Presidenti amerikan Joe Biden takoi në Shtëpinë e Bardhë Presidentin e Finlandës, Sauli Niinisto dhe Kryeministren suedeze Magdalena Andersson, për bisedime rreth kërkesës së vendeve të tyre për anëtarësim në NATO, mbështetjen për Ukrainën dhe sigurinë evropiane. Në një konferencë pas takimit, zoti Biden tha se ShBA mbështesin fuqishëm anëtarësimin e vendeve nordike në aleancën ushtarake.

“Sot nuk ka dilema. Aleanca e NATO-s është e rëndësishme, është e efektshme dhe është më e nevojshme se kurrë. Aleanca është sot më e domosdoshme se më parë dhe do të thoja edhe për të ardhmen. Vendimi i Finlandës dhe Suedisë është dëshmi e këtij përkushtimi. Kjo është për të ardhmen. Është për një NATO të ringjallur që ka mjetet dhe burimet, qartësinë dhe bindjen për të mbrojtur vlerat tona të përbashkëta dhe për të udhëhequr botën”, tha Presidenti Biden.

Kërkesat e Finlandës dhe Suedisë për anëtarësim në NATO, erdhën pas sulmit të Rusisë kundër Ukrainës. Presidenti amerikan shtoi se si Finlanda ashtu edhe Suedia plotësojnë të gjitha kushtet e duhura për t’u bërë pjesë e aleancës ushtarake. Presidenti tha se do të dorëzojë sot në Kongres kërkesën e dy vendeve për ratifikim.

Suedia dhe Finlanda janë anëtarë të Bashkimit Evropian. Presidenti rus Vladimir Putin paralajmëroi Perëndimin se Moska do të përgjigjet nëse NATO shton praninë e saj ushtarake në Finlandë dhe Suedi, menjëherë pasi dy vendet nordike deklaruan të dielën se duan t’i bashkohen aleancës së dominuar nga ShBA.

Dy vendet do të përfitonin nga Neni 5 i aleancës, që parashikon që një sulm ndaj një vendi konsiderohet si sulm ndaj të gjitha vendeve, pasi të jerë anëtarësuar plotësisht.

Disa aleatë të NATO-s, të udhëhequr nga Shtetet e Bashkuara dhe Britania, kanë dhënë shenja se janë gati të ofrojnë mbështetje sigurie për Finlandën dhe Suedinë nëse Kremlini përpiqet të provokojë ose destabilizojë vendet nordike gjatë kohës së shqyrtimit të anëtarësimit të tyre.

Anëtarësimi në NATO kërkon miratimin konsensual të të gjithë anëtarëve.

Ish-Sekretari i Shtetit, Mike Pompeo, po viziton Tiranën. Ndërkohë aktivistja shqiptaro-amerikane, Evi Kokalari shkruan se kjo është një vizitë private e Pompeos.

POSTIMI I PLOTE

Disa gjëra që duhet të keni parasysh nga vizita e Mike Pompeos në Tiranë.

1. Mike Pompeo është në Shqipëri në kapacitetin e një personi privat dhe kjo nuk është vizitë zyrtare.

2. Mike Pompeo është në Tiranë për të dhënë një fjalim tek një komunitet jo-shqiptar, të cilën po e bën në këmbim të një shumë të majme parash, dhe nuk ka ardhur as për qeverinë e Ramës, as për opozitën fallco me seli te Rruga e Elbasanit, dhe as për 100 vjetorin e miqësisë midis Shqipërisë dhe Amerikës.

3. Ardhja e tij është koordinuar me ambasadën siç bëhet zakonisht në këto raste dhe zonja Kim ka organizuar disa evente për të, ku hyn dhe konferenca me grupin parlamentar sot, si dhe një çmim te organizuar nga UT dhe kjo me pagesë.

Mos bini pre e filmave që duan t’ju shesin në mbështetje të luftës kundër opozitës shqiptare. Z. Pompeo i është dërguar një shpjegim i detajuar i ngjarjeve politike të fundit në Shqipëri dhe nuk është këtu për të përkrahur axhendën politike të askujt.

Për arsye sigurie, informacionet e tjera mund t’i shkruaj mbas largimit të tij nga Shqipëria. syri.net

Të gjithë personat që kanë aplikuar për Lotarinë Amerikane do të marrin sot përgjigje.

Duke nisur nga ora 18.00, shqiptarët mund të mësojnë nëse janë përzgjedhur si fitues apo jo. Siç njofton edhe Departamenti i Shtetit i SHBA, Çështjet Konsullore, për t’u interesuar rreth aplikimit tuaj mund të klikoni këtu.

Pasi të ndodheni në uebfaqen e Departamentit të Shtetit, duhet të klikoni mbi butonin “check status” e më pas të vendosni kodin unik që u është dhënë në tetor kur keni bërë edhe aplikimin.

Përzgjedhja bëhet në mënyrë rastësore përmes një shorti kompjuterik.

Në pritje për përzgjedhjen janë rreth 240 mijë shqiptarë.

Një dramë e shoqërisë sonë është emigrimi i shqiptarëve, sidomos i rinisë.

Shqipëria po shpopullohet çdo vit e më shumë teksa të shumtë shqiptarë tentojnë të gjejnë ”shtëpinë” e tyre diku tjetër.

Për qindra mijëra shqiptarë, të pakënëquar me kushtet në vend dhe mënyrën e qeverisjes, çdo vit kërkojnë të largohen dhe një mundësi shohin edhe lotarinë amerikane.

Raportet e hërëpashershme të institucioneve vendase e të huaja zbulojnë një braktisje masive të vendit kryesisht nga të rinjtë. Problematika është vënë shpesh herë në pah, megjithatë nga qeveria nuk duket të ketë ndonjë përpjekje reale në zbutjen e kësaj plage të shoqërsisë./BN

Sekretari amerikan i Shtetit Antony Blinken rezultoi pozitiv me Covid-19 të mërkurën, duke patur siptoma të lehta, sipas një njoftimi të Departamentit të Shtetit.

Kryediplomati amerikan i ka bërë të dyja vaksinat, si dhe dozën përforcuese dhe nuk është takuar drejtpërdrejt me Presidentin Biden prej disa ditësh dhe sipas Departamentit të Shtetit, nuk konsiderohet person që ka patur kontakt të afërt me presidentin.

