Ish-kongresmeni demokrat, Eliot Engel, publikoi sot një opinion në revistën ‘Foreign Policy’, që bëri shumë bujë.

Jehona e shkrimit, ku Engel thotë se administrata e Biden po qetëson autokratin Vuçiç, mbërriti edhe në Kongresin amerikan, ku Komisioni për Marrëdhëniet me Jashtë po mbante një seancë dëgjimore me të dërguarin e SHBA në rajon, Gabriel Escobar.

Kongresmeni republikan, Keith Self, e pyeti Escobarin pikërisht për shkrimin e Engel, që dikur kryesonte këtë komision të rëndësishëm të Kongresit.

Keith Self: Jam i surprizuar të shoh që Eliot Engël, një koleg i krahut tjetër, që e ka kryesuar këtë komitet, ka shkruar një shkrim për Serbinë dhe Rusinë dhe ai arrin në konkluzionin- mos harroni se është koleg nga krahu tjetër që ka drejtuar këtë komision- se administrata e Bidenit po qetëson Serbinë. Ndonjë koment si zyrtar i administratës Biden?

Gabriel Escobar: Do të thoja se kjo është gabim. Në gjashtë ditët e fundit kemi bërë çdo gjë në paragjykim të Serbisë, kemi qenë në favor të liberalizimit të vizave për Kosovën, në favor të anëtarësimit në Këshillin e Europës, kemi njohur rezultatin e zgjedhjeve edhe pse me përqindje të ulët prej 3 përqind, kemi sanksionuar shefin e inteligjencës në Serbi…

Keith Self: Por ju keni mbështetur zgjedhjet e reja. Në seancën e kaluar kam theksuar se kur kemi pjesëmarrje të ulët në SHBA, çka ndodh shpesh, nuk kërkojmë zgjedhje të reja. Megjithatë ju i jeni bashkuar BE-së duke bërë thirrje për zgjedhje të reja?

Gabriel Escobar: Por ne kemi vetë qeverinë e Kosovës që ka thënë se këto zgjedhje nuk janë një çelës për stabilitet…

Keith Self: Koha ime mbaroi, por dua t’u kërkoj ju që të mos e lejoni këtë përfaqësues rus të ngulë këmbët në territorin e NATO-s.

I dërguari amerikan për Ballkanin Perëndimor, Gabriel Escobar, ka thënë se nuk sheh gatishmëri të Kosovës dhe Serbisë për ta zbatuar Marrëveshjen e Ohrit, ndonëse ajo, sipas tij, ofron mundësi të jashtëzakonshme për të dyja vendet.

Ai i ka bërë këto deklarata para Komitetit për Punë të Jashtme të Dhomës së Përfaqësuesve në Shtetet e Bashkuara, teksa ka diskutuar për sigurinë dhe stabilitetin e Ballkanit Perëndimor dhe qasjen e Shteteve të Bashkuara ndaj këtij rajoni.

“Ne kemi tentuar vazhdimisht t’i shtyjmë të dyja palët që të veprojnë, dhe në kthim kemi parë disa seri të përshkallëzimit të situatës. Pozicioni ynë është se marrëveshja do të mund të zbatohej menjëherë pas arritjes së pajtueshmërisë. Secila palë është dashur të hartojë rrugën sesi do ta zbatonte atë”.

Kosova dhe Serbia kanë arritur pajtueshmëri, në shkurt të këtij viti në Bruksel, për rrugën drejt normalizimit të marrëdhënieve. Më pas, në mars, në Ohër janë pajtuar për ankesin e zbatimit të marrëveshjes.

“Marrëveshja i kërkon Serbisë që ta njohë sovranitetin e Kosovës dhe integritetin e saj territorial. T’ia njohë simbolet kombëtare, flamurin, dokumentet qeveritare, diplomat, targat e makinave dhe ia ndalon Serbisë që ta bllokojë anëtarësimin e Kosovës në organizata ndërkombëtare. Kosovës i kërkohet që të zbatojë obligimin që e ka për formim të Asociacionit të komunave me shumicë serbe. Ne besojmë që të dyja vendet duhet të angazhohen menjëherë në këto aspekte, pa parakushte. Duhet të nisin ta kryejnë pjesën e tyre”, ka thënë Escobar.

Megjithatë, Escobar ka thënë se shpreson në përparim të rëndësishëm këtë vit mes Kosovës dhe Serbisë.

I pyetur se çfarë po bën SHBA-ja që t’i bindë pesë shtetet e BE-së – Spanjën, Sllovakinë, Rumaninë, Greqinë, dhe Qipron – që ta njohin shtetësinë e Kosovës, Escobar ka thënë se është në kontakt të vazhdueshëm me to.

“Marrëveshja e Ohrit na ofron neve mundësinë më të madhe në 15 vjetët e fundit që të bashkëpunojmë me Qeverinë e Kosovës që të niset, jo vetëm një fushatë evropiane e njohjeve, por një fushatë globale e njohjeve. Shumica e shteteve do të dëshironin ta shihnin gatishmërinë e Kosovës që ta përmbushë pjesën e saj të marrëveshjes [së Ohrit], që është Asociacioni i komunave me shumicë serbe. Kjo është njëra prej arsyeve pse e kam shtyrë Qeverinë e Kosovës që ta çojë përpara këtë gjë – me mbështetjen amerikane – përmes një rruge që Asociacioni të mos e rrezikojë kushtetutën, apo strukturën ligjore, që të mund të nisim këtë vit fushatën e njohjeve. Deri më tani nuk e kam marrë atë zotim prej Qeverisë së Kosovës”.

Kosova dhe Serbia kanë arritur marrëveshje për Asociacionin më 2013 dhe më pas më 2015 mbi parimet për themelimin e tij.

Po më 2015, Gjykata Kushtetuese e Kosovës ka gjetur se marrëveshja nuk është në harmoni të plotë me Kushtetutën.

Serbia kërkon që Kosova të zbatojë marrëveshjet e arritura, por Qeveria e Kosovës është deklaruar kundër një asociacioni njëetnik.

Mekanizmi ndërkombëtar i ka kërkuar Kosovës që ta formojë Asociacionin në përputhje me kushtetutën, dhe duke ia përmendur disa modele që veçse ekzistojnë në botë.

“Kemi marrë zotime që Serbia nuk do t’i refuzojë zgjedhjet në veri”

Duke folur për situatën aktuale në Kosovë, ligjvënësit amerikanë i kanë konsideruar tensionet e fundit në veri si shumë alarmuese.

Ata e kanë kritikuar edhe qasjen e Qeverisë së Kosovës dhe mungesën e koordinimit me SHBA-në, por edhe rolin e Serbisë në protestat në veri.

Mirëpo, Escobar, ka thënë se ka marrë zotime që Serbia nuk do t’i kundërshtojë zgjedhjet e ardhshme në veri të Kosovës dhe se Serbia do të përballet me pasoja nëse vepron ndryshe.

