Kolegët republikanë të ish-presidentit amerikan Donald Trump dolën në mbrojtje të tij të martën, duke kërkuar shpjegime për kontrollin e FBI-së në shtëpinë e tij Mar-a-Lago në Florida, ku agjentët kërkuan dokumente të klasifikuara që ai i mori nga Shtëpia e Bardhë në fund të mandadit të tij në janar të vitit 2021.

Udhëheqësi i pakicës në Dhomën e Përfaqësuesve, Kevin McCarthy u zotua të hapë një hetim nëse republikanët marrin kontrollin e Dhomës së Përfaqësuesve nga demokratët në fillim të vitit të ardhshëm, që sondazhet sugjerojnë se është një mundësi e fortë politike.

“Kam parë mjaft”, tha ligjvënësi McCarthy në një postim në Twitter. “Departamenti i Drejtësisë ka arritur në një gjendje të patolerueshme politizimi. Pasi republikanët të marrin kontrollin e Dhomës së Përfaqësuesve, ne do të bëjmë një hetim të menjëhershme të këtij departamenti, do të ndjekim faktet dhe nuk do të lëmë gur pa lëvizur.”

Ai paralajmëroi Prokurorin e Përgjithshëm Merrick Garland, kreun e Departamentit të Drejtësisë, duke thënë “ruani dokumentet tuaja dhe hape kalendarin tuaj” për të dëshmuar në një hetim mbi këtë çështje.

Mike Pence, i cili shërbeu në postin e nënpresidentit në kohën kur Donald Trump ishte president, tha: “unë ndaj shqetësimin e thellë të miliona amerikanëve për kontrollin e paprecedentë të rezidencës personale të Presidentit Trump. Asnjë ish-president i Shteteve të Bashkuara nuk i është nënshtruar ndonjëherë një bastisjeje në rezidencën e tyre personale, në historinë e Amerikës”.

Zoti Pence tha se kontrolli i së hënës në pronën e zotit Trump në buzë të oqeanit Atlantik “minon besimin e publikut në sistemin tonë të drejtësisë dhe Prokurori i Përgjithshëm Garland duhet t’i japë llogari të plotë popullit amerikan se pse u ndërmor ky veprim dhe ai duhet ta bëjë këtë menjëherë”.

Ligjvënësit e tjerë republikanë e quajtën kontrollin një shpërdorim të pushtetit, megjithëse kontrolli ishte i autorizuar nga gjykata dhe ka të ngjarë të jetë miratuar në nivelet më të larta të Departamentit të Drejtësisë. Ende nuk dihet se çfarë roli ka luajtur prokurori Garland në këtë çështje.

Ligjvënësja konservatore Marjorie Taylor Greene shkruajti në Twitter “Anuloni fondet për FBI-në!”, duke përdorur të njejtat fjalë që disa ligjvënës liberalë përdorën për policinë në përgjigje të akuzave për përdorim të tepruar të forcës nga departamentet e policisë lokale kundër pakicave.

Gazetari konservator i kanalit Fox News, Sean Hannity, një aleat për një kohë të gjatë i zotit Trump, u tha miliona shikuesve të tij të hënën mbrëma se, “nëse jeni të lidhur me zotin Donald Trump në ndonjë mënyrë, bëni përgatitjet e duhura sepse ata do t’ju ndjekin me fuqinë e plotë të qeverisë federale.”

Ndërkohë, demokratët nuk bënë shumë komente mbi kontrollin e pronës së zotit Trump dhe Shtëpia e Bardhë tha se Presidenti Joe Biden nuk kishte njohuri paraprake për operacionin e FBI-së, i cili zgjati për orë të tëra.

Kryetarja e Dhomës së Përfaqësuesve Nancy Pelosi tha: “Ne besojmë në sundimin e ligjit. Asnjë person nuk është mbi ligjin, madje as presidenti i Shteteve të Bashkuara, as një ish-president i Shteteve të Bashkuara. “

Ndërkohë, ish-presidenti Trump e shfrytëzoi kontrollin e shtëpisë së tij si një shans për të mbledhur më shumë fonde për një kandidim të mundshëm presidencial në zgjedhjet e vitit 2024.

Në një mesazh me celularë dërguar mbështetësve të martën në mëngjes, Trump deklaroi “MAR-A-LAGO u bastis”. Ai tha: “Është koha që ÇDO PATRIOT të ngrihet kundër Gjuetisë së pakontrolluar të Shtrigave nga e Majta dhe kundër persekutimit politik të Presidentit Trump!”

Ai u kërkoi mbështetësve të kontribuonin me shuma mes 45 dhe 5,000 dollarësh.

Ish-presidenti Trump mund të zbulojë përmbajtjen e urdhrit për kontrollin e pronës së tij, por ende nuk e ka bërë këtë. Ai ia dorëzoi 15 kuti me materiale të ndryshme, disa prej tyre me dokumente sekrete, Administratës Kombëtare të Arkivave në janar, një vit pas largimit nga detyra.

Por FBI mori urdhrin e kontrollit për të kërkuar më shumë dokumente dhe mori më shumë materiale pasi kontrolloi zyrën e zotit Trump dhe hapi kasafortën e tij.

Akti i Regjistrit Presidencial, një ligj i vitit 1978 thotë se të gjitha të dhënat presidenciale janë në pronësi të publikut dhe duhet të transferohen automatikisht nën kujdestarinë e Adminstratës Kombëtare të Arkivave menjëherë pas largimit të Presidenti nga detyra. Të gjitha bibliotekat dhe muzetë presidenciale janë pjesë e Administratës Kombëtare të Arkivave, megjithëse ish-presidenti Trump nuk ka ndërtuar një objekt të tillë dhe ka treguar pak interes për ta bërë këtë.

Zoti Trump mund të përballet me akuza penale për mosdorëzimin e menjëhershëm të dokumenteve sekrete pas largimit nga detyra, megjithëse një veprim i tillë do të ishte një gjë e rrallë.

Ai gjithashtu përballet me një hetim për rolin e tij në nxitjen sulmit të 6 janarit 2021 në Kapitol, ndërsa ligjvënësit ishin mbledhur për të çertifikuar fitoren e demokratit Joe Biden në zgjedhjet presidenciale të vitit 2020 dhe për një skemë të disa prej avokatëve të tij për të zëvendësuar elektorët që mbështesnin zotin Biden me njerëz që mbështesnin zotin Trump.

Përveç kësaj, Donald Trump po përballet me një hetim në shtetin jugor të Xhorxhias, ku i kërkoi një zyrtari të zgjedhjeve shtetërore që t’i “gjente” votat e mjaftueshme, më shumë se 11,000, që i duheshin për të përmbysur fitoren e zotit Biden në këtë shtet.

Ish-presidenti amerikan, Donald Trump njoftoi se shtëpia e tij në Florida është bastisur nga agjentët e FBI-së.

Sipas tij, agjentët kanë hapur edhe kasafortën në vilën e njohur si Mar-a-Lago.

Por në një intervistë, djali i tij, Eric Trump, tha se agjentët e FBI nuk kanë gjetur asgjë në kasafortë. Edhe një burim pranë Trump tha për CBS se agjentët e FBI janë larguar pa gjetur ndonjë gjë.

Ish-presidenti e ka quajtur këtë sulm të motivuar politikisht. Sipas Trump, ai ka për qëllim që të pengojë kandidimin e tij në zgjedhjet e vitit 2024.

Mendohet se qëllimi i aksionit ishte që të shqyrtohej nëse Trump ka marrë dokumente të klasifikuara nga u largua nga Shtëpia e Bardhë.

Trump ishte në Nju Jork kur ndodhi bastisja në shtëpinë e tij në Florida.

