Një gjykatëse federale në Shtetet e Bashkuara vendosi që komiteti i Dhomës së Përfaqësuesve, që po heton trazirat e 6 janarit në Kongres, mund të ketë qasje në disa nga të dhënat e Shtëpisë së Bardhë të kohës së ish-presidentit Donald Trump.
Trump ka argumentuar se materialet i mbulon privilegji ekzekutiv, i cili mbron konfidencialitetin e disa komunikimeve të Shtëpisë së Bardhë.
Hetimet e komitetit po përpiqen të zbulojnë nëse Trump ka pasur njohuri paraprake për trazirat.
Më 6 janar, qindra mbështetës të tij kanë sulmuar ndërtesën e Kongresit, në përpjekje për të penguar certifikimin e rezultatit të zgjedhjeve të nëntorit 2020, në të cilat kandidati demokrat, Joe Biden, ka dalë fitues.
Trazirat kanë lënë pesë persona të vdekur, përfshirë një zyrtar të policisë.
Kongresi, megjithatë, ka arritur ta certifkojë rezultatin zgjedhor dhe Biden e ka marrë detyrën e presidentit në muajin janar.
Së paku 535 protestues janë arrestuar, por, deri më tani, janë shqiptuar vetëm disa dënime.
Komiteti i Përzgjedhur i Dhomës së Përfaqësuesve dëshiron të shohë disa të dhëna telefonike, regjistra të vizitorëve dhe dokumente të tjera të Shtëpisë së Bardhë, që mund të hedhin dritë mbi ngjarjet e asaj dite.
Trump ka kërkuar vendim gjyqësor për t’i mbajtur sekret dokumentet.
Por gjykatësja Tanya Chutkan konstatoi se Arkivi Kombëtar – agjencia federale që mban të dhënat e Shtëpisë së Bardhë të Trumpit – duhet të përmbushë kërkesën e panelit.
Chutkan tha se kërkesa e Trumpit për urdhër paraprak gjyqësor duket se mbështetet “në nocionin se pushteti i tij ekzekutiv ekziston deri në përjetësi”.
Sipas saj, presidenti Joe Biden ka autoritetin për të hequr privilegjin ekzekutiv mbi dokumentet, pavarësisht pohimeve ndryshe të Trumpit.
“Presidentët nuk janë mbretër dhe paditësi nuk është president”, shtoi gjykatësja në vendimin prej 39 faqesh.
Beteja ligjore ka të ngjarë të përfundojë në Gjykatën Supreme.
Vendimi u mor në ditën kur dhjetë ndihmës të Trumpit u thirrën për të dëshmuar përpara ligjvënësve amerikanë, në lidhje me ngjarjet e 6 janarit.
Përfaqësuesi Bennie Thompson, i cili kryeson komitetin e Dhomës së Përfaqësuesve, tha në një deklaratë pas vendimit se të dhënat nga Shtëpia e Bardhë janë vendimtare për të kuptuar sulmin e 6 janarit.
“Për mendimin tim, nuk mund të ketë një interes më të fuqishëm publik, sesa sigurimi i përgjigjeve për një sulm mbi demokracinë tonë”, tha Thompson.
Në një intervistë për rrjetin televiziv CNN, Thompson tha se Trump nuk duhet të sillet si një “djalosh i llastuar”.
Trump ka sulmuar në mënyrë të vazhdueshme punën e komitetit dhe ka vazhduar të promovojë teori të pabazuara konspirative për mashtrime në zgjedhje, edhe pse fitorja e Bidenit është vërtetuar në të 50 shtetet amerikane.
Në një reagim pas vendimit të gjykatëses, zëdhënësi i Trumpit, Taylor Budowich, tha se “Trump mbetet i përkushtuar për mbrojtjen e Kushtetutës dhe të Zyrës së Presidentit”.
Ai tha se rasti “është i destinuar të vendoset nga gjykatat e apelit”.
Intervistë me analisten e ‘American Enterprise Institute Karlyn Bowman
Pikërisht një vit më parë, më 7 nëntor 2020, me ardhjen e rezultateve të Pensilvanisë, Joe Biden pati sigurinë se do të ishte presidenti i zgjedhur i Shteteve të Bashkuara, në përfundim të një numërimi të gjatë të votave (numërimi, kujtojmë, kontestuar nga kundërshtari i tij Donald Trump). Më pas Biden mori detyrën më 20 janar 2021. Megjithatë, sot, ylli i presidentit demokrat nuk shkëlqen më siç parashikonin njëqind ditët e para të mandatit të tij. Midis qiramarrësve të Shtëpisë së Bardhë për 40 vitet e fundit, Biden është i dyti i fundit në nivelin e vlerësimit. Më keq se ai vetëm Donald Trump.
“Muaji i tij i mjaltit me amerikanët ishte i shkurtër për shkak të Afganistanit. Vendimi për t’u tërhequr u shpërnda gjerësisht, por menaxhimi i Biden ishte aq i dobët sa hodhi hije mbi aftësinë e tij drejtuese,” shpjegon Karlyn. Bowman, një analiste në ‘American Enterprise Institute.
Asnjëherë që nga Lufta e Dytë Botërore asnjë president nuk ka parë që mbështetja e tij të bjerë kaq shumë. Gjithashtu për shkak të shfaqjes së variantit Delta të koronavirusit; pas verës Biden humbi 14 pikë përqindjeje. “Ne jemi shumë të polarizuar, kështu që është e rëndësishme të theksohet se miratimi i punës së Biden për ata që pretendojnë se janë të pavarur ka shkuar nga mbi 60% në 34%. Kjo është një goditje e madhe në vitin e parë të presidencës”, vë në dukje Karlyn Bowman, një vëzhguese e kujdesshme e politikës amerikane, e cila, ndonëse e njeh simpatinë njerëzore dhe përvojën e madhe të Biden, mbetet shumë e rreptë. “Ai kishte talentin e një senatori, i cili është shumë i ndryshëm nga bindshmëria e një presidenti. Një president ka nevojë për cilësi të tjera dhe nuk e dimë më nëse i ka, ai duket pak i vjetër…”, thotë analistja.
Për të rënduar mbi gjykimin presidencial, ngërçi në Kongres, ku ndarjet mes përfaqësuesve të partisë përdorin nuk lejojnë që axhenda e Biden të bëhet realitet. “Biden sigurisht që mban përgjegjësi për këto vonesa, ai nuk ka qenë në gjendje të ndërmjetësojë me sukses midis demokratëve më përparimtarë dhe më të moderuar,” thotë Bowman.
Pas planit infrastrukturor, Dhoma dhe Senati do të tentojnë ta miratojnë në fotofinish planin për reformën sociale, por nga pikëpamja zgjedhore mund të mos mjaftojë. “Unë mendoj se indekset e saj do të rriteshin pak, por është e vështirë të bësh një shkelje në opinionin publik. Kur ke humbur besimin, është e vështirë ta rifitosh”, kujton analistja.
Ashtu si Reagan, Clinton dhe Obama, Biden gjithashtu e gjen veten se i duhet të kthejë timon. Dhe ai e di se rruga e vetme është një. Sepse, siç tha vetë Biden: “Ajo që di është se njerëzit duan fakte nga ne”./rsi.ch/eb
Presidenti i Shteteve të Bashkuara, Joe Biden tha të shtunën se paketa historike 1 trilion dollarëshe e infrastrukturës që Kongresi e miratoi të premten, do të krijojë miliona vende pune.
Duke folur në Shtëpinë e Bardhë, presidenti Biden e quajti këtë javë “javën e infrastrukturës”.
Ish-Presidenti Donald Trump kishte shpallur “Javën e Infrastrukturës” në vitin 2018, por nuk arriti të miratonte një projektligj të tillë megjithëse ndërmori disa përpjekje gjatë presidencës së tij.
Zoti Biden tha se do të nënshkruante projektligjin dypartiak “së shpejti” duke e kthyer në ligj në një ceremoni zyrtare me pjesëmarrjen e të gjithë atyre që punuan për të, si demokratë edhe republikanë. Amerikanët do t’i shohin efektet e ligjit në muajt e ardhshëm, tha ai.
Ligji dypartiak i infrastrukturës do të krijojë vende pune në projektet për modernizimin e rrugëve dhe urave, si edhe do të transformojë sistemin e transportit të vendit tha ai.
Votimi 228 me 206 që u krye të premten vonë në Dhomën e Përfaqësuesve është një triumf për demokratët e presidentit Biden, të cilët kishin debatuar për muaj të tërë mbi propozimet ambicioze të shpenzimeve që përbëjnë pjesën më të madhe të programit të tij të brendshëm.
Ambasadori Richard Grenell ka publikuar një analizë në faqen e Qendrës Amerikane për Ligj dhe Drejtësi, ku thekson se nuk ka asnjë provë ndaj vendimit të DASH për Sali Berishën.
Grenell, që shihet gjerësisht si ministri në hije i DASH i Partisë Republikane, thotë se vendimi ndaj Berishës u mor nga Sekretari Antony Blinken vetëm si hakmarrje e miliarderit të majtë, George Soros.
Më tej Grenell thekson se Blinken po vepron si agjent i Soros në Ballkan.
“Administrata e Biden është kalamendur sërish duke krijuar një tjetër fiasko ndërkombëtare, këtë herë është Sekretari i Shtetit Blinken që kryeson akuzën për ndërhyrje në politikat zgjedhore, duke e përqendruar vëmendjen e tij te ish-presidenti i Shqipërisë, Sali Berisha. Për ata që nuk e njohin politikën ballkanike, zoti Berisha është një njeri me një të kaluar dinamike, një kundërshtar i vendosur i komunizmit, themelues i Partisë Demokratike të Shqipërisë dhe mik i Amerikës.
Pas një karriere të gjatë për të rikthyer Shqipërinë në dritë pas shtypjes komuniste, zoti Berisha është tërhequr kryesisht nga pjesëmarrja e drejtpërdrejtë në politikë, duke preferuar të ndihmojë në promovimin e konservatorëve me të njëjtat mendime dhe politika anti-socialiste.
Por Sekretari Blinken tronditi rajonin në maj duke shpallur sanksione udhëtimi, në dukje të pabaza, kundër zotit Berisha dhe familjes së tij të ngushtë, duke i ndaluar hyrjen në SHBA,” shkruan Grenell.
Më tej ai thekson se edhe pse kongresmeni Lee Zeldin ka kërkuar prova për këtë vendim, Blinken nuk ka ofruar asgjë.
“Aktualisht e vetmja provë që dimë ne është kundërshtimi i vendosur i Berishës ndaj ndërhyrjes politike të Soros, të cilin Berisha e ka denoncuar për anashkalim të sundimit të ligjit dhe për ndikim informal në të gjithë rajonin e Ballkanit,” thekson Grenell.
Më tej Grenell shkruan se ai vetë nuk ka parë asnjë provë të tillë, edhe pse ka qenë drejtues i Inteligjencës Kombëtare amerikane. Nëse ka ndonjë të tillë, Grenell thotë se Blinken duhet t’i drejtohet Kongresit.
“Është koha që Kongresi të kërkojë provat për sanksionet shqiptare, që Blinken tha se i kishte. Unë personalisht nuk i kam parë kurrë dhe jam përqendruar në çështjet e Ballkanit si drejtor në detyrë i Inteligjencës Kombëtare”.
Grenell: Nuk është paraqitur asnjë evidencë kundër Berishës
“Aktualisht e vetmja provë që dimë ne është kundërshtimi i vendosur i Berishës ndaj ndërhyrjes politike të Soros, të cilin Berisha e ka denoncuar për anashkalim të sundimit të ligjit dhe për ndikim informal në të gjithë rajonin e Ballkanit. Vetë zoti Berisha në vitin 2017 u bëri thirrje qeverive të mëdha të hetonin rolin e Soros në politikën rajonale dhe shkoi aq larg sa të inkurajonte të tjerët që ta shpallnin Sorosin ‘non grata’.
Berisha ka përvojë personale me Sorosin që në ditët më të hershme që datojnë 30 vjet më parë. Të dy kishin kërkuar të punonin së bashku për të zhvilluar një shoqëri civile të pavarur; megjithatë në sytë e Berishës, Soros thjesht po krijonte një strehë të sigurt burokratike për mbështetësit e ish-diktaturës komuniste. Vitet themelore të tensionuara të demokracisë shqiptare kanë galvanizuar këndvështrimin e Berishës, i cili ka shkuar aq larg sa të pohojë se ‘George Soros është një armik i ashpër i maskuar i vlerave që ne besojmë dhe ndajmë’,” shkruan Grenell.
“Kongresmeni Lee Zeldin, anëtar i Komisionit të Punëve të Jashtme në Kongresin Amerikan, kohët e fundit u përball me Sekretarin Blinken për sanksionimin e papritur ndaj Berishës. Sekretari Blinken përcolli pak besim kur iu kërkua justifikim, duke thënë “nuk kam asgjë për të ndarë”. Ndërsa Blinken ishte i paqartë në vazhdimësi ndaj Komisionit, duke mos dorëzuar asnjë informacion apo provë,” shkruan Grenell.
“Sekretari Blinken tani do të përballet me një sfidë të re ndaj autoritetit të tij në formën e gjykatave ndërkombëtare. Javën e kaluar, Gjykata Korrektuese e Parisit njoftoi se do të dëgjonte Berishën dhe pretendimin e tij se Blinken ka shpifur ndaj reputacionit të tij duke e shpallur atë person non-grata,” vijon ai.
Grenell: SHBA nuk mund të shpërdorojë ligjin për interesat e Soros
Madje Grenell shton se edhe kur Kongresi Amerikan ka kërkuar prova, sërish ato nuk janë ofruar nga DASH.
Sipas Grenell, Blinken ka vepruar si agjent i miliarderit të majtë, George Soros. Ambasadori thekson se e vetmja provë që dihet është përplasja e vazhdueshme e Sali Berishës me Sorosin. Për Grenell është shqetëues fakti se Soros po dëmton demokracinë jo vetëm në SHBA, por edhe në botë.
Ai thekson se Blinken do përballet me gjykatat ndërkombëtare, pasi një gjykatë në Paris e ka pranuar padinë e bërë nga Sali Berisha. Në fund, Grenell nënvizon se SHBA si shtet ligjor nuk mund të përdorë ligjin për qëllimet politike të Sorosit.
“Sekretari Blinken tani do të përballet me një sfidë të re ndaj autoritetit të tij në formën e gjykatave ndërkombëtare. Javën e kaluar, Gjykata Korrektuese e Parisit njoftoi se do të dëgjonte Berishën dhe pretendimin e tij se Blinken ka shpifur ndaj reputacionit të tij duke e shpallur atë person non-grata.
Dhe Berisha ka të drejtë në këtë pikë. Këto sanksione udhëtimi të SHBA, që Blinken ka përdorur ndaj Berishës, janë zakonisht një lëvizje e rezervuar për disa nga shkelësit më flagrantë të normave ndërkombëtare dhe të drejtave të njeriut- mbështetur mbi prova- duke përfshirë këtu tipa të ngjashëm me oligarkët rusë. Megjithatë Berisha ka qenë mik i SHBA dhe madje është pritur nga të dy presidentët Bush.
Populli amerikan dhe bota duhet të pyesë nëse u është shitur një premtim i rremë nga Administrata Biden. Në fund të fundit, kjo është një administratë që premtoi ‘kthimin në normalitet’.
Shtetet e Bashkuara janë dhe do të jenë gjithmonë një komb i qeverisur nga ligji dhe arsyeja; dhe këto sanksione, në mungesë të provave, shërbejnë vetëm për të minuar besueshmërinë e SHBA-së. Sekretari Blinken duhet të sigurojë provat e tij mbështetëse nëse Kongresi dhe populli amerikan do të kenë ndonjë besim në kompetencat e Biden në skenën botërore. Është koha që Kongresi të kërkojë provat për sanksionet shqiptare, që Blinken tha se i kishte. Unë personalisht nuk i kam parë kurrë dhe jam përqendruar në çështjet e Ballkanit si drejtor në detyrë i Inteligjencës Kombëtare,” shkruan Grenell.
Grenell: Soros donte t’u gjente strehë ish-bllokmenëve, Berisha u përplas që para 30 vitesh
“Aktualisht e vetmja provë që dimë ne është kundërshtimi i vendosur i Berishës ndaj ndërhyrjes politike të Soros, të cilin Berisha e ka denoncuar për anashkalim të sundimit të ligjit dhe për ndikim informal në të gjithë rajonin e Ballkanit. Vetë zoti Berisha në vitin 2017 u bëri thirrje qeverive të mëdha të hetonin rolin e Soros në politikën rajonale dhe shkoi aq larg sa të inkurajonte të tjerët që ta shpallnin Sorosin ‘non grata’.