Tensionet në veri të Kosovës kanë qenë të larta që disa javë, sidomos në muajin qershor.

Situata është përkeqësuar pasi serbët lokalë në komunat në veri të Kosovës – Zveçan, Leposaviq dhe Zubin Potok – kanë kundërshtuar hyrjen e kryetarëve të rinj shqiptarë, me asistimin e Policisë së Kosovës, në ndërtesat komunale.

Krytarët i kanë fituar mandatet në zgjedhjet e mbajtura në prill të këtij viti, të cilat i kanë bojkotuar serbët.

Mirëpo, më 11 korrik Bashkimi Evropian ka konfirmuar se Kosova ka pranuar të reduktojë praninë e policisë në dhe rreth ndërtesave komunale në Zveçan, Leposaviq dhe Zubin Potok, dhe se Kosova do të mbështesë mbajtjen e zgjedhjeve të reja në katër komunat veriore, si pjesë e veprimeve për të shtensionuar situatën.

Qeveria e Kosovës ka thënë se të gjithë hapat do të “finalizohen brenda një periudhe dyjavore”.

Problemet kyçe të Ballkanit Perëndimor

Escobar ka vlerësuar se, në mesin e problemeve kyçe me të cilat përballet Ballkani Perëndimor janë: përparimi i ngadalshëm në demokratizim, korrupsioni, varësia nga burimet ruse të energjisë, politikat etno-nacionaliste, dezinformatat dhe ndikimi i dëmshëm prej jashtë.

Për Shqipërinë, Maqedoninë e Veriut dhe Malin e Zi

Escobar ka thënë se si Shqipëria, ashtu edhe Maqedonia e Veriut i kanë hapur negociatat për anëtarësim në Bashkimin Evropian, dhe se të dyja janë partnere solide në inkurajimin e normalizimit të marrëdhënieve në mes të Kosovës dhe Serbisë.

“Për t’i çuar përpara aspiratat për anëtarësim në BE, Qeveria e Maqedonisë së Veriut është e përkushtuar për ndryshimet kushtetuese për ta njohur pakicën bullgare. Ne e mbështesim fuqishëm këtë hap të vështirë, por të nevojshëm, dhe jemi të angazhuar me Qeverinë e re të Bullgarisë, për t’u siguruar se ajo nuk do të ketë kërkesa të reja, sapo Maqedonia e Veriut t’i përmbushë kërkesat e marrëveshjes ekzistuese”.

Ai ka thënë se integrimet evropiane dhe transatlantike janë thelbësore për ta zvogëluar ndikimin e aktorëve të dëmshëm në këtë rajon, siç janë Rusia dhe Kina, por edhe të aktorëve lokalë të korruptuar, që synojnë ta destabilizojnë rajonin dhe t’i pengojnë integrimet, duke e zgjeruar ndikimin e tyre.

Escobar ka thënë gjatë dëshmisë së tij se Rusia e shtrin ndikimin e tij në rajon përmes dy rrugëve: dezinformatave dhe energjisë.

“Asgjë më shumë. Rusia nuk ofron tregti bilaterale, as nuk ofron ndihmë, as kapacitet për ndërtim, as mbështetje për reforma demokratike. Thjesht, e fut rajonin në kurth përmes varësisë energjetike. Prandaj, sa më shpejt që mund t’i ndihmojmë rajonit në zvogëlim të varësisë, qoftë përmes gazit të lëngshëm natyror, apo përmes energjisë së ripërtrishme, aq më shpejt do të mund ta luftojmë ndikimin rus në rajon.

Ai e ka përmendur edhe ndikimin që synon ta shtrijë Kina përmes investimeve.

“Ne ofrojmë alternativa për të ndërtuar qëndrueshmëri kundër këtyre ndikimeve”, ka thënë mes tjerash Escobar.

Duke e përshkruar situatën në Malin e Zi, Escobar ka thënë se është rikthyer momentumi drejt të ardhmes evropiane së këtij vendi.

Ai ka vlerësuar se zgjedhjet e fundit presidenciale dhe parlamentare kanë qenë të lira, paqësore dhe se votuesve u janë ofruar mjaft zgjedhje.

“Rezultati e ka forcuar synimin e Malit të Zi drejt integrimit dhe reformave që do të mundësojnë përparim”.

Për Bosnje – Hercegovinën

Escobar ka thënë se presidenti i entitetit të Republikës Sërpska në Bosnje – Hercegovinë, Millorad Dodik, vazhdon të jetë i fokusuar në shpërbërjen e Marrëveshjes së Dejtonit dhe kushtetutës së shtetit.

“Veprimet e vazhdueshme anti-demokratike të Dodikut kërcënojnë stabilitetin, sigurinë dhe prosperitetin e shtetit dhe gjithë rajonit”, ka thënë ai.

Escobar ka thënë se SHBA-ja do të vazhdojë t’i vëzhgojë këto veprime dhe të kërkojë llogaridhënie nga të gjithë ata që e dëmtojnë Marrëveshjen e Dejtonit apo që e kërcënojnë sovranitetin dhe integritetin territorial të Bosnje-Hercegovinës.

Dodik është i sanksionuar nga Shtetet e Bashkuara dhe Mbretëria e Bashkuar.

Escobar i ka bërë këto deklarata në kohën kur Bosnja po përballet me një sërë krizash politike.

Së fundi, Qeveria e Republikës Sërpska ka miratuar ligje për moszbatimin e vendimeve të Gjykatës Kushtetuese të Bosnjës dhe që të mos i publikojë vendimet e Përfaqësuesit të Lartë të bashkësisë ndërkombëtare.

Gabriel Escobar, emisar i Shteteve të Bashkuara të Amerikës për Ballkanin Perëndimor do të raportojë sot para Kongresit Amerikan.

Escobar i ka dërguar një dokument Kongresit për zhvillimet dhe perspektivën e rajonit. Në këtë raport ai thotë mes të tjerave se një problem shumë i madh është i dizinformimit, i cili shpesh herë vjen i diktuar nga Kremlini në gjuhën serbe.

“Serbia shihet si platformë e dizinfomimit që vjen nga Rusia.

Integrimi transatlantik dhe evropian është thelbësor për reduktimin e ndikimit të dëmshëm të aktorëve, si Rusia por edhe aktorët lokalë të korruptuar, që kërkojnë të destabilizojnë rajonin dhe të pengojnë këtë integrim duke zgjeruar ndikimin e tyre.

E ndërsa bën luftë kundër Ukrainës, Kremlini ushqen dezinformimin shpesh përmes gjuhës serbe për të mbjellë ndarje, mosbesim dhe tensione ndëretnike dhe fetare”- theksohet ne raportin e Escobar.