“Këto janë kohë të errëta për kombin tonë, pasi shtëpia ime e bukur, Mar-A-Lago në Palm Beach të Floridës, është aktualisht nën rrethim, po bastiset dhe kontrollohet nga një grup i madh agjentësh të FBI-së. Asgjë si kjo nuk ka ndodhur ndonjëherë, nuk i ka ndodhur më parë një presidenti të Shteteve të Bashkuara”, tha Trump.

syri.net

I dërguari i Posaçëm i Shteteve të Bashkuara për Ballkanin Perëndimor, Gabriel Escobar, tha se krijimi i Asociacionit të komunave me shumicë serbe nuk duhet të jetë në kundërshtim me Kushtetutën e Kosovës, dhe të krijojë “shtet brenda shtetit”.

Gjatë një bashkëbisedimi me gazetarët, Escobar tha se qëndrimi i SHBA-së është që të zbatohen të gjitha marrëveshjet e arritura në kuadër të dialogut Kosovë-Serbi, por tha se duhet të ketë diskutim për çështjen e Asociacionit, që të mos bie ndesh me ligjet.

Gjatë këtij diskutimi ai foli edhe për situatën në rajon dhe përsëriti qëndrimin se “nuk do të ketë luftë në Bosnjë e Hercegovinë”.

“Ne kemi qenë të qartë se palët janë pajtuar më herët për Asociacionin, prandaj duhet të diskutohet. Megjithatë, Asociacioni nuk duhet të ndërhyjë, nuk duhet të bie në kundërshtim me Kushtetutën e Kosovës, nuk duhet të krijojë probleme në funksionalitetin e Kosovës dhe nuk duhet të jetë shtet brenda një shteti”, deklaroi ai.

Escobar tha se ka modele të shumta evropiane, ku minoritetet mund të mbrojnë trashëgiminë e tyre kulturore dhe gjuhën amtare, por pa shkelur kornizën kushtetuese të vendit ku jetojmë.

“Ne duam të gjejmë disa prej këtyre shembujve, dhe ndoshta edhe t’i përdorim si udhëzues për të zbatuar Asociacionin. Prandaj, kam shpresë se mund t’i diskutojmë këto në Bruksel më vonë gjatë këtij muaji”, shtoi ai.

Kosova dhe Serbia kanë arritur më 2013 Marrëveshjen për Asociacionin në kuadër të dialgout të ndërmjetësuar nga Bashkimi Evropian. Dy vjet më vonë, palët kanë nënshkruar Marrëveshjen mbi parimet e themelimit të Asociacionit.

Por, po atë vit, Gjykata Kushtetuese e Kosovës tha se disa pika të marrëveshjes nuk ishin në harmoni me aktin më të lartë juridik, dhe tha se ato mund të harmonizohen me ake nënligjore të Qeverisë.

Kryeministri i Kosovës, Albin Kurti, kundërshton një asociacion njëetnik, ndërkaq Serbia insiston në krijimin e tij.

Më 18 gusht, Kurti dhe presidenti i Serbisë, Aleksandar Vuçiq, do të takohen në Bruksel për të vazhduar dialogun, dhe Escobar tha se shpreson që në këtë takim të flitet edhe për Asociacionin.

Escobar tha se për Shtetet e Bashkuara, çështja e Kosovës “nuk është çështje e hapur”, pasi Uashingtoni dëshiron që Kosova të njihet prej të gjitha shteteve të BE-së dhe të anëtarësohet në organizata ndërkombëtare.

Ai tha se SHBA-ja mbështet “plotësisht dialogun e lehtësuar nga BE-ja”.

“Ne besojmë se ka një zgjidhje të përhershme për çështjen e targave të makinave. Besoj se jemi afër zbatimit e udhërrëfyesit për energjinë në veri, jemi afër nënshkrimit të marrëveshjes për të pagjeturit dhe shpresoj që palët do ta nënshkruajnë këtë marrëveshje shumë shpejt. Dhe sikurse sekretari [amerikan i Shtetit, Antony]Blinken u tha presidentes [Vjosa Osmani] dhe [Albin Kurti] kryeministrit të Kosovës kur ishin në SHBA, ne duhet të nisim diskutimin për Asociacionin”, tha ai.

Duke folur për tensionet në veri, që erdhën si rezultat i dy vendimeve të Qeverisë së Kosovës, atë për dokumentet dhe targat serb, Escobar tha se mospajtimet për veriun duhet të zgjidhen përmes diplomacisë.

“Ajo që po ndodh në veriun e Kosovës në të vërtetë është çështje midis Kosovës dhe Serbisë, prandaj është urgjente që të dy liderët e dy shteteve të takohen në Bruksel në kuadër të dialogut të lehtësuar nga BE-ja dhe të tejkalojnë mospajtimet sa i përket veriut”, tha ai.

Më 31 korrik, serbët lokalë ngritën barrikada në veri të Kosovës, duke kundërshtuar dy vendime të Qeverisë së Kosovës.

Qeveria e Kosovës kishte paraparë që nga 1 gushti të zbatonte lëshimin e dokumenteve për hyrje-dalje për të gjithë shtetasit e Serbisë që hyjnë në territorin e Kosovës.

Këtë praktikë, Serbia e aplikon ndaj shtetasve të Kosovës qe 11 vjet.

Po ashtu nga 1 gushti ishte paraparë të niste procesi i riregjistrimit të makinave me targa me akronime të qyteteve të Kosovës – që lëshohen nga Serbia – e që Prishtina i konsideron të paligjshme.

Zbatimi i dy vendimeve është shtyrë për 1 shtator, pas ndërmjetësimi të SHBA-së dhe BE-së me qëllim të uljes së tensioneve.

Kosova dhe Serbia zhvillojnë diskutime në Bruksel nën ndërmjetësimin e BE-së, që nga viti 2011. Procesi i dialogut ka për synim normalizimin e plotë të raporteve.

Kosova kërkon që një marrëveshje përfundimtare të përfshijë njohjen reciproke, ndërkaq Serbia insiston në një zgjidhje kompromisi.

“S’ka luftë në Bosnjë”

I dërguari i SHBA-së foli edhe për situatën në rajon. Ai tha se në Bosnjë e Hercegovinë nuk do të ketë luftë, por paralajmëroi kundër retorikës nxitëse nga përfaqësuesit.

Ai tha se pret që ky shtet të mbajë zgjedhje të lira më vonë gjatë këtij viti.

Sa i përket Malit të Zi, tha se SHBA-ja përkrah çdo qeveri që përfaqëson vlerat e BE-së dhe është e përkushtuar për NATO.

Ndërkaq, Maqedonisë së Veriut dhe Shqipërisë u premtoi mbështetje në reforma që do të përshpejtonin rrugën e tyre drejt BE-së, pasi këto dy shtete hapën zyrtarisht negociatat për anëtarësim me bllokun evropian.

Një grup senatorësh amerikanë, nga të dy krahët, paraqitën një projektligj që synon të mbështesë zhvillimin ekonomik, tregëtinë, si dhe të luftojë korrupsionin, përfshirë hartimin e legjislacioni të posaçëm për sanksionet, për të frenuar aktivitetet destabilizuese në Ballkanin Perëndimor.

Projekligji, i njohur ndryshe si Akti mbi Demokracinë dhe Prosperitetin në Ballkanin Perëndimor është paraqitur nga senatorja demokrate Jeanne Shaheen, kryetare e Nënkomisionit për Evropën dhe Bashkëpunimin mbi Sigurinë Rajonale dhe senatori republikan Roger Wicker.

