NJU JORK (AP) – Zyrtari kryesor financiar i kompanisë së Donald Trumpit, Allen Weisselberg, pranoi sot fajësinë për shkelje që lidhen me mospagim taksash. Pranimi i fajësisë ishte në kuadër të një marrëveshjeje që ai arriti me prokurorët, në bazë të së cilës, ai duhet të dëshmojë për praktikat e paligjshme të biznesit në Organizatën Trump, thanë për agjencinë Associated Press dy burime në dijeni me këtë çështje.

Zoti Weisselberg është akuzuar për pranimin e më shumë se 1.7 milionë dollarëve në formë kompensimi nga kompania e ish presidentit, por që nuk është pasqyruar në deklarimet e tij për taksat për vite të tëra. Përfitimet përfshijnë pagesën për qiranë e shtëpisë, pagesat për makinave si dhe për koston e shkollës private të nipërve e mbesave.

Në bazë të marrëveshjes për pranimin e fajësisë, zoti Weisselberg do të fliste sot në gjykatë për rolin e kompanisë në marrëveshjen e pretenduar të kompensimit, si dhe ndoshta ai do të dalë si dëshmitar kur Organizata Trump të dalë në gjyq në tetor për akuza penale, thanë burimet.

Dy personat, që nuk ishin të autorizuar të flisnin publikisht për rastin, komentuan në kushte anonimiteti.

Zoti Weisselberg, 75 vjeç, ka të ngjarë të marrë një dënim prej pesë muajsh heqje lirie, në kompleksin famëkeq Rikers Island të Nju Jorkut dhe mund t’i kërkohet të paguajë rreth 2 milionë dollarë dëmshpërblim, përfshirë taksat, gjobat dhe interesat. Nëse ky dënim qëndron, zoti Weisselberg do të kualifikohej për lirim pas rreth 100 ditësh.

Zoti Weisselberg është i vetmi person që përballet me akuza penale deri më tani në hetimin e gjatë të prokururisë së qarkut të Manhatanit për praktikat e biznesit të kompanisë së ish presidentit Trump.

I parë si një nga bashkëpunëtorët më besnikë të biznesit të Trumpit, zoti Weisselberg u arrestua në korrik të vitit 2021. Avokatët e tij kanë argumentuar se zyra e prokurorit të qarkut të udhëhequr nga demokratët, po e ndëshkonte atë sepse ai nuk do të ofronte informacione, që do të dëmtonin zoti Trump.

Prokurori i qarkut gjithashtu po heton për një çështje tjetër, nëse zoti Trump, ose kompania e tij, kanë gënjyer bankat ose qeverinë, duke zmadhuar vlerën e pronave për të marrë kredi, ose për të ulur pagesën e taksave.

Prokurori i atëhershëm i qarkut Cyrus Vance Jr., i cili filloi hetimin vitin e kaluar, i udhëzoi zëvendësit e tij që të paraqesin prova para një jurie të madhe dhe të kërkojnë një aktakuzë ndaj zotit Trump, sipas ish-prokurorit Mark Pomerantz, i cili i kishte drejtuar hetimet më parë.

Por pasi prokurori Vance u largua nga detyra, pasardhësi i tij, Alvin Bragg, lejoi që juria e madhe të shpërbëhej pa ngritur akuza. Të dy prokurorët janë demokratë. Zoti Bragg ka thënë se hetimet janë duke vazhduar.

Organizata Trump nuk është e përfshirë në pranimin e fajësisë nga zoti Weisselberg. Ajo pritet të dalë në gjyq për skemën e pretenduar të kompensimit në tetor.

Prokurorët pretendojnë se kompania u dha përfitime të pataksuara drejtuesve të lartë, përfshirë zotin Weisselberg, për 15 vjet. Vetëm zoti Weisselberg u akuzua se kishte mashtruar qeverinë federale, shtetin dhe qytetin me më shumë se 900,000 dollarë taksa të papaguara dhe rimbursime të pamerituara të taksave.

Sipas ligjit të shtetit, dënimi për akuzën më të rëndë kundër zotit Weisselberg, vjedhje të një shume të madhe, mund të shkonte deri në 15 vjet burg. Por akuza nuk mbart asnjë minimum të detyrueshëm dhe shumica e shkelësve për herë të parë për çështje të lidhura me taksat nuk përfundojnë kurrë pas hekurave.

Akuzat për mashtrim tatimor kundër Organizatës Trump dënohen me një gjobë sa dyfishi i shumës së taksave të papaguara, ose 250,000 dollarë, cilado qoftë shifra më e lartë.

Ndaj vetë zotit Trump nuk janë ngritur akuza. Ai i ka dënuar hetimet e Nju Jorkut si një “gjueti politike shtrigash”, dhe ka thënë se veprimet e kompanisë së tij janë një praktikë standarde në biznesin e pasurive të paluajtshme dhe në asnjë mënyrë një krim.

Javën e kaluar, zoti Trump u thirr për të dëshmuar në kuadër të një çështjeje civile ndaj tij, që po heton Prokurorja e Përgjithshme e Nju Jorkut Letitia James, nën akuzat se kompania e tij ka mashtruar huadhënësit dhe autoritetet tatimore për vlerat e pasurive. Zoti Trump përdori të drejtën që i garanton Amendamenti i Pestë i Kushtetutës, duke mos iu përgjigjur asnjë prej të 400 pyetjeve.

Presidenti i SHBA-së Joe Biden nënshkroi të enjten më 16 gusht një projektligj prej rreth 740 miliardë dollarësh që synon të luftojë ndryshimet klimatike, të rrisë taksat mbi korporatat e mëdha dhe të zgjerojë mbulimin për kujdesin shëndetësor.

Projektligji, i quajtur “Akti i Reduktimit të Inflacionit”, është një arritje e madhe legjislative për demokratët ku përfshihet paketa më e madhe klimatike në historinë e SHBA-së dhe bëhet menjëherë një nga elementët kyç të presidencës së tij dyvjeçare.

Ajo kaloi në votim si në Dhomën e Përfaqësuesve ashtu edhe në Senatin javën e kaluar me mbështetjen e çdo demokrati por të asnjë republikani.

Në këtë paketë përfshihen masa të dizajnuara për të mbështetur alternativat e energjisë me emetim të ulët dhe për të ulur emetimet e gazrave serrë, si dhe për të ulur çmimet e barnave me recetë dhe për të rritur taksat ndaj korporatave dhe të pasurve.

Legjislacioni do të mbledhë rreth 700 miliardë dollarë nëpërmjet rritjes së taksave të korporatave dhe kursimeve të barnave me recetë, dhe do të shpenzojë rreth 400 miliardë dollarë për energjinë e pastër dhe dispozitat e kujdesit shëndetësor.

Biden u kthye shkurtimisht nga pushimet për të nënshkruar projektligjin, i cili u miratua sipas linjave partiake pa asnjë mbështetje nga republikanët e opozitës.

“Ky projekt-ligj është hapi më i madh përpara për të luftuar ndryshimet klimatike,” tha ai në një ceremoni nënshkrimi në Shtëpinë e Bardhë.

Kritikët republikanë kanë sulmuar shumë elementë të projektligjit, duke pohuar se shpenzimet e tij do të përshpejtojnë inflacionin në vend që ta frenojnë atë.

Ish-presidenti amerikan, Donald Trump, reagoi pas disa raportimeve se FBI ka gjetur në shtëpinë e tij dokumente të klasifikuara.

Në një postim në Truth Social, presidenti tha se të gjitha dokumentet e marra nga FBI janë të deklasifikuara.

“Së pari, të gjitha ishin të deklasifikuara. Së dyti, ata nuk kishin nevojë të ‘sekuestronin’ asgjë. Ata mund t’i kishin pasur sa herë donin, pa luajtur politikë dhe pa u futur në Mar-a-Lago. Ishin në një magazinë të sigurt, me një bravë shtesë të vendosur sipas kërkesës së tyre”.

“Problemi më i madh është se çfarë do të bëjnë ata me 33 milionë faqet e dokumenteve, shumica të klasifikuara, që presidenti Obama mori në Çikago”.

Si reagim, Administrata Kombëtare e Arkivave dhe Regjistrave dha në një deklaratë për shtyp se ish-presidenti Obama nuk ka kontroll mbi të dhënat presidenciale nga administrata e tij.

