Demokratja Hillary Clinton ka marrë më tepër se 2 milionë vota më tepër se Presidenti i zgjedhur Donald Trump, i cili arriti të sigurojë fitoren e Shtëpisë së Bardhë, duke marrë shuimcën e votave elektorale.

Ndërsa vazhdon numërimi i votave në disa shtete, deri të mërkurën avantazhi i zonjës Clinton është 2 milionë e 17,563 vota, një shifër që mund të rritet, ngaqë jo të gjitha votat janë numëruar në shtetet që ajo fitoi, sidomos në Kaliforni, shteti më i madh në brigjet amerikane të Paqësorit.

Por sado e madhe që të jetë shifra e votave popullore që ka fituar zonja Clinton, kjo nuk e ndryshon rezultatin e zgjedhjeve presidenciale të 8 nëntorit. Zonja Clinton bëhet kështu kandidatja e 6-të presidenciale në historinë e Shteteve të Bashkuara dhe e dyta në 16 vitet e fundit, që fiton votën popullore, por humbet zgjedhjet, për shkak të sistemit të Kolegjit Elektoral, që sipas Kushtetutës amerikane, përcakton fituesin e zgjedhjeve presidenciale. Kandidati fitues duhet të ketë siguruar 270 prej 538 votve elektorale. Kur të ketë përfunduar numërimi i të gjitha votave Donald Trump mendohet se do të ketë 306 vota elektorale dhe Hillary Clinton 232.

Policë me armë automatike; barriera sigurie; rregulla të reja të lëvizjes në rrugë dhe trotuare – ky është realiteti i ri përreth Kullës Trump në Nju Jork, ku ka banuar prej vitesh Donald Trumpi dhe ku tani presidenti i zgjedhur është në vazhdën e ndërtimit të administratës. Ky realitet ka krijuar kokëçarje të shumta për bizneset lokale, banorët dhe turistët e shumtë në Nju Jork:

Pas shpalljes së fituesit të zgjedhjeve presidenciale, zona përreth grataçielës ku jeton zoti Trump me familjen e tij në Nju Jork, u shndërrua menjëherë në një territor të fortifikuar:

“Kemi angazhuar burime të shumta tek Kulla Trump; një numër policësh janë me detyrë aty 24 orë në ditë,” thotë Carlos Gomez, zyrtar në Departamentin Policor të Nju Jorkut.

Tani që ka filluar sezoni i blerjeve dhe skontove të fund-vitit, autoritetet janë të shqetësuara se lëvizja në këtë pjesë të ngarkuar të bulevardit të famshëm 5^th Avenue në Nju Jork, do të bëhet edhe më e vështirë.

“Vëllimi i Lëvizjes së këmbësorëve në bulevardin 5^th Avenue është ndër më të ngarkuarit në botën perëndimore,” thotë Komisionerja për Transportin në këshillin bashkiak të Nju Jorkut.

Autoritetet lokale kanë ndaluar lëvizjen e kamionëve pranë Kullës Trump dhe është kufizuar edhe lëvizja e këmbësorëve në një perimetër rreth kullës.

“Po ecja në trotuar dhe polici më tha se nuk mund të ecja nga ajo anë, duhet të dilja në anën tjetër,” thotë një këmbësore.

Zoti Trump ka thënë se pas inaugurimit do të vendoset në Shtëpinë e Bardhë, por pritet që të vazhdojë të jetë mjaft i pranishëm në Nju Jork. Disa ditë më parë ai tha se bashkëshortja Melania dhe djali i tyre Barron do të vazhdojnë të jetojnë në Nju Jork deri në përfundim të vitit shkollor.

Tom Cusick i shoqatës së biznesmenëve të zonës thotë se rregullat e reja kufizuese do të kenë ndikim të konsiderueshëm tek vëllimi i biznesit:

“Problemi është se po kufizohet shumë lëvizja e klientëve. Nga bisedat me pronarët e bizneseve mësoj se mund të ketë humbje prej dhjetëra miliona dollarësh vetëm gjatë sezonit të Krishtlindjes. Edhe qeveria lokale dhe shtetërore e Nju Jorkut do të dalë e humbur pasi do të bjerë shuma e taksave të vjela”.

Rënia e vëllimit të biznesit nuk duket se është ndër përparësitë kryesore të kryebashkiakut Bill De Blasio:

“Nuk kam si të them se firmat Gucci dhe Tiffany janë shqetësimi im kryesor në jetë, por e vërteta është se trafiku është bërë problem real”.