Iniciativa vjen mes shqetësimesh të rritura në rajon për shkak të luftës në Ukrainë. Senatorja Shaheen thotë se marrëdhëniet e Shteteve të Bashkuara me Ballkanin Perëndimor janë thelbësore në këto momente, ku duken qartë synimet e Presidentit Putin për të përhapur ndikimin keqdashës në të gjithë Evropën Lindore.

“Projektligji i ri dypartiak forcon tregtinë dhe investimet mes SHBA-ve dhe Ballkanit Perëndimor, duke luftuar në të njejtën kohë korrupsionin, nëpërmjet miratimit të një ligjislacioni të posaçëm për sanksione kundër aktorëve destabilizues. Të gjitha këto hapin rrugën për një integrim më të gjerë euro-atlantik”, tha zonja Shaheen në prezantimin e iniciativës në faqen e saj në internet.

Projekligji udhëzon Sekretarin e Shtetit të ofrojë ndihmë teknike për çdo vend të Ballkanit Perëndimor për të zhvilluar një strategji kombëtare kundër korrupsionit.

Ai parashikon gjithashtu kthimin në ligj të dy urdhra ekzekutivë, që do të garantonin kompetenca për sanksione kundër atyre që kërcënojnë paqen dhe stabilitetin në Ballkanin Perëndimor dhe që janë të përfshirë në akte korruptive.

Po kështu synohet nxitja e partneritetin universitar, inkurajohet angazhimi i Korpusit të Paqes në rajon, krijimi i një iniciative për udhëheqësi rinore në Ballkan dhe si kërkohet nga Korporata Financiare për Zhvillim që të hapë një zyrë të shpallur më parë në rajon.

Zonja Shaheen ishte në krye të një grupi senatorësh amerikanë që vizituan në muajin prill Kosovën, Serbinë e Bosnje e Hercegovinën, mes shqetësimeve rreth ndikimit të konfliktit në Ukrainë, në Ballkanin Perëndimor. Vizita e tyre kishte për qëllim forcimin e lidhjeve mes Uashingtonit dhe Ballkanit Perëndimor, përballë përpjekjeve të huaja për të dëmtuar paqen.

Senatori Wicker tha se projektligji “do të dërgonte një sinjal të fortë dypartiak, se Shtetet e Bashkuara janë të përkushtuara për të mbështetur diplomacinë në rajon”.

Po kështu senatorët Dick Durbin, Thom Tillis, Chris Van Hollen, Ben Cardin e Chris Murphy janë mbështetës të këtij projektligji.

Për senatorin Tillis, në një kohë kur Rusia vazhdon luftën e saj të paligjshme kundër Ukrainës dhe kërcënon aleatët e NATO-s, rajoni i Ballkanit Perëndimor është kritik për sigurinë e Evropës.

Senatori Ben Cardin, Kryetar i Komisionit për Sigurinë dhe Bashkëpunimin në Evropë, i njohur si Komisioni amerikan i Helsinkit, tha se “në një kohë kur vendet e Ballkanit Perëndimor kanë bërë hapa të mëdhenj drejt qeverisjes demokratike, që nga fundi i luftrave në ish-Jugosllavi, përçarjet politike dhe korrupsioni në rritje, kërcënojnë të gërryejnë këtë përparim.

“Ne duhet të vazhdojmë të mbështesim partnerët dhe aleatët tanë demokratikë në Ballkanin Perëndimor. Ky projektligj dypartiak do të çojë përpara stabilitetin rajonal dhe përpjekjet kundër korrupsionit duke krijuar programe që inkurajojnë zhvillimin ekonomik gjithëpërfshirës, strategjinë kombëtare kundër korrupsionit dhe të mbajnë përgjegjës ata që kërcënojnë paqen në Ballkanin Perëndimor”, tha ai.

Senatorët amerikanë e shohin projekligjin si një mundësi për forcimin e mëtejshëm të marrëdhënieve mes SHBA-ve dhe Ballkanit Perëndimor, zgjerimin e mundësive ekonomike si dhe mbështetje për përpjekjet për të çuar përpara demokracinë dhe çrrënjosur korrupsionin.

Presidenti Joe Biden doli pozitiv në testin për COVID-19 përsëri të shtunën, pak më shumë se tre ditë pasi doli nga izolimi për shkak të koronavirusit, tha Shtëpia e Bardhë, në një rast të rrallë “riinfektimi” pas trajtimit me një ilaç antiviral.

Mjeku i Shtëpisë së Bardhë, Dr. Kevin O’Connor tha në një letër se presidenti Biden “nuk ka përjetuar rishfaqje të simptomave dhe vazhdon të ndjehet mjaft mirë”. Mjeku O’Connor tha se “nuk ka asnjë arsye për të rifilluar trajtimin në këtë moment”.

Presidenti Biden shkroi në rrjetet sociale se doli sërish pozitiv, një gjë që ndodh rrallë.

“Nuk kam simptoma, por do të izolohem për sigurinë e të gjithëve përreth meje”, shkroi ai duke theksuar se është ende në punë.

Në përputhje me udhëzimet e Qendrës për Kontrollin dhe Parandalimin e Sëmundjeve, presidenti Biden do të jetë në izolim për të paktën pesë ditë. Ai do të izolohet në Shtëpinë e Bardhë derisa të dalë negativ. Agjencia thotë se shumica e rasteve të rishfaqjes së infeksionit mbeten të lehta dhe se sëmurje të rënda gjatë asaj periudhe nuk janë raportuar.

Njoftimi se presidenti doli pozitiv, u bë vetëm dy orë pasi Shtëpia e Bardhë njoftoi një vizitë në Michigan këtë të martë për të nxjerrë në pah miratimin e një projektligji për të nxitur prodhimin vendas të teknologjisë së lartë. Presidenti Biden ishte planifikuar gjithashtu të vizitonte shtëpinë e tij në Wilmington, Delaware, të dielën në mëngjes, ku zonja e parë Jill Biden ka qëndruar ndërsa presidenti ishte pozitiv. Të dy udhëtimet janë anuluar.

Presidenti Biden, 79 vjeç, u trajtua me ilaçin antiviral Paxlovid, pasi për herë të parë doli pozitiv në 21 korrik. Ai rezultoi negativ për virusin të martën dhe të mërkurën e kaluar. Më pas ai u lirua nga izolimi ndërsa mbante një maskë në mjedise të mbyllura.

Presidenti Joe Biden dhe Xi Jinping i Kinës janë duke eksploruar mundësinë e takimit në person, tha një zyrtar i lartë i administratës pasi udhëheqësit kaluan më shumë se dy orë të enjten duke biseduar për të ardhmen e marrëdhënieve të ndërlikuara, me tensionet për Tajvanin që u shfaqën edhe një herë si një pikë përplasjeje.

Zyrtari nuk pranoi të identifikohej për të folur rreth bisedës. Presidenti Biden e bëri bisedën telefonike nga Zyra Ovale, ku iu bashkuan ndihmësa të lartë, përfshirë Sekretarin e Shtetit Antony Blinken.

Kur zoti Biden ishte nënpresident, ai kaloi orë të tëra me zotin Xi në Shtetet e Bashkuara dhe në Kinë, një përvojë që ai e kujton shpesh ndërsa flet për mundësitë e të dy vendeve për konflikt dhe bashkëpunim. Megjithatë, ata nuk janë takuar personalisht që kur Joe Biden u bë president vitin e kaluar.

Një tensionim i përsëritur është për shkak të Tajvanit, i cili vetëqeveriset prej dekadash, por që Kina e konsideron si pjesë të territorit të saj, një pretendim i theksuar nga zoti Xi të enjten.