Një substancë e bardhë e gjetur brenda Shtëpisë së Bardhë vonë të dielën, që shkaktoi një evakuim të shkurtër, rezultoi se ishte kokainë. Burime të ndryshme iu thanë agjencive të lajmeve Associated Press dhe Reuters se testi paraprak tregoi se substanca e zbuluar në ëest ëing ishte kokainë.

Zëdhënësi i Shërbimit Sekret të SHBA, Anthony Guglielmi nuk e konfirmoi zbulimin, por tha për Washington Post se substanca po i nënshtrohej testimit të mëtejshëm. Krahu Perëndimor përmban Zyrën Ovale, dhomën e kabinetit dhe zonën e shtypit, si dhe zyra dhe hapësirë ​​pune për stafin e presidentit.

Presidenti Joe Biden dhe familja e tij ishin në Camp David kur agjentët e shërbimit sekret që bënin kontrolle rutinë gjetën pluhurin e bardhë në një zonë të aksesueshme për grupet turistike. Biden dhe familja e tij u kthyen në Shtëpinë e Bardhë të martën.

“Të dielën në mbrëmje, kompleksi i Shtëpisë së Bardhë u mbyll në mënyrë paraprake pasi oficerët nga Divizioni i Uniformave të Shërbimit Sekret hetuan një send të panjohur të gjetur brenda një zone pune”, tha Shërbimi Sekret në një deklaratë.

Dështimi i forcave ukrainase për të bërë përparime të shpejta në ofensivën kundër trupave ruse nuk po shkakton panik në mesin e zyrtarëve të lartë ushtarakë amerikanë.

Zyrtarët ukrainas kanë shprehur zhgënjimin e tyre ditët e fundit, duke i bërë thirrje Uashingtonit dhe Perëndimit që t’i ofrojnë armatim më të avancuar për të ndihmuar në shkatërrimin e pozicioneve mbrojtëse ruse dhe për të rimarrë më shumë territor.

Por zyrtarët amerikanë mbeten të bindur se kundërofensiva e Ukrainës do të sjellë rezultate, edhe nëse do të duhen gjashtë deri në tetë javë përpara se forcat ukrainase të bëjnë përparime më thelbësore.

“Lufta në letër dhe lufta e vërtetë në terren janë dy gjëra të ndryshme”, tha komandanti i shtatmadhorisë amerikan, Gjenerali Mark Milley, gjatë një diskutimi në Uashington të premten.

“Fakti që po ecën më ngadalë nga sa parashikuan njerëzit nuk më befason aspak”, tha gjeneral Milley në Klubin Kombëtar të Shtypit, duke vënë në dukje se forcat ukrainase po “përparonin në mënyrë të qëndrueshme dhe të organizuar”.

“Do të jetë shumë e vështirë, shumë e gjatë, shumë e përgjakshme dhe askush nuk duhet të ketë iluzione për këtë”, tha ai.

Më herët të premten, gjenerali më i lartë i ushtrisë së Ukrainës tha për gazetën The Washington Post forcat e tij kishin nevojë të madhe për municion dhe armatime të tjera të avancuara.

“Kjo më zemëron shumë”, tha Valery Zaluzhny, komandant i përgjithshëm i forcave të armatosura të Ukrainës. “Kjo nuk është një shfaqje. Nuk është një shfaqje të cilën e gjithë bota po e shikon dhe vë baste. Çdo ditë, çdo metër jepet me gjak.”

“Pa një furnizim të duhur me armë dhe municione, këto plane nuk janë aspak të realizueshme”, shtoi ai, duke kritikuar Perëndimin për shtyrjen e planeve të luftës që mbështeten në epërsinë ajrore, të cilën as Ukraina dhe as Rusia nuk kanë qenë në gjendje ta sigurojnë.

Kërkesat për më shumë armë

Komandanti Zaluzhny dhe zyrtarë të tjerë ukrainas u kanë bërë thirrje në mënyrë të përsëritur Shteteve të Bashkuara dhe aleatëve të tjerë që të ofrojnë jo vetëm tanke dhe automjete të blinduara, por edhe bomba thërrmuese, raketa me rreze të gjatë veprimi dhe avionë luftarakë modern F-16.

Deri më tani, Shtetet e Bashkuara kanë hezituar t’i japin Kievit sisteme të tilla, megjithëse Uashingtoni ka thënë se do t’i lejojë aleatët e tij t’i ofrojnë Ukrainës avionët e prodhuar në Shtetet e Bashkuara dhe po trajnojnë pilotët ukrainas për t’i drejtuar avionët F-16. Uashingtoni thotë se është përqëndruar në furnizimin e Ukrainës me sisteme dhe armë që forcat e tyre mund t’i dislokojnë menjëherë në vijat e frontit.

Gjeneral Milley tha se kërkesat e Kievit nuk po injoroheshin.

“Sistemet raketore “ATACMS”, avionët F-16 dhe çdo gjë tjetër është në një proces rishikimi të vazhdueshëm”, tha ai. “Këto gjëra janë duke u shqyrtuar. Nuk është marrë asnjë vendim për këtë.”

Gjeneral Milley tha se Shtetet e Bashkuara nuk e kanë përjashtuar mundësinë e furnizimit të Ukrainës me municione thërrmuese, pavarësisht shqetësimeve të disa aleatëve për dëmin që këto bomba shkaktojnë.

Përdorimi i bombave ose predhave, të cilat hapen në ajër dhe hedhin bomba ose predha më të vogla mbi një zonë shumë më të gjërë, kundërshtohet nga një numër organizatash humanitare, të cilat thonë se ato kanë një shkallë të lartë dështimi dhe shpesh shkaktojnë viktima në mesin e civilëve.

Ministri ukrainas i Mbrojtjes Oleksii Reznikov ka thënë se forcat e Kievit kanë çliruar me sukses nëntë vendbanime në rajonet Donetsk dhe Zaporizhzhias, megjithëse sulmi kryesor ende nuk ka filluar.

Kufiri verior

Presidenti ukrainas Volodymyr Zelensky i ka kërkuar udhëheqjes së tij të lartë ushtarake të forcojë sektorin ushtarak verior të Ukrainës pas mbërritjes në Bjellorusi të udhëheqësit mercenar rus Yevgeny Prigozhin.

Presidenti Zelensky nuk e përmendi emrin e shefit të grupit Wagner, Yevgeny Prigozhin në postimin e shkurtër në Telegram.

Zëdhënësi i Këshillit të Sigurisë Kombëtare, John Kirby i tha Zërit të Amerikës se Shtetet e Bashkuara do të “vazhdojnë të monitorojnë aktivitetet e grupit Wagner kudo në botë dhe ne do të vazhdojmë t’i mbajmë ata përgjegjës për veprimet e tyre të dhunshme, skandaloze, vdekjeprurëse dhe të paligjshme. Ata janë ende të aftë për të kryer veprime të tilla.”