Kurse gjykata federale e Floridës ka zbardhur arsyet e bastisjes së shtëpisë së ish-presidentit amerikan Donald Trump nga ana e agjentëve të FBI-së.

Trump po hetohet për tre akuza, ku më e rënda është një shkelje e ‘Espionage Act’, praktikisht një akuzë për spiunazh, por edhe për mbajtje ilegale të dokumenteve qeveritare si dhe për tentativë për të penguar hetimet.

Gjatë kontrolleve në shtëpinë që politikani miliarder ka në Mar-a-Lago të Floridës, FBI ka sekuestruar 20 kuti me dokumente të ndryshme.   syri.net

Agjentët e FBI sekuestruan materiale të klasifikuara në shtëpinë e ish-presidentit Donald Trump në Mar-a-Lago të Florida, gjatë bastisjes së saj të paprecedentë ditën e hënë, duke përfshirë disa të dhëna të shënuara si top sekret, sipas dokumenteve që ka parë Fox News. 

Ish-presidenti Trump kundërshton klasifikimin, duke thënë se të dhënat janë të deklasifikuara.

Sipas urdhrit që ka parë Fox News të premten, gjykatësi amerikan Bruce Reinhart nënshkroi urdhrin më 5 gusht, duke i dhënë autoritetin FBI të kryejë kërkimin e tij “më ose përpara datës 19 gusht 2022” dhe “në orën 6:00 të ditës, deri në orën 10:00”.

Urdhri u vulos zyrtarisht të premten pasdite nga Reinhart.

“Vendndodhjet që do të kontrollohen përfshijnë ‘zyrën 45’, të gjitha dhomat e mbledhjeve dhe dhomat ose zonat e tjera brenda ambienteve të përdorura nga stafi i Trump ku mund të ruhen kutitë ose dokumentet“, thuhet në urdhër.

Sipas Fox News, agjentët e FBI kanë marrë katër dosje me dokumente tepër sekrete, tre grupe dokumentesh sekrete dhe tre dosje me dokumente konfidenciale.

Në procesverbal nuk bëhen publike detaje në lidhje me përmbajtjen e tyre.

Nga ana tjetër, ish-presidenti dhe ekipi i tij, megjithatë, po kundërshtojnë klasifikimin dhe besojnë se informacioni dhe të dhënat janë deklasifikuar.  syri.net

FBI-ja gjeti dokumente të klasifikuara “tepër sekret” nga rezidenca e ish-presidentit Donald Trump në Mar-a-Lago në Florida, sipas dokumenteve të gjykatës të lëshuara të premten pasi një gjykatës federal bëri publik përmbajtjen e urdhrit që autorizonte kontrollin e paprecedentë këtë javë.

Një listë e bërë publike nga gjykata tregon se agjentët e FBI-së morën gjatë kontrollit të hënën 11 dosje të dhënash të klasifikuara sekret nga Mar-a-Lago.

Të dhënat e sekuestruara përfshijnë disa dokumente të etiketuara jo vetëm si tepër sekrete, por edhe të një kategorie të veçantë që përcaktohet për të mbrojtur sekretet më të rëndësishme të vendit që nëse zbulohen publikisht mund të shkaktojnë dëme “jashtëzakonisht të rënda” për interesat e SHBA-së.

Procesverbalet e gjykatës nuk jepnin detaje konkrete në lidhje me informacionin që mund të përmbajnë dokumentet.

Sipas urdhrit, agjentët federalë po hetonin shkelje të mundshme të tre ligjeve të ndryshme federale, përfshirë atë që rregullon mbledhjen, transmetimin ose humbjen e informacionit të mbrojtjes sipas Aktit për Spiunazhin. Ligjet e tjera parashikojnë masat për fshehjen, dëmtimin ose zhvendosjen e të dhënave, si edhe shkatërrimin, ndryshimin ose falsifikimin e të dhënave në hetimet federale.

Lista e objekteve tregon gjithashtu se agjentët federalë kanë mbledhur të dhëna të tjera të mundshme presidenciale, përfshirë urdhrin për faljen presifenciale të aleatit të zotit Trump, Roger Stone, një “kuti prej lëkurë me dokumenta ” dhe informacione për “Presidentin e Francës”.
Gjatë kontrollit u sekuestruan gjithashtu një dosje me fotografi, një shënim me dorë, “dokumente të ndryshme sekrete” dhe “dokumente të ndryshme konfidenciale”.

Avokatja e zotit Trump, Christina Bobb, e cila ishte e pranishme në Mar-a-Lago kur agjentët kryen kontrollin, nënshkroi dy dokumenta me listën e objekteve, njëra ishte dy faqe dhe tjetra një faqe.

Në një deklaratë më herët të premten, ish-presidenti Trump tha se dokumentet e sekuestruara nga agjentët ishin “të gjitha të deklasifikuara” dhe argumentoi se ai do t’i kishte dorëzuar ato vetë nëse Departamenti i Drejtësisë do t’i kishte kërkuar.

Megjithëse presidentët në detyrë në përgjithësi kanë autoritetin të deklasifikojnë informacion, ky autoritet skadon sapo largohen nga detyra dhe nuk është e qartë nëse dokumentet në fjalë janë deklasifikuar.

Madje edhe kompetencat e një presidenti në detyrë për të deklasifikuar mund të jenë të kufizuara kur bëhet fjalë për sekrete të lidhura me programet e armëve bërthamore, operacione të fshehta dhe operativë, dhe disa të dhëna që shkëmbehen me aleate.

Trump mbajti posedimin e dokumenteve pavarësisht kërkesave të shumta nga agjencitë, duke përfshirë Arkivin Kombëtar, për të dorëzuar të dhënat presidenciale në përputhje me ligjin federal.
Është ende e paqartë nëse Departamenti i Drejtësisë e dha urdhrin thjesht për të marrë dokumentat, apo si pjesë e një hetimi më të gjerë penal.

Salman Rushdie, një shkrimtar me origjinë indiane, i cili para disa viteve u urdhërua të vritej nga Irani për shkak të shkrimeve të tij, u sulmua në skenë gjatë një eventi në Nju Jork, sipas një dëshmitari që foli për agjencinë e lajmeve Reuters.

Një burrë nxitoi në skenën e Institutit Chautauqua në shtetin e Nju Jorkut dhe sulmoi Rushdie teksa po prezantohej, tha dëshmitari. Sulmuesi mësohet se është ndalur në vendngjarje. Aktualisht nuk dihet gjendja e Salman Rushdie.

“Ne kemi të bëjmë me një situatë emergjente. Nuk mund të ndaj detaje të mëtejshme në këtë moment,” tha një zëdhënës i Institutit Chautauqua kur u kontaktua nga agjencia e lajmeve Reuters.

Rushdie, i cili ka lindur në një familje muslimane indiane, është përballur me kërcënime me vdekje për romanin e tij të katërt, “Vargjet Satanike”, për të cilin disa muslimanë thanë se përmbante pasazhe blasfemuese. Romani u ndalua në shumë vende me popullsi të madhe myslimane pas botimit të tij në vitin 1988.

Një vit më vonë, Ayatollah Ruhollah Khomeini, asokohe lideri suprem i Iranit, shpalli një “fetva”, ose dekret fetar, duke u bërë thirrje muslimanëve të vrisnin shkrimtarin për blasfemi.

Irani më vonë u tërhoq nga urdhri dhe Rushdie ka jetuar relativisht i pashqetësuar në vitet e fundit.

Rushdie ishte në Institutin Chautauqua për të marrë pjesë në një diskutim rreth shërbimit të Shteteve të Bashkuara si azili për shkrimtarët dhe artistët në mërgim dhe “si një shtëpi për lirinë e shprehjes krijuese”, sipas faqes së internetit të institucionit.

Agjencia Wylie, e cila përfaqëson Rushdie, nuk iu përgjigj menjëherë një kërkese për koment.

Ish-presidenti amerikan, Donald Trump, ka bërë thirrje që të publikohet “menjëherë” urdhri i FBI-së për bastisjet në shtëpinë e tij në Florida.

Kjo thirrje e Trumpit erdhi disa orë pasi Departamenti amerikan i Drejtësisë i kërkoi një gjykate që të bëjë publike urdhrin, teksa prokurori i Përgjithshëm, Merrick Garland, tha se kjo kërkesë bëhet për shkak të “interesit publik për këtë çështje”.