“Sekretari do të izolohet në shtëpi dhe do të vazhdojë punën normalisht. Ai do të rikthehet në zyrë dhe do të rifillojë orarin e plotë dhe udhëtimet sa më shpejt të jetë e mundur”, thuhet në njoftim.

Sekretari Blinken kishte bërë dy teste të tjera, një të të martën dhe një të mërkurën në mëngjes dhe të dyja ishin negative, para se të testonte pozitiv më vonë të mërkurën. Ai kishte marrë pjesë në darkën zyrtare të korrespondentëve të Shtëpisë së Bardhë gjatë fundjavës, një ceremoni e përvitshme, ku marrin pjesë figura të shquara të shtypit dhe politikës dhe numri arrin në disa mijëra vetë.

Zëdhënësi i Shtëpisë së Bardhë Ned Price tha, se departamenti po njofton të gjithë individët me të cilët Sekretari ka patur kontakt të afërt gjatë ditëve të fundit.

Zoti Blinken u takua me Ministren e Jashtme të Suedisë Ann Linde të mërkurën paradite, si dhe me homologun nga Meksika, Marcelo Ebrad të martën.

Zëdhënësi Ned Price, i cili takohet rregullisht me Sekretarin Blinken, tha se ai bëri testin dhe kishte dalë negativ të mërkurën.

Një fjalim i rëndësishëm i Sekretarit Blinken për politikën e administratës ndaj Kinës, i planifikuar për të enjten, u shty.

UASHINGTON – CIA thotë se rusët që nuk mbështesin sulmin e Presidentit Vladimir Putin ndaj Ukrainës mund të jenë duke u përpjekur për t’u vënë në kontakt me shërbimet amerikane të zbulimit. CIA sugjeron që për këtë ata t’i drejtohen të ashtuquajturit internetit të errët (darknet).

Të hënën, agjensia amerikane e zbulimit filloi një fushatë të re për të vendosur praninë e saj në një pjesë të internetit që është e arritshme vetëm nëpërmjet mjeteve të specializuara që mundësojnë anonimitetin. CIA ka një faqe në darknet që ka të njëjtat parametra si faqja e saj normale, por që mund të vizitohet vetëm nëpërmjet programit të navigimit Tor, i cili ka opsione kriptimi që nuk i kanë shumica e programeve normale të navigimit në internet.

Udhëzimet në anglisht dhe rusisht se si mund të arrihet deri tek faqja e saj u shfaqën të hënën në mediat sociale të CIA-s. Agjensia shpreson që rusët e diasporës do t’ua dërgojnë këto udhëzime kontakteve të tyre brenda vendit.

Ndërsa shumë rusë duket se mbështesin atë që Kremlini e quan zyrtarisht “operacion i posaçëm ushtarak”, vëzhgues të hershëm të Rusisë mendojnë se menaxhimi i luftës nga Presidenti Putin mund të distancojë më tej disa prej njerëzve të fuqishëm që nuk janë dakort me të. Megjithë kapacitetet e mëdha për gjurmimin e komunikimeve dhe për marrjen e imazheve satelitore, vazhdon të mbetet jetësore për agjensitë perëndimore të zbulimit që të rekrutojnë burime njerëzore që mund të ofrojnë të dhëna për Kremlinin dhe për rrethanat brenda Rusisë.

“Për misionin tonë global është e nevojshme që individët të mund të na kontaktojnë në mënyrë të sigurt nga kudo që ndodhen”, u shpreh agjensia nëpërmjet një deklarate.

Një zyrtar i CIA-s, që foli në kushte anonimiteti për diskutimin e çështjeve të zbulimit, tha se agjensia e di se “ka rusë të shqetësuar që po përpiqen në mënyrë të dëshpëruar për të kontaktuar CIA-n”. Zyrtari nuk pranoi të thotë se sa persona janë munduar të kontaktojnë që nga fillimi i luftës.

“Nuk ka siguri angazhimi i drejtpërdrejtë me amerikanët, fizikisht apo virtualisht” në Rusi, tha zyrtari. “Për ata persona që dëshirojnë të na kontaktojnë në mënyrë të sigurtë, kjo është mënyra e duhur”.

E çelur për herë të parë në vitin 2019, faqja e CIA’s në darknet mund të vizitohet nëpërmjet programit Tor. Programi Tor e mori këtë emërtim të shkurtuar nga “The Onion Router”, që kanalizon trafikun e internetit përmes disa palëve të treta, për të maskuar identitetin dhe destinacionin. Pasi instalojnë aplikacionin Tor, përdoruesit zakonisht shkruajnë adresa të gjata të përbëra nga simbole të shumta dhe të cilat në fund mbarojnë me “.onion”.

Duke përdorur programin Tor, përdoruesit shmangin gjurmimin gjatë navigimit. Megjithëse asnjë formë komunikimi nuk është krejtësisht e sigurtë gjatë gjithë kohës, zyrtarët e zbulimit thonë se një informator i mundshëm do të ishte më i mbrojtur në darknet nga përgjimi i autoriteteve ruse.

Programi i navigimit Tor u krijua fillimisht me mbështetjen e Laboratorit Kërkimor të Marinës së Shteteve të Bashkuara dhe menaxhohet nga një organizatë jofitimprurëse që nga viti 2006. Programi është përdorur prej kohësh nga ata që kërkojnë më shumë privatësi: disidentët në vendet autoritare dhe njerëzit që duan të shmangin sensorët dhe programet ndaluese, si dhe nga p.sh. gazetarët e agjensisë së lajmeve Associated Press, e cila ka një faqe të sajën për të marrë informata nëpërmjet programit Tor. Programi mund të përdoret pra nga çdokush që kërkon më shumë privatësi, por ai është shfrytëzuar edhe nga kriminelët.

Rusëve iu është dashur prej kohësh të gjejnë mënyra për të shmangur bllokadat e qeverisë në internet. Si reagim ndaj represionit të Kremlinit që nga fillimi i luftës, disa organizata të mediave dhe kompania Twitter kanë reklamuar përdorimin e faqeve të tyre me adresë të llojit “.onion”, apo të programeve që krijojnë një rrjet virtual privat (VPN).