Pas zmbrapsjes së forcave ruse nga rajonet veriore vitin e kaluar, Ukraina ndërmori hapa për të forcuar mbrojtjen e kufirit të saj me Bjellorusinë, një aleat i ngushtë i Rusisë.

Yevgeny Prigozhin mbërriti në Bjellorusi të martën, në bazë të një marrëveshje të ndërmjetësuar nga Presidenti Alexander Lukashenko, që i dha fund rebelimit të mercenarëve të tij në Rusi të shtunën.

Një zëdhënës i Këshillit Kombëtar të Sigurisë i tha Zërit të Amerikës se administrata amerikane ka të njëjtat shqetësime sikurse edhe Kongresi për tensionet e rritura në veri të Kosovës.

“Zyrtarët e qeverisë amerikane duke përfshirë Shtëpinë e Bardhë dhe Departamentin e Shtetit, kanë punuar ngushtë me partnerët e Bashkimit Evropian për të gjetur një zgjidhje diplomatike për ngjarjet e fundit. Ata janë angazhuar me udhëheqësit e Serbisë dhe Kosovës për të nxitur shtensionimin dhe përqendrimin e ripërtërirë në zbatimin e marrëveshjeve të normalizimit të nënshkruara në fillim të këtij viti”, tha zëdhënësi duke nënvizuar se “normalizimi i marrëdhënieve, pjesëmarrja në proceset demokratike dhe respektimi i sundimit të ligjit do të kontribuojnë në qëndrueshmërinë dhe sigurinë në veri të Kosovës”.

Ai i bëri këto komente duke iu përgjigjur Zërit të Amerikës rreth një letre që një grup senatorësh demokratë dhe republikanë i drejtuan presidentit Joe Biden, duke kërkuar që ta trajtojë me përparësi përkeqësimin e situatës së sigurisë ndërmjet Kosovës dhe Serbisë.

Senatorja Jeanne Shaheen bashkë me senatorët Chris Murphy, Chris Van Hollen, Ben Cardin, Pete Ricketts, Thom Tillis, Peter Welch dhe Dick Durbin, shprehën në letër shqetësimin me situatën në veri “ku dhuna e fundit serbe kundër Forcave të NATO-s në Kosovë plagosi rreth 40 paqeruajtës të NATO-s. Që nga ato sulme, ne jemi të alarmuar nga vendimet qeverisë së Kosovës dhe Serbisë, të cilat vazhdojnë të përshkallëzojnë dhe jo ulin tensionet”.

Në letër theksohet shqetësimi për sigurinë dhe mirëqenien e rreth 600 trupave amerikane që shërbejnë në kuadër të KFOR-it.

“Ne vlerësojmë përpjekjet diplomatike të Shteteve të Bashkuara për të ulur tensionet, por këto përpjekje nuk kanë marrë përgjigje të ndërsjellë nga Kosova në veçanti. Si rrjedhojë ne jemi të përgatitur të shqyrtojmë ndryshimin e mbështetjes së Kongresit”, thuhet në letër.

Senatorët kanë përmendur rolin e Shteteve të Bashkuara për pavarësinë e Kosovës por edhe hapat për ndërtuar një marrëdhënie me Serbinë.

Ata shprehen të “tronditur” nga veprimet e fundit të qeverive të Serbisë dhe Kosovës duke i cilësuar “vendime provokuese që kërcënojnë të dëmtojnë mundësitë e përmirësimit të marrëdhënieve dypalëshe”.

Kriza në veri të Kosovës pasoi vendimin e autoriteteve për zbatimin e rezultatit të zgjedhjeve të 23 prillit, të bojkotuara nga partitë politike serbe. Në komunat veriore grupe qytetarësh serbë po vazhdojnë të kundërshtojnë vendosjen në zyrat komunale të kryetarëve shqiptarë.

Ne letrën e senatorëve shprehet mbështetja për propozimin e Bashkimit Evropian për uljen e tensioneve që përfshin: tërheqjen e kryetarëve nga ndërtesat komunale në veri të Kosovës; pezullimi i operacioneve policore në afërsi të ndërtesave komunale me përfundimin e njëkohshëm të protestave, shpalljen e zgjedhjeve të reja komunale me pjesëmarrjen e serbëve të Kosovës; dhe një kthim në dialog për zbatimin e Marrëveshjes së Ohrit, duke përfshirë Asociacionin e Komunave me shumicë serbe.

Senatorët thanë se pa një përkushtim të vendosur për të ndërmarrë këto hapa, administrata amerikane duhet të shtyjë “çdo thellim të marrëdhënieve dypalëshe të në fushën e sigurisë me të dyja vendet”.

Duke theksuar se marrëdhëniet duhet të ndërtohen mbi vullnetin e mirë, bashkëpunimin kuptimplotë dhe vlerat e përbashkëta, senatorët theksojnë se “nuk e shohim këtë episod të fundit tensionesh si një shmangie të përkohshme në marrëdhëniet dypalëshe, por si një moment përcaktues në trajektoren e marrëdhënieve tona me të dyja vendet”.

Bashkimi Evropian paralajmëroi shpalljen e masave të reja ndëshkuese për Kosovën gjatë kësaj jave.

Nënsekretarja amerikane e shtetit, Victoria Nuland, ka përsëritur kërkesën e SHBA-së drejt Kosovës dhe Serbisë për nisjen e zbatimit të Marrëveshjes së Ohrit, pas një takimi me të dërguarin e BE-së për dialogun mes Kosovës dhe Serbisë, Mirosllav Lajçak.

Ajo gjithashtu ka theksuar se SHBA-ja përkrah “planin trepikësh të BE-së si mënyrën më të mirë për ta zgjidhur krizën” në veri të Kosovës.

Kosova dhe Serbia arritën marrëveshje drejt normalizimit të raporteve më 27 shkurt në Bruksel, si dhe u pajtuan për Aneksin e zbatimit të saj në Ohër më 18 mars.

Edhe Marrëveshja e Ohrit kërkon që palët t’i zbatojnë të gjitha marrëveshjet e arritura deri më tani në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë.

Por, situata në veri të Kosovës – zonë e banuar me shumicë serbe – është tensionuar që nga 26 maji, kur Policia e Kosovës asistoi kryetarët e rinj shqiptarë të Zveçanit, Leposaviqit e Zubin Potokut të hynin në ndërtesat komunale. Serbë lokalë kanë protestuar që nga ajo ditë.

Komuniteti ndërkombëtar i ka shprehur tri kërkesa për kryeministrin e Kosovës, Albin Kurti, lidhur me situatën në veri: shtensionimin e situatës atje, mbajtjen e zgjedhjeve të reja dhe kthimin në dialogun për normalizimin e marrëdhënieve Kosovë-Serbi, të ndërmjetësuar nga Bashkimi Evropian.