“Ata që luajnë me zjarrin do të vdesin prej tij”, tha Ministria e Punëve të Jashtme pas telefonatës me Biden. “Shpresohet se SHBA-të do të jenë të qarta për këtë”.

Shtëpia e Bardhë publikoi përshkrimin e saj të bisedës për Tajvanin, duke thënë se Presidenti Biden “theksoi se politika e Shteteve të Bashkuara nuk ka ndryshuar dhe se Shtetet e Bashkuara kundërshtojnë fuqimisht përpjekjet e njëanshme për të ndryshuar status quo-në ose për të dëmtuar paqen dhe stabilitetin përgjatë ngushticës së Tajvanit”.

Qëllimi i telefonatës, e cila filloi në 8:33 të mëngjesit dhe përfundoi në 10:50 të mëngjesit, ishte që “të menaxhojmë me përgjegjësi dallimet tona dhe të punojmë së bashku aty ku përputhen interesat tona”, tha Shtëpia e Bardhë.

Si zakonisht, Kina nuk la asnjë dyshim se fajëson Shtetet e Bashkuara për përkeqësimin e marrëdhënieve mes dy vendeve.

“Presidenti Xi nënvizoi se përqasja dhe përcaktimi i marrëdhënieve Kinë-SHBA në termat e konkurrencës strategjike dhe për ta parë Kinën si rivalin kryesor dhe sfidën më serioze afatgjatë, do të ishte keqperceptim i marrëdhënieve mes Kinës dhe SHBA-ve dhe keqkuptim i zhvillimit të Kinës dhe do të mashtronte njerëzit e të dy vendeve dhe komunitetin ndërkombëtar”, tha Ministria e Punëve të Jashtme.

“Të dy krerët e shteteve patën një komunikim dhe shkëmbim të thelluar për marrëdhëniet dhe çështjet me interes të përbashkët Kinë-SHBA”, raportoi Televizioni Qendror i Kinës në faqen e tij të internetit.

Pika më e fundit e tensionit ka qenë vizita e mundshme e Kryetares së Dhomës së Përfaqësuesve Nancy Pelosi në Tajvan, ishull që vet-qeveriset në mënyrë demokratike dhe merr mbështetje joformale mbrojtëse nga Shtetet e Bashkuara, por që Kina e konsideron pjesë të territorit të saj. Pekini ka thënë se do ta konsideronte një udhëtim të tillë si një provokim, një kërcënim që zyrtarët amerikanë po e marrin me seriozitet të shtuar nën dritën e inkursionit të Rusisë në Ukrainë.

“Nëse SHBA këmbëngul të ndjekë rrugën e vet dhe të sfidojë vijën përfundimtare të Kinës, ajo me siguri do të përballet me përgjigje të forta”, tha Zhao Lijian, një zëdhënës i Ministrisë së Jashtme të Kinës, para gazetarëve në fillim të kësaj jave. “Të gjitha pasojat që vijnë do të përballohen nga SHBA-ja.”

Zonja Pelosi do të ishte zyrtarja më e lartë i zgjedhur në SHBA që do të udhëtonte në Tajvan që kur republikani Newt Gingrich vizitoi ishullin në vitin 1997, kur ishte kryetar i Dhomës së Përfaqësuesve. Presidenti Biden javën e kaluar u tha gazetarëve se zyrtarët ushtarakë amerikanë besonin se nuk ishte “ide e mirë” që zonja Pelosi të vizitonte ishullin për momentin.

John Kirby, zëdhënës i sigurisë kombëtare të SHBA-së, tha të mërkurën se ishte e rëndësishme që presidentët Biden dhe Xi të mbanin diskutimin rregullisht të hapur.

“Presidenti dëshiron të sigurohet që linjat e komunikimit me Presidentin Xi të mbeten të hapura sepse ato janë të nevojshme”, u tha zoti Kirby gazetarëve në një konferencë në Shtëpinë e Bardhë. “Ka çështje për të cilat ne mund të bashkëpunojmë me Kinën, dhe ka çështje ku padyshim ka fërkime dhe tensione”.

Presidentët Biden dhe Xi folën për herë të fundit në mars, menjëherë pas sulmit rus të Ukrainës.

“Kjo është një nga marrëdhëniet dypalëshe më të rëndësishme në botë sot, me shumë degëzime përtej të dy vendeve individuale,” tha zoti Kirby.

Disa analistë besojnë se presidenti Xi gjithashtu ka interes për të shmangur përshkallëzimin pasi ai kërkon një mandat të tretë të paprecedentë në detyrë në një kongres të Partisë Komuniste në pushtet që pritet në vjeshtë.

Presidenti Biden dëshiron gjithashtu të diskutojë çështjet e klimës dhe konkurrencës ekonomike, tha një person i informuar për bisedën, si dhe idenë e vendosjes së një kufiri të çmimit të naftës ruse për të ndëshkuar Moskën për luftën e saj në Ukrainë, një çështje që Sekretarja e Thesarit Janet Yellen e ngriti me homologët kinezë më herët në korrik.

Administrata Biden ka debatuar nëse do të heqë disa tarifa për mallrat kineze si një mënyrë për të lehtësuar inflacionin në rritje.

Kur presidenti Biden foli për herë të fundit me homologun Xi në mars, ai paralajmëroi për “pasoja” nëse Pekini do të jepte mbështetje materiale për luftën e Rusisë, dhe qeveria amerikane beson se kjo vijë e kuqe nuk është kaluar.

Tajvani është ankuar për manovra të shtuara ushtarake kineze gjatë dy viteve të fundit për ta detyruar atë të pranojë sovranitetin e Pekinit.

I dërguari i posaçëm amerikan për Ballkanin, Gabriel Escobar i tha Zërit të Amerikës pas nënshkrimit të marrëveshjes energjetike mes Korporatës Sfidat e Mijëvjeçarit dhe Kosovës se marrëveshja është shenjë e thellimit të bashkëpunimit në mes të Kosovës dhe Shteteve të bashkuara.

“Kosova është një partner jashtëzakonisht i mirë në rajon, është një vend kompentent në marrëdhënien tonë në rajon. Gjithçka që mund të bëjmë për ta thelluar bashkëpunimin, jemi të lumtur ta bëjmë”, tha ai.

Zoti Escobar tha se është e rëndësishme për të gjithë rajonin që të distancohet nga energjia ruse pasi Rusia e shfrytëzon atë si armë.

Në përgjigje të një pyetjeje të Zërit të Amerikës, lidhur me rrezikun e ndikimit të situatës së krijuar në Ukrainë dhe synimeve të Moskës tek Ballkani Perëndimor, zoti Escobar u shpreh optimist për zmbrapjsen e këtyre synimeve në rajon.

“Asnjëherë nuk kemi parë një unitet të tillë që kemi tani brenda NATO-s dhe unitetin që kemi me partnerët tanë evropianë për t’u siguruar që siguria evropiane është përparësia jonë më e madhe. Në këtë kontekst e konsiderojmë edhe Ballkanin Perëndimor dhe besoj që Ballkani Perëndimor do të jetë në rregull”, tha ai.

Ai shtoi se megjithë sfidat e ndryshme, të gjitha vendet e rajonit kanë përkrahjen dhe vëmendjen e Shteteve të Bashkuara.

Ish-presidenti Donald Trump do të kthehet të martën në Uashington, për herë të parë që nga largimi nga detyra, për të mbajtur një fjalim për politikën, përpara një grupi studimor aleat që ka hartuar një agjendë për një mandat të dytë të mundshëm.