Megjithëse zyrtarët nuk japin detaje, mendohet se shërbimet amerikane të zbulimit ushtrojnë veprimtari brenda Rusisë. Tërheqja e vëmendjes tek faqja në darknet i bën të ditur kontakteve të mundshme se CIA i kushton vëmendje sigurisë së tyre, thotë Mark Kelton, i cili doli në pension nga CIA në vitin 2015, pasi shërbeu si drejtues për kundërzbulimin.

“Kur njerëzit vendosin të kontaktojnë, ata janë shumë mirë të vetëdijshëm për atë që po bëjnë dhe se cilat janë rreziqet”, thotë zoti Kelton. “Tashmë bëhet fjalë që t’i sigurojnë se nga kjo anë ka njerëz që interesohen për mbrojtjen e tyre”.

Ngjarjet madhore si rënia e Murit të Berlinit kanë përfaqësuar shpesh mundësi rekrutimi për shërbimet e zbulimit në Uashington dhe në Moskë. Lufta në Ukrainë e Presidentit rus Putin ka shkaktuar një spirale me pasoja për Rusinë, me mijëra ushtarë të vrarë, sanksione që kanë dëmtuar ekonominë ruse, si dhe dështimin e arritjes së objektivave bazë ushtarake ndërkohë që imazhet që duket se pasqyrojnë krime lufte po përhapen në mbarë botën. Disa vëzhgues besojnë se kjo luftë mund të ofrojë mundësi të tilla.

Dy gazetarë të respektuar rusë, Andrei Soldatov dhe Irina Borogan, shkruajtën në një artikull të fundit se dështimet e luftës kanë provokuar “një lojë të ashpër kalimi të fajit” brenda aparatit të sigurisë të Rusisë, i njohur me emërtimin “siloviki”. Ushtria ruse fajëson Putinin që kërkoi një “strategji të re të përmbajtur”, e cila besojnë se ua ka lidhur duart përballë forcave ukrainase që mbështeten nga Perëndimi, shkruajtën gazetarët Soldatov dhe Borogan.

Disa nga anëtarët e aparatit të sigurisë që refuzonin telefonatat e gazetarëve kur filloi lufta, tashmë po flasin më shumë.

“Kjo është hera e parë që ‘solivikit’ po krijojnë distancë mes tyre dhe presidentit. Kjo hap mundësira të të gjitha llojeve”, shkruajtën gazetarët.

Ideologjia personale apo zhgënjimi me regjimin e Putinit mund të shërbejnë më shumë si shtysa për dikë që vendos të spiunojë Rusinë, se sa shpërblimet financiare që mund të jepen, thotë zoti Kelton.

“Kriza është gjithnjë një moment i mirë për spiunazhin”, tha ai. “Njerëzit në shoqëritë autokratike shpesh ndjekin rrymën deri në pikën kur iu duhet të përballen me domosdoshmërinë morale dhe politike për të bërë një zgjedhje. Kjo ka qenë historikisht një mundësi e mirë që njerëzit të kontaktojnë me Shtetet e Bashkuara”.

Ambasadori amerikan në Beograd, Christopher Hill, tha në një intervistë me shërbimin serb të Zërit të Amerikës, se Shtetet e Bashkuara dhe Bashkimi Evropian presin që Serbia t’u bashkohet sanksioneve kundër Rusisë, por është Beogradi ai që duhet të vendosë dhe nuk ka trysni mbi të për këtë çështje. Ambasadori Hill tha se Serbia “duhet të mendojë sërish”, nëse beson se Rusia do ta ndihmojë rreth çështjes së Kosovës.

Zëri i Amerikës: Së fundmi Serbinë e vizituan tre senatorë amerikanë, si dhe ndihmës sekretarja amerikane e shtetit, Karen Donfried. Të gjithë qëndruan në Serbi pak kohë pas zgjedhjeve dhe të gjithë transmetuan mesazhin se Serbia duhet të vendosë sanksione kundër Rusisë për shkak të agresionit mbi Ukrainën. Disa thonë se qëllimi ishte shtimi i trysnisë mbi Beogradin? Cili sipas jush ishte mesazhi kryesor për Serbinë?

Ambasadori Hill: Mendoj se është e rëndësishme të kuptohet se gjatë këtyre vizitave u diskutuan një sërë temash. Tema e parë ishin marrëdhëniet mes Serbisë dhe SHBA-së dhe do të thosha se marrëdhëniet janë të mira, por besojmë që mund të bëjmë më shumë. Sigurisht, një nga temat ishte situata në Ukrainë, një nga tragjeditë më të mëdha të këtij shekulli. Prandaj, nuk është për t’u habitur që përfaqësuesit amerikanë paraqitën aspekte të ndryshme të asaj situate në kombinim me marrëdhëniet ndërmjet Serbisë dhe BE-së dhe faktin se nga pikëpamja e BE-së dhe SHBA-së, Serbia duhet të veprojë si anëtare e BE-së dhe t’u bashkohet sanksioneve. Është e qartë që kjo është politika jonë dhe nga ana tjetër, Serbia duhet të mendojë për të.

Zëri i Amerikës: Kryeministrja Ana Bërnabiç, tha se biseda e saj me zonjën Karen Donfried ishte “e vështirë, konstruktive dhe korrekte” dhe se asaj “i gumëzhinte në kokë” pas bisedës. Mund të na thoni çfarë ishte kaq e vështirë?

Ambasadori Hill: Nuk e di çfarë ka menduar kur ka thënë “e vështirë”, biseda ishte shumë pozitive. Sigurisht që ne kemi dallime për disa çështje, siç janë sanksionet dhe ka dallime të tjera – për shembull, sa shpejt Serbia dhe Kosova mund të përparojnë në bisedime. Por ka edhe shumë ngjashmëri në politikat tona, përfshirë edhe ekonominë, për të cilat u diskutua shumë në takimin me kryeministren dhe presidentin.

Zëri i Amerikës: Përse është e rëndësishme për Amerikën dhe BE-në që Serbia të vendosë sanksione kundër Rusisë?