Kurti, në anën tjetër, e ka prezantuar ditë më parë një plan pesëpikësh për ulje të tensioneve./ REL/

Hunter Biden arriti marrëveshje për pranimin e fajësisë në çështjen e taksave federale dhe armëve.

Shtëpia e Bardhë iu përgjigj të martën lajmeve se djali i Presidentit, Hunter Biden, siguroi një marrëveshje federale për pranimin e fajësisë, pas një hetimi që rezultoi në lidhje me një akuzë për armë zjarri dhe dy kundërvajtje tatimore.

Fox News konfirmoi se djali i Presidentit do të deklarohet fajtor për dy akuza për shmangie të qëllimshme nga pagesa e taksës federale të të ardhurave.

Hunter Biden ra gjithashtu dakord të lidhë një marrëveshje devijimi paraprak në lidhje me një akuzë të veçantë të lidhur me mbajtjen e një arme zjarri nga një person që është përdorues i paligjshëm ose i varur nga një substancë e kontrolluar.

“Presidenti dhe Zonja e Parë e duan djalin e tyre dhe e mbështesin atë ndërsa ai vazhdon të rindërtojë jetën e tij. Nuk do të kemi asnjë koment të mëtejshëm,” tha zëdhënësi i Shtëpisë së Bardhë, Ian Sams.

Prokurori i SHBA-së për Distriktin e Delaware, David C. Weiss tha, se sipas informacionit tatimor, Hunter Biden “ka marrë të ardhura të tatueshme mbi 1,500,000 dollarë në vit në vitet kalendarik 2017 dhe 2018”.

“Pavarësisht se i detyrohej më shumë se 100,000 dollarë në taksat federale mbi të ardhurat çdo vit, ai nuk e pagoi tatimin mbi të ardhurat për asnjërin vit,” tha zyra e Weiss të martën. “Sipas Informacionit për armën e zjarrit, nga data 12 tetor 2018 ose rreth datës 23 tetor 2018, Hunter Biden mbante një armë zjarri, pavarësisht se e dinte se ishte përdorues i paligjshëm dhe i varur nga një substancë e kontrolluar.”

Zyra e Weiss tha se nëse shpallet fajtor, Hunter Biden përballet me një dënim maksimal prej 12 muajsh burg për secilën nga akuzat tatimore – gjithsej dy vjet – dhe një dënim maksimal prej 10 vjet burg për akuzën e armës së zjarrit.

“Një gjykatës federal i gjykatës së qarkut do të përcaktojë çdo dënim pasi të marrë parasysh Udhëzimet e Dënimit të SHBA dhe faktorë të tjerë ligjorë,” tha zyra e Weiss.

“Hetimi është në vazhdim,” tha zyra në një deklaratë të martën.

Biden ka qenë nën hetim federal që nga viti 2018. Ky hetim për “çështjet e tij tatimore” filloi në mes të zbulimit të aktivitetit të dyshimtë në lidhje me fondet nga “Kina dhe vende të tjera të huaja”./ar.sh/SYRI.NET

Djali i presidentit amerikan Joe Biden, Hunter Biden, ka rënë dakord të pranojë fajësinë për akuzat federale që lidhen me mospagimin nga ana e tij të taksave federale.

Hunter Biden është akuzuar për mospagim të taksave federale mbi të ardhurat dhe posedim të paligjshëm të një arme dhe sipas një dokumenti të paraqitur në Gjykatën e Dellauerit ai ka arritur një marrëveshje mbi akuzat e ngritura me Departamentin e Drejtësisë.

Si pjesë e marrëveshjes, të bërë publike të martën, Hunter Biden do të deklarohet fajtor për kundërvajtje tatimore dhe pritet të arrijë një marrëveshje me prokurorët për akuzën penale të mbatjes së paligjshme të një arme zjarri si dhe përdorim droge. Është disi e pazakontë që një çështje penale federale të zgjidhet në të njëjtën kohë kur akuzat paraqiten në gjykatë, megjithatë nuk është konsideruar si një rast krejtësisht i padëgjuar.

Marrëveshja i jep fund një hetimi të gjatë që Departamenti i Drejtësisë ka kryer ndaj Hunter Biden-it, i cili ka pranuar se po lufton me varësinë ndaj drogës që pas vdekjes së vëllait të tij Beau Biden në vitin 2015. Ky zhvillim gjithashtu shmang një proces gjyqësor që do të zinte faqet e para të shtypit duke krijuar shpërqendrim për Shtëpinë e Bardhë që është përpjekur me forcë të ruajë distancën me Departamentin e Drejtësisë.

Lajmi vjen ndërsa republikanët e Kongresit po kryejnë hetimet e tyre në pothuajse çdo aspekt të marrëdhënieve të biznesit të Hunter Biden-it, përfshirë pagesat e kryera jashtë vendit dhe aspekte të tjera të financave të tij. Ky zhvillim vjen gjithashtu disa ditë pas ngritjes së një padie federale kundër ish-presidentit Donald Trump për mbatje të qëllimtë dhe të paautorizuar të dokumenteve të klasifikuara në pronën e tij në Florida.

Presidenti Joe Biden është përballur gjithashtu me pyetje në lidhje me marrëdhëniet e biznesit të djalit të tij dhe varësinë nga droga.

Në akuzën për armëmbatje thuhej se në tetor 2018, Hunter Biden mbajti për 11 ditë një pistoletë (Colt Cobra 38), pavarësisht se e dinte se ishte përdorues droge. Akuza mbart një dënim maksimal deri në 10 vjet burg, por Departamenti i Drejtësisë thotë Hunter Biden ka arritur një marrëveshje paraprake për këtë akuzë. Detajet e plota ende nuk dihen.

Shtëpia e Bardhë nuk ka bërë ende asnjë koment mbi këtë çështje.

Ish-i dërguari i posaçëm amerikan, Richard Grenell, tha se administrata e Donald Trump ka ndërmarrë hapa të paprecedentë për të afruar Kosovën dhe Serbinë.

“Për shkak se ne ishim duke bërë aq shumë progres, ne diskutuam idenë potenciale për heqjen e NATO-s nga Kosova në vitin 2020”, tha ai në Real America’s Voice.

Grenell tha se Kosova e Serbia u pajtuan për zhvillim ekonomik, për hapje të kufijve dhe se pati marrëveshje edhe për fluturime mes Prishtinës dhe Beogradit.

Ai tha se administrata e Joe Biden vendosi që të ndryshojë politikat ndaj Ballkanit Perëndimor dhe se tani BE-ja është në krye. syri.net

Daniel Ellsberg, sinjalizuesi që ekspozoi shtrirjen e përfshirjes së SHBA në Luftën e Vietnamit, ka vdekur në moshën 92-vjeçare. Ai vdiq në shtëpinë e tij në Kensington, Kaliforni, nga kanceri i pankreasit, tha familja e tij.