Berisha ka përvojë personale me Sorosin që në ditët më të hershme që datojnë 30 vjet më parë. Të dy kishin kërkuar të punonin së bashku për të zhvilluar një shoqëri civile të pavarur; megjithatë në sytë e Berishës, Soros thjesht po krijonte një strehë të sigurt burokratike për mbështetësit e ish-diktaturës komuniste. Vitet themelore të tensionuara të demokracisë shqiptare kanë galvanizuar këndvështrimin e Berishës, i cili ka shkuar aq larg sa të pohojë se ‘George Soros është një armik i ashpër i maskuar i vlerave që ne besojmë dhe ndajmë’,” shkruan Grenell./Syri.net
UASHINGTON – Një juri e madhe ka ngritur akuza ndaj analistit rus që kontribuoi duke ofruar materiale për të ashtuquajturën “Dosja Steele”, ku aludohej për lidhje të mundshme mes zyrtarëve të fushatës elektorale në vitin 2016 të ish-Presidentit Donald Trump dhe Rusisë. Ky zhvillim u njoftua të enjten nga një prokuror i posaçëm që po heton këtë çështje.
Analisti Igor Danchenko përballet me pesë akuza për dhënien e deklaratave të rreme FBI-së në lidhje me burimet për materialin që i kishte dhënë kompanisë britanike që përgatiti dosjen, tha John Durham, prokurori i posaçëm i emëruar nga Departamenti amerikan i Drejtësisë gjatë administratës së ish-Presidentit Trump.
Gjatë një seance të shkurtër dëgjimore të enjten në Aleksandria, të shtetit amerikan Virxhinia, Gjykatësja Theresa Buchanan urdhëroi lirimin me kusht të zotit Danchenko, kundrejt një garancie prej 100 mijë dollarësh, në pritje të gjykimit, dhe pasi avokati i tij i tha gjykatës se i akuzuari jeton me familjen e tij në Virxhinia.
Avokati i zotit Danchenko sinjalizoi se klienti i tij nuk do të pranojë fajësinë për akuzat, megjithëse nuk u paraqit ndonjë deklaratë zyrtare e tij. Një prokuror tha se nëse do të shpallet fajtor, zoti Danchenko mund të përballet me pesë vite burg për secilën nga akuzat.
Akuza thotë se gjatë periudhës qershor – nëntor 2017, zoti Danchenko bëri deklarata të rreme për burimet e disa informacioneve që i kishte ofruar një kompanie investigative britanike, firmë të cilën ai nuk e identifikoi me emër.
Burimet i konfirmuan agjensisë së lajmeve Reuters se kompania kishte lidhje me ish-zyrtarin e shërbimit britanik të zbulimit, Christopher Steele. Dosja, e cila iu qarkullua FBI-së dhe organeve të mediave përpara zgjedhjeve të nëntorit 2016, paraqiste të dhëna ende të paprovuara se Rusia zotëronte informacion shantazhi për zotin Trump dhe për disa nga këshilltarët e tij republikanë, dhe se Moska po punonte mbrapa skene për mundjen e kundërshtares demokrate Hillary Clinton.
Akuza thotë se zoti Danchenko bëri deklarata false për informacionin që ai tha se e kishte marrë nga një telefonues anonim që pretendonte se Kremlini mund të ishte duke ndihmuar për zgjedhjen e zotit Trump. Akuza thotë se zoti Danchenko e dinte se informacioni nuk ishte i vërtetë. Një avokat i zotit Danchenko nuk iu përgjigj menjëherë kërkesës për të komentuar për këtë çështje.
Dy burime të mirëinformuara rreth aktiviteteve të Prokurorit Durham thanë se ai ka lëshuar fletëthirrje për të kërkuar evidencë nga burime të shumta, ndër ta edhe persona të lidhur me Fusion GPS, kompania investigative me seli në Uashington e cila porositi ngritjen e dosjen.
Zoti Steele është ish-zyrtari i zbulimit britanik që përgatiti dosjen për kompaninë Fusion GPS, që punonte për një firmë ligjore që përfaqësonte Partinë Demokrate dhe fushatën presidenciale të zonjës Clinton për zgjedhjet e vitit 2016. Zoti Steele refuzoi të komentojë nëpërmjet një mesazhi të postës elektronike.
Një nga burimet në dijeni të aktivitetit të Prokurorit Durham tha se kompania Fusion GPS nuk është pjesë e hetimit të tij. Zoti Steele kishte refuzuar më parë të bashkëpunonte me hetuesit e Prokurorit Durham.
Presidenti amerikan, Joe Biden, do të jetë mikpritës i takimit të lartë për demokraci më 9 dhe 10 dhjetor, në të cilin janë ftuar mbi 100 shtete të botës, por jo edhe Kosova.
Ndonëse, administrata amerikane ende nuk e ka bërë publike listën e vendeve pjesëmarrëse në takimin që do të zhvillohet virtualisht, të premten portali amerikan “Politico” publikoi listën e 100 shteteve pjesëmarrëse. Në mesin e tyre nuk është Kosova sikurse as Serbia dhe Bosnja, ndërsa të ftuara janë Shqipëria, Maqedonia e Veriut dhe Mali i Zi. Në mesin e atyre që nuk janë ftuar sipas Politicos, është edhe Hungaria.
Një zëdhënës i ambasadës amerikane në Prishtinë tha se takimi i lartë per demokraci i “është një nga shumë nismat amerikane e përqendruar në çuarjen përpara të demokracisë, luftimit të korrupsionit dhe promovimin e respektimit të të drejtave të njeriut gjithandej botës. Jo të gjithë partnerët mund të akomodohen në këtë nismë”, tha zëdhënësi.
Ai nënvizoi se “sikundër e ka theksuar edhe presidenti Biden në video adresimin e tij të muajit gusht, Kosova ka shënuar përparim të jashtëzakonshëm gjatë 20 viteve të fundit’ në ndërtimin e një demokracie shumetnike dhe të qëndrueshme. Si partnere e palëkundur e Kosovës, SHBA-ja mbetet e përkushtuar që të punojë me Kosovën në forumet tjera për të çuar përpara dhe fuqizuar demokracinë, për të parandaluar rrëshqitjen demokratike, për të promovuar respektimin e të drejtave të njeriut, dhe për të luftuar korrupsionin, me qëllim që bashkë të dëshmojmë se demokracitë angazhohen për nevojat e qytetarëve të tyre”, tha zëdhënësi i ambasadës amerikane.
Megjithatë, njoftimi se Kosova nuk është ftuar në takim, nxiti reagime të një pjese të opozitës dhe vëzhguesve të pavarur që e vlerësojnë këtë si të dëmshme për Kosovën.
Kryetari i Aleancës për Ardhmërinë e Kosovës, Ramush Haradinaj, shkroi në rrjetet sociale se mungesa e ftesës “duhet të na shqetësojë të gjithëve pa dallim dhe të shërbejë si sinjal alarmi për shkallën e degradimit të raporteve me SHBA-të si rezultat i qeverisjes së Albin Kurtit”.
Nuk pati ndonjë reagim të menjëhershëm të udhëheqësve të institucioneve të Kosovës rreth kësaj çështjeje.
Miq, familjarë dhe ish-kolegë po nderojnë sot Colin L. Powell, ushtarakun dhe diplomatin që gëzon një admirim të gjerë, i cili nga një djalë i Bronksit u bë i pari afrikano-amerikan në krye të Shtabit të Përgjithshëm e më vonë, sekretari i parë afrikano-amerikan i Shtetit.
Sot në Katedralen Kombëtare në Uashington po mbahet funerali për nder të tij ku po merr pjesë edhe Presidenti Joe Biden, si dhe ish-Presidentët Obama dhe Bush.
Gjatë ceremonisë mbajti një fjalim Madeleine Albright, paraardhësja e zotit Powell në detyrën e sekretares së Shtetit.
Megjithëse me vonë do të bëheshin miq të mirë, marrëdhëniet mes zotit Powell dhe zonjës Albright janë përshkuar nga përplasje, sikurse ajo gjatë periudhës që zonja Albright shërbente si ambasadore në Kombet e Bashkuara nën administratën Klinton. Të dy e kanë risjellë në vëmendje atë periudhë, që përkonte me muajt e fundit të zotit Powell në detyrën e Shefit të Shtabit të Përgjithshëm. Aso kohe zonja Albright shtroi një pyetje që lidhej me ndërhyrjen ushtarake të SHBA-së në Ballkan duke thënë se: pse Shtetet e Bashkuara duhet të kishin një ushtri të shkëlqyer nëse nuk mund ta përdornin për rrethana të tilla?
Në kujtimet e tij duke iu referuar atyre ditëve zoti Powell ka thënë se ishte acaruar aq shumë nga deklarata sa kishte “menduar se do të pësonte një aneurizëm”. (fryrje e aortës, arteries kryesore të zemrës që furnizon me gjak pjesën tjetër të trupit).
Lidhur me këtë çështje pikëpamja e zotit Powell ishte se Shtetet e Bashkuara duhet ta angazhonin ushtrinë e tyre, vetëm kur të kishin një objektiv politik të qartë dhe të arritshëm, një element kyç i asaj që do të njihej më vonë si Doktrina Powell.
Pikërisht këtij momenti iu rikthye zonja Albright në fjalimin e saj gjatë ceremonisë së lamtumirës për zotin Powell, duke theksuar arsyet se pse u bënë miq, pavarësisht dallimeve:
“Arsyeja është se nën atë pamje të jashtme plot shkëlqim prej luftëtari e burri shteti, fshihej një nga njerëzit më të butë dhe më të denjë që secili prej nesh mund të ketë takuar ndonjëherë. Ndërsa arrita ta njoh, arrita ta shoh Colin Powell-in si një figurë që tejkalonte cdo dimension për nga virtytet e tij, ndershmëria homeriane, dinjiteti, besnikëria dhe për nga përkushtimi i palëkundur ndaj vlerave ku besonte dhe si një njeri të fjalës. Këto ishin të njëjtat tipare që ai pa u lodhur përpiqej t’i kultivonte tek ushtarët nën komandën e tij, tek diplomatët që drejtonte, kolegët me të cilët punonte, lexuesit e librave të tij, tek të gjithë ata që dyndeshin për të dëgjuar fjalimet e tij, studentët apo tek mijëra të rinj që përfituan nga Aleanca e Premtuar Amerikane, që Alma dhe ai e trumbetonin me forcë“, tha zonja Albright.
Gjithashtu janë parashikuar fjalime nga Richard Armitage, ish-zëvendës sekretar i shtetit gjatë kohës kur zoti Powell mbante detyrën e kryediplomatit të vendit, si dhe djali i zotit Powell, Michael Powell.
Zoti Powell vdiq më 18 tetor në moshën 84-vjeçare nga ndërlikime të shkaktuara nga COVID-19. Familja e tij tha se ai ishte plotësisht i vaksinuar kundër koronavirusit, por zotit Powell kishte një sistemit të dobët imunitar pasi vuante nga mieloma e shumëfishtë, apo kanceri i gjakut një sëmundje për të cilën merrte trajtime.
Historia e ngritjes së zotit Powell si një nga figurat më të shquara të kombit, ka shërbyer si një shembull për shumë njerëz.
Në autobiografinë e tij të titulluar “Udhëtimi im Amerikan”, zoti Powell kujtonte një fëmijëri të epokës së pas depresionit, të jetuar në lagjen e Bronksit në Nju Jorkut, si një nxënës jo i mirë, i shkujdesur dhe pa objektiva.
Ushtria i hyri në gjak gjatë vitit të tij të parë në Kolegjin e Nju Jorkut në vitin 1954. Frymëzuar nga shokët e tij me uniformë ai u regjistrua në Trupat e Trajnimit të Oficerëve Rezervë të shkollës.
Pas kësaj zoti Powell do të vazhdonte të shquhej me karrierën e tij në ushtri.
Edhe pse ishte vetëm 4 vjeç kur Shtetet e Bashkuara hynë në Luftën e Dytë Botërore, ai ruante kujtime të gjalla nga vitet e luftës.
Zoti Powell shërbeu në ushtri për 35 vjet. Ai u emërua në detyrën e togerit të dytë në vitin 1958, më pas shërbeu si drejtues toge, në atë që aso kohe njihej si Gjermania Perëndimore dhe në vitin 1962 shërbeu për një vit në Vietnam si këshilltar i një batalioni këmbësorie, periudhë gjatë së cilës u plagos. Zoti Powell do të shërbente sërisht në Vietnam në vitin 1968 dhe më pas ai mbajti një sërë detyrash si brenda ashtu edhe jashtë vendit.
Në fund të viteve 1970 ai punoi në Zyrën e Sekretarit të Mbrojtjes dhe në vitin 1983 shërbeu si gjeneral brigade duke u bërë ndihmësi i lartë ushtarak i Sekretarit të Mbrojtjes Caspar Weinberger. Më vonë ai shërbeu në Shtëpinë e Bardhë si këshilltar për sigurinë kombëtare i Presidentit Ronald Reagan dhe në vitin 1989 u ngrit në detyrën e një gjenerali me katër yje. Më vonë, po atë vit, Presidenti George H.W. Bush e emëroi në detyrën e Shefit të Përgjithshëm të Shtabit.
“Ai ishte aq i preferuar nga presidentët saqë u nderua dy herë me Medaljen Presidenciale të Lirisë“, tha ish-Presidenti George W. Bush në një koment pas publikimit të njoftimit për vdekjen e zotit Powell.
Gjatë karrierës së tij ai u vlerësua lart e fitoi besim ndërkombëtar, besim që u vu në rrezik në shkurtin e vitit 2003, kur gjatë një fjalimi në Kombeve të Bashkuara, në cilësinë e sekretarit të Shtetit, ai parashtroi kërkesën për të nisur luftën në Irak. Pas daljes së lajmeve se informacionet e zbulimit që ai përmendi ishin të gabuara e ndërsa lufta në Irak u shndërrua në një makth të përgjakshëm dhe kaotik, reputacioni i zotit Powell u dëmtua, por megjithatë nuk u shkatërrua.
Pas largimit nga qeveria, ai u shndërrrua në një figurë qendrore në skenën globale. Ai themeloi një organizate e cila synonte të ndihmonte të rinjtë e varfër amerikanë e pa mundësi kryesisht financiare. Republikanët donin që ai të kandidonte për president. Por i zhgënjyer me partinë e tij, zoti Powell dha mbështetjen e tij për tre kandidatët më të fundit për president që i takojnë partisë demokrate, të cilët mirëpritën mbështetjen e tij.
Ndikimi i zotit Powell u ndje në nivelet më të larta të struktuave amerikane të mbrojtjes edhe për shumë kohë pas tërhoqjes së tij nga jeta publike. Lloyd Austin, i cili në janar u bë sekretari i parë afrikano-amerikan i Mbrojtjes, e quajti zotin Powell një mik dhe këshilltar të tij. Ashtu si zoti Powell, zoti Austin u ngjit në strukturat e ushtrisë duke u bërë një gjeneral me katër yje.
Në ditën e vdekjes së zotit Powell, zoti Austin e quajti atë “një nga udhëheqësit më të mëdhenj që ka njohur vendi”.
Zoti Powell ishte mes atyre figuarave të shquara të vendit në fushën e sigurisë kombëtare që humbën jetën këtë vit, mes tyre George Shultz, i cili ka shërbyer në kabinetin e Presidentit Ronald Reagan dhe ishte sekretar Shteti nën Presidentin George H.W. Bush; si dhe Donald H. Rumsfeld, i cili ka shërbyer dy herë si sekretar i Mbrojtjes. Vetëm disa javë para vdekjes së zotit Powell, një ish-komandant i forcave amerikane në Irak, gjenerali i ushtrisë Raymond Odierno, vdiq nga sëmundja e kancerit.
Qeveria amerikane ka shtuar katër kompani të huaja teknologjike në listën e kompanive që thotë se kishin “zhvilluar dhe kishin pajisur me programe kompjuterike spiunazhi qeveritë e huaja” dhe se ato “u përdorën për të vënë në shënjestër në mënyrë keqdashëse zyrtarë qeveritarë, gazetarë, biznesmenë, aktivistë, akademikë dhe punonjës të ambasadave.”
Departamenti i Shtetit akuzoi kompanitë për “përfshirje në aktivitete që bien ndesh me sigurinë kombëtare ose interesat e politikës së jashtme të Shteteve të Bashkuara”.
Kompanitë janë NSO Group dhe Candiru të Izraelit, Positive Technologies të Rusisë dhe Iniciativa për Sigurinë Kompjuterike të Singaporit PTE. LTD.
Këto kompani tani do të përballen me kufizime të rënda në eksportimin e produkteve të tyre në SHBA dhe do ta bëjë të vështirë për firmat amerikane të sigurisë kibernetike t’u shesin atyre informacione që mund të jenë të dobishme në zhvillimin e produkteve të tyre.