Përveç ankesave të banorëve dhe bizneseve lokale, trafiku dhe siguria janë shqetësimi kryesor i autoriteteve lokale me vëmendjen e shtuar që ka tërhequr Kulla Trump në qendër të Manhatanit.

Presidenti Barak Obama nderoi me Medaljen e Lirisë 21 qytetarë amerikanë për merita të veçanta. Mes fituesve të medaljes kishte filantropistë, artistë, shkencëtarë dhe personalitete të angazhuar fuqishëm në çështje sociale. Në fjalën e tij presidenti Obama tha se çdo njëri prej fituesve të medaljes shërben si thërrje për të kujtuar se diversiteti e ka ndihmuar këtë vend dhe e ka bërë Amerikën madhështore.

Presidenti Barak Obama tha se medalja e lirisë nderon idenë se “kushdo në Amerikë mund të ndihmojë për ta bërë këtë vend më të mirë”.

“ Sot nderojmë ata amerikanë të jashtëzakonshëm që na kanë ngritur shpirtin lart, na kanë bashkuar edhe më shumë dhe nxitur drejt progresit”, tha presidenti Obama.

Në ceremoni morën pjesë emra të njohur të botës së spektaklit , sportit, artit, shkencës dhe filantropisë. Ndër ta themeluesit e mikrosoftit Bill dhe Melinda Gates.

Fondacioni që ata drejtojnë ka siguruar 36 milionë dollarë në formë granti për të promovuar shëndetin dhe luftuar urine dhe varfërinë.

Gjithashtu u nderuan të tjerë emra te mëdhenj si basketbollisti Kareem Abdul-Jabbar.

Legjenda e basketbollit, njihet për fjalimet e tij për drejtësi sociale.

“Fizikisht, intelektualisht dhe shpirtërisht Kareem është shumë i veçantë. Një amerikan që ndriçon liritë dhe aspiratat tona” tha presidenti Obama.

Presidenti u dha medalje dhe aktorëve si Tom Hanks, Robert De Niro e Robert Redford si dhe aktivistëve, shkencëtareve, artistëve sikurse arkitektes Maya Lin.

Ajo është projektuesja e monumentit që përkujton veteranët e luftës në Vietnam, vendosur në Uashington.

“Ky monument ka ndryshuar menyrën sesi ne mendojmë për monumentet por edhe çfarë mendojmë për sakrificën, patriotizmin dhe veten tonë” tha presidenti Obama

Komediania dhe aktorja Ellen DeGeneres u përfshi nga emocionet kur mori medaljen.

DeGeneres bëri histori kur deklaroi publikisht orientimin seksual të saj.

Presidenti Obama tha se ndihej i prekur prej çdo njerit që u nderua me medalje. Kjo sipas tij na kujton se diversiteti i vendit ka ndihmuar për ta bërë madhështore Amerikën.

Donald Trump ka kundërshtuar çdo lloj “rivendosje” të marrëdhënieve me Rusinë, por ka ripërsëritur qëndrimin e tij se Washingtoni dhe Moska duhet të punojnë më mirë se bashku, veçanërisht në Siri.

Trump, i bëri komentet në një intervistë me redaktorë dhe gazetarë nga New York Times.

Ai përsëriti komentet e tij për luftën e SHBA-së në Irak, duke e cilësuar “një prej gabimeve më të mëdha në historinë e vendit tonë”.

Ai tha se ka disa “ide të fuqishme” për t’u marrë me luftën gjashtë vjeçare në Siri, por nuk pranoi të futej në hollësi.

“Duhet ta përfundojmë atë çmenduri që po vazhdon në Siri”, tha ai.

Moska ka mbështetur regjimin e Sirisë në luftën kundër kryengritësve, por Washingtoni ka përkrahur rebelët më të moderuar, dhe do që presidenti i Sirisë, Bashar al Assad, të largohet

Presidenti i zgjedhur i SHBA-së, Donald Trump, ka përsëritur vlerësimet e tij të mëhershme se Rusia dhe SHBA-ja duhet të bëjnë më shumë për të gjetur të përbashkëtat dhe të bashkëpunojnë rreth shqetësimeve të përbashkëta, siç është terrorizmi.

Por, ai kundërshtoi ta quajë një veprim të tillë si “rivendosje” – fjalë kjo që u përdor nga rivalja e tij në zgjedhje, Hillary Clinton, kur ishte sekretare e shtetit, në përpjekje për të rregulluar lidhjet me Moskën”. Përpjekjet dështuan dhe lidhjet dy palëshe tani janë në shkallën më të ulët ndonjëherë që prej Luftës së Ftoftë.

“Nuk do ta përdorja atë fjalë (rivendosje), pas asaj çfarë ka ndodhur”, tha zoti Trump.

