleminderit që keni sjellë gëzim në këtë luftë”, i tha ai turmës.

Por, ai po ashtu kritikoi kandidatin republikan për nënpresident, JD Vance, dhe kritikoi disa politika të republikanëve.

“Përderisa shtetet tjera po ndalonin librat në shkolla, ne po çrrënjosnim urinë nga shkollat tona”, tha ai.

Walz është kritikuar se ka ekzagjeruar karrierën e tij. Gruaja e tij gjatë kësaj jave e sqaroi se ajo nuk i ishte nënshkruar fertilizimit sipas metodës in vitro, siç kishte pretenduar Walz disa herë. Por, ajo tha se i ishte nënshkruar trajtimeve të tjera të fertilitetit. Republikanët po ashtu kanë kritikuar për deklaratat e bëra nga Walz më 2018, i cili kishte thënë se kishte mbajtur armë në luftë. Edhe pse ai ka shërbyer në Gardën Kombëtare për 24 vjet, ai asnjëherë nuk ishte dislokuar në një zonë lufte.

Walz ka përfshirë sfidat e familjes së tij me ferilitet në narrativin e tij, si një mënyrë për t’u afruar me votuesit që janë të shqetësuar me heqjen e të drejtave riprodhuese në SHBA. Por, Gwen Walz në një deklaratë të lëshuar të martën tregoi për përvojën e saj dhe tha se i është nënshtruar një trajtimi tjetër e jo in vitro.

“Nëse nuk keni përjetuar asnjëherë jofertilitetin, ju siguroj se e njoh dikë që e ka përjetuar”, tha Tim Walz të mërkurën.

Të mërkurën, në Kuvendin e demokratëve kishte edhe persona me të cilët Trump ishte ballafaquar gjatë karrierës së tij: Bill Clinton, presidenti i 42-të i SHBA-së dhe Oprah Winfrey, një prezantuese ikonike.

Gjatë adresimeve, të dizajnuar për të kritikuar Trumpin, Clinton dhe Winfrey e paraqitën ish-presidentin si një njeri vetjak, ndërkaq Harrisin si një person të përqendruar më shumë në nevojat e përditshme të amerikanëve sesa në nevojat e saj.

“Sipas meje kemi një zgjedhje të qartë. Kamala Harris për njerëzit. Personi tjetër që ka dëshmuar është vetëm për vete, ‘unë, unë dhe unë’”, tha Clinton, i cili mbajti një fjalim në Kuvendin Kombëtar Demokratik pothuajse 10 minuta më të gjatë se fjalimi i Walzit, që ishte njeriu kryesor i natës.

Winfrey ndërkaq ofroi mbështetje për Harrisin. “Mirësjellja dhe respekti janë opsion në këto zgjedhje”, duke ftuar amerikanët që të zgjedhin Harrisin dhe Walzin në zgjedhjet presidenciale të nëntorit. REL

Një Parti Demokrate e rigjallëruar u mblodh mbrëmjen e së hënës për të dëgjuar fjalën përshëndetëse të Presidentit Joe Biden, vendimi i të cilit për t’i dhënë fund rikandidimit, çliroi energji të reja me ngjitjen në krye të garës të Nënpresidentes Kamala Harris.

Kuvendi Kombëtar Demokrat që filloi punimet të hënën në Çikago ka peshë të veçantë për këtë parti, vetëm një muaj pas ndërrimit të kandidatëve në mes të garës elektorale. Kjo mbrëmje e parë ishte konceptuar si një kalim i stafetës tek kandidatja e përzgjedhur nga vetë Presidenti Biden, megjithëse fillimisht si vetëm zëvendëse e tij.

Dukshëm i prekur pas fjalimeve të bashkëshortes së tij, Zonjës së Parë Jill Biden dhe vajzës së tij Ashley Biden, presidenti foli përpara delegatëve, që e pritën me ovacione të zgjatura, duke bërë thirrje për të votuar për kandidaten demokrate për presidente, Kamala Harris. Ai rikujtoi momentet e vështira kur pati bërë betimin për të marrë detyrën e presidentit, mes periudhës së vështirë të pandemisë dhe atyre që i quajti kërcënime ndaj demokracisë amerikane.

“Besoja atëherë dhe besoj tani, se progresi ishte dhe është i mundur, ashtu siç është i arritshëm dhe se ditët tona më të mira janë ende përpara”, tha Presidenti Biden. “Dimrin e kemi lënë pas. Qëndroj përpara jush me zemër mirënjohëse për të raportuar se demokracia ka mbizotëruar. Demokracia”.

Presidenti Biden përsëriti thënien e tij se “jemi në një betejë për vetë shpirtin e kombit amerikan”.