“Kjo përpjekje ka për qëllim përmirësimin e sigurisë dixhitale të qytetarëve, luftimin e kërcënimeve kibernetike dhe zbutjen e mbikëqyrjes së paligjshme”, tha Departamenti i Shtetit.
Sipas agjencisë Reuters, si kompania NSO Group ashtu edhe Candiru janë akuzuar për shitjen e produkteve të tyre tek regjimet autoritare. NSO tha se ndërmerr veprime për të parandaluar abuzimin e produkteve të saj.
Kompania Positive Technologies ka qenë në pikëpyetje më parë, pasi ishte sanksionuar nga administrata Biden sepse ka ofruar ndihmë për forcat ruse të sigurisë. Kompania tha se nuk ka bërë asgjë të keqe.
Asnjë nga kompanitë nuk komentoi për përfshirjen e tyre në listën e zezë.
Republikani Glenn Youngkin zgjidhet guvernator i ardhshëm i Virxhinias në Shtetet e Bashkuara. Ai është 2.7 pikë përpara demokratit Terry McAuliffe, me më shumë se 95% të votave të numëruara.
Votimi është parë gjerësisht si një referendum për presidencën e Joe Biden dhe humbja do të nervozojë demokratët. Në zgjedhjet presidenciale një vit më parë Biden fitoi lehtësisht në Virxhinia.
Në një fjalim për përkrahësit, Youngkin e quajti fitoren e tij një “moment përcaktues”.
Zgjedhjet ishin testi i parë i madh i ndjenjës së votuesve amerikanë para mbajtjes së zgjedhjeve të mesmandatit vitin e ardhshëm për Kongres.
Në një tjetër garë kyçe për guvernator, guvernatori demokrat Phil Murphy i Nju Xhersit po përpiqet të fitojë rizgjedhjen kundër kundërshtarit republikan Jack Ciattarelli, i cili udhëhoqi garën pas 78 për qind të votave të numëruara. Por, votat nga disa bastione demokrate ende nuk ishin llogaritur. rel
“Marrëdhëniet tona me Serbinë nuk janë as të mira e as të këqija, janë të ndërlikuara”, tha Gabriel Escobar, i dërguari special i SHBA-së për Ballkanin.
Ajo që i ndërlikon këtë marrëdhënie ndoshta sugjerohet më së miri nga çështjet kryesore të hapura që janë shfaqur sërish në marrëdhëniet midis Uashingtonit zyrtar dhe Beogradit, të cilat, së bashku me angazhimin më të fortë të SHBA-së në Balkan, të nisur nën administrimin e Presidentit të ri Joe Biden.
Bashkëbiseduesit e Euronews Serbia, të cilët folën për marrëdhëniet ndërmjet Beogradit dhe Prishtinës, theksuan katër çështje të hapura, të cilat janë kryesisht të ndërthurura – çështjen e lidhjes së SHBA-së dhe BE-së në veprim në rajon, të cilën vetë Escobar e theksoi qartë, duke thënë se Serbia ka mbështetjen e SHBA-ve, përderisa është në rrugën evropiane, çështjen e Kosovës dhe marrëdhëniet me Rusinë dhe Kinën që dalin prej saj, dhe në fund, zgjidhja e çështjes së vëllezërve të vrarë Bytyçi, si pikë dypalëshe. për të cilën Shtetet e Bashkuara kanë këmbëngulur për një kohë të gjatë.
Dy gjëra ishin vendimtare për të interpretuar se roli i Amerikës në Ballkan ishte bërë më aktiv. Njëra i referohet faktit se ndryshimi i administratës në Uashington ka çuar në një lloj riorganizimi diplomatik që në fund të fundit nënkupton emërimin e Christopher Hill si ambasador të ri në Beograd dhe tjetri përshkallëzimin e krizës njëmbëdhjetëditore në veri të Kosovës, kur kalimet administrative u bllokuan për shkak të mosmarrëveshjes për targat.
Pikërisht në atë krizë erdhi në fokus bashkëpunimi mes SHBA-së dhe BE-së. Ndërmjetësi kryesor i marrëveshjes ndërmjet Beogradit dhe Prishtinës, që i dha fund krizës, si më parë, ishte Bashkimi Evropian, por vetë Escobar mori pjesë në negociatat në Bruksel, pikërisht në fazën përfundimtare.
Aleanca BE-SHBA u “vulos” më pas në një deklaratë zyrtare pas një takimi midis Sekretarit të Shtetit të SHBA Anthony Blinken dhe Përfaqësuesit të Lartë të BE-së Josep Borrell, duke vënë në dukje se SHBA dhe BE kanë rënë dakord të forcojnë më tej angazhimin e përbashkët në Ballkanin Perëndimor në mbështetjen e rajonit në rrugën e tij evropiane.
Mesazhi përfundimtar erdhi nga Escobar, i cili në një intervistë për Aljazeera Balkan ku në pyetjen nëse presidenti serb Aleksandar Vuçiç kishte mbështetjen e Uashingtonit, u përgjigj: “Ai ka mbështetjen e Uashingtonit përderisa Serbia vazhdon në rrugën evropiane, kjo është e Serbisë. synimi i deklaruar dhe partneriteti ynë si me Serbinë ashtu edhe me të gjitha vendet e rajonit. Ky është qëllimi ynë.”
Çështja e Kosovës
Çështja e Kosovës është një nga çështjet kyçe në marrëdhëniet e Serbisë si me Shtetet e Bashkuara ashtu edhe me BE-në. Uashingtoni është partneri më i rëndësishëm ndërkombëtar i Kosovës kur bëhet fjalë për pavarësinë dhe është administrata amerikane ajo që ka ndikimin më të madh në vendimet e Kosovës, veçanërisht në kohë krize.
Prandaj nuk është për t’u habitur që ishte i dukshëm angazhimi më intensiv i SHBA-së në zgjidhjen e krizës në veri të Kosovës, por edhe lëvizjet e administratës amerikane që tregojnë angazhimin e tyre më të drejtpërdrejtë në negociatat mes dy palëve në Bruksel. Në këtë këndvështrim, po shqyrtohet edhe mundësia që Shtetet e Bashkuara të emërojnë të dërguarin e tyre special për dialogun.
Përkatësisht, Shtetet e Bashkuara dhe BE-ja njoftuan më 20 tetor se ishin pajtuar që të forcojnë më tej angazhimin e tyre të përbashkët në Ballkanin Perëndimor në mbështetje të përparimit të rajonit në rrugën e tij evropiane.
Uashingtoni dhe Brukseli kanë vënë theks të veçantë në dialogun ndërmjet Beogradit dhe Prishtinës dhe tensioneve në veri të Kosovës që ndodhën gjatë shtatorit dhe tetorit. Të dyja palët theksuan rëndësinë e dialogut të ndërmjetësuar nga BE, duke thënë se ai ishte “një mekanizëm kyç për zgjidhjen e normalizimit gjithëpërfshirës të marrëdhënieve midis Serbisë dhe Kosovës”.
Vetë Escobar tha më herët se Shtetet e Bashkuara do të përdorin çdo mundësi për të “ndihmuar dhe mbështetur përpjekjet e BE-së për të arritur një marrëveshje për normalizimin e marrëdhënieve midis Beogradit dhe Prishtinës”, duke përfshirë bashkëpunimin midis tij dhe Lajcak në bisedimet me liderët dhe palët në dialog.
Kryebashkiaku i qytetit New York, Bill de Blasio, tha se kjo shifër paraqet më pak se 6 për qind të fuqisë punëtore të bashkisë të qytetit New York
Qyteti New York ka vendosur rreth 9 mijë punonjës në pushim pa pagesë pasi ata refuzuan të respektojnë urdhrin e qytetit për t’u vaksinuar kundër koronavirusit të ri (COVID-19), transmeton Anadolu Agency (AA).
Kryebashkiaku i qytetit New York, Bill de Blasio, tha se kjo shifër paraqet më pak se 6 për qind të fuqisë punëtore të bashkisë të qytetit New York.
De Blasio po ashtu njoftoi se rreth 12 mijë punonjës të tjerë të pa vaksinuar kanë aplikuar për përjashtim mjekësor dhe pritet të marrin vendimin përfundimtar në ditët e ardhshme. Ata mund të qëndrojnë në punë derisa të vlerësohen rastet e tyre.
“Kushdo që nuk e ka bërë deri më tani, ka ende një mundësi për ta rregulluar atë. Vaksinohuni, kthehuni në punë, sepse ne kemi nevojë që të gjithë të bëjnë punën e tyre dhe ne kemi nevojë që të gjithë të jenë të sigurt”, tha de Blasio.
Një pakicë e vogël e fuqisë punëtore e qytetit New York zëshëm ka kundërshtuar urdhrin për t’u vaksinuar dhe sindikata që përfaqëson zjarrfikësit e qytetit ngriti alarmin se mund të rrezikohet siguria publike në qytetin më të madh të SHBA-së.
Megjithatë, de Blasio tha se nuk ka pasur asnjë shtëpi zjarrfikëse që është mbyllur dhe koha e përgjigjes mbetet “normale” për zjarrfikësit dhe policinë.
Por ai paralajmëroi se një numër jashtëzakonisht i lartë i punonjësve “pretendojnë se janë të sëmurë dhe nuk janë”, gjë që kërcënon veprime të mundshme ligjore.
“Nuk është e pranueshme. Gjëja që duhet bërë është të vini në punë, të mbroni njerëzit siç jeni betuar për ta bërë. Dhe shikoni, kjo është diçka që ne nuk e tolerojmë. Në fund të fundit, kur njerëzit bëjnë këtë lloj gjëje, ka pasoja”, tha de Blasio.
Presidenti i Shteteve të Bashkuara, Joe Biden, tha se samiti për klimën që po mbahet në Glasgou të Skocisë duhet të jetë “fillimi” i një dekade të ambicieve drejt trajtimit të ndryshimeve klimatike.
“Askush prej nesh nuk mund t’i shpëtojë më të keqes nëse nuk arrijmë ta shfrytëzojmë këtë moment”, tha Biden duke iu drejtuar pjesëmarrëve në samit.
Shtetet e Bashkuara janë ende duke u përpjekur që disa nga ndotësit më të mëdhenj në botë – Kina, Rusia dhe India – t’i bashkohen SHBA-së dhe aleatëve të saj në planet për të djegur shumë më pak qymyr, gaz dhe naftë dhe për të bërë hapa drejt përdorimit të energjisë më të pastër.
Biden tha se përgjigja masive e nevojshme për të ndaluar krizën klimatike duhet të shihet si një mundësi për ekonomitë e botës.
“Ne kemi aftësinë të investojmë në veten tonë dhe të ndërtojmë një të ardhme të barabartë, me energji të pastër dhe në këtë proces të krijojmë miliona vende pune”, tha Biden.
“Ne jemi në një pikë kthese në historinë botërore”, tha Biden, duke përshkruar përhapjen e zjarreve, thatësirave dhe fatkeqësive të tjera të lidhura me klimën.
“Ndryshimet klimatike tashmë po shkatërrojnë botën”, tha presidenti amerikan, duke shtuar se çdo ditë që vendet nuk veprojnë atëherë kostoja rritet.
Duke marrë parasysh modelet e procedurave sikurse në Samitin e Parisit për Klimën më 2015, shpresohet se në takimin në Skoci, liderët do të pajtohen për një marrëveshje të re për klimën dhe më pas zyrtarët tjerë të hartojnë detajet, para përfundimit të samitit më 12 nëntor.
Më shumë se 20,000 delegatë janë akredituar për këtë samit.
Në këtë organizim është vërejtur mungesa e liderit të Kinës, Xi Jinping dhe atij rus, Vladimir Putin.
Presidenti i Shteteve të Bashkuara, Joe Biden, ka thënë se sjellja e Uashingtonit ka qenë “e pahijshme” kur ka bërë marrëveshje për një pakt të ri të sigurisë, që i ka kushtuar Francës miliarda dollarë.
Biden i ka bërë komentet të premten, në një takim me homologun francez, Emmanuel Macron.
Ka qenë ky takimi i parë i tyre prejse Shtetet e Bashkuara, Britania e Madhe dhe Australia kanë rënë dakord muajin e kaluar për paktin Aukus.
Me këtë pakt, Kanbera ka anuluar një marrëveshje prej 37 miliardë dollarësh me Parisin, për të ndërtuar një flotë nëndetësesh konvencionale.
Në vend të saj, ajo do të ndërtojë së paku tetë nëndetëse me energji bërthamore, me teknologji të SHBA-së dhe Britanisë.
Vendimi e ka zemëruar Parisin, i cili e ka cilësuar paktin Aukus si “goditje në shpinë”.
“Ajo që kemi bërë, ka qenë e pahijshme”, ka thënë Biden gjatë takimit që është zhvilluar në Ambasadën e Francës në Vatikan.
“Kam pasur përshtypjen se Franca ka qenë e informuar shumë kohë më parë se marrëveshja nuk do të realizohet”, ka thënë Biden.
Macron ka thënë se është e rëndësishme “të shikohet kah e ardhmja”.
Takimi ka qenë pjesë e një serie bisedimesh midis presidentit të SHBA-së dhe liderëve botërorë, përpara samitit të ekonomive kryesore në botë, të njohura si G20, që do të mbahet këtë fundjavë në Romë.
Zëvendësndihmës-Sekretari amerikan i Shtetit për Evropën dhe Euroazinë, njëherësh i dërguari për Ballkanin Perëndimor, Gabriel Escobar, ka thënë të enjten se administata e presidentit amerikan, Joe Biden ka dyfishuar përkushtimin amerikan për të punuar me aleatë dhe partnerë që Ballkani Perëndimor të avancojë në rrugën evropiane.
Në një dëshmi para Nën-Komitetit të Dhomës së Përfaqësuesve për Evropë, Energji dhe Ambient, ai ka thënë se autoritetet amerikane janë duke punuar me partnerë të Bashkimit Evropian për të përforcuar mesazhin se anëtarësimi mbetet mundësi brenda afateve realiste kohore, më pas shtysë për kryerjen e reformave, si dhe për forcim të rezistencës ndaj ndikimit rus dhe kinez në prag të Evropës.
“Mesazhi më i fuqishëm që mund të japë tani BE-ja është që të caktojë nisjen e bisedimeve për anëtarësim me Maqedoninë e Veriut dhe Shqipërinë, para fundit të këtij viti”, ka thënë deklaruar Escobar.
Sipas tij, vonesat në këtë drejtim mund të nxisin dyshime dhe rrezikojnë të shkatërrojnë shpresat e një brezi të ri për të ardhmen evropiane.
Për këtë arsye, ai ka thënë se Sekretari amerikan i Shtetit, Antony Blinken dhe Përfaqësuesi i Lartë i BE-së për Politikë të Jashtme dhe Siguri, Josep Borrell, kanë dalë me komunikatë të përbashkët, më herët gjatë këtij muaji, për të theksuar se anëtarësimi në bllokun evropian është rruga e vetme përpara për rajonin.
Gjatë dëshmisë së tij ai ka përmendur edhe rëndësinë e vazhdimit të dialogut mes Kosovës dhe Serbisë, që ndërmjetësohet nga BE-ja.
Escobar ka thënë se për këtë arsye ka udhëtuar në Bruksel muajin e kaluar për të përkrahur përpjekjet e Përfaqësuesit Special të BE-së për dialog, Mirosllav Lajçak, që të shtyjë të dyja palët për të shtensionuar situatën për shkak të targave të makinave dhe për të gjetur zgjidhje.
Escobar i është referuar marrëveshjes së arritur mes Kosovës dhe Serbisë më 30 shtator, sipas së cilës, makinat e regjistruara në Kosovë dhe në Serbi duhet të vendosin letra ngjitëse mbi simbolet shtetërore në targat e makinave kur të kalojnë në territorin e njëra-tjetrës.
“Së bashku e kemi bërë të qartë se dialogu është forum në të cilin të dyja palët, si të barabarta, duhet të punojnë për të zgjidhur dallimet e tyre dhe për të normalizuar marrëdhëniet, në mënyrë ideale përmes një njohjeje reciproke”.
Infografikë
Marrëveshja për targat mes Kosovës dhe Serbisë
“Partneriteti i SHBA-së është me njerëzit e Malit të Zi”
Kur ka folur për Malin e Zi, Escobar i ka konsideruar të rëndësishme ndryshimet që kanë ndodhur pas mbajtjes së zgjedhjeve parlamentare në gusht të vitit 2020.
“E kemi bërë të qartë që partneriteti me Malin e Zi është partneritet me popullin dhe institucionet demokratike të këtij shteti, dhe jo me ndonjë parti politike”.