Presidenti i zgjedhur, Donald Trump, ndërkohë u tërhoq nga premtimet gjatë fushatës zgjedhore për t’u larguar nga Marrëveshja e Parisit për ndryshimet klimatike. Presidenti i zgjedhur Trump i ka bërë deklaratat në kohën e përpjekjeve për ta ndërtuar adminstratën e re.

Në një intervistë me redaktorët dhe gazetarët e New York Times, më 22 nëntor, Trump la të kuptohet se ai në fakt mendon se ka një lidhje ndërmjet aktivitetit njerëzor dhe ngrohjes globale.

Ai tha se do të jetë “i hapur” për tërheqjen e SHBA-së nga marrëveshja e Parisit për të ulur emetimet e ngrohjes klimatike.

Gjatë fushatës së ashpër, Trump alarmoi ambientalistët dhe shkenctarët e ngrohjes globale duke thënë se do ta tërheqë plotësisht nënshkrimin e SHBA-së nga marrëveshja.

Në intervistë, Trump zbuti qëndrimin nga fushata se rivalja e tij demokrate, Hillary Clinton, do të duhet të hetohet për përdorimin e serverit privat të postës elektronike, kur ishte sekretare e shtetit.

Thirrja i nxiti përkrahësit e tij më të përkushtuar të cilët brohoritën “Arrestojeni!” në fushtat e tij zgjedhore. Por, gjithashtu, alarmoi shumë amerikanë për një destabilizim të mundshëm të sistemit demokratik në SHBA.

“Nuk dua t’i lëndojë Clintonët. Sinqerisht nuk dua”, tha Trump në intervistë. “Ajo ka kaluar nëpër shumëçka dhe ka vuajtur në shumë mënyra”. (REL)

Padia e paraqitur në gjykatën federale në Nju Jork, përmban detaje për akuzat kundër 37 vjeçarit Mohamed Rafik Naji, përfshirë shprehjen e mbështetjes për një sulm në Nju Jork të ngjashëm me atë të Nisës në Francë, ku humbën jetën 84 vetë dhe për të cilin ka marrë përgjegjësi Shteti Islamik.

Naji citohej t’i kishte thënë një informanti në një nga bisedat e tij të regjistruara se ekstremistët e Shtetit Islamik donin që një operacion i ngjashëm të ndërmerrej nësheshin Times Square.

Ndërkohë Departamenti i Shtetit lëshoi dje një paralajmërim për qytetarët amerikanë që të jenë të kujdesshëm në festivale dhe grumbullime për festa, përfshirë tregjet e hapura gjatë udhëtimit të tyre në Evropë. Sipas paralajmërimit, ka informacione të besueshme se Shteti Islamik, al-Kaida dhe degët e tyre, vazhdojnë të bëjnë plane për sulme në Evropë.

Departamenti i Shtetit përmend sulmet në Belgjikë, Francë, Gjermani dhe Turqi vitin e kaluar dhe thotë se vazhdon të jetë i shqetësuar për potencialin për sulme në gjithë Evropën.

Ministri i brendshëm francez, Bernard Cazeneuve tha se shërbimi anti-terrorist i vendit ishte mobilizuar maksimalisht, duke shtuar se “rreziku terrorist nuk ka qenë kurrë kaq i lartë në territorin e vendit”.

“Sfida e luftës kundër terrorizmit është e jashtëzakonshme. Dhe do ta them, sepse është e vërtetë, se ne kemi marrë masa të konsiderueshme, por asnjëherë nuk mund të flitet për eliminimin e plotë të rrezikut dhe ata që e garantojnë një gjë të tillë e gënjejnë popullin frajncez. Por si ministër i brendshëm, në koordinim me ministrinë e drejtësisë, u kam thënë bashkëkombasve të mi, se janë marrë të gjitha masat për të shmangur rrezikun terrorist dhe për të mbrojtur popullin francez”.

Në Strasburg, ku disa persona u arrestuan në një operacion anti-terrorist gjatë fundjavës, tregu i pervitshëm i krishtlindjeve hapet të premten dhe disa nga kioskat e hapura që më pare po tërhiqnin turistë.

Presidenti i zgjedhur i SHBA-së, Donald Trump, është zotuar se do të tërhiqet nga një marrëveshje kundërthënëse e tregtisë në ditën e parë në zyrë.

Njoftimi, i bërë përmes një porosie në video të publikuar më 21 nëntor, ishte një prej deklaratave më të qarta për qëllimet e tij që të zhbëjë një marrëveshje të arritur ndërmjet 12 shteteve, që u bë një prej temave qendrore gjatë fushatës zgjedhore këtë vit.