Ish presidenti Trump do t’i drejtohet takimit dy ditësh të Institutit Politik Amerika e Para (AFIP), ndërsa disa këshilltarë po e nxisin atë të kalojë më shumë kohë duke folur për pikëpamjet e tij për të ardhmen dhe më pak kohë duke u ndërlidhur me zgjedhjet e 2020-ës, ndërsa përgatitet të shpallë një fushatë të pritshme për Shtëpinë e Bardhë në vitin 2024.

“Unë besoj se do të jetë një fjalim shumë i përqendruar në politika, me shikim përpara, më shumë si një fjalim mbi gjendjen e kombit 5.0”, tha presidentja e AFPI-së, Brooke Rollins. E përbërë nga ish-zyrtarë dhe aleatë të administratës së zotit Trump, organizata jofitimprurëse shihet gjerësisht si një “administratë në pritje” që mund të zhvendoset shpejt në krahun perëndimor (të Shtëpisë së Bardhë) nëse zoti Trump do të kandidonte përsëri dhe do të fitonte.

Paraqitja e zotit Trump në Uashington, udhëtimi i tij i parë që nga 20 janari i vitit 2021, kur presidenti Joe Biden bëri betimin, ndodh ndërsa rivalët e tij të mundshëm në zgjedhjet e vitit 2024 kanë ndërmarrë hapa gjithnjë e më të hapur për të sfiduar statusin e tij si flamurtar i partisë. Në mesin e tyre është edhe ish nënpresidenti Mike Pence, i cili ka promovuar “Agjendën e tij të Lirisë” në fjalimet që shërbejnë si një kontrast i nënkuptuar me zotin Trump.

“Disa njerëz mund të zgjedhin të përqendrohen në të kaluarën, por unë besoj se konservatorët duhet të përqendrohen në të ardhmen. Nëse e bëjmë këtë, ne nuk do të fitojmë vetëm zgjedhjet e ardhshme, ne do të ndryshojmë rrjedhën e historisë amerikane për gjenerata”, kishte planifikuar të thoshte zoti Pence në një fjalim në Fondacionin Heritage në Uashington në prag të vizitës së zotit Trump. Paraqitja e zotit Pence u shty për shkak të motit të lig, por ai do të mbajë fjalimin e tij të martën në mëngjes përpara Fondacionit të Amerikës së Re, jo shumë larg takimit të AFPI-së.

Ish presidenti Trump ka shpenzuar shumë kohë që nga largimi nga detyra i përqendruar në zgjedhjet e vitit 2020 dhe duke përhapur gënjeshtra për humbjen e tij për të mbjellë dyshime për fitoren e presidentit Biden. Në të vërtetë, edhe kur komisioni i 6 janarit po nxirrte në pah përpjekjet e tij të dëshpëruara dhe potencialisht të paligjshme për të qëndruar në pushtet dhe refuzimin e tij për të larguar një turmë të dhunshme të mbështetësve të tij ndërsa ata përpiqeshin të ndalonin kalimin paqësor të pushtetit, zoti Trump vazhdoi të përpiqej t’u bëjë trysni zyrtarëve për të përmbysur fitoren e zotit Biden, pavarësisht se nuk ka mjete ligjore për të rrëzuar zgjedhjet e kaluara.

“Presidenti Trump sheh një komb në rënie, pjesërisht për shkak të rritjes së krimit dhe komuniteteve që janë bërë më të pasigurta për shkak të politikave demokrate”, tha zëdhënësi i tij, Taylor Budowich. “Fjalimi i tij do të nxjerr në pah dështimet e politikave të demokratëve, ndërsa do paraqes një pikëpamje të ‘Amerika e para’ për sigurinë publike që me siguri do të jetë një çështje përcaktuese për zgjedhjet për Kongresin dhe përtej”.

Përtej takimit të lartë, personeli AFPI ka hedhur themelet për të ardhmen, “duke u siguruar që të kemi politikat, personelin dhe procesin e përcaktuar për çdo agjenci thelbësore kur të marrim përsëri Shtëpinë e Bardhë”, tha zonja Rollins.

Organizata jofitimprurëse u zhvillua, tha ajo, nga përpjekjet për të shmangur ditët e hershme kaotike të mandatit të parë të zotit Trump, kur ai arriti në Shtëpinë e Bardhë i papërgatitur, pa plane të qarta e të gatshme për t’u zbatuar. Ndërsa zoti Trump po kandidonte për rizgjedhje, zonja Rollins, në atë kohë shefe e Këshillit të Politikave të Brendshme të zotit Trump, filloi të hartonte një agjendë të mandatit të dytë me zyrtarë të tjerë të administratës, përfshirë këshilltarin e lartë të politikës ekonomike Larry Kudlow dhe këshilltarin e sigurisë kombëtare, Robert O’Brien.

Kur u bë e qartë se zoti Trump do të largohej nga Shtëpia e Bardhë, tha ajo, AFPI u krijua për të vazhduar punën “të organizuar rreth asaj agjende të mandatit të dytë që ne nuk e publikuam kurrë”.

Organizata, është shndërruar në një gjigant, me një buxhet operativ prej rreth 25 milionë dollarësh dhe 150 pjesëtarë të personelit, përfshirë 17 ish zyrtarë të lartë të Shtëpisë së Bardhë dhe nëntë ish anëtarë të kabinetit.

Grupi gjithashtu ka më shumë se 20 qendra politikash dhe është përpjekur të zgjerojë shtrirjen e tij përtej Uashingtonit me orvatjet për të ndikuar në legjislaturat lokale dhe bordet e shkollave. Një “nismë e udhëheqjes amerikane”, e drejtuar nga ish shefi i Zyrës së Menaxhimit të Personelit, Michael Rigas, filloi disa javë më parë të identifikojë personelin e ardhshëm besnik ndaj zoti Trump dhe qasjes së tij “Amerika e para”, të cilët mund të punësoheshin si pjesë e një përpjekjeje më të madhe, për të zëvendësuar pjesë të mëdha të shërbimit civil, raportoi së fundmi gazeta në internet Axios.

Grupi është një nga disa organizatat aleate të zoti Trump që kanë vazhduar të çojnë përpara politikat e tij në mungesë të tij, duke përfshirë ‘America First Legal’, e përkushtuar për të luftuar agjendën e presidentit Biden përmes sistemit gjyqësor, Qendrën për Ripërtëritjen e Amerikës dhe Institutin e Partneritetit Konservator.

Takimi synon të nxjerrë në pah “Agjendën Amerika e para” të AFPI-së, e përqendruar në rreth 10 fusha kryesore të politikave, duke përfshirë ekonominë, kujdesin shëndetësor dhe sigurinë e zgjedhjeve. Ai përfshin shumë nga çështjet që mbajnë vulën e zotit Trump, si vazhdimi i ndërtimit të një muri përgjatë kufirit jugor dhe një plan për “çmontimin e shtetit administrativ”.

Në një fjalim të hënën, ish kryetari i Dhomës së Përfaqësuesve, Newt Gingrich, “Kontrata me Amerikën” e të cilit është vlerësuar se ndihmoi fitoren e republikanëve në zgjedhjet afatmesme të vitit 1994, e vlerësoi përpjekjen si çelësin për fitoren e ardhshme të Partisë Republikane.

“Populli amerikan kërkon zgjidhje”, tha ai.

Nuk ka informacione të inteligjencës që thonë se presidenti rus, Vladimir Putin, është në gjendje të keqe shëndetësore, tha drejtori i Agjencisë Qendrore të Inteligjencës (CIA), William Burns.

Ka pasur spekulime të pankofirmuara mediatike se Putin, i cili këtë vit mbush 70 vjet, nuk është mirë me shëndet dhe ndoshta vuan nga kanceri.

Por, Burns tha se nuk ka asnjë të dhënë që sugjeron për një gjë të tillë, dhe me të qeshur tha se Putin duket “shumë mirë me shëndet”.