Ai ka thënë mes tjerash se autoritetet amerikane janë të përgatitura për të punuar me të gjithë partnerët malazezë që ndajnë vizionin për Malin e Zi si një shtet sovran, gjithëpërfshirës dhe demokratik, i cili avancon në kryerjen e reformave të nevojshme si vend aspirant i BE-së dhe mbetet aleat i palëkundur i NATO-s.
“Kërcënimet e Dodikut janë të rrezikshme”
Sa i përket Bosnje-Hercegovinës, Escobar ka thënë gjatë dëshmisë së tij se autoritetet amerikane dhe ato evropiane janë duke punuar për të shtyrë përpara reformat që e çojnë këtë vend drejt komunitetit euro-atlatnik.
Sipas tij, kërcënimet e fundit në nivel institucional nga anëtari serb i Presidencës trepalëshe të Bosnjës, Millorad Dodik, janë të rrezikshme dhe kërcënojnë dëmtimin e Marrëveshjes së Dejtonit dhe perspektivën evropiane të qytetarëve të këtij shteti.
“Ne jemi duke u angazhuar fuqishëm me aktorët lokalë dhe partnerët tanë për të shmangur çdo lëvizje që kërcënon kthimin e Bosnjës në të kaluarën e trazuar”.
Dodik është anëtari serb i Presidencës trepalëshe të Bosnje e Hercegovinës, i cili kërkon transferimin e të gjitha kompetencave nga shteti në nivel të entitetit.
Ai po ashtu ka thënë se Republika Sërpska do të shkëputet nga Bosnje e Hercegovina nëse këto kompetenca nuk i kthehen entitetit.
Transferimi i kompetencave nga shteti i Bosnjës tek entitetet nuk është në përputhje me Kushtetutën e Bosnjës.
“Moska dhe Pekini kundërshtojnë rrugën e rajonit drejt Perëndimit”
Shtetet e Bashkuara kanë ndarë mbi 2.4 miliardë dollarë për rajonin e Ballkanit në dekadën e kaluar, ka thënë Escobar.
Sipas tij, Moska dhe Pekini vazhdimisht kundërshtojnë integrimin perëndimor të rajonit përmes dezinformatave dhe duke shfrytëzuar dobësitë e këtyre vendeve.
“Rusia është duke i përdorur si armë furnizimet me energji, për të nxitur korrupsionn dhe për të penguar potencialin e rritjes. Republika Popullore e Kinës është duke punuar po ashtu për të zgjeruar ndikimin përmes infrastrukturës dhe detyrimeve ekonomike. Nuk mund t’i lëmë të kenë sukses”, ka thënë mes tjerash Escobar.
Përfshirja e Ballkanit Perëndimor në programin e sanksioneve
Kongresisti Bill Keating, njëherësh udhëheqës i Nën-Komitetit për Evropë, Energji dhe Ambient, e ka konsideruar rajonin e Ballkanit Perëndimor me rëndësi gjeo-strategjike dhe tejet të rëndësishëm për stabilitetin e Evropës.
Megjithatë, Keating ka thënë se dhe duhet bërë punë në këtë rajon.
Ai ka thënë se mbështet përpjekjet e presidentit Biden për të luftuar korrupsionin në rajon, përmes përfshirjes së Ballkanit Perëndimor në programin e sanksioneve në qershor të këtij viti, dhe se ata që destabilizojnë rajonin dhe keqpërdorin fondet publike duhet të mbahen përgjegjës.
Më 19 maj 2021, Departamenti amerikan i Shtetit, u ka ndaluar hyrjen në territorin amerikan ish-presidentit dhe ish-kryeministrit të Shqipërisë, Sali Berisha dhe anëtarëve të familjes së tij të ngushtë, për shkak të përfshirjes së tij në korrupsion të gjerë.
Në deklaratën e Sekretarit amerikan të Shtetit, Antony Blinken, është thënë se Berisha, në cilësinë e tij zyrtare, në veçanti si kryeministër i Shqipërisë, ka qenë i përfshirë në veprime korruptive, të tilla si shpërdorim i fondeve publike dhe ndërhyrje në proceset publike.
Berisha ka thënë se akuzat e ngritura ndaj tij janë “shpifje publike” dhe ka dorëzuar padi në Gjykatën Korreksionale të Parisit ndaj Sekretarit Blinken.
Presidenti amerikan, Joe Biden, tha se Shtetet e Bashkuara do t’i dilnin në mbrojtje Tajvanit, nëse ai sulmohet nga Kina.
“Po, jemi zotuar për këtë”, tha Biden në një takim me qytetarë, që u transmetua drejtpërdrejt nga rrjeti televiziv CNN.
Deklarata e tij është në kundërshtim me politikën afatgjate të SHBA-së për ta ndihmuar Tajvanin në ndërtimin e mbrojtjes së tij, por jo për ta ndihmuar atë ushtarakisht në një konflikt të mundshëm.
Deklarata po ashtu vjen më pak se dy muaj pas tërheqjes së SHBA-së nga Afganistani. SHBA-ja ka qenë 20 vjet e angazhuar ushtarakisht në këtë vend.
Presidenti iu përgjigj një anëtari të audiencës, i cili pyeti nëse Shtetet e Bashkuara do të jenë në gjendje të vazhdojnë të përballojnë zhvillimin e shpejtë ushtarak të Kinës.
“Mos u shqetësoni nëse ata do të jenë më të fuqishëm. Kina, Rusia dhe pjesa tjetër e botës e dinë që ne kemi ushtrinë më të fuqishme në historinë e botës”, tha Biden.
“Unë dua që Kina ta kuptojë se ne nuk do të tërhiqemi”, tha presidenti, për të shtuar se ai nuk do që të nisë Luftë të re të Ftohtë me Kinën.
Megjithatë, një zëdhënës i Shtëpisë së Bardhë tha më vonë se Biden nuk ka shpallur ndonjë ndryshim të politikës amerikane dhe se nuk ka një ndryshim të tillë.
“Marrëdhënia e mbrojtjes e SHBA-së me Tajvanin udhëhiqet nga Akti i Marrëdhënieve me Tajvanin. Ne do të vazhdojmë përkushtimin tonë sipas Aktit, do të vazhdojmë të mbështesim vetëmbrojtjen e Tajvanit dhe do të vazhdojmë të kundërshtojmë çdo ndryshim të njëanshëm të status quo-së”, tha zëdhënësi.
Tajvani do ta mbrojë veten, tha zëdhënësi i zyrës presidenciale, Xavier Chang, në përgjigje të deklaratës së Bidenit.
Tensionet midis Tajvanit dhe Kinës janë rritur kohëve të fundit, sidomos për shkak të inkursioneve kineze në zonën e mbrojtjes ajrore të Tajvanit.
Tajvani e konsideron veten shtet sovran, por Kina e sheh atë si provincë të shkëputur. Pekini nuk e ka përjashtuar mundësinë e përdorimit të forcës për të arritur bashkimin.
Ministri i Mbrojtjes i Tajvanit, Chiu Kuo-cheng, tha në fillim të këtij muaji se marrëdhëniet midis Tajvanit dhe Kinës janë në nivelin më të keq të tyre në më shumë se 40 vjet. Ai parashikoi se Kina do të jetë në gjendje ta pushtojë Tajvanin deri në vitin 2025.
Kina thotë se Tajvani është çështja më e ndjeshme dhe më e rëndësishme në lidhjet e saj me Shtetet e Bashkuara dhe ka dënuar, siç ka thënë, “bashkëpunimin e fshehtë” midis Uashingtonit dhe Taipeit.
Duke folur për gazetarët këtë javë, ambasadori i Kinës në Kombet e Bashkuara, Zhang Jun, tha se Kina ndjek një “ribashkim paqësor” me Tajvanin, derisa u përgjigjet “përpjekjeve separatiste” të Partisë së tij Demokratike Progresive.
“Ne nuk jemi ngatërrestarë. Përkundrazi, disa vende – SHBA-ja në veçanti – po ndërmarrin veprime të rrezikshme, duke e çuar situatën në Ngushticën e Tajvanit në një drejtim të rrezikshëm”, tha ai.
Biden dhe presidenti i Kinës, Xi Jinping, pritet të mbajnë një takim virtual në fund të vitit.
Zyrtarët e Shtëpisë së Bardhë thonë se besojnë se angazhimi i drejtpërdrejtë me Xinë është mënyra më e mirë për të parandaluar përkeqësimin e mëtejshëm të marrëdhënieve midis dy ekonomive më të mëdha në botë.
Ish -presidenti amerikan Donald Trump tha të mërkurën se po hap një kompani mediatike me një platformë mediash sociale.
Zoti Trump e bëri njoftimin në një deklaratë për shtyp nëntë muaj pasi Twitter dhe Facebook e ndaluan atë nga platformat e tyre për shkak të nxitjes së kryengritjes ndaj Kapitolit më 6 janar.
Ish-presidenti tha se po krijon Grupin Trump për Media dhe Teknologji dhe aplikacionin “Truth Social” për të rivalizuar kompanitë e mëdha teknologjike që i kanë mohuar atij qasjen tek miliona vetë.
Kompania tha se aplikacioni i saj pritet të prezantohet këtë muaj dhe në fillim të vitit të ardhshëm të hidhet në qarkullim në shkallë vendi. Kompania tha gjithashtu se do të krijojë një shërbim televiziv me abonim me lajme, podkaste dhe programe argëtuese.
“DWA”, një firmë me qendër në Majami, mblodhi 287.5 milionë dollarë në një ofertë publike fillestare më 8 shtator për të financuar kompaninë e re./VOA
Gazetari i njohur amerikan, Matt Palumbo ka publikuar një investigim në portalin e konservatorëve amerikane, Bongino, ku zbulon lidhjet e forta të Sekretarit të Shtetit, Antony Blinken me miliarderin kontrovers, George Soros.
Ky investigim zbulon edhe arsyen e vërtetë se përse Sali Berisha u shpall ‘non grata’ nga Blinken. Në shkrim thuhet se nuk ka është ofruar asnjë fakt për këtë vendim, ndërkohë që theksohet se ai është bazuar mbi dizinformacione nga mediat e përkrahura nga Soros.
Por konstatimi bombastik i këtij investigimi është se ‘faktet’ për korrupsionin e Berishës i janë dërguar Departamentit të Shtetit nga ish-bashkëshortja e Edi Ramës dhe bashkëshortja aktuale e ministrit Bledi Çuçi, Delina Dico.
“Përgjegjës për dhënien e fakteve mbi korrupsionin e supozuar të Berishës Departamentit të Shtetit është Instituti i Menaxhimit Lindje-Perëndim – ewmi.org/. Instituti drejtohet nga një grua e quajtur Delina Fico, e cila është Drejtore e Shoqërisë Civile. Instituti i Menaxhimit Lindje-Perëndim është një nga dy grupet e krijuar nga Soros (tjetri është Universiteti i Evropës Qendrore). Fico dikur ka qenë e fejuar me kryeministrin socialist Edi Rama dhe më pas u martua me Bledi Çuçin, një nga aleatët e ngushtë të Ramës,” thuhet në investigim.
“Me sa duket, Blinken nuk mund të flasë në emër të askujt tjetër në Departamentin e Shtetit kur bie fjala për lidhjet e tyre me Soros, madje as në emër të vetë babait të tij. I ati i Antony, Donald Blinken, dhe gruaja e tij Vera financuan Arkivat e Shoqërisë së Hapur Vera & Donald Blinken në Universitetin e Evropës Qendrore (ECU), e cila përmban një koleksion dixhital të dokumenteve historike hungareze.
Në një raport të Soros Foundations Network më 2002, babai i Blinken renditet i treti në listën e Bordit të të Besuarve, pas kryetarit Soros dhe Aryeh Neier. Donald Blinken ka qenë Ambasador i SHBA në Hungari nga 1994 deri më 1998, pikërisht kur Soros po përgatiste terrenin atje, dhe ai e gruaja e tij kishin lidhje të ngushta me qeverinë socialiste”./Syri.net
PM, Edi Rama, Delina Fico dhe Bledi Çuçi, ministri i qeverive të Edi Ramës
Ish-Presidenti i Shteteve të Bashkuara të Amerikës Bill Clinton dha një azhurnim të gjendjes së tij shëndetësore të mërkurën, duke thënë në një video të postuar në Twitter se ai është “në rrugën e rimëkëmbjes”.
Në video, Clinton falënderoi dashamirësit e tij dhe punonjësit e kujdesit shëndetësor për mbështetjen e tyre ndërsa ai ishte shtruar në spital (University of California, Irvine Medical Center for sepsis).
“Jam vërtet i lumtur që jam kthyer në shtëpi. Unë ndihem mirë, duke shijuar këtë mot të bukur vjeshte. Jam në rrugën e rimëkëmbjes, por dua t’i kujtoj të gjithëve atje jashtë që të marrin kohë për të dëgjuar trupin e tyre dhe kujdesuni për veten”, tha Clinton.
“Ne të gjithë kemi punë për të bërë dhe secili prej nesh ka një rol të rëndësishëm për të luajtur në jetë dhe në të ardhmen e afërt. Unë, për shembull, do të bëj çmos që të jem rreth e rrotull, të vazhdoj të bëj më të mirën që mundem për një kohë shumë më gjatë”, shtoi ai.
Kur u njoftua shtrimi në spital i Clinton javën e kaluar, mjekët e tij Alpesh Amin dhe Lisa Bardack thanë se ai ishte përgjigjur mirë ndaj antibiotikëve.
“Pas dy ditësh trajtimi, numri i rruazave të bardha të gjakut po zvogëlohet dhe ai po i përgjigjet mirë antibiotikëve”, shtuan ata. “Ekipi mjekësor me bazë në Kaliforni ka qenë në komunikim të vazhdueshëm me ekipin mjekësor të Presidentit në Nju Jork, përfshirë kardiologun e tij. Shpresojmë që ai të kthehet në shtëpi së shpejti”, thanë ata në atë kohë.
Ish-presidenti e la spitalin të dielen, dhe mjeku i tij Amin tha se Clinton, 75 vjeç, do të përfundonte trajtimin e tij të antibiotikëve në shtëpi në Nju Jork.
UASHINGTON – Agjentët federalë zhvilluan “aktivitet për zbatimin e ligjit” të martën në rezidencën në Uashington të oligarkut rus Oleg Deripaska, një aleat i ngushtë i Presidentit rus Vladimit Putin.
Agjentët zhvilluan “një aktivitet për zbatimin e ligjit të autorizuar nga gjykata”, tha një zëdhënës i FBI-së. Zyrtarë nuk ofruan informacione të mëtejshme për rrethanat e prezencës së tyre, apo ndonjë informacion për hetime të mundshme ku mund të përfshihet zoti Deripaska.
Shtetasi i pasur rus që e ngriti pasurinë nëpërmjet biznesit të aluminit, është një aleat i ngushtë i zotit Putin dhe u përmend disa herë në raportin e prokurorit të posaçëm Robert Mueller për ndërhyrjen në zgjedhjet presidenciale të vitit 2016.
Oleg Deripaska ecën së bashku me Presidentin Putin pas një takimi ndërkombëtar në vitin 2017
Zoti Deripaska mbante lidhje edhe me Paul Manafortin, ish-drejtori i fushatës elektorale të ish-Presidentit Trump, i cili u gjet fajtor për tetë krime financiare në kuadrin e hetimeve të Prokurorit Mueller. Zotit Manafort iu dha më vonë falja nga Presidenti i atëhershëm Trump.
Gjatë administratës së ish-Presidentit Trump, Departamenti i Thesarit kishte hequr gjithashtu sanksionet financiare ndaj tre kompanive të lidhura me zotin Deripaska. Zyrtarët thanë në atë kohë se kishin vepruar kështu pasi aksionet e drejtpërdrejta dhe indirekte të zotit Deripaska në këto kompani ishin zvogëluar deri në pikën që ai nuk kishte më kontroll mbi to. VOA
VOAL – Gjenerali Colin Powell, ish -sekretari amerikan i shtetit, vdiq në moshën 84 -vjeçare. Komplikimet që u shfaqën pas kontaktimit të Covid-19 shkaktuan vdekjen e tij, shkruhej të hënën, në faqen e tij në Facebook. Powell ishte sekretar shteti nga 2001 deri në 2005, nën administrimin e George W. Bush.
Powell ishte i pari afrikano -amerikan që mbante postin e shefit të shtabit të ushtrisë amerikane dhe atë të shefit të diplomacisë amerikane. “Ne kemi humbur një burrë, baba, gjysh dhe një amerikan të jashtëzakonshëm,” shkroi familja në Facebook, duke vënë në dukje se ai ishte i vaksinuar plotësisht. rsi-eb
Ish-presidenti amerikan Bill Clinton pritet të dalë sot nga spitali, njoftoi të shtunën zëdhënësi i tij, transmeton Anadolu Agency (AA).