Rrjedhja e dokumenteve të Pentagonit të vitit 1971 të ish-analistit ushtarak amerikan bëri që ai të quhej “njeriu më i rrezikshëm në Amerikë”.

Ajo çoi në një çështje në Gjykatën e Lartë pasi administrata e Nixon u përpoq të bllokonte botimin në New York Times.

Por akuzat për spiunazh kundër Ellsberg u hodhën poshtë përfundimisht. “Danieli ishte një kërkues i së vërtetës dhe një tregimtar patriotik, një veprimtar kundër luftës, një bashkëshort, baba, gjysh dhe stërgjysh i dashur, një mik i dashur për shumë njerëz dhe një frymëzim për shumë të tjerë. Ai do të jetë i shtrenjtë. Na mungon të gjithëve”, tha familja e Ellsberg në një deklaratë të marrë nga NPR.

Për dekada të tëra, Ellsberg ishte një kritik i palodhur i tejkalimit të qeverisë dhe ndërhyrjeve ushtarake.

Kundërshtimi i tij u kristalizua gjatë viteve 1960, kur ai këshilloi Shtëpinë e Bardhë për strategjinë bërthamore dhe vlerësoi Luftën e Vietnamit për Departamentin e Mbrojtjes.

Ajo që Ellsberg mësoi gjatë asaj periudhe rëndoi shumë në ndërgjegjen e tij. Sikur ta dinte publiku, mendoi ai, presioni politik për t’i dhënë fund luftës mund të ishte i papërmbajtshëm.

Publikimi i Dokumenteve të Pentagonit, 7000 faqe qeveritare që ekspozuan mashtrimet nga presidentë të shumtë amerikanë, ishte produkt i këtij arsyetimi.

Gazetat kundërshtonin deklaratat publike të qeverisë për luftën dhe zbulimet mallkimore që ato përmbanin ndihmuan t’i jepej fund konfliktit dhe, në fund të fundit, mbollën farat e rënies së Presidentit Richard M Nixon.

Ellsberg ishte “gjyshi i sinjalizuesve”, tha për BBC ish-kryeredaktor i gazetës The Guardian, Alan Rusbridger.

Ndërhyrja e tij “ndryshoi rrënjësisht opinionin publik në Luftën e Vietnamit”, tha Rusbridger në programin World Tonight të Radio 4. Çështja kundër tij krijoi një precedent dhe “asnjë qeveri e SHBA-së nuk është përpjekur ndonjëherë të dënojë një dokument mbi bazën e sigurisë kombëtare”, tha ai.

Gazetat e Pentagonit krijuan një përplasje të Amendamentit të Parë midis administratës së Nixon dhe The New York Times, e cila së pari botoi histori të bazuara në dokumente, të hedhura nga zyrtarët qeveritarë si një akt spiunazhi që rrezikonte sigurinë kombëtare. Gjykata e Lartë e SHBA-së vendosi në favor të lirisë së shtypit.

Ellsberg u akuzua në gjykatën federale në Los Anxhelos në 1971 për vjedhje, spiunazh, komplot dhe akuza të tjera.

Por përpara se juria të arrinte një vendim, gjyqtari e hodhi poshtë çështjen duke përmendur sjellje të pahijshme të qeverisë, duke përfshirë përgjimin e paligjshëm.

Gjykatësi tha se në mes të çështjes atij i ishte ofruar puna e drejtorit të FBI-së nga një prej ndihmësve kryesorë të Presidentit Nixon.

Doli gjithashtu se kishte pasur një vjedhje të sanksionuar nga qeveria të zyrës së psikiatrit të Ellsberg.

Ellsberg lindi në Çikago më 7 Prill 1931 dhe u rrit në periferi të Detroit, Michigan. Para se të arrinte në Pentagon, ai ishte një veteran i Trupave Detare me doktoraturë në Harvard, i cili kishte punuar për Departamentin e Mbrojtjes dhe të Shtetit.

Sipas Rusbridger, sinjalizuesit e kohëve të fundit si Julian Assange dhe Edward Snowden janë “formuar nga” Ellsberg.

Ai i tha BBC-së se çështja Pentagon Papers e kishte shtyrë të mendonte “kush mund të përcaktojë interesin kombëtar: është qeveria e ditës apo njerëzit me ndërgjegje si Daniel Ellsberg?”

Ellsberg vazhdoi përpjekjen e tij për ta mbajtur qeverinë përgjegjëse vite pas rrjedhjes së dokumenteve të Pentagonit.

Gjatë një interviste në dhjetor 2022, ai i tha BBC Hardtalk se ai ishte “backup” sekret për rrjedhjen e dokumenteve të Wikileaks.

Në rastin e Wikileaks, organizata e Julian Assange publikoi më shumë se 700,000 dokumente konfidenciale, video dhe kabllograme diplomatike, të siguruara nga një analist i inteligjencës së ushtrisë amerikane, në vitin 2010.

Ellsberg tha se ai mendonte se Assange “mund të mbështetet tek unë për të gjetur një mënyrë për ta nxjerrë atë [informacionin]”.

Në vazhdën e një diagnoze të kancerit të pankreasit në shkurt, në të cilën mjekët i thanë Ellsberg se kishte tre deri në gjashtë muaj jetë, ai kaloi muajt e fundit duke reflektuar mbi Dokumentet e Pentagonit dhe duke sinjalizuar më gjerësisht.

Në një email të marsit 2023 të marrë nga Washington Post, Ellsberg shkroi: “Kur kopjova dokumentet e Pentagonit në vitin 1969, kisha çdo arsye të mendoj se do ta kaloja pjesën tjetër të jetës sime pas hekurave. Ishte një fat që do ta kisha pranuar me kënaqësi nëse do të thotë përshpejtim i përfundimit të Luftës së Vietnamit, e pamundur siç dukej.”

Ish-presidenti i Shteteve të Bashkuara të Amerikës, Donald Trump deklaroi të martën se ishte i pafajshëm ndaj akuzave federale për mbajtje të paautorizuar të dokumentave sekrete të sigurisë kombëtare pas largimit nga detyra dhe i gënjeu zyrtarët që kërkuan rikthimin e tyre.

Deklarimi i zotit Trump para gjykatësit Jonothan Goodman në gjykatën federale të Majamit, shënon fillimin e një beteje ligjore që ka gjasa të vazhdojë gjatë muajve të ardhshëm ndërsa ish-presidenti vazhdon fushatën për të rimarrë Shtëpinë e Bardhë në zgjedhjet e 24 nëntorit të vitit 2024. Ekspertët parashikojnë se mund të duhet një vit ose më shumë para se të zhvillohet gjyqi.