Ambasadori Hill: Më duhet të them se ka pasur një keqkuptim në lidhje me raportin (mbi vizitën në rajon) të shkruar nga Senatori (Chris) Murphy dhe njerëzit disi e kuptuan se ato 60 ditë, që kishin të bënin me një çështje ekonomike, kishin të bënin me sanksionet – gjë që nuk është e vërtetë. Unë isha atje dhe nuk bëhej fjalë për sanksione. Por Shtetet e Bashkuara po i thonë Serbisë se nuk është çështja nëse do të shkoni në Lindje apo Perëndim, por ka vetëm një drejtim dhe i takon Serbisë për të vendosur sa shpejt dëshiron të arrijë atje… Rusia vështirë se mund të jetë një model tani, nuk është një vend që do të dëshironit ta kishit mik apo aleat. Dhe mendoj se po bëhet gjithnjë e më e qartë se çfarë duhet të bëjnë vendet. Më në fund, u takon vendeve të vendosin dhe askush nuk po i bën trysni askujt, njerëzit në Serbi duhet të vendosin se në cilin drejtim duan të shkojnë.

Zëri i Amerikës: A do të ketë pasoja në marrëdhëniet mes Serbisë dhe Shteteve të Bashkuara nëse nuk i vihen sanksione Rusisë?

Ambasadori Hill: Është një pyetje hipotetike. Ajo që do të donim është thellimi i marrëdhënieve me Serbinë. Ne e dimë se sa e rëndësishme është Serbia në rajon dhe në Evropë dhe do të donim të kishim marrëdhënie më të mira. Shtetet e Bashkuara tani kanë marrëdhënie më të mira me BE-në për shkak të kësaj lufte të tmerrshme në Ukrainë. Ne po flasim me Serbinë se çfarë mund të bëjmë së bashku për t’i dhënë fund kësaj lufte… Nuk do të doja të hyja në këtë, nuk po flasim për pasojat. Thelbi është se ne do të donim marrëdhënie më të mira dhe mundësitë për të gjetur interesa të përbashkëta.

Zëri i Amerikës: Disa ekspertë thonë se çështja e Kosovës është një burim i madh i ndikimit rus në Serbi dhe zyrtarët serbë shpesh thonë se Rusia po i mbron interesat e Serbisë në Këshillin e Sigurimit të OKB-së. A ka Amerika një kundërpërgjigje për këtë?

Ambasadori Hill: Unë nuk kam parë asgjë që tregon se Rusia po mbron dikë përveç zotit (Vladimir) Putin. Dhe do të isha shumë i kujdesshëm me argumentet se Serbia përfiton nga veprimet e Rusisë. Unë e kuptoj dinamikën në Këshillin e Sigurimit të OKB-së, e kuptoj thelbin. Por, Serbia duhet të vendosë se çfarë marrëdhëniesh do të ketë me fqinjët e saj dhe si do t’u qaset atyre. Qëndrimi ynë është se Serbia duhet të mbështesë bisedimet e ndërmjetësuara nga BE-ja. Nuk mendoj se Serbia duhet ta shikojë Rusinë në raport me Kosovën, apo anasjelltas, por ta shikojë secilën situatë veç e veç. Rusia është larguar kaq shumë nga ajo që ne e quajmë dinjitet ndërkombëtar, aq larg nga vlerat perëndimore, kështu që nëse mendoni se Rusia do të ndihmojë disi me Kosovën – duhet ta mendoni sërish.

Zëri i Amerikës: A besoni se do të vazhdojnë bisedimet Serbi-Kosovë, që janë në vendnumërim dhe kur?

Ambasadori Hill: Për këtë do të vendosin Kosova dhe Serbia. E di që BE-ja po përpiqet shumë të vendosë në tryezë ide të ndryshme, tema për të diskutuar, për të ruajtur vrullin. Nuk është shumë argëtuese të jesh ndërmjetësues, e kam bërë këtë në të kaluarën. Negociatat janë shumë të vështira dhe e di që BE-ja po bën më të mirën që mundet dhe Serbia dhe Kosova duhet ta respektojnë këtë. Këto çështje nuk janë të lehta, nëse do të ishin, do të ishin zgjidhur shumë kohë më parë. Duhet të kuptojmë vështirësitë, por jo të mbetemi peng i tyre, por të shohim se ku do të donim të arrinim. Duam të ngecim në këtë kohë apo duam një jetë më të mirë për popullin e Serbisë. Por, nuk janë diplomatët amerikanë ata që duhet t’u thonë serbëve se çfarë të bëjnë.

Zëri i Amerikës: Si e komentoni faktin që Serbia po blenë armë nga Rusia dhe Kina?

Ambasadori Hill: Shtetet e Bashkuara kanë një qëndrim për këtë; Serbia duhet të mendojë në mënyrë afatgjatë për një strukturë sigurie që e bën atë të sigurt. Dhe strukturat e përbashkëta të sigurisë janë më të mirat. Mendoj se është shumë e vështirë në shekullin 21 të blesh pak pajisje nga njëra anë, pak nga ana tjetër dhe të besosh se kjo u shërben interesave tuaja të sigurisë. Në fund, e di që serbët nuk pajtohen me këtë, por në fund është mirë që Serbia të jetë në NATO. Do të duhet kohë, e njoh shumë mirë historinë. Historianët shikojnë prapa, diplomatët shohin përpara. Besoj se Serbia do ta kuptojë se mbrojtja e përbashkët, është zgjidhja më e mirë.

Zëri i Amerikës: Organizata ndërkombëtare Freedom House, këtë vit tha se Serbia nuk është një regjim demokratik por një regjim hibrid, se liria e medias është e rrezikuar dhe korrupsioni është i përhapur. Dhe kjo gjendje është regjistruar prej disa vitesh. A jeni dakord me këto gjetje?