Në një mesazh të postuar në platformën e tij sociale, Truth Social, Trump shkroi:

“Unë jo vetëm që nuk e kundërshtoj publikimin e dokumenteve… Unë do të bëj edhe një hap më tej duke i inkurajuar që të publikojnë menjëherë këto dokumente”.

Ai sërish tha se bastisjet e Byrosë Federale të Hetimeve në pronën e tij në Mar-a Lago ishin “të pajustifikueshme dhe të panevojshme”.

“Publikoni dokumentet menjëherë”, shkroi ai.

Gjatë 11 gushtit, Departamenti i Drejtësisë tha se ka bërë kërkesë për publikimin e dokumenteve, që zakonisht mbesin konfidenciale kur një hetim është në zhvillim e sipër. Por, departamenti tha se publiku duhet të dijë pse FBI-ja bastisi shtëpinë e ish-presidentit të hënën, më 8 gusht.

“Interesi i publikut është i madh për të kuptuar atë që ndodhi”, thuhej në mocionin e paraqitur në gjykatën federale në Florida.

Tani i mbetet gjyqtarit të vendosë nëse do të publikojë urdhrin e bastisjeve. Por, nëse publikohen dokumentet mund të nxjerrin informacione lidhur me dyshimet që FBI ka për trajtimin e dokumenteve të ndjeshme qeveritare nga ana e Trump, teksa ai po përgatitet që të garojë sërish për postin e presidentit.

Ende nuk dihet se sa shumë informacione mund të ketë në dokumente nëse ato bëhen publike.

Bastisjet e të hënës ishin bastisjet e para në historinë amerikane në shtëpinë e ndonjë ish-presidenti, si pjesë e një hetimi penal. Trump dhe republikanë të tjerë kanë kritikuar këtë vendim të FBI-së dhe kanë thënë se është i motivuar politikisht.

Por, duke folur në një konferencë për media më 11 gusht, prokurori i Përgjithshëm, Merrick Graland, mbrojti agjentët e FBI-ë dhe zyrtarët e Departamentit të Drejtësisë.

“Nuk do të rri i heshtur kur integriteti i tyre sulmohet padrejtësisht”, tha ai për gazetarët.

Ai pranoi se personalisht ka miratuar urdhrin për bastisjet dhe se marrja e këtij vendimi nuk ka qenë e lehtë.

Më herët, avokatja e Trimpit, Lindsey Halligan, ka thënë se Trump dhe ekipi i tij ligjor po e shqyrtonin mundësinë për të publikuar urdhrin e bastisjeve para se gjykatësi të marrë ndonjë vendim. Ata po ashtu po e shqyrtojnë mundësinë e publikimit të fotografive dhe videove nga bastisjet, tha ajo.

Agjentët e FBI-së në Mar-a Lago kanë kërkuar që kamerat e sigurisë të fiken, por ekipi i Trumpit ka refuzuar të bëjë një gjë të tillë, ka raportuar CBS News.

Trump deklaroi të enjten se nuk ka pasur nevojë për bastisje pasi tha se avokatët e tij po bashkëpunonin plotësisht dhe se “Qeveria mund të marr çfarëdo që të dëshirojë, nëse ne e kemi në pronësi atë”.

UASHINGTON (AP) – Departamenti i Drejtësisë po i kërkon një gjykate federale të bëj publik urdhrin që FBI-ja përdori për të kontrolluar pronën në Mar-a-Lago të ish-presidentit Donald Trump, tha të enjten Prokurori i Përgjithshëm Merrick Garland, duke pranuar interesin e jashtëzakonshëm publik për rastin rreth të dhënave të klasifikuara.

Kërkesa është e çuditshme sepse dokumenta të tilla tradicionalisht mbeten të vulosura gjatë një hetimi në vazhdim. Por Departamenti i Drejtësisë duket ta ketë pranuar se heshtja që nga kontrolli kishte krijuar një vakum për sulme të hidhura verbale nga ish presidenti Trump dhe aleatët e tij dhe se publiku kishte të drejtë të dinte çfarë nxiti veprimin e së hënës në shtëpinë e ish-presidentit.

“Interesi i qartë dhe i fuqishëm i publikut për të kuptuar atë që ndodhi në këto rrethana peshon më shumë në favor të bërjes publike të urdhrit”, thuhej në një mocion të paraqitur në gjykatën federale në Florida të enjten.

Kërkesa që është tani në dorën e gjykatësit dhe që ish presidenti mund ta kundërshtojë bërjen publike të saj– mund të zbulojë informacione jo të këndshme për ish-presidentin dhe për shqyrtimin e FBI-së për trajtimin nga ana e tij të dokumenteve të ndjeshme të qeverisë pikërisht ndërsa ai përgatitet për një tjetër garë për Shtëpinë e Bardhë. Gjatë fushatës së tij të suksesshme të vitit 2016, ai vuri në dukje shpesh një hetim të FBI-së ndaj kundërshtares së tij demokrate, Hillary Clinton, për të pare nëse ajo keqpërdorte informacionin e klasifikuar.

Në këtë pikë është e paqartë se sa informacion do të përfshihej në dokumente, nëse ato do të bëheshin publike, ose nëse ato do të përfshinin një deklaratë të FBI-së që me sa duket do të parashtronte një bazë të detajuar faktike për kontrollin në pronën Mar-o-Lago. Departamenti kërkoi në mënyrë specifike bërjen publike të urdhrit si dhe një listë ku renditeshin sendet që u sekuestruan, së bashku me dy dokumenta të paspecifikuara.

Për të marrë një urdhër kontrolli, autoritetet federale duhet t’i provojnë një gjyqtari se ekziston një shkak i mundshëm për të besuar se është kryer një krim. Kryeprokurori Garland tha se ai personalisht e miratoi urdhrin, një vendim që ai tha se departamenti nuk e mori lehtë duke pasur parasysh se praktika standarde aty ku është e mundur, është të zgjidhen taktika më pak ndërhyrëse sesa kontrolli i shtëpisë.

As zoti Trump dhe as FBI-ja nuk kanë thënë asgjë në lidhje me dokumentet që FBI-ja mund të ketë sekuestruar, apo çfarë saktësisht kërkonin agjentët. Por ish-presidenti u ankua sërish të enjten për kontrollin.

Zoti Trump, i cili për vite me radhë ka kritikuar FBI-në dhe ka kërkuar të mbjellë mosbesim mes mbështetësve të tij në vendimet e saj, tha se urdhri u kërkua dhe kontrolli u krye pavarësisht bashkëpunimit të tij me Departamentin e Drejtësisë.

Në një postim në platformën e tij “Truth Social”, zoti Trump tha se “avokatët dhe përfaqësuesit e tij po bashkëpunonin plotësisht” përpara kontrollit dhe se zyrtarët e qeverisë “mund të kishin gjithçka që dëshironin, kurdo që të dëshironin, nëse ne do ta kishim atë që kërkonin”.

Departamenti i Drejtësisë ka afat deri të premten pasdite për të njoftuar gjyqtarin nëse zoti Trump do të kundërshtojë publikimin e urdhërit.

Politika e FBI-së dhe e Departamentit të Drejtësisë paralajmëron kundër diskutimit të hetimeve në vazhdim, si për të mbrojtur integritetin e hetimeve, ashtu edhe për të shmangur keqtrajtimin e padrejtë të dikujt që po hetohet. Kjo është veçanërisht e vërtetë në rastin e urdhrave të bastisjeve, ku dokumentet gjyqësore mbështetëse mbahen në mënyrë rutinë sekret ndërsa hetimi vazhdon.

Sidoqoftë, në këtë rast, kryeprokurori Garland përmendi faktin se vetë Trumpi kishte dhënë konfirmimin e parë publik të kontrollit të FBI-së, “siç është e drejta e tij.” Departamenti i Drejtësisë, në dosjen e tij të re, tha gjithashtu se zbulimi i informacionit në lidhje me të tani nuk do të dëmtojnë funksionet e gjykatës.

Megjithatë, zoti Garland, në një deklaratë publike të planifikuar me ngut në Departamentin e Drejtësisë, dukej se pranoi natyrën e pazakontë të kërkesës së departamentit pasi ai refuzoi të merrte pyetje ose të jepte ndonjë hollësi thelbësore në lidhje me hetimin e FBI-së.