“Kandidova në vitin 2020 për shkak të atyre çfarë pashë në Charlottesville në gusht 2017, kur ekstremistët u shfaqën me pishtarë në duar, me simbole naziste dhe me slogane anti-semite të dëgjuara në Gjermaninë e viteve 1930, supremacistë të bardhë, të inkurajuar nga presidenti në Shtëpinë e Bardhë që e shikonin si aleatin e tyre”, tha Presidenti Biden.

Ai tha se kandidoi për një Amerikë me shanse të barabarta për të gjithë, të vendosur për të lëvizur përpara dhe për të mos u rikthyer tek urrejtja dhe dhuna e çfarëdolloj forme.

Pasi radhiti arritjet për programet sociale, përfaqësimin e pakicave në gjyqësor, rikonsolidimin e ekonomisë të goditur nga pandemia, Presidenti Biden u zotua se ashtu si ai vetë, edhe zonja Harris do t’u kundërvihet në skenën ndërkombëtare regjimeve totalitare.

“Asnjë komandant i përgjithshëm nuk duhet të përkulet përpara një diktatori siç vepron Trump-i me Putinin. Unë nuk e kam bërë kurrë këtë dhe ju premtoj se Kamala Harris nuk do ta bëjë këtë kurrë”, tha Presidenti Biden.

Ai e kritikoi ashpër kandidatin republikan për president, Donald Trump, se e la Evropën dhe NATO-n në gjendje të dobësuar dhe se u desh shumë punë për ta forcuar Evropën sërish dhe madje për ta zgjeruar NATO-n me anëtarësimin e Finlandës dhe Suedisë.

Presidenti Biden tha se Presidenti Putin mendonte se do ta merrte kryeqytetin e Ukrainës, Kievin, brenda tre ditëve. “Tre vite më vonë, Ukraina është ende e lirë“, tha Presidenti Biden.

Presidenti përmendi se kur mori detyrën, pritshmëria e përgjithshme ishte se Kina do t’ia kalonte në mënyrë të pashmangshme Shteteve të Bashkuara, por se kjo prishmëri nuk dëgjohet më e tillë. Ai vuri në dukje punën e bërë për t’i dhënë fund luftës në Gazë nëpërmjet një marrëveshjeje për lirimin e pengjeve dhe armëpushimin.

Duke denoncuar dhunën ndaj Kapitolit më 6 janar 2021, Presidenti Biden tha se ish-Presidenti Trump nuk do e pranojë rezultatin e zgjedhjeve nëse nuk i fiton ato. Duke bërë thirrje që të votohet për kandidaten demokrate për presidente dhe kandidatët demokratë për në Kongres, ai vlerësoi karakterin e zonjës Harris, duke thënë se ajo do të jetë një presidente historike për të cilën do të jemi të gjithë krenarë.

Pak më herët, zonja Harris i bëri një surprizë delegatëve duke u shfaqur vetë në skenë mbrëmjen e së hënës, duke i paraprirë kështu mesazhit të Presidentit Biden.

“Joe, faleminderit për udhëheqjen tënde historike, për një jetë të tërë në shërbim të vendit tonë, dhe për gjithçka tjetër që do të vazhdosh të bësh”, tha ajo. “Të jemi mirënjohës përgjithmonë”.

Një mesazh mbështetjeje u dha më herët edhe nga ish-Sekretarja e Shtetit dhe ish-kandidatja e Partisë Demokrate për presidente, Hillary Clinton. Ajo përshëndeti Presidentin Biden për vendimin e tij, duke thënë se “tashmë po shkruajmë një kapitull të ri në historinë e Amerikës”.

Zonja Clinton, e cila ishte bërë gruaja e parë kandidate për presidente e një partie kryesore në Shtetet e Bashkuara, bëri thirrje për zgjedhjen e zonjës Harris si presidentja e 47-të e Shteteve të Bashkuara. Duke iu referuar betejës për përfaqësimin e grave në politikë, ajo tha se “kur një barrierë rrëzohet për një prej nesh, e hap rrugën për të gjithë ne të tjerët”.

Demokratët shpresojnë që kuvendi gati njëjavor do të forcojë pozitat e zonjës Harris në përballjen me kandidatin republikan Donald Trump, rikthimi i të cilit në garë shihet nga demokratët si një rrezik ekzistencial. Duke u bërë kandidate për presidente vetëm rreth një muaj më parë, zonjës Harris i duhet tashmë të fitojë mbështetjen e një vendi të ndarë, që e sheh atë më pozitivisht, por që ende nuk ka marrë një vendim për zgjedhjet e ardhshme.

Kryeministri i Kosovës, Albin Kurti, është duke qëndruar në Shtetet e Bashkuara, për të marrë pjesë në Konventën Kombëtare Demokratike në Çikago, e cila fillon sot.