Angel Urena tha se Clinton “ka vazhduar të bëjë përparim të shkëlqyeshëm” gjatë 24 orëve të fundit. Ai u pranua në Qendrën Mjekësore Irvine të Universitetit të Kalifornisë për të marrë trajtim për një infeksion të martën.
“Ai do të qëndrojë gjatë natës në Qendrën Mjekësore UC Irvine për të vazhduar të marrë antibiotikë IV para daljes së pritshme nesër”, tha Urena në një deklaratë.
Zëdhënësi tha se Clinton është në “disponim të mirë” dhe po kalon kohën me familjen e tij, duke takuar miqtë dhe duke parë futboll në kolegj.
Ish-presidenti “mezi pret të kthehet në shtëpi shumë shpejt”, shtoi ai.
“Pas dy ditëve të trajtimit, numri i qelizave të bardha të gjakut po zvogëlohet dhe ai po u përgjigjet mirë antibiotikëve”, thuhej në deklaratën e Dr. Alpesh Amin dhe Dr. Lisa Bardack që u publikua të enjten.
VOAL – Do të quhet “Legacy Tower” (“Kulla e Trashëgimisë”), do të ketë 55 kate dhe do të kushtojë rreth 460 milionë franga. Në shtetin e Floridës, puna sapo ka filluar për të ndërtuar një nga ndërtesat e para pandemike në botë. Një kullë e futur në një kompleks ndërtimi të gjerë që do të përfshijë mbi 300 apartamente luksoze, por edhe qindra dhoma hoteli dhe shërbime mjekësore të shpërndara në dhjetë kate.
“Projekti lindi para ardhjes së koronavirusit,” thotë Daniel Kodsi, CEO i Legacy Miami Worldcenter, “por më pas e përshtatëm atë. Përveç shërbimeve mjekësore, kemi shtuar pjesën e hotelit dhe më pas kemi shtuar shumë veçori për të siguruar mirëqenien e banorëve ”.
Kulla do të ketë një sistem të veçantë ventilimi dhe do të përdoren materiale antimikrobike. Sidoqoftë, do të ketë gjithashtu robotë të aftë për të vrarë bakteret dhe shumë pajisje që do të punojnë pa kontakt, për shembull për të thirrur ashensorin dhe për të hapur dyert. rsi-eb
Dhoma e Përfaqësuesve të SHBA-së të martën miratoi projekt-ligjin që do të rrisë përkohësisht kufirin e borxhit me 480 miliardë dollarë deri në fillim të dhjetorit, transmeton Anadolu Agency (AA).
Duke shmangur një dështim të mundshëm, legjislacioni u miratua sipas linjave partiake me 219 vota ‘për’ dhe 206 ‘kundër’. Tani projekt ligji shkon tek presidenti Joe Biden, i cili pritet ta nënshkruajë atë.
Javën e kaluar, Senati miratoi një rritje afatshkurtër të kufirit të borxhit federal në një votim 50 ‘për’ dhe 48 ‘kundër’ pas diskutimeve disa javore.
Të dielën, Sekretarja e Thesarit, Janet Yellen paralajmëroi për një “sasi të madhe” nëse Kongresi nuk arrin të bëjë një marrëveshje tjetër.
“Një dështim për të rritur kufirin e borxhit ndoshta do të shkaktonte një recesion dhe madje mund të rezultonte në një krizë financiare. Do të ishte një katastrofë”, tha Yellen në programin “This Week” të ABC.
Sipas demokratëve, ngritja e kufirit të borxhit është një përgjegjësi dypartiake dhe republikanët duhet ta favorizojnë atë pasi përfshin shpenzimet që burojnë nga administrata e ish-presidentit Donald Trump.
Sekretari amerikan i Shtetit Antony Blinken po shkon në Paris, udhëtimi i tij i parë në Francë pas krijimit të një partneriteti të zgjeruar trepalësh të sigurisë mes Australisë, Britanisë së Madhe dhe Shteteve të Bashkuara (AUKUS) që rriti tensionet mes aleatëve transatlantikë.
Ekspertët thanë se presin që Sekretari Blinken, i cili ka lidhje të forta personale me Francën, të përdorë udhëtimin e ardhshëm për të përmirësuar marrëdhëniet SHBA-Francë.
Diplomati më i lartë amerikan do të kryesojë takimin e Këshillit Ministror të Organizatës për Bashkëpunimin Ekonomik dhe Zhvillimin që është planifikuar të mbahet më 5-6 tetor dhe do të përkujtojë 60 vjetorin e organizatës.
Sekretari Blinken do të ketë një takim dypalësh me Ministrin e Jashtëm Francez Jean-Yves Le Drian në Paris. Franca do të mbajë presidencën e Këshillit të Bashkimit Evropian nga 1 janari-30 qershor 2022.
“Sekretari Blinken gjithashtu do të takohet me homologët francezë për të vazhduar diskutimet mbi forcimin e mëtejshëm të marrëdhënieve vitale SHBA-Francë për një sërë çështjesh përfshirë sigurinë në rajonin Indo-Paqësor, krizën klimatike, rimëkëmbjen ekonomike nga pandemia COVID-19, marrëdhëniet transatlantike, dhe punën me aleatët dhe partnerët tanë për të adresuar sfidat dhe mundësitë globale”, tha Departamenti i Shtetit në një deklaratë të premten.
Tensionet mbi marrëveshjen AUKUS
Administrata e Presidentit amerikan Joe Biden njoftoi më 15 shtator një pakt të ri sigurie me Australinë dhe Britaninë e Madhe. Sipas marrëveshjes, Australia do të marrë të paktën tetë nëndetëse me energji bërthamore që do të ndërtohen në vend duke përdorur teknologjinë amerikane. Marrëveshja erdhi pasi Australia u tërhoq nga një marrëveshje e mëparshme me Francën për nëndetëset me naftë, duke zemëruar Parisin.
Franca tërhoqi ambasadorët e saj në SHBA dhe në Australi brenda dy ditëve pas njoftimit. Ministri Le Drian deklaroi se ka një “krizë besimi” tek Shtetet e Bashkuara.
Pas një telefonate mes Presidentit Biden dhe Presidentit Francez Emmanuel Macron më 22 shtator, që synonte të zbuste tensionet mbi marrëveshjen e nëndetëseve, të dy udhëheqësit vendosën të “hapnin një proces konsultimesh të thelluara” për të siguruar “besimin”. Macron gjithashtu vendosi që ambasadori francez Philippe Etienne të kthehej në Uashington javën pasuese.
Të enjten, këshilltari amerikan i sigurisë kombëtare Jake Sullivan u takua me ambasadorin Etienne në Shtëpinë e Bardhë për të “vazhduar përparimin e agjendës së përbashkët”, përpara takimit të Presidentit Biden me Macronin në Evropë në fund të tetorit. Të dy janë planifikuar të marrin pjesë në samitin e Grupit të 20-shes në Romë.
“Ne duhet të sigurohemi që besimi s’ka ndryshuar,” tha Karen Donfried, ndihmës sekretarja e shtetit për çështjet evropiane dhe euroaziatike, e sapo konfirmuar në këtë post.
Ndërsa marrëdhënia SHBA-Francë mbetet një marrëdhënie e rëndësishme për të dyja palët, James Goldgeier në Institutin Brookings me qendër në Uashington, tha se administrata Biden “duket se është befasuar pak nga reagimi i zemëruar francez” për marrëveshjen AUKUS.
“Është mirë që dy presidentët po kërkojnë mënyra për të ecur përpara. Nuk ka dyshim se administrata Biden e sheh Indo-Paqësorin si fokusin e saj kryesor. Politika e Shteteve të Bashkuara ndaj rajoneve si Evropa shihet përmes këtij këndvështrimi”, tha për Zërin e Amerikës zoti Goldgeier.
Departamenti i Shtetit tha në një deklaratë se delegacioni amerikan në takimin ministerial të OECD-së përfshin gjithashtu të Dërguarin Special të Presidentit për Klimën John Kerry dhe Përfaqësuesen amerikane të Tregtisë Katherine Tai.
Linja ajrore amerikane United Airlines njoftoi se ka nisur procedurat për të përjashtuar nga puna 593 punonjës të cilët kanë refuzuar të vaksinohen kundër koronavirusit (COVID-19), transmeton Anadolu Agency (AA).
Në një e-mail nga drejtuesit e kompanisë drejtuar punonjësve thuhet se ky ishte një vendim jashtëzakonisht i vështirë, por që ata duhej të garantonin sigurinë e ekipeve të tyre.
United Airlines, kompania kryesore ajrore në SHBA, e cila e ka bërë të detyrueshme që të gjithë punonjësit e saj në vend të vaksinohen kundër COVID-19, gjithashtu deklaroi se e kanë shtyrë planin për pushime të papaguara nga 2 tetori në 15 tetor për shkak të një padie në vazhdim.
Kompania me mbi 67 mijë punonjës tha se 99 për qind e punonjësve tashmë kanë përfunduar vaksinimin, duke shtuar se personat që do të përjashtohen nga puna përbëjnë 1 për qind.
Në fillim të gushtit, United Airlines vendosi të pushojë punonjësit e pavaksinuar, më së voni deri në pesë javë pasi vaksina mori miratimin e plotë nga Administrata Amerikane e Ushqimit dhe Barnave (FDA).
Zyrtarë të lartë të ushtrisë amerikane po vazhdojnë sot të japin dëshmi në Kongres mbi tërheqjen dhe evakuimin e ushtrisë amerikane nga Afganistani. Në seancën e djeshme në Senat, gjenerali Mark Milley e cilësoi evakuimin si “një sukses logjistik, por edhe si një dështim strategjik”.
Gjenerali i lartë amerikan të martën e vlerësoi prerazi misionin e evakuimit në Afganistan …
“Ishte një sukses logjistik, por një dështim strategjik”.
Ndërsa për përfundimin e luftës në përgjithësi….
“Një dështim strategjik. Armiku është në krye të Kabulit. Nuk ka asnjë mënyrë tjetër për ta përshkruar – kjo është pasojë e gabimeve të akumuluara në 20 vjeteve, jo 20 ditë”.
Gjenerali Milley, së bashku me shefin e Komandës Qendrore, Gjeneral Frank McKenzie, thanë se ata personalisht kishin kërkuar që të mbaheshin minimumi 2.500 trupa në Afganistan.
“Vlerësimi im daton në vjeshtën e 2020-ës dhe mbeti i pandryshuar gjatë gjithë kohës. Ne duhet të mbanim një prani të qëndrueshme prej 2.500 trupash, që mund të shkonte deri në 3.500, për të shkuar më pas drejt një zgjidhjeje të negociuar”, tha general Milley.
“Unë rekomandova që të mbanim 2,500 trupa në Afganistan. Dhe gjithashtu rekomandova më herët në vjeshtën e vitit 2020 që të mbanim 4.500 në atë kohë. Këto janë pikëpamjet e mia personale. Unë gjithashtu kisha mendimin se tërheqja e atyre forcave do të çonte në mënyrë të pashmangshme në kolapsin e forcave ushtarake afgane dhe përfundimisht të qeverisë afgane”, tha gjenerali Frank McKenzie.
Pohimet e gjeneralëve ishin në kontrast me ato të Presidentit Joe Biden, i cili ka thënë se nuk i kujtohej asnjë këshilltar i tij që e kishte nxitur të mbante një forcë të vogël ushtarake amerikane në Afganistan.
Shtëpia e Bardhë të martën mbrojti përsëri vendimin për të larguar të gjitha trupat nga Afganistani.
“Nëse do të kishim mbajtur 2,500 trupa atje, do të kishim rritur numrin e tyre, do të kishim luftuar me talebanët, do të kishim më shumë viktima. Ky ishte një realitet i qartë për të gjithë”, tha zëdhënësja Jen Psaki.
Si republikanët ashtu edhe demokratët kritikuan ashpër administratën që la pas amerikanë dhe aleatë afganë edhe pasi presidenti tha se nuk do ta bënte një gjë të tillë.
Ata gjithashtu bënë pyetje të mprehta mbi të ardhmen e luftës kundër terrorizmit atje.
A është bërë më e vështirë detyra e ushtrisë për të mposhtur kërcënimet terroriste nga Afganistani?, pyeti senatorja republikane Joni Ernst.
-Po, u përgjigj gjeneral Milley.
A kanë talebanët dhe partnerët e tyre terroristë më shumë aftësi për t’u stërvitur dhe përgatitur në Afganistan tani që jemi larguar?
Milley: Po.
“A jeni të sigurt se ne mund t’u mohojmë organizatave si al-Kaida dhe ISIS-i aftësinë për ta përdorur Afganistanin si bazë për aktivitetet terroriste?”, pyeti senatori demokrat Mark Kelly.
“Kjo mbetet ende për t’u parë”, u përgjigj gjenerali Frank McKenzie.
Ushtria është vënë nën kritika të ashpra për sulmin e saj të gabuar me dron në ditët e fundit të tërheqjes që vrau 10 civilë, një sulm për të cilin gjenerali McKenzie ka marrë përgjegjësinë.
Zyrtarët e lartë të mbrojtjes gjithashtu përsëritën faktin se inteligjenca amerikane kishte dështuar të parashikonte rënien e shpejtë të Kabulit.
Por në mësimet e nxjerra, ata kishin një mesazh për udhëheqësit civilë të Amerikës.
“Unë do të këshilloja çdo udhëheqës: Mos vendosni data të caktuara ose data përfundimi për operacionet. Bëjini gjërat të bazuara në kushtet në terren dhe tdy presidentë rradhazi [Trump dhe Biden] vendosën data të caktuara”, tha gjenerali Mark Milley.
…dhe për udhëheqësin e larguar afgan Ashraf Ghani.
“Kur presidenti i vendit largohet papritmas në mes të fushatës për të mbrojtur kryeqytetin, mendoj se i jep fund çdo shansi për të patur sukses”, tha gjenerali Frank McKenzie.
voal.ch – Gazeta prestigjioze zvicerane NZZ ka botuar sot një opinion nga Markus Ziener, Washington me titull “politikat e Biden po vënë në rrezik marrëdhëniet SHBA-Europë”. Autori shkruan se “SHBA duan që t’i forcojnë lidhjet me aleatët Europianë, por ata janë të zhgënjyer me Presidentin Biden. Më tutje autori në opinionin e tij në NZZ, nënvizon faktin se “Muaji i mjaltit i Europës me Joe Biden ishte jetëshkurtër. Tërheqja e nxituar e Amerikës nga Afganistani, pa u këshilluar me aleatët, i ka zemëruar liderët Europian. Për shembull, Biden do ta ketë të vështirë të gjejë mbështetje për qëndrimin e tij të ashpër ndaj Kinës, për shembull.”
“Kur Presidenti amerikan Joe Biden njoftoi në Konferencën e Sigurisë në Mynih në shkurt se “Amerika është kthyer”, psherëtima e lehtësimit ishte e dukshme. Pas katër vitesh të Donald Trump, të shënuar nga mosinteresimi në rastin më të mirë dhe shpesh nga shpërfillja e hapur për Evropën, kjo periudhë e ftohtë tani dukej se kishte marrë fund.
“Unë e di se vitet e fundit kanë tensionuar dhe testuar marrëdhënien tonë transatlantike,” u tha Biden pjesëmarrësve të konferencës në Mynih. Por ai tha se Shtetet e Bashkuara tani ishin të vendosura të ribashkoheshin me Evropën dhe se donin të rimerrnin pozicionin e tyre si një udhëheqës i besuar. Vëzhguesit ishin të prirur ta besonin fjalën e presidentit amerikan me këtë angazhim, duke ardhur nga dikush me një njohje kaq të thellë me marrëdhëniet trans-atlantike.
Kjo kishte ndodhur gjashtë muaj më parë. Ndërsa sot zhgënjimi ka zënë vend gjithnjë e më shumë. Shumë nga të dy anët e Atlantikut e kishin imagjinuar kthimin e Amerikës krejt ndryshe.
Sidoqoftë, është mënyra se si Shtetet e Bashkuara trajtuan tërheqjen nga Afganistani që është provuar të jetë një goditje më e madhe për marrëdhëniet trans-atlantike. Biden nuk ishte i gatshëm të rinegociojë marrëveshjen katastrofike të Dohas me talebanët që paraardhësi i tij arriti në shkurt 2020. Në këtë marrëveshje, Uashingtoni de facto kishte rënë dakord për një tërheqje të pakushtëzuar. Për më tepër, karakteri i tërheqjes së trupave amerikane u diktua nga Shtetet e Bashkuara, duke i lënë aleatët e saj të përballonin sa të mundnin.