“Pjesa më e madhe e punës sonë kryhet jashtë syrit të publikut. Ne e bëjmë këtë për të mbrojtur të drejtat kushtetuese të të gjithë amerikanëve dhe për të mbrojtur integritetin e hetimeve tona,” tha ai. “Ligji federal, rregullat e departamentit dhe detyrimet tona etike më pengojnë të jap detaje të mëtejshme në këtë kohë, në lidhje me arsyen e kontrollit”.

Departamenti i Drejtësisë nën drejtimin e zotit Garland ka qenë i kujdesshëm ndaj deklaratave publike në lidhje me hetimet e ngarkuara politikisht, ose për të konfirmuar se deri në çfarë mase mund të hetonte zotin Trump si pjesë e një hetimi më të gjerë për trazirat e 6 janarit në Kongres dhe përpjekjet për të përmbysur rezultatet e zgjedhjet e vitit 2020.

UASHINGTON – Zyrtarët federalë po thonë pak deri tani për kontrollin e FBI-së të së hënës në shtëpinë e ish-presidentit Donald Trump në Mar-a-Lago në Florida, por zoti Trump dhe një nga djemtë e tij kanë thënë se veprimi është pjesë e një hetimi për heqjen nga zoti Trump të dokumentave zyrtare nga Shtëpia e Bardhë.

Ndërsa një kontroll i tillë i banesës së një ish-presidenti amerikan është i paprecedentë, hetimet për heqjen ose mbajtjen e paligjshme të informacionit të klasifikuar, janë më të zakonshme.

Persona të tjerë që janë ndjekur penalisht dhe që kanë pranuar fajësinë ose janë dënuar përfshijnë punonjës të Departamentit të Mbrojtjes, kontraktorë të mbrojtjes dhe punonjës ose kontraktorë të FBI-së, CIA-s dhe Agjencisë së Sigurisë Kombëtare.

Më poshtë është një listë e disa rasteve të njohura:

Prill 2005 – Ish-këshilltari i sigurisë kombëtare, Sandy Berger u shpall fajtor për heqjen e vetëdijshme të dokumenteve të klasifikuara nga Administrata Kombëtare e Arkivave dhe Regjistrimeve. Zoti Berger pranoi se kishte fshehur dhe hequr pesë kopje të një dokumenti të klasifikuar nga Arkivat në shtator dhe tetor të vitit 2003.

Zoti Berger pranoi gjithashtu fshehjen dhe heqjen e shënimeve të shkruara me dorë në kundërshtim me politikën e Arkivave. Në shtator të vitit 2005, zoti Berger u urdhërua të paguante një gjobë prej 50,000 dollarësh dhe të mos kishte leje të sigurisë për tre vjet.

Mars 2013 – Nënkoloneli në pension Benjamin Pierce Bishop u arrestua në Hawaii dhe u akuzua për mbajtje të paligjshme të dokumenteve në lidhje me mbrojtjen kombëtare dhe komunikim të qëllimshëm të informacionit të mbrojtjes kombëtare tek një person që nuk kishte të drejtë të merrte një informacion të tillë. Dokumentet e gjykatës pretendonin se zoti Bishopi, i cili punonte për një kontraktues të mbrojtjes, kishte 12 dokumente që përmbanin informacion të klasifikuar në rezidencën e tij. Më tej, dokumentet pretendojnë se zoti Bishop ia komunikoi me dashje atë informacion një gruaje 27-vjeçare kineze me të cilën ai kishte një lidhje.

Zoti Bishop u shpall fajtor në mars të vitit 2014. Ai u dënua me më shumë se shtatë vjet burg dhe tre vjet lirim të mbikëqyrur.

Mars 2015 – Gjenerali në pension i ushtrisë amerikane David Petraeus, ish-drejtor i CIA-s, u shpall fajtor për akuzën e heqjes dhe mbajtjes së paautorizuar të materialit të klasifikuar. Akuza pasoi zbulimet se zoti Petraeus ndau disa nga materialet me biografen dhe të dashurën e tij.

Zoti Petraeus u dënua me dy vjet burg me kusht dhe një gjobë prej 100,000 dollarësh.

Korrik 2015 – Rezervisti i Marinës amerikane, Bryan Nishimura, u dënua me dy vjet burgim me kusht dhe 7,500 dollarë gjobë pasi u shpall fajtor për shkarkimin dhe ruajtjen e dokumenteve të klasifikuara nga periudha e dislokimit të tij në Afganistan në 2007-2008 në pajisjet e tij personale. Në një kontroll në shtëpinë e tij në maj të vitit 2012-ës u gjetën materiale të shumta të klasifikuara, si në formate digjitale ashtu edhe në ato të shtypura.

Gusht 2016 – Ish-kontraktori i Agjencisë Kombëtare të Sigurisë, Harold Martin, u arrestua për atë që prokurorët federalë e përshkruan si një vjedhje të informacionit top-sekret të qeverisë që ishte “marrë në një shkallë të gjerë dhe një kohëzgjatje shumë vjeçare”.

Sipas një deklarate nga Departamenti i Drejtësisë, zoti Martin u padit në shkurt të vitit 2017 me akuzën e vjedhjes dhe mbajtjes së dokumentave të klasifikuara dhe materialeve të tjera. Departamenti më tej pretendoi se zoti Martin “vodhi dhe mbajti” dokumente shumë sekrete gjatë një periudhe 20 vjeçare, duke i mbajtur ato në shtëpinë e tij dhe në automjetin e tij.

Sipas aktakuzës, dokumentet e vjedhura dhe të mbajtura nga zoti Martin përmbanin informacione të planifikimit të Agjecisë së Sigurisë Kombëtare dhe informacion mbi objektivat e grumbullimit së inteligjencës. Dokumentet e tjera, nga Komanda Kibernetike e SHBA-së, përmbanin informacion mbi aftësitë ushtarake të SHBA-së, disa për t’u përdorur në operacione specifike dhe dokumente për boshllëqet në aftësitë kibernetike të SHBA-së.

Harold Martin u shpall fajtor për ruajtjen e qëllimshme të informacionit të mbrojtjes kombëtare në mars 2019. Në korrik 2019, zoti Martin u dënua me nëntë vjet burg, pasuar nga tre vjet lirim të mbikëqyrur.

Janar 2017 – Ish-kontraktori i mbrojtjes dhe marinsi Weldon Marshall u arrestua për mbajtjen e paligjshme të informacionit të klasifikuar, të ruajtur në disqe kompakte dhe disqe kompjuterike që ai mbante në shtëpinë e tij në Teksas. Informacioni përfshinte dokumente të klasifikuara nga koha e tij me Marinën e SHBA dhe nga koha e tij si kontraktor i mbrojtjes në Afganistan.

Zoti Marshall u shpall fajtor në mars 2018. Ai u dënua në qershor 2018 me më shumë se tre vjet burg, i ndjekur nga një vit lirim i mbikëqyrur.

Janar 2018 – Ish-oficeri i CIA-s Jerry Chun Shing Lee, i njohur gjithashtu si Zhen Cheng Li, u arrestua me akuzën e ruajtjes së paligjshme të informacionit të mbrojtjes kombëtare. Prokurorët pretenduan se Lee, ndërsa qëndronte në hotele në Hawaii dhe Virxhinia, kishte në posedim dy libra të vegjël që përmbanin shënime të shkruara me dorë që përfshinin emrat e vërtetë dhe numrat e telefonit të agjentëve dhe punonjësve të fshehtë të CIA-s, shënime operacionale nga takimet e agjentëve, vendndodhjet e takimeve operacionale dhe vendndodhjet e objekteve të fshehta.

Zoti Lee u padit në maj 2018 për dy akuza për mbajtje të paligjshme të dokumenteve në lidhje me mbrojtjen kombëtare, si dhe një akuzë për komplot për t’i dhënë informacione të mbrojtjes kombëtare një qeverie të huaj.

Lee u deklarua fajtor dhe u dënua në nëntor 2019 me 19 vjet burg për komplot për të komunikuar, shpërndarë dhe transmetuar informacione të mbrojtjes kombëtare tek Kina.