Konventa Kombëtare e demokratëve nis më 19 gusht në Çikago, më pak se një muaj pas largimit të pritur të presidentit aktual, Joe Biden, nga gara presidenciale.

Kjo ngjarje, që do të shfaqet nëpër televizione, i ofron mundësinë nënpresidentes Kamala Harris, tashmë e konfirmuar si e nominuara e demokratëve për president, që t’i prezantojë qëndrimet e veta para një audience kombëtare.

Javën e kaluar, ambasadori amerikan në Prishtinë, Jeffery Hovenier, tha se Kurti planifikon të marrë pjesë në Konventën Kombëtare Demokratike me ftesë të Institutit Kombëtar Demokratik, duke shtuar ky institut i ka ftuar edhe kryetarët e partive tjera të Kosovës.

“Por, të jemi të qartë, kjo nuk është ftesë nga Qeveria amerikane”, tha Hovenier.

Ndërkohë, zyra e Kurtit tha se kryeministri do të ketë edhe takime të ndryshme dypalëshe gjatë qëndrimit në Shtetet e Bashkuara, pa dhënë hollësi të tjera.

Kurti udhëton për në SHBA në një kohë kur Uashingtoni po inkurajon Qeverinë e Kosovës që t’i kthehet “angazhimit konstruktiv” me të, BE-në, NATO-n dhe partnerët e tjerë ndërkombëtarë.

SHBA-ja ka shprehur zhgënjim me vendimin e fundit të autoriteteve në Kosovë për mbylljen e nëntë degëve të Postës së Serbisë, në veri të Kosovës, që sipas zyrtarëve në Kosovë, punonin pa licencë.

Zëdhënësi i Departamentit amerikan të Shtetit, Matthew Miller, deklaroi më 7 gusht se me vendimet e vazhdueshme të pakoordinuara, Kosova po vë në rrezik mundësitë që Uashingtoni i ka ndihmuar që të krijojë.

SHBA-ja e ka kundërshtuar gjithashtu synimin e Qeverisë së Kurtit për hapjen në këtë kohë të urës mbi lumin Ibër për qarkullim edhe të automjeteve – e cila ndan Mitrovicën në jug me shumicë shqiptare dhe në veri me shumicë serbe. REL

Kuvendi Kombëtar i Partisë Demokrate nis punimet mbrëmjen e së hënës në qytetin e Çikagos. Gjatë aktivitetit katërditor, që shënon pikën kulmore për demokratët, pritet të mbahen fjalime në mbështetje të kandidates për Shtëpinë e Bardhë, Kamala Harris, por nuk do të mungojnë dhe sulmet ndaj kundërshtarit të saj republikan, Donald Trump.

Demokratët kanë zgjedhur drejtuesit më të lartë në vend dhe një sërë figurash të spikatura për të mbajtur fjalime në mbështetje të kandidates së tyre për Shtëpinë e Bardhë. Kamala Harris u bë pjesë e garës presidenciale më pak se një muaj më parë pas tërheqjes së Presidentit Joe Biden mes një trysnie në rritje në radhët e udhëheqësve të Partisë Demokrate.

Presidenti demokrat u paraqit dobët në një debat me rivalin republikan, Donald Trump në fund të qershorit, ndërsa rënia e mbështetjes në sondazhe tregoi se ai kishte të ngjarë të humbiste përballë pararendësit të tij.

Presidenti Biden, 81 vjeç, shprehu mbështetjen për Nënpresidenten Harris e cila është 59 vjeçe. Zoti Biden do të flasë të hënën në kuvend për t’u treguar 4,000 delegatëve dhe audiencës se pse ajo e meriton ta pasojë atë duke u bërë presidentja e 47 e vendit.

Nëse fiton, Kamala Harris do të bëhet presidentja e parë grua në Shtetet e Bashkuara, dhe udhëheqësja e dytë me origjinë afrikano-amerikane që drejton Shtëpinë e Bardhë. Ajo ka edhe origjinë indiane. Në vitin 2009, demokrati Barack Obama bëri betimin si presidenti i 44 i Shteteve të Bashkuara dhe udhëhoqi vendin deri në janar të vitit 2017, duke u bërë presidenti i parë me ngjyrë në historinë e Shteteve të Bashkuara.

Por më e rëndësishmja për demokratët është se një sërë sondazhesh kombëtare tregojnë se zonja Harris aktualisht gëzon më shumë mbështetje se rivali i saj republikan dhe udhëheq në shtetet fushëbetejë, që kanë të ngjarë të përcaktojnë rezultatin e zgjedhjeve amerikane.

Zoti Obama do të flasë në kuvend të martën ndërsa ish Presidenti Bill Clinton do t’u drejtohet delegatëve të mërkurën. Nënpresidentja Harris do të mbajë fjalimin e saj të enjten, natën e fundit të kuvendit, ku do të pranojë zyrtarisht emërimin e Partisë Demokrate si kandidate për postin e presidentes së Shteteve të Bashkuara.