Në një gjykim të gabuar të plotë të aftësisë luftarake të ushtrisë afgane, SHBA bëri një dalje të nxituar nga angazhimi 20-vjeçar në Afganistan që bëri që partnerët e NATO-s të dukeshin pak më shumë se shtojcat e Amerikës. Ndërsa vendet aleate kishin bërë vetë gabime të shumta, tërheqja kaotike në fund la një pasqyrë shkatërruese në vazhdën e saj. A thua se “Amerika është kthyer” – me të vërtetë?” (Source NZZ)/EB
I dërguari i posaçëm i SHBA për Haitin ka dhënë dorëheqjen, duke shkaktuar një ‘tërmet’ në vend
Daniel Foote ka publikuar një letër ku dënon trajtimin çnjerëzor që po u bëhet emigrantëve nga Haiti.
BBC, që e ka lajm të parë letrën, shkruan se akuzat e Foote janë bombastike.
Ai shkruan se Haiti është një shtet në kolaps, kurse SHBA vazhdon të deportojë emigrantët.
Pamjet e haitianëve në këto kampe të deportimit kanë tronditur botën dhe kanë sjellë kritika të forta ndaj administratës së Biden.
Në letrën e dorëheqjes që Foote ia dërgon kreut të Departamentit të Shtetit, Antony Blinken, thuhet Haiti është në gjendje katastrofike për shkak të ndërhyrjes së SHBA në punët e brendshme.
Sipas tij, amerikanët kanë deklaruar mbështetje për një kryeministër të pavotuar.
“Krenaria që na bën të besojmë se duhet të zgjedhim fituesin – përsëri – është mbresëlënëse. Ky cikël i ndërhyrjeve politike ndërkombëtare në Haiti ka prodhuar vazhdimisht rezultate katastrofike,” shkruan Foote.
Administrata e Presidentit Biden po përdor një politikë të debatueshme si bazë për dëbimin masiv të më shumë se 12,000 haitianëve që kanë mbërriur në kufirin jugor amerikan me Meksikën në përpjekje për të kërkuar azil.
Këta emigrantë haitianë janë me fat. Ata janë ndër të paktët që do të qëndrojnë në Shtetet e Bashkuara – tani për tani – ndërsa qeveria po dëbon shumicën e mbi 12,000 emigrantëve që kanë arritur në këtë pikë kufitare.
Mbështetësit thonë se duket se emigrantët më të rrezikuar nuk po dëbohen. Emigrantja hatitiane Micheline Bautiste tregon për Zërin e Amerikës përpjekjet për mbërritur në Shtetet e Bashkuara.
“Kaluam në këmbë kodra, lugina e lumenj. Ishte shumë e vështirë por falë Zotit jam këtu.”
Duke lënë djalin 13-vjeçar në Haiti, ajo jetoi në Kili për tre vjet duke shitur nëpër rrugë. Kur dëgjoi se njerëzit po shkonin në Shtetet e Bashkuara, ajo vendosi të nisej me ta.
E nisur nga Brazili, Mariange Verna eci për dy muaj. Gjashtë ditët e fundit nën urën që lidh Amerikën me Meksinën, thotë ajo, kanë qënë tejet të vështira.
“Në tre ditët e fundit kam ngrënë vetëm një herë.”
Guerline Jozef drejton grupin që mbështet migrantët “Aleanca e Urës Haitiane” me qendër në San Diego të Kalifornisë. Ajo shkoi në Teksas për të ndihmuar.
“Gratë po lindin nën urë – është e tmerrshme. Si një nënë, si një grua, si një haitiane, si një Amerikane, si një grua me ngjyrë, ajo që po shikoj është e papranueshme”.
Mbështetësit e emigracionit po e kritikojnë si diskriminues përdorimin nga ana e administratës Biden të një urdhri të debatueshëm shëndetësor të vendosur nga administrata Trump.
Urdhri mbështetet tek një ligj i shëndetit publik dhe lejon dëbimin e migrantëve si rezultat i pandemisë. Joseph Makhandal Champagne është avokat për çështjet e imigracionit.
“Urdhri po i jep qeverisë amerikane liri të plotë për t’i dëbuar ata njerëz pa dëgjuar kërkesat dhe lutjet e tyre”.
Administrata Biden po sfidon urdhërin e një gjykatësi federal për të ndaluar përdorimin e urdhrit për kthimin mbrapsht të familjeve me fëmijë. Urdhri përcakton një afat dyjavor për veprimin e administratës. Sekretarja e shtypit Jen Psaki shprehu qendrimin e Shtëpisë së Bardhë.
“Kemi thënë se kjo nuk është koha për të ardhur. Nuk bëhet fjalë vetëm për njerëzit në Shtetet e Bashkuara, por edhe për mbrojtjen e migrantëve që do të vinin në grupe masive”.
Disa thonë se urdhëri po përdoret në mënyrë selektive. Profesoresha e drejtësisë në Universitetin Vanderbilt, Karla McKanders thotë se kohët e fundit disa migrantëve venezuelianë u është lejuar intervista për azil. Ajo foli me Zërin e Amerikës përmes rrjetit Zoom.
“Njerëzit po pyesin se pse shtetasit haitianë nuk kanë të njëjtën të drejtë.”
Pamjet befasuese të punonjësve të kufirit mbi kuaj shkaktuan kritika. Një zëdhënës i administratës Biden ka thënë se kjo është e papranueshme dhe se autoritetet do të zhvillojnë hetime. Imazhet janë veçanërisht të dhimbshme duke pasur parasysh historinë racore të Shteteve të Bashkuara, thotë zonja Guerline Jozef me organizatën “Haitian Bridge Alliance”
“Njerëz mbi kuaj që përpiqen të kapin njerëzit me ngjyrë në kufi, kjo nuk është barazi racore.”
Ndërsa ky grup i vogël ishte në gjendje të qëndronte në Shtetet e Bashkuara tani për tani, shumë të tjerë po kthehen atje nga janë nisur.
Disa orë pas debutimit të Joe Biden para Asamblesë së Përgjithshme të Kombeve të Bashkuara, një rast vë në siklet administratën e tij, politikën e tij të migracionit dhe në veçanti ministrin Alejandro Mayorkas, ndër të tjera bir i refugjatëve Kubanë: janë ato fotografi të lëshuara nga media në SHBA që tregojnë oficerët e policisë kufitare mbi kalë duke përdorur kamxhikun për të larguar emigrantët në kufirin meksikan pranë Del Rio, Teksas.
Një krizë e re humanitare është duke u zhvilluar atje, me ardhjen e mbi 10.000 njerëzve, kryesisht haitianë.
Sipas Mayorkas, rreth 4,000 prej tyre të pastrehë u transferuan në strehimore.
Imazhe “të tmerrshme për t’u parë”, pranoi zëdhënësja e Shtëpisë së Bardhë, Jen Psaki.
“Unë kam parë vetëm disa, por nuk e kam kontekstin e plotë, por nuk mund ta imagjinoj se çfarë konteksti do t’i bënte ata të përshtatshëm,” tha ajo.
Reagimet erdhën gjithashtu nga disa parlamentarë demokratë.
Sekretari i Shtetit Anthony Blinken diskutoi situatën të hënën me kryeministrin Haitian Ariel Henry dhe homologun e tij meksikan Marcelo Ebrard.
Sipas Mayorkas, haitianët kanë marrë informacion të rremë në lidhje me mundësinë e qëndrimit në Shtetet e Bashkuara, pasi “kufijtë nuk janë të hapur dhe ata do të riatdhesohen”./RSI.ch/eb
Shtëpia e Bardhë ka reaguar pas vendimit të Francës për ta tërhequr ambasadorin nga Uashingtoni për shkak të pakënaqësisë së Parisit rreh një pakti trepalësh të ShBA-së me Britaninë e Madhe e Australinë.
Një zyrtar i Shtëpisë së Bardhë tha të premten se Shtetet e Bashkuara shprehin keqardhje për vendimin e Francës për tërheqjen e ambasadorit dhe do të vazhdojnë që të angazhohen në ditët në vijim për t’i zgjidhur dallimet mes dy shteteve, shkruan Reuters, transmeton Gazeta Express.
Franca i tërhoqi ambasadorët nga Shtetet e Bashkuara dhe Australia, pasi kjo e fundit bëri marrëveshje me Britaninë e Madhe dhe ShBA-në për prodhimin e nëndetëseve me energji bërthamore.
Ky pakt i dha fund marrëveshjes që Australia e kishte nënshkruar më parë me një kompani franceze për të njëjtin qëllim. Vlera e marrëveshjes ishte 40 miliardë dollarë.
Ministri i Jashtëm i Francës, Jean-Yves Le Drian, pas marrëveshjes e krahasoi presidentin amerikan, Joe Biden, me paraardhësin e tij, Donald Trump, dhe tha se pakti trepalësh është “thikë pas shpine” për Francën, vendim absurd dhe i njëanshëm.
Në anën tjetër, Shtetet e Bashkuara janë munduar që ta zbusin zemërimin e Francës. Sekretari amerikan i Shtetit, Anthony Blinken, tha se Franca mbetet partnere jetike në rajonin e Indiano-Paqësorit.
Një sulm me dron i kryer gjatë orëve të fundit të evakuimit të Shteteve të Bashkuara nga Afganistani nuk vrau një terrorist të prirur për të sulmuar aeroportin ndërkombëtar në Kabul, dhe në vend të tij vrau deri në 10 civilë, përfshirë një punonjës të ndihmave dhe shtatë fëmijë.
Pranimi i së premtes nga komandanti i trupave amerikane në rajon pasoi një hetim ushtarak të nxitur nga pretendimet e njerëzve në terren, si dhe njoftimet e mediave, se objektivi i goditur më 29 gusht nga një raketë e llojit Hellfire nuk përbënte një kërcënim.
“Kjo goditje u ndërmor me besimin e sinqertë se do të parandalonte një kërcënim të menjëhershëm për forcat tona dhe personat që po evakuoheshin në aeroport”, u tha gazetarëve në Pentagon gjenerali Kenneth “Frank” McKenzie, komandanti i Komandës Qendrore të Shteteve të Bashkuara, nëpërmjet një lidhjeje videofonike. “Hetimi ynë tani arriti në përfundimin se goditja ishte një gabim tragjik”, tha ai.
“Ne tani vlerësojmë se nuk ka gjasa që automjeti ose ata që vdiqën të ishin të lidhur me ISIS-K”, shtoi Mckenzie, duke përdorur një akronim për filialin e grupit terrorist të Shtetit Islamik në Afganistan, i njohur gjithashtu si IS-Khorasan.
Sekretari amerikan i Mbrojtjes Lloyd Austin gjithashtu kërkoi falje për sulmin e gabuar.
Lloyd Austin
“Në emër të burrave dhe grave të Departamentit të Mbrojtjes, unë shpreh ngushëllimet e mia më të thella për anëtarët e familjeve të atyre që u vranë”, tha Sekretari Austin në një deklaratë. “Ne kërkojmë ndjesë dhe ne do të përpiqemi të mësojmë nga ky gabim i tmerrshëm”.
Ndjesa është një kthesë dramatike për ushtrinë amerikane, e cila ka mbrojtur sulmin ajror prej javësh të tëra.
Vetëm disa ditë pas sulmit, oficeri ushtarak më i lartë amerikan, Shefi i Shtabit të Përgjithshëm, Mark Milley, e mbrojti sulmin si “të drejtë”.
“Ne e dimë nga një sërë mjetesh të tjera se të paktën një nga ata njerëz që u vranë ishte një koordinator i ISIS-it”, u tha zoti Milley gazetarëve në Pentagon më 1 shtator. “Procedurat u ndoqën në mënyrë korrekte”.
Edhe atëherë, rrëfimet nga terreni po tregonin një histori të ndryshme – se në vend që të vriste një koordinator të IS-Khorasan, sulmi amerikan me dron në fakt kishte hedhur në erë Ezmarai Ahmadin, një punonjës ndihmash në organizatën Nutrition and Education International me qendër në Kaliforni, i cili kishte aplikuar për t’u zhvendosur në Shtetet e Bashkuara.
Anëtarët e familjes thanë se viktimat e tjera përfshinin vajzën e Ahmadit, si dhe nipërit dhe mbesat.
Hetime të tjera nga gazetat The New York Times dhe The Washington Post hodhën dyshime të mëtejshme ndaj qëndrimit amerikan se goditja kishte eliminuar një terrorist të grupit IS-Khorasan.
Hetimi i gazetës Times përcaktoi se makina, një Toyota Corolla e bardhë, për të cilën zyrtarët amerikanë menduan se ishte e mbushur me eksploziv, në të vërtetë mbante kanistra uji. Dhe ndalesat e dyshimta që kishte bërë Ahmadi ndërsa Shtetet e Bashkuara e vëzhgonin nga qielli, ishin ndalesa për të marrë kolegë dhe për të bërë furnizime me ujë.
“Ne nuk e ndërmorëm goditjen sepse menduam se kishim gabuar. E bëmë goditjen sepse menduam se kishim një objektiv të mirë”, tha Gjenerali McKenzie i Komandës Qendrore (CENTCOM) të premten, duke vënë në dukje atë që ai tha se ishin “mbi 60 raporte të nivelit shumë të lartë për kërcënimin e afërt për forcat tona në Kabul dhe përreth tij”, shumë prej tyre të përqëndruara tek përdorimi i një makine Toyota Corolla të bardhë.
“Është e qartë se të dhënat tona të zbulimit ishin gabuar me këtë Toyota Corollan e bardhë në fjalë”, tha ai.
Zyrtarët ushtarakë amerikanë thanë se ata ende besojnë se kishte një komplot të IS-Khorasan për të sulmuar aeroportin me atë lloj makine nga një nga vendet ku u pa Toyota e Ahmadit. Por, ata tani besojnë se sulmi mund të jetë ndërprerë nga një sulm ajror amerikan ditë më parë që kishte në shënjestër operativët e grupit terrorist në provincën Nangarhar.
McKenzie tha se Shtetet e Bashkuara tani po shikojnë të bëjnë të ashtuquajturat pagesa ex gratia për anëtarët e familjeve që mbijetuan, megjithëse ai pranoi se dorëzimi i dëmshpërblimeve mund të ishte i vështirë pa një prani të Shteteve të Bashkuara në terren.
Komandanti i CENTCOM-it nuk pranoi të thoshte nëse do të ndërmerrej ndonjë masë disiplinore kundër atyre të përfshirë në kryerjen e goditjes, duke thënë se përgjegjësia përfundimtare i takonte atij.
Stema e Komandës Qendrore (CENTCOM)
Organizatat për të drejtat e njeriut po kërkojnë më shumë.
“Shtetet e Bashkuara tani duhet të angazhohen për një hetim të plotë, transparent dhe të paanshëm për këtë incident”, tha Brian Castner, një këshilltar i lartë për krizat në Amnesty International.
“Kushdo që dyshohet për përgjegjësi penale duhet të ndiqet penalisht në një porces të drejtë gjyqësor”, tha zoti Castner në një deklaratë zyrtare. “Të mbijetuarit dhe familjet e viktimave duhet të mbahen të informuar për përparimin e hetimit dhe të marrin dëmshpërblim të plotë”.
Unioni Amerikan i Lirive Civile (ACLU) tha se sulmi me dron në Kabul duhet të jetë “një thirrje zgjimi”.
“Në këtë goditje, ne shohim jehonën e shumë jetëve të tjera civile të humbura dhe të dëmtuara rëndë, qoftë në luftëra si në Afganistan, apo jashtë tyre, si p.sh. në Somali”, tha Hina Shamsi nga ACLU në një deklaratë.
Disa ligjvënës amerikanë po bëjnë thirrje që të bëhet më shumë.
“Departamenti i Mbrojtjes ka hedhur hapin e parë drejt transparencës dhe llogaridhënies”, tha Ligjvënësi Adam Schiff, kryetar i Komisionit të Zbulimit të Dhomës së Përfaqësuesve, në një deklaratë me shkrim. Ai e quajti sulmin vdekjeprurës me dron “një dështim shkatërrues”.
“Ne duhet të dimë se çfarë shkoi keq në orët dhe minutat para fillimit të goditjes për të parandaluar tragjedi të ngjashme në të ardhmen”, shtoi ai.
“Komisioni i Forcave të Armatosura do të dëgjojë nga zyrtarët e administratës në javët në vijim për tërheqjen kaotike dhe vdekjeprurëse nga Afganistani”, tha senatori James Inhofe, anëtar i lartë i komisionit, në një deklaratë me shkrim.
“Goditja e 29 gushtit tregon se sa të vështira dhe komplekse mund të jenë operacionet kundër terrorizmit, dhe për fat të keq nënvizon se një strategji e llojit ‘mbi horizont’ vetëm do të rrisë kompleksitetin dhe vështirësinë”, tha ai.
Ekzistojnë gjithashtu pikëpyetje në lidhje me të ardhmen e çdo sulmi amerikan kundër terrorizmit në Afganistan, kundër grupeve si IS-Khorasan ose al-Kaida, të cilat tani për tani do të kryheshin “mbi-horizont” – nga bazat amerikane që gjenden orë larg në Lindjen e Mesme.