Gjykata nuk i vuri kushte financiare apo kufizime udhëtimi zotit Trump. Gjykatësi Goodman vendosi që zoti Trump nuk lejohej të komunikonte me dëshmitarët e mundshëm për këtë rast.

Ish-ndihmësi i zotit Trump, Walt Nauta, gjithashtu i akuzuar në këtë çështje, u paraqit në gjykatë së bashku me zotin Trump, por nuk do të deklarohet rreth akuzave deri më 27 qershor, sepse ai nuk ka një avokat vendas. Ai gjithashtu u lirua pa pasur nevojë për garanci financiare dhe u urdhërua që të mos fliste me deshmitarët e tjerë.

ÇFARË NDODHI NE GJYKATË?

Avokati i zotit Trump tha se klienti i tij deklaron se ishte i pafajshëm. Gjykata nuk i vuri kushte financiare apo udhëtimi me mirëkuptimin për t’u paraqitur në gjykatë në të ardhmen.

Gjatë seancës 50-minutëshe në fytyrën e tij u vunë re disa herë ndjenja zemërimi, por nuk pati shprehi të tjera. Ai mblodhi krahët, ndërsa mbante në dorë një stilolaps dhe kryqëzonte gishtat e dorës ndërsa dëgjonte.

Përpara se të fillonte seanca ai u pëshpëriti diçka në vesh avokatëve të tij, por nuk foli fare gjatë procedurës. Ai qëndroi pa lëvizur në karrige ndërsa avokati i tij u ngrit në këmbë dhe foli në emër të klientit.

“Padyshim, ne deklarojmë pafajsinë”, i tha avokati gjykatësit.

Avoakti Blanche e kundërshtoi vendimin e gjykatësit për ndalimin e ish-presidentit që të fliste me dëshmitarët, përfshirë ish-ndihmësin e tij, gjithashtu të akuzuar, Walt Nauta, duke thënë se ata punojnë për zotin Trump dhe ai duhet të jetë në gjendje të komunikojë me ta.

Pas disa ecejakjesh, gjykatësi Jonathan Goodman tha se zoti Trump nuk mund të flasë me ta për çështjen përveçse nëpërmjet avokatëve të tij, por ai mund të flasë me ta për punën.

Ndryshe nga akuza ndaj zotit Trump në Nju Jork, në gjykatën federale në Majami nuk u lejuan kamerat.

ÇFARË NDODH MË PAS?

Pas seancës, zoti Trump shkon në klubin e tij të golfit në Bedminster, Nju Xhersi, ku do të mbajë një fjalim dhe do zhvillojë një darkë për mbledhje fondesh.

Përpara se të nisej për në aeroport, autokolona e zotit Trump ndaloi në restorantin “Versailles” në lagjen “Little Havana” të Majamit, ku një turmë e vogël mbështetësish e priste atë. Pasi bëri foto me të pranishmit, zoti Trump komentoi shkurt për çështjen.

“Mendoj se po shkon mirë”, tha ai. “Ne kemi një vend të manipuluar. Kemi një vend të korruptuar”. Disa udhëheqës fetarë u lutën për të në restorant.

Mbështetësit brohoritën “Ne e duam Trumpin” ndërsa autokolona e tij u largua nga gjykata në orën 15:55, afërsisht dy orë pas mbërritjes. Zoti Trump është ish-presidenti i parë që akuzohet për krime federale.

Autoritetet federale kishin rritur masat e sigurisë përreth ndërtesës dhe zyrtarët e Majamit thanë se janë të përgatitur për të parandaluar dhunën e mundshme nga mbështetësit e zotit Trump dhe kundër-protestuesit.

“Në qytetin tonë, ne sigurisht që besojmë tek Kushtetuta dhe se njerëzit duhet të kenë të drejtën të shprehen”, tha gjatë një konference për shtyp të hënën Kryetari i Bashkisë së Majamit, Francis Suarez. “Por, ne gjithashtu besojmë tek ligji dhe rendi. Dhe e dimë, dhe shpresojmë, se e nesërmja do të jetë paqësore”.

Ngritja e akuzave zyrtarisht ndaj ish-presidentit, vjen pesë ditë pasi juria e madhe federale në Majami miratoi 37 akuza penale ndaj tij, 31 prej të cilave e akuzojnë ish presidentin për “mbajtje të qëllimshme” të dokumenteve të klasifikuara të sigurisë kombëtare, në shkelje të Ligjit të Spiunazhit.

Një ndihmës i zotit Trump, Walt Nauta, gjithashtu u akuzua në lidhje me pengimin e përpjekjeve të qeverisë për të marrë dokumentet.

Zoti Trump është i pari ish-president që përballet me akuza federale. Kjo është hera e dytë brenda dy muajve që ndaj tij ngrihen akuza.

Ai përballet me akuza penale të një natyre tjetër në Nju Jork në lidhje me një pagesë për të blerë heshtjen e një aktoreje të filmave pornografikë, gjatë fushatës së tij elektorale për zgjedhjet presidenciale të vitit 2016.

Gjatë seancës së të martës, gjykatësja do ta informojë zotin Trump për të drejtat e tij dhe do t’i lexojë akuzat e ngritura ndaj tij. Ai pritet që të vetëdeklarohet i pafajshëm.

Çështja i është caktuar Gjykatëses Aileen Cannon. Ajo është emëruar nga zoti Trump gjatë kohës që ai ishte president, dhe u kritikua për favorizim të ish-presidentit gjatë vendimeve që mori për këtë çështje vitin e kaluar.

Gjykatësja Cannon ua ndaloi për pak kohë hetuesve federalë shqyrtimin e dokumenteve të marra nga prona e zotit Trump, Mar-a-Lago, gushtin e kaluar dhe emëroi një ekspert të posaçëm për t’i shqyrtuar ato. Por, një gjykatë apeli e rrëzoi vendimin e saj, duke u shprehur se ajo nuk kishte autoritet për të marrë një vendim të tillë.

Akuzat ndaj ish-Presidentit Trump u ngritën bazuar mbi një hetim që filloi pasi ai thuhet se refuzoi përpjekjet e përsëritura të Arkivave Kombëtare për të dorëzuar dokumentet që ai kishte nxjerrë nga Shtëpia e Bardhë dhe që i mbante në Mar-a-Lago.

Dokumenti federal radhit 31 akuza ndaj ish-Presidentit Trump për “mbajtje të qëllimshme” të informacionit të klasifikuar të sigurisë kombëtare, për secilin nga dokumentet që mori nga Shtëpia e Bardhë.

21 prej këtyre dokumenteve gjendeshin ndër mbi 100 dokumentet që FBI-ja i zbuloi gjatë kontrollit në Mar-a-Lago në gushtin e kaluar.