Ambasadori Hill: Këto janë çështje komplekse që kanë të bëjnë me situatën e brendshme këtu dhe çfarë po bëhet në lidhje me liritë e medias. Në Shtetet e Bashkuara e vlerësojmë shumë lirinë e medias, faktin që ka mendime të ndryshme për gjithçka. Mendoj se kjo është shumë e rëndësishme për demokracinë dhe do të jem i lumtur t’ia paraqes shembullin tonë popullit serb. Besoj se Serbia do të kuptojë se mediat e lira janë pjesë e demokracisë dhe se demokracia është rruga drejt një situate më të mirë ekonomike. Demokracia nënkupton shumësi opinionesh dhe besoj se Serbia duhet të përpiqet për këtë. Por, unë jam një diplomat i huaj, mysafir tek ju, serbët duhet të vendosin për këtë. Nuk do të hyj në atë se a pajtohem me gjetjet e disa organizatave. Unë kam një mendim personal për këtë, por nuk do ta thosha.

Zëri i Amerikës: A keni ndonjë pritshmëri nga qeveria e re e Serbisë?

Ambasadori Hill: Do të doja të shihja se çfarë qeverie do të jetë. Neve në Amerikë na duhen disa muaj për të formuar një qeveri. Unë jam i sapoardhur këtu dhe jam gati për detyrën time, të punoj me qeverinë e re të Serbisë dhe të shoh se nga po shkon ajo. Nëse do të isha qytetar i këtij vendi, gjë që nuk jam, do të isha shumë kureshtar të shishja se në ç’drejtim do të shkojë. Një gjë shumë e rëndësishme ndodhi më 24 shkurt, kur Rusia nisi një agresion ndaj vendit fqinj. Unë me të vërtetë nuk e kuptoj se si dikush mund të jetë mbështetës i Rusisë ose të flasë në favor të Rusisë. Shpresoj që qeveria e re do të marrë një drejtim të caktuar, por është në dorën e atyre që do të formojnë qeverinë. Mezi pres të shoh si do të jetë.

Zëri i Amerikës: A nënkupton ky “drejtim i caktuar” më pak bashkëpunim me Rusinë?

Ambasadori Hill: Nuk do të thosha bashkëpunim, më mirë do të thosha më pak besim në Rusinë. Ideja se Rusia do t’i zgjidhë problemet serbe në Kosovë ose diku tjetër – vetëm shikoni situatën në Ukrainë dhe më thoni se është i vlefshëm propozimi që Serbia të mbështetet në Rusi për çfarëdo qoftë.

Vepra dhe kontributi i Medeleine Albright, ish -Sekretares amerikane të Shtetit, do të nderohet edhe nga Kosova. Në ceremoninë mortore që mbahet të mërkurën Washington, dashurinë dhe ndihmën e saj të madhe për Kosovën, do ta nderojnë me pjesmarrje presidentja Vjosa Osmani dhe kryeministri Albin Kurti, njofton RTK.

Ata janë nisur të hënën në mbrëmje, drejt Shteteve të Bashkuara të Amerikës, që të jenë të pranishëm në këtë ceremoni funebre, e cila pritet të mbledhë personalitete të shquara nga mbarë bota.

Ndikimi që la pas vetës tek politika amerikane, ish-Sekretarja e Shtetit, Medeline Albright, në raport me Kosovën, është e jashtëzakonshme. Një fakt i tillë u pohua edhe nga Ndihmësekretarja amerikane për Byronë e Çështjeve Evropiane dhe Euroaziatike, Karin Donfried.

Gjatë vizitës në Kosovë, këtë të hënë, në konferencë për media me presidenten Osmani, ajo rikujtoi edhe një herë dëshirën e Medeline Albright, për ta parë një Kosovë të përparuar.

“Së fundi humbëm një nga avokatet më të fuqishme të pavarësisë dhe sovranitetit të Kosovës, Sekretaren e Shtetit, Madeline Albright. Ajo ishte thellësisht e përkushtuar ndaj Kosovës dhe së ardhmes së saj”, tha Donfried, duke risjellë në vëmendje edhe dashurinë dhe respektin që Kosova ruan për të, e dëshmuar kjo në mënyra të ndryshme.

“Dua t’ia vë në dukje presidentes Osmani, mirënjohjen e saj për Sekretaren e Shtetit Albrighit, duke shpallur ditë kombëtare të zisë”, tha ajo.

Ajo vlerësoi edhe udhëtimin e Osmanit e Kurtit drejt Washingtonit për të marrë pjesë në ceremoninë motore. “Gjithashtu për të udhëtuar drejt Washingtonit, sot më vonë së bashku me kryeministrin Kurti, për të nderuar kujtimin e saj”.

Ndikimi që la pas vetës tek politika amerikane, ish-Sekretarja e Shtetit, Medeline Albright, në raport me Kosovën, është e jashtëzakonshme. Një fakt i tillë u pohua edhe nga Ndihmësekretarja amerikane për Byronë e Çështjeve Evropiane dhe Euroaziatike, Karin Donfried.

Gjatë vizitës në Kosovë, këtë të hënë, në konferencë për media me presidenten Osmani, ajo rikujtoi edhe një herë dëshirën e Medeline Albright, për ta parë një Kosovë të përparuar.

“Së fundi humbëm një nga avokatet më të fuqishme të pavarësisë dhe sovranitetit të Kosovës, Sekretaren e Shtetit, Madeline Albright. Ajo ishte thellësisht e përkushtuar ndaj Kosovës dhe së ardhmes së saj”, tha Donfried, duke risjellë në vëmendje edhe dashurinë dhe respektin që Kosova ruan për të, e dëshmuar kjo në mënyra të ndryshme.

“Dua t’ia vë në dukje presidentes Osmani, mirënjohjen e saj për Sekretaren e Shtetit Albrighit, duke shpallur ditë kombëtare të zisë”, tha ajo.

Ajo vlerësoi edhe udhëtimin e Osmanit e Kurtit drejt Washingtonit për të marrë pjesë në ceremoninë motore. “Gjithashtu për të udhëtuar drejt Washingtonit, sot më vonë së bashku me kryeministrin Kurti, për të nderuar kujtimin e saj”.

Udhëtimin drejt Washingtonit të presidentes Osmani e kryeministrit Kurti, ditë më parë për RTK- në, e konfirmuan zyrtarët përkatës të të dy institucioneve. Megjithatë, këshilltarët për media, kanë qenë të rezervuar në dhënien e informatave, nese drejtuesit e shtetit të Kosovës, do të kenë edhe takime me zyrtarë amerikanë.