Por McKenzie tha se rregullat e përfshirjes për sulme të tilla ajrore do të ishin të ndryshme.
Gjenerali Kenneth McKenzie
“Ne do të kemi shumë më tepër mundësi se sa kishim nën këtë presion ekstrem kohor për t’i hedhur një sy objektivit … për ta studiuar objektivin me platforma të shumta për të pasur një mundësi për të zhvilluar modelin e zgjatur të jetesës”, tha ai. “Asnjë nga këto gjëra nuk ishte në dispozicion për ne duke pasur parasysh natyrën urgjente dhe të ngutshme të kërcënimit të menjëhershëm për forcat tona.”
Komandanti amerikan tha gjithashtu se përkundër garancive dhe angazhimeve të tyre të përsëritura, talebanët kishin bërë pak për të ndihmuar evakuimin, përveç krijimit të një perimetri të jashtëm të sigurisë rreth aeroportit të Kabulit, i cili “gjithashtu i lejoi ata të kontrollonin njerëzit që përndryshe do të kishin arritur në aeroport”.
Për sa i përket ndonjë ndihme tjetër kundër IS-Khorasan, “nuk di të jenë duke bërë ndonjë gjë për ne tashmë”, tha Gjenerali McKenzie.
Komandanti më i lartë ushtarak amerikan tha të premten se telefonatat që kishte bërë me homologun e tij kinez në muajt e fundit kaotikë të presidencës së Donald Trumpit ishin “plotësisht brenda detyrave dhe përgjegjësive” të punës së tij.
Në komentet e tij të para publike mbi bisedat, Gjeneral Mark Milley tha se telefonatat ishin “rutinë” dhe ishin bërë “për të qetësuar si aleatët ashtu edhe kundërshtarët në rastin në fjalë me qëllimin, që të sigurohet stabiliteti strategjik.” Shefi i Shtabit të Përgjithshëm foli me agjencinë Associated Press dhe një gazetar tjetër që udhëtonin me të në Evropë.
Gjeneral Milley ka qenë në qendër të debateve mes njoftimeve se kishte bërë dy telefonata me gjeneralin Li Zuocheng të ushtrisë kineze për ta siguruar atë se Shtetet e Bashkuara nuk do të hynin në luftë me Kinën.
Përshkrimet e telefonatave të bëra tetorin e kaluar dhe në janar ishin pjesë e fragmenteve nga libri i ri “Peril” i gazetarëve të “Washington Post-it”, Bob Woodward dhe Robert Costa. Sipas librit, gjeneral Milley i tha gjeneralit Li se do ta paralajmëronte atë në rast të një sulmi.
Të premten gjenerali Milley bëri vetëm disa komente të shkurtra në mbrojtje të telefonatave, duke thënë se ai ka në plan të japë një shpjegim më të detajuar për këtë çështje para Kongresit kur të dëshmojë në një seancë nga fundi i shtatorit.
“Mendoj se është më mirë që t’i kem të rezervuara komentet derisa ta bëj një gjë të tillë para ligjvënësve që kanë përgjegjësinë ligjore të ushtrojnë mbikëqyrje ndaj ushtrisë amerikane,” tha gjeneral Milley. “Do të ofroj gjithë informacionin që Kongresi do të më kërkojë pas dy javësh.”
Gjeneral Milley dhe Sekretari Amerikan i Mbrojtjes Lloyd Austin janë planifikuar të dëshmojnë më 28 shtator para Komisionit të Senatit për Shërbimet e Armatosura, në një seancë që ishte parashikuar të përqendrohej tek tërheqja e ushtrisë amerikane nga Afganistani dhe evakuimi kaotik i amerikanëve, afganëve dhe të tjerëve nga ai vend.
Megjithatë tani zoti Milley pritet të përballet me pyetje të ashpra lidhur me telefonatat të cilat u bënë gjatë muajve të fundit të mandatit të Presidentit Trump, ndërsa ai sfidonte rezultatet e zgjedhjeve të vitit 2020.
Telefonata e dytë, më 8 janar, u bë dy ditë pasi një turmë e dhunshme sulmoi Kapitolin e SHBA-së në një përpjekje për të parandaluar Kongresin të certifikonte fitoren e Presidentit Joe Biden.
Një komision i posaçëm i Dhomës së Përfaqësuesve, që po heton trazirat e 6 janarit në Kapitol, ka kërkuar detaje rreth telefonatave të gjeneralit Milley.
Ligjvënësit amerikanë, demokrati Bennie Thompson dhe republikania Liz Cheney, drejtues të komisionit, kanë kërkuar gjithashtu informacione në lidhje me zgjedhjet e nëntorit, transferimin e pushtetit nga zoti Trump tek zoti Biden dhe trazirat.
Gjenerali Milley u emërua shef i shtabit të përgjithshëm nga ish-presidenti Trump në vitin 2019 dhe ka mbetur në atë post në administratën e zotit Biden. Në këtë post, ai është këshilltari kryesor ushtarak i presidentit dhe sekretarit të mbrojtjes.
Shtëpia e Bardhë dhe shefi i Pentagonit kanë thënë se ata vazhdojnë të kenë besim të plotë te gjenerali Milley.
Sipas librit të ri, zoti Milley, i frikësuar nga veprimet e Presidentit Trump në fund të mandatit të tij, telefonoi dy herë homologun e tij kinez për ta siguruar atë se SHBA nuk do të sulmonte Kinën. Njëra telefonatë u bë më 30 tetor, katër ditë para zgjedhjeve. E dyta ishte më 8 janar, më pak se dy javë para inaugurimit të zotit Biden dhe dy ditë pas kryengritjes në Kapitol nga mbështetësit e Trump.
Disa ligjvënës amerikanë kanë thënë se Milley ka tejkaluar autoritetin e tij dhe kanë bërë thirrje që zoti Biden ta shkarkojë atë. Zoti Trump e quajti gjeneralin Milley si tradhtar, dhe “krejtësisht të çmendur” dhe tha se zoti Milley “nuk ia kishte përmendur asnjëherë telefonatat me Kinën.”
Presidenti Biden u tha gazetarëve pasi u bënë të njohura fragmentet e librit se “kam besim të madh te gjeneral Milley.”
Zyra e gjeneralit Milley, në një deklaratë këtë javë, tha se telefonatat kishin për qëllim të përçonin një ndjenjë “sigurie” tek ushtria kineze dhe ishin në përputhje me përgjegjësitë e tij si kreu i shefave të përgjithshëm.
Në deklaratën e zëdhënësit të zotit Milley, thuhej gjithashtu se thirrjet ishin bërë “në koordinim dhe komunikim” me Pentagonin dhe agjencitë e tjera federale.
Sipas librit, një kopje të të cilit e ka agjencia AP, Milley siguroi homologun e tij kinez në telefonatën e parë se “qeveria amerikane është e qëndrueshme dhe gjithçka do të jetë në rregull”. Aty thuhet se ai i tha gjeneralit Li, se “ne nuk do të sulmojmë ose kryejmë ndonjë operacion kinetik kundër jush.”
“Nëse do të sulmojmë, do t’ju telefonoj paraprakisht. Nuk do të jetë surprizë,” citohet të ketë thënë Milley.
Gjenerali Milley foli me një numër udhëheqësish të tjerë ushtarakë në të gjithë botën pas trazirave të 6 janarit; ato përfshinin udhëheqës nga Mbretëria e Bashkuar, Rusia dhe Pakistani. Një përshkrim i telefonatave në janar përmend “disa” homologë të tjerë me të cilët zoti Milley shkëmbeu mesazhe të ngjashme, se qeveria amerikane ishte e fortë dhe në kontroll.
Telefonata e dytë kishte për qëllim të qetësonte Kinën për ngjarjet e 6 janarit. Por sipas librit, nuk kishte qenë aq e lehtë që të qetësohej gjenerali Li, edhe pasi gjenerali Milley i premtoi atij se “ne jemi 100 për qind të qëndrueshëm. Gjithçka është në rregull. ”
Në përgjigje të librit, senatori republikan Marco Rubio, i kërkoi presidentit Biden të shkarkonte gjeneralin Milley, duke thënë se gjenerali punoi për të “sabotuar në mënyrë aktive” ish-presidentin Trump, që ishte komandant i përgjithshëm.
Të mërkurën Shtëpia e Bardhë i doli në mbrojtje komandantin më të lartë ushtarak amerikan, Kreun e Shtabit të Përgjithshëm, Gjeneral Mark Milley, përballë thirrjeve për dorëheqjen e tij pasi u bënë publike pjesë të një libri të ri të shkruar nga gazetarët e gazetës Washington Post, Bob Woodward dhe Robert Costa.
Sipas librit, të titulluar “Peril”, gjeneral Milley u kishte thënë zyrtarëve të lartë ushtarakë se çdo urdhër për sulm që mund të jepej nga ish Presidenti Donald Trump në ditët e fundit të presidencës së tij duhet të kalonte përmes tij. Libri zbulon gjithashtu se gjenerali Milley telefonoi dy herë autoritetet kineze për të siguruar Pekinin se nuk kishte ndonjë rrezik se Shtetet e Bashkuara do ta sulmonin atë.
Sipas ligjit amerikan, presidenti është komandanti i përgjithshëm i forcave të armatosura të vendit dhe në Shtetet e Bashkuara ka një traditë të kontrollit civil mbi udhëheqësit ushtarakë.
Por gjenerali Milley, duke besuar se gjendja mendore e zotit Trump ishte keqësuar pasi humbi garën për t’u rizgjedhur nëntorin e kaluar, thirri udhëheqësit e tij të lartë ushtarakë në fillim të janarit për t’u siguruar që ata të konsultoheshin me të para se të zbatonin ndonjë urdhër për sulm jashtë vendit nga zoti Trump, sipas librit. Gjenerali Milley nuk i ka kundërshtuar pohimet.
Pasi u bë e ditur të martën se ai kishte kontaktuar Pekinin, zyrtarët e lartë thanë se zoti Milley kishte koordinuar telefonatat me dijeninë e zyrës së sekretarit të mbrojtjes, udhëheqësi civil i Pentagonit.
Zoti Trump nuk dha ndonjë urdhër të tillë për sulm në janar, në prag të largimit nga Uashingtoni dhe marrjes së presidencës nga demokrati Joe Biden, megjithëse ai vazhdon edhe sot e kësaj dite me pretendimet e pabaza se u privua nga një mandat tjetër katërvjeçar për shkak të manipulimeve me votat.
Gjenerali Milley ka vazhduar të drejtojë ushtrinë amerikane gjatë tetë muajve të parë në detyrë të zotit Biden. Por disa ligjvënës republikanë kanë kërkuar dorëheqjen e tij lidhur me incidentet e përshkruara në libër, i cili do të dalë në qarkullim javën e ardhshme.
Sekretarja e shtypit e Shtëpisë së Bardhë, Jen Psaki hodhi poshtë çdo pretendim se gjenerali Milley kishte shkelur parimin e kontrollit civil mbi ushtrinë. Ajo tha se Presidenti Biden ka “besim të plotë në udhëheqjen e tij, patriotizmin e tij dhe besnikërinë e tij ndaj Kushtetutës.”
Incidentet ndodhën në një kohë kur ish -presidenti “nxiti trazira që çuan në kryengritje dhe një sulm mbi Kapitolin e vendit tonë,” tha ajo. Qindra mbështetës të zotit Trump sulmuan ndërtesën e Kongresit më 6 janar në përpjekje për të mos lejuar ligjvënësit që të certifikonin fitoren e zotit Biden.
Zonja Psaki i quajti trazirat në Kapitol “një nga ditët më të errëta në historinë e kombit tonë.”
Senatori republikan Marco Rubio nga Florida, një kritik i shpeshtë i Biden, bëri thirrje për dorëheqjen e Milley, duke thënë se Milley “punoi për të minuar në mënyrë aktive komandantin e përgjithshëm të forcave të armatosura amerikane” dhe se veprimet e tij ishin tradhti.
“Gjeneral Milley është përpjekur të justifikojë sjelljen e tij të pamatur duke argumentuar se ajo që ai e perceptoi si gjykim të ushtrisë ishte më e qëndrueshme sesa ai i komandantit të saj civil,” i shkruan senatori Rubio zotit Biden.
“Është një precedent i rrezikshëm që mund të përdoret në çdo moment në të ardhmen nga gjeneral Milley ose të tjerë,” tha zoti Rubio. “Rrezikon të godasë parimin e vjetër të vendit tonë të kontrollit civil mbi ushtrinë.”
Një tjetër republikan, senatori Ted Cruz i Teksasit, i quajti zbulimet e librit “thellësisht shqetësuese”.
“Kushtetuta jonë parashikon kontroll civil mbi ushtrinë dhe nëse kryetari i Shtabit të Përgjithshëm po sabotonte në mënyrë aktive komandantin e përgjithshëm dhe u premtonte armiqve tanë se do ta sfidonte komandantin e tij, kjo nuk është plotësisht në përputhje me përgjegjësitë e tij,” tha Cruz.
Por zëdhënësi i gjeneralit Milley, koloneli David Butler, tha se veprimet që thuhet në libër se i ka ndërmarrë shefi i shtabit ishin brenda kufijve normalë, duke vënë në dukje se ai konsultohet rregullisht me shefat e mbrojtjes në të gjithë botën, përfshirë ata në Kinë dhe Rusi.
“Gjeneral Milley vazhdon të veprojë dhe këshillojë brenda autoritetit të tij në traditën e ligjshme të kontrollit civil të ushtrisë dhe betimit të tij ndaj Kushtetutës,” tha zoti Butler në një deklaratë për shtyp.
voal.ch – Sekretari i Shtetit Antony Blinken dëshmoi për dy ditë rresht, më 13 shtator përpara Komitetit për Marrëdhëniet me Jashtë të Kongresit Amerikan dhe më 14 shtator përpara Senatit në lidhje se si e kishte drejtuar administrata e Presidentit Biden tërheqjen e SHBA nga Afganistani.
“Ne nuk trashëguam një plan”, tha Sekretari i Shtetit Antony Blinken në Kongres më 13 shtator përpara Kongresit.
Sipas gazetës New York Times: “Blinken është grilluar në Kongres”.
Sipas Euronews.com Sekretari amerikan i Shtetit Antony Blinken përsëriti argumentin e Presidentit Joe Biden se SHBA u përball me një zgjedhje midis përshkallëzimit ose tërheqjes.Republikanët e grilluan Blinken për atë që ata e quajtën një “fatkeqësi të përmasave epike”.Kongresmeni republikan Michael McCaul iu referua tërheqjes së shpejtë nga Kabuli si një “debakl, një katastrofë dhe një tradhti”.Ndërkohë, Sekretari Blinken mbrojti veprimet e administratës Biden gjatë muajve të fundit në Afganistan.
Anëtari i Komitetit të Kongresit për Marrëdhëniet me Jashtë Republikani Michael McCaul gjatë seancës dëgjimore me Sekretarin e Shtetit Blinken tha se ai do të kërkojë që të hetohet tërheqja e trupave amerikane nga Afganistani.
Ndërsa sipas New York Post Senatori Josh Hawley ka kërkuar dorëheqjen e Sekretarit të Shtetit Antony Blinken, Sekretarit të Mbrojtjes Lloyd Austin dhe Këshilltarit të Sigurisë Kombëtare Jake Sullivan për shkak të tërheqjes kaotike të trupave Amerikane nga Afganistani.
Sipas Newsweek Sekretari i Shtetit Antony Blinken u pyet në Komitetin për Marrëdhëniet e jashtme të Kongresit edhe për sulmin me dron nga pala Amerikane ku u vranë 10 afganë civilë, midis tyre shtatë fëmijë. “Unë nuk e di”, u përgjigj Blinken, kur u pyet të martën. Nëse nga sulmi i fundit i dronit amerikan në Kabul, Afganistan u vra terroristi i dyshuar apo një punonjës civil afgan që punonte prej shumë kohësh me një organizatë ndihmash amerikane me familjen e tij.Senatori Republikan i Kentucky, Rand Paul e pyeti Blinken në lidhje me një sulm me dron ushtarak të 29 gushtit, nëse “Djaloshi që administrata e Biden e vrau, ishte një punonjës i një organizate ndihmash apo një operativ i ISIS-K?” “Unë nuk e di”, tha Blinken.
Në fakt sipas një hetimi nga gazeta NYT për Zemari Ahmadi, që u vra nga sulmi me dron më 29 gusht 2021 bashkë me 9 të tjerë, midis tyre 7 fëmijë, doli se nuk ishte terrorist nga Isis-K, por një inxhinier elektronik bashkëpunëtor i amerikanëve që kishte bërë kërkesë vize me familjen për në SHBA./voal.ch (Sources: NYT, NYP, Newsweek, Euronews)
Presidenti amerikan Joe Biden do të flasë drejtpërdrejt në Asamblenë e Përgjithshme të OKB-së në New York javën e ardhshme, bëri të ditur Shtëpia e Bardhë, transmeton Anadolu Agency (AA).