Trump bëri premtimin për Partneritetin Trans- Paqësor në një video të publikuar në YouTube ku edhe nënvizoi priritetet e 100 ditëve të para të tij pas ceremonisë së betimit më 20 janar.

“Do të publikoj një njoftim për qëllimin e tërheqjes nga Partneriteti Trans Paqësor, një shkatërrim i mundshëm për vendin tonë”, tha Trump. “Në vend të tij do të negociojmë marrëveshje të drejta, dy palëshe që do të sjellin vende pune dhe do ta kthejnë industrinë në brigjet amerikane”.

Presidenti në largim, Barack Obama, ka bërë përpjekje të mëdha për ta ratifikuar këtë marrëveshje, që do të zvogëloj taksat, do të heqë ndalesat tregtare dhe masat e tjera në 12 shtete.

Por marrëveshja u shndërrua në një çështje të nxehtë gjatë fushatës zgjedhore, me Trumpin që kritikoi rivalen e tij demokrate, Hillary Clinton, për mbështetje të saj dhe pastaj tërheqje.

Porosia populiste e Trumpit pati jehonë në shumë rajone industriale të SHBA-së, që janë përballur me shkurtime të mëdha të vendeve të punës në industri duke fajësuar për këtë një tjetër marrëveshje, Marrëveshjen për Tregti të Lirë të Amerikës Veriore.

Tërheqja e Trumpit nga marrëveshja mund të ketë pasoja politike në shtetet e tjera.

Duke folur gjatë një vizite zyrtare në Argjentinë, kryeministri i Japonisë,tha se marrëveshja mund të jetë e “pakuptimshme” pa pjesëmarrjen e SHBA-së.

Ai gjithashtu tha se marrëveshja nuk mund të rinegociohet.

“Kjo do të trazojë balancin fundamental të përfitimeve”.

Abe javën e kaluar u bë lideri i parë i huaj që takoi Trumpin që prej zgjedhjes së tij të papritur më heret gjatë këitj muaji.

Shqetësimet janë shtuar në Japoni se Trump mund gjithashtu të vazhdojë në zbatimin e premtimit të tij zgjedhor se do të kërkojë nga Tokio që të paguaj më shumë për 50 mijë trupat amerikane të stacionuara në Japoni sipas një marrëveshjeje të sigurisë. (REL)

Një autobus i shkollës, me fëmijë të shkollës fillore, doli nga rruga dhe u përmbys, në shtetin e SHBA-së, Tennessee, duke lënë të vdekur gjashtë fëmijë dhe një numër të tjerëve të lënduar.

Zyrtarë të shpëtimit thanë se në autobus ndodheshin 35 fëmijë, kur doli nga rruga dhe goditi drunjtë, në orët e pasdites në Chattanooga të Tennessee.

Shefi i zjarrfikësve, Fred Fletcher, tha se 21 fëmijë janë hospitalizuar. Ai tha se po hetohet nëse tejkalimi i shpejtësisë ishte faktori i aksidentit. Autobusi ishte e vetmja makinë e përfshirë në aksident.

USA Today njoftoi se shoferi ishte burgosur dhe do të përballet me pesë akuza të vrasjes me automjet, rrezikim të pamatur dhe ngasje të pamatur.

Chattanooga ndodhet rreth 150 kilometra në very të Atlantas në Georgia.(REL)

Nënpresidenti i zgjedhur i SHBA-së, Mike Pence ka konfirmuar se ish kandidati republikan për president, Mitt Romney është “nën shqyrtim aktiv” për të shërbyer si sekretar i shtetit i SHBA-së, së bashku me kandidatët e tjerë.

Pence i bëri këto deklarata gjatë një interviste me televizionin Fox vetëm një ditë pasi presidenti i zgjedhur Donald Trump, u taku a me Romney i cili e pati kritikuar gjatë fushatës zgjedhore.

Trump tha se takimi ishte “shumë i mirë” megjithë spekulimet se u diskutua edhe për çështjen e diplomatit kryesor.

Pence i tha Fox news se Romney, që garoi pa sukses kundër Barack Obamës më 2012, shfaqi vullnetin që të merret parasysh për këtë pozitë.

Romney e akuzoi Trumpin për “mashtrim” gjatë fushatës dhe u bëri thirrje republikanëve që të mos e votojnë.

Trump iu përgjigj duke e quajtur Romneyn “humbës” dhe “kandidat të dështuar”.

Megjithëkëtë, Romney i telefonoi Trumpit javën e kaluar për ta uruar për fitoren e befasishme.