Maj 2018 – Ish-kontraktori i CIA-s Reynaldo Regis u shpall fajtor për akuzën e heqjes dhe mbajtjen e paautorizuar të materialeve të klasifikuara, si dhe për dhënien e deklaratave të rreme për oficerët federalë të zbatimit të ligjit. Prokurorët thanë se gjatë kohës së tij në CIA, zoti Reyes kreu kërkime të paautorizuara në bazat e të dhënave të klasifikuara dhe kopjoi informacionin në dhjetëra fletore, të cilat më pas i mori në shtëpi.

Në nëntor 2018, Reyes u dënua me 90 ditë burg. Avokati i tij më vonë i tha agjencisë Associated Press dhe mediave të tjera se klienti i tij “nuk kishte asnjë qëllim. Ishte thjesht një gabim”.

Gusht 2019 – Ish-punonjësja e Agjencisë Kombëtare të Sigurisë (NSA) Elizabeth Jo Shirley u arrestua në Mexico City nën akuzën e rrëmbimit të fëmijës së saj 6 vjeçare dhe më vonë u akuzua për mbajtjen e dokumenteve sekrete në pajisjet e saj elektronike, si në Meksikë ashtu edhe disa të ruajtura në shtëpinë e saj në Virxhinia Perëndimore.

Prokurorët argumentuan gjithashtu se zonja Shirley kërkoi t’i ofronte informacionin qeverisë ruse. Në korrik 2020, zonja Shirley u shpall fajtore për akuzën e mbajtjes së qëllimshme të informacionit të mbrojtjes kombëtare dhe për një akuzë për rrëmbim ndërkombëtar. Ajo u dënua në janar të vitit 2021 me më shumë se tetë vjet burg për mbajtje të qëllimshme të informacionit të mbrojtjes kombëtare. Ajo u dënua gjithashtu me tre vjet burg për akuzën e rrëmbimit.

Qershor 2020 – Hetuesit kryen një kontroll në shtëpinë në Hawaii të Asia Janay Lavarello, një punonjëse e Departamentit amerikan të Mbrojtjes, pas kthimit të saj nga një detyrë e përkohshme në Ambasadën e SHBA në Manila. Hetuesit gjetën dokumente, shkrime dhe shënime të shumta të klasifikuara në lidhje me mbrojtjen kombëtare apo marrëdhëniet me jashtë dhe thanë se dokumentet – që u panë për herë të parë nga të ftuarit në një darkë të organizuar nga zonja Lavarello – nuk ishin transportuar me zarfa të sigurisë diplomatike, siç kërkohej.

Zonja Lavarello u deklarua fajtore për heqjen me vetëdije të informacionit të klasifikuar në korrik 2021. Ajo u dënua në shkurt 2022 me tre muaj burg dhe 5,500 dollarë gjobë.

Maj 2021 – Kendra Kingsbury, një punonjëse në divizionin e FBI-së në Kansas City, u padit me dy akuza për mbajtje të paautorizuar të dokumenteve në lidhje me mbrojtjen kombëtare. Dokumentet e gjykatës argumentojnë se zonja Kingsbury mori materiale të ndjeshme dhe dokumente të klasifikuara nga vendi i saj i punës për një periudhë prej më shumë se 12 vjetësh dhe i mbajti në shtëpinë e saj. Një nga dokumentet përfshinte informacione për anëtarët e al-Kaidës në Afrikë, përfshi ato të një bashkëpunëtori të dyshuar të themeluesit të al-Kaidës, Osama bin Laden.

Kolegët republikanë të ish-presidentit amerikan Donald Trump dolën në mbrojtje të tij të martën, duke kërkuar shpjegime për kontrollin e FBI-së në shtëpinë e tij Mar-a-Lago në Florida, ku agjentët kërkuan dokumente të klasifikuara që ai i mori nga Shtëpia e Bardhë në fund të mandadit të tij në janar të vitit 2021.

Udhëheqësi i pakicës në Dhomën e Përfaqësuesve, Kevin McCarthy u zotua të hapë një hetim nëse republikanët marrin kontrollin e Dhomës së Përfaqësuesve nga demokratët në fillim të vitit të ardhshëm, që sondazhet sugjerojnë se është një mundësi e fortë politike.

“Kam parë mjaft”, tha ligjvënësi McCarthy në një postim në Twitter. “Departamenti i Drejtësisë ka arritur në një gjendje të patolerueshme politizimi. Pasi republikanët të marrin kontrollin e Dhomës së Përfaqësuesve, ne do të bëjmë një hetim të menjëhershme të këtij departamenti, do të ndjekim faktet dhe nuk do të lëmë gur pa lëvizur.”

Ai paralajmëroi Prokurorin e Përgjithshëm Merrick Garland, kreun e Departamentit të Drejtësisë, duke thënë “ruani dokumentet tuaja dhe hape kalendarin tuaj” për të dëshmuar në një hetim mbi këtë çështje.

Mike Pence, i cili shërbeu në postin e nënpresidentit në kohën kur Donald Trump ishte president, tha: “unë ndaj shqetësimin e thellë të miliona amerikanëve për kontrollin e paprecedentë të rezidencës personale të Presidentit Trump. Asnjë ish-president i Shteteve të Bashkuara nuk i është nënshtruar ndonjëherë një bastisjeje në rezidencën e tyre personale, në historinë e Amerikës”.

Zoti Pence tha se kontrolli i së hënës në pronën e zotit Trump në buzë të oqeanit Atlantik “minon besimin e publikut në sistemin tonë të drejtësisë dhe Prokurori i Përgjithshëm Garland duhet t’i japë llogari të plotë popullit amerikan se pse u ndërmor ky veprim dhe ai duhet ta bëjë këtë menjëherë”.

Ligjvënësit e tjerë republikanë e quajtën kontrollin një shpërdorim të pushtetit, megjithëse kontrolli ishte i autorizuar nga gjykata dhe ka të ngjarë të jetë miratuar në nivelet më të larta të Departamentit të Drejtësisë. Ende nuk dihet se çfarë roli ka luajtur prokurori Garland në këtë çështje.

Ligjvënësja konservatore Marjorie Taylor Greene shkruajti në Twitter “Anuloni fondet për FBI-në!”, duke përdorur të njejtat fjalë që disa ligjvënës liberalë përdorën për policinë në përgjigje të akuzave për përdorim të tepruar të forcës nga departamentet e policisë lokale kundër pakicave.

Gazetari konservator i kanalit Fox News, Sean Hannity, një aleat për një kohë të gjatë i zotit Trump, u tha miliona shikuesve të tij të hënën mbrëma se, “nëse jeni të lidhur me zotin Donald Trump në ndonjë mënyrë, bëni përgatitjet e duhura sepse ata do t’ju ndjekin me fuqinë e plotë të qeverisë federale.”

Ndërkohë, demokratët nuk bënë shumë komente mbi kontrollin e pronës së zotit Trump dhe Shtëpia e Bardhë tha se Presidenti Joe Biden nuk kishte njohuri paraprake për operacionin e FBI-së, i cili zgjati për orë të tëra.

Kryetarja e Dhomës së Përfaqësuesve Nancy Pelosi tha: “Ne besojmë në sundimin e ligjit. Asnjë person nuk është mbi ligjin, madje as presidenti i Shteteve të Bashkuara, as një ish-president i Shteteve të Bashkuara. “

Ndërkohë, ish-presidenti Trump e shfrytëzoi kontrollin e shtëpisë së tij si një shans për të mbledhur më shumë fonde për një kandidim të mundshëm presidencial në zgjedhjet e vitit 2024.

Në një mesazh me celularë dërguar mbështetësve të martën në mëngjes, Trump deklaroi “MAR-A-LAGO u bastis”. Ai tha: “Është koha që ÇDO PATRIOT të ngrihet kundër Gjuetisë së pakontrolluar të Shtrigave nga e Majta dhe kundër persekutimit politik të Presidentit Trump!”

Ai u kërkoi mbështetësve të kontribuonin me shuma mes 45 dhe 5,000 dollarësh.

Ish-presidenti Trump mund të zbulojë përmbajtjen e urdhrit për kontrollin e pronës së tij, por ende nuk e ka bërë këtë. Ai ia dorëzoi 15 kuti me materiale të ndryshme, disa prej tyre me dokumente sekrete, Administratës Kombëtare të Arkivave në janar, një vit pas largimit nga detyra.

Por FBI mori urdhrin e kontrollit për të kërkuar më shumë dokumente dhe mori më shumë materiale pasi kontrolloi zyrën e zotit Trump dhe hapi kasafortën e tij.