Shtëpia e Bardhë tha se Biden do të japë deklaratat të martën, 21 shtator, në fjalimin e tij të parë në mbledhjen vjetore diplomatike që nga marrja e detyrës.
Theksohet se do të pasojnë detaje shtesë.
Seanca e 76-të e Asamblesë së Përgjithshme do të hapet më 14 shtator dhe dita e parë e Debatit të Përgjithshëm të nivelit të lartë do të zhvillohet më 21 shtator dhe do të zgjasë deri më 27 shtator.
Më shumë se 130 udhëheqës shtetërorë dhe qeveritarë pritet të marrin pjesë në sesionin e këtij viti.
WASHINGTON – Duke dëshmuar në një seancë dëgjimore në Kongres të hënën, Sekretari amerikan i Shtetit Antony Blinken mbrojti me vendosmëri tërheqjen ushtarake amerikane muajin e kaluar nga Afganistani që përfundoi një luftë 20 vjeçare, më e gjata në historinë e Shteteve të Bashkuara.
Nëse Presidenti amerikan Joe Biden do të kishte vendosur të mbante forca të armatosura në Afganistan, kjo “do të kërkonte dërgimin e më shumë trupave amerikane në Afganistan për të mbrojtur veten dhe për të parandaluar një marrje të pushtetit nga talebanët, duke pësuar viktima – dhe në rastin më të mirë rivendosjen e një ngërçi dhe ngecjeje të pafund në Afganistan, nën kërcënimin e sulmeve”. tha sekretari Blinken përpara Komisionit për Marrëdhëniet me Jashtme të Dhomës së Përfaqësuesve.
“Nuk ka tregues se qëndrimi më i gjatë do t’i kishte bërë që forcat afgane të sigurisë ose qeveria afgane të ishin më elastike apo të qëndrueshme,” tha ai. “Nëse 20 vjet dhe qindra miliarda dollarë në mbështetje, pajisje dhe trajnime nuk do të mjaftonin, përse një vit tjetër, pesë apo 10, do të ishin ndryshe?”
Kryengritësit talebanë pushtuan vendin në mes të gushtit, ndërsa Presidenti afgan Ashraf Ghani iku në mërgim në Emiratet e Bashkuara Arabe. Shtetet e Bashkuara evakuuan 124,000 njerëz, shumica afganë, së bashku me rreth 5,500 amerikanë, nga aeroporti i Kabulit në ditët e fundit të gushtit, duke lënë pas rreth 100 amerikanë.
FILE – U.S. soldier holds a “Gate Closed” sign as hundreds of people gather near an evacuation checkpoint on the perimeter of Hamid Karzai International Airport, in Kabul, Afghanistan, Aug. 26, 2021.
Disa amerikanë kanë qenë në gjendje më pas të largohen nga vendi, përmes daljeve tokësore ose në pak fluturime ajrore të lejuara nga talebanët.
Sekretari Blinken tha se zyrtarët amerikanë nuk e kishin parashikuar rënien e qeverisë afgane aq shpejt, edhe ndërsa talebanët përparuan në të gjithë vendin.
“Edhe vlerësimet më pesimiste nuk parashikuan që forcat qeveritare në Kabul do të rrëzoheshin ndërsa forcat amerikane të ishin ende në vend”, tha ai.
Edhe pse evakuimi kryesor ka përfunduar, diplomati amerikan tha: “Ne po vazhdojmë përpjekjet tona të paepura për të ndihmuar amerikanët e mbetur, si dhe afganët dhe qytetarët e vendeve aleate dhe partnere, të largohen nga Afganistani nëse ata zgjedhin të bëjnë një gjë të tillë”.
“Ashtu siç kemi bërë gjatë gjithë historisë sonë, amerikanët tani po mirëpresin familjet nga Afganistani në komunitetet e tyre dhe po i ndihmojnë ata të zhvendosen ndërsa fillojnë jetën e tyre të re”, tha sekretari Blinken. “Kjo është gjithashtu diçka për të qenë krenarë”.
Pyetje nga paneli i Dhomës së Përfaqësuesve
Sekretari Blinken u përball me pyetje të vështira dhe vlerësime të ashpra për tërheqjen nga paneli i Dhomës së Përfaqësuesve dhe kjo pritet të ndodh përsëri të martën kur të dalë për të dëshmuar para Komisionit të Senatit për Marrëdhëniet me Jashtë.
Ligjvënësit republikanë të opozitës dhe disa kolegë demokratë kanë kritikuar strategjinë e presidentit për tërheqjen e trupave, qytetarëve amerikanë dhe mijëra afganëve që punuan për forcat amerikane si përkthyes dhe këshilltarë gjatë luftës.
Kryetari i komisionit të Dhomës së Përfaqësuesve, kongresmeni Gregory Meeks i Nju Jorkut, tha: “Shkëputja nga Afganistani nuk do të ishte kurrë e lehtë”.
Por ai shtoi, “Kjo luftë duhet të kishte përfunduar 19 vjet më parë”, pasi Shtetet e Bashkuara rrëzuan me sukses talebanët nga pushteti dhe shkatërruan terrenet e trajnimit për terroristët e Al-Kaidës që sulmuan Shtetet e Bashkuara në vitin 2001, duke vrarë gati 3,000 njerëz.
Ligjvënësi Michael McCaul i Teksasit, republikani kryesor i panelit të Dhomës së Përfaqësuesve, e karakterizoi tërheqjen e Shteteve të Bashkuara nga Afganistani si “një fatkeqësi me përmasa epike” dhe vuri në dukje se shumë zyrtarë të përkohshëm që tani kontrollojnë Afganistanin ishin dikur terroristë të Shteteve të Bashkuara të Amerikës në qendrën e burgimit të Guantanamos në Kubë.
Ligjvënësi republikan Steve Chabot i Ohajos tha se Afganistani është bërë “edhe një herë një strehë për terroristët”.
“Po, shumica e amerikanëve donin të largoheshin nga Afganistani, por jo në këtë mënyrë ” tha zoti Chabot.
Ligjvënësi demokrat, Brad Sherman i Kalifornisë, fajësoi ish-Presidentin Donald Trump që ra dakort vitin e kaluar për tërheqjen me 1 maj 2021, afati përfundimtar për dhënien fund të përfshirjes ushtarake amerikane në Afganistan pa planifikim të mjaftueshëm. Zoti Sherman pyeti sekretarin Blinken nëse administrata e mëparshme amerikane la detaje se si mund të ishte kryer tërheqja.
“Ne trashëguam një afat,” u përgjigj Blinken. “Ne nuk trashëguam një plan.”
Family members of U.S. Marine Sgt. Johanny Rosario Pichardo are grief stricken upon the arrival of his casket at Logan Airport in Boston.
Kritikat për tërheqjen nga Afganistani u shtuan veçanërisht pasi 13 pjesëtarë të shërbimit amerikan gjetën vdekjen në një sulm vetëvrasës në aeroportin e Kabulit në ditët e fundit të tërheqjes. Shteti Islamik-Khorasan, një degë afgane e grupit terrorist që vepron në Lindjen e Mesme, mori përgjegjësinë për sulmin.
Sondazhet kombëtare të votuesve amerikanë tregojnë mbështetje të gjerë për vendimin e Presidentit Biden për t’i dhënë fund asaj që ai e ka quajtur një “luftë të përhershme” në Afganistan, por jo mënyrën se si u bë tërheqja.
Dëshmia e ardhshme
Gjatë dy ditëve të dëshmisë, sekretari Blinken ka të ngjarë të pyetet përse SHBA nuk e filloi evakuimin e qytetarëve amerikanë më shpejt, veçanërisht pasi presidenti Biden njoftoi qëllimin e tij në prill për të nderuar marrëveshjen e Trumpit me talebanët për t’i dhënë fund luftës dhe për të tërhequr forcat amerikane.
Ligjvënësit kanë synuar gjithashtu të vënë në shënjestër informacionet e inteligjencës amerikane për dështimin në parashikimin e marrjes së shpejtë të pushtetit nga talebanët dhe rënien e qeverisë afgane.
Republikanët thonë se duan të përqëndrojnë pyetjen e tyre në performancën e presidentit Biden në javët dhe ditët e fundit të luftës, ndërsa demokratët shpresojnë të analizojnë të gjithë përpjekjen e luftës që u krye nën drejtimin e katër presidentëve – republikanëve George W. Bush dhe Trump, dhe demokratëve Barack Obama dhe Joe Biden.
George Bushi filloi luftën në fund të vitit 2001 për të zhdukur terrenet e stërvitjes së terroristëve të al-Kaidës, që kryen sulmet terroriste të 11 shtatorit 2001 kundër Shteteve të Bashkuara, me terroristët e al-Kaidës që urdhëruan aeroplanët amerikanë të rrëzoheshin në kullat binjake të Nju Jorkut, në Pentagon dhe jashtë Uashingtonit. 20 vjetori i sulmeve u përkujtua me ceremoni solemne të shtunën e kaluar.
Kërcënimet për SHBA
Në një takim të nivelit të lartë të inteligjencës dhe sigurisë kombëtare të hënën, Drejtoresha e Inteligjencës Kombëtare Avril Haines u tha të pranishmëve se kërcënimet më të mëdha për Shtetet e Bashkuara nuk po vinin më nga Afganistani.
“Ajo që ne shohim si kërcënim nga ISIS është Jemeni, Somalia, Siria dhe Iraku” tha zonja Haines. “Aty shohim kërcënimin më të madh”.
Ajo tha se tërheqja e trupave amerikane nga Afganistani ka ndikuar në aftësinë e agjencive të inteligjencës amerikane për të ditur se çfarë po ndodh në terren me grupet terroriste si al-Kaida dhe IS-Khorasan.
“Thjesht nuk ka asnjë dyshim se kur tërhiqesh, pa trupa në terren, pa infrastrukturën që kishim, pa qeverinë afgane në pozicionin që ishte, mbledhja e inteligjencës është zvogëluar,” tha ajo.
Ajo tha se komuniteti i inteligjencës amerikane, megjithatë, ishte duke u përgatitur për këtë eventualitet për “një kohë të gjatë”.
Presidenti Biden e ka quajtur tërheqjen nga Afganistani një “sukses të jashtëzakonshëm” dhe mbrojti vendimin për t’i dhënë fund luftës atje, duke thënë se ai nuk do t’ia kalojë përgjegjësinë e menaxhimit të përfshirjes ushtarake amerikane atje një udhëheqësi të pestë amerikan.
Zëdhënësi i Pentagonit John Kirby tha të hënën se një pauzë që ndikon në fluturimet e evakuimit të refugjatëve afganë për në Shtetet e Bashkuara do të zgjasë edhe një javë tjetër për shkak të shpërthimit të rasteve të fruthit. Ai tha se rastet e fruthit në mesin e afganëve u zbuluan në tre qendra të ndryshme në Shtetet e Bashkuara.
Pezullimi i fluturimeve e ndërlikon më tej procesin e evakuimit të afganëve në Shtetet e Bashkuara.
Në orën 8:46 të mëngjesit të 11 shtatorit 2001, Joe Irizarry po drejtonte një tren udhëtarësh në Nju Jork, shumë afër kullave binjake të Qendrës Botërore të Tregtisë. Disa sekonda më vonë, aeroplani i parë u përplas në kullën e parë. Korrespondentja e Zëri të Amerikës, Anna Nelson bisedoi me zotin Irizarry mbi ngjarjen, 20 vjet më vonë.
“Unë mendoj se kam qenë më i lumtur para kësaj ngjarjeje. Isha 40 vjeç, ndihesha mirë. Isha i martuar, baba i katër fëmijëve. Kisha dëshirë të bëhesha polic, por kjo nuk funksionoi, kështu që isha drejtues trenash në qytetin e Nju Jorkut. Isha në gjendje të siguroja një jetë të mirë. Unë bëja punën që nuk më pëlqente shumë, por ajo paguante faturat. Unë isha drejtues i trenit të linjës R më 11 shtator të vitit 2001”, thotë Joe Irizarry.
Ai e mban mend mirë mëngjesin e asaj dite. Në orën 8:45 të mëngjesit treni i tij ndaloi në stacionin Cortlandt Street kur ai ndjeu një shpërthim që e lëkundi trenin.
“Nuk e dija se çfarë ishte. Nuk e dija nëse u godita nga një tren tjetër apo shpërtheu një bombë. I thashë konduktorit tim që të hapte dyert pasi ndaluam në stacion dhe unë shkova për kontrolluar pjesën e pasme të trenit. Pashë dy gra që po vraponin poshtë shkallëve, të cilat më thanë se një aeroplan sapo kishte goditur kullën e parë. Unë u kërkova të gjithë pasgjerëve që të qëndronin në tren, kështu që ata që ishin në platformë hipën përsëri në tren”.
Zoti Irizarry thotë se në atë moment, një valë njerëzish filluan të mbushnin stacionin e trenit, platforma e të cilit filloi të mbulohej nga një re pluhuri dhe mbeturinash.
“Ishte e frikshme. Në atë moment askush nuk e dinte se ishte një sulm terrorist. Të gjithë mendonin se ishte një aksident. Kishte njerëz që vraponin poshtë shkallëve për të hipur në tren, i thashë konduktorit që t’i mbante dyert hapur derisa të gjithë njerëzit të hynin në tren. Stacioni Cortlandt Street ishte pikërisht përballë kullës, më pak se 100 metra larg saj. Pra, unë isha në stacionin nëntokësor kur avioni i parë goditi kullën. Nuk më zuri paniku në atë moment. Detyra ime ishte të dërgoja njerëzit në një vend të sigurt”, thotë ai.
Rregulli i përgjithshëm për drejtuesit e trenave është të mbërrijnë në stacion, të presin jo më shumë se 10-15 sekonda, derisa njerëzit të hipin në tren, të mbyllin dyert dhe të largohen. Zoti Irizarry shkeli të gjitha këto rregulla.
“Në atë moment u sigurova që të gjithë njerëzit të ishin në gjendje të hipnin në tren. Dhe në momentin kur nuk pamë njeri jashtë trenit, mbyllëm dyert dhe u nisëm. Disa qindra njerëz kishin hipur në tren. Kontaktova me Qendrën e Kontrollit për t’i informuar mbi atë qe po ndodhte…ishte një situtatë e rëndë”, thotë ai.
“Kur arrita në stacionin Avenue Continental, atëherë zbulova saktësisht se çfarë kishte ndodhur, kulla po rrëzohej. Hyra në dhomën e personelit dhe e pashë ngjarjen në televizor. Në atë moment, mua më zuri paniku. E kuptova se kisha qenë nën ndërtesën që po rrëzohej. Pastaj, unë shkova në shtëpi dhe fillova të qaja.”
Stacioni i Cortlandt Street u dëmtua rëndë dhe u desh të rindërtohej plotësisht. Një pjesë e stacionit u shemb. Zoti Irizarry ishte larguar në kohën e duhur.
“Autoriteti i tranzitit më vuri në kontakt me një pasagjere, e cila kishte kontaktuar median. Unë takova Lindën, e cila ishte ulur në vagonin e ngjitur me kabinën e drejtuesit të trenit.”
“Në fakt, mu deshën disa ditë para se ta kontaktoja atë për shkak të tronditjes që përjetova. Doja të riktheja qetësinë, sepse atë ditë humba shumë miq. Pastaj vendosa ta bëja telefonatën, ta falenderoja atë”, thotë Linda DeSilvio.
“Është një ndjesi e mirë të mendosh që dikush të konsideron hero. Kjo është puna jonë, t’i mbajmë klientët tanë të sigurt!”, tha Joe Irrizary në shtator të vitit 2001, pas takimit me pasagjeren Linda DeSilvio.
Kanë kaluar dy dekada nga tragjedia, por për zotin Irizarry, gjithçka është ende reale dhe shumë e dhimbshme.
“Merrja shumë ditë pushimi sepse nuk doja të kaloja më në atë zonë. Pastaj, bazuar në vitet e punës, unë zgjodha të punoja në linja të tjera të trenave. Kur drejtoja trenin shpesh filloja të qaja. Më 31 dhjetor të vitit 2011 dola në pension. Unë vuaj nga sindroma e stresit post-traumatik, ankthi, depresioni, astma. Nuk ka asnjë lehtësim. Unë mendoj për të gjithë ata që vdiqën në atë moment, edhe pse unë jam akoma këtu. Kanë kaluar 20 vjet, por mua më duket sikur kjo ka ndodhur dje…”, thotë ai.