Akuza thotë se dokumentet përmbanin informacion të klasifikuar për programet bërthamore të Shteteve të Bashkuara, për pikat e dobëta të Shteteve të Bashkuara dhe të vendeve aleate në rast të një sulmi, si dhe planet për përgjigjen e mundshme ndaj sulmit. Akuza thotë se ekspozimi i këtyre dokumenteve mund të rrezikojë sigurinë kombëtare të Shteteve të Bashkuara.

Gjashtë akuzat e tjera – ku përfshihet pengimi i drejtësisë, konspiracion për të penguar drejtësinë dhe deklarimet e rreme – kanë të bëjnë me përpjekjet e zotit Trump për të penguar hetimin dhe për të fshehur mbajtjen prej tij të dokumenteve të klasifikuara.

Zoti Trump pretendon se ka patur një urdhër për të çklasifikuar të gjitha dokumentet e zhvendosura nga Zyra Ovale për në rezidencën e tij brenda Shtëpisë së Bardhë.

Por, akuza thotë se ish-Presidenti Trump ishte i ndërgjegjshëm për ligjet në fuqi për informacionin e klasifikuar të sigurisë kombëtare dhe se i shkeli ato me dashje.

Në një rast në korrik 2021, zoti Trump akuzohet se ua tregoi një dokument për një “plan sulmi” një grupi prej katër personash, që nuk ishin të autorizuar të njiheshin me informacione të klasifikuara – një shkrimtari, një botuesi dhe dy punonjësve – në klubin e tij të golfit në Nju Xhersi, duke u thënë atyre se dokumenti ishte “shumë i klasifikuar” dhe “sekret” dhe se ai nuk mundej më ta çklasifikonte atë.

Në një rast tjetër, në shtator 2021, zoti Trump i tregoi një hartë të klasifikuar një përfaqësuesi të organizatës së tij politike për fushatën elektorale, duke i thënë personit në fjalë se “nuk duhej t’ia tregonte dhe se ai nuk duhej të afrohej shumë” pranë hartës, thuhet në akuzë.

Pas paraqitjes së akuzave, zoti Trump pritet të lihet në gjendje të lirë. Data e fillimit të procesit gjyqësor ndaj tij mbetet e paqartë. Disa ekspertë thonë se mund të duhen muaj të tërë që të fillojë dhe se madje edhe mund të shtyhet deri pas zgjedhjeve presidenciale të vitit 2024.

Megjithë problemet e shtuara me sistemin gjyqësor, zoti Trump është i lirë të vazhdojë fushatën për president dhe është zotuar se do ta vazhdojë fushatën edhe nëse shpallet fajtor.

“Nuk do të largohem kurrë”, tha zoti Trump gjatë një interviste me revistën ‘Politico’ të shtunën.

Pas njohjes me akuzat, zoti Trump pritet të udhëtojë me avion drejt klubit të tij të golfit në Nju Xhersi, ku do të organizojë aktivitetin e parë për mbledhje fondesh për fushatën e tij elektorale për zgjedhjet presidenciale të vitit 2024.

Ish-Presidenti Donald Trump mbërriti në Florida përpara paraqitjes në një gjykatë federale në Majemi të martën, si pjesë e një padie për mbatjen e paautorizuar të dokumenteve sekrete qeveritare.

Zoti Trump përballet me 37 akuza, mes të cilave, mbajtje e qëllimtë e dokumenteve sekrete të mbrojtjes, konspiracion, pengim të drejtësisë dhe deklarata të rreme. Kjo është hera e parë në historinë e vendit që ndaj një ish-presidenti ngrihen akuza federale.

Dalja para gjykatës në Majemi është planifikuar të ndodhë të martën në orën 15:00 me orën lokale. Kjo do të jetë hera e dytë që nga muaji prill, që zoti Trump përballet me akuza penale. Por ndryshe nga rasti i Nju Jorkut, ekspertët ligjorë e kanë cilësuar aktpadinë e prokurorëve federalë, një çështje më të fortë. Akuzat përfshijnë ndër të tjera shkelje të ligjit të spiunazhit, i cili e konsideron një vepër penale mbatjen e paautorizuar të dokumenteve që lidhen me mbrojtjen. Nëse shpallet fajtor zoti Trump rrezikon një dënim maksimal prej 20 vitesh heqje lirie.

Ish-Presidenti thotë se është i pafajshëm dhe është zotuar se do të vazhdojë fushatën e tij për t’u rizgjedhur në krye të Shtëpisë së Bardhë në vitin 2024.

Zoti Trump, i cili mbush 77 vjeç të mërkurën, la klubin e tij të golfit në Bedminster të shtetit të Nju Xhersit shoqëruar nga një autokolonë ndërsa mbështetës të tij ishin mbledhur për një tubim mesdite, në një tjetër klub golfi, në zotërim të tij, në Majemi.

“Shpresoj që i gjithë vendi po sheh atë që e majta radikale po i bën Amerikës”, shkruante zoti Trump në platformën e tij të mediave sociale “Truth Social”, përpara se avioni i tij, me emrin Trump, të nisej drej Floridës.

Problemet ligjore nuk e kanë dëmtuar popullaritetin e zotit Trump në mesin e votuesve republikanë. Sondazhet e opinionit publik e tregojnë atë shumë përpara rivalëve të tij, që garojnë për të siguruar kandidimin zyrtar nga partia. Deri më tani, të gjithë kandadidatët kanë qenë kryesisht në anën e tij mbi këtë çështje.

Paraqitja e zotit Trump në gjykatë po paraprihet nga një retorikë e përshkallëzuar në internet, përfshirë deklaratat me tone sfiduese nga ana e ish-presidentit dhe aleatëve të tij politikë. Kjo ka bërë që zyrtarët e zbatimit të ligjit të vihen në gatishmëri për probleme të mundshme që lidhen me sigurinë. Autoritetet thanë se po monitorojnë gjithashtu planet për mitingje pro zotit Trump në Majemi.

Akpadia, ka rikthyer vëmendjen tek gjykatësja federale Aileen Cannon, emri i së cilës u bë i njohur për publikun verën e kaluar, kur ajo mbikëqyri procedurat gjyqësore në lidhje me kontrollin e autorizuar, që FBI-ja kreu në rezidencën e zotit Trump në Mar-a-Lago të Floridës, për të marrë dokumentet sekrete. Zonja Cannon, emëruar në këtë detyrë nga zoti Trump në vitin 2020, do të jetë edhe gjykatësja e çështjes që lidhet me dokumentet sekrete.

Zonja Cannon mbahet mend për vendimin e saj të diskutueshëm për të caktuar një ekspert të posaçëm, për të shqyrtuar mënyrën se si u mblodhën provat gjatë kërkimit të kryer nga FBI, një vendim që u rrëzua përfundimisht nga një gjykatë apeli, me gjykatës konservatorë, që u treguan mjaft kritikë mbi mënyrën e trajtimit të çështjes nga zonja Cannon.