Akti i Regjistrit Presidencial, një ligj i vitit 1978 thotë se të gjitha të dhënat presidenciale janë në pronësi të publikut dhe duhet të transferohen automatikisht nën kujdestarinë e Adminstratës Kombëtare të Arkivave menjëherë pas largimit të Presidenti nga detyra. Të gjitha bibliotekat dhe muzetë presidenciale janë pjesë e Administratës Kombëtare të Arkivave, megjithëse ish-presidenti Trump nuk ka ndërtuar një objekt të tillë dhe ka treguar pak interes për ta bërë këtë.

Zoti Trump mund të përballet me akuza penale për mosdorëzimin e menjëhershëm të dokumenteve sekrete pas largimit nga detyra, megjithëse një veprim i tillë do të ishte një gjë e rrallë.

Ai gjithashtu përballet me një hetim për rolin e tij në nxitjen sulmit të 6 janarit 2021 në Kapitol, ndërsa ligjvënësit ishin mbledhur për të çertifikuar fitoren e demokratit Joe Biden në zgjedhjet presidenciale të vitit 2020 dhe për një skemë të disa prej avokatëve të tij për të zëvendësuar elektorët që mbështesnin zotin Biden me njerëz që mbështesnin zotin Trump.

Përveç kësaj, Donald Trump po përballet me një hetim në shtetin jugor të Xhorxhias, ku i kërkoi një zyrtari të zgjedhjeve shtetërore që t’i “gjente” votat e mjaftueshme, më shumë se 11,000, që i duheshin për të përmbysur fitoren e zotit Biden në këtë shtet.

Ish-presidenti amerikan, Donald Trump njoftoi se shtëpia e tij në Florida është bastisur nga agjentët e FBI-së.

Sipas tij, agjentët kanë hapur edhe kasafortën në vilën e njohur si Mar-a-Lago.

Por në një intervistë, djali i tij, Eric Trump, tha se agjentët e FBI nuk kanë gjetur asgjë në kasafortë. Edhe një burim pranë Trump tha për CBS se agjentët e FBI janë larguar pa gjetur ndonjë gjë.

Ish-presidenti e ka quajtur këtë sulm të motivuar politikisht. Sipas Trump, ai ka për qëllim që të pengojë kandidimin e tij në zgjedhjet e vitit 2024.

Mendohet se qëllimi i aksionit ishte që të shqyrtohej nëse Trump ka marrë dokumente të klasifikuara nga u largua nga Shtëpia e Bardhë.

Trump ishte në Nju Jork kur ndodhi bastisja në shtëpinë e tij në Florida.

“Këto janë kohë të errëta për kombin tonë, pasi shtëpia ime e bukur, Mar-A-Lago në Palm Beach të Floridës, është aktualisht nën rrethim, po bastiset dhe kontrollohet nga një grup i madh agjentësh të FBI-së. Asgjë si kjo nuk ka ndodhur ndonjëherë, nuk i ka ndodhur më parë një presidenti të Shteteve të Bashkuara”, tha Trump.

syri.net

I dërguari i Posaçëm i Shteteve të Bashkuara për Ballkanin Perëndimor, Gabriel Escobar, tha se krijimi i Asociacionit të komunave me shumicë serbe nuk duhet të jetë në kundërshtim me Kushtetutën e Kosovës, dhe të krijojë “shtet brenda shtetit”.

Gjatë një bashkëbisedimi me gazetarët, Escobar tha se qëndrimi i SHBA-së është që të zbatohen të gjitha marrëveshjet e arritura në kuadër të dialogut Kosovë-Serbi, por tha se duhet të ketë diskutim për çështjen e Asociacionit, që të mos bie ndesh me ligjet.

Gjatë këtij diskutimi ai foli edhe për situatën në rajon dhe përsëriti qëndrimin se “nuk do të ketë luftë në Bosnjë e Hercegovinë”.

“Ne kemi qenë të qartë se palët janë pajtuar më herët për Asociacionin, prandaj duhet të diskutohet. Megjithatë, Asociacioni nuk duhet të ndërhyjë, nuk duhet të bie në kundërshtim me Kushtetutën e Kosovës, nuk duhet të krijojë probleme në funksionalitetin e Kosovës dhe nuk duhet të jetë shtet brenda një shteti”, deklaroi ai.

Escobar tha se ka modele të shumta evropiane, ku minoritetet mund të mbrojnë trashëgiminë e tyre kulturore dhe gjuhën amtare, por pa shkelur kornizën kushtetuese të vendit ku jetojmë.

“Ne duam të gjejmë disa prej këtyre shembujve, dhe ndoshta edhe t’i përdorim si udhëzues për të zbatuar Asociacionin. Prandaj, kam shpresë se mund t’i diskutojmë këto në Bruksel më vonë gjatë këtij muaji”, shtoi ai.

Kosova dhe Serbia kanë arritur më 2013 Marrëveshjen për Asociacionin në kuadër të dialgout të ndërmjetësuar nga Bashkimi Evropian. Dy vjet më vonë, palët kanë nënshkruar Marrëveshjen mbi parimet e themelimit të Asociacionit.

Por, po atë vit, Gjykata Kushtetuese e Kosovës tha se disa pika të marrëveshjes nuk ishin në harmoni me aktin më të lartë juridik, dhe tha se ato mund të harmonizohen me ake nënligjore të Qeverisë.

Kryeministri i Kosovës, Albin Kurti, kundërshton një asociacion njëetnik, ndërkaq Serbia insiston në krijimin e tij.

Më 18 gusht, Kurti dhe presidenti i Serbisë, Aleksandar Vuçiq, do të takohen në Bruksel për të vazhduar dialogun, dhe Escobar tha se shpreson që në këtë takim të flitet edhe për Asociacionin.

Escobar tha se për Shtetet e Bashkuara, çështja e Kosovës “nuk është çështje e hapur”, pasi Uashingtoni dëshiron që Kosova të njihet prej të gjitha shteteve të BE-së dhe të anëtarësohet në organizata ndërkombëtare.

Ai tha se SHBA-ja mbështet “plotësisht dialogun e lehtësuar nga BE-ja”.

“Ne besojmë se ka një zgjidhje të përhershme për çështjen e targave të makinave. Besoj se jemi afër zbatimit e udhërrëfyesit për energjinë në veri, jemi afër nënshkrimit të marrëveshjes për të pagjeturit dhe shpresoj që palët do ta nënshkruajnë këtë marrëveshje shumë shpejt. Dhe sikurse sekretari [amerikan i Shtetit, Antony]Blinken u tha presidentes [Vjosa Osmani] dhe [Albin Kurti] kryeministrit të Kosovës kur ishin në SHBA, ne duhet të nisim diskutimin për Asociacionin”, tha ai.

Duke folur për tensionet në veri, që erdhën si rezultat i dy vendimeve të Qeverisë së Kosovës, atë për dokumentet dhe targat serb, Escobar tha se mospajtimet për veriun duhet të zgjidhen përmes diplomacisë.

“Ajo që po ndodh në veriun e Kosovës në të vërtetë është çështje midis Kosovës dhe Serbisë, prandaj është urgjente që të dy liderët e dy shteteve të takohen në Bruksel në kuadër të dialogut të lehtësuar nga BE-ja dhe të tejkalojnë mospajtimet sa i përket veriut”, tha ai.

Më 31 korrik, serbët lokalë ngritën barrikada në veri të Kosovës, duke kundërshtuar dy vendime të Qeverisë së Kosovës.

Qeveria e Kosovës kishte paraparë që nga 1 gushti të zbatonte lëshimin e dokumenteve për hyrje-dalje për të gjithë shtetasit e Serbisë që hyjnë në territorin e Kosovës.

Këtë praktikë, Serbia e aplikon ndaj shtetasve të Kosovës qe 11 vjet.

Po ashtu nga 1 gushti ishte paraparë të niste procesi i riregjistrimit të makinave me targa me akronime të qyteteve të Kosovës – që lëshohen nga Serbia – e që Prishtina i konsideron të paligjshme.

Zbatimi i dy vendimeve është shtyrë për 1 shtator, pas ndërmjetësimi të SHBA-së dhe BE-së me qëllim të uljes së tensioneve.