“Ka plot thashetheme lidhur me shëndetin e presidentit Putin dhe deri më tani ne mund të themi se ai është plotësisht shumë i shëndetshëm”, tha Burns gjatë Forumit të Sigurisë Aspen në Kolorado.

Pasi publiku reagoi me të qeshura ndaj kësaj deklarate, ai shtoi se ky nuk ishte një gjykim zyrtar i inteligjencës.

Burns ka qenë ambasador i Shteteve të Bashkuara në Moskë dhe për dy dekada ka vëzhguar dhe është marrë me liderin rus.

Putin është “një besimtar i madh në kontroll, frikësim dhe hakmarrje” dhe këto veti janë forcuar gjatë dekadës së fundit, pasi rrethi i tij i këshilltarëve është tkurrur, tha shefi i CIA-s.

“Ai është i bindur se fati i tij si udhëheqës i Rusisë është për të rivendosur Rusinë si një fuqi të madhe. Ai beson se çelësi për ta bërë këtë është të rikrijojë një sferë ndikimi në fqinjësinë e Rusisë dhe ai nuk mund ta bëjë këtë pa e kontrolluar Ukrainën”, shtoi Burns.

Shefi i CIA-s kishte vizituar Moskën nëntorin e kaluar dhe kishte paralajmëruar Rusinë për pasoja serioze nëse e pushton Ukrainën, pasi inteligjenca amerikane kishte mbledhur informacione për planet e Moskës. Por Burns tha se nga ai udhëtim ishte kthyer më i shqetësuar sesa ishte para se të nisej për në Rusi.

Në pushtimin që ka nisur pesë muaj më parë, Rusia ka arritur të pushtojë pjesë në lindje dhe jug të Ukrainës, por ka dështuar që ta përmbushë qëllimin fillestar që ishte marrja nën kontroll e Kievit dhe që atëherë pretendon se objektivi kryesor që në fillim ka qenë “çlirimi” i rajonit lindor të Donbasit.

SHBA-ja ka akuzuar Rusinë se po përgatitet që të aneksojë më shumë pjesë të Ukrainës.

Zonja e parë e Ukrainës, Olena Zelenska, e cila ndodhet për vizitë zyrtare në SHBA,  do t’i drejtohet me një fjalim Kongresit amerikan të mërkurën, pas takimit me Presidentin Joe Biden. Fjalimi synon të rrisë mbështetjen e SHBA-së për Ukrainën, ndërkohë që Rusia vazhdon presionin ushtarak në rajonin lindor të Donbasit të Ukrainës, duke synuar qytete të tilla si Kramatorsk dhe Sloviansk.

Ndërsa të martën, Olena Zelenska u prit nga  Zonja e Parë e SHBA, Jill Biden në një takim në Shtëpinë e Bardhë.

Takimi më i fundit mes tyre ndodhi gjatë vizitës së paparalajmëruar të zonjës Biden në Ukrainën perëndimore, njoftoi VOA, në muajin maj, vizitë gjatë së cilës ato vizituan një shkollë dhe iu bashkuan një grupi fëmijësh që po përgatisnin dhurata, me rastin e ditës së nënës.

Presidenti Joe Biden i dhuroi zonjës së parë ukrainase një buqetë me lule, me ngjyrat e flamurit të Ukrainës.

Shtëpia e Bardhë tha se zonja Zelenska po viziton Uashingtonin “për të nënvizuar koston njerëzore të agresionit rus në Ukrainë. Në takimet me zyrtarët amerikanë pritet të diskutohet rreth mbështetjes së vazhdueshme të Shteteve të Bashkuara për qeverinë e Ukrainës dhe popullin e saj, në mbrojtje të demokracisë, si dhe mbi përballjen me pasojat e mëdha të luftës, pasoja që do të ndihen për vite me radhë”.

Të hënën, zonja Zelenska u takua me Sekretarin amerikan të Shtetit të Antony Blinken.

Zëdhënësi i Departamentit të Shtetit Ned Price tha se zonja Zelenska dhe zoti Blinken biseduan mbi “kostot e mëdha njerëzore e në rritje të sulmit në shkallë të gjerë të Rusisë”. Ai vuri në dukje se zoti Blinken theksoi përkushtimin e SHBA-ve për të mbështetur Ukrainën.

“Sekretari Blinken përgëzoi punën e Zonjës së Parë Zelenska për të ndihmuar ukrainasit e prekur nga lufta”, tha zoti Price. “Ai përsëriti se Shtetet e Bashkuara do të vazhdojnë të ofrojnë ndihmë për Ukrainën në mënyrë që t’i përgjigjet sfidave të rëndësishme ekonomike dhe humanitare, përfshirë mbështetjen e iniciativës së zonjës së parë mbi shëndetin mendor, për qytetarët e prekur nga lufta”.

Presidenti i Shteteve të Bashkuara, Joe Biden, ka nënshkruar një urdhër më 19 korrik, që ka për synim të pengojë shtetet që të ndalojnë dhe ndëshkojnë padrejtësisht shtetasit amerikanë jashtë vendit.

Kjo masë do t’i lejojë agjencitë e Qeverisë amerikane që të vendosin sanksione dhe masa të tjera ndaj atyre që “padrejtësisht ndalojnë” amerikanë, tha një zyrtar amerikan gjatë një konference me gazetarë para se Biden të nënshkruante urdhrin.

Kjo lëvizje vjen pasi së fundmi disa shtetas amerikanë janë arrestuar në Rusi, përfshirë edhe basketbollisten, Brittney Griner. Autoritetet ruse kanë thënë se kanë gjetur vaj kanabisi në valixhen e saj, kur ajo po kalonte nëpër aeroportin Sheremetevo në muajin shkurt.

Shtetasi tjetër amerikan, ish-marinsi, Paul Whelan, është arrestuar në dhjetor të vitit 2018 dhe është akuzuar për spiunazh. Ai ka mohuar akuzat, por në qershor të vitit 2020 është dënuar me 16 vjet burgim.

Biden “është i përkushtuar që të zgjidhen të gjitha këto raste”, tha zyrtari amerikan.

Në të njëjtën kohë, Uashingtoni dëshiron të krijojë një strategji parandaluese që rrit pasojat për marrjen e pengjeve, përfshirë vendosjen e sanksioneve financiare dhe të udhëtimit.

Fondacioni James W.Foley, thotë se 64 amerikanë aktualisht janë të ndaluar padrejtësisht ose po mbahen pengje.

Ky fondacion është themeluar në emër të James Foley, gazetarit amerikan që u rrëmbye dhe vra në Siri më 2014.

Urdhri i presidenti Biden vjen pasi ish-marinsi amerikan, Trevor Reed, u përfshi në një shkëmbim të të burgosurve, përkatësisht me Konstantin Yaroshenko, një pilot rus që kishte qenë i burgosur në SHBA nën akuzat për trafikim droge.

Një gazetë në shtetin juglindor amerikan të Teksasit publikoi pamjet nga kamerat e sigurisë të sulmit me armë në një shkollë fillore në Uvalde të Teksasit dhe ndërhyrjen e policisë në masakrën e majit ku u vranë 19 fëmijë dhe dy mësues. Pamjet janë të redaktuara dhe të rënda për t’u parë.

Në pamjet shqetëuese 90 minutëshe të publikuara të martën në faqen e gazetës “Austin American Statesman”, shihet sulmuesi 18 vjeçar, Salvador Ramos duke hyrë në shkollën fillore në Uvalde, para se të fillojë të qëllojë me armë zjarri në drejtim të fëmijëve.