Presidenti i SHBA-së, Barack Obama, e bëri në Amerikën Latine atë që provoi ta bënte në Evropë; iu tha qytetarëve të shqetësuar që të mos nxjerrin përfundime negative për njeriun që dikur e kishte cilësuar si të paaftë për të shërbyer në Shtëpinë e Bardhë, presidentin e zgjedhur Donal Trump.

Në ndalesën e fundit lamtumirëse të turit ndërkombëtar, që përfshiu Greqinë dhe Gjermaninë, Obama vazhdoi përpjekjen e tij për t’i zbutur ankthet që kur afaristi republikan, Trump, mundi rivalen demokrate, Hillary Clinton, ish- sekretare e Shtetit, në garën presidenicale

“Porosia ime për ju… dhe porosia që e kam dërguar në Evropë është: mos paragjykoni më të keqen“, i tha Obama një grupi të të rinjve gjatë një sesioni të pyetje-përgjigjeve, në Peru.

“Prisni deri sa të vendoset administrata: ajo aktualisht po i bën bashkë politikat e saj dhe pastaj mund të gjykoni nëse është në përputhje me interesat e bashkësisë ndërkombëtare për të jetuar në paqe dhe në pëparim bashkërisht”, njofton AP.

Trump i fitoi zgjedhjet pasi premtoi të ndërtonte një mur në kufirin e SHBA-së me Meksikën, të kthejë prapa marrëveshjet tregtare dhe të ndalojë përkohësisht hyrjen e myslimanëve në SHBA.

Obama provoi të zbuste frikën duke u zotuar për një bartje të qetë të pushtetit dhe duke shprehur optimizmin se presidenti i zgjedhur do të largohet nga retorika e ashpër e fushatës kur të përballet me realitetin e detyrës.

“Është me rëndësi për secilin në botë që të mos bëjë gjykime të menjëhershme por t’i japë presdentit të zgjedhur një shans që ta bëjë ekipin e tij bashkë, të vlerësojë çështjet, të përcaktojë politikat, sepse siç e kam thënë gjithnjë: fushata nuk është gjithmonë e njëjtë me atë se si qeveriset”, tha Obama.

Ndërkohë, në SHBA, presidenti i zgjedhur Donald Trump, ka takuar Mitt Romneyn, një ish-kandidat republikan për president të SHBA-së, që ka humbur më 2012 në garë me Barack Obamën, dhe që ndërkohë ka qenë kritik edhe i fushatës së Trump.

Por, Trump nuk zbuloi asnjë emërim në fillim të fundjavës – dhe as nuk la të kuptohet nëse Romney do të mund të luante ndonjë rol në administratën e re, shkruan Reuters.

Romney është përfolur edhe për mundësinë që të jetë sekretar i Shtetit në administratën Trump

Presidenti i zgjedhur, ndërkaq, të dielën do të takojë edhe guvernatorin e New Jersey, Chris Christie, ish-kryebashkiakun e New Yorkut, Rudy Giuliani, dhe sekretarin e shtetit të Kanzas, Kris Kobach. (REL)

I zgjedhuri i presidentit të zgjedhur të SHBA-së, Donald Trump, për këshilltar të sigurisë kombëtare ka sugjeruar se Washingtoni duhet të përmirësojë marrëdhëniet e tij me Turqinë, duke ekstraduar një klerik të cilin Ankaraja e akuzon për përpjekje të grusht shtetit në muajin korrik.

Gjenerallejtënanti i pensionuar, Michael Flynn, ish-drejtor i Agjencisë së Inteligjencës, emërimi i të cilit u njoftua të premten, e përshkroi Fetullah Gylenin, në faqen e tij të blogut në gazetën The Till si një “mullah Islamik në hije që banon në Pennsylvania”, i cili “fsheh një agjendë radikale islamike”.

“Rrjeti global i Gylenit ka që të gjitha shenjat që përmbajnë përshkrimet për një rrjet të fjetur të rrezikshëm të terrorit. Nga pikëpamja e Turqisë, Washingtoni po e mban një Osama bin Laden të Turqisë” ka shkruar Flynn në ditën e zgjedhje. “Ne nuk duhet t’i ofrojmë atij një bazë të sigurt”.

Flynn ka thënë se ithtarët e Gylenit ishin donatorë të Fondacionit Clinton, një bamirësi globale që udhëhiqet nga familja e rivales demokrate të Trumpit, Hillary Clinton.

“Ka ardhur koha që ta shohim më mirë rëndësinë e Turqisë” ka shkruar ai. “Na duhet ta përshtatim politikën tonë të jashtme për ta pranuar Turqinë si prioritet. Ne duhet ta shohim botën nga perspektiva e Turqisë”.