Kosova dhe Serbia zhvillojnë diskutime në Bruksel nën ndërmjetësimin e BE-së, që nga viti 2011. Procesi i dialogut ka për synim normalizimin e plotë të raporteve.

Kosova kërkon që një marrëveshje përfundimtare të përfshijë njohjen reciproke, ndërkaq Serbia insiston në një zgjidhje kompromisi.

“S’ka luftë në Bosnjë”

I dërguari i SHBA-së foli edhe për situatën në rajon. Ai tha se në Bosnjë e Hercegovinë nuk do të ketë luftë, por paralajmëroi kundër retorikës nxitëse nga përfaqësuesit.

Ai tha se pret që ky shtet të mbajë zgjedhje të lira më vonë gjatë këtij viti.

Sa i përket Malit të Zi, tha se SHBA-ja përkrah çdo qeveri që përfaqëson vlerat e BE-së dhe është e përkushtuar për NATO.

Ndërkaq, Maqedonisë së Veriut dhe Shqipërisë u premtoi mbështetje në reforma që do të përshpejtonin rrugën e tyre drejt BE-së, pasi këto dy shtete hapën zyrtarisht negociatat për anëtarësim me bllokun evropian.

Një grup senatorësh amerikanë, nga të dy krahët, paraqitën një projektligj që synon të mbështesë zhvillimin ekonomik, tregëtinë, si dhe të luftojë korrupsionin, përfshirë hartimin e legjislacioni të posaçëm për sanksionet, për të frenuar aktivitetet destabilizuese në Ballkanin Perëndimor.

Projekligji, i njohur ndryshe si Akti mbi Demokracinë dhe Prosperitetin në Ballkanin Perëndimor është paraqitur nga senatorja demokrate Jeanne Shaheen, kryetare e Nënkomisionit për Evropën dhe Bashkëpunimin mbi Sigurinë Rajonale dhe senatori republikan Roger Wicker.

Iniciativa vjen mes shqetësimesh të rritura në rajon për shkak të luftës në Ukrainë. Senatorja Shaheen thotë se marrëdhëniet e Shteteve të Bashkuara me Ballkanin Perëndimor janë thelbësore në këto momente, ku duken qartë synimet e Presidentit Putin për të përhapur ndikimin keqdashës në të gjithë Evropën Lindore.

“Projektligji i ri dypartiak forcon tregtinë dhe investimet mes SHBA-ve dhe Ballkanit Perëndimor, duke luftuar në të njejtën kohë korrupsionin, nëpërmjet miratimit të një ligjislacioni të posaçëm për sanksione kundër aktorëve destabilizues. Të gjitha këto hapin rrugën për një integrim më të gjerë euro-atlantik”, tha zonja Shaheen në prezantimin e iniciativës në faqen e saj në internet.

Projekligji udhëzon Sekretarin e Shtetit të ofrojë ndihmë teknike për çdo vend të Ballkanit Perëndimor për të zhvilluar një strategji kombëtare kundër korrupsionit.

Ai parashikon gjithashtu kthimin në ligj të dy urdhra ekzekutivë, që do të garantonin kompetenca për sanksione kundër atyre që kërcënojnë paqen dhe stabilitetin në Ballkanin Perëndimor dhe që janë të përfshirë në akte korruptive.

Po kështu synohet nxitja e partneritetin universitar, inkurajohet angazhimi i Korpusit të Paqes në rajon, krijimi i një iniciative për udhëheqësi rinore në Ballkan dhe si kërkohet nga Korporata Financiare për Zhvillim që të hapë një zyrë të shpallur më parë në rajon.

Zonja Shaheen ishte në krye të një grupi senatorësh amerikanë që vizituan në muajin prill Kosovën, Serbinë e Bosnje e Hercegovinën, mes shqetësimeve rreth ndikimit të konfliktit në Ukrainë, në Ballkanin Perëndimor. Vizita e tyre kishte për qëllim forcimin e lidhjeve mes Uashingtonit dhe Ballkanit Perëndimor, përballë përpjekjeve të huaja për të dëmtuar paqen.

Senatori Wicker tha se projektligji “do të dërgonte një sinjal të fortë dypartiak, se Shtetet e Bashkuara janë të përkushtuara për të mbështetur diplomacinë në rajon”.

Po kështu senatorët Dick Durbin, Thom Tillis, Chris Van Hollen, Ben Cardin e Chris Murphy janë mbështetës të këtij projektligji.

Për senatorin Tillis, në një kohë kur Rusia vazhdon luftën e saj të paligjshme kundër Ukrainës dhe kërcënon aleatët e NATO-s, rajoni i Ballkanit Perëndimor është kritik për sigurinë e Evropës.

Senatori Ben Cardin, Kryetar i Komisionit për Sigurinë dhe Bashkëpunimin në Evropë, i njohur si Komisioni amerikan i Helsinkit, tha se “në një kohë kur vendet e Ballkanit Perëndimor kanë bërë hapa të mëdhenj drejt qeverisjes demokratike, që nga fundi i luftrave në ish-Jugosllavi, përçarjet politike dhe korrupsioni në rritje, kërcënojnë të gërryejnë këtë përparim.

“Ne duhet të vazhdojmë të mbështesim partnerët dhe aleatët tanë demokratikë në Ballkanin Perëndimor. Ky projektligj dypartiak do të çojë përpara stabilitetin rajonal dhe përpjekjet kundër korrupsionit duke krijuar programe që inkurajojnë zhvillimin ekonomik gjithëpërfshirës, strategjinë kombëtare kundër korrupsionit dhe të mbajnë përgjegjës ata që kërcënojnë paqen në Ballkanin Perëndimor”, tha ai.

Senatorët amerikanë e shohin projekligjin si një mundësi për forcimin e mëtejshëm të marrëdhënieve mes SHBA-ve dhe Ballkanit Perëndimor, zgjerimin e mundësive ekonomike si dhe mbështetje për përpjekjet për të çuar përpara demokracinë dhe çrrënjosur korrupsionin.

Presidenti Joe Biden doli pozitiv në testin për COVID-19 përsëri të shtunën, pak më shumë se tre ditë pasi doli nga izolimi për shkak të koronavirusit, tha Shtëpia e Bardhë, në një rast të rrallë “riinfektimi” pas trajtimit me një ilaç antiviral.

Mjeku i Shtëpisë së Bardhë, Dr. Kevin O’Connor tha në një letër se presidenti Biden “nuk ka përjetuar rishfaqje të simptomave dhe vazhdon të ndjehet mjaft mirë”. Mjeku O’Connor tha se “nuk ka asnjë arsye për të rifilluar trajtimin në këtë moment”.

Presidenti Biden shkroi në rrjetet sociale se doli sërish pozitiv, një gjë që ndodh rrallë.

“Nuk kam simptoma, por do të izolohem për sigurinë e të gjithëve përreth meje”, shkroi ai duke theksuar se është ende në punë.

Në përputhje me udhëzimet e Qendrës për Kontrollin dhe Parandalimin e Sëmundjeve, presidenti Biden do të jetë në izolim për të paktën pesë ditë. Ai do të izolohet në Shtëpinë e Bardhë derisa të dalë negativ. Agjencia thotë se shumica e rasteve të rishfaqjes së infeksionit mbeten të lehta dhe se sëmurje të rënda gjatë asaj periudhe nuk janë raportuar.

Njoftimi se presidenti doli pozitiv, u bë vetëm dy orë pasi Shtëpia e Bardhë njoftoi një vizitë në Michigan këtë të martë për të nxjerrë në pah miratimin e një projektligji për të nxitur prodhimin vendas të teknologjisë së lartë. Presidenti Biden ishte planifikuar gjithashtu të vizitonte shtëpinë e tij në Wilmington, Delaware, të dielën në mëngjes, ku zonja e parë Jill Biden ka qëndruar ndërsa presidenti ishte pozitiv. Të dy udhëtimet janë anuluar.

Presidenti Biden, 79 vjeç, u trajtua me ilaçin antiviral Paxlovid, pasi për herë të parë doli pozitiv në 21 korrik. Ai rezultoi negativ për virusin të martën dhe të mërkurën e kaluar. Më pas ai u lirua nga izolimi ndërsa mbante një maskë në mjedise të mbyllura.