Albright së fundit herë vizitoi Kosovën në qershor 2019, në 20 vjetorin e çlirimit duke marrë pjesë personalisht në zbulimin e bustit të saj, ku i pranishëm ishte edhe ish presidenti Bill Clinton. Ish – Sekretarja e Shtetit, Madeline Albright, vdiq me 23 mars.

Familja e saj njoftoi se ajo u shua e rrethuar nga më të dashurit e saj. E në anën tjetër, dy ditë më vonë, presidentja Vjosa Osmani, shpalli një ditë zije në Kosovë, në nderim të vepres dhe kontributit të saj për lirinë dhe demokracinë e këtij vendi. Ceremonia mortore për Albright, do të mbahet me 27 prill (e mërkurë) në Katedralen Kombëtare në Washington.

Pjesmarrja është vetëm me ftesa. Megjithatë, për shkak të interesimit të madh, do të ketë transmetim direkt nëpërmjet Livestream.

Një gjykatës i Nju Jorkut tha të hënën se ish-presidenti Donald Trump shpërfilli autoritetin e gjykatës, duke mos iu përgjigjur në mënyrë të përshtatshme një thirrjeje të lëshuar nga Prokurorja e Përgjithshme e shtetit të Nju Jorkut, në kuadër të një hetimi civil mbi bizneset e tij.

Gjykatësi Arthur Engoron urdhëroi zotin Trump të paguajë një gjobë prej 10,000 dollarësh në ditë.

“Zoti Trump, e di që ti e merr seriozisht biznesin tënd dhe unë e marr seriozisht detyrën time”, tha gjykatësi Engoron përpara se të jepte vendimin nga gjykata në një sallë gjyqi në Manhatan.

Prokurorja e Përgjithshme e Nju Jorkut, Letitia James, një demokrate, i kishte kërkuar gjykatës ta mbante përgjegjës zotin Trump pasi ai shkeli një afat të caktuar nga gjykata më 31 mars për të dorëzuar dokumentet. Gjykatësi tha se konstatimi për mosrespektim të gjykatës ishte i përshtatshëm sepse zoti Trump dhe avokatët e tij nuk kishin treguar se ishin përpjekur me seriozitet të siguronin dokumentet e kërkuara.

Ish-presidenti republikan Donald Trump është përballur me prokuroren James në gjykatë për hetimin e saj, të cilin ai e ka quajtur një “gjueti shtrigash” të motivuar politikisht.

Prokurorja James ka kryer një hetim të gjatë mbi Organizatën Trump, kompaninë e familjes së ish-presidentit, duke u përqendruar tek ajo që ajo thotë se është një prirje për të mashtruar autoriteteve tatimore mbi vlerën e pronave të tij.

Vendimi i gjykatësit erdhi pavarësisht nga këmbënguljet e vazhdueshme të avokates së zotit Trump, Alina Habba, se ajo kishte bërë përpjekje të mëdha për të respektuar kërkesën, madje duke udhëtuar në Florida për të pyetur konkretisht zotin Trump nëse ai kishte në posedim ndonjë dokument që ka lidhje me kërkesën e gjykatës.

“Mocioni për shpërfillje të gjykatës është i papërshtatshëm dhe i gabuar”, tha ajo. “Ai ka respektuar kërkesën e gjykatës… nuk ka më dokumente që mund të dorëzohen nga Presidenti Trump.”

Zëdhënësit e zotit Trump nuk iu përgjigjën menjëherë një kërkese për koment.

Hetuesit e prokurores James kanë thënë në dosjet gjyqësore se kanë zbuluar prova se zoti Trump mund të ketë deklaruar në mënyrë të pasaktë vlerën e pronave të tij, si ajo e një fushe golfi dhe gradaçelat, në raportet e tij financiare për më shumë se një dekadë.

Një hetim penal paralel po zhvillohet për këtë çështje nga Prokurori tjetër demokrat i Qarkut të Manhatanit, Alvin Bragg.

Senatorët amerikanë, Chris Murphy, Jeanne Shaheen dhe Thom Tillis, thanë të martën në Beograd se Serbia duhet të harmonizojë politikën e saj të Jashtme me atë të Bashkimit Evropian.

Ata i bënë këto komente pas takimit me presidentin e Serbisë, Aleksandër Vuçiç, duke theksuar se “në këtë moment historik është me rëndësi që vendet demokratike të Evropës t’i dërgojnë mesazh të qartë Rusisë dhe të kërkojnë llogari”.

Të tre senatorët po qëndrojnë në rajon në kohën e agresionit rus në Ukrainë dhe shqetësimeve për ndikimet e konfliktit edhe në Ballkanin Perëndimor.

“Ndërsa Rusia vazhdon të humbasë në Ukrainë, ajo do të përpiqet të krijojë probleme në rajonet e brishta në afërsi. Unë jam në Serbi, Kosovë dhe Bosnje këtë javë me senatoren Shaheen dhe senatorin Thom Tillis, për të forcuar lidhjet e Shteteve të Bashkuara me Ballkanin, përballë përpjekjeve të huaja për të dëmtuar paqen”, shkroi në rrjetet sociale para takimeve në Beograd senatori Chris Murphy.

Ai tha se gjatë bisedimeve me presidentin serb, Aleksandër Vuçiç, i është thënë se synohet një bashkësi e vendeve demokratike që do të dënojnë agresionin rus në Ukrainë.

“I kuptojmë lidhjet historike ndërmjet Serbisë dhe Rusisë. Vazhdojmë të mbështesim Serbinë në rrugën e saj drejt anëtarësimit në Bashkimin Evropian, ndërsa kemi ardhur të forcojmë marrëdhëniet e mira që ka ajo me Shtetet e Bashkuara”, tha senatori Murphy.

Senatorja Shaheen tha se është biseduar për sanksionet kundër Rusisë dhe se diskutimet rreth tyre do të vazhdojnë.

“Siç tha edhe presidenti serb, e ardhmja e Serbisë është në perëndim me pjesën tjetër të Evropës dhe ajo ecën në atë drejtim me lidhjet tregtare, të biznesit dhe investimeve. Nëse ky është synimi, atëherë gjithsesi duhet të keni politikë të Jashtme të harmonizuar me Bashkimin Evropian”, tha senatorja Shaheen.