Pas komenteve të Flynn, presidenti i Turqisë, Recep Tayyip Erdogan e ka cilësuar fitoren e Trump “si një epokë të re” të marrëdhënieve të Ankarasë me Washingtonin dhe ka shtuar kërkesën për ekstradimin e menjëhershëm të Gylenit, që prej zgjedhjeve të 8 nëntorit

Administrata Obama ka deklaruar se do t’ia lë Departamentit të Drejtësisë të vendos nëse ka baza ligjore për të përmbushur kërkesën e Turqisë për ekstradim, në një process që sipas gjasave është i gjatë dhe burokratik, dhe që ka frustruar Erdoganin.

Gylen asnjëherë nuk ka qenë i akuzuar për krime në SHBA dhe vazhdimisht ka kundërshtuar terrorizmin si dhe grusht shtetin e dështuar në Turqi, siç kanë bërë edhe shkollat dhe organizatat e bamirësisë të afërta me të.

Një avokat i Gylenit, Jason Weinstein i ka cilësuar komentet e Flynnit për Gylenin “shqetësuese” por ka shprehur besimin se SHBA-ja do të vazhdojë ta trajtojë këtë çështje në mënyrë të drejtë.

“Shpresojmë dhe presim që ligji të zbatohet dhe që politika të mos ndërhyjë në gjykimin e zyrtarëve të karrierës (Departamenti i Drejtësisë). Nëse zbatohet ligji, atëherë kemi besim se zoti Gylen nuk do të kthehet në Truqi, ku me siguri do të shndërrohet në objekt torture, të një gjykimi të padrejtë dhe ekzekutimit”, tha Weinstein.

Media ameriakane njofton se presidenti i zgjedhur Donald Trump ka zgjedhur Senatorin republikan nga Alabama, Jeff Sessions për postin e Prokurorit të Përgjithshëm.

Ekipi i tranzicionit presidencial nuk e ka konfirmuar njoftimin, por shumë grupe mediatike citojnë burime në kushte anonimiteti që janë në dieni të emërimit. Nuk është e qartë nëse Senatorit Sessions i është bërë zyrtarisht oferta nga zoti Trump. Senatori ka qenë që herët një ndër mbështetësit e Donald Trumpit.

69-vjeçari nga Alabama ka qenë senator që në 1997 dhe më parë ka qenë prokuror në shtetin e tij. Prokurori i Përgjithshëm është autoriteti më i lartë për zbatimin e ligjit në Shtetet e Bashkuara. Ai është kreu i Departamentit të Drejtësisë.

Ndërkaq, një zyrtar i lartë i ekipit të zotit Trump thotë se presidenti i zgjedhur i ka ofruar Lejtnant Gjeneralit në pension Michael Flynn postin e këshilltarit të sigurisë kombëtare, por ende nuk është bërë një njoftim zyrtar. Flynn ka kryesuar më parë Shërbimin e Zbulimit brenda Departamentit të Drejtësisë.

Presidenti i zgjedhur amerikan, Donald Trumpi, i ka ofruar ish-shefit të inteligjencës ushtarake, Michael Flynn, postin e këshilltarit për siguri kombëtare, kanë raportuar mbrëmë mediat amerikane.

Derisa nuk ka pasur njoftime se a e ka pranuar Flynn këtë ofertë, agjencia Reuters e ka cituar një zyrtar të lartë të zotit Trump, që ka thënë se “kur presidenti i Shteteve të Bashkuara kërkon nga ju që të shërbeni, ekziston vetëm një përgjigje”.

Zoti Flynn ka shërbyer në dy vite të trazuara si drejtor i Agjencisë së inteligjencës ushtarake në administratën Barack Obama, para se të largohej në vitin 2014 dhe të shndërrohej në kritik udhëheqës të politikave të jashtme të Obamës.

Zoti Flynn është veçanërisht kritik ndaj qasjes së Obamës për luftën kundër grupit ekstremist, Shteti Islamik, duke argumentuar se Shtetet e Bashkuara janë më pak së sigurta nga terrorizmi sot, se që ishin para sulmeve terroriste të 11 shtatorit të vitit 2001.

Pas rreth 2 muajsh Donald Trump do të jetë zyrtarisht presidenti i 45-të i Shteteve të Bashkuara. Një nga sfidat kyçe të tij do të jetë balacimi i premtimeve të bëra në fushatë mbështetësve tij me nevojën për të shëruar plagë që u hapën dhe shqetësuan mjaft amerikanë pikërisht për shkak të kësaj retorike. Analistët thonë se emrat që zoti Trump do të zgjedhë për kabinetin e tij do të tregojnë shumë se çfarë tonesh kërkon t’i japë ai qeverisjes.