Presidenti Joe Biden dhe Xi Jinping i Kinës janë duke eksploruar mundësinë e takimit në person, tha një zyrtar i lartë i administratës pasi udhëheqësit kaluan më shumë se dy orë të enjten duke biseduar për të ardhmen e marrëdhënieve të ndërlikuara, me tensionet për Tajvanin që u shfaqën edhe një herë si një pikë përplasjeje.

Zyrtari nuk pranoi të identifikohej për të folur rreth bisedës. Presidenti Biden e bëri bisedën telefonike nga Zyra Ovale, ku iu bashkuan ndihmësa të lartë, përfshirë Sekretarin e Shtetit Antony Blinken.

Kur zoti Biden ishte nënpresident, ai kaloi orë të tëra me zotin Xi në Shtetet e Bashkuara dhe në Kinë, një përvojë që ai e kujton shpesh ndërsa flet për mundësitë e të dy vendeve për konflikt dhe bashkëpunim. Megjithatë, ata nuk janë takuar personalisht që kur Joe Biden u bë president vitin e kaluar.

Një tensionim i përsëritur është për shkak të Tajvanit, i cili vetëqeveriset prej dekadash, por që Kina e konsideron si pjesë të territorit të saj, një pretendim i theksuar nga zoti Xi të enjten.

“Ata që luajnë me zjarrin do të vdesin prej tij”, tha Ministria e Punëve të Jashtme pas telefonatës me Biden. “Shpresohet se SHBA-të do të jenë të qarta për këtë”.

Shtëpia e Bardhë publikoi përshkrimin e saj të bisedës për Tajvanin, duke thënë se Presidenti Biden “theksoi se politika e Shteteve të Bashkuara nuk ka ndryshuar dhe se Shtetet e Bashkuara kundërshtojnë fuqimisht përpjekjet e njëanshme për të ndryshuar status quo-në ose për të dëmtuar paqen dhe stabilitetin përgjatë ngushticës së Tajvanit”.

Qëllimi i telefonatës, e cila filloi në 8:33 të mëngjesit dhe përfundoi në 10:50 të mëngjesit, ishte që “të menaxhojmë me përgjegjësi dallimet tona dhe të punojmë së bashku aty ku përputhen interesat tona”, tha Shtëpia e Bardhë.

Si zakonisht, Kina nuk la asnjë dyshim se fajëson Shtetet e Bashkuara për përkeqësimin e marrëdhënieve mes dy vendeve.

“Presidenti Xi nënvizoi se përqasja dhe përcaktimi i marrëdhënieve Kinë-SHBA në termat e konkurrencës strategjike dhe për ta parë Kinën si rivalin kryesor dhe sfidën më serioze afatgjatë, do të ishte keqperceptim i marrëdhënieve mes Kinës dhe SHBA-ve dhe keqkuptim i zhvillimit të Kinës dhe do të mashtronte njerëzit e të dy vendeve dhe komunitetin ndërkombëtar”, tha Ministria e Punëve të Jashtme.

“Të dy krerët e shteteve patën një komunikim dhe shkëmbim të thelluar për marrëdhëniet dhe çështjet me interes të përbashkët Kinë-SHBA”, raportoi Televizioni Qendror i Kinës në faqen e tij të internetit.

Pika më e fundit e tensionit ka qenë vizita e mundshme e Kryetares së Dhomës së Përfaqësuesve Nancy Pelosi në Tajvan, ishull që vet-qeveriset në mënyrë demokratike dhe merr mbështetje joformale mbrojtëse nga Shtetet e Bashkuara, por që Kina e konsideron pjesë të territorit të saj. Pekini ka thënë se do ta konsideronte një udhëtim të tillë si një provokim, një kërcënim që zyrtarët amerikanë po e marrin me seriozitet të shtuar nën dritën e inkursionit të Rusisë në Ukrainë.

“Nëse SHBA këmbëngul të ndjekë rrugën e vet dhe të sfidojë vijën përfundimtare të Kinës, ajo me siguri do të përballet me përgjigje të forta”, tha Zhao Lijian, një zëdhënës i Ministrisë së Jashtme të Kinës, para gazetarëve në fillim të kësaj jave. “Të gjitha pasojat që vijnë do të përballohen nga SHBA-ja.”

Zonja Pelosi do të ishte zyrtarja më e lartë i zgjedhur në SHBA që do të udhëtonte në Tajvan që kur republikani Newt Gingrich vizitoi ishullin në vitin 1997, kur ishte kryetar i Dhomës së Përfaqësuesve. Presidenti Biden javën e kaluar u tha gazetarëve se zyrtarët ushtarakë amerikanë besonin se nuk ishte “ide e mirë” që zonja Pelosi të vizitonte ishullin për momentin.

John Kirby, zëdhënës i sigurisë kombëtare të SHBA-së, tha të mërkurën se ishte e rëndësishme që presidentët Biden dhe Xi të mbanin diskutimin rregullisht të hapur.

“Presidenti dëshiron të sigurohet që linjat e komunikimit me Presidentin Xi të mbeten të hapura sepse ato janë të nevojshme”, u tha zoti Kirby gazetarëve në një konferencë në Shtëpinë e Bardhë. “Ka çështje për të cilat ne mund të bashkëpunojmë me Kinën, dhe ka çështje ku padyshim ka fërkime dhe tensione”.

Presidentët Biden dhe Xi folën për herë të fundit në mars, menjëherë pas sulmit rus të Ukrainës.

“Kjo është një nga marrëdhëniet dypalëshe më të rëndësishme në botë sot, me shumë degëzime përtej të dy vendeve individuale,” tha zoti Kirby.

Disa analistë besojnë se presidenti Xi gjithashtu ka interes për të shmangur përshkallëzimin pasi ai kërkon një mandat të tretë të paprecedentë në detyrë në një kongres të Partisë Komuniste në pushtet që pritet në vjeshtë.

Presidenti Biden dëshiron gjithashtu të diskutojë çështjet e klimës dhe konkurrencës ekonomike, tha një person i informuar për bisedën, si dhe idenë e vendosjes së një kufiri të çmimit të naftës ruse për të ndëshkuar Moskën për luftën e saj në Ukrainë, një çështje që Sekretarja e Thesarit Janet Yellen e ngriti me homologët kinezë më herët në korrik.

Administrata Biden ka debatuar nëse do të heqë disa tarifa për mallrat kineze si një mënyrë për të lehtësuar inflacionin në rritje.

Kur presidenti Biden foli për herë të fundit me homologun Xi në mars, ai paralajmëroi për “pasoja” nëse Pekini do të jepte mbështetje materiale për luftën e Rusisë, dhe qeveria amerikane beson se kjo vijë e kuqe nuk është kaluar.

Tajvani është ankuar për manovra të shtuara ushtarake kineze gjatë dy viteve të fundit për ta detyruar atë të pranojë sovranitetin e Pekinit.

I dërguari i posaçëm amerikan për Ballkanin, Gabriel Escobar i tha Zërit të Amerikës pas nënshkrimit të marrëveshjes energjetike mes Korporatës Sfidat e Mijëvjeçarit dhe Kosovës se marrëveshja është shenjë e thellimit të bashkëpunimit në mes të Kosovës dhe Shteteve të bashkuara.

“Kosova është një partner jashtëzakonisht i mirë në rajon, është një vend kompentent në marrëdhënien tonë në rajon. Gjithçka që mund të bëjmë për ta thelluar bashkëpunimin, jemi të lumtur ta bëjmë”, tha ai.

Zoti Escobar tha se është e rëndësishme për të gjithë rajonin që të distancohet nga energjia ruse pasi Rusia e shfrytëzon atë si armë.

Në përgjigje të një pyetjeje të Zërit të Amerikës, lidhur me rrezikun e ndikimit të situatës së krijuar në Ukrainë dhe synimeve të Moskës tek Ballkani Perëndimor, zoti Escobar u shpreh optimist për zmbrapjsen e këtyre synimeve në rajon.

“Asnjëherë nuk kemi parë një unitet të tillë që kemi tani brenda NATO-s dhe unitetin që kemi me partnerët tanë evropianë për t’u siguruar që siguria evropiane është përparësia jonë më e madhe. Në këtë kontekst e konsiderojmë edhe Ballkanin Perëndimor dhe besoj që Ballkani Perëndimor do të jetë në rregull”, tha ai.

Ai shtoi se megjithë sfidat e ndryshme, të gjitha vendet e rajonit kanë përkrahjen dhe vëmendjen e Shteteve të Bashkuara.