Policia futet në shkollë vetëm pak minuta më vonë. Fillimisht disa oficerë nxituan drejt klasës, por u tërhoqën pasi dëgjuan të shtëna të tjera.

Të tjerë oficerë policie futen në shkollë, disa prej të cilëve kishin pajisjet e duhura mbrojtëse.

Por, në pamjet e redaktuara shihet se oficerët vazhdojnë të qëndrojnë në fund të korridorit për 77 minuta pa ndërhyrë, edhe pasi kishin dëgjuar të shtëna të tjera.

Dy oficerë të Patrullës Kufitare të Shteteve të Bashkuara më në fund futen në klasë, duke qëlluar dhe vrarë sulmuesin Ramos.

19 fëmijë dhe 2 mësues u vranë në këtë masakër.

Dështimi i agjencive për zbatimin e ligjit në Uvalde për të ndërhyrë menjëherë, si dhe hetimet mbi sulmin, kanë shkaktuar zemërim tek prindërit dhe në përgjithësi tek komuniteti në Uvalde.

Ata e shprehën zemërimin e tyre në një mbledhje të Këshillit Bashkiak në Uvalde, pak orë pas publikimit të pamjeve.

Disa nga pjesëmarrësit kërkuan llogaridhënie për policinë dhe më shumë informacione në hetimin që është karakterizuar me deklarata të paqarta.

“A i sheh dikush ata duke bërë punë të mirë? A është e mjaftueshme vetëm përpjekja për t’u futur atje?A ishte e mjaftueshme për njerëzit që po vriteshin? Kjo nuk ishte e mjaftueshme”, thotë për një televizion në San Antonio Adam Martinez, banor në Uvalde.

“E kam parë në lajme. Të gjithë këta oficerë kishin armët dhe pajisjet e duhura mbrojtëse, ndërsa qëndronin, thjesht qëndronin atje”, flet me zemërim pastori Daniel Myers.

Anëtari i Këshillit Bashkiak në Uvalde, Ernest King kritikoi gazetën që publikoi pamjet.

“E kanë bërë për vlerësime dhe për para. Kjo është arsyeja e vetme që e publikuan”, tha ai.

Por komuniteti në Uvalde nuk pajtohet.

“Njerëzit duan t’i shohin pamjet. Prindërit duan t’i shohin ato. Që të sigurohemi se do t’i mbajmë të gjithë përgjegjës”, thotë Adam Martinez.

Departamenti i Sigurisë Publike në Teksas publikoi një raport në fillim të këtij muaji, ku thotë se një oficer policie në Uvalde humbi mundësinë për ta qëlluar sulmuesin Ramos para se të futej në shkollë, sepse po priste leje nga eprorët e tij.

Një komision hetues i udhëhequr nga ligjvënësit e Teksasit njoftoi më herët planet për të shfaqur pamjet për herë të parë të dielën, krahas bërjes publike të gjetjeve të tyre pas disa javë hetimesh dhe mbledhjes së dëshmive me dyer të mbyllura nga më shumë se 40 dëshmitarë.

Presidenti i Shteteve të Bashkuara të Amerikës, Joe Biden tha se vendimi i Gjykatës Supreme që anulon të drejtën për abort ishte një demonstrim i “fuqisë së papërpunuar politike” dhe nënshkroi një urdhër ekzekutiv të premten, më 8 korrik, që do të ndihmojë për mbrojtjen e qasjes për ndërprerjen e shtatzënisë.

Biden, demokrat, ka qenë nën presion nga partia e tij për të ndërmarrë veprime pas vendimit të Gjykatës Supreme muajin e kaluar për të rrëzuar vendimin gjyqësor “Roe kundër Wade”, i cili përmbysi 50 vjet të mbrojtjes së të drejtave riprodhuese të grave.

Kompetencat e presidentit janë të kufizuara, sepse shtetet amerikane mund të miratojnë ligje që kufizojnë abortin dhe qasjen në barëra, kështu që ky urdhër ekzekutiv pritet të ketë ndikim të kufizuar.

“Ajo, për të cilën jemi dëshmitarë, nuk ishte një gjykim i bazuar në Kushtetutë, por një demonstrim i fuqisë së papërpunuar politike”, u tha Biden gazetarëve në Shtëpinë e Bardhë pasi citoi në masë të madhe mendime të gjyqtarëve të Gjykatës Supreme, të cilët morën vendimin e tyre.

“Nuk mund të lejojmë Gjykata Supreme që është jashtë kontrollit, e cila punon në bashkëpunim me elementë ekstremistë të Partisë Republikane, të na heqë liritë dhe autonominë tonë personale”, tha ai.

Shtëpia e Bardhë nuk e përfaqëson publikisht idenë e reformimit të vetë gjykatës ose zgjerimit të panelit prej nëntë anëtarësh, e cila është propozuar nga përfaqësuesja e grupit progresiv të Dhomës së Përfaqësuesve, Pramila Jayapal.

Në vend të kësaj, Biden vuri në dukje se votuesit mund të siguronin të drejtat e abortit duke zgjedhur më shumë senatorë pro abortit dhe vuri në dukje se opinioni i shumicës së Gjykatës Supreme ka të bëj me “pushtetin politik të grave”.

“Mendoj se gjykata ose në atë rast republikanët… nuk e kanë idenë për fuqinë e grve amerikane”, tha ai, duke shtuar se beson që gratë do të lajmërohen në numër rekord në zgjedhjet e nëntorit, në mënyrë që t’i rikthejnë të drejtat e tyre.

Biden citoi raportet e fundit se një vajzë 10-vjeçare në Ohajo u detyrua të udhëtonte në Indiana për të kryer një abort pasi u përdhunua.

“Paramendojeni që jeni vajzë. Vetëm paramendojeni se jeni vajzë 10 vjeçe. A beson dikush në këtë?”, tha ai.

Në qershor, Biden dënoi vendimin e gjykatës dhe sugjeroi që senatorët amerikanë të heqin bllokimin legjislativ, në mënyrë që përkohësisht të hiqet ‘filibuster’ në Senat, për të rivendosur të drejtat për abortin.

Megjithatë, ai sugjerim u refuzua nga ndihmësit e senatorëve kryesorë demokratë Kirsten Sinema dhe Joe Manchin.

Në fillim të qershorit, burimet i thanë Reuters se Shtëpia e Bardhë nuk kishte gjasa të ndërmerrte hapa të guximshëm në kuptimin e qasjes ndaj abortit që kongresistët demokratë kanë kërkuar, siç është reforma gjyqësore ose ofrimi i shërbimeve riprodhuese në shtete.

Të premten, Biden udhëzoi Departamentin e Shëndetësisë dhe Shërbimeve Njerëzore që të ndërmarrë veprime për të mbrojtur dhe zgjeruar qasjen ndaj “abortit me ilaçe”, të miratuar nga Administrata e Ushqimit dhe Barnave, tha Shtëpia e Bardhë.

Ekspertët thonë se pilula që përdoret për të ndërprerë shtatzëninë e hershme nuk ka gjasa që së shpejti të jetë e qasshme pa recetë. Urdhri presidencial nuk do të ndikojë në shtetet që tashmë e kufizojnë përdorimin e këtyre barnave.

Biden udhëzoi gjithashtu resorin dikasterial që t’u sigurojë grave qasje në kujdesin mjekësor urgjent, shërbimet e planifikimit familjar dhe kontracepsionin, duke përfshirë pajisjet intrauterine (IUD).

Në urdhrin ekzekutiv, Biden udhëzoi gjithashtu prokurorin e tij shtetëror dhe avokatin e Shtëpisë së Bardhë që të mblidhnin avokatë pro bono dhe organizata të tjera për të ofruar këshilla ligjore për pacientët që kërkojnë abortin, si dhe për ata që ofrojnë abortin.