Fitorja impresionuese e Donald Trumpit u duket ende një ëndërr disa prej mbështetësve të tij dhe ai menjëherë përcolli një mesazh pajtimi në fjalimin e tij të fitores.

“Mendoj se ka ardhur koha që të bashkohemi” – tha Donald Trump .

Por fitorja e zotit Trump u zbeh prej protestave nga Oregoni dhe Kalifornia në perëndim, në qytetin e ti, në Nju Jork dhe Masaçuset në lindje.

“Jam i zhgënjyer, por ky më tremb” thotë një nga pjesmarrësit në protestat kundër presidentit të zgjedhur.

Pas zgjedhjeve janë shënuar disa incidente që kanë patur në shënjestër pakicat dhe myslimanët, diçka rreth së cilës zoti Trump u pyet gjatë emisionit “60 Minuta” të rrjetit CBS.

“ Më trishton të dëgjoj një gjë të tillë, ndaj them ndalni, nëse ndihmon”-tha Donald Trump.

Tejkalimi i ndarjes politike është shqetësim edhe për presidentin Barak Obama.

“Është shumë e rëndësishme të përpiqemi të shpërndajmë mesazhe bashkimi, të mbrrijmë me to tek grupet e pakicave, gratë apo tek të tjerët që u shqetësuan nga përmbatja e fushatës”- tha presidenti Obama

Politika u trazua sërisht pasi zoti Trump nisi përzgjedhjen e qeverisë së tij, përfshi kryetarin e partisë republikane Reince Priebus si shefin e kabinetit dhe Stephen Bannon si këshilltarin e tij kryesor, një gazetar i diskutueshëm, I identifikuar me krahun e djathtë ekstrem.

Prova kryesore e Trumpit është përzgjedhja e ekipit qeverisës thotë John Fortier i qëndrës së politikave mbipartiake.

“Proçesi i përzgjedhjes së stafit është shumë i rëndësishëm në Shtetet e Bashkuara dhe si një kandidat që vjen nga jashtë politikës, ai nuk ka lidhjet tradicionale dhe njerëzit e duhur që një administrate duhet të ketë”.

Por aftësia e zotit Trump për të inkurajuar shërimin e kombit ka më shumë të bëjë me tonin e retorikës së tij, thotë Molly Reynolds e institutit “Brookings”.

“Kemi ndjesinë e Trumpit që kemi parë në fushatë dhe kemi një version të zbehtë të Trumpit që vjen kohë pas kohe. Dhe pyetja është nëse ajo formë e tij që pamë gjatë fushatës elektorale do të shfaqet sërisht kur ai të jetë në krye të Shtëpisë së Bardhë. Këtë nuk dimë!”

Në javët që vijnë pritet që zoti Trump të bëjë publike emrat e kabinetit të tij. Ata që ai do të të përzgjedhë do të nënvizojnë edhe tonin që do të përdorë si president i ardhshëm.

Rreth një mijë gjimnazistë nga kryeqyteti amerikan dhe zonat përreth braktisën mësimin për të zhvilluar një marshim në qytet të martën me nota proteste kundër presidentit të sapo zgjedhur Donald Trump.

Një klub i të drejtave të njeriut nga Shkolla e Mesme “Woodrow Wilson” i lajmëroi nxënësit përmes medias sociale dhe u dërgoi email prindërve lidhur me synimet për të organizuar protestën. Lakita Porchia është nëna e një studenti protestues.

“Kur fola me tim bir ai më sqaroi se donte të tregonte unitet me shokët e tij dhe se nuk i besonte prentendimet e zotit Trump.”

Disa studentë kishin veshur bluza me mbishkrimin “grua e ulët”, një referencë ndaj komentit që zoti Trump bëri për kundërshtaren demokrate Hillary Clinton.

Edhe pse këta studentë nuk mund të votojnë, ata dëshironin të shprehnin qëndrimin e tyre ndaj presidentit të zgjedhur. Matt Floid është njëri prej tyre.

“Kjo do të thotë unitet dhe e kemi shprehur zëshëm qëkur u mblodhëm. Në një mënyrë duhet të reagojmë ndaj retorikës, nuk mund të kemi një vend ku retorika e mbushur me urrejtje pranohet nga shoqëria. Kjo është qesharake.”