Në fillim të muajit, kandidatja demokrate për presidente, Kamala Harris dhe kandidati për nënpresident, Tim Walz, siguruan emërimin përmes një votimi elektronik.

Gjatëdhjetë vjeçari Tim Walz, i cili është në mandatin e dytë si guvernator i Minesotës, ka qenë mësues në shkollë të mesme dhe ka shërbyer për 12 vjet si ligjvënës në Dhomën e Përfaqësuesve të shtetit të tij.

Gjatë 5 viteve e gjysmë në krye të Minesotës, ai ka zbatuar një axhendë liberale, por ishte pak i njohur në qarqet e politikës amerikane deri para përzgjedhjes së tij nga zonja Harris për të kandiduar për Shtëpinë e Bardhë. Ai u përzgjodh përballë dy figurave më të njohura demokrate. Këshilltarët thonë se zonja Harris mendon se ai është figura më e përshtatshme për të bashkëpunuar nëse i fiton zgjedhjet e 5 nëntorit.

Demokratët që mendonin se Presidenti Biden ishte shumë i moshuar për të kandiduar, jo më të shërbente për katër vjet të tjera, shprehën menjëherë mbështetjen për zonjën Harris. Presidenti Biden është tre vjet më i madh në moshë se republikani Donald Trump.

Megjithëse Kamala Harris ka përfaqësuar në të kaluarën Kaliforninë në Senatin amerikan dhe aktualisht është Nënpresidente e Shteteve të Bashkuara, sikurse zoti Walz, është deri diku një figurë e panjohur për publikun amerikan.

Për shumë votues amerikanë, fjalimi për pranimin e emërimit mund të jetë hera e parë që e dëgjojnë atë të flasë pas një kohë të gjatë.

Që nga momenti që u mori stafetën për garën presidenciale, zonja Harris u është përgjigjur vetëm në pak raste pyetjeve të gazetarëve që mbulojnë fushatën e saj.

Ajo ka refuzuar të zhvillojë një konferencë të gjerë për shtypin ose të intervistohet nga një gazetar apo gazetare me peshë në televizionet kryesore amerikane. Ajo ka thënë se do të zhvillojë intervista të tilla në fund të gushtit.

Zonja Harris ka tërhequr mijëra mbështetës nëpër tubime në shtetet fushëbeteja, duke përcjellë mesazhe të shkruara me kujdes, dhe kujtuar votuesve se ajo e filloi karrierën politike si prokurore lokale dhe më pas u bë prokurore e përgjithshme e Kalifornisë.

“Në këto detyra, jam ndeshur me individë të të gjitha llojeve. Pra më kuptoni kur them se e njoh llojin e Donald Trump-it”, tha ajo gjatë një fjalimi.

Një juri e shpalli zotin Trump përgjegjës në çështjet civile për abuzim seksual me një grua dhe më pas shpifje ndaj saj, ndërsa një juri tjetër në maj e shpalli atë fajtor për 34 akuza penale që lidhen me pagesën e parave për të blerë heshtjen e aktoreje të filmave pornografikë.

Në fillim të vitit, një gjykatës arriti në përfundimin se zoti Trump i kishte manipuluar të dhënat e biznesit për të siguruar kredi të favorshme nga bankat dhe tarifa të leverdishme nga kompanitë e sigurimeve dhe e urdhëroi atë të paguante një dëmshpërblim prej rreth 300 milionë dollarë.

Republikani Trump e ka sulmuar ashpër rivalen Harris si një intelektuale e peshës së lehtë. Ai ka thënë se zonja Harris nuk është e zgjuar sa duhet për t’u përballur me pyetjet e vështira të gazetarëve.

Disa republikanë i kanë kërkuar zotit Trump që të heq dorë nga sulmet personale ndaj zonjës Harris dhe të vërë në shënjestër politikat e saj, por ai nuk ka pranuar.

“Unë kam të drejtë për sulme personale”, tha ai për gazetarët të enjten. “Duhet ta bëj sipas mënyrës sime”.

Ndërsa shumica e delegatëve në kuvend janë rreshtuar plotësisht pas zonjës Harris, disa dhjetëra të tjerë kanë thënë se janë “të pavendosur” për kandidaturën e saj, në shenjë proteste ndaj mbështetjes së administratës së Presidentit Biden për Izraelin në luftën e tij kundër militantëve të Hamasit në Gaza.

Demokratja Harris e ka mbështetur gjerësisht Izraelin, ndërsa ka bërë thirrje për një armëpushim në luftën 10-mujore. Ajo ka refuzuar të mbështesë një nga kërkesat e disa prej delegatëve pro-palestinezë, embargon e ndihmave ushtarake për Izraelin.