“Kjo mund të përfshijë mbrojtjen e të drejtës për të udhëtuar jashtë shtetit për të kërkuar kujdes mjekësor”, tha Shtëpia e Bardhë në një deklaratë.

Vendimi i Gjykatës Supreme ua ktheu shteteve federale mundësinë për të ndaluar abortin. Për këtë shkak, gratë me shtatzëni të padëshiruara përballen me zgjedhjen për të udhëtuar në një vend tjetër ku procedura është ende e ligjshme dhe krijon mundësitë për të blerë pilula aborti në internet ose për të kryer një abort të paligjshëm potencialisht të rrezikshëm.

Kjo çështje mund të nxisë mbështetësit demokratë që të dalin pasivisht në zgjedhjet e nëntorit, në mes të mandatit, kur republikanët kanë një shans për të marrë kontrollin e Kongresit.

Demokratët mbajnë një shumicë të dobët në Dhomën e Përfaqësuesve dhe kontrollojnë Senatin e ndarë në mënyrë të barabartë, falë votës së nënpresidentes Kamala Harris.

Urdhri ekzekutiv i Bidenit synon gjithashtu të mbrojë privatësinë e pacientit dhe të sigurojë sigurinë e klinikave mobile të abortit në kufijtë shtetërorë, si dhe të urdhërojë krijimin e një task force për të koordinuar përgjigjen e administratës ndaj kujdesit shëndetësor riprodhues, tha Shtëpia e Bardhë.

Vendimi i Gjykatës Supreme pritet të ketë një ndikim joproporcional mbi gratë afrikano-amerikane dhe gratë e pakicave të tjera, të cilat tradicionalisht përballen me kosto të mëdha dhe pengesa logjistike në marrjen e kujdesit shëndetësor riprodhues, thonë ekspertët.

Ish-sekretari amerikan i Mbrojtjes Jim Mattis kritikoi të premten Presidentin rus Vladimir Putin dhe e quajti sulmin e Rusisë në Ukrainë, “marrëzi e tregues paaftësie”.

Në një fjalim në Seul, zoti Mattis e krahasoi Presidentin Putin me një lloj personazhi paranojak, që përmendet në librat e shkrimtarit rus, Fyodor Dostojevsky.

“Putini është një krijesë që ka dalë nga librat e Dostojevskit. Ai bie në shtrat çdo mbrëmje i zemëruar, i frikësuar, e sheh një Rusi të rrethuar nga makthet“, tha zoti Mattis.

Ish-sekretari amerikan i Mbrojtjes ka bërë relativisht pak komente publike, që pas dorëheqjen së tij nga detyra e shefit të Pentagonit, në vitin 2018, për shkak të një mosmarrëveshjeje mbi politikën e jashtme, me ish-Presidentin Donald Trump.

Zoti Mattis nuk foli drejtpërdrejtë rreth këtyre mosmarrëveshjeve, por tha se zoti Trump zbatoi një politikë të jashtme jotradicionale e cila sfidoi marrëdhëniet e Shteteve të Bashkuara me aleatët e saj.

Komentet e zotit Mattis u përqëndruan tek zoti Putin. Ai e portretizoi atë si një njeri të çekuilibruar e të paaftë për të marrë vendime të zgjuara, për shkak të mungesës së njerëzve që i japin këshilla të shëndosha.

I pyetur se cili është mësimi më i rëndësishëm që mund të nxirret nga lufta e Rusisë në Ukrainë, zoti Mattis u përgjigj: “Nuk duhen zgjedhur gjeneralë të paaftë në krye të operacioneve”.

Ai tha gjithashtu se sulmi i Rusisë ishte një sulm “taktikisht joprofesional dhe i pamenduar nga pikëpamja strategjike”.

Ish-sekretari amerikan i Mbrojtjes kritikoi gjithashtu forcimin e marrëdhënieve të Kinës me Rusinë, si dhe mungesën e gatishmërisë së Pekinit për të kundështuar luftën e Moskës në Ukrainë.

Një vend “nuk mund të jetë i madh, nëse mbështet sulmin kriminal të Rusisë në Ukrainë”, tha ai.

Duke iu referuar periudhës që shërbeu si shef i Pentagonit gjatë administratës së Presidentit Trump, zoti Mattis foli për një “kohë të trazuar” dhe e quajti ish-presidentin një “udhëheqës të pazakontë”, por pa e kritikuar drejtpërdrejt.

“Demokracitë nganjëherë mund të jenë populiste dhe ndonjëherë thyejnë traditën“, tha ai. “Është në natyrën e demokracive ndonjëherë, që të vënë në provë idetë e gjithçka“.

Amerikanët, tha zoti Mattis, duhet të përgjigjen duke ruajtur besimin tek “institucionet” si dhe “tek ata me të cilët nuk pajtohen”.

Zoti Mattis e mbajti fjalimin në Korenë e Jugut, një vend aleat i SHBA-ve, i cili ndjeu në mënyrë dramatike ndikimet e politikës së jashtme jotradicionale të zotit Trump.

I pyetur se çfarë mendonte mbi takimet e zotit Trump me udhëheqësin e Koresë së Veriut Kim Jong Un, zoti Mattis tha se megjithëse ai nuk ka qenë kurrë optimist mbi rezultatin e bisedimeve, përpjekja diplomatike sipas tij, ishte “gjëja e duhur për t’u bërë”.

Zoti Mattis vlerësoi gjithashtu qasjen, që po zbaton presidenti i ri i Koresë së Jugut Yoon Suk Yeol, i cili synon që vendi i tij të luajë një rol më të madh në arenën ndërkombëtare.

Zoti Yoon, me pikëpamje konservatore, ka përqafuar në mënyrë të qartë politikat e Shteteve të Bashkuara. Ai mori pjesë në takimin e NATO-s që u mbajt në Madrid, duke shënuar herën e parë, që një udhëheqës i Koresë së Jugut merr pjesë në një takim të tillë.

Zoti Mattis vlerësoi praninë e zotit Yoon në takim, duke thënë se kjo gjë është në interesin më të mirë të Perëndimit.

Por ai kritikoi ato zëra në Seul, të cilët kohët e fundit kanë bërë thirrje që Koreja e Jugut të ketë armët e veta bërthamore.

“Nuk keni nevojë për armë bërthamore në gadishull për të siguruar parandalimin e tyre në shkallë të gjerë, dhe për sa kohë që ekziston besimi mes Koresë së Jugut dhe Shteteve të Bashkuara“, tha zoti Mattis.

Anketat e opinionit publik tregojnë vazhdimisht se shumica e koreano-jugorëve mbështesin idenë e pajisjes së vendit me armë bërthamore, në kushtet kur Koreja e Veriut vazhdon të rrisë arsenalin e vet bërthamor.

Gjatë periudhës së kandidimit të tij për president, zoti Yoon tha se do t’i kërkonte Shteteve të Bashkuara që të arrinin një marrëveshje për ndarjen e armëve bërthamore, ose ridislokimin e armëve taktike bërthamore, që Uashingtoni tërhoqi nga Koreja e Jugut në fillim të viteve 1990. Një gjë e tillë u refuzuar menjëherë nga Departamenti amerikan i Shtetit.

Shtetet e Bashkuara dhe Koreja e Jugut duhet të vazhdojnë të forcojnë besimin mes tyre duke treguar vendosmëri kundër qasjes së Phenianit për rritjen e kapaciteteve të tij bërthamore tha zoti Mattis.

“Duhet të bëni çdo gjë që ju vetë të mos pajiseni me këto armë, pasi ato janë të tmerrshme”, tha ai.