Në mbarë vendin janë zhvilluar protesta masive të përditshme, që nga fitorja e zotit Trump ndaj zonjës Clitnon. Por tani, grupe aktivistësh po hartojnë planet për një protestë ditën që zoti Trump do të bëjë betimin.

Mbi 80 mijë njerëz kanë nënshkruar në Facebook për të marrë jesë në Marshimin e Grave në Uashington me 21 janar.

Në një intervistë televizive të transmetuar të dielën, zoti Trump tha se amerikanët nuk kanë pse të frikësohen nga presidenca e tij.

Të premten ai shkroi në Twitter se i pëlqen fakti që ka grupe të vogla që kanë pasion për vendin dhe parashikoi se “ne të gjithë do të jemi të bashkuar dhe krenarë”.

Dhoma Përfaqësuese e Shteteve të Bashkuara pothuajse unanimisht e ka miratuar legjislacionin dypartiak për ripërtritjen e sanksioneve kundër Iranit dhe imponimin e sanksioneve të reja kundër mbështetësve të presidentit të Sirisë, Bashar al-Assad.

Ky legjislacion, që është miratuar me 419 vota për dhe 1 kundër, tregon mbështetje të gjërë në Kapitoll Hill për mbajtjen e presionit ekonomik ndaj Teheranit dhe ndëshkimin e mbështetësve të qeverisë së Sirisë.

Ky legjislacion ishte sponzorizuar nga kryesuesi republikan i Komitetit të punëve të jashtme, Ed Royce, dhe demokrati më i lartë në këtë komitet, Eliot Engel.

Tash ky legjislacion duhet të diskutohet në Senat, para se t’i dërgohet presidentit, Barack Obama, për nënshkrim.

Ish kryetari i New Yorkut, Rudolph Giuliani është ndër kandidatët kryesor për sekretar të shtetit në adminstratën e Donald Trump, thanë zyratrë të Trumpit më 14 nëntor.

Giuliani ishte këshilltari kryesor dhe më avokuesi më i zëshëm për Trumpin gjatë fushatës kundër demokrates Hillary Clinton.

Duke folur në një ngjarje të Wall Street Journal në Washington, Giuliani hodhi poshtë mundësinë që të bëhet prokuror i përgjithshëm i Trump – një punë për të cilën ish prokurori federal është parë si kandidati kryesor

Ai tha se mendon që John Bolton, ish ambassador i SHBA-së në OKB, “do të ishte një zgjedhje shumë e mirë” për sekretar të shtetit. Por I pyetur nëse ishte dikush tjetër më i mirë, ai u përgjigj me një buzëqeshje: “ Ndoshta unë, nuk e di’.

Inaugurimi i Trump bëhet brenda 66 ditësh dhe presidenti i zgjedhur është i përqëndruar në ndërtimin e ekipit dhe për të biseduar me udhëheqës të jashtëm.(REL)

Përveç Gulianit dhe Bolton,kryetari i Dhomës së Përfaqësuesva, Njut Gingrich gjithashtu është emëruar si një [prej kandidatëve kryesorë për një punë diplomatike.

Mijëra studentë kanë lënë orët e mësimit për të protestuar kundër presidentit të zgjedhur të SHBA-së, Donald Trump, duke vazhduar protestat edhe në javën e dytë.

Rajoni i Los Angeles-it numëroi rreth 4 mijë studentë pjesëmarrës në protestë, që brohoritën “JO Presidenti im”, për shkak të planeve të Trumpit për të dëbuar imigrantët e paligjshëm dhe pë rtë ndërtuar murin ndërmjet SHBA-së dhe Meksikës.

Zyrtarët e arsimit në Seattle thanë se rreth 5 mijë studentë të shkollave të larta dhe nxënës të shkollave të mesme, rreth 10 për qind e studentëve të këtij distrikti, dolën në rrugë.

Qindra studentë të tjerë, marshuan në protestë në Portland, Oregon, Montgomery County, Maryland, Denver dhe në rajonin e San Franciscos, thanë autoritetet.

Dhjetëra mijëra njerëz marshuan në qytete nga Neë Yorku deri në Los Angeles në taubimet përgjithësisht paqesore që prej fitores së Trump ndaj demokrates Hillary Clinton, më 8 Nëntor. Trump siguroi vota të mjaftueshme në Kolegjin Zgjedhor prej 538 anëtarëve për të fituar presidencëm.

Protestuesit kanë dënuar sulmet ndaj grave që bartin shami të kokës, grafitet raciste dhe ngacmimin e fëijëve imigrantë.

Trump në një intervistë në CBS tha se ishte “i mërzitur” me incidentet e tilla dhe ju bëri thirrje kryesve të akteve të tilla “të ndalojnë”.