Beogradi ka votuar kundër Rusisë tre herë në Kombet e Bashkuara, por nuk ka vendosur sanksione kundër saj. Një aleate e vjetër e Serbisë, Moska mbështete qëndrimin e Beogradit për të mos njohur pavarësinë e Kosovës që u shpall në shkurt të vitit 2008 me mbështetjen e Shteteve të Bashkuara dhe vendeve kryesore të Bashkimit Evropian.

Senatori Murhy tha se është i zhgënjyer me mungesën e përparimit në procesin e bisedimeve Kosovë – Serbi dhe se për këtë çështje do të diskutohet edhe në Prishtinë më vonë gjatë kësaj jave.

Senatorët amerikanë thanë të martën gjithashtu se nëse Serbia dëshiron të anëtarësohet në Bashkimin Evropian, duhet të rishqyrtojë armatosjen e saj nga Rusia dhe Kina.

“Në planin afatgjatë, mendoj se çdo vend duhet të marrë një vendim nëse është në interesin e tyre më të mirë të sigurisë lidhja me Kinën. Nëse Serbia synon të jetë anëtare e Bashkimit Evropian, atëherë ndoshta nuk është në interesin e saj afatgjatë që të ketë një marrëdhënie sigurie me Kinën”, tha senatori Murphy.

Në fillim të këtij muaji, Kina i dorëzoi Beogradit një sistem të mbrojtjes ajrore, me gjithë paralajmërimet e mëparshme amerikane se Serbia nëse dëshiron integrimet perëndimore, duhet të përafrojë ushtrinë e saj me standardet perëndimore.

Pranimi i armëve kineze nxiti reagime mes shqetësimeve perëndimore se një grumbullim i armëve në Ballkan në kohën e luftës në Ukrainë, mund të kërcënojë paqen e brishtë në rajon.

Një meteor përshkoi një rrugë të gjatë nga shtëpia për të vizituar Tokën në 2014-ën.

Studiuesit zbuluan meteorin e parë të njohur ndëryjor që e ka goditur Tokën, sipas një dokumenti të Komandës Hapësinore të Shteteve të Bashkuara të publikuar së fundmi.

Një meteor ndëryjor është një shkëmb hapësinor që e ka origjinën nga jashtë sistemit tonë diellor — një dukuri e rrallë kjo.

Ai është i njohur si CNEOS 2014-01-08 dhe zbriti me përplasje përgjatë bregut verilindor të Papua Guinesë së Re më 8 janar 2014.

Zbulimi erdhi si befasi për Amir Siraj, i cili e identifikoi objektin si një meteor ndëryjor në një studim të vitit 2019 ku ai ishte bashkëautor ndërsa ishte kërkues universitar në Universitetin e Harvardit.

Siraj po hetonte ‘Oumuamua, objektin e parë të njohur ndëryjor në sistemin tonë diellor që u gjet në vitin 2017, me Abraham Loeb, profesorin e shkencës në Universitetin e Harvardit.

Siraj vendosi të kalonte nëpër bazën e të dhënave të NASA-s për Studimet e Objekteve Afër Tokës për të gjetur objekte të tjera ndëryjore dhe gjeti atë që ai besonte se ishte një meteor ndëryjor brenda disa ditësh.

Nevoja për shpejtësi

Shpejtësia e lartë e meteorit është ajo që fillimisht i ra në sy Siraj.

Meteori po lëvizte me një shpejtësi të lartë prej rreth 28 milje në sekondë (45 kilometra në sekondë) në krahasim me Tokën, e cila po lëviz me rreth 18.6 milje në sekondë (30 kilometra në sekondë) rreth diellit.

Shpejtësia heliocentrike përcaktohet si shpejtësia e meteorit në raport me diellin, e cila është një mënyrë më e saktë për të përcaktuar orbitën e një objekti. Është llogaritur në bazë të këndit në të cilin një meteor godet Tokën. Planeti lëviz në një drejtim rreth diellit, kështu që meteori mund të ketë goditur Tokën kokë më kokë, që do të thotë në drejtim të kundërt të drejtimit që po lëviz planeti, ose nga prapa, në të njëjtin drejtim që lëviz Toka.

Meqenëse meteori goditi Tokën nga prapa, llogaritjet e Siraj thanë se meteori po udhëtonte me rreth 37.3 milje në sekondë (60 kilometra në sekondë) në krahasim me diellin.

Më pas ai përcaktoi trajektoren e meteorit dhe zbuloi se ishte në një orbitë të palidhur, ndryshe nga orbita e mbyllur e meteorëve të tjerë. Kjo do të thotë se në vend që të qarkullonte rreth diellit si meteorët e tjerë, ai erdhi nga jashtë sistemit diellor.

“Me sa duket, ai u prodhua nga një yll tjetër, u dëbua nga sistemi planetar i atij ylli dhe ashtu ndodhi që të hyjë në sistemin tonë diellor dhe të përplaset me Tokën,” tha Siraj. syri.net

Pentagoni do të presë liderët nga tetë prodhuesit kryesorë të armëve amerikane të mërkurën për të diskutuar kapacitetin e industrisë për të përmbushur nevojat e Ukrainës për armë nëse lufta me Rusinë zgjat me vite, thanë të martën dy persona në dijeni për takimin.

Kërkesa për armë është rritur pasi pushtimi i Rusisë nxiti transferimin e armëve të SHBA-së dhe aleatëve në Ukrainë. Rifurnizimi si dhe planifikimi për një luftë më të gjatë pritet të diskutohet në takim, thanë burimet për Reuters në kushte anonimiteti.

Zyra e Blerjes dhe Mbështetjes e Pentagonit, blerësi i armëve për Departamentin e Mbrojtjes së SHBA-së, do të drejtojë takimin 90-minutësh dhe Zëvendës Sekretarja e Mbrojtjes Kathleen Hicks pritej të merrte pjesë, tha një nga personat.

Pentagoni ka thënë se armët më të dobishme janë sistemet më të vogla si raketat antitank Javelin dhe raketat anti-ajrore Stinger, të cilat Uashingtoni dhe aleatët i kanë dërguar në Ukrainë pothuajse çdo ditë.

Përdorimi intensiv, si dhe efektiviteti i fushëbetejës i shfaqur nga forcat ukrainase, ka nxitur interesin për rifurnizimin me këto armë.

Raytheon Technologies dhe Lockheed Martin Corp prodhojnë së bashku Javelins, ndërsa Raytheon prodhon Stingers.

Prodhuesit e tjerë kryesorë të armëve janë Boeing Co Northrop Grumman, General Dynamics dhe L3Harris Technologies. syri.net

Pas publikimit të raportit të përvitshëm për të drejtat e njeriut të Departamentit amerikan të Shtetit, Sekretari i Shtetit Antony Blinken foli me tone të zymta.

“Kthimi pas (për respektimin e të drejtave të njeriut) fatkeqësisht vazhdon”, tha Sekretari Blinken, duke përmendur luftën e Rusisë në Ukrainë.

“Shohim se çfarë lë pas kjo valë – trupa, duar të lidhura, të braktisur nëpër rrugë; teatro, stacione treni, godina banesash të shndërruara në rrënoja me civilët brenda tyre”, tha kryediplomati amerikan, ndërsa Rusia vazhdon me mizoritë sistematike dhe në masë të gjerë në Ukrainë.

Për Rusinë, raporti i Departamentit të Shtetit për të drejtat e njeriut për vitin 2021 nënvizoi dhunën e ushtruar ndaj kritikëve të Kremlinit dhe burgosjen e tyre. Vetëm këtë javë, një nga kundërshtarët kryesorë të Presidentit rus Vladimir Putin dhe një kritik i vendimit të Putinit për të pushtuar Ukrainën, Vladimir Kara-Murza, u arrestua dhe u ndalua në Moskë.

Të tjerë, përfshirë Alexei Navalnin, i cili u helmua dhe u burgos, renditen si shembuj të privimit arbitrar të jetës nga Rusia dhe hakmarrjeve të motivuara politikisht kundër individëve brenda dhe jashtë vendit.

“Qeveritë po burgosin më shumë kritikë. Sot, më shumë se një milion të burgosur politikë mbahen në mbi 65 vende”, tha Sekretari Blinken.

“I bëjmë thirrje Rusisë që të ndalojë abuzimin e ligjeve represive” për të vënë në objektiv qytetarët e saj, protestuesit jo të dhunshëm dhe paqësorë, si dhe individët që nuk po bëjnë asgjë më shumë se mbrojtjen e të drejtave të tyre universale, tha zëdhënësi i Departamentit të Shtetit Ned Price gjatë një konference për shtyp të martën.

Edhe përpara se të fillonte sulmi i Rusisë, Departamenti i Shtetit tha se sulmi i Moskës në vitin 2014 dhe aneksimi i Gadishullit të Krimesë të Ukrainës ka patur një efekt të rëndësishëm negativ në situatën e të drejtave të njeriut.

“Qeveria ruse vazhdoi të armatoste, stërviste, drejtonte dhe luftonte përkrah forcave separatiste të udhëhequra nga Rusia në Ukrainën lindore. Autoritetet gjithashtu kryen arrestime, ndalime dhe gjykime të motivuara politikisht të qytetarëve ukrainas në Rusi, shumë prej të cilëve pretendojnë se janë torturuar”, thuhet në raport.

Për Kinën, Departamenti i Shtetit tha se “gjenocidi dhe krimet kundër njerëzimit” ndaj ujgurëve kryesisht myslimanë dhe anëtarëve të grupeve të tjera të pakicave etnike dhe fetare në Xinjiang kanë vazhduar, me “arrestime masive të më shumë se një milion ujgurëve” dhe grupeve të tjera të pakicës myslimane në kampe internimi jashtëgjyqësore dhe dy milionë të tjerë që i nënshtrohen “riedukimit” gjatë ditës.

Në janar 2021, Shtetet e Bashkuara i klasifikuan zyrtarisht politikat e Kinës ndaj ujgurëve si gjenocid dhe krime kundër njerëzimit.

Zyrtarët e qeverisë kineze dhe të shërbimeve të sigurisë shpesh bënë shkelje të të drejtave të njeriut pa u ndëshkuar, thuhet në raport.

“Problemet e rëndësishme të të drejtave të njeriut përfshinin raporte të besueshme të vrasjeve arbitrare ose të paligjshme nga qeveria; zhdukjet e detyruara nga qeveria; torturat nga qeveria; kushtet e ashpra dhe kërcënuese për jetën në burg dhe gjatë paraburgimit”, thotë Departamenti i Shtetit.

Për Iranin, raporti amerikan paraqet një pamje të rëndë, duke përmendur abuzime të rëndësishme të të drejtave të njeriut, përfshirë raporte të besueshme të ekzekutimeve për krime që nuk përmbushin standardin ligjor ndërkombëtar; vrasje arbitrare nga qeveria dhe agjentët e saj; zhdukjet me forcë që i atribuohen qeverisë dhe agjentëve të saj; tortura ose trajtim mizor, çnjerëzor ose poshtërues nga qeveria dhe agjentët e saj; si dhe arrestimi apo ndalimi arbitrar.

“Ne vazhdojmë të gjejmë mënyra si në publik ashtu edhe në mënyra shumë të matura për të mbështetur njerëzit që po përpiqen të avancojnë situatën e të drejtave të njeriut në Iran”, tha Lisa Peterson, ushtruese e detyrës së ndihmës sekretares së shtetit për demokracinë, të drejtat e njeriut dhe çështjet e punës. “Ne kemi vënë gjithashtu në veprim një sërë mekanizmash të sanksioneve”, shtoi ajo.

Raporti gjithashtu vuri në dukje veprimet e qeverisë egjiptiane kundër disidentëve politikë, korrupsionin e vazhdueshëm nga udhëheqësi venezuelian Nicolas Maduro dhe ndihmësit e tij kryesorë, dhe kufizimet e vendosura në fjalimin politik nga qeveritë si Kuba, Etiopia, Sudani dhe Bjellorusia.

Për gati pesë dekada, Departamenti i Shtetit ka publikuar raportin e tij vjetor mbi praktikat e të drejtave të njeriut. Raporti i vitit 2021 mbulon 198 vende dhe territore anembanë globit.